Blog

Halim Kosova ka bërë disa takime jo të zakonta në orët e para të mëngjesit me qytetarë e banorë që e nisin punën më herët se të tjerët.

Kandidati për kryebashkiak ka garantuar taksistët për luftë ndaj informalitetit.

“Ikin të gjithë ata ilegalët se nuk i intereson atyre të punojnë. Po t’ia rimbursosh naftën këtyre që janë të ligjëruar ai tjetri s’ka leverdi, do detyrohet të liçensohet o s’ka mundësi”, tha Kosova.

“E rëndësishme është që secili nga ju, po jo vetëm nga ju, kudo ku janë njerëzit, duhet thënë një variant që është në të mirën e tyre dhe të qytetarëve . Po qe se plotësohen këto dy kondita, o burra, para”.

Kosova ka vizituar dhe kopshtet e cerdhet për të takuar prindërit e biseduar me ta. Kandidati për kryebashkiak u ndal tek një çerdhe ku kontribuoi vetë pak kohë më parë që ajo të paisej me një kënd lodrash.

“Ishte me të vërtetë gjë e veçantë. Kjo rastësia juaj, ardhja e rastësishme ishte domosdoshmëri për neve”, thotë edukatorja.

“Unë thashë më mirë me sponsorizu diçka, ndonjë çerdhe, ndonjë kopësht që mbetet se sa me i bërë lekët flamuj që për pak ditë ikin të gjitha ose ngelen lartë në shtyllë derisa koha ti seleksionojë”, tha Halim Kosova.

Njoftim për shtyp i Partisë Demokratike, 19 Qershor 2015

Kandidatja për bashkinë e Durrësit, Grida Duma bashkëbisedoi me tregtarët e tregut industrial në qytet. Duma tha se bashkia do tu ofrojnë këtyre bizneseve një hapësirë publike në mënyrë që të ulin kostot nga qeraja e lartë që paguajnë sot në hapësirë private. Kandidatja tha se taksat e tyre të shitësve ambulantë do ti ulë me 50 % ndërsa do të ketë amnisti për taksat e papaguara deri në vitin 2014.

“Taksat tuaja do t’i përgjysmojnë menjëherë që në muajin e parë. Tregun publik do e bëjmë sezbën për ju. Do punojmë çdo ditë për të hapur vende pune. E kam thënë që çdo familje të ketë të paktën një të punësuar”, tha Duma.

Tregtarët u ankuan për mungesën mungesën e fuqisë blerëse dhe taksat e larta ç’ka ka bërë që nga 1300 biznese që ishin në këtë treg, kanë mbetur vetëm 700. Ky treg u përmbyt dy ditë më parë duke i vendosur në një situatë edhe më të vështirë tregtarët e tregut më të madh të Durrësit.

Njoftim për shtyp i Partisë Demokratike, 19 Qershor 2015

Fjala e z.Kosova në mitingun mbyllës të Njësisë 5 

Miqtë e mi

Ju falenderoj nga zemra

Mikpritjen tuaj, besimin tuaj e kam ndjerë që në ditën e parë të fushatës e deri sot që jemi mbledhur kaq të shumtë në numër, për të lënë takimin tjetër të rëndësishëm që është pasnesër.

Pas tre ditësh ne kemi shansin të bëjmë një zgjedhje;

Eshtë një zgjedhje për të gjetur zgjidhje për shqetësimet, hallet e kërkesat tona të përditshme.

Eshtë një zgjedhje për të bërë një ndryshim historik; që Bashkinë e Tiranës ta marrin qytetarët e Tiranës. Qytetarët e Tiranës, secili nga ju, të vendosni vetë për drejtimin e jetës tuaj këto 4 vite.

Të sjellim ndryshimin, të mos e lejojmë më politikën të luajë me këtë qytet. Ky është qyteti ynë.

Ne e duam Tiranën.

Unë banoj në këtë njësi, në njësinë 5. Deri dy muaj më parë kam pasur privilegjin të jem dhe përfaqësuesi juaj në Parlament.

Kanë krijuar një mit për këtë zonë të Tiranës. Jo e majtë, jo Stalingrad. Unë i refuzoj me përbuzje këto etiketime. Këto janë damka që i ka vendosur politika që nuk i ka trajtuar qytetarët e Komunës së Parisit dhe të njësisë 5 me respektin e duhur. Dhe sidomos, nuk i ka trajtuar me respekt ajo pjesë e politikës që e ka marrë si të mirëqënë, e ka konsideruar këtë njësi si hambarin e votave të saj dhe nuk është kujtuar të bëjë asgjë për të përmirësuar jetën tuaj, menjëherë pas ditës së zgjedhjeve.

