Blog

Edi Rama po konfirmon çdo ditë se është i zhytur në një nga aferat më të mëdha me pasurinë kombëtare, siç është rasti i Skavicës.

Refuzimi i transparencës prej tij, vërteton se Rama e ka paracaktuar fituesin, pas bisedimeve sekrete dhe ta paligjshme që ka mbajtur në Turqi.

Edi Rama nuk përgjigjet, nëse kompania që ai ka vendosur ti japë Skavicën, me pazare të fshehta, pa garë e transparencë, është apo jo në listën e zezë, për shkak të veprimtarisë së saj të mëparshme, e shpallur si e tillë nga autoritetet turke e ndërkombëtare?

Edi Rama nuk përgjigjet, se përse kompania që ai ka takuar fshehtas e shpall vendimin që e ka fituar koncesionin, përpara se ta shpallë qeveria.

Edi Rama nuk përgjigjet, pse e mbajti të fshehtë vendimin dhe u detyrua ta publikojë atë dy javë më pas, prej denoncimeve të opozitës.

Edi Rama nuk përgjigjet, sa herë ka udhëtuar në Turqi ministri i tij Ahmetaj, dhe a ka bërë negociata sekrete e të paligjshme me kompaninë.

Edi Rama nuk përgjigjet; a ka pasur kompani të tjera të interesuara për projektin Skavica dhe pse i dha bonusin maksimal kompanisë me të cilën bëri negociata sekrete.

Koha e gënjeshtrave dhe propagandës ka mbaruar.

Edi Rama, kryeministri më i korruptuar në Ballkan, që ka nxjerrë në pazar pasuritë publike e shpërndan koncesionet sipas interesave të tij, do të japë përgjigje e do të mbajë përgjegjësi për të gjitha zullumet e tij.

Deklarata për mediat e sekretares së Marrëdhënieve me Publikun, Grida Duma, 11 Janar 2016

Sipas axhendës së rënë dakord dje, sot grupi i ekspertëve për Reformën në Drejtësi u mblodh në Kryesinë e Kuvendit për të draftuar rekomandimet e Komisionit të Venecias mbi amendamentet kushtetuese.

Pika e parë e diskutimit ishte reflektimi i rekomandimit të Komisionit të Venecias mbi nevojën e eleminimit të kapjes politike të sistemit të drejtesisë, sipas një propozimi konkret kompromisi të ofruar në përputhje me të nga ekspertët e Partisë Demokratike. Edhe pse dje në mbrëmje u ra dakord parimisht për të reflektuar rekomandimin nr. 55 të Komisionit të Venecias dhe që propozimi i ekspertëve të Partisë Demokratike do të shqyrtohej me kujdes, sot  që në fillim të mbledhjes, pa asnjë argument, ekspertët e caktuar nga mazhoranca refuzuan ta analizonin këtë propozim, duke treguar vendosmërinë e tyre për të mos marrë në vlerësim asnjë alternativë që siguron moskapjen politike të sistemit të drejtesisë, pavaresisht qendrimit të prerë të mbajtur nga Komisioni i Venecias mbi këtë çështje.

Duke parë vendosmërinë e ekspertëve të mazhorancës për të mosreflektuar rekomandimet e Komisionit të Venecias, si dhe mos vlerësimin e mundësive për zgjidhje të mundshme kompromisi dhe të përbashkëta, ekspertët e Partisë Demokratike u ndodhen në pamundësi për të vijuar diskutimet në një mbledhje të përbashkët, që nuk ofron asnjë mundësi për zgjidhje të përbashkëta.

Njoftim për shtyp i Partisë Demokratike, 10 Janar 2016

Qytetarët po vazhdojnë të vuajnë pasojat e përmbytjeve dhe ndërkohë që reshje të reja kanë nisur, qeveria nuk ndërhyn dhe nuk jep zgjidhjet që i takojnë asaj.

E rëndë mbetet situata sidomos në Shijak dhe Lushnje dhe në fshatrat e këtyre zonave.

Janë shembur 2 ura në Shkumbin duke izoluar rreth 6 mijë banorë në fshatrat Gryksh i Madh, Shezë, Trash dhe Petisht.

Banorët në Katund dhe në Sukth janë ende pa kushtet minimale, pa ushqim, e orendi, dhe janë shprehur para medias se askush nga qeveria nuk ka shkuar ti takojë.

