Blog

Edi Rama nxiti sërish sot ndasi e konflikt social, duke provokuar shoqërinë me nderimin që i bëri diktatorit Hoxha dhe shpurës tjetër komuniste të regjimit kriminal, që vranë, internuan, dënuan pa gjyq, zhdukën të drejtat elementare të njeriut, dhe sollën krizën e urisë për 45 vite në Shqipëri.

Përmes pinjollit të tij në Bashkinë e Tiranës, Edi Rama organizoi një aktivitet shtetëror me fotot e enverit e nexhmies në Pezë, kësaj radhe me akt edhe më agresiv duke i vendosur ato në vendin e nderit.

Edhe më e rëndë është kjo ngjarje, kur të tilla manifestime bëhen me paratë e taksave të qytetarëve.

Partia Demokratike e dënon këtë politikë të shëmtuar e kriminale të Edi Ramës që nga viti në vit po glorifikon dhe po restauron dikatorin më të egër të lindjes, duke e bërë tashmë pjesë zyrtare të protokollit.

Ky është akti i një kryeministri të dështuar, i neveritur tashmë nga mbarë shoqëria që rreket në mënyrë të dëshpëruar të ruajë mbështetjen tek një grusht ish-komunsitësh.

Ne i kërkojmë Edi Ramës të heqë menjëherë dorë nga këto provokime, me diktatorin, regjimin e të cilit mijëra shqiptarë e kanë paguar me gjak e me jetën e tyre.

Nëse ai vazhdon të glorifikojë me arrogancë e me forcë enver hoxhën, qytetarët e vendit dhe ne do ti japim përgjigjen që meriton, përgjigjen që ka marrë dhe idhulli i tij.

Deklaratë për shtyp e nënkryetarit të Partisë Demokratike, Edi Paloka, 16 Shtator 2015

I marri nuk ka brirë thotë populli, por sot Edi Rama i shfaqi brirët e tij.

Në kulmin e akuzave me emra, fakte dhe shifra të pakundërshtueshme për kriminalizimin e shtetit, për kapjen e shtetit nga narkomafia, për lidhjet e bandave më të rrezikshme të drogës me ministrin e brendshëm, për gradimin si drejtorë, kryetarë këshillash, kryetarë bashkie dhe deputetë të narkotrafikantëve të dënuar, kur të gjithë; shqiptarë dhe të huaj, qeveri e institucione ndërkombëtare dhe media kombëtare dhe ndërkombëtare tregojnë me gisht si përgjegjës qeverinë e Edi Ramës, ky i fundit paralizon punën e mbi 2 mijë policëve duke i mbledhur me forcë në pallatin e Kongreseve.

Kjo ndodh ndërkohë që droga po fiton çdo ditë terren duke pushtuar çdo pëllëmbë të vendit si asnjëherë më parë, ndodh sepse Edi Rama ka vetëm një rrugë për tu përballur me dështimet dhe përgjegjësitë e tij; propagandën boshe, kinemanë e verës së vonë. Kjo jo vetëm nuk ndihmon në luftën kundër narkotrafikut dhe drogës në tërësi por sot e stimuloi dhe ndihmoi në mbarështimin e saj.

Ndërkohë që qindra oficerë janë thirrur me dhunë në kazermën mediatike të Edi Ramës, ngarkesa të reja droge bëhen gati, plantacione të tëra me bimë narkotike shtohen e ruhen me armë nga habilajt dhe shullazët e Tahirit, të cilët përpos që kanë vënë poshtë oficerët e policisë, për ta pasur edhe më të lehtë përdorin targën e tyre të preferuar AA003GB, saktësisht makinën e Ministrit të Brendshëm, kur nuk janë duke përdorur varkën e tij.

Në përfundim të kësaj paraditeje, kur shqiptarët bëjnë bilancin, panë se mijëra euro nga paratë e taksapaguesve të qytetarëve shqiptarë u çuan dëm për ekrane e fasada, dhe orë të tëra rroga policësh që në vend se të shkonin prapa krimit, iu dhanë liri të pakufi bandave të trafikut për të vazhduar vallen e tyre kriminale, ndërkohë që Edi Rama shkumëzonte dhe djersiste kundër opozitës dhe medias që i ka nxjerrë në shesh të palarat kutërbuese mbi lidhjet e kësaj qeverie me krimin dhe narkotrafikun.

