Blog

Përparim Agalliu, kryetar i seksionit nr 6 të degës së Partisë Demokratike në Durrës rrëzoi versionin e Policisë mbi dhunimin e bashkëshortes së tij, dje në mbrëmje. Agalliu tha për mediat që Policia e Shtetit ka dhënë një version aspak të saktë për ngjarjen. Ai tha se nuk ka asnjë konflikt dhe nëse Policia mbështet këtë version atëhere të tregojë autorët. Në të kundërt, tha Agalliu, Policia po bën një lojë që të fshehë autorët e vërtetë të ngjarjes. “Nëse policia ka arritur në këtë përfundim do të thotë që ka gjetur autorët e këtij krimi dhe i lutem policisë të thotë nëse i ka arrestuar këta autorë. Ndryshe, bën lojë që të fshehë autorin e vërtetë të kësaj vepre kriminale”, tha Agalliu i cili shtoi se ngjarja ishte e tmerrshme në dhunën ndaj bashkëshortes së tij ku pasi e goditën i thanë; tani ec e voto për PD-në.

Njoftim për shtyp i Partisë Demokratike, 21 Qershor 2015

Të nderuar qytetarë sot është një ditë e rëndësishme për  të gjithë votuesit. Me votën tuaj ju do të vendosni për të sotmen dhe të ardhmen tuaj!

Demokracia funksionon vetëm në qoftë se ju votoni.

Pavarësisht parregullsive të ndodhura në të gjithë vendin të cilat janë dokumentuar nga Partia Demokratikë dhe ju garantojmë, përgjegjësit do të mbajnë përgjegjësi për çdo parregullsi, pavarësisht thyerjes së Kodit Zgjedhor nga drejtues, ministra dhe deputet të PS dhe  LSI të cilët janë futur nëpër qendra votimi, këto të faktuara me foto dhe video,

qytetarët po i drejtohen kutive të votimit sepse ata e dinë që vetëm duke votuar do të marrin vendime për të ardhmen e tyre.

Partia Demokratike falënderon  qytetarët të cilët kanë treguar edhe sot qytetarinë e tyre duke mos rënë pre e provokimeve, por kanë ushtruar qetësisht dhe në mënyrë demokratike të drejtën e tyre të votës.

Partia Demokratike, partnerët tanë SHBA, BE, KiE, OSBE/ODHIR janë në çdo qendër votimi dhe po dokumentojnë  gjithë procesin

Kur kanë mbetur pak më shumë se 5 orë nga mbyllja zyrtare e kutive të votimit Partia Demokratike përsërit edhe një herë thirrjen drejtuar zgjedhësve t’i drejtohen kutive të votimit dhe të hedhin votën e tyre.

Të nderuar bashkëqytetarët, ju që sot keni të drejtën e votës, ndani disa minuta nga koha juaj për të votuar pasi vota është fuqia juaj, është gjykimi juaj, është vendimi juaj dhe askush nuk mund të dalë mbi të.

Mos mungoni, keni akoma rreth 5 orë në dispozicion  merrni të afërmit, familjarët, miqtë tuaj dhe shkoni të votoni. Dita e votimit është dita e fuqisë sovrane të qytetarëve!

Deklaratë e deputetes së Partisë Demokratike, Jorida Tabaku, 21 Qershor 2015

Ashtu siç e ka deklaruar edhe më parë Partia Demokratike sot është vërtetuar se sontazhi i IPR Marketing  nuk  është gjë tjetër veçse një sondazh i manipuluar me parat e krimit te organizuar.

Në disa zona si ne  Tiranë, Durrës etj stafi i IPR marketing është kujdesur jo për një sondazh real shkencore por për te manipuluar zgjedhësit dhe sondazhin.

Partia Demokratike ka kapur në flagrancë disa raste kur përfaqësues të stafit të IPR marketing me fletë të plotësuara paraprakisht i hidhnin në kuti si të plotësuara prej tyre dhe manipulonin zgjedhësit.

