Blog

Kryetari i Partisë Demokratike Lulzim Basha po merr pjesë në Kongresin e Partive Popullore Europiane (EPP) që zhvillohet në 21 dhe 22 tetor në Madrid, Spanjë

Në këtë kongres ‎do të trajtohen një gamë e gjerë e sfidave me të cilat përballet Europa sot, nga siguria tek rimëkëmbja ekonomike. Kongresi do të fokusohet në politikat e jashtme dhe ato të sigurisë të tilla si migrimi dhe lufta kundër terrorizmit, si dhe çështje të një rëndësie të madhe në axhendën europiane si rritjen, punësimin, një treg dixhital të përbashkët, ndryshimet klimatike dhe partneritetin midis Europës dhe SHBA.

Kongresi do të zgjedhë drejtuesit e rinj të PPE,  Presidentin, zv/presidentët, Sekretarin e Përgjithshëm.

Për herë të parë Partia Demokratike e Shqipërisë merr pjesë si anëtare me të drejta të plota e PPE-së dhe do të ushtrojë të drejtën e votës.

Në kongresin e PPE-së Madrid do të ketë rreth 3.000 pjesëmarrës, mes të cilëve  750 delegatë, krerë  shtetesh dhe qeverish anëtare të BE-së, si kancelarja Angela Merkel (Gjermani), kryeministrat Mariano Rajoy (Spanjë),  Bojko Borisov (Bullgari), Viktor Orban (Hungari), Pedro Passos Coelho (Portugali), Laimdota Straujuma (Letoni), etj. Po kështu marrin pjesë Presidenti i Komisionit Europian Jean-Claude Juncker, Presidenti i Këshillit Europian Donald Tusk.

PPE është grupimi  më i madh dhe më me ndikim në nivelin europian. PPE ka 75 parti anëtare nga 40 vende. Nga radhët e saj janë zgjedhur kryetarët e Komisionit Europian dhe Këshillit Europian. PPE ka dhe  grupin më të madh në Parlamentin Europian.

Njoftim per shtyp i Partise Demokratike, 21 Tetor 2015

Sot u bëmë dëshmitarë të një shfaqje tjetër me regji qendrore nga ato që Edi Rama ia ka marrë dorën dhe i ka bërë risinë e vetme dhe ritualin më të mërzitshëm të qeverisjes së tij. Një shfaqje, e cila si gjithmonë vjen pasi plasin skandalet, pasi akuzat me fakte dhe argumente të pakundërshtueshme drejtohen ndaj tij dhe ministrave të tij. Nuk jep përgjigje. Nuk lejon transparencën. Ndalon hetimin. Por sa herë që i plasin skandale kemi të garantuar estradën me regjisor personal Edi Ramën. Këtë bëri dhe sot. Rrahu gjoksin para shqiptarëve por nuk u tha asnjë fjalë se pse u grabitën 600 milionë euro, një vit e gjysëm fatura energjie dhe 1 vit pensione të të gjithë shqiptarëve. Pse ndaloi hetimin për vjedhjen e shekullit. Pse nuk pranon sot hetimin ndërkombëtar si instrumentin që ka propozuar opozita për të zbardhur skandalin më të madh të korrupsionit dhe mashtrimit në Europë, sipas vetë avokatëve të qeverisë. Sado kopacë e zarë të blejë dhe të pajtojë ne jemi këtu për ti bërë këto pyetje në emër të qytetarëve shqiptarë.

Pse i fale 600 milionë euro CEZ-it?

Pse ndale arbitrazhin?

Pse ndale hetimin për këtë aferë?

Ku janë paratë e shqiptarëve?

Sot, siç e ka bërë zakon, rrahu gjoksin dhe ngriti gishtin e akuzës. Rrahu gjoksin duke thënë se ky ishte një pazar i mirë. Sigurisht që ishte një pazar i mirë dhe madje i ëmbël për të dhe Ilir Metën dhe për ministrat, për thërrimet që kanë marrë. Por në fakt është pakt kriminal, një gur fundosës për financat e vendit, është një peshë e papërballueshme që i shtohet halleve që po u bëhen kapicë shqiptarëve dhe familjeve të tyre anembanë vendit. Por vetëm hallet e shqiptarëve nuk deportojnë dot në atë sallë, të izoluar dhe me regji qendrore. Aty ku ndodhen ata që pasi falën dhe ndanë 600 milionë euro, u vërsulën mbi shqiptarët me kërbaç dhe haraç. Por çfarë bënë me paratë që mblodhën me dhunë dhe padrejtësi, që i morën jetën Qamil Zelës, Llazi Nasit, Gjovalin Lazrit, Arif Dodës, kryefamiljarë që nuk përballuan dot aribraritetin banditesk të OSHEE-së.