Unë them se Njësia 5, është një njësia e qytetarëve të nderuar, të ndershëm e punëtorë që meritojnë vemendje, meritojnë shërbim, meritojnë të shohin produktin e vërtetë, arsyen pse duhet të ekzistojë pushteti, pra të marrin në këmbim ato gjëra që janë legjitime, pas kontributit të dhënë gjithë jetën.

Për këtë them, se ka ardhur momenti për një ndryshim historik. Që zona juaj, lagjia juaj, rruga juaj, pallati juaj, shpëtia juaj, të mos konsiderohet si hartë votash për interesat e kalkulimet politike.

Unë jam këtu që të shërbej çdo ditë, 24 orë në ditë, pa pushim. Vetëm një gjë kam në zemër e në mendje. Interesin tuaj, interesin e qytetarëve.

Nuk hyj në këtë sipërmarrje për të bërë karrierë a llogari politike. E kam bërë zgjedhjen time me zemër.

Kam prezantuar për njësinë 5 dhe për Farkën një projekt të detajuar. Investime dhe ndërhyrje në infrastrukturë që do të ndryshojnë, do të përmirësojnë jetën tuaj aty ku banoni.

Kemi bërë llogaritë me specialistët më të mirë të fushës, dhe kemi dalë në përfundimin se do të sjellim ujë 24 orë. Jam angazhuar për një qytet të pastër e të gjelbër.

Programi im ka lindur nga takimet me ju, nga shkëmbimet e bisedave, nga dëgjimi i halleve dhe shqetësimeve.

Po sigurisht ju nuk keni vuajtur se kanë munguar programet e premtimet në letër.

Unë nuk jam një politikan tipik.

Kam një vizion timin, që afrohet shumë me atë vizion që kanë qytetarët e ndershëm të Njësisë 5, Farkës e gjithë Tiranës, për punët e tyre.

Caktoj objektiva, vendos standarde dhe i mbikqyr projektet deri në detaje, derisa ato të realizohen. Derisa uji të vijë në shtëpitë tuaja, derisa rruga të vijë në lagjen tuaj, derisa lulishtja të ndërtohet poshtë pallatit, derisa fëmijët të kenë këndin e lojërave e të moshuarit një vend për tú shplodhur.

Nuk heq dorë kollaj. Eshtë pasioni im ti ndjek gjërat deri në fund. Këtë kam bërë gjatë gjithë jetës time, gjatë menaxhimit e drejtimit të sektorëve mjaft të rëndësishëm.

Unë besoj se shumica absolute e qytetarëve të Tiranës janë të ndershëm, kanë integritet dhe e vlerësojnë transparencën. Besoj se shumica absolute e qytetarëve të Tiranës e urrejnë korrupsionin, rryshfetin, abuzimet me fondet publike.

Ky është një moment i rëndësishëm takimi për ne. Ky është vendi ynë i takimit. Këto parime na kanë bërë bashkë në këtë fushatë. Na kanë bërë bashkë në këtë rrugë të cilën do ta cojmë deri në fund. Nuk ka çmim që e blen integritetin tim, nuk ka çmim që e blen ndershmërinë tuaj, votën tuaj, verdiktin tuaj Sovran.

Kundërshtarët kanë shpenzuar miliona për postera, reklama e sondazhe të blera. Ata harrojnë se nuk blihet e vërteta, nuk blihet e shkuara, nuk blihet e ardhmja.

Nuk blihet vendimi që qytetarët e Tiranës e kanë marrë tashmë.

Ja ku jemi sot bashkë. Eshtë një nisje e re kjo. Na ka mbledhur ndershmëria e pastërtia. Qytetarët e Tiranës, unë e di se e kanë bërë zgjedhjen e tyre. Kjo do të jetë një sfidë për këdo që mendon se mashtrime, e me vjedhje ecet përpara e bëhet karrierë.

Qyteti është i yni.

Ne do të vendosim

Vota jonë do të sjellë ndryshimin

Të majtë e të djahtë

Të qendrës e paparti

Të rinj e të reja

Për një qytet të zhvilluar

Për një Tiranë të pastër

Për një Tiranë miqësore e pa konflikt politik

Për kryeqytetin tonë europian që e duam aq shumë

Me punë e jo fjalë

Ju falenderoj dhe takimi tjetër pas tre ditësh.

