Blog

Kandidati Gjergji Mero në një nga zona me popullsinë më të re në Korçë, dha mesazhin se të rinjtë po ikin nga Korça pasi kanë humbur shpresën.

“Me programin tonë  do të kthejmë besimin se në Korçë jetohet. Nuk do të lejojmë që qyteti të mplaket pasi të rinjtë po ikin përditë dhe azilkërkimin drejt Perëndimit e shohin si shpëtim, tha profesor Mero. Ai tha se përditë dëgjon prindër dhe njerëz që dëshmojnë për ikjen e fëmijëve të tyre, pasi në Korçë nuk ka punësim dhe asnjë mundësi edukimi e zbavitje. Kjo nuk është Korça që meritojnë fëmijët tanë tha kandidati Mero, i cili shpalosi prioritetet si punësimi i të rinjve në shërbimet e Bashkisë, biznesin privat në bashkëpunim dhe me projektet e organizatave ndërkombëtare .

Gjatë bisedës më banorët dhe të rinjtë e lagjes 6, kandidati Mero tha se kjo qeveri ka rritur në mënyrë të pa përballueshme tarifat e arsimit të lartë duke u prishur ëndrrën  qindra të rinjve në Korçë  për të vazhduar Universitetin. Si rektor kjo është një gjë më dhemb shumë , pasi të rinjtë korçarë janë me shumë potenciale dhe shkëlqejnë në universitetet e Evropës dhe SHBA.

“Me Bashkinë e re do të financojmë bursa studime për fëmijët e familjeve në nevojë në fshat e qytet, do të punësojmë studentët e ekslencës dhe ata që mbarojnë studimet jashtë shtetit. Njëherësh programi i bashkisë së re parashikon punësimin në projektet komunitare dhe ato të binjakëzimit të Korçës me qytetet e tjera të Evropës”, tha ndër të tjera profesor Gjergji Mero.

Njoftim për shtyp i Partisë Demokratike, 15 Qershor 2015

Kryeministri Rama ishte dje në Vlorë.

Erdhi, dhe theu tre rekorde.

Rekordi i parë: Mbylli një fushatë elektorale pa shpallur një program për Vlorën.

Rekordi i dytë: Mbylli fushatën dhe sezonin turistik. Duke mos e hapur fare sivjet.

Rekordi i tretë: Foli më gjatë se kandidati i tij dhe gjithë të pranishmit bashkë.

Dje, si përherë, kryeministri nuk i kurseu batutat, sharjet, dhe premtimet enciklopedike.

Gjatë kësaj batareje verbale m’u referua edhe mua si kandidat i opozitës në Vlorë.

E kishte kapur meraku me arsimimin tim si jurist.

E keni kot z. Kryeministër: Unë jam inxhinier!

Kandidati yt, siç e ka thënë vetë, ka dashur të jetë i tillë.

Dikush mund të kompleksohet nga diploma  e vetë: Qoftë ky mjek, apo mësues vizatimi.

Një mësues vizatimi si ai, që vizaton më keq se Joni im 5-vjeçar.

Por ky nuk është problemi im, dhe as i vlonjatëve.

Kam një merak tjetër, dhe një pyetje për ju dhe kandidatin tuaj.

Ku e keni programin?

Si mund të mbyllet një fushatë elektorale pa i thënë votuesve: Ja ku është alternativa ime?

Cilën prej premtimeve të 2013-ës keni realizuar për Vlorën, që vlonjatët t’u besojnë premtimeve të 2015?

Përgjigjen ua jep Vlora më 21 qershor.

Deklarata e kandidatit të opozitës për bashkinë e Vlorës Genc Deromemaj, 15 Qershor 2015

Kandidati për kryetar bashkie i Partisë Demokratike në Elbasan Ardjan Turku, zhvilloi një takim me banorë të lagjes 5 maji të qytetit.

Një qytetar, anëtar i shoqatës së invalidëve të punës, shprehu shqetësimin e heqjes në masë të mbështetjes financiare për këtë kategori, duke akuzuar për këtë fakt bashkinë e Elbasanit.

