Blog

Në Komisionin për Punën, Çështjet Sociale dhe Shëndetësinë deputetët demokratë theksuan sot se  Ministria e Shëndetësisë dështoi me proçesin e dezinfektimit në sezonin turistik.

Gjatë trajtimit të projektligjit “Për shërbimet dhe produktet biocide në shëndetin publik” kryetarja e komisionit, deputetja Vokshi tha se tenderi është bërë abuziv dhe se kompania fituese  është e lidhur me drejtues të Ministrisë së shëndetësisë, duke fituar me ofertën më të lartë. “Jane eleminuar 2 firmat e shpallura me oferta me të ulëta, duke e zhvilluar tenderin krejtësisht në mënyrë klienteliste.

Firma fituese eshte edhe importuese e produktit biocid te përdorur në këtë prokurim. Resurset njerezore, financiare dhe avionët nuk u përdorën për dezinfektim të sipërfaqeve, por për të ngarkuar avionët me drogë, ‎që u kapën dhe në shtetin fqinj” – tha Vokshi.

Njoftim i Partisë Demokratike, 14 Shtator 2015

Në mbledhjen e sotme të Komisionit Parlamentar të Integrimit, Partia Demokratike kërkoi një plan veprimi të qeverisë për azilkërkuesit shqiptarë në vendet e BE.

Gjatë diskutimit të projektligjit “Për ratifikimin e marrëveshjes ndërmjet Republikës së Shqipërisë dhe Bashkimit Europian për pjesëmarrjen e Republikës së Shqipërisë  në programin “Europa për qytetarët”, kryetarja e komisionit, deputetja Majlindja Bregu tha se qeveria dështoi tërësisht me hapjen e vendeve të reja të punës, duke mos ndalur fluksin e eksodit.

Qeveria duhet të ngrejë sa më parë një plan masash ekonomike dhe punësimi për shqiptarët që po kthehen nga azili, plan i cili mungon krejtësisht dhe në termat e ndihmës ekonomike, sigurimit të invaliditetit, etj.

Njoftim i Partisë Demokratike, 14 Shtator 2015

Edi Rama dhe Saimir Tahiri po tentojnë të mbyllin zyrtarisht një prej skandaleve më të mëdha të qeverisjes së tyre, siç ishte fshehja e kërkesës së intepol Brukselit për deputetin Mark Frroku.

Rikthimi në punë i shefit të Interpolit, i cili u nis të bëhej kurban për të marrë përgjegjësinë me vete, dëshmon se Kërkesa e Interpolit, nuk është fshehur nga ai, por është fshehur nga Ministri i Brendshëm.

Opozita reagoi dhe e bëri publik këtë pakt kriminal që në ditët e para të kësaj afere.

Sot me rikthimin në punë, në të njëjtën detyrë të personit të planifikuar për të luajtur rrolin e rrufe-pritses, del qartë se kërkesa e Interpol Brukselit u fsheh me urdhër të Edi Ramës dhe Saimir Tahirit, pasi Mark Frroku, deputeti i tyre, kishte në dorë dëshminë kryesore për mbylljen e hetimit ndaj Ilir Metës, i cili u akuzua nga radhët e mazhorancës për porositjen e vrasjes së dy deputetëve.

Kërkesa u fsheh me urdhërin e Ramës, i cili është arkitekti i inkriminimit, njeriu që solli në parlament deputetë me të shkuar kriminale si Mark Frroku.

Skema mafioze u ekzekutua nga Saimir Tahiri, tashmë i njohur si Ministër i lidhur me bandat, i njohur si kumbari i drogës dhe aferave kriminale në vend.

Kush do të mbajë përgjegjësi tani për këtë skandal?

Pushteti po bën të gjitha përpjekjet që faji të mbetet pa përgjegjës, si çdo aferë tjetër kriminale e këtij regjimi.

Partia Demokratike i kërkon prokurorisë të çojë deri në fund këtë hetim, dhe të nxjerrë përgjegjësit para ligjit.