Por kudo nga Veriu në Jug, ka ndërprerje energjie, dëmtime rrugësh, dhe fshatra të tërë të izoluar e me mungesa bazike në ujë dhe ushqime.

Megjithë nevojën që kanë qytetarët për ndërhyrje urgjente, Edi Rama vazhdon me konvalishencën e tij nën efektet e pushimeve luksoze në Majemi.

Pasi ka zhdukur tre herë në prag të tre dimrave rreth 12 milionë dollarë të destinuara për kanalizimet, Edi Rama refuzon të marrë masa e të vlerësojë me seriozitet zonat e përmbytura, pasurinë e dëmtuar të mijëra familjeve.

Ky është viti i tretë që Edi Rama jo vetëm është përgjegjës për përmbytjet, duke hequr fondet për kanalizimet e duke i dhënë si pako dhuratë për klientelën e tij, por nuk mban asnjë përgjegjësi edhe pasi përmbytjet ndodhin.

Ai shfaqet gjithnjë pasi del dielli, ose pasi kthehet prej pushimeve duke fajësuar të tjerët.

Kjo arrogancë dhe pashpirtësi e Edi Ramës, do të marrë përgjigjen e merituar nga qytetarët, nga banorët e tradhëtuar e të lënë në mëshirë të fatit prej tij.

Deklarata për mediat e anëtares së Këshillit Kombëtar, Reila Bozdo, 10 Janar 2016

Skavica është ndoshta projekti me korruptiv dhe pazari më i dyshimtë i Edi Ramës me pasuritë publike.

I kapur në këtë aferë, Edi Rama vazhdon të refuzojë transparencën, ashtu siç e nisi këtë histori me bisedime të fshehta e sekrete.

Partia Demokratike e paralajmëroi këtë aferë të dyshimtë me 29 prill të vitit të kaluar, por qeveria e mohoi. Në fund të vitit, qeveria e pranoi, madje si arritje të sajën;

Arben Ahmetaj u shpreh nw televizion: ”Më thoni një emër që është larguar?! Ju them unë një që ka ardhur. Skavica. Suzer & Nurol Group”.

Edi Rama refuzon të përgjigjet, por pyetjet që kanë qytetarët dhe opioni publik mbeten;

-1 A ka bërë ai negociata të fshehta e të paligjshme me kompaninë Suzer?

-2 Pse u mbajt sekret propozimi i Suzer dhe vlerësimi i saj me bonus?

-3 Pse vendimi i qeverisë për Suzer nuk u publikua bashkë me vendimet e tjera të datës 23 dhjetor, por vetëm pasi denoncoi opozita?

-4 Sa herë e ka vizituar Turqinë në dy vitet e fundit ministri Ahmetaj, dhe me çfarë qëllimesh?

Edi Rama refuzon të përgjigjet, por ai do të marrë përgjigjen e merituar nga qytetarët për aferat e tij korruptive me pasuritë publike.

Deklarata për mediat e Sekretares së Marrdhënieve me Publikun, Grida Duma, 10 Janar 2016

Skavica, projekti më i madh energjetik në vend, është gjithashtu një nga pazaret dhe aktet korruptive më të mëdha të Edi Ramës.

Partia Demokratike e denoncoi këtë aferë të Edi Ramës, ditën kur ai shkoi në Turqi dhe bëri bisedimet private, sekrete.

Atëkohë, qeveria e mohoi, por më vonë, Arben Ahmetaj e pranoi në ekran aferën e Ramës, me krenari madje si bum investimi.

Arben Ahmetaj në ekran;

Janë disa pyetje që kanë sot qytetarët dhe opinioni publik;

Kur qeveria e mori vendimin me 23 dhjetor, tia japë skavicën firmës turke, pa garë, pa transparencë, përse e mbajti të fshehur dhe e shpalli me 7 janar?

Kush janë zyrtarët e tjerë të qeverisë, që kanë vijuar negociatat sekrete të Edi Ramës me kompaninë turke?

Përse vendimin e shpall kompania turke, përpara se sa ta bëjë publike qeveria shqiptare?

Dhe, a është firma e përzgjedhur nga Edi Rama, në listën e zezë për shkak të aktiviteteve të saj të dyshimta, e shpallur si e tillë nga autoritetet turke dhe ndërkombëtare?

Partia Demokratike do të bëjë transparencë deri në fund, për një nga pazaret më të mëdha të Edi Ramës me pasurinë e vendit.

