Blog

Edi Rama është shkelësi i parë i ligjit të zgjedhjeve, pasi ka ndërruar qendrën e tij të votimit 5 ditë para votimit të 21 qershorit.

Duke mos e konsideruar rregullin e ligjin, duke i shkelur me këmbë me vetëdije të plotë, Edi Rama ka paraqitur kërkesën për të votuar në qendrën pranë sarajeve të tij në Surrel, vetëm 5 ditë para zgjedhjeve.

Ja ku kemi këtu kërkesën e të interesuarit, Edi Rama regjistruar me datë 16 qershor.

Kodi Zgjedhor thotë shprehimisht, se ndryshimi i qendrës së votimit bëhet vetëm në rastet kur ka pasaktësi ose kur emri i votuesit nuk ka dalë në qendrën e tij të votimit. Nëse lista është shpallur, qytetari voton në qendrën e votimit ku është shpallur lista, edhe nëse ndërron vendin e banimit.

Me një kërkim të thjeshtë, del se emri i Edi Ramës është shpallur me 11 maj në qendrën e tij të mëparshme të votimit, në shkollën Pjetër Budi. Pra, pas kësaj, ai nuk mund të votonte diku tjetër. Në fakt, ligji u shkel, dhe z.Rama u shfaq si votues i Surrelit.

Ky nuk është një akt i izoluar, një aksident, apo një neglizhencë e pafat.

Eshtë lehtësia me të cilën Edi Rama nëpërkëmb ligjin, rregullin, sistemin. Eshtë lehtësia me të cilën janë bërë manipulimet masive në këto zgjedhje. Eshtë lehtësia me të cilën është shkelur ligji në dhjetra e qindra qendra votimi, me transferime votuesish, siç ka ndodhur me votuesin e Surrelit.

Duke qënë vetë ai në krye të makinës së manipulimit, Edi Rama nuk e ka për gjë që drejtpërdrejt të shkelë ligjin, Kodin Zgjedhor.

Kjo është damka e këtyre zgjedhjeve, ku vota u ble masivisht, ku ligji u shkel e u nëpërkëmb, ku manipulimet njohën nivele skandaloze.

Partia Demokratike do ta thellojë çdo ditë aksionin e saj në denoncimin e shkeljeve dhe manipulimit të zgjedhjeve. Qytetarët shqiptarë meritojnë vetëm zgjedhje të lira e të ndershme.

Deklaratë për shtyp e kryetarit të Grupit Parlamentar, Edi Paloka, 15 Korrik 2015

Negociatat mes SHBA, 5 fuqive botërore dhe Iranit u mbyllën me një marrëveshje. Partia Demokratike e Shqipërisë përshëndet palët negociatore për arritjen e kësaj marrëveshje me rëndësi historike për ndalimin e përhapjes së armëve bërthamore dhe që përbën një ogur të mirë për paqen në Lindjen e Mesme. Partia Demokratike bashkohet me qendrimin e partnerëve tanë strategjike Shteteve të Bashkuara të Amerikës dhe Bashkimit Europian në këtë përpjekje.

Njoftim për shtyp i Partisë Demokratike, 14 Korrik 2015

Takimi me Presidentin Shultz shkoi jashtëzakonisht mirë. Unë e falenderova Presidentin Shultz për mbështetjen e madhe që i ka dhënë proceseve demokratike në Shqipëri, e në veçanti procesit të dekriminalizimit. Ishte falë mbështetjes së tij personale që në 24 Dhjetor të vitit të kaluar, u arrit Marëveshja për Dekriminalizimin. Për fat të keq, siç jemi të gjithë dëshmitarë, kjo marëveshje nuk ka funksionuar deri më sot, për shkak të mungesës së vullnetit politik nga ana e dyshes Rama-Meta. Ndava këtë shqetësim madhor me Presidentin Shultz si dhe faktin se në vend të dekriminalizimit të jetës parlamentare, u shkua përpara me kokëfortësi  drejt  kriminalizimit të pushtetit vendor përmes kandidimit të personave me rekorde kriminale për kryetar bashkish nga dyshja Rama Meta, si dhe ndava shqetësimet  e mëdha për zhbërjen e standardeve zgjedhore gjatë zgjedhjeve të 21 Qershorit.

Diskutuam për tri problemet kryesore, për tri sfidat e mëdha ekzistenciale me të cilat ballafaqohet demokracia sot dhe e ardhmja europiane e Shqipërisë, që janë krimi, korrupsioni dhe zgjedhjet e lira dhe të ndershme. Me Presidentin Shultz, ndamë pikëpamjen se, me një angazhim konstruktiv  te palëve, do të ishte rruga e duhur për  tëzgjidhur këto probleme ekzistenciale dhe unë e sigurova se Partia demokratike dhe opozita dhe unë personalisht jemi të angazhuar dhe të vendosur për të ecur përpara me përparësitë,  duke nisur së pari me dekriminalizimin duke bërë të qartë se, nuk mund të ketë integrim europian të vendit me kriminelë në parlament e kryetarë bashkish. Nuk mund të ketë, nuk mund të pretendohet dhe është e pasinqertë, çdo ligjërim, çdo retorikë, çdo përbetim për të ardhmen europiane të Shqipërisë, kur e sotmja kutërbon nga akte të papërgjegjshme politike siç  është kandidimi i personave me rekorde kriminale për kryetarë bashkish apo mbajtja në Parlament e personave me rekorde kriminale.

Së dyti, problemi themelor është ai i votës, i zgjedhjeve të lira dhe të ndershme. Kërkova ndihmën e Presidentit të Parlamentit Europian, që në bazë të raporteve fillestare dhe përfundimtare të OSBE-ODHIR dhe Këshillit të Evropës të rikthejmë në vëmendje të institucioneve evropiane domosdoshmërinë për të vepruar si në rrafshin legjislativ dhe institucional, edhe në rrafshin politik për të rikthyer standardet zgjedhore që u shkatërruan nga kjo dyshe, nga kjo mazhorancë në 21 Qershor.

Dhe së treti për luftën ndaj korrupsionit i cili është i lidhur me krimin dhe me zgjedhjet e kapura, 150 milion dollarë  që i mungojnë doganave dhe tatimeve të shtetit, një pjesë e të cilave padyshim janë përdorur për të blerë masivisht votat në procesin e 21 Qershorit, por nga ana tjetër 150 milionë dollarë që i mungojnë pensioneve, rrogave, shkollave, shëndetësisë, ndihmës ekonomike, sepse kanë përfunduar në xhepat e oligarikisë dhe klientelës  qeveritare, janë një këmbanë konkrete alarmi për shkallën e lartë të korrupsionit, në të cilën po e zhyt Shqipërinë papërgjegjshmëria dhe korrupsioni i qeverisë Rama-  Meta.

Këto janë probleme të mëdha, probleme, për të cilët Partia Demokratike është e vendosur të luftojë deri në fund me të gjithë forcën e saj dhe të mbështetësve të saj, por janë po kështu probleme të mëdha dhe për Bashkimin Europian. Ndaj kam kërkuar ndihmën e Presidentit Shultz, që përveç president i një  institucioni shumë të rëndësishëm siç është Parlamenti Europian, është një figurë e nderuar e të majtës europiane, në mënyrë që për hir të Shqipërisë, për hir të shqiptarëve, për hir të vlerave dhe të parimeve për të cilët qëndron Bashkimi Evropian, të përpiqemi së bashku dhe kam bindjen e plotë se do të përpiqemi së bashku, për ti dhënë  Shqipërisë dhe shqiptarëve atë që meritojnë.

Pyetje: Z.Basha, kancelarja Merkel vizitoi Tiranën dhe po ashtu ndihmëssekretarja e Shtetit dhe kryetari i Parlamentit Europian. Pse kjo qasje ndaj rajonit dhe në veçanti ndaj Shqipërisë?