Ne i sigurojmë qytetarët e vendit se ky skandal nuk do të mund të mbyllet asnjëherë me urdhrin politik të Edi Ramës.

Çështja do të zbardhet dhe urdhëruesi, Saimir Tahiri, apo shefi i tij, do të mbajnë përgjegjësi para ligjit e para drejtësisë.

Deklaratë për shtyp e Sekretarit të Përgjithshëm, Arben Ristani, 14 Shtator 2015

Partia Demokratike i uron të gjithë nxënësve një vit të mbarë shkollor dhe i inkurajon më të rinjtë për rezultate e suksese. Dija është investimi më i madh për kombin dhe rruga më e sigurtë e zhvillimit të vendit.

Por për fat të keq, ne nuk mund të qëndrojmë vetëm tek urimet, kur situata sot në arsim është e rëndë.

Mësuesit po kalojnë në skanerin e dhunës qeveritare, që kërkon të zbulojë biografi politike, për të kryer shkarkime të reja masive, e për të hapur vend për militantët politikë. Ne kemi denoncuar se si qeveria kërkon të marrë informacion për të gjithë stafin e shkollave, për prirjet e tyre politike.

Sot qindra mesues, u gjendën befasisht të transferuar me përdhunë nga shkollat ku japin kontribut disavjeçarë, për tu zevëndësuar me militantë e klientelë.

Mësuesit u shantazhuan në zgjedhjet e fundit, dhe u kërcënuan me vendin e punës në këmbim të votës për qeverinë, e shkruar e zeza mbi të bardhë në raportin e ODIHR.

Mijëra fëmijë janë sot në kushte skandaloze ekonomike dhe në pamundësi për të blerë librat apo çantat e shkollës.

Po janë dhe me mijëra fëmijë në kampet e refugjatëve në Europë, të larguar nga vendi, sepse kjo qeveri u ka prerë shpresën dhe besimin për të ardhmen.

Nuk ka asnjë invetim në infrastrukturën shkollore. Ska shkolla të reja, ska laboratore të reja, nuk ka hapësira të reja për nxënësit.

Dhe sigurisht, këtë gjendje të zymtë të arsimit, qeveria nuk mund të mos e kulmonte me një inkriminim.

Ja ku kemi këtu, të emëruarin e qeverisë si drejtor të shkollës së mesme profesionale “Kristo Isak” në Berat.

Me firmën e Ministrit Klosi, vjen në këtë detyrë me 1 shtator, Armelin Cili, një i dënuar në vitin 2011, me 12 muaj për korrupsion. Armelin Cili është kapur dhe është provuar se ka abuzuar me ndihmën ekonomike në dhjetra raste.

Duke përdorur paratë e ndihmës ekonomike, me një skemë vjedhjeje, sikur ia jepte personave që në fakt rezultonin se ishin jashtë shtetit. Një hajdutëri skandaloze dhe e papranueshme. E megjithatë, me rilindjen, ky person promovohet dhe bëhet drejtor i shkollës profesionale.

Nuk është kjo mënyra për të nisur një vit shkollor.

Nuk është kjo mënyra që ka zgjedhur qeveria për këtë ngjarje të rëndësishme të shoqërisë tonë.

Kjo është mënyra më e keqe, në dëm të arsimit, në dëm të aspiratës së nxënësve, në dëm të mundit dhe djersës së prindërve të këtij vendi që sakrifikojnë kaq shumë për të ardhmen e fëmijëve të tyre.

Deklaratë për shtyp e deputetit të PD, Luciano Boci, 14 Shtator 2015

Prej 10 ditësh, kryetari i Parlamentit dhe ministri i Brendshëm, dy funksionarë të rëndësishëm të shtetit janë pa legjitimitet dhe vazhdojnë të ushtrojnë detyrën edhe pse në sytë e mbarë shqiptarëve janë të akuzuar njëri për marrje rryshfeti e tjetri për lidhje me bandat e trafikut të drogës.