 Shfaqja mediatike e Edi Ramës sado ta shtrydhësh ka vetëm llafe.

Faktet janë këto;

Raportet vjetore të Departamentit Amerikan të shtetit të vitit 2009, 2010, 2011 e 2012 thonë se Shqipëria ka bërë progres në luftën kundër drogës dhe Shqipëria nuk është më vend tranzit i drogës.

Raporti i grupit të Dublinit, miratuar nga Këshilli i Bashkimit Europian në vitin 2011 dhe 2012, thotë se Shqipëria vazhdon të ketë sukses në luftën ndaj trafikut të drogës, duke vlerësuar rënien e prodhimit dhe tranzitimit. Vlerësimi i Kërcënimit për Europën Juglindore  (Southeast European Threat Assesment on Criminality) në mars 2012, shprehet se; shtypja që Shqipëria dhe Italia i kanë bërë transportimit të drogës ka çuar në evitimin e Shqiperise prej rrjeteve kriminale si vend tranzit për ngarkesat e narkotikëve, duke i detyruar ato të kalojnë në vendet e tjera fqinje.

Vite në të cilat në Policinë shqiptare u instaluan mekanizmat me efiçentë dhe modernë në luftën kundër krimit. Ti rikthejmë edhe njëherë në vemendjen e qytetarëve sistemet MEMEX dhe TIMS që gjurmuan për herë të parë me metoda shkencore të pakrahasueshme dhe bëmë të mundur hetimet proaktive dhe vënien para drejtësisë të numrit më të madh të kriminelëve e në veçanti të narkotrafikantëve. Arritje të konfirmuara nga vizita të krerëve të policive europiane. Kujtoj këtu; krerët e antimafias italiane, presidentin e Zyrës Federale Gjermane Kundër Krimit, etj. Nuk po ju mërzis me çfarë u bë sepse shqiptarët e dinë sepse nëse do të dish se çfarë është bërë, shiko produktin dhe jo shfaqen.

Produkti ishte Shqipëria në NATO që s’mund të futej nëse habilajt dhe shullazët ishin të lidhur me lulin dhe mulin. Produkti ishte heqja e vizave për qytetarët shqiptarë, që nuk mund të ndodhte nëse kryeministri do ti bënte marshalla bandave më të rrezikshme të drogës nga Hakmarrja për Drejtësi tek shullazët me shokë. Nuk do të ndodhte, nëse kryeministri i vendit do të fuste në Parlament narkotrafikantë të dënuar dhe t’u hapte atyre dyert e makinave, duke sabotuar operacione policore shumëpalëshe. Nuk do të ndodhte nëse kryeministri i vendit do t’i merrte narkotrafikantët dhe t’i kandidonte për kryetarë bashkish përkundër insistimit të opinionit publik, të opozitës, të medias dhe të ambasadorëve. E s’mund të ndodhte ndryshe.

Por vizat u hoqën e Shqipëria hyri në NATO, u mor rekomandimi pozitiv për anëtarësimin e vendit në Bashkimin Europian. Këto janë rekordet kundër të cilave sado do të shkumëzojë e djersisë Edi, nuk i zhbën dot. Sepse i përjetojmë dhe i shijojnë shqiptarët anembanë, të rinj e të moshuar, të djathtë e të majtë.

Këto janë rezultatet. Por kur nuk ke rezultate pozitive, kur nxin në rekordet e tua nga krimi, ku në çdo raport në Berlin, në Bruksel, Uashington, Londër, Paris, të përmendin si përgjegjësin kryesor të inkriminimit të shtetit, të veshjes me pushtet tw trafikantëve, atëhere nuk të mbetet gjë tjetër veçse të organizosh kinemanë verore e të thërrasësh 2 mijë policë me forcë në këtë kazermë, e ti poshtërosh ata.