Basha: Kjo është një shenjë e qartë e qendrave të rëndësishme vendimmarrëse euroatlantike e shqetësimit për zhvillimet në rajon. Kjo është shprehur prej më shumë se dy vitesh nga të gjithë zërat e rendësishëm të vendimarrrjes euroatlamentike që nga Sekretari i Shtetit Kerri, Presidenti Shultz, vetë kryetari i Komisionit Juncker e shumë të tjerë, shqetësimi se në vend të kompletimit të procesit demokratik dhe të shtetit ligjor, vendet e Ballkanit Perëndimor në tërësi dhe Shqipëria në veçanti janë të ekspozuara nga rreziku i prapsimit demokratik, i zhbërjes së standardeve demokratike, i kapjes së shtetit dhe zëvendësimit të sundimit të ligjit me sundimin e krimit dhe korrupsionit.

Eshtë një mundësi e jashtëzakonshme për të gjithë, jo vetëm për opozitën, të bashkojmë forcat me të gjithë ata pavarësisht angazhimit politik apo mosangazhimit politik për të mos lejuar zhbërjen e standardeve demokratike, për të shpëtuar demokracinë që fillon me shpëtimin e zgjedhjeve të lira dhe të ndershme dhe për t’iu përveshur për një lufte të pakompromis kundër krimit dhe korrupsionit dhe kundër fenomenit të shëmtuar të veshjes së krimit me pushtet dhe të investimit të pushtetit në krim.

Pyetje: Z.Basha, pse PD po e vonon analizën e zgjedhjeve të 21 Qershorit?

Basha: E keni gabim. Nuk po e vonon aspak. Procesi sapo ka nisur dhe do të vazhdojë me efiçencë të madhe dhe pa asnjë vonesë.

Pyetje: Z.Basha do të ketë largim të kryetarëve të degëve pasi në statut nuk ka diçka të tillë?

Basha: Spekulimet për koka turku mesa duket bëhen për tirazh sepse Partia Demokratike nuk ka qënë dhe nuk është parti që bën koka turku. Por është një parti që merr përgjegjësi, merr vendime, konfirmon besimin aty ku besimi është dhënë, rivendos besimin aty ku besimi duhet rivendosur.

Pyetje: Z.Basha, ka pasur dhe një deklaratë nga kryetari i republikanëve z.Mediu për një afrim të PD-së me LSI-në. Çfarë të vërtete ka në këtë mes?

Basha: Nuk e kam lexuar deklaratën për të cilën bëhet fjalë por me siguri ju do ta keni keqkuptuar. Partia Demokratike nuk bën zgjedhje mes dy të këqijave, të keqen më të vogël për shqiptarët, por ka zgjedhur të jetë në krah të shqiptarëve për të luftuar çdo të keqe. Partia Demokratike dhe demokratët nuk kanë interes kryesor ti hipin kalit apo gomarit të pushtetit por kanë interes kryesor të heqin zgjedhën e atyre që kanë shaluar shqiptarët duke kapur zgjedhjet, duke kapur institucionet, duke punësuar krimin, duke ngritur korrupsionin në nivele të panjohura. Pra ne kemi një betejë misionare, një betejë për interesat e shqiptarëve dhe aleancën tonë e kemi me shqiptarët dhe vetëm me shqiptarët.

Pyetje: Në këto kushte besoni se do të kryhet reforma në drejtësi?

Basha: Për reformën në drejtësi, siç e keni parë, me ndërhyrjen e Shteteve të Bashkuara të Amerikës dhe Bashkimit Europian, dhe dua të falenderoj në veçanti përfaqësuesit e tyre në Tiranë, dje është qartësuar ajo që na ishte thënë javën e kaluar; paritetin në komisionin “Ad hoc” të reformës. Partia Demokratike ka qënë dhe është e gatshme të marrë përsipër të gjithë përgjegjësitë që i takojnë. Ne kemi vizionin dhe platformën për një drejtësi të pastruar nga korrupsioni, të përgjegjshme dhe transparente para publikut, të shpejtë dhe jo të vonuar, të pakapur nga politika. Këtë vizion dhe platformë, eskpertizën tonë që siç e dini është jo vetëm e bollshme por edhe e njohur nga parnerët ndërkombëtarë si superiore, do ta vëmë në funksion të një procesi gjithpërfshirës, konsensual, transparent dhe me ndihmën e institucioneve ndërkombëtare. Ne kemi vullnetin e mirë dhe mbetet të shikohet nëse edhe shumica do ta ketë këtë vullnet.

Prononcim për mediat i kryetarit të PD, Lulzim Basha, pas takimit me Presidentin e Parlamentit Europian, Martin Shultz, 14 Qershor 2015

Z Basha, cili ishte tema e bisedimeve me ndihmëssekretaren e Shtetit znj.Nuland?

Basha: Së pari, dua të falenderoj ndihmëssekretaren e Shtetit znj.Nuland për vemëndjen e madhe që i jep Shqipërisë dhe mbështetjen e madhe që i ka dhënë dhe vazhdon ti japë popullit shqiptar në kauzën e demokracisë, të shtetit ligjor, të luftës kundër krimit dhe korrupsionit, që siç i ka cilësuar vetë ndihmës-sekretarja Nuland janë dy tumoret kanceroze të Shqipërisë dhe Ballkanit  Perëndimor. Në këtë takim pata mundësinë ta njoh me zhvillimet e fundit duke nisur me zgjedhjet e 21 Qershorit ku për fat të keq paralajmërimi i Komitetit të Helsinkit të Kongresit Amerikan u vërtetua. Pavarësisht thirrjeve nga ligjvënësit amerikanë që të organizohej një proces zgjedhor ku publiku dhe qytetarët të kishin besim në votën e tyre dhe mos-prekjen e votës, një proces ku të mos intimidoheshin, kërcënoheshin dhe të viheshin nën presion institucionet zgjedhore, zgjedhësit, vëzhguesit, komisionerët dhe opozita, për fat të keq, siç vërteton dhe raporti paraprak i OSBE/ODIHR-it, raporti i Këshillit të Europës, vetë deklarata e Ambasadës së Shteteve të Bashkuara të Amerikës pas zgjedhjeve, ishte pikërisht kjo që ndodhi.

Pati blerje masive të votës, pati presion mbi votuesit, mbi administratën, mbi institucionet zgjedhore, mbi opozitën, mbi aktivistët. Pati përfshirje masive të kontigjenteve kriminale dhe krimit të organizuar dhe krimit ordiner si dhe kandidim të personave me rekorde kriminale pavarësisht se komuniteti ndërkombëtar në tërësi dhe Shtetet e Bashkuara të Amerikës në veçanti kërkuan tërheqjen e tyre, siç ishte rasti i Elvis Roshit dhe Artur Bushit në zgjedhjet që sapo lamë pas.

Këto probleme përsa i përket mbetjes në vend të procesit të dekriminalizimit për shkak të mungesës së vullnetit nga maxhoranca, nga dyshja Rama-Meta, problem i madh i korrupsionit i cili vetëm këto 5 muaj i ka kushtuar shqiptarëve 150 milionë dollarë në tatime dhe dogana, para që duhet të shkonin për rritje rrogash, pensionesh e rritje të ndihmës ekonomike, për shkolla, qendra shëndetësore, por që në fakt janë vjedhur nga doganat dhe tatimet e shqiptarëve,  pra problemet e asaj që quhet zhbërje të standardeve demokratike, prapsim i procesit demokratik, dhe probleme të krimit dhe korrupsionit, kanë dominuar pjesën kryesore të bisedës me ndihmëssekretaren Nuland.

Pyetje: Z Basha, çfarë keni marrë mbrapsht nga znj.Nuland në çështjet që keni ngritur?