Kryetari i Parlamentit është akuzuar nga avokatët e qeverisë shqiptare për korrupsion, dhe provat e argumentat e tyre për rryshfetin e Metës janë pjesë e raportit që kanë paraqitur në Arbitrazhin e Vjenës.

Ministri i Brendshëm akuzohet nga një oficer i lartë i antidrogës me lidhje të forta me partnerët europianë, se është i implikuar me bandat më të rrezikshme të narkotrafikut në Jug.

Ky vend dhe qytetarët e tij nuk mund të mbajnë në kurriz dy funksionarë të lartë të shtetit, nën të tilla akuza.

Ndaj Partia Demokratike, përsërit kërkesën për dorëheqjen e menjëhershme të Ilir Metës dhe vendosjen e tij në dispozicion të një hetimi të plotë dhe të besueshëm për akuzat e bëra publike.

Largimi i Saimir Tahirit është parakusht për t’i hapur rrugë një hetimi të plotë e të pandikuar mbi akuzat e tmerrshme dhe faktet e bëra publike për implikimin e tij në trafikun e drogës përmes kushërinjve Habilaj të cilëve ju ka vënë në dispozicion edhe automjetin e tij privat dhe skafin po në emër të tij.

Dorëheqja dhe hetimi i Ilir Metës, shkarkimi i menjëhershëm i Saimir Tahirit dhe nisja e hetimit për akuzat e rënda ndaj tij, adoptimi pa asnjë vonesë i ligjit për dekriminalizimin si parakusht edhe për rikthimin e besimit në zgjedhje të lira dhe të ndershme, si dhe adoptimi i një plani urgjent masash për krizën ekonomike duke ulur taksat dhe rritur pagat e pensionet, kjo është rruga përmes të cilës mund të shpëtohet demokracia dhe stabiliteti i vendit.

Nëse dyshja Rama-Meta vazhdon me kokëfortësi të kapen me dhunë e arrogancë pas karrikes edhe pse nën akuza të pakapërdishme, atëherë do të përballen me forcën e bashkuar të qytetarëve shqiptarë deri në rrëzimin e regjimit të krimit dhe korrupsionit.

Deklaratë për shtyp e nënkryetarit të PD, Edmond Spaho, 13 Shtator 2015

Deputetja e Partisë Demokratike, Albana Vokshi e shoqëruar nga kryetari i Bashkisë së Pogradecit Eduart Kapri, vizitoi banorët e fshatrave të Mokrës, një zonë e prekur masivisht nga eksodi.

Mbi 250 familje raportohen se janë larguar nga Mokra drejt vendeve Europiane në muajt e fundit në përpjekje për mbijetesë për shkak të kushteve të mjerueshme. Në fshatin Trebinjë dhe Potgozhan, në skamje të plotë, nuk ekziston asnjë mundësi zhvillimi i bujqësisë dhe blegtorisë ndërkohë që në terren nuk është investuar asgjë nga qeveria.

“Unë jam e ve dhe kam për të rritur me një pension minimal, dy fëmijë. Ata janë në shkollë dhe unë nuk arrij t’i ushqej me bukë dhe librat nuk kam me se t’ua blej. Më mirë të vdes në rrugët e Gjermanisë sesa në këtë fshat të humbur, pa shpresë.- u shpreh një nënë. Ndërsa Eltoni një i ri pa punë tha se dikur në këtë zonë jetonin afro 300 familje, tani kanë mbetur vetëm 40.

Gjatë takimeve, deputetja Vokshi tha se qeveria nuk po kryen detyrën duke lënë familjet e varfra në skamje të plotë duke u prerë ndihmën ekonomike padrejtësisht.

Deputetja u perball me realitetin tronditës në familjen Muça, ku kryefamiljari Shpëtim, i paralizuar në punë dhe me disa sëmundje, i ishte mohuar e drejta për të marrë pagesën e Kempit, të miratuar në fund të vitit 2013. Mungesa e të ardhurave minimale nuk mundësonte blerjen e ilaceve dhe kurimin e tij.

