Blog

Ndërtuesit të vilave të Edi Ramës në Dardhë dhe në Durrës, Agron Papulit, po i ecën mirë biznesi, dhe investimi që ka bërë për luksin e Edi Ramës, po i kthehet sot disafish.

Para se të marrte Jaguarët me xhama të zinj, makinat e sheikëve, tek dyqani i Papulit, afera 2 milionë euroshe, Edi Rama i ka dhënë atij edhe 1 miliardë e 247 milionë lekë për blerje ambulancash.

Ja ku është dokumenti zyrtar që tregon se Ministria e Shëndetësisë ka dorëzuar tek ndërtuesi personal i Ramës pothuajse gjithë fondin limit, për blerje ambulancash.

Ky duhet të jetë rasti i vetëm në botë ku në fillim kryeministri përcakton dyqanin ku do blihen mjetet, pastaj nis procedura.

Korrupsioni thellohet çdo ditë sipas skemës së Edi Ramës, ku nuk ka tender, nuk ka garë, nuk pritet kush ofron më pak. Paratë bëhen gati e shkojnë tek miqtë e tij.

Edi Rama është sot kryeministri më i korruptuar në Ballkan, dhe sipas dokumentit të punës së OSBE ai zotëron 200 milionë euro pasuri.

Eshtë e qartë mënyra se si mund të bësh biznes në Shqipëri sot.

Ndërto dhe fali një vilë Edi Ramës, ai të jep miliardat.

Ky korrupsion masiv i shtrirë në çdo zyrë, kjo mënyrë e të bërit biznes me paratë e shqiptarëve po sjell varfëri e skamje, dhe rënie pikiatë të ekonomisë së vendit, siç bëri të ditur edhe Banka Botërore në raportin e fundit ku Shqipëria ka përkeqësim dramatik, zbritje me 35 vende duke qënë sot të fundit në rajon dhe për disa tregues të fundit në botë.