 Çfarë i bënë këto para?!

5 miliardë ia japin Carapulit, ndërtuesit të sarajeve të Edi Ramës. Me një tender të bërë enkas për të, me çmim të fryrë dhe ofertuesit më të shtrenjtë dhe ka dy javë që nuk thotë asnjë fjalë por edhe e mbron edhe pse opozita e denoncoi se tenderi ishte me fitues të paracaktuar. Dhe këtë bëri edhe sot.

 850 milionë lekë i janë dhënë Safet Gjicit, kandidatit të Edi Ramës për bashkinë e Kamzës.

340 milionë lekë i janë dhënë Pjerin Ndreut, deputetit të Edi Ramës.

Miliona ka marrë edhe kompania e Ilir Beqës.

970 milionë lekë ka marrë kompania e Sadri Abazit.

Para të gjakut të shqiptarëve të dhëna pa tender, pa garë.

Kjo është vetëm maja e ajsbergut, është vetëm një pjesë e aferave në OSHEE me paratë e gjakut të shqiptarëve. Ne po bëjmë një hulumtim të plotë për të zbardhur gjithë skemën mafioze, maskarallëqet dhe ndarjen e milionave me porosi dhe urdhër të Edi Ramës për miqtë e klientët e tij.

Ju garantoj sot, median, qytetarët shqiptarë, nga kjo foltore me përgjegjësi të plotë, se Partia Demokratike do të vazhdojë denoncimet dhe do t’i mbajë  përgjegjës deri në fund këta zullumqarë.

Do ta paguajnë, njësoj siç po i paguajnë sot shqiptarët vjedhjet dhe grabitjet e pushtetarëve.

Hetimi i skemës më të madhe të korrupsionit, i aferës së CEZ është gur themeli për stabilitetin e vendit dhe të ardhmen e tij.

Çdo ditë që kalon pa hedhur dritë e pa bërë transparencë, pa nxjerrë përgjegjësitë dhe pa i vënë para drejtësisë për 600 milionë euro që u janë marrë shqiptarëve, është një kthim pas.

Nuk mundet që Edi Rama të vazhdojë të qeverisë vendin, kur e ka plaçkitur atë me 600 milionë euro.

Nuk mundet Edi Rama të dalë para shqiptarëve, kur u ka marrë nga shtëpia e tyre, nga tavolina e bukës së tyre, nga ekonomia e tyre, nga e ardhmja e fëmijëve të tyre, 600 milionë euro.

Zvarritja e qëllimshme është thellim i kësaj vjedhje.

Provat dhe faktet janë bërë publike, të konfirmuara nga media ndërkombëtare, nga avokatët ndërkombëtarë të qeverisë dhe së fundmi nga Kontrolli i Lartë i Shtetit.

Qytetarët kërkojnë transparencë, shqiptarë meritojnë drejtësi, opozita ka ofruar instrumentin duke depozituar në parlament projektligjin për hetim ndërkombëtar.

Por transparenca dhe drejtësia po zvarritet nga Edi Rama dhe Ilir Meta.

Janë këta të dy që e ndaluan me ligj hetimin e aferës CEZ. Janë këta të dy që ndaluan ndjekjen e mëtejshme penale të fajtorëve të dërguar për ndjekje penale. Janë po këta të dy që e zvarrisin hetimin ndërkombëtar sepse qendrojnë kokë e këmbë pas kësaj afere. Nxjerrin pretekste, zvarrisin dhe rrëzojnë kërkesat e opozitës, kërkojnë të fitojnë kohë. Sa më shumë ndodh kjo aq më shumë vetëdenoncohen dhe zhvishen lakuriq para shqiptarëve si autorë të aferës korruptive me 600 milionë euro.