“Ju e shihni që këtu ka një varfëri migjeniane, pa drita e me qirinj, pa ujë,  ku mungojnë dhe mjetet më bazike të një jete minimaliste. Këtu nuk zbatohen të drejtat më minimale të njeriut dhe ligji shkelet hapur me arrogancë. Gratë kryefamiljare nuk punëson dhe nuk marrin ndihmë sociale. Kempi u hiqet në mënyrë ç’njerëzore të sëmurëve, në shkelje të plotë të ligjit. Nga  gjithë ky mjerim, njerëzit gjejnë mundësi shpëtim tek emigrimi që qeveria mundohet ta fshehë dhe të manipulojë shkaqet e tij drithëruese”, tha Vokshi.

Kryetarja e Komisionit Parlamentar për Punën, Çështjet Sociale dhe Shëndetësinë, Albana Vokshi deklaroi se historitë e mjerimit në Mokër dhe eksodi i shqiptarëve vlejnë të denoncohen si krime të qeverisë. Ajo tha se Partia Demokratike ka një plan shpëtimi i cili do të nxjerrë shqiptarët nga kriza, me taksa të ulëta, luftë kundër krimit dhe korrupsionit shtetëror dhe programe punësimi.

Njoftim për shtyp i Partisë Demokratike, 13 Shtator 2015

Qindra qytetarë dhe anëtarë të Partisë Demokratike morën pjesë në homazhet që u organizuan sot pranë memorialit të Heroit të Demokracisë, Azem Hajdari, 17 vjet pas vrasjes së tij nga bandat e lidhura me pushtetin e kohës.

Pasi vendosi kurorën me lule në memorialin e Heroit të Demokracisë, Kryetari i Partisë Demokratike, Lulzim Basha u shpreh se Azemi është gjallë, sepse e gjallë është kurajo e tij për të mos lëshuar liritë e fituara në dhjetorin e vitit 1990, kurajo për të mposhtur edhe një herë krimin e lidhur me pushtetin.

“Jemi këtu për të nderuar Tribunin e demokracisë shqiptare liderin e lëvizjes studentore të Dhjetorit, njeriun që vrau frikën e që me frikën e vrarë dhe të hedhur mbi supe, si një triumf i rinisë shqiptare shpërndau kurajën e njerëzve të lirë nga Jugu në Veri. Diktatura nuk ia fali kurrë Azem Hajdarit përmbysjen e madhe e të parikthyeshme, kthimin e lirisë së qytetarit në themel të një shoqërie, mposhtjen e frikës, ekzaltimin e kurajos qytetare. Ndaj krimi i lidhur me pushtetin, shkuli Azem Hajdarin nga gjiri i demokratëve dhe shqiptarëve të lirë më 12 Shtator 1998.

Por nuk e shkuli e nuk e shkul dot kurrë nga mirënjohja e demokratëve dhe e një kombi të tërë, nga nderimi për veprën e tij të pavdekshme. Azem Hajdari  është gjallë sepse e gjallë është kurajo, vendosmëria e tij për të mos lëshuar kurrë liritë e fituara në Dhjetorin e vitit 1990. Azem Hajdari është gjallë sepse e gjallë është forca kreshnike e Azem Hajdarit në Partinë Demokratike për ti prirë qytetarëve të lirë, për ta mposhtur dhe një herë krimin e lidhur me pushtet dhe pushtetin e bërë njësh me krimin”, u shpreh Lulzim Basha.

Mesazhi i kryetarit të Partisë Demokratike në homazhet e bëra pranë memorialit të Heroit të Demokracisë, 17 vjet pas vrasjes së tij, 12 Shtator 2015

Pikërisht në kulmin e debatit për dekriminalizimin, kur mbarë shoqëria e opinioni ndërkombëtar kërkojnë veprim të shpejtë për të shkëputur krimin nga pushteti, Edi Rama ka dërguar në krye të këshillit të qarkut të Kukësit, një person me të shkuar problematike, si Abedin Oruçi.