Z Basha: Kam marrë mbështetjen e plotë nga ndihmëssekretarja e Shtetit znj.Nuland, të SHBA-ve, për përpjekjet e Partisë Demokratike dhe platformën tonë për të trajtuar këto probleme kryesore të demokracisë shqiptare. Pikësëpari çështjen e dekriminalizimit, për të ecur përpara me axhendën tonë të dekriminalizimit në mënyrë që qytetarët shqiptarë të kenë atë që meritojnë, një parlament dhe pushtet vendor të pastër nga personat me rekorde kriminale. Kjo do të thotë se Partia Demokratike do të vazhdojë të ecë përpara me plaftomën e saj duke çuar propozimet konkrete edhe njëherë, për herë të dytë në parlament me qëllim që kushdo që sot është anëtar i parlamentit apo kryetar i njësive vendore të dalë nga 21 Qershori dhe që ka rekorde të tmerrshme kriminale, të ndalohet nga mbajtja dhe ushtrimi i funksioneve të zyrave përkatëse. Pra largimi nga parlamenti shqiptar dhe nga pushteti vendor i personave me rekorde të tmerrshme kriminale dhe ndalimi po kështu përmes akteve ligjore që ne do të propozojmë dhe një strukture institucionale që po kështu do ta propozojmë, i kandidimit të tyre në të ardhmen duke filluar me zgjedhjet e ardhshme parlamentare.

Pyetje: Do ti hidhni në tryezën e komisionit të dekriminalizmit?

Basha: Ne i kemi hedhur një herë. Janë injoruar nga shumica. Tani do ti hedhim përsëri me mbështetjen e plotë të SHBA-ve, kam besim edhe të Bashkimit Europian. Së dyti, po kështu, kemi një mbështetje të plotë për axhendën tonë për të vënë përpara përgjegjësisë ligjore dhe politike të gjithë ata që shkatërruar standardet e zgjedhjeve të 21 Qershorit. Ne sigurisht do të procedojmë me kallzimet tona rast pas rasti për ti vënë përpara përgjegjësisë penale ata që kërcënuan, intimiduan, ushtruan dhunë, ushtruan presion, goditën qytetarët e zgjedhësit, aktivistët e opozitës në këto zgjedhje dhe po kështu, do të ecim përpara me propozime konkrete të cilat do të synojnë pamundësimin e manipulimeve në shkallë të gjërë, në veçanti sa ka të bëjë me identifikimin e votuesve me karta e identitetit që u blenë e u shitën, u mblodhën në kundërshtim me ligjin.

Dhe po kështu në raport me fenomenin e shëmtuar të shitblerjes së votës që blihen me paratë e krimit dhe korrupsionit si dhe shumë çështje të tjera të deformimit të vullnetit zgjedhësve siç treguan dhe raportet ndërkombëtare. Pra edhe kuadër të luftës tonë për zgjedhje të lira dhe të ndershme, mora mbështetjen e plotë të ndihmës-sekretares së Shtetit znj.Nuland. Folëm edhe për një sërë çështjesh të tjera ku u vlerësua qëndrimi i Partisë Demokratike në raport me integritetin e personave që kërkojnë zyrë publike dhe çfarë kemi bërë ne si parti në këtë drejtim si dhe me vizionin e kësaj partie dhe timin si kryetar i saj, për ti ofruar shqiptarëve atë që meritojnë në 2015 dhe më tej; një Shqipëri me standard të shekullit të 21-të dhe jo një kthim prapa në praktikat më të errëta të fillimit të këtij shekulli.

Pyetje: Z Basha, a prekët edhe problemet ekonomike të vendit në lidhje me problemet që ka vendi si taksa problesive, çështja e pronës etj?

Basha: Këto çështje janë sigurisht pjesë e bisedës me zyrtarë të lartë të SHBA-ve por për Partinë Demokratike thelbi i problemit është krimi i ngritur në pushtet dhe i veshur me pushtet, pushteti që ka investuar tek krimi, është korrupsioni që tashmë ka kapur qeverisjen në të gjitha nivelet, siç thotë raporti i Departametit Amerikan të Shtetit, është zhbërja e standardeve demokratike. Këto janë tumoret kanceroze në një stad të avancuar:  regjimi i konsoliduar i krimit dhe korrupsionit që përbën sfidën më të madhe për sigurinë dhe mirëqënien e qytetarë shqiptarë dhe para të cilave qëndron e vendosur për betejë deri në fitore Partia Demorkatike dhe unë personalisht.

Prononcim për mediat i kreut të opozitës Lulzim Basha, pas takimit me ndihmës-sekretaren amerikane të Shtetit znj.Nuland. 13 Korrik 2015

Çmimi i naftës në Shqipëri po arrin shifrat rekord duke shkaktuar dhe më shumë kosto e varferi tek qytetarët, ndersa qeveria vazhdon të kundrojë nga larg këtë plagë ekonomike.

Çmimi i naftës ka arritur deri në 190 lekë litri, më i shtrenjti në rajon e më gjerë, duke ndikuar në shtrëngimin edhe më tej të jetesës.

Ndërkohë, Edi Rama vazhdon me kokëfortësi te mbaja taksat e rritura mbi qarkullimin duke refuzuar të ulë keshtu çmimin e naftës.

Shqipëria është i vetmi vend që çmimi i naftës vazhdon të rritet ndërkohë që prej dy vitesh nuk rriten me asnjë qindarkë pagat e pensionet. Nga këto tarifa e çmime skandaloze po përfitojnë miqtë dhe klientet e qeverisë, që pasurohen çdo ditë në kurriz të qytetarëve.

Partia Demokratike i bën sërish thirrje qeverise të heqë taksën e qarkullimit dhe të ulë kështu çmimin e naftës e të lehtësojë jetën e shqiptarëve.

Deklaratë për mediat e deputetit, Gerti Bogdani. 11 Korrik 2015

Jam e ndërgjegjshme që sot mund të jemi ende të entuziazmuar nga vizita e djeshme historike e kancelares Merkel në vendin tonë, e cila sigurisht që duhet përshëndetur. Një vizitë, që përpos kënaqësisë që zakonisht vjen kur një vend i fuqishëm hedh sytë nga ne, duhet të na japë më shumë guximin për të reflektuar mbi atë çfarë jemi, një vend i cili ka statusin e vendit kandidat, pret hapjen e negociatave e ndërkohë që vuan e lëngon, kur sheh eksodin si mënyrë shpëtimi njësoj si 25 vjet më parë. Një paradoks, të cilin ia kujtoi edhe kancelarja Merkel kapitenit të qeverisë .

Përndryshe, do të rifutemi në qarkun e përhershëm të llomotitjeve të pafundme për rritje ekonomike, papunësi në rënie edhe për të gjetur justifikimin e të larguarve nga vendi jonë drejt Gjermanisë me përmasa të afërta me ato të Sirisë, se kanë shkuar në Gjermani për të gjetur punë. E çuditshme, kur në Shqipëri, të paktën sipas ligjërimit qeveritar, ne kemi një rritje të punësimit me rreth 100 mijë të punësuar më shumë. Jemi në vitin e dytë të qeverisjes suaj dhe politika fiskale që keni ndjekur deri më tani kanë qenë ato të rritjes së taksave dhe rëndimit të xhepit të konsumatorit, shtrëngimit të lakut për ekonominë dhe bizneset. Këtë ua kanë kujtuar edhe para dy muajsh investitorët gjermanë, meqenëse kritikat që ju vijnë nga ato që flasin shqip juve përgjithësisht nuk para i pëlqeni.