Policët e Shqipërisë kanë pasur, kanë dhe do të kenë mbështetjen totale të Lulzim Bashës, dje si Ministër i Brendshëm, sot si kryetar i opozitës dhe nesër si Kryeministër. Me vepra dhe jo më fjalë. Por kjo shfaqje i poshtëron ata.  Sepse pas kësaj shfaqeje, qendrojnë përgjegjësit e vërtetë; Edi Rama që emëroi tradhtarët e policisë si drejtorë personeli në Vlorë për të bërë trafikun e drogës, Edi Rama që arreston ata që denoncojnë lidhjet e Saimir Tahirit me bandën e habilajve dhe përdorimin e mjeteve të tij motorike nga trafikantët e drogës.

Unë mbështes totalisht dhe pa asnjë rezervë Policinë e Shtetit. Ndaj, i them Edi Ramës, meqë e ka bërë rrugë, mos u bëj burracak, mos u fshih pas policisë, mos u fshih me regji qendrore. Ke mbyllur ekranet e çdo debati sepse e vërteta duhet të mbyllet me çdo kusht sepse genjeshtra nuk mban debat, por nuk e zhbën dot të vërtetën.

As me shfaqje me regji qendrore, as me keqpërdorimin që i bëre sot ambasadorëve, duke thyer dhe kodin e lashtë të shqiptarëve që thotë se miku nuk tallet dhe poshtërohet kur e fton në shtëpinë tënde. Sepse edhe ambasadorët ishin aty në krah të policies, e nuk janë dhe nuk mund të jenë kurrë vulë e krimit, inkriminimit që Edi Rama i ka bërë shtetit, përdhosjes që Edi Rama i ka bërë Policisë së Shtetit.

Pamë sot mashtrime që të qash dhe te qeshësh nga zori, se paskan zbuluar edhe një farë superiore kanabisi këta, se këtej kanë korrur 69 mijë bimë por paska vetëm 44 hektarë të mbjella, kur dihet botërisht nga ekspertët që një bimë kanabisi llogaritet me një metër katror. Por kjo e këtyre mesa duket është superiore dhe e ka për gjysëm metër katror. Duhet të jetë kanabis social.

Edi Rama ka një rekord të qartë përsa i përket krimit e në veçanti narkotrafikut.

I ka caktuar trafikantët e drogës në poste kyçe në administratë.

I ka futur trafikantët e drogës në parlament.

I bëri më pas dhe kryetarë bashkie.

Emblema e luftës së Edi Ramës me drogën, janë roshët, bushët, bardhët, ndonët, peçët.

Trafikantë të dënuar apo të ndjekur që administrojnë sot territore të tëra me pushtetin që u dha Edi Rama.

Rekordet e zeza të Edi Ramës kanë pushtuar faqet kryesore të medias europiane dhe botërore. Shtypi gjerman, italian, belg, holandez, francez çdo javë ka raporte për pushtimet e vendeve të tyre me narkotikë që prodhohen ose kalojnë nga Shqipëria.

Laboratori monstruoz i kokainës u ngrit në kërthizën e vendit e do të vazhdonte të nxirrte tym sot e kësaj dite nëse nuk do të kapej nga policia gjermane.

Dhe sikur të mos mjaftonte infrastruktura, lidhjet kriminale, lehtësitë për bandat, ndarja e pushtetit me ta, mbrojtjen që u bëri, në fund, Edi Rama vendosi në dispozicion të trafikut të drogës edhe qiellin shqiptar.

Avionë që ngarkohen me drogë në Shqipëri e shkojnë në Itali janë kthyer në linjë të zakonshme fluturimi.

Kjo është për fat të keq situatë e rëndë, e jashtzakonshme, e pafshehshme, e patolerueshme e drogës dhe narkotrafikut me lidhje qeveritare dhe me përgjegjësi direkte të Edi Ramës dhe Saimir Tahirit.

Ajo që pamë në ekran, ishte thjesht një qokë e bosit të bosëse, për sy e faqe.

Megjithëse hoqëm vizat, futëm Shqipërinë në NATO, hapëm rrugën për integrimin europian të vendit, nuk kemi bërë asnjëherë shfaqje të tilla. As Ministria e Brendshme dhe as Policia. Pse?! Sepse bënim punën. Sepse kapnim narkotrafikantët.

Kush i bën këto?! Ai qw nuk ka asnjw rezultat pozitiv por vetwm gjwma. E vetmja gjë që mbetet për tu bërë është shfaqja me paratë e taksapaguesve shqiptarë. Por shfaqja nuk është alternativë për zgjidhjen e situatës së rëndë në vend.