Ata mund të manipulojnë sondazhin por nuk mund të manipulojnë vullnetin dhe votën e qytetarëve të hedhur në kutinë e votimit.

Ata blejnë sondazhet por nuk u dalin llogaritë ndaj kanë bërë 9 deklarata shtypi të dëshpëruar, në pak orë.

Demokratët janë forcë fituese, me zgjedhje reale, ata le të mbajnë sondazhet e manipuluara.

Deklaratë e deputetes së Partisë Demokratike, Jorida Tabaku, 21 Qershor 2015

Orari i votimit është mbyllur.

Opinioni publik është njohur përmes medias për shumë probleme që janë hasur gjatë zgjedhjeve, ku përpjekjet për manipulim nga qeveria, nga dyshja Rama-Meta dhe njerëzit e saj kanë qenë prezente.

Partia Demokratike ka arritur të frenojë shumë prej këtyre rasteve. Ne po ju paraqesim tani një pjesë të listës me parregullsi e cënim të standardeve të raportuara gjatë gjithë ditës nga njerëzit tanë të pranishëm në çdo qendër votimi. Shkelje të faktuara e të dokumentuara, për të cilët janë njoftuar partnerët ndërkombëtarë.

Kështu, vetëm pak orë para se votimi të hapej zyrtarisht dhe në orët e para të 21 qershorit, në Selenicë, vëllai i kandidatit të majtë për bashkinë,  Kasem Cenaj, shef komisariati në Shkodër, ka kërcënuar me jetë disa votues në këtë zone duke mbjellur një klimë terrori dhe frike. Në Klos, shefi i policisë, njëkohësisht bashkëshorti i  kandidates së majtë për këtë bashki, ka kërcënuar dhe sulmuar fizikisht aktivistë të Partisë Demokratike.

Sot, për disa orë në qendrën e votimit 1629 në Krrabë, Nazmi Balla, një oficer burgjesh, i armatosur, kërcënonte votuesit.

Në Vorë, në Lezhë, në Përmet në Peqin zyrtarë të administratës kalonin në filtër qytetarët para se ata ti drejtoheshin kutisë së votimit.

Në Shkodër, një mjet tërësisht i veshur me logot dhe flamujt e LSI ka transportuar materialet zgjedhore nga KZAZ në qendrat e votimit.

Në Krujë, eskorta e makinave që transportonin materialet zgjedhore nga KZAZ ka qenë e drejtuar nga vëllai i kandidatit të majtë, Artur Bushi. Ajo që e bën dhe më shqetësuese është që eskorta e Bushit ka lëvizur e shoqëruara nga policia dhe stafi i KZAZ në një bashkëpunim të pastër që nxit dyshimet për një krim elektoral.

Në Shkodër, në disa qendra votimi si ajo 92, 259/1, e 288 janë shfaqur individë me karta të falsifikuara ose që kanë votuar në emër të personave të tjerë, siç ishte rasti i bërë publik sot nga votuesja Ingrid Paçrami, e cila nuk arriti të votonte, pasi një tjetër person me identitetin e saj ishte paraqitur në qendrën e votimit.

Po ashtu Shaban Meta nga Durrësi nuk votoi dot se dikush votoi në emër të tij me kartë të falsifikuar.

Është denoncuar në mbarë vendin cilësia e dobët e bojës, dhe ky element sigurie ka rënë që në mëngjes herët.

Janë raportuar dhe dhjetëra raste, të dhunës fizike dhe verbale të ushtruar ndaj qytetarëve e mbështetësve të Partisë Demokratike nga funksionarë shtetërorë dhe banditë të lidhur me ta. Ne kemi raporte të plota, dhe përgjegjësit kanë emër. Ata do të mbajnë përgjegjësi para ligjit deri në fund, dhe partnerët tanë e misioni i vëzhguesve do të njihen me këto rekorde kriminale.