Ndonëse, dëshmia më e qartë e politikës suaj fiskale reflektohet më së miri, për fatin tonë të keq, në çdo fund muaji ku të dhënat e Ministrisë së Financave, Bankës së Shqipërisë apo edhe të INSTAT, dëshmojë tollovinë që politikat tuaja bëjnë. Duke thelluar akoma më shumë krizën. Të ardhurat nga tatimi dhe doganat për 5 mujorin janë 11 miliard lekë më pak se sa parashikimi i qeverisë. Për të dytën herë Doganat dështojnë në mbledhjet e të ardhurave duke mbledhur 6.5% më pak se sa viti 2014, pra 28 milionë euro më pak. Justifikimi i drejtorisë së doganave është se kjo rënie vjen si pasojë e rënies së çmimit të naftës në bursat ndërkombëtare, duke ngritur kështu një tjetër pyetje; Si ka mundësi që ne si shtet mbledhim më pak të ardhura sepse çmimi i naftës në bursën ndërkombëtare është i ulët ndërkohë që shpenzojmë më shumë të ardhura nga xhepi jonë sepse çmimi i naftës në vendin tonë është më i larti në rajon?

Madje, vetë zëri i “Taksave Nacionale” që përfshin brenda saj Taksën e Qarkullimit, që vetëm këtë vit u rrit me 10 lek/litër është mbledhur 2.5 miliard lekë më pak se sa parashikimi. Sikundër edhe Akciza e cigares që u rrit për të dytin vit radhazi në 110 lek/paketë rezulton të jetë mbledhur 4.5 miliard lekë më pak se sa plani qeveritar.

Ky pesë mujor është pasqyra e qartë e tollovisë qeveritare që keni katranosur në çorbën rilindase për ekonominë e vendit. Të dhënat dhe shifrat mbi ekonominë dhe afarizmin dëshmojnë qartë se vendi është zhytur në një gjendje kllapie dhe po shpëton jo sepse qeveria po injekton fonde në shërbim të rigjallërimit të jetës, por sepse ajo po tërheq fonde parash në formë borxhi për të mbajtur në këmbë një ekonomi që po e rrënon dita ditës.

Të dhënat që kanë si burim INSTAT flasin për një gjendje anemike të shportës së shpenzimeve, ndërkohë që raporti i Bankës së Shqipërisë përmend me shqetësim se kostot e financimit të sektorit privat dhe publik janë në minimumin e tyre historik. Për të mos përmendur më tej se të ardhurat nga TVSH-ja, që është zëri kryesor në buxhetin e shtetit, shënojnë rënien prej 6.4% apo 3.2 miliardë lek më pak se sa e njëjta periudhë e një viti më parë. Nga krahu tjetër, shqiptarët në pesë muaj kanë paguar 3.2 miliard lekë më pak tatime nga të ardhurat e tyre personale, nga plani që ishte parashikuar për këtë zë në buxhet. Pra, janë mbledhur 22.2% më pak dhe nuk duhet harruar se të ardhurat e 5 muajve të parë të këtij viti janë të niveleve të ngjashme me të ardhurat e arkëtuara në të njëjtën periudhë të një viti më parë. Duke i lënë dy mundësi zgjedhjeje qeverisë; e para të pranojë dështimin e saj fiskal që si pasojë ka sjellë një fshehje të pasurisë apo në rast të kundërt të pranojë dështimin e saj për të prodhuar një ekonomi të shkallës, duke qenë se sot shqiptarët nuk kanë mundësi të paguajnë taksat e larta për një ekonomi kaq të varfër sa kjo e jona.

E gjithë kjo rritje e tmerrshme taksash shoqëruar me parashikimin tejet optimist të qeverisë duhet të kishin sjellë në buxhetin e shtetit një rritje të të ardhurave me së paku 10 përqind. Por, ka ndodhur e kundërta, të ardhurat në total janë 6.7 miliard lekë më pak se sa plani qeveritar, që përkthehet në -4.2% në krahasim me çfarë kishin përllogaritur.

Ajo rritja me 5%, në krahasim me vitin e shkuar, nuk vjen si pasojë e politikave fiskale apo funksionimit të ekonomisë. Kjo rritje në krahasim me vitin e shkuar vjen si pasojë e rritjes së zërit tek Të Ardhurat Jotatimore, apo thënë më shqeto janë sërishmi tarifat që shqiptarët nuk mund t’u shmangen dot që sjellin si pasojë rritjen e të ardhurave.

Peshën më të madhe të rritjes prej 5% sot po e mbajnë në kurriz familjet e varfra, familjet e thjeshta, ato që jetojnë në qytetet që janë shndërruar si geto. Që heqin nga goja e tyre kafshatën e përditshme për të mbledhur paratë që të paguajnë shtrenjtimin me dhjetë fish të Tarifave të Shkollimit, e gjasat janë që ato të paguajnë akoma më shumë përgjatë dy viteve të ardhshme. Kjo është Shqipëria jonë.

Nuk është Shqipëria, përralla e përditshme që dëgjojmë në televizor, ajo e 100 mijë të punësuarve dhe as nuk është vendi jonë në një shpërthim të eksporteve siç ministri gënjente një muaj më parë. Kur, nga kjo foltore plot krenari na foli për një rritje me 11.9% të eksporteve që na rezultoi në të vërtetë jo vetëm që nuk kishim rritje por që fatkeqësisht të kishim patur një rënie prej 4% në krahasim me një vit më parë.

Shqipëria e shifrave është dëshmia më e qartë e diferencës mes fakteve, të dhënave dhe argumenteve përballë së cilës qëndron qeveria bashkë me shtrembërimin e dhimbshëm të këtij realiteti. Shtrembërim që bie mbi kurrizin e qytetarëve. Pas pak ditësh do të na duhet të flasim mbi ndryshimin e këtij buxheti, i cili nga fjalët e kryeministrit duhet të ishte një buxhet historik. Por që si përherë rezultoi të ishte historik vetëm në ligjërim. Duhet të ndryshojë ky buxhet sepse edhe aktorët ndërkombëtarë si FMN dhe BB kanë shprehur shqetësimin e tyre të madh mbi mbledhjen e të ardhurave që ka ndikuar drejtë për drejtë në uljen e shpenzimeve qeveritare. Gjatë pesë muajve të parë të vitit është shpenzuar 14 miliardë lekë më pak se sa parashikimi apo thënë më thjeshtë, qeveria ka shpenzuar vetëm 1% të Produktit të Brendshëm Bruto. Kjo reflektohet qartësisht në situatën e dobët të investimeve publike në shërbim të komunitetit.

Pastaj, sikur të mos mjaftonte kjo, buxheti i këtij viti i ka trajtuar shtresat në nevojë si një trup i huaj brenda kësaj shoqërie. Sa që hera herës më duket se qeveria socialiste e cila në programin e saj beson tek pariteti absolut dhe drejtësia sociale, më shumë ka përzemër fasadat institucionale në raste pritje e përcjelljesh se sa këto qytetarë. E meqenëse kam folur shpesh nga kjo foltore edhe për to dua t’ju sjell të dhënat mbi fondet që qeveria ka dhënë për shtresat në nevojë nga Janari deri në Maj 2015.

Sipas këtyre të dhënave, buxheti i shtetit ka akorduar 8.54 miliard lekë për këto shtresa, ku përfshihen zërat e Pagesës së Papunësisë, Ndihmës Ekonomike, Kompensimin për ish të Përndjekurit Politikë dhe Kompensimin për Shtresat në Nevojë. I fundmi prej të cilëve duhet të rimbursonte rritjen e çmimit të energjisë elektrike për këtë shtresë dhe që ironikisht nuk është disbursuar ende, duke mbetur në kuotën e zero lekëve të dhëna nga shteti në favor të personave që energjia elektrike u vjen më shtrenjtë në shtëpi.

Akoma dhe më cinike bëhet situata, kur super buxheti prej kaposhi është shndërruar në një thelë e cila fondin për këto shtresa e ka edhe më të vogël jo vetëm se viti 2014, apo 2013 por edhe se viti 2012 në të cilin fondi i akorduar nga qeveria ka qenë 9.46 miliardë lekë, 920 milionë lekë më shumë të akorduara tre vjet më parë se sa sot. Kur tri vite më parë nuk kemi pasur as çmim më të lartë energjie dhe as fasho për shtresat në nevojë.