Kanë futur duart në paratë e shqiptarëve, kanë marrë shumën e barabartë me pensionet e një viti, dhe për këtë megaskandal nuk duan as hetim, as përgjegjësi, as ballafaqim me ligjin.

Sulmojnë opozitën, sulmojnë institucionet e pavarura, sulmojnë median që hetoi mbi skandalin, dhe këdo që kërkon drejtësi dhe transparencë.

Sipas tyre cështja nuk ekziston, 600 milionë euro janë një fjalë goje.

U bë çfarë u bë, ky është qendrimi që kanë teksa fërkojnë barqet e tyre të nginjura me paratë e vjedhura nga shqiptarët në kufinjtë e mjerimit, pamundësisë dhe të mbijetësës.

Edhe kryetari i Kuvendit që u mburr para kamerave, që kur thotë po është po, sot po thotë vazhdimisht jo.

Sigurisht është i kapur, sepse ka pjesën e vet në këtë aferë.

Mbajnë njëri-tjetrin në këtë mëkat ku kanë vendosur martesën e re dhe përkushtimi i tyre është të mbajnë sa më larg hetimin dhe drejtësinë.

Vjedhja është e madhe, është mina e ekonomisë shqiptare.

Kjo aferë i kushton çdo shqiptari për frymë minimalisht 200 euro. E genjen mendja këta se shqiptarët do paguajnë 200 euro për frymë fatura të konfirmuara, për xhepat e tyre dhe luksin e tyre.

Kjo ska për të ndodhur. Paratë do të kthehen, përgjegjësit do të vihen para drejtësisë. Dhe pa ndodhur kjo, as në parlament dhe as në Shqipëri nuk do të ketë as qetësi dhe as stabilitet.

Deklarata për mediat e kryetarit të Partisë Demokratike, Lulzim Basha, 20 Tetor 2015

Kryetari i Partisë Demokratike Lulzim Basha iu bashkua përkujtimit të shqiptares së madhe Nënë Tereza në 12 vjetorin e Lumturimit të saj organizuar nga Bashkia Lezhë.

Forca e mesazhit dhe përkushtimit të Nënë Terezës rrezaton sot në këtë situatë të vështirë ekonomike e sociale që po kalon vendi, tha zoti Basha.
“Në qoftë se kujdesemi për njëri-tjetrin, në qoftë se mendojmë për fatin e njëri-tjetrit,  jo vetëm për fatin tonë, veçanërisht ne njerëzit e vendimmarrjes, vendore apo qendrore të politikës, atëherë nuk ka vështirësi që nuk tejkalohet dhe nuk ka problem që nuk zgjidhet,” -theksoi kryetari i Partisë Demokratike.

Nga Lezha e Besëlidhjes së Skënderbeut, zoti Basha ka ftuar qytetarët të bëhemi bashkë pa asnjë dallim kundër të keqes, ta flakim të keqen, të përqafojmë të mirën e të ecim përpara.
“Po të bëhemi prapë bashkë rreth të mirës do të dimë ti themi ndal të keqes që po na gërryen ditë për ditë në siguritë tona, mirëqenien tonë, në shëndetin tonë dhe të fëmijëve tanë.”