Të sjellim në fuqi bashkimin tonë, fitoren tonë përbashkët

Njoftim për shtyp i Partisë Demokratike, 18 Qershor 2015

Basha: Dyshja Rama-Meta, piramida më e madhe e mashtrimit politik.

Basha: Më 21 qershor votë njerëzve të punës dhe jo të krimit

Fjala e kryetarit të Partisë Demokratike Lulzim Basha në mbyllje të fushatës elektorale në Kavajë

Mirëmbrëma Kavaja, mirëmbrëma zonja dhe zotërinj, vëllezër dhe motra, maratonomak të lirisë dhe demokracisë, bashkudhëtarë të fitores të Ëngjëll Carës dhe të Kavajës demokratike. Mirëmbrëma banorë të bashkisë së re të Rrogozhinës, bashkëqytetarë ka ardh dita që me votën tuaj me 21 qershor do të jetë qytetari i parë dhe shërbëtori i parë Eqerem Deliu.

Vëllezër dhe motra kohë të rënda pllakosën këto dy vite Kavajën, Rrogozhinën dhe mbarë Shqipërinë, bashkë në këto ditë e javë të fushatës , por edhe më parë, në muajt që kaluan, jemi parë sy më sy , kemi qarë hallet, kemi dëgjuar nga goja juaj sesi jeta është bërë më e vështirë, më e vështirë për të papunët, që tashmë s’kanë asnjë shans për përkrahje ekonomike, më e vështirë për sipërmarrjen e vogël dhe biznesin sepse taksat janë dyfishuar, më e vështirë për familjen anembanë sepse dyfishuara janë edhe faturat abuzive të energjisë, dyfishuar janë edhe taksat, edhe listat e ushqimeve, e vështirë është bërë edhe për ata që kanë një vend pune, por nuk kanë asnjë siguri, se këtë vend pune do ta gëzojnë edhe nesër. Është bërë vështirë, nuk ka lekë, nuk ka punë. Ky është refreni që dëgjon kudo nga jugu në veri, nga lindja në perëndim.

Po ç’është kjo e keqe që ka pllakosur, pse është thelluar varfëria, pse papunësia ka kapur nivele rekord, pse vallë shqiptarët 25 vjet pas rrëzimit të rregimit komunist janë drejtuar kurbetit njësoj si para dy dekadash duke shënuar numrin më të madh të azil-kërkuesve në Europë, pas sirianëve, ku lufta civile ka shkatrërruar vendin , familjet e komunitetin. Ç’është kjo e keqe vëllezër dhe motra që ka kapur prej fyti  shqiptarët, të djathtë e të majtë, ç’është ky lak në fytin tuaj. Janë taksat që janë rritur e shumëfishuar, janë faturat e energjisë më të larta, është çmimi i naftës më i lartë dhe kush i solli, dyshja Rama-Meta, piramida më e madhe e mashtrimit politik.

Njerëz të pashpirt e të pabesë, që tjetër gjë premtuan para dy vitesh e krejt e në drejtim tjetër shkuan sapo morën pushtetin. Premtuan ulje taksash dhe i rritën ato, por thonë sot me pacipësinë më të madhe se opozita gënjen. Opozita u thotë të vërtetën, siç e shikon, siç e ndjen, siç e dëgjon nga goja e njerëzve. Thuajini Edi Ramës dhe Ilir Metës a i kanë rritur taksat apo jo, a i kanë rritur faturat e energjisë apo jo, a ju kanë sjellë vende të reja pune, a kanë punësuar njerëz në Kavajë, po në Rrogozhinë. Ku janë vendet e punës, ku janë paratë e taksave të larta, e faturave të larta të energjisë, çfarë kanë sjellë këto dy vite, përveç shkatërrimit, mashtrimit, kërbaçit, gjobave, burgut, papunësisë, varfërisë dhe eksodit.

Kjo është e vërteta, e vërteta e dhimbshme dhe vëllezër dhe motra është detyra ime ta them si kryetar i opozitës se me dyshen Rama-Meta e nesërmja do të jetë edhe më e zezë, ekonomia do të rrëshqasi në gropë më të thellë, papunësia do të rritet, varfëria do të vazhdojë të thellohet siç tregojnë ditë për ditë raportet e institucioneve europiane dhe ndërkombëtare sepse për ta rritja e taksave, kërbaçi mbi kokën e të pamundurve, rritja e faturës së energjisë është drejtimi i duhur, por ky nuk mund të jetë drejtimi i duhur për shqiptarët.