“Kanë hequr 3250 veta, nga invaliditeti. Në lagjen Shënkoll 14 veta janë me karrocë. I është hequr e drejta, nuk njihen. Kemi vajtur, kemi trokitur tek të gjithë, na thonë dil përjashta çfarë je ti, kush je ti, nuk të njohim fare. Unë jam një qytetar i thashë, zonjë, dhe urdhëro dokumentin. Ik or vlla thotë nuk të njoh fare, dil përjashta, tha. Prandaj të lutem shumë në qoftë se në datë 21 fiton, do të bësh pastrim të gjithë, ti zhdukësh ata se këtu nuk çahet më, tha qytetari.

Turku gjatë fjalës së tij theksoi faktin se bashkia e Elbasanit gjatë këtyre viteve është keqmenaxhuar. Sipas tij me mbi 80 miliardë lekë në dispozicion gjatë këtyre 8 viteve, Elbasani duhet të ishte një qytet me infrastrukturë të përfunduar në të gjithë territorin e tij dhe jo vetëm në qendër.

“Kur unë menaxhoj një gjë përpiqem ti çoj paratë tek nevojat më bazike. Dhe unë e di që nevojat më bazike janë për rrugë dhe për sheshe, janë për pemë dhe për gjelbërim, këtu ku keni ju pallatet, vendet tuaja. Janë për hapjen e rrugëve të reja që lirojnë trafikun. Nuk ka mundësi që të jetohet këtu, kur 500 metra më poshtë ka një tjetër situatë. Nuk mund të zhvillohet qyteti kështu dhe nuk mund të përdoren paratë e taksapaguesve kështu. Të gjithë duhet të jenë të barabartë dhe në 8 vite më besoni që me ato dhjetëra e dhjetëra miliardë lekë që janë harxhuar, në qoftë se ne do i harxhonim ashtu siç e patëm nisur, sot ne do të kishim pothuajse të gjithë sheshet e asfaltuara, nëpër këto lagje që nuk janë lagje të reja, sepse janë lagje që prej 30 vjetësh, dhe nuk do të ishin në këtë gjendje sikur sapo sot është ndërtuar këtu. Pra politikat që duhet të ndiqen në qytet, për ndërtime, investime, për krijime kushtet komode që ju ta ndieni veten se vërtet banonin në qytet, që fëmijët tuaj ta ndiejnë veten të barabartë me to, paratë duhet të menxhohen me një tjetër mentalitet.

Duke folur në këtë takim kreu i Partisë Demokratike në Elbasan Aurel Bylykbashi, duke iu përgjigjur deklaratave të deputetit Taulant Balla ka theksuar faktin se gjatë mandatit të z. Turku në Elbasan 2003-2006, qyteti ndryshoi pamje, ku u investua në të gjitha hyrje daljet e tij, si dhe u realizuan mbi 20 projekte çdo vit, në rrugë e sheshe pallatesh, me anë të buxhetimit me pjesëmarrje. Ndërkohë z. Bylykbashi i ka kërkuar kreut aktual Qazim Sejdini të japë llogari për premtimet e bëra në fushatat e kaluara dhe mosrealizimin e tyre.

Njoftim për shtyp i Partisë Demokratike, 15 Qershor 2015

Kandidatja për bashkinë e Durrësit, Grida Duma prezantoi programin në lagjen 15 të qytetit në Spitallë. Duma tha se do t’i jepet zgjidhje emergjente problemit të kanalizimeve dhe ujit të pijshëm ku brenda 6 muajve do të ketë të paktën 3 herë më shumë ujë të pijshëm dhe zgjidhje problemit të kanalizimeve brenda një viti e 8 muaj.

“Përveç kanalizimeve dhe ujërave, problemin e mbeturinave që ju e keni shumë afër, është një problem emergjent për shëndetin, për turizmin dhe qytetin. Është e pafalshme që të konceptohet që një qytet turistik t’i djegë plehrat.  Është e pafalshme që të konceptohet që një qytet turistik të ketë Porto Romanon pjesë të mrekullueshme të bregdetit ta ketë zonë plehrash. Është shumë e rëndësishme që të fillojmë projektin tonë të pastrimit të mbeturinave dhe riciklimit të tyre. Sistemi pas 21 Qershorit do të jetë; në çdo 150 metra do të kemi 3 kosha plehrash me 3 ngjyra të ndryshme ku do të ndajmë plastikën, nga qelqi dhe kartoni”, tha Duma.