“Kjo është një ditë ku shumë prej nesh në Lezhë dhe anembanë Shqipërisë mendohemi, reflektojmë për ditë të vështira që janë ulur këmbëkryq në mijëra vatra familjare, shqiptare.  Shqiptarja e madhe që u nderua me çmimin Nobel për Paqen u ka dhënë një shembull të madh, jo vetëm të krishterëve anembanë botës,jo vetëm shqiptarëve nga gjiri i të cilëve ndodhet, por gjithë civilizimit, shembullin se me forcën e shpirtit nuk ka gjë që nuk tejkalohet!
Kjo forcë e shpirtit, duhet për të kuptuar dhe për të besuar, për të qenë të bindur se në qoftë se kujdesemi për njëri-tjetrin, në qoftë se mendojmë për fatin e njëri-tjetrit, jo vetëm për fatin tonë, veçanërisht ne njerëzit e vendimmarrjes, vendore apo qendrore të politikës, atëherë nuk ka vështirësi që nuk tejkalohet dhe nuk ka problem që nuk zgjidhet. E keqja e të keqes, është kur pushon, ndal së kujdesuri, së shqetësuari për fatin e njerëzve. Por ama kur zemrën e ke të hapur dhe të frymëzuar, nga dashuria për njeri-tjetrin, nga besimi që bashkë mund t’ja dalim dhe mund të zgjidhim edhe probleme më të mëdha, atëherë nuk ka asgjë që nuk mund të zgjidhet. E dimë këtë në kohërat më të vështira të kombit tonë kur një grusht burrash u mblodhën bashkë këtu në Lezhë, ia dolën dhe i bënë ballë për një kohë të gjatë fuqisë më të madhe, rrebesheve më të mëdha të kohës këtu në Lezhë. E pra, po të bëhemi prapë bashkë rreth të mirës, do të dimë ti themi ndal të keqes që po na gërryen ditë për ditë në siguritë tona, mirëqenien tonë, në shëndetin tonë dhe të fëmijëve tanë. Të bëhemi bashkë pa asnjë dallim kundër të keqes, ta flakim të keqen, të përqafojmë të mirën e të ecim përpara! Ky është reflektimi që më ndrin sot në shpirt teksa emocionohem dhe gëzohem në këtë përkujtim të të bekuarës Nënë Terezë!”

Njoftim për shtyp i Partisë demokratike, 19 Tetor 2015

Asnjë përgjigje nga ministri Beqja për një nga aferat e tij më të bujshme, gjë që e ka bërë kampion të korrupsionit. Kompania e themeluar prej tij, qysh se Ilir Beqa mori pushtet, ka fituar 28 tendera në 22 muaj.

11 milionë euro shpejt e shpejt nga paratë e taksapaguesve shqiptarë.

I vetmi reagim i këtij kampioni të korrupsionit, ishte se këto fitime qenkan normale për kompaninë, dhe se firma e themeluar prej tij paska fituar shumë në kohën e qeverisë së mëparshme.

Genjeshtër.

Ja ku kemi këtu dokumenta e të dhëna, që dëshmojnë se kompania e Beqës skualifikohej për mungesë të theksuar dokumentacioni e mosplotësim kriteresh.

Por gjërat ndryshuan sapo Beqa u bë ministër. Kompania e tij u rrit, u zmadhua u pesëfishua.

Intech + në 22 muaj ka fituar 28 tendera pa zhvilluar asnjë proces apo garë, por me urdhër dhe porosi, me kritere të bëra enksa për të. Prej mëse dy vitesh kur rilindi Beqa, rilindi edhe biznesi i tij, duke e rritur fitimin me 1 miliardë lekë pra kemi 5-fishim të fitimit neto të deklaruar. Ja grafiku i të ardhurave dhe shpenzimeve të deklaruara nga kjo kompani, ju mund ti ndiqni në ekran.

Transfertat e Thesarit të cilat jane te vetmet qe kane mbetur online sepse cdo gjë tjetër për kompaninë përpara vitit 2013 në QKR është fshirë, tregojne se te ardhurat për këtë kompani nga buxheti i shtetit kane filluar pikerisht mbasi Beqaj u be Minister. Ju mund ta shihni këtë në dokumentat në ekran.

Rezulton dukshëm, e zezë mbi të bardhë në këto dokumenta, rritja e fondeve për kompaninë e ministrit  nga viti 2014 me 3,5 milionë dollarë dhe në 8 muajt e parë të këtij  viti, me 7 milionë dollarë.

Pra, fitimet e kompanisë që ka themeluar Beqja rriten në mënyrë marramendëse, sapo ai emërohet ministër shëndetësie.

Kjo është skema e vjedhjes, e zhvatjes e pasurimit me fondet publike, skemë e ndërtuar nga Edi Rama dhe ministrat e tij.

Një korrupsion skandaloz që e vë Beqën në krye të skuadrës së abuzuesve, por që duhet të vërë në lëvizje prokurorinë.

Kjo makutëri, kjo seri vjedhjesh po ndodh çdo ditë, teksa qytetarëve u merret shpirti, u merret dhe qindarka e fundit, teksa burgosen për një kupon ata që mezi sigurojnë ushqimin për fëmijet e tyre.