A është përmirësuar jeta juaj këto dy vite vëllezër dhe motra, a njihni kavajas jeta e të cilëve është përmirësuar këto dy vite, për familjet e tyre, për komshinjtë e tyre? Sigurisht që jo, ky nuk është drejtimi i duhur për Shqipërine dhe shqiptarët, pork y është drejtimi i duhur për oligarkinë e cila pasurohet ditë për ditë, duke abuzuar paratë e ilaçeve, taksave, faturave, djersës dhe gjakut tuaj. Në këto zgjedhje kanë refuzuar të flasin për varfërinë, për papunësinë e le më të ofrojnë zgjidhje, kanë refuzuar sepse e dinë mirë këta nastradinë se janë ata shkaktarët e thellimit të varfërisë, janë ata shkaktarët e 5-fishimit të mjerimit, janë ata që i vunë kularin në fyt ekonomisë dhe lakun në fyt mijëra familjeve, duke shkaktuar papunësinë më të shpejtë këtë dekadë, ndaj nuk ju shohin në sy, i ulin  mbështetësit e tyre punonjës të administratës nëpër karrige si memcë, sespe nuk duan të dëgjojnë as zërin e mbështetësve të tyre të 23 qershorit, se njësoj si zëri juaj do t’ju thoshte, gënjeshtarë ku i keni premtimet, ku i keni taksat e ulëta, ku i keni çmimet e ulëta, ku i keni 300 mijë vendet e punës?

Kjo është e vërteta, e vërteta e dhimbshme. Kanë guximin t’i diktojnë opozitës mos flasë për varfërinë, mos flasë për papunësinë,  most ë ofrojë zgjidhje për njerëzit, kjo është shkolla e vjetër e diktaturës që lamë pas dhe këta janë pinjollët e të njëjtës mendësi, e asaj mendësie që e ka tmerruar aq shumë Engjëll Cara saqë dje fikën kabllorin për mos të dëgjuar zëerin e tij, po nuk e ndalin dot zërin e Engjëll Carës se ai është zëri juaj, nuk e ndalin dot fitoren e Engjëll Carës se është fitorja  e Kavajës.

Ndaj i ka hyrë tartakuti pa ofertë, pa zgjidhje për ju, denigrojnë dhe shajnë nga mëngjesi në darkë,  nuk merren me punë, nuk është asnjë ditë në punë kryeministri, por gjithë ditën duke sharë e dukë marrë në gojë opozitën, kandidatët, popullin, duke kërcënuar, duke shpifur, duke baltosur. Po vallë për këtë e zgjodhën, për këtë paguhet nga taksat tona, për këtë majmet e fryhet ai dhe klientela e tij? Sigurisht që jo, po këtë e bën se s’ka zgjidhje për ju, dhe do të shurdhojë debatin politik, me qëllim që ju most ë dëgjoni zgjidhjet që ne kemi për ju,  e ka të pamundur.

Ju e njihni ofertën tonë, ju e njihni projektin tonë, ulje taksash, ulje çmimesh, rrije të punësimit përmes investimeve publike, ky është premtimi i Partisë Demokratike, ulja me 25% e çmimit të energjisë dhe falja e kamatvonesave është programi ynë dhe ju do ta ktheni në ligj me 21 qershor duke votuar Partinë Demokratike, duke votuar numrin 15, taksa më e ulët në Ballkan 9% për popullim me të ardhurat më të ulëta në Ballkan, ky është premtimi i Lulzim Bashës dhe i Partisë Demokratike që me votën tuaj do të kthehet në ligj më 21 qershor. Ulja e çmimeve për bukën, vajin, sheqerin, orizin, për miellin, për qumështin, për vezën dhe për mishin, përmes eliminimit të tvsh-së, pra uljen me 20% për mallrat e konsumit, për familjet dhe familjarët që ta kenë më të lehtë të mbyllin muajin.

Kjo është oferta jonë, ky është ligji që ju votoni duke votuar votuar Partinë Demokratike, numrin 15 më 21 qershor. Vëllezër dhe motra, këto zgjedhje janë të qarta, oferta jonë në nivel qendror mbështetet nga kandidatët tanë në nivel lokal.