Ajo më tej tha se do të ndalet masakra ndaj objekteve historike dhe ka një projekt për rivitalizimin e siteve arkeologjike.

“Ajo që do të bëjmë bashkë përveçse do të ndalojmë këtë masakër është të rizgjojmë qytetin antik. Të gjitha të tjerat do të jenë në planin tim të dorës së parë për ti pastruar, rrethuar dhe ndriçuar. Do kemi një pedonale të madhe që do të ndjekë gjithë murin e vjetër dhe do të shkojë drejt markatës antike dhe drejt 18 siteve arkeologjike që ka qendra e Durrësit”, tha Duma.

Një shqetësim për banorët ishte edhe siguria në shkolla, ku kandidatja Duma tha se projekti i saj përmban ngritjen e një grupi special të Policisë Bashkiake për të ruajtur shkollat. Ajo tha më tej se pas 21 Qershorit, qyteti do të çlirohet dhe do të ketë dinjitet për të gjithë qytetarët.

“Do të ndërtojmë një grup special të Policisë Bashkiake që do të sigurohet se kush i shkon rreth e qark oborrit të shkollës që jo rrallë herë në gjimnaze është problem për narkotrafikun. Kjo dhunë që ushtrohet tek të gjithë banorët dhe qytetarët e Durrësit është një dhunë e cila nuk do të egzistojë më, një dhunë e cila pas 21 Qershorit do të jetë një çlirim absolut dhe do të jetë dinjitet për secilin që shikon punën e vetë”, tha Duma.

Njoftim për shtyp i Partisë Demokratike, 15 Qershor 2015

Kryetari i Partisë Demokratike Lulzim Basha i ka konsideruar të ulëta dhe qesharake mallkimet e kryeministrit ndaj qytetarëve. Në takimin elektoral në Mallakastër, zoti Basha tha se pasi Rama –Meta dhe gjithë makineria e tyre dështuan me turp për të trembur popullin me shantazhe, me sondazhe, me pazare, me zarfe, me përçarje, me intriga, me diversion, me dhunë, me kërcënime deri më gotën e ujit, tani kanë nisur me mallkime. Mallkimi më i madh që Edi Rama dhe Ilir Meta i kanë bërë popullit janë varfëria mjerimi  dhe pasiguria ku e kanë zhytur vendin për të cilin do të marrin dhe ndëshkimin në 21 qershor.

“Shikoni sa qesharak dhe i pashpresë është bërë! Pasi e ka parë se s’i i funksionojnë as premtimet se nuk i beson njeri, as kërcënimet se nuk kërcënon dot një popull ka filluar me mallkime, është bërë si ai qesharaku që thoshte, të zëntë sëmundja po s’më votove mua! O Edo sa poshtë ke rënë! Po pse, me mallkime do i marrësh votat e mallakastriotëve dhe shqiptareve?”,- tha zoti Basha

Në dy vite, qeverisja dyshja Rama Meta nuk mbajtën asnjë premtim për të cilin u votuan. Bënë të kundërtën e premtimeve, rritën taksat, rritën çmimin e energjisë, shtuan papunësinë, ua bënë më të vështirë jetën qytetarëve. Varfëria që thelluan dhe mbollën në këtë vend tha zoti Basha nuk është në shitje, por është në luftë me dyshen Rama Meta. Dinjiteti që nëpërkëmbën nuk është në shitje, por është në luftë më ta.
Kryetari i Partisë Demokratike tha se asgjë nuk e shuan shpresën e qytetarëve dhe nuk mund t’i mposhtë ëndrrat e tyre.

