Blog

Edi Rama  gënjen. Letra të cilën i referohet nuk është asgjë tjetër vetëm kalimi i kërkesave të bëra nga Shoqata e Ndërtuesve për leje zhvillimore Ministrisë së Zhvillimit Urban. Kjo pasi me datë 22.08.2014 Edi Rama bllokon miratimin e PDV dhe lejeve, nga organet e pushtetit vendor në të gjithë territorin.  Në këto kushte Bashkia i kalon 30 kërkesat e Shoqatës së Ndërtuesve, Qeverisë. Asnjëra prej këtyre kërkesave nuk është marrë në shqyrtim dhe aq më pak miratuar nga Bashkia e Tiranës. Me datë 23.03.2015 Edi Rama si kryetar i KKT-së nga 30 kërkesat e Shoqatës së Ndërtuesve përzgjedh vetëm 6 prej  tyre, dhe në mungesë të akteve nënligjore i kërkon bashkisë t’i pajisë me leje ndërtimi. Me datë 21.05. 2015 Bashkia e Tiranës i kthen përgjigje KKT-së ku i argumenton se  vendimmarrja e saj është  në kundërshtim me ligjin. Më pas me një ndryshim në VKM Nr. 408, Edi Rama i jep kompetenca vetes së tij të japë leje ndërtimi brenda territorit të qyteteve, duke shkelur autonominë e pushtetit vendor.  Pas kësaj bën vendimin e KKT-së datë  09.09. 2015 ku i pajis me leje ndërtimi vetë 6 ndërtues prej 30 kërkesave të dërguar nga Shoqata e Ndërtuesve.

Çfarë ka ndodhur :

1. Bashkia e Tiranës nën drejtimin e Lulzim Bashës për ti dhënë fund klientelizmit në dhënien e lejeve të ndërtimit ka miratuar planin urbanistik, i pari që prej vitit 1989 si dhe planet e detajuara vendore.
2. Bashkia ka hartuar 30 PDV,  faza e parë ku nuk përcaktohet asnjë gjurmë ndërtimi, vetëm treguesit e zhvillimit dhe infrastruktura rrugore.
3. 22.08.2014 Edi Rama bllokon miratimin e PDV-ve dhe lejeve nga organet e pushtetit vendorë në të gjithë teritorin.
4. 01.10 2014 Edi Rama miraton ligjin e ri të planifikimit të territorit i cili shfuqizon ligjin nr. 10119 dhe të gjitha aktet nënligjore në fuqi, përfshirë VKM Nr. 502 që është rregullorja e urbanistikes, duke bllokuar procesin deri në daljen e akteve të reja nënligjore.
5. Në dhjetor 2014 Shoqata e Ndërtuesve sjell kërkesë në Bashki për të marrë në konsideratë projektet e hartuara prej tyre konform ligjit të vjetër.
6. 10.12 2014 Bashkia ia përcjell kërkesën e Shoqatës së Ndertuesve Ministrisë së Zhvillimit Urban Eglantina Gjermenit, pasi kërkesa e Shoqatës së Ndërtuesve nuk ishte më në kompetencë të bashkisë për shkak të shfuqizimit të ligjit të vjetër dhe mosmiratimit të akteve nënligjore të ligjit të ri.
7. Me 23.03.2015 Edi Rama si kryetar i KKT-së nga 30 kërkesat e Shoqatës së Ndërtuesve përzgjedh vetëm 6 prej tyre dhe në mungesë të akteve nënligjore i kërkon bashkisë t’i pajisë me leje ndërtimi.
8. Me 21.05.2015 Bashkia e Tiranës i kthen përgjigje KKT-së, ku i argumenton se  vendimmarrja e saj është në kundërshtim me ligjin.
9. Më pas me një ndryshim në VKM Nr.408 Edi Rama i jep kompetenca vetes së tij të japë leje ndërtimin brenda territorit të qyteteve duke shkelur autonominë e pushtetit vendor.
10. Pas kësaj bën vendimin e KKT-së datë 09.09. 2015 ku pajis me leje ndërtimi 6 ndërtues prej 30 qer kishte paraqitur shoqata e ndertuesve
    