Deklarata për mediat e deputetes Arbiola Halimi, 19 Tetor 2015

Siç e shihni në ekran, me 28 mars, Lamja i Ramës ishte tek zyrat e ALUIZNIT tek Ali Demi, dhe tha; kemi 40 grupe në terren, rreth 100 specialiste që punojnë vetëm në Tiranë, duke bërë matje.

ATSH, shekulli, zeri popullit, citojnë lamen e Ramës.

Po ja ku kemi këtu, faqen zyrtare të Aluzinit, që tregon për punën e madhe në njerëzve të Lames.

Pra, kishte një ushtri me njerëz në rrugë për të bërë matjet, dhe sot për punën e bërë, për produktin që e ka në sirtar, në fakt një produkt që e ka gjetur aty sepse është bërë para vitit 2013, Lamja ka nxjerrë ca miliona të mira nga arka e shtetit, 1.5 milionë dollare, dhe ia ka dhënë mikut të tij.

Për operacionin korruptiv është kujdesur drejtoresha e Lames, zonja Dervishaj!

Ajo që mban firmën dhe vulën, ka përcaktuar kriteret e tenderit, dhe rastësisht në fund, milionat i merrka burri i saj, zoti Dervishaj.

Ai që nuk linte vend pa dhënë mendimin e tij të vyer, nga kangjellat e Presidences e deri tek pllaka ne kalanë e Lezhes, ka disa ditë që ka humbur! Për 1.5 milionë dollarët në fjalë …nuk ka mendim…

1. Nuk ka asnjë mendim për 1.5 milionë dollarë të paguar, për të prodhuar  të njëjtat letra që po zverdhen në sirtaret e vetë institucionit…
2. Nuk ka mendim për prokurimin dy vite rresht të së njëjtës konsulence, për të njëjtin terren madje edhe kur në vitin pasardhes jep trefishin e fondeve të një viti me parë…

Por zoti Lam po bën prapë me hile.

3. Nëse ‘zoti Lam” do të fliste, do të duhej të na tregonte cili ekspert prokurimesh garanton pastërtinë e nje tenderi konsulence 600,000 dollarësh të kryer në veç 3 jave?
4. Nëse ‘zoti Lam” do të fliste, do te duhej të na tregonte cila qenkesh kjo kompani konsulence Shqiptare që paska mbi 200 punonjes të trainuar dhe me experience që të mundet të tejkalojë ritmet e ALUIZNI-t i cili na paskësh patur mbi 100 punonjës ne terren vetem në Tiranë?
5. Nëse ‘zoti Lam” do të fliste, do të duhej të na shuante kureshtjen edhe mbi faktin se cila kompani konsulence paguhet 8,000 dollare në ditë, dmth 100 dollarë ora?
6. PSE duhen bërë këto matje nga firma private, kur ALUIZNI e ka strukturen të ngritur prej vitesh, me qindra punonjës me eksperience e të trainuar dhe që po ecnin me ritme aq te larta sa ç’na deklaruat para 16 muajsh?
7. Si shmanget konflikti i interesit kur tenderin e fiton bashkëshorti i drejtoreshës që harton termat e references për tenderin në fjale?

Shqiptarët nuk meritojnë këtë qeveri hajdutësh që po vjedh ditën për diell sikur të ishte dita e fundit.

Partia Demokratike po depoziton sot gjithe dokumentacionin përkatës në Prokurori dhe garanton Shqiptaret që hajdutet nuk do mund të gëzojnë asnjë cent nga paratë e vjedhura në mënyre kaq të pacipë.

Dita e fundit është pranë!

Deklarata për mediat e deputetit Gent Strazimiri,19 Tetor 2015

Ku janë fshehur Rama dhe Lamja? Ka dy ditë që po tregojmë një aferë të piste vjedhje të 1.5 milion dollareshe dhe kemi ngritur disa pyetje qe kanë mbetur pa përgjigje.

Sot po ju tregojme nje aspekt edhe me te rende te kesaj afere. Ndersa matjet ne terren ishin kryer prej vitesh dhe letrat po zverdhen ne arkivat e ALUIZNI-t, Lamja dhe Rama na u mburren se kishin 100 punonjes ne terren vetem ne Tirane qe po kryenin matje me ritme te papara.