Tani, për këtë ka dy mundësi që qeveria bën mirë të na i thotë; Mundësia e parë është që shqiptarët sot të jenë më të pasur se sa dje aq sa ato të mos kenë nevojë për këtë ndihmë ekonomike; dhe mundësia e dytë lidhet me abuzimin qeveritar me fondet e personave më të pamundur. Atyre që ajo u premtoi devotshmëri dhe barazi!

Po. Sigurisht. Keto e më shumë. Taksa të larta por më pak të ardhura, biznese që pushojnë njerëz nga puna, biznese që deklarojnë më pak të ardhura. Investime të huaja në rënie e asnjë investim publik e sigurisht asnjë shpenzim për shtresat në nevojë. Por nga ana tjetër rritje të kontrabandës së duhanit e të karburantit. Po, sot duket se asgjë nuk bën përshtypje e asgjë nuk krijon përshtjellim. E siç duket ky është qëllimi që njerëzit të jenë aq të varfër sa të mos t’u bëjë përshtypje asgjë. Thjesht të jenë në pritje të zgjedhjeve të rradhës me shpresën se do përfitojnë diçka.

Fjala në Kuvend e deputetes të PD, Jorida Tabaku, 9 Korrik 2015

Të nderuar kolegë,

Marrëveshja e sotme, në momentin e parë mund të na duket se na e afron më shumë datën e hapjes së negociatave. Por nisur nga shpjegimet e përfaqësuesve të qeverisë, marrëveshja ka për qëllim kryesor mbulimin e kostos së biletave të personave që do marrin pjesë në programe me BE. Kaq shumë e thjeshtoi përfaqësuesja e qeverisë në komisionin e ligjeve! Pra e kuptoni se përtej emrit pompoz, marrëveshja nuk na e afron më shumë datën e hapjes së negociatave.

Ndërsa pregatisja fjalën, shtysën kryesore ma dha premtimi solemn i kryeministrit ndaj Kancelares Merkel se 5 prioritetet e vëna nga BE për hapjen e negociatave do na u plotësokan të gjitha deri në vjeshtë. Me siguri Merkel nuk e besoi, por as shqiptarë budallenj nuk ka që ta hanë këtë gënjeshtër.

5 prioritetet që u vunë në 2014, pas zgjedhjeve të 2013, sigurisht që nuk përfshijnë bërjen e zgjedhjeve në përputhje me standartet ndërkombëtare. Nuk e përfshijnë sepse zgjedhjet e 2013 e kishin kaluar atë test. Në fakt e kishin kaluar që në 2009.

Zgjedhjet janë më shumë se pjesë e Kritereve të Kopenhagenit për të hyrë në BE. Me negociata apo pa to, me antarësim në BE apo pa të, zgjedhjet e lira dhe të ndershme I duhen shqiptarëve. Shqipëtarëve i duhen zgjedhje dhe jo thejsht votime siç ishin këto të 2015.

Po le të shohim pak progresin e zgjedhjeve:

Në 2001, ODIHR u shpreh se zgjedhjet ishin një hap përpara në krahasim me zgjedhjet e kaluara. Imagjinoni vetë, një hap para nga zgjedhjet e 2000. Një hap para, pa asnjë koordintë se sa larg ishim nga arritja e standarteve.

Qeveria socialiste bëri çmos të fitonte, shkeli ligjin dhe standartet vetëm që të arrinte 84 mandate, të miratonte presidentin që donte dhe tí bënte ligjet me 3/5 e vetme. ODIHR vuri në pikëpyetje këtë shumicë të cilësuar vetëm për shkak të shkeljeve skandaloze që pa.

Në 2001 Shqipëria nuk kishte perspektivë për në BE. Asgjë nuk e shtynte qeverinë socialiste të përbushte kriterin e zgjedhjeve aso kohe.

Por në 2003, Samiti i Selanikut ku u përcaktua axhenda e integrimit europian të Ballkanit Perëndimor I dha një shtysë procesit demokratik. Kështu u bë reforma e parë konsensuale zgjedhore dhe zhdukja e problemit të policisë në zgjedhje qenë arritje.

Në 2003, ODIHR vulosi zgjedhjet si një shans I humbur për të arritur standartet ndërkombëtare. Progres shte i vogël. Shefi I misionit të ODIHR I cilësoi si një tango: dy hapa para dhe një hap prapa. Standartet shiheshin tashmë por ne ishim ende larg.

Në 2005 dhe 2007, raporti I ODIHR thote: Zgjedhjet u përputhën vetëm pjesërisht me angazhimet e OSBE-së dhe standarde të tjera ndërkombëtare për zgjedhje demokratike. Progres, por I pjesshëm. Sigurisht që nuk mund të kishte progress në 2007 po të kujtojmë bllokimin e pregatitjeve dhe shtyrjen e zgjedhjeve që shkaktoi Rama duke bllokuar listat e zgjedhësve në bashkitë dhe komunat e drejtuara nga socialistët.

Në 2005 punohej për MSA. Kjo e fundit u nënshkrua në 2006, pas zgjedhjeve. Më pas vendi u fut në reforma të thella për integrimin europian dhe euroatlantik. Pas zgjedhjeve të 2007, në vitin 2008 Shqipëria u antarësua në NATO. Përsëri zgjedhjet ishin kriter bazë politik.

Në 2009 ne aplikuam për antarësim para zgjedhjeve. Për zgjedhjet e atij viti, ODIHR për herë të parë vuri vulën e cilësisë. Zgjedhjet plotësuan shumicën dërrmuese të standarteve të OSBE, përfshirë standartet kyçe. Nuk pati manipulim të numërimit apo të rezultatit. Kështu u shpreh me shkrim ODIHR, edhe pse Rama kundërshtoi për 2 vjet rresht.

Punuam shumë në 2009-2010 për reforma dhe arritje standartesh. Iu përgjigjëm pyetësorit të BE, morëm liberalizimin e vizave por për shkak të bllokimit politik që Rama I bëri çdo reforme, statusi kandidat, sic e kujtoni, u shty.

Në 2011, zgjedhjet u quajtën kompetitive dhe transparente. Pa kompeticion, pa garë nuk ka zgjedhje demokratike. Edhe pretendimet e PS për transparencë mbetën bosh pas këtij vlerësimi. Por sigurisht, polarizimi që I bëri jetës politike Rama dhe PS nuk kaloi pa gjurmë.

Në 2012 nuk na e dhanë statusin. Vetë Komisioni Europian e pranoi se ishin përmbushur kushtet por kërkoi edhe 3 ligjet e famshme. U bënë edhe ato ligje në 2013, u bënë edhe zgjedhjet.

ODIHR u shpreh se zgjedhjet parlamentare të 23 qershorit 2013 ishin konkurruese, me pjesëmarrje aktive të shtetasve gjatë gjithë fushatës dhe respekt të mirëfilltë për liritë themelore. Të gjithë pranuam se ishin ndër zgjedhjet më të mira që kishim bërë.

Në tetor 2013, një muaj pasi qeveria e PD la zyrat, Komisioni Europian vendosi se Shqipëria I kishte plotësuar tashmë të gjitha kushtet për marrjen e statusit të vendit kandidat. Statusi u mor disa muaj më vonë.

Pra, në 2001, kur nuk kishte asnjë kushtëzim në kuadër të integrimit europian, qeveria socialiste e kishte mendjen vetëm tek fitorja. Me çdo kusht.
Për një dekadë, 2003-2013 kur Shqipëria u fut në procesin e integrimit, zgjedhjet shënuan progres. Çdo stacion, çdo benchmark i procesit të integrimit ishte shtysë për progress demokratik. Kjo është provë për fuqinë demokratizuese të këtij procesi.