“Në këto dy vite pllakosi një varfëri edhe më e madhe, u shtua papunësia, u rrit kostoja e jetesës u rritën çmimet, u rritën taksat dhe njerëzit u zhytën në varfëri e në dëshpërim të thellë por dyshja Rama-Meta nuk i ka prioritet këto halle.  Këto dy vite nuk bëri asgjë për t’ju ndihmuar. Përkundrazi, ju a bëri edhe më të vështirë jetën, ndaj jemi mbledhur këtu, për të ndalur këtë të keqe, për t’i thënë stop kësaj mënxyre dhe do i themi me votë”,- theksoi kryetari i Partisë Demokratike Lulzim Basha

Njoftim për shtyp i Partisë Demokratike, 15 Qershor 2015

Kandidatja e Partisë Demokratike për kryetare e Bashkisë së Shkodrës Voltana Ademi, ka prezantuar përpara banorëve të Shkodrës programin elektoral “Për Shkodrën e së Ardhmes”. Me pjesmarrjen e qindra mbështetësve, profesionistëve të fushave të ndryshme, përfaqësues të shoqërisë civile, personaliteteve të politikës dhe deputetë të Parlamentit Shqiptar, Voltana Ademi ka shpalosur me hollësi të gjitha shtyllat e programit të saj duke u ndalur edhe tek nevojat specifike në sektorë të rendësishëm për zonat e ndryshme të kësaj bashkie.

“Të shërbesh për mua do të thotë të zbatosh ligjin, të punosh me përgjegjësi, profesionalizëm, ndershmërisht dhe me transparencë. Përfshirja e njerëzve në vendimmarrje, partneriteti publik-privat do të jenë çelësi i suksesit në përdorimin me efiçencë të financave, burimeve për projektet që do të realizojmë së bashku. Ne do të përmirësojmë më tej qeverisjen lokale për të siguruar mjetet e nevojshme për të shërbyer, për t’u zhvilluar e për të krijuar vende pune. Ne do të punojmë për të rifituar besimin e investitorëve vendas e të huaj për të siguruar rritje, për të zhvilluar ekonominë, bujqësinë, turizmin dhe biznesin. Ofroj një program të përgatitur nga specialistët më të mirë të fushave respektive me të cilët prej vitesh kam punuar në hartimin e dokumentave strategjike dhe projekteve për zhvillimin e territorit”.

Në këtë takim ishte i pranishëm sekretari i përgjithshëm i Partisë Demokratike Arben Ristani, i cili u ka bërë thirrje shkodranëve që të votojnë alternativën e Partisë Demokratike për “Punë dhe Dinjitet” dhe programin e kandidates Voltana Ademi e të mos e shesin votën e tyre tek PS dhe LSI.

“Po e varfërojnë dhe po e dhunojnë që në fund të vijë skalioni i tretë dhe t’ua blejë votën. Po ua blen shumë lirë pasi i ka varfëruar dhe dhunuar aq sa duhet. Duhet të jemi absolutisht të vëmëndshëm, absolutisht dinjitozë në mënyrë që të mos e lejmë vendin të shkojë drejt këtij drejtimi të gabuar. Do ju bëja thirrje të votojmë të gjithë Partinë Demokratike pa devijuar asnjë votë. Të votojmë numrin 15 në fletën e votimit, të votojmë të gjithë Partinë Demokratike dhe sigurisht të votojmë Voltanën për kryetare të Bashkisë”.

Njoftim për shtyp i Partisë Demokratike, 15 Qershor 2015

Kryetari i Partisë Demokratike është ndalur në Korçë në përmbyllje të turit elektoral për zgjedhjet e 21 qershorit. Zoti Basha tha ne fjalën e tij se 21 qershori është dita kur populli vendos me votë për mënyrën e qeverisjes, por edhe ofertën që është më e mira, për të zgjidhur hallet dhe problemet e tyre. Edi Rama dhe Ilir Meta kanë të tjera prioritete, tha zoti Basha, ata synojnë kontroll absolut, pushtet absolut që t’u shërbejë atyre dhe jo qytetarëve.