Në fakt, shfaqja është vetë problemi. Europa i ka mbyllur dyert për qeverinë e Edi Ramës.  Zgjidhja fillon me spastrimin e politikës nga krimi i veshur me pushtet dhe pushteti i veshur me krim.

Cilit polic mund ti kërkohet të vërë jetën në rrezik për të mbrojtur ligjin kur Ministri i Brendshëm akuzohet si kumbari i bandave?!

Cilit oficer mund ti kërkohet përkushtim e sakrificë, kur ti vetë je një burracak që fshihesh pas policisë. Policisë që e tradhton shefi yt i personelit në Vlorë.

Mesa duket, ëndrrën e tij të çmendur nuk e ka prekur. Thirrja e vetme që bëri nga Pallati i Kongreseve ishte heshja; të heshtë opozita e të heshtin mediat. Me insistim kërkon memecërinë e denoncimeve. Kërkon memecërinë ndërkohë që qytetarët tregojnë me gisht e shohin ditë për ditë parcelat që i ruajnë me armë në krah, në sy të policëve të zvetënuar, ushtarët e habilajve dhe bandave të tjera të drogës nën bekimin e Saimirit.

Pra është populli që i sheh se si banditët e tu sundojnë. Eshtë populli që gjakoset në komisariate nga banditët e tu që i ke bërë deputetë.

Populli sheh se si në 2 vjet e gjysëm në qeveri, sa herë është koha të mbash përgjegjësitë, shkumëzon e djersit kundër opozitës.

Qytetarët, ndërkombëtarët, opozita duan Dekriminalizimin. Ligji është në parlament. Nuk e di se çfarë të djeg por unë them nise me testin e drogës ti dhe ministri yt.

Do të ishte një fillim i mbarë.

Deklaratë për shtyp e Kryetarit të Partisë Demokratike, Lulzim Basha, 16 Shtator 2015.

Kryetari i Partisë Demokratike Lulzim Basha u takua me europarlamentarët  raportues për Shqipërinë Eduard Kukan dhe Knut Fleckenstein,  zyrtarë të lartë të Komisionit dhe institucioneve të tjera europiane  si dhe ishte i pranishëm në seancën e posaçme dëgjimore për zgjedhjet vendore te organizuar nga Komisioni  i Punëve të Jashtme të Parlamentit Europian në Bruksel. Pas raportimit të kryesueses së misionit të vëzhguesve Audrey Glover, eurodeputët  konkluduan se zgjedhjet e 21 Qershori nuk ishin as të lira dhe as të ndershme.

Kryetari i Partisë Demokratike Lulzim Basha tha se kjo është hera e parë pas 13 vjetësh që Shqipëria shënohet si vendi që nuk garanton votën e lirë të qytetarëve. Zgjedhjet e 21 Qershorit, tha Basha, përballën qytetarët  dhe opozitën me forcën e plotë të një makinerie shtetërore të fortifikuar me ndihmën e krimit, bandave dhe parave të drogës e korrupsionit.

“Është një skaner i plotë i gjendjes në Shqipëri që ka kulmuar me kapjen dhe rrëzimin e zgjedhjeve të 21 Qershorit, standardeve zgjedhore. Për herë të parë në 13 vite Shqipëria shënohet si një vend ku nuk garantohet vota e lirë e qytetarëve, vota pa frikë nga ndërshkimi qeveritar. Zgjedhjet e 21 Qershorit nuk u rrëzuan dhe nuk u kapën sepse nuk kishte ligje por u rrëzuan dhe u kapën nga sepse qeveria kishte vullnetin për të kapur pushtetin me çdo çmim, edhe duke rrrëzuar standardet zgjedhore që Shqipëria i kishte plotësuar në të kaluarën. Ky është një konkluzion jashtëzakonisht damkosës për vendin dhe kjo damkë e rëndë e prapakthehut demokratik të vendit është vepër e Edi Ramës dhe Ilir Metës të cilët në vend të një gare të ndershme mes partive politike, me 21 Qershor përballën qytetarët dhe opozitën me forcën e plotë të një makinerie shtetërore të fortifikuar me ndihmën e krimit, bandave dhe parave të drogës e korrupsionit. Jo më kot, edhe konkluzioni i parë dhe dominues i sesionit të sotëm parlamentar është dekriminalizimi” ,- theksoi zoti Basha.