Nderkaq edhe pse kishin 100 punonjes ne terren ne Tirane, sic mund t’a shihni ne dokumentet e Agjensise se Prokurimeve Publike, sërish, po për këtë punë, ne 2015 Rama-Lamja kane tenderuar një tashmë një firmë private pa personel, per te evidentuar situaten ne terren Tirana-1 dhe Tirana-3 me vlera 300 milione dhe 100 milione respektivisht (me TVSH).

POR nderkohe që sot po perlajne 400 milione leke, edhe ne fund të vitit 2014, Rama e Lamja paskan zhvatur plot 127 milione leke të tjera pikerisht per Tirana-1 dhe Tirana-3!

Shihni bashkengjitur Buletinin e 24 Nentorit 2014 te APP qe njofton per lidhje kontrate me vlere mbi 64 milione leke per Tirana-1, si dhe Buletinin e 1 Dhjetorit 2014 te APP qe njofton lidhje kontrate me vlere 63 milione leke per Tirana-3, pikerisht per burrin e Drejtoreshes se Lames që harton termat e referencës së tenderave.

Skeme e thjeshte por e piste ndarje parash te taksapaguesve mes Rames dhe Lames:

-Fillimisht shpall tendera per letra qe po zverdhen neper sirtaret e ALUIZNI-t,

-Pastaj perdor drejtoreshen e besuar për të hartuar termat e references dhe shpall fitues burrin e drejtoreshes së besuar,

Dhe kështu perserit skemen e ndarjes se parave ne dy vite per te njejtat zona.

Ky model abuziv zbatohet edhe per qytetet e tjera.

Rezultati: Mbi 1.5 milione dollare qe Rama dhe Lamja po vjedhin nga taksat tona.

Ka dy dite qe Rama dhe Lamja fshihen dhe nuk japin pergjigje. Por pyetjet mbeten:

1. A na tregoni dot nje vend sado te korruptuar te botes ku prokurohet 1.5 milione dollare per letra qe po zverdhen ne sirtaret e vete institucionit?
2. A na tregoni dot nje vend sado te korruptuar ku prokurohet dy vite rrjesht per te njejten pune dhe vitin pasardhes i jepet trefishi i fondeve te nje viti me pare?

Këto jane vjedhje paturp dhe nuk ka asnjë socialist – pervec Rames dhe Lames – qe t’i konsiderojne si VJEDHJE ME LEZET. Shqiptarët nuk e meritojnë këtë qeveri hajdutë.

Deklarata për mediat e deputetes Mimoza Hajdarmata, 18 Tetor 2015.

Tani që bomba e CEZ-it ka shpërthyer, Edi Rama është hedhur në sulm për të mbyllur çdo rrugë që të çon tek drejtësia.

Kur ne kërkojmë hetim ndërkombëtar sepse në aferën e vjedhjes së 600 milionë eurove janë përfshirë kryeministri, kryetari i parlamentit, pra njerëzit më të pushtetshëm në vend para të cilëve prokuroria jonë zor se do të qendronte në këmbë, Edi Rama thotë se jemi vend sovran.

Kemi institcionet tona thotë Edi Rama, dhe mbyll kështu një rrugë që të çon tek drejtësia.

Kur vjen puna tek institucionet tona, meqë jemi vend sovran, nëse këto institucione guxojnë të bëjnë punën e tyre ato bëhen objekt sulmi skandaloz. Kontrolli i Lartë i Shtetit verifikoi dëmin që Edi Rama ka shkaktuar me marrëveshjen që bëri me firmën çeke, dhe shihni çfarë ndodh. Prej asaj dite KLSH është nën goditje të vazhdueshme prej kryeministrit.

Pse? Sepse edhe kjo rrugë që të çon tek drejtësia, dhe duhet mbyllur.

A do të sulmohej KLSH nëse do të mendonte si Edi Rama. Nëse do të mbyllte pazarin e tij, a do të goditej ky institucion. Jo aspak. Ashtu ne do të ishim vend sovran. Por kur KLSH bën detyrën e mbron interesat e vendit, atëherë shpallet armik i popullit.

Letrat janë aty. Provat e faktet janë aty.

600 milionë euro, detyrime të pranuara nga vetë kompania CEZ, që iu falën, dhe më keq, u ndanë me kompaninë çeke nga Edi Rama.