    ---

    Njoftim për shtyp i Partisë Demokratike, 2 Nëntor 2015

Pasi u  lëshoi rrufetë e arrogancës dhe injorancës, pasi ua ka nxirrë  jetën të gjithëve dhe pasi ua ka mbyllur qepenat mijëra prej bizneseve, kryeministri i rrëzuar nga  gremina  e ekonomisë  dhe  mali i skandaleve të korrupsionit me tenderat publikë,  u kujdes  sot të  inskenonte një  komunikim  me përfaqësuesit e biznesit në një seminar të mbyllur.

Nuk dua të ndalem te ilariteti që shkaktoi përballja e tij me pyetje dhe probleme që nuk ja ka haberin. Që nuk u dha mundësi të shpaloseshin, sepse  brenda tyre gjendet e ngjizur revolta e sipërmarrjes së vogël dhe biznesit në tërësi me këtë qeveri dhe këtë kryeminister.

Do të ndalem te “sihariqi” që dha në përgjigje të njërës prej pyetjeve. Bandat e tatimoreve nuk do të shkojnë më  sa herë t’i teket të dhunojnë sipërmarresit  në  dinjitetin e tyre, siç po bën prej muajsh. Qeveria do të vendosë në derë  çertifikatën  e  detyrimit të shlyer dhe pas kësaj  mund të punojnë të qetë.

Siç e kuptojnë menjëherë gjithë sipërmarresit e vegjël në vend, qytetarët me të cilin kemi qenë  dhe jemi në një  bashkëbisedim intensiv,  ky është  thelbësisht  propozimi që unë dhe  Partia Demokratike kemi bërë prej më shumë se një muaji.

Sigurisht, paketa jonë për bisnesin e vogël është shumë me e gjerë dhe më e plotë se kaq. Ajo përmban përcaktime të reja, realiste dhe nxitëse, se çfarë duhet  konsideruar biznes i vogël duke e rritur tavinin deri në 120 milionë lekë të vjetra; përmban taksa proporcionale në vartësi të xhiros, 20 deri në 120 milionë lekë, përmban uljen e cmimit të energjisë dhe naftës dhe të tjera masa lehtësuese.

Si çdo  kopjim i  keq dhe mekanik, edhe ky që kryeministri i rrëzuar i ka berë paketës sonë është i bastarduar, i  pjesshëm, demagogjik, inefiçent. Ndonëse si autorë të  propozimit  për vendosjen  e pullës fiskale në xhamin e  çdo biznesi të vogël, që do të jetë  dokumenti i  sprapsjes së çdo tatimori që urdhërohet të bëjë apo  do të dojë të bëjë xhandarin, garipin  dhe zhvatësin,  ne nuk mund të mos  na vijë mirë që edhe pse në kushtet e panikut kryeministri i rrëzuar e përvetësoi  propozimin tonë dhe e shpalli sot  para biznesit të vogël.

Etika minimale  sigurisht e donte që ai  të njihte autorësinë e  këtij propozimi në realitetin  shqiptar të debateve  të freskëta mes opozitës dhe qeverisë,  pse jo të  falenderonte Partinë Demokratike dhe opozitën. Jo se kemi nevojë për falenderimet e tij,  por  kjo është një normë elementare në sjelljen politike dhe njerëzore.

Në mungesë të saj, në mungesë  të etikës,  na mbetet të themi  bashkë me gjithë sipërmarrjen se një  kryeministër, të cilit nuk i dridhet dora  të destinojë miliarda lekë të shqiptarëve për miqtë dhe ministrat e tij të korruptuar,  nuk është problem fare që kopjoj  një propozim, vjedh një propozim dhe të hiqet sikur e ka të tijin.