Deklaratë e deputetes se Partisë Demokratike, Eleina Qirici, 29 tetor 2015

Kryetari i Partisë Demokratike Lulzim Basha u takua me tregtarë dhe qytetarë të Fierit në kuadër të turit “Fjalën e kanë qytetarët”. Ndonëse takimi ishte planifikuar me tregtarët dhjetëra qytetarë e kanë ndalur zotin Basha për t’i shprehur shqetësimet nga papunësia deri te pamundësia për të siguruar bukën e gojës.
Qytetarë:  Jam me një pleqëri në shpi, më kanë hequr përkrahjen. S’kam bukë, ku do vete, s’kam me çfarë të paguaj as ujë, as drita. Ku mund të ushqehem. Jam një 84 vjeçe me një pension pa gjë tjetër, pa një të ardhme. Më kërkojnë taksën e shtëpisë e me çfarë ta shlyej?!
“Shqiptarët po jetojnë ditë për ditë depresionin ekonomik dhe psikologjik, që është produkt i vetëm i qeverisjes së Edi Ramës dhe Ilir Metës, këtë po e prekim dhe shohim kudo, nga jugu në veri, me demokratë e socialistë e njerëz pa bindje politike,” -theksoi zoti Basha në takimin me tregtarët.
Tregtarët janë ankuar për dhunën dhe terrorin që ushtron policia ndaj tyre sikur janë kriminel, jo sikur mbajnë frymën gjallë duke shitur disa tufa me çaj.
Tregtare:  Kemi një biznes të vogël. Ai thotë mbyll biznesin nëse nuk është personi që është në emrin e vet. S’lë dot fëmijën në dyqanin tënd. 80 metër katrorë me thotë dua kasën. Lekë nuk ka. Unë kam djalin pa punë, vajzën pa punë,  burrin pa punë, dhëndrin pa punë. Në ç’vend të botës të fut në burg pse po ha bukë?
Tregtare: Ka filluar reprezalja. Kam falimentuar sepse dyqani është në emër të vajzës. Burri im ka që në ‘92 me licencë taksie  dhe është pa punë. Kam harxhuar 30 mijë euro të marrë kredi në bankë për operacion në zemër dhe jam pa kemp sepse me thonë të funksionojnë valvulat mirë. Që të funksionojnë mirë duhet të paguaj 200 euro në muaj. I kam nisur letër ministrit të Shëndetësisë dhe me ka thënë ik te Sigurimet. Merret domatja me liste? Ku vajtën 600 milionë euro? Pse nuk mblidhet populli siç u mblodh për armët kimike se s’ka më shkatërruese se çfarë po bëjnë këta sot me biznesin e vogël.
Taksist:  Të lutem çohu dhe t’i rrëzojmë se po na shkatërrojnë.
Tregtare: Më kanë vënë një gjobë 500 mijëshe kot fare. I thash t’i je spiun e çfarë mund të bësh tjetër. Me dokumente në rregull me të gjitha.
Shitëse ambulante: Burri më ka vdekur dhe më ka lënë dy jetimë. Jam 53 vjeç, shteti nuk më mbështet fare. Shes dy tufa çaj dhe rigon dhe këta me shajnë më kërkojnë kasën. Sikur po vjedh. Të shahet të ofendohet një grua me thinja në kokë…. të më fusin në punë një pastruese.
Shitëse ambulante:  Pa punë burri, djali, të gjithë në shtëpi. Po na ndjekin policët për këtë arkën e domateve. Djali do të hajë një copë bukë se vdes. Na thonë policët zhdukuni, na vjen turp.
Tregtari: Lule shesim. Na mashtruan ju dhamë votën, na gënjyen.
Ndërsa ka dëgjuar një nga një shqetësimet e tregtarëve zoti Basha beri të ditur se një tjetër lajm i keq ka ardhur sot për ekonominë shqiptare nga Banka Botërore.
“Sot  kemi një tjetër lajm negativ për ekonominë. Ndërkohë që Edi Rama është në luks të shfrenuar në hotelet më të shtrenjta të Hong-Kongut për të ftuar gjoja biznesmenët që të vijnë në Shqipëri, Banka Botërore thotë që Shqipëria ka rënë në pikatë për sa i përket klimës së biznesit, ka rënë në pikiatë korrupsionit, ka rënë në pikiatë për shkak të politikës arbitrare me energjinë, me biznesin, me taksat. Pra, tashmë nuk është vetëm opozita, nuk janë vetëm qytetarët por janë edhe institucionet ndërkombëtare që i kanë hequr një kryq të madh të qeverisjes së Edi Ramës, të cilët duke iu bashkëngjitur analizës tonë për faktet na mbështesin me atë që është detyra ime, detyra jonë, t’ju ofrojmë shqiptarëve një rrugë tjetër sepse rruga e nisur dy vite më parë çoi  për fat të keq drejt një gremine,” -tha zoti Basha.
Shkopi arbitrar i kësaj qeverie i godet të pamundurit, ndërkohë që një grusht njerëzish vazhdojnë të pasurohen, tha zoti Basha duke sjellë në vëmendje 130 milionë dollarë taksa dhe TSVSH të papaguar nga Albpetroli që ka përfunduar në xhepat e pushtetarëve.