Po nëse do të guxonte një prokuror të bente detyrën, ta çonte përpara procesin. Eshtë e qartë se çfarë do të ndodhte. Edi Rama do ta shpallte armik të popullit, siç po bën me KLSH-në. Ai po i jep mesazh çdokujt që guxon të bëjë detyrën sipas ligjit, që të heqë dorë.

Nuk do drejtësi Edi Rama për aferën më korruptive të historisë së vendit.

Me çdo kusht nuk do drejtësi.

Të gjithë e kuptojmë qartë pse ndodh kjo, pse Edi Rama gjendet në këtë ditë ku e kanë zënë ethet nga drejtësia.

Sepse është fajtor, është i përfshirë vetë, këmbë e krye.

Po të ishte për damianët e tij, tani që kjo çështje po rëndon shumë, ai do ti kishte hedhur këta zëdhënës të paktit kriminal, si bagazhet e tepërta, e vetë do të shpëtonte.

Madje, me gjasë do bënte dhe burrin e mirë, e do thoshte të bëhet drejtësi.

Por se bën dot, sepse kjo vjedhje e shqiptarëve ka emrin e tij. Kjo megaaferë ka firmën e tij, vulën e tij.

Çdo hetim do ta merrte me vete. Eshtë zullum i madh, është mëkati më i madh financiar që i është bërë vendit. Damianët do flisin, dhe në rrokullisjen e tyre marrin me vete dhe padronin.

Drejtësia për këtë çështje është fundi i Edi Ramës.

Dhe ai po bën gjithçka për të mbyllur drejtësinë.

Nuk pranon kërkesën e opozitës për hetim ndërkombëtar, ju e dini se nuk e futi sërish në kalendarin e punimeve të Kuvendit.

Për këtë, iu ul edhe një herë në gjunjë Ilir Metës.

Nga dëshpërimi thirri në ndihmë një kopje të damianit, një kopac që çuditi europën kur tha se CEZ ishte kuçedra që i kishte zënë grykën të ardhmes së vendit, që kishte në dorë statusin e vendit kandidat.

U përgenjështrua 3 herë kopaci i Ramës. Nga Republika Ceke dhe nga Bashkimi Europian. Pra nuk ishte çështje statusi e integrimi, ishte pazar.

Tani sulmon KLSH-në.

I bën presion prokurorisë.

Dhe rrëzon kërkesat e opozitës për hetim ndërkombëtar.

Pra po e shpall veten të pahetueshëm.

Edi Rama po na thotë se paska një imunitet ekstra, se nuk bën të ketë dyshime mbi të, dhe nuk bën të ketë drejtësi mbi të. Paska zbuluar kështu se qenka i dërguari i të plotfuqishmit, dhe e di ai se çfarë bën me paratë e shqiptarëve, kujt ia jep, si i ndan. Eshtë puna e tij.

Siç po bën në çdo drejtim, çdo ditë.

Ky spaçator tenderash, që i vë gishtin fituesit para se të nisin procedurat.

I jep ndërtuesit të sarajeve të tij çdo tender, carapulët e tij marrin të gjitha paratë dhe mundësisht shfaqen me ofertën më të lartë që të mos kursehet asnjë qindarkë.

Këtë po bën në shendetësi e kudo. Vjedhja e zhvajtja është kthyer në epidemi. Ministra që fitojnë me kompanitë e tyre 28 tendera në 22 muaj. Lamja që merr qindra milionë lekë për një produkt që tashmë ekziston. Ministri tjetër që ruan linjat e drogës. Kontrabanda gëlon.

Dhe në krye, Edi Rama, që nuk do drejtësi.

I druhet drejtësisë si temjanit.

Partia Demokratike nuk do ta lejojë.

Ka një forcë madhore të cilën nuk e urdhëron dot Edi Rama. Eshtë bashkimi i qytetarëve dhe kërkesa për drejtësi. Ky është sovrani që nuk mbyllet dot zyrave me urdhër. Aty do të shkojë çështja, tek sovrani. Paratë do të gjenden, do t’u kthehen qytetarëve, dhe ligji do veprojë me gjithë pushtetin e tij mbi përgjegjësit.

Deklarata për mediat e nënkryetarit të Partisë Demokratike, Edi Paloka, 17 Tetor 2015