Çfarë është e rëndësishme?! E rëndësishme është se sot gjithë sipërmarrësit dhe qytetarët e mirëinformuar gjithashtu  kanë  mësuar e kuptuar akoma më mirë se rruga e zgjidhjes, rrugët e zgjidhjes për nxjerrjen e ekonomisë nga gremina  ku  e ka zhytur  Edi Rama dhe  për  vendosjen e saj në kursin e ringritjes , është rruga që propozon Partia Demokratike dhe unë.

Akoma më e rëndësishme është zbatimi konkret dhe pa humbur kohë i propozimit për pullën fiskale, apo për çertifikatën, siç e quajti kopjaci për të mos u dukur kopjac.

Sepse, e dimë të gjithë: ky kryeministër ka zakonin e  keq që  bën atë që nuk thotë dhe thotë atë që nuk bën; premton atë që do të braktisë dhe “mban” fjalën e padhënë, e pathënë; i intereson vetëm propaganda, i intereson vetëm të shtyjë ditët.

Partia Demokratike dhe unë ne do të shtyjmë  dhe do të ngulmojmë me forcë,  në bashkëpunim me sipërmarjen e vogël, për çlirimin e saj nga trysnia poshtëruese e   arrogancës, dajakut  dhe kusarisë qeveritare të Edi Ramës.

Megjithë peshën e veçantë  që ka, pulla fiskale është  vetëm një element i paketës që do të çlirojë, frymëzojë dhe lancojë sipërmarrjen e lirë në Shqipëri.  Opozita e ka ketë paketë, të cilën po e konsulton dhe po e konsolidon në  komunikim të hapur me sipërmarrjen e lirë, me qytetarët para se ta paraqesë në formë institucionale si programin qeverisë së Partisë Demokratike.

Unë deklaroj  sot se kapja apo kacavarja pas një elementi të  veçantë të paketës së ringritjes dhe dinjitetit të sipërmarrjes, siç është pulla fiskale, duke injoruar  elementët e tjerë,  është  tregues  i qëndrimit prej të mbyturi, i politikave   demagogjike dhe improvizuese, që nuk të çojnë askund, që nuk e nxjerrin ekonominë nga gremina.

Qeveria dhe kryeministri i rrëzuar kanë treguar qartë këto dy vite se u mungon vizioni, u mungojnë zgjidhjet, u mungon aftësia, u mungon përgjegjësia, u mungon integriteti dhe ndershmëria për të qeverisur shqiptarët.

Edi Rama me qeverinë e tij në një anë  dhe ekonomia në anën tjetër janë  në armiqësi permamente.  Kjo marrëdhënie ka lindur kështu qysh ditën e parë dhe  vetëm është përkeqësuar.

Me  dajakun në një dorë dhe  duke  grabitur pasuritë publike me dorën tjetër, kjo qeveri  nuk mund të prodhojnë kurrë as paqe, as zhvillim, por vetëm rrokullisje dhe përkeqësim.

Tani që  mandati  i saj ka hyrë në fazën e kompromentimit dhe degjenerimit të përshpejtuar, i shtrënguar në darën e skandaleve, gafave, injorancës  dhe arogancës  të tij, Edi Rama po përpiqet të marrë pak frymë duke kopjuar si një nxënës i keq opozitën.  Por nuk  kalohet klasa me kopje.

Megjithëse në thelb kopjimi është dhe mbetet forma më e lartë e vlerësimit.

Jo vetëm biznesi por me këtë akt tashmë edhe kryeministri ka pranuar dështimin e tij, rrëzimin e tij, mungesën e vizionit, vullnetit, padrejtësinë dhe arbitraritetin e tij, ka pranuar se ai është problemi dhe ka pranuar se propozimet e bëra nga ne, nga  Partia Demokratike, nga unë, janë zgjidhja dhe rruga e daljes nga kjo krizë.