“Këtu në Fier vetëm në 10 muajt e fundit oligarkët e mafia qeveritare të lidhur me të kanë bërë 100 milionë dollarë pasuri vetë me Albpetrolin. 100 milionë dollarë taksa që nuk janë paguar,  30 milionë dollarë  TVSH që nuk është paguar.  Çfarë do të mund të bënim në Fier me 30 milionë dollarë? Sa familje mund t’u vinim në ndihmë me 30 milionë dollarë?  Çfarë investimesh mund të bënim këtu me 30 milionë dollarë? Sa vende pune mund të hapeshin me 30 milionë dollarë? Por nuk janë hapur, as investime nuk janë bërë, as familjeve nuk u është ardhur në ndihmë sepse vetëm me vetëm në këto muaj 30 milionë dollarë janë pasuruar dhe shtuar kontot e oligarkëve dhe qeveritarëve të lidhur me ta, të cilët ngrenë vila dhe saraje nga  Surreli në bregdet.
Nuk ka shqiptarë që nuk e sheh me sy se ku ka shkuar vendi për shkak të qeverisjes së korruptuar dhe kriminale, të një kryeministri për të cilën OSBE-ja në raportin e vet të punës thotë se ka 200 milionë euro pasuri. Ku i mori? Kush ja la? Paratë e shqiptarëve përfundojnë në kontot bankare të qeveritarëve.  Por dita për të dhënë llogari dhe për t’ia kthyer këto popullit po afron,” – u shpreh kreu i demokrateve.
Zoti Basha ka paraqitur disa prej propozimeve të demokratëve të cilat synojnë të nxjerrin ekonominë nga kriza, rrisin punësimin dhe mirëqenien për qytetarët.
“Preokupimi kryesor i imi është punësimi dhe mirëqenia.  Së pari,  ne duam të injektojmë në tregun shqiptar dhe ekonominë shqiptare milionat që sot zhduken, duke ulur taksat. Premtimi im dhe vendimi i parë i qeverisë së re të demokratëve, kur të ketë besimin tuaj, do të jetë ulja më e madhe e taksave që ka përjetuar ndonjëherë ky vend, duke nisur me taksën e biznesit, tatimin mbi fitimin në 9%.
Së dyti, sa i përket taksave për biznesin e vogël,  ne do ta rrisim nivelin e biznesit të vogël deri në 120 milionë lekë të vjetra. Deri në 2 milionë lekë të reja, pra 20 milionë lekë të vjetra  biznesi i vogël do të paguajë vetëm 100 mijë lek të vjetra në vit.
Ndërsa për fashën e epërme, për ata që kanë xhiro deri në 120 milionë lekë të vjetra taksa maksimale nuk do të kalojë  600 mijë lek të vjetra. Kjo taksë do të paguhet dhe do të verifikohet përmes pullës fiskale të vendosur në një nga xhamat e biznesit dhe kjo pullë fiskale, ju jap fjalën do të jetë tabela e ndalim –kalimit për bandat e tatimorëve dhe për inspektorët që po ju marrin shpirtin biznesit. Nuk do të ketë dhe as nuk do të justifikohet prani e tatimorëve në ato biznese që e ekspozojnë pullën e pagimit të taksave.
Efekti total i masave tona fiskale do të arrijë në mbi 650 milionë euro, para që sot zhduken në kontot e qeveritarëve, ne do t’ia kthejmë tregut, do t’ia kthejmë qytetarëve, do t’ia kthejmë mirëqenies së qytetarëve nga jugu në veri, nga lindja në perëndim. Do të jetë një fillim i mbarë sepse do të ketë më shumë para, më shumë para në xhepat e konsumatorëve, më shumë xhiro për biznesin, më shumë qarkullim i lekut, më shumë optimizëm, më shumë energji pozitive, më shumë kreativitet.
Do t’i marrim këto masa por nuk do të ndalemi me kaq. Ne do të çmimin e energjisë, duke e ulur me 15% TVSH-në për biznesin dhe me 19% TVSH-në për të gjithë konsumatorët. Ulja e çmimit të energjisë do të sjellë po kështu rritje të konkurrueshmërinë në tregun e brendshëm dhe natyrisht eksporteve. Ne po kështu do të ulim çmimin e naftës, do të heqim 240 lekë për litër taksë “Rama”, duke bërë naftën automatikisht 240 lekë më të lirë për litër. Dhe sot duam të konfirmojmë këtu para biznesit të vogël fierak, për ju dhe për shqiptarët anembanë, vendimin tonë dhe vendosmërinë time për të falur pa kusht të gjithë kamatëvonesat e energjisë elektrike shqiptare. Falja e kamatëvonesave do të thotë po kështu çlirim për ata që kanë lidhur kontratë me OSHEE-në, nga gjoba e përmuajshme e pagesës së këtyre kamatëvonesave. Natyrisht ne jemi dhe do të jemi për shtet formal, për pagesën e energjisë elektrike, por jemi dhe do të jemi patjetër në krah të njerëzve dhe jo në krah të një pale të korruptuar siç është OSHEE-ja, e cila ka një dhe vetëm një qëllim: Të mbledhë para për t’ia dhënë Carapulëve të Edi Ramës me shokë,”- u shpreh kryetari i Partisë Demokratike Lulzim Basha.