Shikoni se çfarë ju ofron oligarkia. Një biznesmen të marrë nga Tirana për Rrogozhinën. A po vjen të japë, a po vjen të marrë? Sigurisht për të marrë nga banorët e Rrogozhinës, të marrë nga pasuritë e Rrogozhinës, të marrë nga taksat e Rrogozhinës e t’ia dorëzojë oligarkisë. Nuk ka shanse, Rrogozhina e ka marrë vendimin. Oferta e Rrogozhinës përfaqësohet nga njeriu i punës, ai që vjen të japë, të shërbejë, të ulë taksat, të nxisë punësimin, të jetë në krahun tuaj, Eqerrem Deliu.

Zgjedhje katastrofë në Rrogozhinë kanë bërë për kandidatin e tyre, me sybet këtu në Kavajë me Elvin alias Elvis Roshi. I njohur tashmë edhe përtej kufijve të Republikës së Shqipërisë si njeriu me dy emra, me dy fytyra dhe me një të kaluar të errët dhe kriminale. Një njeri i cili është një turp i madh për Kavajën, një turp i madh dhe një njollë e madhe për këtë vatër të demokracisë, me të cilën krenohen jo vetëm demokratët, por të gjithë shqiptarët.

Nuk e dija, thotë kryeministri, nuk e dija si e kishte emrin dhe nuk ka rekorde kriminale. Shtypi vendor i nxorri dënimin për plagosje me armë zjarri. Shtypi ndërkombëtar i nxorri dënimin për trafik droge dhe narkotikësh në Zvicër. Po tani pse hesht? Ça do t’i thuash nesër kavajasve? Si do t’ia thuash emrin, Ervin , siç e thërret i ati, apo Elvis siç e thërret partia? Pse kandidon, pse nuk e tërheq tani që shqiptarët anëembanë, e çdo kavajas e kupton që s’është socialist, e s’është asgjë tjetër përveçse një trafikant i dënuar? Sepse e ka aleatin e tij, aleatin e partnerin e tij, ortakun e tij sepse Ervini është i Ramës, për Ramën dhe me Ramën e nuk ka qenë, e nuk do të jetë kurrë, i Kavajës, për Kavajën dhe me Kavajën.

Prandaj bën gjithçka për të heshtur ofertën tonë, bën gjithçka për të mbytur ofertën dhe zërin e saj, gjithçka për të eklipsuar kandidatin tonë. Ja ku e keni, e njeh Kavaja, e njeh Parlamenti, e njeh Shqipëria, birin e Kavajës, prindin e Kavajës, babain e Kavajës, qytetarin e parë të Kavajës, shërbëtorin e Kavajës, Engjëll Cara.

Kavaja ka dy zgjedhje. T’i nënshtrohet kularit, kërbaçit, krimit, taksave, drejtimit të cilin ka shkuar Kavaja në këto dy vite si gjithë Shqipëria, e që Elvin Roshi do ta bëjë edhe më keq, apo të zgjedhë shpëtimin, shpresën, zhvillimin, punën dhe dinjitetin, vizionin, pra të zgjedhë Engjëll Carën dhe Partinë Demokratike.

Le t’i themi nga ky shesh sot, ku jemi të gjithë në këmbë e të gjithë të bashkuar, cili është vendimi juaj e kush është kryetari i ardhshëm i bashkisë. Mesazhi i Kavajës, fitorja e Kavajës, është pararendja e fitores së madhe së qytetarisë. Kështu ka qenë në ditët e vështira, kur e izoluan dhe e rrethuan nga terrori komunist, ju vëllezër e motra, prindër të kësaj rinie të mrekullueshme, e thyet në mes diktaturën dhe hapët kapitullin e demokracisë.

Atëherë ishit vetëm, ishit të rrethuar e ishit pak. Sot jemi shumë, sot jemi bashkë, bashkë me ne është Amerika, bashkë me ne është Europa, është e vërteta, është Zoti, është fitorja. Masivisht vëllezër dhe motra, masivisht drejtohuni kutive të votimit, asnjë kavajës të mos mbesë në shtëpi, të gjithë së bashku të kthejmë 21 qershorin në festën e madhe të fitores së demokracisë. Zoti e bekoftë Kavajën, gëzuar muajin e mrekullueshëm të Ramazanit, fitore, fitore, fitore!