Përtej anatemimit nervoz dhe në panic, ky është konfirmimi zyrtar nga Edi Rama për vlerat e Partisë Demokratike si alternativë  politike, po afirmon çdo ditë të ofertës tonë, për taksën e sheshtë më të ulët në Ballkan prej 9 %, për biznesin e vogël deri në 120 milionë lekë që do të paguajë midis 10-60 mijë lekë të reja në vit taksë në varësi të xhiros të evidentuar me pullë fiskale, që është edhe tabela ndalim-kalimi për tatimorët, për ulje e çmimit të energjisë, për uljen e çmimit të naftës dhe për faljen e kamatvonesave për të gjithë shqiptarët.

Pyetje: Z Basha, cili është komenti juaj për arrestimin e studentëve sot?

Informacioni që unë kam është që studentët Anita Lushi, Bora Mema, Klodi Hoxha, Viki Çipi, Liri Kuçi, Durim Jashari, Dardan Konjuca dhe  Valton Marku,  aktivistë të Lëvizjes Studentore për Universitetet janë arrestuar dhe keqtrajtuar pas një demonstrimi që kanë bërë në dalje të Edi Ramës nga seminari me biznesin e vogël. Së pari dua të them se Partia Demokratike dhe unë, kemi qenë jemi dhe do të jemi deri në fund në krah të studentëve, pedagogëve dhe prindërve kundër ligjit klientelist, korruptiv  dhe primitiv për arsimin e lartë në Shqipëri.  Së dyti dua të them që këta studentë  nuk kanë asnjë lidhje politike me Partianë Demokratike. Ndërkohë që në këto momente që po flasim, pashë ashtu si para 25 vitesh, Ramiz Alia i akuzoi studentët si vegla të kosovarëve, edhe tani, Edi Rama dhe mediat e tij servile po i akuzojnë se, kjo është një lëvizje e frymëzuar nga parti politike në Kosovë. E vërteta sipas informacioneve që ka opozita është krejt tjetër. Kjo është një lëvizje kundër ligjit të klientelist e korruptiv  për arsimin e lartë. Në mbështetje të universiteteve dhe këtu objektivat e studentëve dhe objektivat politike të Partisë Demokratike me të vërtetë bashkohen. Por ky është momenti por ti bërë një thirrje autoriteteve të rendit dhe të policisë që kanë qenë në kontakt me studentët, të hapin sytë për çdo abuzim me integritetin e tyre fizik apo psikologjik, me shkeljen e të drejtave të njeriut, do të përgjigjen një për një, nga punonjësi më i thjeshtë i policisë tek oficerët komandues. Hiqni duart nga studentët, bëni takimin sipas ligjit, respektojini të drejtat e tyre ligjore,  kushtetuese, të drejtat e njeriut. Partia Demokratike qëndron pa ekuivok në mbështetje të studentëve, në kauzën e tyre të drejtë  kundër ligjit klientelist dhe korruptiv për arsimin e lartë.

Deklarata për mediat e kryetarit të Partisë Demokratike, Lulzim Basha, 2 Nëntor 2015

Edi Rama gënjeu dje shqiptarët duke dashur t’i ikë përgjegjësisë për lejet e ndërtimit që ka dhënë me firmën e tij.

Lulzim Basha nuk ka dhënë asnjë prej këtyre lejeve të ndërtimit. Bashkia e Tiranës nën drejtimin e Lulzim Bashës për ti dhënë fund klientelizmit në dhënien e lejeve të ndërtimit ka miratuar planin urbanistik, i pari që prej vitit 1989 si dhe planet e detajuara vendore.

Për t’i dhënë hapësirë praktikës së tij të korrupsionit dhe arbitraritetit me lejet e ndërtimit, Edi Rama me 22 gusht 2014 bllokoi të gjitha studimet e bëra nga Bashkia dhe shfuqizoi VKM Nr. 502 që përcaktonte Rregulloren Urbane të Shqipërisë. Pas bllokimit të studimeve urbane të Tiranës në 22 gusht 2014, Edi Rama mori vetë në dorë dhënien e lejeve të ndërtimit bazuar jo në ligj dhe plan urban, por në vullnetin e tij personal.