“I janë vërsulur në këto zgjedhje lokale opozitës, kryetarit të opozitës, kandidatëve tanë, qytetarëve me kërcënime, me shantazhe, me presione, me diversione, me gjithçka për t’i mashtruar, për t’i kërcënuar, që të mos e kthejnë 21 qershorin në atë që është, duhet të jetë dhe do të jetë, dita e gjykimit popullur me votë, sepse këta erdhën në pushtet duke premtuar ulje taksash, kur i rritën taksat, askush nuk i ka harruar, korçarët i vuajnë ditë për ditë në shtëpi, shqiptarët i vuajnë ditë për ditë në shtëpi. Sepse këta erdhën në pushtet duke premtuar 300 mijë vende pune. Nuk hapën asnjë vend të ri pune, as nuk u munduan të hapnin vende pune, në fakt jua bënë jetën tuaj më të vështirë sepse me taksat e larta me rritjen e çmimit të energjisë dhe të naftës mbyllën me qindra sipërmarrje të vogla e të mesme, mbyllën dhe vështirësuan mundësitë e biznesit të madh për të marrë njerëz në punë, e në fakt i detyruan ata për të nxjerrë njerëz nga puna. Nxorrën në mënyrë arbitrare kundër ligjit mijëra nëpunës të ndershëm të shtetit, askush se ka harruar Brunilda Mekën e nuk do ta harrojë. Në këto kohë të vështira, jua kanë bërë njerëzve edhe më të vështirë jetën. Edi Rama sillet sot si vëllai binjak i Sudes, në një piramidë të stërmadhe mashtrimesh. Edi Sudja premtoi punësim dhe solli shpunësim, premtoi taksa të ulëta dhe solli taksa të larta, premtoi ulje të çmimit të energjisë dhe solli rritje të çmimit të energjisë”.

Deri më sot, tha zoti Basha, nuk kemi parë asnjë zgjidhje nga dyshja Rama-Meta, asnjë ofertë. Janë munduar ta fshehin me propagandë realitetin dhe të mos japin zgjidhje per të.

“Kemi parë rënien e konsumit, varfërinë e papunësinë, u kemi thënë jepju zgjidhje qytetarëve. Interesi i oligarkisë janë vilat, interesi i oligarkisë janë hotelet, interesi i oligarkisë janë fundjavat e luksit në Europë, në të njëjtën Europë që ku kanë nisur si refugjatë qytetarët e vet. Interesi i oligarkisë është kulla e korrupsionit që është bërë me lekët tuaja, me djersën tuaj, me gjakun tuaj.Sa probleme mund të zgjidheshin me paratë që hodhi në këtë kullë? Sa probleme mund të zgjidheshin, sa familje mund të ndihmoheshin, sa njerëzve mund t’u vihej në ndihmë, por jo, vendosi të bëjë kullën, dyfish më shtrenjtë, sepse gjysma e parave zhduket në xhepat korruptivë. Kjo pra është e vërteta. Nuk e sheh popullin e vet, nuk e dëgjon popullin e vet. Ne i themi ku i ke taksat e ulura, ky thotë kam mbjellë palma, ne i themi ku e ke energjinë e ulur, ky thotë kam bërë kullën, ne i themi ku ke 300 mijë vendet e punës. Vlonjatët nuk guxoi t’i shohë në sy e mos t’i thoshte të vërtetën. E tha më në fund mbrëmë, e pranoi më në fund papunësinë. E pranoi varfërinë, e pranoi mjerimin, s’ka nga të shkojë. Populli e ka rrethuar, hallet tuaja, problemet tuaja, nuk mund të injorohen.  E pranoi, por çfarë bëri këto dy vite për t’i zgjidhur këto probleme?”

Nuk ka emergjencë më të madhe se lufta ndaj papunësisë, varfërisë, pasigurisë sot, prandaj, tha zoti Basha, oferta e Partisë Demokratike është ngritur pikërisht mbi këtë emergjencë.