Shqiptarët meritojnë transparencë, dhe Edi Ramës e pazareve të tij kanë për ti dhënë përgjigjen e merituar.

Deklarata për mediat e Sekretares për Marrëdhëniet me Publikun, Grida Duma, 9 Janar 2016

Garancitë për jetën, garancitë për sigurinë, për rendin, kanë rënë në Shqipëri në mënyrë dramatike si asnjëherë tjetër.

Pak minuta më parë, në mes të ditës, në mes të Tiranës, një 39 vjeçar u mor peng në prani të fëmijës së tij të mitur.

Dje u ekzekutua në mënyrë mafioze një 44 vjeçar në Fier.

Një person i pajetë u gjet sot në Klos.

Kjo është kronika e 24 orëve të fundit.

Ndërkohë që bilanci i këtyre 9 ditëve është tronditës, 21 viktima në vrasje dhe në aksidente.

Ky është sundimi i krimit, i bandave, i trafikantëve.

Këto janë ditët më të mira për mafian, sepse mafia ka njeriun e vet në qeveri, mafia ka Saimir Tahirin në krye të Ministrisë së Brendshme.

Larje hesapesh, ekzekutime mafioze tipike të karteleve të drogës, rrëmbime personash në mes të qytetit.

Këto krime tronditëse janë kthyer në zhvillime të përditshme.

Dhe çdo ditë mund të ndodhin shpërthime të tilla kriminale, sa kohë që nxitësi kryesor i krimit, i trafikut të drogës, i paligjshmërisë, i paprekshmërisë së bandave kryesore, është Saimir Tahiri.

Me Saimir Tahirin është legalizuar trafiku i drogës në vend, është legalizuar aktiviteti kriminal i bandave të lidhura me të.

Dhe krimi sjell krim, një cikël që po zmadhohet çdo ditë e më shumë.

Partia Demokratike i kërkon Policisë së Shtetit, pjesës me integritet të burrave dhe grave me uniformë, të mos e lënë vendin në greminën ku po e çon Saimir Tahiri dhe Edi Rama. Të zbatojnë ligjin e të luftojnë krimin, sepse dita e ndarjes së krimit nga shteti, dita e largimit të Tahirit dhe shefit të tij nuk është e largët.

Deklarata për mediat e anëtarit të Këshillit Kombëtar, Ervin Salianji, 9 Janar 2016

Pyetje: Z.Basha kemi të reja mbi qëndrimin e ekspertëve demokratë mbi reformën në drejtësi dhe politikisht nga Partia Demokratike?

Basha: Partia Demokratike është zotuar publikisht për zbatimin 100% të rekomandimeve të Venecias. E kam bërë këtu para jush këtë zotim dhe e përsëris edhe sot. Kam bërë një ftesë publike dhe e përsëris edhe sot për Edi Ramën dhe Ilir Metën që të punojmë mbi rekomandimet e Komisionit të Venecias si udhërrëfyesi i vetëm për Reformën në Drejtësi.

Fatkeqësisht që nga ky moment ka patur vetëm retorikë dhe asnjë veprim pozitiv në këtë drejtim, përkundrazi ka patur veprime që bien ndesh me rekomandimet e Komisionit të Venecias dhe zotimin publik të mazhorancës për të punuar së bashku me opozitën për një draft të ri. E kam fjalën për draftin parafabrikat të 29 dhjetorit, një përpjekje tinzare, hileqare e Edi Ramës që në vend të përqafimit të rekomandimeve të Venecias, kërkon të bëjë “ Bypass”-in e rekomandimeve të Venecias.

Pavarësisht kësaj përpjekje, ekspertët tanë kanë vazhduar punën në tryezën e ekspertëve duke kërkuar që tryeza e ekspertëve të reflektojë rekomandimet e Komisionit të Venecias.

Më 4 janar tryeza ra dakord dhe tha se nuk ka draft tjetër, por ndërkohë përsëri në mënyrë tinëzare dhe hileqare ka shpërndarë një draft që në fakt është parafabrikati i 29 dhjetorit. Në këto kushte pyetja e vetme të cilës duhet t’i japë përgjigje Edi Rama është: Po Venecias apo Jo Venecias?