Pasionin e Edi Ramës për betonizimin korruptiv dhe arbitrar nuk ka shqiptar që nuk e njeh. 20 përqindshi i famshëm i lejeve të ndërtimit zuri vend edhe në raportin e punës së OSBE-së që deklaron se Edi Rama ka një pasuri prej 200 milionë euro që menaxhohet në llogari “off shore” nga të afërmit e tij.

Çdo përpjekje për të larë duart dhe për të fajësuar të tjerët e nxjerr atë zbuluar në këtë aferë të paligjshme. Kjo pasi jo vetëm që këto leje ndërtimi kanë autorësinë e Edi Ramës por edhe sepse janë në kundërshtim të hapur me ligjin, pasi 30 studimet pjesore janë kryer në përputhje me Rregulloren Urbanistike VKM Nr. 502 e cila u shfuqizua nga vetë Edi Rama. Bashkë me shfuqizimin e kësaj rregulloreje,  Edi Rama ka bërë të pavlefshme dhe studimet pjesore vendore të Bashkisë Tiranë.

Reagim i Partisë Demokratike, 2 Nëntor 2015

Albana Vokshi, Kryetarja e Lidhjes Demokratike të Gruas së Shqipërisë, denoncoi në Kongresin e Forumit të Gruas së Partive Popullore Europiane politikat korruptive të qeverisë në Tiranë, që e kanë zhytur Shqipërinë në varfëri dhe kanë shkaktuar eksodin më të madh ekonomik në historinë e Europës. Deputetja e Partisë Demokratike, Znj. Vokshi deklaroi se shumica e familjeve shqiptare që po kërkojnë azil në Gjermani nuk kanë asnjë të ardhur dhe korrupsioni shtetëror i ka perjashtuat nga skema e ndihmës ekonomike. “Në Shqipëri theksoi Vokshi, kryeministri merr borxh për luksin e qeveritarëve ndërsa statistikat zyrtare tregojnë se mbi 30% e shqiptarëve jetojnë në varfëri ekstreme. Fushatat korruptive për tatimin e bizneseve që nuk paguajnë ryshfet te qeveria, kanë mbyllur mijëra vende pune”. Deputetja Vokshi theksoi së në varfëri ekstreme dhe pa mbrojtje sociale janë lënë nënat kryefamiljare dhe familjet me persona me aftësi të kufizuara.

Në takim merrnin pjesë Ministrja e Landit të Bavarise për Punën, Çështjet Sociale dhe Familjen, Emilia Müller‎, e ngarkuar edhe me çështjen e refugjatëve,  eurodeputete dhe kryetare të forumeve te grave, anetare të EPP Women, përfaqësuese nga shoqëria civile dhe sipërmarrja.

Kongresi i Forumit të Grave të Partive Popullore Europiane i kushtoi nje seance te vecante, krizës së emigracionit, fokusuar tek azilkërkuesit nga Ballkani.

Zonja Vokshi duke analizuar  krizën social ekonomike theksoi  se të gjithë treguesit ekonomikë dhe socialë janë përkeqësuar në mënyrë të ndjeshme. Rritja e të gjitha taksave; rritja e çmimit të energjisë elektrike, naftës, produkteve të shportës‎; ulja e pagave dhe pensioneve reale; ulja e ndjeshme e remitancave; heqja e mijëra familjevë, edhe kryefamiljareve nga ndihma e konomike dhe mijera përsonave nga skema e invaliditetit, pushimet për arësye politike nga administrata etj, kanë rritur ndjeshëm nivelin e vrfërisë në vend.

Papunësia është rritur me 5%, ndërkohë që Papunësia ndër gra e ë rinj shkon nga 35 deri në 70% ë rajone të ndryshme të vendit. ‎Këto dhe të tjera janë arësyet pse shqiptarët po lënë çdo ditë vendin e tyre.