Njoftim për shtyp i Partisë Demokratike, 18 Qershor 2015

Kandidatja për bashkinë e Durrësit, Grida Duma u prit me entuziazëm nga banorët e fshatit “Sektori Rinia”. Duma tha se si kryebashkiake do të mbrojë çdo qytetar në bashkinë e madhe dhe do luftojë varfërinë duke hapur vende të reja pune. Ajo u shpreh se bashkë do rregullojmë jetën në komunitete me shkolla dhe hapësira publike më të mira.

“Do të keni kryebashkiaken tuaj të fortë për tu mbrojtur të gjithëve. Të heqim varfërinë e skajshme në këto zona sepse do hapim vende pune dhe të parët do jeni ju. E rëndësishme është që ndërsa hapim vende pune të kthejmë edhe drejtësinë, bashkë do filojmë të rregullojmë jetën si për shkollë, si për punësimin dhe për rritjen e rrogave”, tha Duma.

Njoftim për shtyp i Partisë Demokratike, 18 Qershor 2015

Presioni që po ushtrohet për tjetërsimin e vullnetit të votës së tyre, madje edhe të familjareve të tyre në këmbim të vendit të punës  është një rast i paprecedent në një sistem demokratik.

Presioni dhe shantazhi ndaj punonjësve të administratës është shenjë e panikut që i ka zënë dyshen Rama-Meta për humbjen jo vetëm në Tropojë por në gjithë Shqipërinë.

Dhjetëra raste janë denoncuar nga punonjës të hidrocentralit të Fierzës të cilëve u është kërkuar të paraqesin të dokumentuar me foto apo filmim votën e tyre nëse duan të jenë në punë edhe pas datës 22 qershor.

Jemi këtu për të garantuar çdo votues, veçanërisht ata që janë në një presion të tillë që vota e tyre është e shenjtë dhe Partia Demokratike do të jetë pranë çdo qëndre votimi për të vëzhguar, ndaluar dhe denoncuar çdo tendencë për shkelje të fshehtësisë së saj dhe më tej për të mbrojtur këdo që mund të cënohet për shkak të vullnetit të tij politik të përkthyer me votë në dt. 21 qershor.

Askush nuk mund ta kërcënojë apo shantazhojë popullin e Tropojës.
Ne i bëjmë thirrje qytetarëve të Tropojës, votoni masivisht më dt. 21 qershor, shprehni vullnetin tuaj të lirë dhe mos lejoni t’ju nëpërkëmbin.

Personat që kanë kërcënuar punonjësit e hidrocentralit me bukën e fëmijëve do të përgjigjen para ligjit. Bëni kujdes ju njohim j’ua dimë me emër e mbiemër do të mbani përgjegjësi.

21 qershori është festë e demokracisë, tropojanët dhe shqiptarët me votën e tyre do ta ndalin të keqen, do të votojnë për punë dhe dinjitet.

Njoftim për shtyp i Partisë Demokratike, 18 Qershor 2015

Sa shtëpi ka Erion Veliaj? Ku jeton Erion Veliaj?

Në deklaratën e pasurisë ne 2013 Erion Veliaj thotë se ka shitur një shtëpi 50 metër katrorë pranë Pazarit të Ri dhe me të njëjtën sasi parash ka blerë një shtëpi 110 metër katrorë në rrugën “Hoxha Tahsim”  dhe çuditërisht kontrata e shitblerjes është në të njëjtën ditë që Erion Veliajt është betuar si ministër. A është koincidencë kjo?

Deklarata e pasurisë nuk ka ndryshim as në vitin 2014, por në emisionin “Opinion”, Erion Veliaj thotë se nuk e ka shitur shtëpinë garsoniere, pra prej 50 metrash katrorë pranë Pazarit të Ri.

Ai tha se jeton në një shtëpi 140 metër katrorë, pranë Andi Bushatit te Kodra e Diellit, pra një shtëpi tjetër nga ajo që është deklaruar nga Erion Veliaj në deklaratën e pasurisë.

Dokumentet tregojnë edhe se Erion Veliaj ka prenotuar një vilë 200 mijë euro në Mullet.Sa herë ka folur për shtëpinë ka dhënë një version ndryshe.

Ne sot kemi disa pyetje per Erion Veliajn:

–          Sa shtëpi ke?

–          Ku jeton?

–          Ku i mori paratë për vilën dhe shtëpitë?

Erion Veliaj duhet të përgjigjet dhe të bëjë transparencë për fondet publike, për dasmën, për lidhje me Dzanashvilin, për lidhjet  me  Bechettin, për fondet e fushatës?