Zgjedhjet e 2015 ishin të parat pas 10 vjetësh të organizuara nga socialistët, përfshirë ata që lëvizin sa majtas djathtas. Test i parë i madh për këtë qeveri.
Së paku të ruanin standartet e arritura që në 2009. Nuk qe e thënë. Raporti paraprak I ODIHR e ka nxirë të paktën katër herë duke gjetur po aq shkelje të standarteve të OSBE, përfshirë të drejtën për të kandiduar. Ky është standart bazë.

Po si ka mundësi? Socialistët nuk dinë të bëjnë zgjedhje? Jo, thjesht nuk duan. Sepse si në 2001, I intereson veç pushteti, me çdo mjet e çdo kusht.
A ka ndonjë objektiv apo afat në procesin e integrimit që duhet arritur e që të shërbejë si shtytje? Për fat të keq jo. Nuk është caktuar asnjë datë për hapjen e negociatave. Pra nuk shohim asnjë dritë jeshile, sado larg. Na kanë vënë 5 prioritete, por s’ka asnjë progress të dukshëm për to.

Edhe Kancelarja Merkel as që përmendi ndonjë perspektivë të shpejtë. Tha që BE ka si interes të sajin integrimin në BE të Ballkani Perëndimor. Shyqyr që Rama nuk ia ktheu: Shqipëria ka nevojë për Evropën ashtu siç Evropa ka nevojë për Shqipërinë. Tamam si politikan siçilian.

Fundja edhe zgjedhjet e 21 qershorit si në Siçili I bëri. Para, dhunë, banda, blerje vote, kërcënim për të mos votuar, blerje kartash, karta fallso, emigrant që votojnë pa ardhur në Shqipëri, kërcënim si të votosh, banditë si kandidatë, banditë si staf zgjedhor madje edhe si vëzhgues, etj.

Ky është moment I errët për demokracinë dhe aq më shumë për zgjedhjet demokratike. Egzistenca e një objektivi apo afati të lidhur me BE na ka tërhequr përpara për një dekadë rresht. Sot nuk ka më të tillë, ndaj zgjedhjet e 2015 u dërrmuan në standarte bazë.

Edi Rama ka provuar se kërkon gjithmonë pushtet, e ka atë si ujin, nuk bën dot pa të dhe është gati të shkelë çdo rregull të shtetit apo të partisë për ta marrë dhe për ta mbajtur pushtetin.

Në 2013 e mori me zgjedhje por për të nuk ka rëndësi që pushtetin duhet ta konfirmojë vetëm me zgjedhje. Qëllimi justifikon mjetin, qoftë ky mjet blerja e votës, presioni dhe dhuna mbi opozitën dhe median, etj.

Për ta ilustruar, në 2000 Edi Rama u zgjodh kryebashkiak I Tiranës dhe manipulimet për llogari të tij I bëri Ilir Meta kryeministër I asaj kohe. Në 2003 ju kujtohet katrahura e zgjedhjeve në Tiranë kur vetëm që të rrinte Rama në pushtet në Bashki, 1/3 e qendrave të votimit u shpartalluan dhe u desh përsëritja e votimit. Po kështu ju kujtohet si bllokoi zgjedhjet në gjithë Shqipërinë në 2007 me histori çertifikatash e bllokim listash zgjedhësish. Vetëm që të mbajë pushtetin.

Por tani është kryeministër, I gjithëfuqishëm në krye të regjimit të tij. Sot kur nuk ka një deadline konkret për hapjen e negociatave me BE. Pyetja që të vjen vetiu është: a I intereson hapja e negociatave Ramës? A e do ai integrimin europian? Integrimin që I heq pushtet një kryeministri, nuk I lë shteg për korrupsion, kërkon që kriminelët të jenë në burg e jo në parlament app bashki?

Florian Bieber, të cilin e përmenda para një jave na jep dekalogun e këshillave makiavelike per një autokrat ballkanik të shekullit të 21.

1. Merrni kontrollin e zgjedhjeve, jo në ditën e zgjedhjeve, por përpara

Juve ju duhet t’i fitoni zgjedhjet dhe të pranoheni nga të huajt gjithashtu. Ju duhet të dukeni si një demokrat i mirë në Ballkan. Princi im i dashur, kjo nuk do të thotë që ju duhet të jeni i tillë.

Së pari, shihini zgjedhjet si një mënyrë për t’u forcuar. Zgjidhni me kujdes momentin e zgjedhjeve: zgjedhjet e parakohshme mund t’ju ndihmojnë të kapni opozitën të papërgatitur dhe të bëni votimet kur popullariteti juaj ka arritur majat. Ofrojuni votuesve ca para, apo faluni faturat e papaguara të energjisë, ka shumë mënyra për të marrë vota për pak gjë. Ndonjëherë konsideroni ofrimin e ca parave për njerëzit që të mos votojnë (ju e dini se ata do të votonin për kundërshtarin tuaj).

2. Merrni nën kontroll median, sigurohuni të keni shumë zëra, që thonë të njëjtën gjë, dhe mbani edhe një qen rojë për ta sulur.

Për të mbajtur pushtetin nga brenda vendit, media është e domosdoshme. Një pjesë e vogël e mediave janë ekonomikisht të shëndetshme dhe mënyra më e mirë për t’i kontrolluar është t’u jepni reklama atyre që raportojnë mirë për ju (dhe mos harroni, ju jeni reklamuesi më i madh).

Shumë gazeta dhe stacione televizive zotërohen nga biznesmenë të errët lokalë, për të cilët s’do mend është e lehtë të gërmoni disa detyrime tatimore të papaguara.

Gazetarët mund të jenë shpeshherë paksa të bezdisshëm dhe mënyra më e mirë për t’u siguruar se po sillen mirë është t’i kërcënoni pak, jo në publik, por ushtroni prak presion mbi disa prej tyre. Shumica syresh do të jenë të lumtur të vetëcensurohen.

3. Flisni për BE-në dhe dëshirën për t’u anëtarësuar por luani ‘ngrij-shkrij’.

Dëshirojeni BE-në, por lëshoni njëfarë doze dykuptimësie. Të jeni shumë pro-europian këto kohë tingëllon si përpjekje shumë e sforcuar me një partner që, në fakt, nuk ju dëshiron. Kështu pra, hidhni disa dyshime mbi projektin e integrimit.

Dhe e keni parë sa herë kyeministri ka hedhur doza euroskepticizmi për gjoja lodhjen e shqiptarëve nga pritja, se Europa nuk kupton rëndësinë e integrimit të Ballkanit sa e kuptojnë ballkanasit. Se Shqipërisë I intereson Evropa po aq sa I intereson Evropës Shqipëria, dmth, po nuk pati interes Europa, nuk kemi as ne. Për pak do të shpallë doktrinën sovjetike të mosndërhyrjes reciproke në punët e brendëshme. Kulmin e arrin me kërcënimin prej cheguevaristi se po nuk na pranoi Europa, në qaftë pas veten se do t’i vijë ISIS.

4. Flisni për luftën ndaj korrupsionit dhe reformat. Flisni, flisni dhe arrestoni ndonjë.

Kush është në favor të korrupsionit? Askush. Kështu, nuk ka temë më të sigurtë për të bërë fushatë dhe për të folur tërë kohën. Është mirë që të pozicionoheni si një luftëtar i patrembur ndaj korrupsionit dhe të paraqisni çdo të korruptuar si kundërshtar të sundimit tuaj, duke hedhur kësisoj dyshime korrupsioni mbi opozitën tuaj.

Sigurisht, është e vështirë të qëndroni të pushtet pa toleruar pak korrupsion. Sigurohuni që të keni suksese rastësore, disa arreste dhe procese. Mbajeni vath në vesh se arrestet janë më të rëndësishme se vendimet gjyqësore. Gjithashtu kapni disa nga çunat tuaj. Ju bën të dukeni më serioz.

Edhe reportazhet për stilin modest të jetesës ju ndihmojnë shumë, si dhe deklaratat e pasurisë mund të trajtohen me njëfarë shkalle lirie letrare. Tamam si ajo historia se me 3.000 Euro bëhet një super vilë.