“Gratë dhe vajzat janë viktimat më të mëdha dhe më të drejtpërdrejta të politikave të ndërmarra nga kjo Qeveri; të mjerimit ekonomiik, korrupsionit dhe gjithë sistemit të tenderokracisë e monopoleve që ka ngritur kryeministri Rama, qeveria e tij dhe mazhoranca parlamentare”.

Forumi i grave të PPE miratoi një rezolutë drejtuar Parlamentit evropian, ku ndër të tjera kërkohej që Liderët e Bashkimit Europian të kthejnë vëmendjen nga vende të Ballkanit perëndimor në të cilët demokracia po vihej në rrezik, shteti ligjor nuk funksiononte si duhej, korrupsioni në rritje ishte shqetësues.

Vendeve të Ballkanit u kërkohet të forcojnë shtetin e së drejtës dhe të marrin masa për ngritjen ekonomike, në  mënyrë që të ndalohen  prurjet e mëdha të azilkërkuesve.

Gjatë forumit të grave të PPE, u rizgjodh me votë presidente  znj. Doris Pack, si dhe Kryesia e re e këtij forumi.

Njoftim për shtyp i Partisë Demokratike, 2 Nentor 2015

Kryebashkiaket dhe këshilltarët bashkiakë të Partisë Demokratike në bashkitë e vendit kanë dorëzuar pranë Këshillave Bashkiake kërkesën për të ulur me 30 % taksat mbi pronën. Kërkesa për të ulur maksimalisht taksat mbi pronën vjen pas apelit publik të kryetarit të opozitës Lulzim Basha.

Taksat mbi pronën u rrit deri katërfish në dy vitet e fundit duke rënduar barrën e taksave që paguajnë veçanërisht bizneset e vogla të cilat ndodhen në kushtet e mbijetesës. Ulja me 30 % e taksës do të ndikojë direkt në buxhetin e bizneseve dhe familjeve të tyre. Kryetari i Partisë Demokratike, Lulzim Basha ka deklaruar se me marrjen e besimit nga shqiptarët, taksa mbi pronën do të shkojë në nivelet që ka qënë para vitit 2007.