Ndonese seanca ishte thirrur për të diskutuar raportin e OSBE-ODHIR për zgjedhjet, dekriminalizimi është shndërruar në çështjen kryesore pasi sipas kryetarit të demokratëve Lulzim Basha, pa zgjidhjen e këtij problemi, pa dekriminalizimin, as që mund të bëhet fjalë për të adresuar problemet e tjera të zgjedhjeve në Shqipëri.

“Ne këtu ishim mbledhur për të diskutuar raportin për zgjedhjet e 21 Qershorit por gjysmën e kohës e kaluam duke folur për dekriminalizimin. Pse?! Sepse kriminalizimi i politikës, kandidimi i personave me rekorde kriminale për kryetar bashkie dhe për këshilltarë, përdorimi i bandave kriminale për të terrorizuar qytetarët dhe votuesit ishin problemet kryesore të zgjedhjeve të 21 Qershorit krah për krah me blerjen e votës dhe keqpërdorimin e administratës, fondeve dhe aseteve shtetërore. Pa zgjidhjen e këtij problemi, pa dekriminalizimin, as që mund të bëhet fjalë për të adresuar problemet e tjera të zgjedhjeve në Shqipëri. Ndaj dekriminalizimi është nevojë urgjente në vetvete por edhe në funksion të një procesi të mundimshëm, siç tha zonja Glover, të rikthimit të beismit të qytetarëve shqiptarë në zgjedhje të lira dhe të ndershme.

Partia Demokratike dhe unë personalisht jemi të vendosur që duke nisur me procesin e dekriminalizimit  të çojmë deri në fund  përjashtimin nga çdo funksion drejtues çdo person të zgjedhur apo të emëruar me rekorde kriminale nga qeveria aktuale dhe ne këtë mënyrë  të hapim një kapitull të ri edhe për zgjedhjet si testi kryesor i funksionimit të një demokracie” ,- theksoi kryetari i Partisë Demokratike Lulzim Basha

Zoti Basha ka ndarë shqetësimin me eurodeputetët për mungesën e vullnetit nga ana e mazhorancës për të nisur procesin e dekriminalizimit, por nga ana tjetër ka shprehur vendosmërinë e tij dhe të Partisë Demokratike për të bërë dekriminalizimin.  Pa fituar këtë betejë Shqipëria nuk mund të ecë përpara, tha zoti Basha.

“Përfaqësuesit e qeverisë në Komisionin e Dekriminalizimit janë përpjekur të bllokojnë procesin e adoptimit të ligjit për dekriminalizimin sipas draftit që opozita ka çuar në Kuvend, draft i cili bazohet tërësisht nga rekomandimet e Komisionit të Venecias për këtë çështje. Kjo është një dëshmi tjetër e mungesës së vullnetit për dekriminalizimin nga Edi Rama i cili është shënuar si arkitekti i kriminalizimit të politikës dhe administratës së lartë. Tashmë po shënohet si personi që po bën gjithçka për ta bllokuar dekriminalizimin. Sot nga Brukseli kam një mesazh për qytetarët shqiptarë;  beteja për dekriminalizimin duhet të fitohet sepse është nyja gordiane ku lidhen të gjitha problemet e tjera të Shqipërisë si vota e lirë, ekonomia, varfëria dhe lufta kundër saj, papunësia, mirëqënia. Pa fituar këtë betejë Shqipëria nuk mund të ecë përpara”, u shpreh Basha.