Nëse Po Venecias, hapi i parë që duhet hedhur është publikisht të mohojë ekzistencën e një drafti paralel. Ai mund të jetë drafti i PS, draft i Fatmir Xhafës apo draft i Departamentit të Drejtësisë në Partinë Socialiste por nuk është dhe nuk mund të jetë kurrë një produkt konsensual.

Hapi i dytë është të lexojmë sëbashku konkluzionet e Venecias.

Hapi i tretë është të punojmë mbi një dhe një draft të vetëm, në kushte barazie të ekspertëve tanë dhe ekspertëve të Edi Ramës, Sokol Sadushit, Gent Ibrahimit, Aurela Anastasit dhe çfarëdo ekspertësh të tjerë që janë të angazhuar dhe që deri tani janë mbajtur të fshehtë por në fakt janë për ne sot e gjithë ditën, siç kanë qenë këto muaj ekspertët e Edi Ramës, të cilët i mirëpresim.

Këta janë ekspertët tanë, unë nuk e fsheh, dal para tyre dhe jo pas tyre për t’ju shprehur këtë vullnet tonin. Asgjë më pak se rekomandimet e Venecias nuk është e pranueshme për Partinë Demokratike, nuk kërkojmë asgjë më shumë se zbatimin e rekomandimeve të Venecias.

Pyetje: Kryetari i Kuvendit bëri thirrje sot PD dhe juve sigurisht që ekspertët të kthehen në tryezën e dialogut, negociatave ndoshta në tryezën e PD dhe të gjitha palëve për reformën në drejtësi dhe më pas t’i lihet vend edhe tryezave politike. Z. Basha ndoshta është kjo një zgjidhje për të gjetur reformën?

Basha: S’ka rëndësi të bëjmë shumë tryeza  se ne nuk jemi palloj, ne jemi politikane marrim vendime apo jo . Unë e kam marrë vendimin, rekomandimet e Venecias janë udhërrëfyesi ynë. Të zbatojmë rekomandimet e Venecias, të udhëzojë ekspertët e tij që të zbatojnë rekomandimet e Venecias siç kam udhëzuar unë ekspertët tanë të zbatojnë rekomandimet e Venecias. Kaq është!

Pyetje: Z.Basha, Presidenti ka bërë thirrje për një tryezë politike, jeni ju për një takim mes jush –z.Rama-z.Meta për t’i zgjidhur çështjet delikate?

Basha: Unë mirëpres çdo iniciativë të institucionit të Presidentit të Republikës për të ndihmuar në transparencën e procesit, për të parë qartë se kush ka vullnet dhe kush jo. Dua të përsëris edhe një herë që PD ka vullnet të çeliktë për reformën në drejtësi, sikundër ka vullnet të çeliktë për të mos lejuar kapjen politike të drejtësisë.

Pyetje: Keni komunikuar me ambasadorin Lu, apo keni patur takime me diplomatë?

Basha: Jam në kontakt të vazhdueshëm. Faleminderit!

Prononcimi për mediat i kryetarit të Partisë Demokratike, Lulzim basha, 8 Janar 2016

Pas çdo toke të përmbytur, pas çdo prodhimi të çuar dëm, pas çdo shtëpie e pasurie të mbuluar nga uji, qendron papërgjegjshmëria dhe politika korruptive e Edi Ramës.

Me dorën e tij, Edi Rama ka hequr çdo vit miliona dollarë fonde të destinuara për kanalizimet, për ti dërguar si pako dhurata për miqtë e klientët e tij, për luksin e tij dhe shpenzimet qeveritare.

Çdo banor i Bregut të Matit, i Torovicës, i Ishmit, i Sukthit, i Shijakut, i Çermës, çdo banor i Rrrogozhinës, fshatrave të Elbasanit, të Lushnjës, Fierit, Dibrës, çdo i përmbytur këto ditë nga Veriu në Jug, duhet ta dijë se fatkeqësia natyrore nuk do të ishte kaq dramatike nëse nuk do të ekzistonte fatkeqësia tjetër më e rëndë, që quhet Edi Rama.

Asnjë punim në kanalizime nuk është bërë, edhe pse përvoja e afërt tregon se shirat sjellin përmbytje, edhe pse dihet se sezoni i reshjeve ishte në prag.

Fondet për këto punime të domosdoshme në infrastrukturë janë dërguar nga Edi Rama në drejtim të interesave të tij klienteliste.

Sapo erdhi në pushtet, Edi Rama hoqi 2.5 milionë dollarë për kanalizimet, ose 30 përqind të gjithë fondit.