Pavarësisht këtyre akteve, të dhënat e Partisë Demokratike flasin për fitoren tonë të qartë dhe bindëse, të kandidatëve dhe Partisë Demokratike nga Jugu në Veri.

Ne i kërkojmë qeverisë, dyshes Rama-Meta, të heqin dorë nga çdo përpjekjet e tyre për manipulim, të mos prekin rezultatin.

Vota është hedhur, tani të dëgjojmë zërin e qytetarëve.

I bëjmë thirrje numëruesve tanë të qëndrojnë në krye të përgjegjësisë historike që kanë për të garantuar votën e shqiptarëve.

Partia Demokratike është pranë jush, miqtë tanë ndërkombëtarë janë pranë jush.

Deklaratë për media e n/kryetarit të Partisë Demokratike, Edi Paloka, 21 Qershor 2015

Mirëmbrëma miq

Mirëmbrëma qytetarë të Durrësit

Dua t’iu falenderoj në mbyllje të kësaj ditë të rëndësishme, për pjesmarrjen në zgjedhje. T’iu falenderoj për ushtrimin e përgjegjësisë qytetare.

Dua të falenderoj gjithashtu, komisionerët dhe vëzhguesit për punën e palodhur për rezistencën që u kanë bërë akteve e përpjekjeve të dëshpëruara për manipulim.

Të dhënat e para flasin për një fitorë të alternativës tonë në Durrës, fitore të Partisë Demokratike.

Tani që votimi është mbyllur, kemi hyrë në një proces të rëndësishëm që është numërimi.

I kërkoj numëruesve ta ruajnë votën e durrsakeve, ta garantojnë atë. Të bëjmë të dëgjohet zëri i tyre. Unë jam pranë çdo numëruesi, Partia Demokratike dhe miqtë tanë ndërkombëtarë janë pranë çdo numëruesi.

Në asnjë mënyrë, nuk do të lejojmë cënimin e vullnetit të shprehur tashmë me votë.

Ju faleminderit.

Njoftim për shtyp i Partisë Demokratike, 21 Qershor 2015

Mirëmbrëma të dashur miq

Mirëmbrëma qytetarë të Tiranës

Jam këtu për të falenderuar qytetarët që morën pjesë në votime dhe të gjithë ata komisionerë e vëzhgues që punuan me përkushtim për të garantuar një proces të rregullt, pavarësisht përpjekjeve jo të vogla e jo të pakta për manipulim që u bënë në qendra të ndryshme votimi.

Të dhënat e para që vijnë nga përfaqësuesit tanë flasin për një rezultat pozitiv në Tiranë. Fitorja jonë e përbashkët, e qytetarëve të Tiranës  gjendet në kutitë e votimit.

Kemi hyrë në një moment shumë të rëndësishëm të këtyre zgjedhjeve, që është numërimi. I kërkoj numëruesve tanë në Tiranë, burrave e grave, vajzave e djemve, të qëndrojnë, të ushtrojnë këtë përgjegjësi historike që kanë, për ta bërë zërin e qytetarëve të dëgjohet.

Unë jam pranë jush, Partia Demokratike është pranë jush dhe mbarë qytetarët e Tiranë janë pranë jush, pasi ju kanë besuar vullnetin e tyre.

Ne së bashku nuk do të lejojmë asnjë përpjekje për të deformuar verdiktin e sovranit.

Ju faleminderit

Njoftim për shtyp i Partisë Demokratike, 21 Qershor 2015

Kryetari i Partisë Demokratike Lulzim Basha ka votuar sot ne orën 8.30 të mëngjesit. Zoti Basha ka ftuar të gjithë qytetarët të marrin pjesë masivisht në votime. Vendimet merren nga ata që votojnë, – tha zoti Basha, pasi vota është fuqia e qytetarëve.