Njoftim për shtyp i Partisë Demokratike, 28 tetor 2015

Edi Rama shpenzoi kot dhjetra mijëra euro nga taksat e shqiptarëve, në luksin e shfrenuar të hoteleve më luksoze të Hong-Kongut, pasi thirrja e tij ndaj biznesit kinez për të investuar në Shqipëri u hodh ne kosh te plehrave nga raporti më i rëndësishëm i Bankës Botërore, Doing Bussines

Investitoret përpara se të marrin një vendim, nuk dëgjojne pallavrat e Edi Ramës, por shohin raportin e Bankës Botërore për Shqipërinë, ku ne kemi humbur 35 vende krahasuar me një vit më parë.

Jemi sot vendi i fundit në rajon dhe, për lejet e ndertimit, vendi i fundit në botë.

Treguesit kryesorë janë në përkeqësim të ndjeshëm:

Nisja e biznesit me -4 pikë.

Leja e ndërtimit -67 pikë.

Furnizimi me energji elektrike – 3 pikë.

Regjistrimi i pronës -3 pikë.

Marrja e kredisë -6 pikë

Taksat – 12 pikë.

Zgjidhja e çështjeve të paaftësisë paguese -2 pikë.

Të gjitha këto përkeqësime dramatike për biznesin lidhen me qeverisjen, me Edi Ramën drejtpërdrejt.

Korrupsioni skandaloz i shtrirë masivisht, klientelizmi dhe fakti që vetëm ndërtuesit e tij punojnë sot, rritja e taksave dhe, nga ana tjetër, kontrabanda e evazioni i stërmadh, represioni dhe dhuna ndaj biznesit që nuk është afer qeverisë, të gjitha këto kanë sjellë këtë rezultat dramatik.

Ky është raporti më negativ që merr një qeveri shqiptare për ekonominë e vendit. Edi Rama, ka bërë gjithçka për të ardhur në këtë ditë.

Kjo pasaportë e zezë për Shqipërinë është një pengesë serioze për ardhjen e investitorëve dhe për zhvillimin e ekonomisë.

Vendi është në pikiatë, në rënie të lirë. Në rajon, sigurisht të fundit, ku dhe Kosova paraqitet më mirë, më atraktive për biznesin. Të fundit në botë për lejet e ndërtimit.

Vendi është në krizë të thellë dhe kjo tashmë u konfirmua dhe nga raporti kryesor i Bankës Botërore.

Ky paport është një nekrologji e kësaj qeverie që nuk ekziston më.

Shqipëria dhe qytetarët kanë nevojë për një paketë shpëtimi dhe Partia Demokratike është gati të marrë vendime të rëndësishme për uljen e taksave, lehtësimin e biznesit dhe luftën ndaj korrupsionit.

Deklarata për mediat e deputetit Florion Mima, 28 Tetor 2015

Nëse denoncon lidhjet e Saimir Tahirit me krimin dhe dëshmon publikisht me fakte e me prova, të kërcënohet jeta dhe duhet të kërkosh azil në vende të sigurta.

Kështu ka ndodhur me oficerin Zagani, falë të cilit akuzat ndaj Tahirit për lidhje me trafikantët e drogës janë ndërkombëtarizuar, dhe po ashtu është bërë i njohur botërisht edhe fakti se ky oficer kërcënohet me jetë nga mafia e lidhur me ministrin.