Njoftim për shtyp i Partisë Demokratike, 15 Shtator 2015

Në komisionin për Edukimin dhe Mjetet e Informimit Publik, deputetët demokratë i kërkuan ministres së Arsimit  Lindita Nikolla sqarime mbi pushimin masiv të mësuesve në Hotolisht, dhe ne vende të tjera, si një vendim arbitrar dhe i paligjshëm. Deputeti Luciano Boci në seancën dëgjimore me ministren Nikolla tha se mësuesit po lincohen dhe po shkarkohen politikisht nga puna, duke anashkalkuar çdo procedurë ligjore. Deputetët e PD, theksuan se vetë ligji i ndryshuar nga mazhoranca në Maj 2015 parashikon që emërimet e mësuesve bëhen nga drejtori i shkollës në bazë të një komisioni të ngritur, me konkurim të hapur, por emërimet kryhen mbi baza politike dhe aspak mbi meritat profesionale dhe procedurat ligjore. Deputeti Boci tha se transferimi nuk ekziston si koncept dhe si tagër juridik në ligj, duke bërë që  Drejtoria Arsimore  të abuzojë me kompetencat e saj.  “Vetë Ministren e kemi evidentuar si shkelësen e ligjit. Ministria ndërkohë nuk ka marrë asnjë masë dhe nuk është shprehur për rastet kur drejtuesit e DAR dhe të shkollave kanë shkelur ligjin”, u shpreh deputeti Boci . Ndërkohë opozita u shpreh në komision që dekreti i Presidentit të Republikës, për kthimin për rishqyrtim të ligjit “Për arsimin e lartë dhe kërkimin shkencor në institucionet e arsimit të lartë në Republikën e Shqipërisë”, është një mundësi për të zhvilluar një debat profesional dhe për të kaluar një ligj konsensual dhe në përputhje me Kushtetutën.

Njoftim për shtyp i Partisë Demokratike, 15 Shtator 2015

Deputetët demokratë në komisionin për Veprimtarinë Prodhuese, Tregëtinë dhe Mjedisin deklaruan sot se ligji “Për turizmin” bie ndesh me Kushtetutën dhe ligjet e vendit si dhe me legjislacionin e BE. Debati u zhvillua gjatë shqyrtimit sot të dekretit të Presidentit “Për kthimin për rishqyrtim të  ligjit”. Deputetët e PD deklaruan se sezoni turistik ishte i dështuar dhe për këtë dëshmon mungesa e statistikave si për pushuesit vendas dhe turistët e huaj në bregdet, ashtu edhe ata të turizmit malor.  Deputetët e opozitës i kërkuan ministrit të Turizmit  Arben Ahmetaj të dhëna konkrete mbi problematikat e sezonit, për të cilat ministri nuk pranoi të jepte sqarime. Deputetja Mimoza Hajdarmata u shpreh se ky sezon pati dhe pasigurinë e rendit, ku incidenti më flagrant ishte vrasja e turistëve ceke, për të cilët ministri Ahmetaj nuk shprehu as ngushëllimet e rastit. Deputetja Hajdarmata tha se shqetësues është dhe fenomeni i transferimit të tokave turistike në për interesat klanore të kompanive të qeverisë.

Njoftim për shtyp i Partisë Demokratike, 15 Shtator 2015

Deputetët e Partisë Demokratike mbështetën në Komisionin Parlamentar të Ekonomisë marrëveshjen mes qeverisë shqiptare dhe KFW Frankfurt AM Main për shumën 24 milionë euro  “Ujësjellësi rural III”. Ky projekt ka nisur që në vitin 2008 duke qënë të vetmet fonde për investime në ujesjellësa në zona rurale ndërsa qeveria nuk ka kryer asnjë investime në këto dy vite.

Opozita theksoi në komision se qeveria nuk sjell kritere për miratimin e projekteve dhe nuk ka asnjë informacion për shpërndarjen e fondeve duke pasur shpërdorim të tyre. Raporti mes kostos dhe përfitimit është shumë i lartë ku në një investim për 75 mijë banorë janë harxuar 40 milionë euro. Investimet lokale sot kanë një ritëm shumë të ulët. Fondi i zhvillimit është krijuar për të mbështetur zonat rurale, ndërkohë që sot fondi përdoret për qendra qytetesh, fasada dhe nuk ka asnjë projekt për zonat periferike, nuk ka investime për rrugë rurale, nuk ka investime për ujësjellësa. Deputetët e opozitës theksuan se qëllimi ka qënë eleminimi i disbalancave ndërmjet qytetit dhe fshatit  ndërsa sot fondet përdoren për palma dhe fasada.