Personazh i kronikave të zeza, mjafton të fusni në google emrin e tij për të parë sa të pasur e ka CV-në, dhe pikërisht për shkak të aktiviteteve të paaligjshme u shkarkua nga qeveria e mëparshme nga detyra e kryetarit të komunës Kolsh.

Por Abedin Oruçi ushtroi edhe dje dhunë ndaj sekretarit të këshillit të qarkut, e po ashtu, mori me dhunë zyrën e kreut të këshillit të qarkut, pas një mbledhjeje të paligjshme.

Partia Demokratike e dënon këtë inkriminim të zyrës së rëndësishme të kreut të Këshillit të Qarkut të Kukësit, dhe e konsideron si sfidë që Edi Rama po i bën procesit të dekriminalizimit.

Ne i kërkojmë Prokurorisë të hetojë me shpejtësi aktet e dhunës së djeshme të Oruçit, dhe kërkojmë vendosjen e ligjshmërisë në Këshillin e Qarkut.

Çdo vonesë është mbrojtje e krimit, është promovim i krimit.

Qytetarët e Kukësit nuk mund ta pranojnë këtë model të Edi Ramës. Dhe Partia Demokratike bashkë me qytetarët e Kukësit, bashkë me qytetarët e vendit do ta çlirojnë një herë e mirë politikën dhe qeverisjen nga krimi i lidhur me pushtetin.

Deklaratë për shtyp e kreut të Grupit Parlamentar të PD, Edi Paloka, 12 Shtator 2015

-Z. Bylykbashi, dy ditë më para Kryeministri Rama ka folur për çështjen e dekriminalizimit ku tha se nuk e ka lexuar projektin tuaj por edhe se nuk do të varet nga opozita për afatet kohore të miratimit të këtij drafti të opozitës. Keni ndonjë koment për këtë?

Eshtë e qartë se z.Rama nuk i shpëton dot kësaj taktike të përcaktuar që është vonesa dhe taktika për të zvarritur procesin e dekriminalizimit. Nuk ka rëndësi nëse e lexon z.Rama apo jo, e rëndësishme është që ky proces duhet të vazhdojë përpara pa pasnjë vonesë. Afatet nuk i vendos Partia Demokratike por interesi publik që denoncon me zë të lartë këtë turp që Kryeministri Rama ka bërë, kriminalizimin e parlamentit dhe gjithçkaje tjetër, e për rrjedhojë z.Rama ka një detyrim absolut për të zbatuar marrëveshjen e 24 Dhjetorit. Me gjithë taktikat vonuese dhe zvarritëse e ka sjellë deri këtu, por nuk ka më asnjë shans për ta vonuar më tutje, dhe në tryezat e Kuvendit është një projekligj konkret i cili bën një zgjidhje të plotë të problemit të kriminalizimit që ky kryeministër i ka bërë parlamentit dhe institucioneve të tjera. Nëpërmjet këtij projekligji dhe ndryshimeve kushtetuese që i hapin rrugën atij, ne i japim zgjidhje të plotë dhe z.Rama është i ftuar që përtej çdo mungese vullneti të bashkojë votat dhe të bëjmë një ligj që do të hyjë në fuqi shpejt, do të zbatohet shpejt dhe me efikasitet, dhe kriminelët në parlamentin shqiptar të lënë mandatet e tyre dhe në të ardhmen askush të mos guxojë që ta bëjë përsëri.

-Në komisionin e Dekriminalizimit a do të filloni me nismën tuaj apo do të diskutoni diçka tjetër në fillim?

Projekligji është propozuar formalisht por në substancën e tij ky ligj do të diskutohet nga e hëna ku do të thirret komisioni i Dekriminalizimit. Për të diskutuar në substancë dhe në detaje ne jemi të hapur për të diskutuar çdo zgjidhje strukturore të asaj substance, me kushtin që ligjin ta bëjmë më të mirë e më të fortë. Ndërkohë, nuk do të pranojmë asnjë lloj vonese dhe nuk ka negociim në lidhje me faktin që kriminelët duhet të largohen menjëherë nga parlamenti i Shqipërisë.