Nëse je përmbarues dhe duhet të zbatosh vendimin e gjykatës që është kundër Saimir Tahirit, arrestohesh.

Kështu ka ndodhur me përmbaruesin privat Baftjat Neli i cili po ndiqte zbatimin e vendimit të Gjykatës ku Saimir Tahiri është dënuar për shpifje me 30 milionë lekë gjobë.

Pra Saimir Tahiri, kumbari i drogës në vend, lidhja e krimit me pushtetin, është i paprekshëm.

Dëshmitarëve që flasin për lidhjet e tij me krimin u ndërsen banditët, përmbaruesve që duhet të zbatojnë vendimin e gjykatës kundër tij u vërsul policinë.

Kjo është gjendja dramatike e demokracisë në vend, ku sundon krimi dhe jo ligji.

Ku qytetarëve u merret shpirti e u përmbyset gjithçka për një kupon tatimor, ndërsa Ministri i brendshëm nuk deklaron shitjen e makinës, nuk zbaton vendimin e gjykatës dhe arreston atë që është ngarkuar me zbatimin e vendimit të gjykatës kundër tij.

Ministri i brendshëm është nën akuzat më të rënda në historinë e vendit dhe për këtë kanë shkruar dhe mediat më autoritare të Europës.

Saimir Tahiri është një nga fytyrat e kësaj klike mafioze që duhet larguar sa nuk është vonë.

Deklarata për mediat e anëtarit të Këshillit Kombëtar, Fabian Topollaj, 28 Tetor 2015

Bashkë me naftën e me mallrat e tjera, dhe me pasagjerët për 25 vite me radhë, hekurudha Ballsh-Fier-Vlorë do të marrë me vete edhe mandatin e deputetes Valentina Leskaj, nënkryetare e Kuvendit.

Ekskluziviteti që Edi Rama i dha djalit të nënkryetares së Kuvendit, nuk është vetëm një korrupsion i pastër e ndarje privilegjesh, por njëkohësisht është shkelje e rëndë e ligjit.

Ky fakt përbën shkelje flagrante të ligjit nr.9367, datë 7.4.2005 “Për parandalimin e konfliktit të interesave në ushtrimin e funksioneve publike”, i ndryshuar.

Neni 24 i këtij ligji, parashikon shprehimisht se personat e lidhur me deputetin, fëmija madhor i një deputeti nuk mund të lidhë kontratë ose nënkontratë me asnjë institucion publik.

E zezë mbi të bardhë.

Pika 1 e nenit 21 shprehimisht përcakton: “Asnjë individ, kur ky njësohet me një zyrtar në njërin nga funksionet e përcaktuara nga ligji (ku përfshihet edhe deputeti), nuk mund të lidhë kontratë apo nënkontratë me asnjë institucion publik”.

Ndërkohë pika 3 e nenit 24 parashikon se: “Ndalimet dhe kufizimet për zyrtarin, (deputetin) zbatohen edhe për personat e lidhur me të, ku sipas ligjit përfshihet edhe fëmija në moshë madhore (pika 1 e nenit 24)”.

Po pavarësisht këtij ndalimi, Edi Rama ka standardin e tij të dyfishtë dhe kur vjen puna tek miqtë e tij, ligji pushon së ekzistuari. Ndaj ai lidhi kontratë me djalin e Valentina Leskajt.

Nga dita që hekurudha Ballsh-Fier-Vlorë mori emrin hekurudha Leskaj, nënkryetarja e Kuvendit është në shkelje të ligjit, është në papajtueshmëri me ligjin, çdo ditë që mban mandatin, çdo ditë që paraqitet në Kuvendin e Shqipërisë.

Nga dita e dhënis së këtij koncesioni zonja Leskaj është në shkelje të Kushtetutës, ku neni 71 i saj parashikon rastin e papajtueshmërisë së mandatit.

Partia Demokratike do të paraqesë sot në Kuvend kërkesën për mbarimin e mandatit të deputetes Leskaj.