Në shtator të vitit 2014, pikërisht para sezonit të reshjeve, Edi Rama hoqi 4.9 milionë dollarë për kanalizimet, ose e shkurtoi fondin me 40 përqind.

Në fund të vitit që kaloi, zhduku sërish 4.2 milionë dollarë që ishin të destinuara për kanalizimet.

Ndërkohë që në fushatë, Edi Rama premtoi se asnjë pëllëmbë toke nuk do të përmbytej më dhe tha se do të investonte 160 milionë dollarë për kanalizimet.

Me të gjitha aktet e tij, ka treguar se është bashkautor i përmbytjeve dramatike.

Dhe është shfaqur gjithnjë pasi ka dalë dielli, ose pasi është kthyer prej pushimeve luksoze.

Kjo arrogancë e kjo pacipësi, kjo shpërfillje e poshtërim i shqiptarëve nuk thahet dot dhe nuk mbulohet dot, ajo meriton e do të marrë përgjigjen e merituar nga qytetarët.

Deklarata për mediat e deputetit, Luciano Boçi, 8 Janar 2016

Gjendja në Veri nga përmbytjet është e rëndë, ndërkohë që konstatohet mungesa totale e strukturave qeveritare.

Deputetja e Qarkut të Kukësit Mimoza Hajdarmataj ishte në Domaj të Hasit, ku si pasojë e rreshjeve të mëdha, Gura e fshatit ka përmbytur shtepitë dhe po rrezikon jetën e dhjetra familjeve.

Banorët mes të cilëve të moshuar dhe fëmijë gjenden të izoluar në pamundësi për furnizime me ushqime dhe ilaçe. Asnjë ndihmë apo ushqime për bagëtitë nuk është dhënë nga Emergjencat civile apo strukturat e tjera shtetërore,  në këto zona tejet te  izoluara, me distanca të largëta nga Kukesi,   me infrastrukturë të amortizuar dhe pa asnjë shërbim publik.

Deputetja Hajdarmataj në takimet me banorët e shtëpive të përmbytura tha se është e patolerueshme që qeveria në këtë emergjencë nuk mbështet as banorët por dhe vetë pushtetin lokal, ku janë përfaqësues të PS. “Këtu nuk ndihet as edhe një moment shteti, emergjencat civile,  jetët njerëzore dhe çdo gje janë lënë në mëshirën e fatit. Kryeministri qe erdhi nga pushimet dhe ministrat nuk mund të analizojnë emergjencën e përmbytjeve vetëm nga qendra e Shqiperisë e të shpërfillin  Veriun dhe Jugun me arrogancë”, tha Hajdarmataj.

Banorët  i thanë deputetes Hajdarmataj se të tilla përmbytje nuk kanë ndodhur prej mëse gjysëm shekulli dhe se ata rrezikohen nga ora në orë nga mungesa e ndërhyrjes.

Kryetari i Partisë Demokratike, Lulzim Basha ka inspektuar situatën në zonën e Çermës ku Shkumbini ka çarë argjinaturën dhe mbi 150 familje janë përmbytur gjatë pasdites. Dhjetëra metra kub ujë për sekondë vërshojnë përmes çarjes duke zgjeruar njollën e përmbytjes. Banorët thonë se nuk është marrë asnjë masë për mbylljen e çarjës ndërsa situata po përkeqësohet edhe më tej

Basha: A kanë sjellë inerte për ta mbyllur?

Banorë: Asgjë, helikopteri është ul atje,  rri aty. Si duket japin intervista dhe ja popullin ku e ke, nën ujë. Ne 76 jemi mbyt për herë të fundit.

Banorë: Mos shikoni vetëm Çermën, shikoni dhe fshatin Thanas më lart. Kemi nxjerrë lopët në 2 të natës përjashta dhe kush nuk vuri dorë, erdhën në mëngjes dhe ikën prap.

Banorë: Ca njerëz kanë lopët andej (në zonën nën ujë)  dhe po mbyten të gjitha.

Banorë: Shtëpitë nën ujë, ato të shtetit rrinë atje ja ku janë nuk bëjnë asgjë.

Situata është e vështirë në të gjithë vendi, tha zoti Basha, duke apeluar banorët të bashkëpunojnë me forcat e specializuara për të evituar çdo rrezik për jetët e njerëzve.