-A ka ndonjë gjë që ju mund të tërhiqeni siç mund të jetë pershembull testi i drogës?

Unë nuk besoj se kemi vendosur gjëra të tepërta në këtë projekligj. Unë besoj se janë të gjitha çështje dhe zgjidhje përkatëse që i interesojnë opinionit publik. Të mos ketë kriminelë dhe persona të padenjë në parlament dhe në politikë. Nëse do të ketë probleme dhe halle të PS-së, le ti bëjë publike. Ne do ti diskutojmë. Ato gjëra që do të çojnë në pamundësi për dekriminalizim, nuk pranohen në asnjë rast.

-Një ligj si “Sevenino” që edhe kryeministri e ka pranuar diçka të tillë?

Ky ligj që ne kemi propozuar ndjek modelin Severino. Ky ligj ka sjellë në Itali që mjaft persona të lenë mandatin duke përfshirë një numër të madh personash të njohur siç ishte dhe Berluskoni. Ligji i ynë shkon drejt të njëtit model. Sigurisht, reflekton problematikën e rënduar shqiptare dhe nëse janë dakord me strukturën e këtij ligji dhe zgjidhjet që ne japim aty, për faktin që është edhe Komisioni i Venecias ai që na ka dhënë rrugë për mënyrën se si ti japim zgjidhje, besoj se nuk do të kemi vështirësi vetëm nëse kanë halle të mëdha që do të dalin më pas emra të tjera që mund ti pengojë ata.

-Ky ligj nuk kaloi në kalendarin 3 javor të punimeve por në programin 2 mujor të punës në Kuvend. Z.Basha kishte pritshmëri që ky ligj të kalojë Brenda muajit shtator?

Eshtë e turpshme që kjo mazhorancë fshihet pas justifikimeve teknike për të penguar futjen e këtij ligji por, së fundmi, u vendos në program, por jo në kalendar. Ne do të vazhdojmë të insistojmë që ai të jetë menjëherë në shqyrtim. Komisioni i dekriminalizmit nuk pengohet. Ne do ta shqyrtojmë. Por mund t’u kujtohet që qendruan deri në orën 5 të mëngjesit për ligjin e arsimit për interesin dhe protestën e studentëve, pedagogët, familjet e studentëve për atë ligj që shkatërron arsimin shqiptar, vetëm që ta fusnin në seancën e radhës, në rastin e dekriminalizimit kur interesi është për të nxjerrë nga parlamenti kriminelët, z.Rama gjen çdo lloj fustifikimi për ta zvarritur që të mos futet. Nuk ka më mundësi dhe është në keqbesim sot me marrëveshjen e 24 Dhjetorit. Ne nuk do t’i japim mundësinë ta zgjasë më tej. E vetmja gjë që zgjidh është bashkëpunimi i tij për ti dhënë fund këtij problemi të madh.

Prononcim për mediat i kryetarit të Komisionit Parlamentar për Dekriminalizimin Oerd Bylykbashi, 11 Shtator 2015

Partia Demokratike njofton të gjithë anëtarët, militantët, dhe simpatizantët e saj si dhe mbarë qytetarët se nesër në orën 10:45 do të zhvillohen homazhe në nder të Heroit të Demokracisë, Azem Hajdari, pranë memorialit të tij në rrugën Abdi Toptani.

Heroi i Demokracisë Azem Hajdari u vra 17 vite më parë nga dora e krimit të lidhur me pushtetin. Demokratët dhe mbarë qytetarët janë të ftuar nesër në nderimin e liderit të Lëvizjes së Dhjetorit, simbolit të demokracisë, Azem Hajdari. Idealet dhe aspiratat e Azemit, kauza për të cilën ai luftoi, janë sot më aktuale se kurrë.