Deputetët e opozitës shtuan se ka një nivel shumë të ulët të disbursimit të kredive të huaja. Me Aktin Normativ u hoqën 100 milionë dollarë investime nga te cilat 28 milionë dollarë ishin destinuar për ujësjellësat. Marrja e kredive me kosto të lartë shpreh paaftësinë e qeverisë për mosmanaxhim të të ardhurave publike.

Njoftim për shtyp i Partisë Demokratike, 15 Shtator 2015

Skandali i fshehjes së kërkesës së Interpol Brukselit për deputetin Mark Frroku, po merr edhe më shumë erë, dhe tashmë kanë mbetur vetëm dy persona përgjegjës për këtë akt të rëndë të rënies së shtetit, të fundosjes së çdo standardi.

Dy personat e vetëm përgjegjës që kanë mbetur tashmë në këtë aferë, janë Saimir Tahiri dhe Edi Rama.

Shefi i interpolit u kthye në detyrë, pasi gjykata e gjeti jo-përgjegjës për fshehjen e kërkesës së Interpol-Brukselit.

Ish-drejtori i Përgjithshëm i Policisë  Artan Didi,qe te mbyllte gojen u dërgua me ngritje në Amerikë nga Edi Rama.

Akti i rëndë i fshehjes së kërkesës së interpolit, ky bashkëpunim i hapur me krimin, tashme ka ngelur në derën e Saimir Tahirit dhe Edi Ramës.

Eshtë e qartë, se një dokument i tillë, një kërkesë nga Interpoli për një deputet, mund të fshihej për muaj të tërë vetëm nga Ministri i Brendshëm me bekimin e Kryeministrit.

Ky bashkëpunim në krim, u bë për të akuzuarin për vrasje që Edi Rama e bëri deputet, për të akuzuarin që bëri fushatë për Saimir Tahirin në kombinat.

Ky bashkëpunim në krim i Saimir Tahirit dhe Edi Ramës, u bë për deputetin që me dëshminë e tij mbylli hetimin për Ilir Metën, i cili u akuzua nga radhët e vetë mazhorancës për porositjen e vrasjes së dy deputetëve.

Ky bashkëpunim në krim i Saimir Tahirit dhe Edi Ramës, është një nga episodet e inkriminimit masiv, dhe krimit të veshur me pushtet e pushtetit të veshur me krim.

Ndaj Edi Rama i nxjerr pengesa dekriminalizimit, e bllokon atë.

Por skandalet nuk do të mund të mbyllen asnjëherë. Sajmir Tahiri duhet të largohet dhe t’i hapë rrugën hetimit për këtë rast dhe për të gjitha rastet e tjera të provuara për lidhjet e tij dhe perfshirjen në krim.

Dekriminalizimi do të bëhet dhe përgjegjësit e akteve të rënda kriminale do të dalin para ligjit e drejtësisë.

Deklaratë për shtyp e deputetit të PD, Flamur Noka, 15 Shtator 2015

Një nga njerëzit më të afërt të Ministrit të Brendshëm, Anastas Meçi, inspektori i tij personal që ka në fakt më shumë pushtet se sa i jep detyra dhe ligji, është përjashtuar dy herë nga policia e Shtetit për shkelje të rënda.

Fillimisht u përjashtua në vitin ‘96 për falsifikim provash. Ai u akuzua se falsifikoi provat në djegien e magazinës së armatimeve në Peqin, në vitin 91.

Më pas, u përjashtua në vitin 2001, nga Bilbil Mema, atëherë drejtor i Përgjitshëm i Policisë, për abuzime të rënda me atributet e Policisë. U kap me abuzime me armatimin, kur ishte shef i sektorit të grumbullimit të armëve në komisariatin e Kuçovës.

Kemi këtu dy shkresat zyrtare për inspektorin e Tahirit.

Por sot, ky i përjashtuar dy herë për shkelje të rënda, është krahu i djathtë i Ministrit të Brendshëm.

Pikërisht, me të tillë persona, Ministri Tahiri mbyll aferat e tij dhe kujdeset për bizneset e tij kriminale. Ai është sot ministri më i akuzuar në dy dekadat e fundit, për lidhje me bandat e trafikut të drogës.

Oficerë të lartë të Policisë kanë dhënë prova e dëshmi të implikimit të drejtpërdrejtë të Saimir Tahirit në trafikun e drogës.