Njoftim për shtyp i Partisë Demokratike, 1 Nëntor 2015

Kryetari i Partisë Demokratike, z.Lulzim Basha i shoqëruar nga një ekip drejtuesish të lartë të departamenteve e komisioneve parlamentare të Partisë Demokratike në fushën e ekonomisë dhe financave publike, pritën në një takim zyrtar në seli misionin e FMN-së, i cili po viziton Shqipërinë në kuadrin e rishikimit periodik të ecurisë së marrëveshjes mes Qeverisë së Shqiperisë dhe FMN.
z.Basha i njohu bashkëbiseduesit me vlerësimet e opozitës shqiptare lidhur me zhvillimet më të fundit në vend, me theks të veçantë në ato financiare dhe ekonomike. z.Basha theksoi se situata është dramatike në të gjitha aspektet e jetës së vendit, për shkak të korrupsionit, kapjes së shtetit nga një grusht oligarkësh dhe individësh me rekorde kriminale, si edhe rreth varfërimit të përditshëm të shqiptarëve, humbjes së shpresës që po shpie në largime masive të papara më parë të qindra mijëra shqiptarëve, të cilet vendosin të braktisin vendin e tyre në kërkim të një jete më të mirë.
Kreu i opozitës informoi bashkëbiseduesit se nën këtë qeveri, të gjithë treguesit ekonomike, financiare dhe makroekonomikë të vendit janë përkeqësuar dhe se kjo qeveri e kapur nga krimi dhe nën diktatin e krimit po bën çdo gjë që vendi të gremiset në honet e thella të varfërisë e mjerimit ndërkohë që është vetëm një grusht oligarkësh pranë kryeministrit të cilët përfitojnë nga afera qindramilionë euroshe në koncensionime të errëta të shërbimeve publike, tendera dhe zhvatje të pasurive e aseteve publike. Doing Business i Bankës Boterore vetëm sa rikonfirmoi ato shqetësime të cilat opozita ka më shumë se dy vjet që ua ka bërë prezent shqiptarëve.
Në takim u diskutua edhe për situatën e rëndë në financat publike, rritjen e pakontrolluar të borxhit publik, rënien dramatike të të ardhurave publike si edhe shpenzimet e luksit për vetura qeveritare, për punë e shërbime publike që gjoja tenderohen por që fitohen vetëm nga klientë personalë të kryeministrit të vendit. Kreu i PD ndau me misionin e FMN edhe shqetësimin lidhur me lehtesinë me të cilën qeveria shqiptare, edhe nën monitorimin e partnerëve të huaj, po borxhon vendin në nivele të paimagjinueshme më parë por edhe për shpenzime totalisht të panevojshme. Kështu në vetem dy vite niveli i borxhi është rritur nga 61% në 72% të PBB në një kohë që qeveria ka mashtruar lidhur me të ashtuquajturat borxhe për fatura të pashlyera.  Në më shumë se dy vite nuk kemi pothuaj asnjë investim publik në një kohë që shpenzimet kapitale janë në rangun e rreth 600 milionë dollarëve në vit por me të cilat deri me sot realizohen vetëm sheëtitore me palma, shatërvane dhe asnjë km rrugë, asnjë shkollë ose spital, asnjë kanal vaditës e kullues.
Pala e FMN u interesua të dijë vizionin e opozitës rreth planeve të fundit të qeverisë për krijimin e zonave të lira ekonomike, planeve të qeverisë për rritje të reja taksash si edhe se si mendonte opozita të vinte nën kontroll rritjen e shfrenuar të borxhit nesër kur asaj t’i besoheshin përsëri fatet e vendit. z.Basha informoi bashkëbiseduesit se vizioni i opozitës shqiptare është i qartë si drita e diellit dhe ai është vizioni i njerëzve të përkushtuar për të sjellë Shqipërinë në shtratin normal të zhvillimit ekonomik në të gjitha fushat, në bujqësi, ndërtim, transport, turizëm, energjetikë etj. Ai njohu misionin e FMN me vizionin e opozitës për shtet të vogël, për taksa të ulta, për trajtim dinjitoz si edhe ndihmë e shërbim ndaj tatimpaguesve për të përmbushur në mënyrë vullnetare detyrimet tatimore.

Njoftim për shtyp i Partisë Demokratike, 1 Nentor 2015

Pas denoncimit që kryetari i opozitës Lulzim Basha i bëri një aferë të dyshimtë të një kompanie pranë qeverisë, Info-telekom, që ka arritur të 100 fishojë xhiron vjetore në vit, duke shkuar në 145 milionë euro, gazetarët e Opinion, janë thelluar dhe më tej duke zbuluar hije të tjera të këtij biznesi.

Për këtë arsye, njerëzit e përfshirë në këtë biznes, klientë të qeverisë, kanë kërcënuar sot në mënyrë kriminale gazetaret e Opinion.

Kjo është klima që ka krijuar në vend Edi Rama, i cili mbetet frymëzuesi i kërcënimeve e shantazheve që i bëhen medias sa herë që publikohen skandalet e tij dhe të ministrave të tij.

Partia Demokratike e dënon me ashpërsinë më të madhe këtë sulm ndaj medias, ndaj fjalës së lirë.

Ne i bëjmë thirrje prokurorisë të nisë hetimin për kërcënimin që i është bërë gazetarëve, për këtë akt të rëndë ndaj lirisë së shprehjes.

Partia Demokratike dhe qytetarët janë në krah të medias së lirë dhe ne e inkurajojmë atë në misionin fisnik të hetimit të korrupsionit dhe garantimit të transparencës.

Kërcënimet e shantazhet ndaj medias, janë aktet e një kryeministri të rrëzuar që është kapur me forcë pas karrikes, janë reagimet e një qeverie të zhytur në hajdutëri e krim.

Deklarata për mediat e deputetit Luçiano Boçi, 31 Tetor 2015