Erion Veliaj nuk është vetëm mashtrues, por ka përfituar nga fondet publike dhe nuk është transparent. Ai gënjen dhe fsheh, këtij nuk i besohet.

Njoftim për shtyp i Partisë Demokratike, 18 Qershor 2015

Kryetarja e LDGSH-së deputetja Albana Vokshi,  ishte në Fushë-Krujë në takim  me gratë dhe vajzat e kësaj zone në mbështetje të kandidatit Hamdi Pasha. Në qendër të fjalës së saj ishte papunësia e lartë e nënave dhe grave të Fushë Krujës, për shkak dhe të mbylljes së bizneseve nga taksat e larta dhe nga ulja e ndjeshme e fuqisë  blerëse.

Zonja Vokshi tha se gratë dhe vajzat në 21 Qershor do të votojnë për shpëtimin e familjeve të tyre nga mjerimi dhe për punësimin e tyre si standart kryesor për një  status të fortë e të pavarur të tyre në shoqërinë shqiptare.

“Kryeministri Edi Rama dhe kjo qeveri nuk e sheh gruan si forcë kryesore të zhvillimit të qyteteve por  si burim për vota, sepse mendon se ato manipulohen lehtë nga mashtrime dhe barcaletat  e tij.  Nëse Rama do të respektonte vërtetë gratë, nuk do të lejonte heqjen e KEMPI-it dhe invaliditetit te gratë e sëmura, dhe mijëra nënave dhe kryefamiljareve në nevojë nga lista e ndihmës sociale”.

Unë jam e bindur, u shpreh zonja Vokshi , se në këto zgjedhje gratë do të sjellin ndryshimin e madh në Fushë Krujë dhe në çdo bashki. Ju do ti hapin rrugë programit të kandidatit Pasha, sepse  ka nisma konkrete për punësimin e grave, dhe kryefamiljareve në nevojë,  si dhe hapjes së biznesve nga vetë ju me lehtësi të madhe fiskale.  Asnjëra prej jush nuk do ta coj votën dëm për të përkrahur Rilindjen e krizës dhe premtimeve boshe të kandidatëve të saj.”, theksoi ndër të tjera deputetja Albana  Vokshi.

Njoftim për shtyp i Partisë Demokratike, 18 Qershor 2015

Kryetari i Partisë Demokrtaike Lulzim Basha priti në një takim, një delegacion nga Kongresi i Autoriteteve Lokale dhe Rajonale të Këshillit të Evropës, të kryesuar nga z Stewart Dikson (Britani e Madhe), që do të vëzhgojnë zgjedhjet lokale në Shqipëri. Pas takimit zoti Basha ne nje prononcim për mediat z. Basha theksoi se “Askush nuk  prek dhe nuk e cënon dot votën e qytetarëve. Partia Demokratike ka marrë të gjitha masat për ruajtjen e votës, për një proces të rregullt zgjedhor dhe bashkë me partnerët tanë, bashkë me Këshillin e Europës, OSBE, SHBA, BE do të garantojmë një proces ku çdo qytetar të ketë mundësi të flasë me votën e tij apo të saj”. 

Prononcimi për mediat i kryetarit të Partisë Demokratike Lulzim Basha

Unë pata një takim me përfaqësues të vëzhguesve të Këshillit të Europës të cilët së bashku me vëzhguesit e ODIHR-OSBE dhe të vendeve mike, SHBA dhe vendeve të BE do të përbëjnë një trupë të fuqishme të vëzhgimit të zbatimit të standardeve zgjedhore, ditën e diel. I informova për përpjekjet e përditshme dhe të përnatshme të qeverisë për të zhbërë standardet zgjedhore, për vendosmërinë e Partisë Demokratike dhe opozitës së bashku me qytetarët shqiptarë që kjo të mos ndodhë.

Më garantuan se në çdo bashki të vendit, vëzhguesit ndërkombëtarë do të jenë masivisht të pranishëm, të ndërgjegjësuar për rëndësinë e këtyre zgjedhjeve, për të ardhmen europiane të Shqipërisë, të ndërgjegjësuar po kështu për problematikën e shkaktuar, por të vendosur për të monitoruar e ruajtur standardet zgjedhore.

Përfitoj nga rasti t’u bëj thirrje zgjedhësve shqiptarë qytetarëve shqiptarë që masivisht të dalin e të votojnë ditën e diel. Askush nuk  prek dhe nuk e cënon dot votën tuaj. PD ka marrë të gjitha masat për ruajtjen e votës, për një proces të rregullt zgjedhor dhe bashkë me partnerët tanë, bashkë me Këshillin e Europës, OSBE, SHBA, BE do të garantojmë një proces ku çdo qytetar të ketë mundësi të flasë me votën e tij apo të saj.