5. Zgjidhni problemet me fqinjët për të fituar lëvdata dhe krijoni disa të tjera për të qenë popullor

BE-ja dhe të huajt pëlqejnë të merreni vesh me fqinjët tuaj, kështu që flisni për bashkëpunimin rajonal, për faktin që ne të gjithë bashkëndajmë të ardhmen tonë europiane.

Në këtë kohë, problemet e reja apo të vjetra me fqinjët janë shumë të dobishëm brenda vendit. Asgjë nuk e shumëfishon popullaritetin tuaj më shumë se zënka me fqinjët.

Droni në Beograd, incidentet në vizitën e Beogradit, prishja e paktit detar duke lënë hapur një problem kufitar me një vend anëtar të BE gjë që do tw na rwndojw kur tw fillojmw negociatat pwr antarwsim, të gjitha këto janë kripë dhe piper në këtë çorbë.

6. Lidh miqësi të ndryshme me të huaj, disa do t’ju kenë qejf për çfarë jeni, disa për atë që pretendoni të jeni.

BE-ja është investitori, donatori dhe klienti juaj më i madh, por mos u fokusoni vetëm tek ajo. Flirtimi me të tjerë do ta bëjë BE-në paksa xheloze dhe do t’ju kushtojë më shumë vëmendje. Plus që ju mund të paraqiteni si origjinal. Është po ashtu me rëndësi të kini parasysh se donator dhe investitorë të tjerë kanë më pak kapistra apo kushte.

A e keni vënë re sa janë shtuar kompanitë aziatike që po marrin konçensione apo zona të lira industrial? Ata nuk venë kushte në luftën kundër korrupsionit.

7. Punësoni votuesit tuaj. Flakni kundërshtarët.

Mënyra më e mirë për të qëndruar në pushtet është të merrni në punë votuesit tuaj. Ka plot vende pune për të ofruar, nga këshilltarët tek sanitaret.
Nëse është e qartë se ajo që ka rëndësi është përkatësia në partinë tuaj, kjo do t’ju ndihmojë të mblidhni vota dhe mbështetje për partinë. Shumë nga shërbyesit tuaj civilë do të rekrutojnë dhjetëra votues vetëm që të ruajnë vendin e tyre të punës.

Oponentët tuaj mund të flaken në rrugë, nga administrata shtetërore apo bizneset private (në fund të fundit, me shumë gjasë ju kontrolloni pjesën më të madhe të financimeve shtetërore), apo edhe prindërit, motrat dhe vëllezërit e tyre. Ka plot mënyra t’i bëni të mendohen dy herë kur flasin për ju.

8. Sundimi i Ligjit, sundimi juaj, ligji juaj.

Ndërkombëtarët do të flasin e flasin për sundimin e ligjit. Është e rëndësishme të siguroheni që ligji të jetë mjaftueshëm i komplikuar sa të mos zbatohet gjerësisht, por të ekzistojë gjithmonë një hijë paligjshmrie mbi të, që të mund të përdoret, kur të jetë e nevojshme. Demonstruesit mund të gjobiten me gjoba të majme për bllokimin e trafikut. Rregulla të tjera të vogla mund t’ju ndihmojnë t’ju kujtoni atyre se ai që sundon është ligji juaj.

9. Nuk duhet të keni ideologji, mund t’ju lëndojë.

Askush nuk do t’ju votojë për shkak të ideologjisë, do t’ju votojnë për shkakun tuaj dhe të punës që u ofruat për të afërmit e tyre.

Deviza e kryeministrit “Përtej së majtës dhe të djathtës” është lapidare në këtë kontekst.

10. Premtoni ndryshim, por sigurohuni që asgjë nuk ndryshon.

Votuesit tuaj duan që situata të përmirësohet, prandaj mos premtoni t’i mbani gjërat ashtu si janë, por krijoni një imazh se si do të jenë. Mbajini gjërat të pandryshuara, se ndryshimi është një premtim i lehtë, por një realitet i rrezikshëm.

Tani, ndryshim do të thotë fushatë e vazhdueshme. Drejtojeni qeverinë si të jeni në fushatë. Kjo do t’ju bëjë të dukeni energjik dhe ju ndihmon të dukeni sikur jeni akoma në opozitë, edhe pse nuk jeni.

I dashur Princ i Ballkanit (përfundon Bieber)

Sundimi është si vallëzimi buzë kraterit të një vullkani. Mund të sundoni vetëm nëse pretendoni se jeni demokrat në favor të integrimit europian, por mund të vazhdoni sundimin tuaj për një kohë të gjatë vetëm duke mos vepruar sipas këtyre pretendimeve.

Ky është dekalogu makiavelik që kuptohet qartë që Rama po e zbaton me përpikmëri, sikur ta kete konspektuar. Nëse kjo merret me të lehtë apo me të qeshur, nuk do të mjaftojnë zgjedhjet me standarte për të larguar këtë regjim që është instaluar në Tiranë.

Vjeshta e 2015 është në prag. Me siguri në vjeshtë, kryeministi do t’ia verë fajin opozitës antireformiste që nuk ia mbajti fjalën Kancelares Merkel. Pastaj vjen fundi I vitit. Nga viti që vjen do krijojë disa turbullira për të tërhequr vëmendjen. Ndryshime kushtetuese të njëanëshme, reforma pompoze.

Pse jo, do të arresojë disa drejtore apo edhe ndonjë ministër LSI-je, disa gjyqtarë. Siç thotë Florian Biebber, më shumë vlen arrestimi, se bën lajm tani, menjëherë. Dënimi kërkon kohë dhe nuk hyn në punë, është vonë.

Iku edhe 2016 dhe të gjithe do fokusohen tek zgjedhja e presidentit të ri. Votat I ka për ta zgjedhur I vetëm dhe do thotë se 84 e kusur votat e tij do të thotë konsensus.

Nuk është çudi që as rekomandimet e ODIHR të mos ketë pasur kohë ti zbatojë kryeministri. Për çfarë I duhen? Edhe në 2013-2015 nuk I preku me dorë, fitoi dhe askush nuk I tha gjë.

Ndërkohë erdhën zgjedhjet e 2017 dhe asgjë nuk ka ndryshuar nga makineria kriminale zgjedhore e 2015.

Blerja e votës, blerja e kartave të identitetit, përdorimi I kriminelëve, manipulimi I listave të zgjedhësve, përdorimi I policisë janë vetëm simptoma. Janë të gjitha simptoma të korrupsionit politik. Të atij korrupsioni politik që për të blerë dhe kapur pushtet, ushqehet me paranë e korrupsionit të madh qeveritar me tendera të drejtpërdrejtë dhe me paratë e krimit të organizuar.

Ndaj, kam një kërkesë për Kancelaren Merkel nga ky podium. Një kërkesë që do t’ia përsëris çdo interlokutori të huaj që do të takoj. BE duhet të bëjë hapje të kufizuar të negociatave. Sa më parë. Të hapin negociatat vetëm për kapitullin 23 në lidhje me luftën ndaj korrupsionit qeveritar dhe kapitullin 24 për luftën ndaj krimit të organizuar. Kapitujt e tjerë mund të presin deri sa t’i rikthehemi zgjedhjeve të lira e të ndershme.

Vetëm kjo hapje negociatash për do ta drenojë kënetën e qelbur ku po llokoçitet dhe trashet ky regjim. Sepse kështu inspektorët e Brukselit do ti qëndrojnë pas qafe Ramës dhe Metës e do t’I kërkojnë llogari për luftën kundër korrupsionit dhe krimit të organizuar. Vetëm kështu do të ketë shpresë.

Përndryshe, Rama dhe Meta di t’I blejnë zgjedhjet e 2017 me paratë e drogës dhe korrupsionit dhe do të rifillojnë të flasin për demokracinë diku nga 2019. Ndërkohë BE do të ketë gjetur motiv tek ato zgjedhje të blera për ta rishtyrë hapjen e negociatave edhe për disa vjet të tjera, si në rastin e Maqedonisë.