Partia Demokratike nuk do të lejojë shkeljen e ligjit dhe do ta çojë deri në fund këtë çështje.

Deklaratë e Sekretarit të Përgjithshëm, Arben Ristani

Skandalet dhe shkalla e paimagjinueshme e korrupsionit në shëndetësi, me koncesionet e tenderat e Rama-Beqës thellohen çdo ditë.

Me urdhër të Edi Ramës koncesioni 10 vjeçar i hemodializes, me vlere 8,6 milionë dollarë në vit, i është dhënë një kompanie fantazëm, pa zyrë, pa përvojë në këtë drejtim.

Sigurisht, Edi Rama nuk do tia dijë për veshkat apo shqetësimet shëndetësore të njerëzve, ai është nisur vetëm nga një qëllim. Biznes, para të thata për të ndarë, 86 milionë dollarë që jepen me fitues të paracaktuar.

Këtu kemi arritur, e keqja nuk ka asnjë kufi.

Këto janë aktet e kryeministrit më të korruptuar në Ballkan, që sipas raportit të punës së OSBE gëzon 200 milionë euro pasuri.

Pasi u mori paratë, pasi u mori shpresën, i kalli në mjerim e skamje, tani Edi Rama po u merr shqiptarëve edhe veshkat.

Çfarë duhet të presim më nga ky regjim i korruptuar.

Deklarata për mediat e deputetes Albina Deda, 27 Tetor 2015

Thellohet skandali me luksin qeveritar.

Revolta e menjehershme e  qytetarëve pas vendimit të Edi Ramës, për t’i shtuar rehatisë së tij dhe të ministrave edhe nga një Jaguar të tipit të fundit me paratë e shqiptarëve, e nxiti qeverinë që të genjejë turpshëm.

Zyra ku prodhohet  propaganda e Edi Ramës,  pretendon se po kursehet dhe thotë se aktualisht qeveria shpenzon 636 mijë euro për mirëmbajtjen e makinave që ka.

Në fakt, qeveria ka shpenzuar në një vit vetëm 23 mijë euro për mjetet e transportit, referuar këtij dokumenti zyrtar të thesarit.

Zyra e Edi Ramës ka genjyer 30 fish, me shumën e paraqitur.

Një përpjekje e dëshpëruar për të mbuluar këtë shpenzim skandaloz për luks qeveritar, për ministrat e zhytur në korrupsion.

Faktet janë kokëforta.

2 milionë euro ka vendosur Edi Rama tia japë ndërtuesit të tij personal, të vilave të tij në Dradhë dhe ne Durrës, Gon Papulit, që ai vetë dhe ministrat e tij, të thellojnë edhe më shumë pabarazinë, varfërinë e mjerimin në këtë vend.

44 makina luksi për Ramën dhe ministrat e tij.

2 milionë euro që tahirët, beqët e damianët me në krye Ramën, ti shohin qytetarët nga xhamat e errët të Jaguarëve modeli i fundit.

Dhe në fund, sërish makinat i mbeten Papulit të Ramës.

Një aferë e pastër korruptive që kutërbon mbare vendin.

2 milionë euro që do mjaftonin për t’u falur qytetarëve të pamundur kamatvonesat e energjisë.

2 milionë euro, pagesa e 41 mijë të papunëve, ose 34 mijë pensione fshati, apo 18 mijë e 700 pensione qyteti, që Edi Rama ia jep Papulit të tij.

Shqiptarët nuk mund të lejojnë një tallje të tillë nga qeveria.

Eshtë ora për tu ngritur e për ti ndalur hajdutët e xhamave të zi.

Deklarata për mediat e deputetes së PD, Mimoza Hajdarmataj, 26 Tetor 2015

Corriere della Sera, gazeta prestigjioze dhe ndër më të rendësishmet në Europe i ka bërë të ditur miliona lexuesve të saj se ministri ynë i brendshëm gjendet nën akuzë për lidhje me bandat më të rrezikshme të drogës në vend.