 “Unë dua t’i bëj thirrje qytetarëve shqiptarë në këtë ditë të madhe e të rëndësishme për vendin tonë, në ditën kur qytetarët vendosin me votë të marrin masivisht pjesë në votime, t’u bëj thirrje qytetarëve të Tiranës e anembanë Shqipërisë që të ndajnë pak minuta nga koha e tyre, të vijnë në qendrën e votimit, të hedhin votën e tyre, sepse vota juaj, të nderuar qytetarë është fuqia juaj, është vendimi juaj, është gjykimi juaj, është momenti i sovranitetit tuaj. Vendimet merren nga ata që votojnë, ndaj ejani masivisht dhe jepni votën tuaj për të ardhmen tuaj, familjes e fëmijëve tuaj! Zoti e bekoftë Shqipërinë!” – theksoi kryetari i Partisë Demokratike Lulzim Basha.

Njoftim për shtyp i Partisë Demokratike, 21 Qershor 2015

Partia Demokratike denoncon me forcë aktet e shëmtuara të kandidatit të Edi Ramës për Bashkinë e Mirditës, i cili u kap sonte në flagrancë duke shpërndarë ndihma në këmbim të votës.

Partia Demokratike denoncon gjithashtu neglizhencën e Policisë, e cila megjithë insistimin e kërkesat e vazhdueshme nuk reagoi në kohë.

Përfaqësuesit e Partisë Demokratike arritën të ndalonin furgonin e Ndrec Dedës, arritën të bllokonin këtë përpjekje të dëshpëruar të kandidatit të Edi Ramës për dëmtuar standardin e zgjedhjeve.

Më poshtë, keni prononcimin e deputetes së Partisë Demokratike, Albina Deda dhe foto të makinës së kandidatit Ndreca me ndihma në këmbim të votës.

Njoftim për shtyp i Partisë Demokratike, 20 Qershor 2015

Merene Agalliu, Sekretare e një qendre votimi dhe bashkëshortja e kryetarit të Seksionit nr 6 të Partisë Demokratike të degës së Durrësit është dhunuar në mënyrë barbare. Persona të paidentifikuar kanë sulmuar fizikisht aktivisten e Partisë Demokratike duke i thënë: tani voto PD-në, e më pas e kanë dhunuar rëndë fizikisht. Aktivistja u dërgua në spital në një gjendje të rëndë. Deputeti i Partisë Demokratike Oerd Bylykbashi e dënoi ashpër këtë ngjarje dhe i bëri thirrje kandidatit Dako të tërhiqet nga dhunimi i aktivistëve të PD-së.

Deklaratë për shtyp e Partisë Demokratike, 20 Qershor 2015

Partia Demokratike dënon shpifjet e pabaza të Monika Kryemadhit ndaj deputetit Bumçi, në lidhje me një pretendim ende të pakonfirmuar edhe nga policia e vënë krejtësisht në shërbim të oligarkisë.

Shpifja në adresë të deputetit Bumçi është një skenar djallëzor dhe kriminal për të nxitur tensione dhe për të çorientuar vëmendjen e opinionit publik me qëllim dhunimin e standardeve të zgjedhjeve, sepse Ilir Meta e di që e ka të sigurt humbjen në Lezhë.

Partia Demokratike distancohet me neveri të plotë nga këta skenarë kriminalë dhe i bën thirrje të gjithë anëtarëve dhe votuesve rë saj në Lezhë të ruajnë gjakftohtësinë.

Ne i kërkojmë qytetarëve të Lezhës dhe përkrahësve tanë të mos ndikohen, të injorojnë skenarët e pështirë të LSI-së dhe të vazhdojnë angazhimin e tyre duke dalë masivisht të dielën në votime për një fitore të pastër e të sigurt të Partisë Demokratike dhe kandidatit tonë për Bashkinë e Lezhës, z. Fran Frrokaj.

Deklaratë për shtyp e Partisë Demorkatike, 20 Qershor 2015