Nëse kjo është perspektiva, sigurisht është shumë e errët për shqiptarët.

Fjala në Kuvend e deputetit të PD, Oerd Bylykbashi, 9 Korrik 2015

Rama dhe Veliaj, edhe sot vazhdojnë të heshtin për pallatet dhe ndërtimet komerciale që kishin planifikuar këtu në hyrje të Parkut të Liqenit. Sigurisht që pseudokonkursi i shpallur në mënyrë tinzare ishte thjeshtë një vegël klienteliste për të filluar dhe zbatuar planin e betonizimit të sheshit Nënë Tereza, të hyrjes së Parkut të Liqenit të Tiranës, akoma pa marrë postin e kryetarit të bashkisë nga ana e z.Veliaj. Që të gjithëve ju kujtohen gjatë fushatës përgjërimet dhe premtimet për 3 vite moratorium për pezullimin e ndërtimeve, zgjerimin e vijës së gjelbër të Parkut të Tiranës, jo betonizim, ndërtime të cilat do të ishin vetëm në periferi dhe jo në zonat që tashmë kanë intesitet të lartë. Këto premtime kaluan edhe në skajin tjetër kur filloi të premtojë që çdo pronë private do të merrej dhe kthehej në hapësirë të gjelbërt publike.

Ndërkohë kishte muaj që ishte shpallur një konkurs i cili pa dijeninë e publikut kishte propozuar rreth 10 projekte për të betonizuar hyrjen e Parkut të Liqenit të Tiranës. Besoj se sot i kuptojnë të gjithë milionat e hedhura në fushatën e Tiranës. Të gjithë kuptojnë arsyet se pse Partia Socialiste me çdo kusht përpiqej të merrte Bashkinë e Tiranës, thjeshtë  për të vazhduar farsën klienteliste, thjeshtë për të vazhduar betonizimin e Tiranës, thjeshtë për të ndjekur një model që ishte për 11 vite.

Nuk besoj që do të jetë e largët dita kur ne do të shohim edhe në Sheshin Skënderbej të njëjtin projekt; betonizim. Betonizim aty ku ka hapësira publike sepse sigurisht që hapësirat private do kthehen në hapësira të gjelbërta. Nuk besoj që do të jetë e largët dita kur ne do të shohim Parkun e Liqenit të Tiranës të betonizuar. Kjo është arsyeja pse u bllokua projekti i rigjallërimit të Sheshit Nënë Tereza sepse nuk u miratuar nga qeveria. Kjo është arsyeja pse shumë projekte të tjera të propozuara nga Bashkia e Tiranës nuk morën jetë sepse kishin shpallur në mënyrë të fshehtë dhe tinzare konkurse për të realizuar të gjithë qëllimet e tyre klienteliste.

Fale presionit të bërë nga opozita dhe presionit të bërë nga shoqëria civile, nga aktivistë të shoqërisë civile dhe zëra të pavararur të medias, vendimi i konkursit u shty për të shtator. Jam e sigurtë që nese ky presion vazhdon atëhere ne do të ndalojmë ndërtimet këtu në hyrje të Parkut të Liqenit të Tiranës. Përfitoj nga rasti ti bëj thirrje kryetarit të ri të Bashkisë z.Erion Veliaj, i cili nuk lë rast pa u shfaqur në televizion, që nuk lë pusetë dhe fëmi rom pa shfrytëzuar për të dalë në televizion, ndërkohë që ditët e fundit e kemi parë që është zhdukur, të dalë e të deklarojë që ai nuk ka për të lejuar që ndërtimet të zënë frymën e Parkut të Liqenit të Tiranës.

Deklaratë për shtyp e deputetes të PD, Jorida Tabaku, 8 Korrik 2015

Z, Halimi, prej 1 viti diskutohet për Reformën në Drejtësi. Kur do të vendosë Partia Demokratike për t’u përfshirë në komision?

Ka patur gjatë javëve të fundit takime intensive të eksponentëve të Partisë Demokratike me parnerët ndërkombëtarë të cilët asistojnë në çështjet e Reformës në Drejtësi dhe nga sinjalet dhe mesazhet që kemi marrë, maxhoranca ka pranuar një nga dy kërkesat e opozitës. Ka pranuar kërkesën përsa i përket paritetit në komision, një kërkesë shumë e rëndësishme në mënyrë që reformat të jenë jetëgjata dhe të mos varen vetëm nga qenia vetëm në një mandat të një qeverie. Ndaj dhe opozita do ta marrë pjesë në mbledhjet e ardhshme të komisionit të posaçëm të Reformës në Drejtësi dhe sigurisht në seancën e ardhshme do të bëhet e ditur emrat. Opozita sot ka depozituar edhe listën e 5 anëtarëve të këtij komisioni, meqë ky komision do të ketë 10 anëtarë, duke u tërhequr nga kërkesa për bashkëdrejtimin e këtij komisioni. Pra, komisioni do të ketë një kryetar dhe një nënkryetar që i përket opozitës dhe të ketë në përbërje 10 anëtarë me nga 5 të secilës palë. Sigurisht që opozita do të shohë me vëmëndje edhe seriozitetin e kësaj reforme dhe angazhimin e qeverisë në reformën në drejtësi në mënyrë që kjo reformë të bëhet duke pasur si synim që të ketë në vëmëndje luftën ndaj korrupsionin në sistemin e drejtësisë dhe forcimin e institucioneve të drejtësisë, dhe jo kapjen e tyre. Sepse është fakt i pranuar tashmë nga të gjithë, se gjatë këtyre dy viteve çdo ligj që ka kaluar qeveria që ka pasur të bëjë me drejtësisë, nuk ka pasur si synim luftën ndaj korrupsionit por ka pasur si synim kapjen e institucioneve të drejtësisë. E kam fjalën këtu për ligjin e KLD-së, i cili nuk solli asnjë risi tjetër për luftën ndaj korrupsionit në sistemin e drejtësisë, përsa i përket shkallëvve të para të gjykimit, por solli vetëm zëvëndësimin e karrigeve, duke zëvëndësuar 3 anëtarët e zgjedhur nga Parlamenti i mëparshëm me 3 anëtarë që janë militantë të Partisë Socialiste në Këshillin e Lartë të Drejtësisë. Pra ka qënë një ligj që nuk ka pasur luftën ndaj korrupsionit në sistemin e drejtësisë por ka pasur të bëjë me kapjen e sistemit të drejtësisë, ashtu si ligjet e tjera të cilat janë miratuar nga qeveria gjatë këtyre dy viteve, siç është ligji për Gjykatën e Lartë, i cili edhe ai nuk ka pasur si synim luftën ndaj korrupsionit në Gjykatën e Lartë por ka si synim kapjen e kësaj gjykate nga maxhoranca, pasi në atë ligj dihet që është futur elementi i ministrit të Drejtësisë për të dhënë mendime dhe propozuar anëtarët e Gjykatës së Lartë. Pra, opozita do të shikojë me shumë vëmëndje çdo hap që do të ndjekë qeveria duke qenë prezente në këtë reformë ashtu si një element jashtëzakonisht të rëndësishëm për opozitën që është procesi i dekriminalizimit të cilët duhet të shkojnë paralele, pasi është shumë e rëndësishme që ligjet që do të hartohen për të reformuar sistemin e drejtësisë duhet të vijnë, sigurisht, nga deputëtë me integritet dhe duke bërë dekirminalizimin e Parlamentit. Ky është qendrimi i opozitës. Sot opozita ka depozituar emrat dhe presim seancën e radhës miratimin e këtyre emrave në mënyrë që opozita të marrë pjesë.

Prononcim për mediat i deputetit të PD, Eduard Halimi, 7 Korrik 2015