Thirrja ime është, pjesëmarrje masive në votime. E diela është dita e sovranit, dita e popullit. Dilni në votime dhe votoni lirisht për kandidatët tuaj, për zgjedhjen tuaj, natyrisht për zgjedhjen e kandidatëve! Unë kam një thirrje, votoni kandidatët e PD, Halim Kosovën në Tiranë, kandidatët tanë anembanë vendit, për t’ju ofruar punë, dinjitet, respekt dhe një standard demokracie vendore që e meritoni e që nuk mund të zhduket e nuk do të zhduket nga oligarkia!

A folët ju për sa u përket listave…?

Për gjithçka folëm, për gjithçka informuam dhe për gjithçka kemi marrë masat. Nuk ka e nuk do të ketë asnjë votues që është zhvendosur me hir apo me pahir në Durrës, në Kavajë, kryesisht në këto dy bashki apo ndonjë bashki tjetër që do të lejohet të votojë nëse nuk është i regjistruar sipas ligjit. Pra, në ato raste ku ka regjistrime fiktive, ku votuesit e këtyre dy bashkive apo ndonjë bashkie tjetër jetojnë diku tjetër realisht e janë zhvendosur pa dijeninë e tyre apo në mënyrë korruptive, ata nuk do të mund të votojnë, të mos marrin mundimin, të mos pranojnë lekët e korrupsionit, të mos marrin makinat, furgonët, autobusët, të qëndrojnë në shtëpitë e tyre dhe të votojnë në komunitetet e tyre, as në Durrës, as në Kavajë, askund tjetër! Komisionerët tanë nuk do të lejojnë votimin e personave të regjistruar në mënyrë fiktive.

Njoftim për shtyp i Partisë Demokratike, 18 Qershor 2015

Kandidati i Partisë Demokratike për bashkinë e Elbasanit dhe koalicionit për punë dhe dinjitet Ardjan Turku, ka zhvilluar një takim me banorë të lagjes NSHU të qytetit. Edhe në këtë takim kandidati Turku vuri theksin tek mungesa totale e investimeve në këtë lagje, megjithëse bashkia e qytetit ka pasur në dispozicion miliarda lekë, të cilat janë investuar vetëm në qendër.

“Politikat që janë ndjekur gjatë gjithë këtyre viteve, janë të tilla që paratë do ti hedhim po në qendër të Elbasanit dhe qendra e Elbasanit, ka mbetur po ajo që ishte në 1932-shin.  Ajo që kam ndërmend unë është kjo. Të filloj të zhvilloj pjesën tjetër të Elbasanit.

Takimet e kandidatit Ardjan Turku vazhduan edhe në fshatin Mengël. Duke folur në këtë takim deputeti i PD Ridvan Bode ka kërkuar nga këta banorë të bëjnë diferencën mes kandidatëve dhe të votojnë  Ardjan Turkun më 21 Qershor.

“Ardjanin tani e njihni të gjithë se çfarë përfaqëson dhe çfarë njeriu është. Kundërshtari tregoi se është një sundimtar anadollak, i cili kërcënon njerëzit, mundohet tu mbyllë gojën, tu mbylli sytë, tu mbylli veshët njerëzve  dhe natë e ditë, përmes atyre televizorëve që punon vetë e që kërcënon, s’bën gjë tjetër veçse bën filma për veten e tij, selfie i thonë këta të rinjtë sot, që nxjerrin në telefon veten e tyre. Ai është Qazimi i vërtetë. Ai që nuk do që kush ta shohë në sy, nuk do që kush ta kritikojë, nuk do që asnjeri tjetër të gjykojë për Qazimin dhe si punon Qazimi, dhe Qazimi e ka treguar që punon në mënyrë okulte dhe korruptive. Familja e tij dhe një grusht njerëzish që sot i nis lart e poshtë, për presion dhe dhunë, janë të vetmit ata që përfitojnë nga pushteti Qazimit dhe sigurisht me atë metodën e makiazhit në surratin e tij, ka bërë vetëm 300 metro linear në Elbasan, ku ka hedhur 75 miliardë lekë në 8 vitet e tij”, tha Bode.

Njoftim për shtyp i Partisë Demokratike, 18 Qershor 2015