Faktet tregojnë se Tahiri ka inkriminuar kupolën e rendit dhe lidhjet e tij me krimin janë tronditëse.

Ka vetëm një rrugë, largimi i tij dhe hetimi i plotë nga drejtësia.

Deklaratë për shtyp e deputetes të PD, Mimoza Hajdarmata, 15 Shtator 2015

Komisioni i Dekriminalizimit rifilloi sot punën pas nisjes së sesionit të ri parlamentar. Me propozim të kryetarit, Oerd Bylykbashi, Komisioni adoptoi me votim Raportin Paraprak të Komisionit të Venecias, të miratuar më 30 qershor 2015, si dokument themelor dhe udhëzues të punës së tij në hartimin e legjislacionit për dekriminalizimin.

Opozita prezantoi draftin e ligjit të posaçëm që i jep zgjidhje tërësore nevojës për dekriminalizim të institucioneve nëpërmjet largimit të zyrtarëve me rekorde të rënda kriminale dhe pengon zgjedhjen apo emërimin e tyre në të ardhmen, si dhe amendamentet kushtetuese që i hapin rrugën këtij ligji. Kjo shënon një hap të rëndësishëm në punën e komisionit për të futur në rrugën e zgjidhjes çështjen e largimit të kriminelëve nga institucionet publike, përkundër bllokimeve të vazhdueshme të krijuara nga mazhoranca që nga fillimi i punës së komisionit.

Kryetari i komisionit, Bylykbashi theksoi se projektligjet janë hartuar në përputhje të plotë me parimet dhe modelet e përmbledhura në raportin e Komisionit të Venecias. Përfaqësuesit e opozitës u shprehën të hapur për të diskutuar dhe arritur kompromis me mazhorancën për përmbajtjen dhe formën e ligjit, por shprehën vendosmërinë për të mos pranuar asnjë cedim nga objektivi i largimit të çdo krimineli nga institucionet, përfshirë ata me identitet të shumfishtë.

Përfaqësuesit e opozitës në komision nënvizuan faktin se edhe 9 muaj pas marrëveshjes së 24 janarit 2014, mazhoranca vazhdon të zvarrisë punën për dekriminalizimin dhe se përveç retorikës, nuk ka paraqitur deri më sot asnjë platformë apo projektligj, edhe pas 3 muajsh nga dalja e raportit të Komisionit të Venecias.

Edhe në seancën e sotme, mazhoranca u përpoq me çdo mënyrë të bllokonte paraqitjen dhe shqyrtimin publik të nismave konkrete të opozitës për dekriminalizim me pretendime proceduriale të pabazuara. Opozita theksoi se kjo është vazhdim i mungesës së vullnetit nga ana e mazhorancës për ta përmbyllur këtë proces të rendësishëm, dhe se asnjë përpjekje nuk do ta bllokojë atë.

Kryetari i komisionit, pas prezantimit të projektligjeve, tha se ishte koha që përfaqësuesit e mazhorancës në komision të fillojnë të bashkëpunojnë në miratimin e një ligji sa më të fortë e të plotë. Mbledhja e ardhshme e komisionit do të vazhdojë me diskutimet në parim dhe nen për nen të propozimeve.

Njoftim i Partisë Demokratike, 14 Shtator 2015

Deputetët e Partise Demokratike kërkuan sot transparencë dhe përgjegjshmëri për menaxhimin e fondeve publike.  Në diskutimet e projektligjit  “Për inspektimin financiar publik”,
dhe projektligjit “Për auditimin e brendshëm në sektorin publik”, deputetët  theksuan se kryeministri dhe ministrat e tij abuzojnë me fondet publike, duke organizuar tendera me prokurim të drejtperdrejtë për klientët e qeverisë. Deputetët e opozitës sollën në vëmendje skandalin e abuzimit me thesarin e Shtetit, ku nëpunësit publikë janë detyruar të paguajnë shpenzimet e aktiviteteve të partisë në pushtet. Këto ligje të qeverisë së kapur nuk do e ndalojnë Ramën dhe ministrat e tij të abuzojnë me fondet publike për të përfituar pasuri 200 milionëshe, u shprehën deputetët e Partisë Demokratike në Komisionin e Ligjeve.

Njoftim i Partisë Demokratike, 14 Shtator 2015