“Dita e sovranit në demokraci vonon por nuk mungon, 21 qershori është dita e sovranit, 21 qershori është dita juaj, është dita kur kartonat i keni ju, vendimin e keni ju me votë. Me votë vendosim së bashku një paketë shpëtimi për Shqipërinë për të ulur me 25% çmimin e energjisë, për të vendosur taksën e sheshtë më të ulët në Ballkan, për rrogat dhe të ardhurat dhe për taksat e biznesit në mënyrë që paratë të mos shkojnë në xhepat e oligarkisë, siç janë zhdukur 150 mln dollarë nga doganat shqiptare, në këto 5 muaj 150 milion dollar që duhet të ishin në xhepat tuaja, në tavolinat e fëmijëve tuaj dhe që sot janë konta të majmura të oligarkisë dhe të bandës, të votojmë pra për uljen e taksave, të votojmë për rritjen e rrogave dhe pensioneve, të votojmë paketën tonë për të ulur me 20% çmimet e miellit, sheqerit, orizit, vajit, qumështit, mishit, vezës sepse ky është një problem i madh, mbyllja e muajit, blerja e ushqimeve që këta nuk e shohin dot, të heqin TVSH-në për ushqimet. Vota juaj është ligj i ligjeve, nuk ka emergjencë më të madhe se gjendja ekonomike dhe ne ofrojmë shpëtimin, ofrojmë rrugëdaljen, ofrojmë shpresën. Nuk ka emergjencë më të madhe se lufta ndaj papunësisë, ndryshe do të kishtë qënë Shqipëria nësë të gjithë energjinë që e përqëndron kundër opozitës, kundër kandidatëve tanë me kërcënime dhe mashtrime do ta kishte investuar për të luftuar papunësinë”,- përfundoi zoti Basha.

Njoftim për shtyp i Partisë Demokratike, 15 Qershor 2015

Fjala e z.Kosova në takimin përmbyllës të fushatës në Njësinë 10

Të dashur miq

Ky shesh, ky entuziasëm flet shumë.

Jam i lumtur të jem mes jush, dhe sa më shumë shprehni mbështetjen tuaj, aq më shumë rritet përgjegjësia ime që të jem në shërbimin tuaj nesër, të bëj gjithçka për të përligjur këtë entuziasëm, këtë mikpritje që më bëni.

15 qershor sot.

Pas 6 ditësh kemi takimin tjetër të rëndësishëm. Në kutinë e votimit.

Eshtë një ditë e historike miqtë e mi, dhe ju do të bëni një ndryshim të madh në Tiranë.

Ne duam të jetojmë demokracinë çdo ditë, dhe ky është momenti.

Projekti im është transparenca, integriteti, ndërshmëria, lufta ndaj korrupsionit, dhe komunikimi i përditshëm dhe i drejtpërdrejtë me ju. Do të pyeteni për çdo gjë. Bashkia është pushteti juaj.

Eshtë shumë e thjeshtë.

E kam thënë edhe më parë. Unë nuk hyra në këtë garë që të bëhem qytetari i parë. Nuk hyra që të krijoj një distancë me ju. Unë vij nga ju, nga kontakti i përditshëm me ju, jam një nga ju, dhe do të jem një qytetar si ju. Nuk ka hierarki e ndarje mes nesh.

I djahtë, i mjatë, i qendrës, i paparti, kushdo qofsh, banor i këtij qyteti, kudo ku banon, në njësinë 10, në njësinë 9, në fshat apo në qytet, në gjithë territorin e Tiranës, po e them sot këtu se; je partneri im. Konsideroj çdo qytetar të barabartë në të drejta e përgjegjësi dhe do jem çdo ditë në krahun e secilit për të shërbyer.

Unë kam një projekt konkret me pesë pika kyçe, prioritete që kanë lindur nga komunikimi i përditshëm me qytetarët.

Ujë 24 orë, shkolla të reja e përmirësim i atyre ekzistuese, rrugë e trotuare, qytet të pastër e higjenik, ulje taksash për biznesin dhe krijimi i vendeve të punës.

Programi është i detajuar, i hartuar me ndihmën e ekspertëve më të mirë të fushës. Tirana sipas meje nis tek dera e shtëpisë. Ndërhyrjet do të ndikojnë në cilësinë e jetës në rrugën e në lagjen tuaj.

Programi është pjesë e kontratës tonë, dhe duhet ta dini miqtë e mi se nuk kam pranuar të vendos atyre gjëra të parealizueshme. Që në këtë moment ka nisur marrdhënia jonë e re.

Unë e di se ju nuk keni vuajtur për të parë e dëgjuar premtime. Madje keni dëgjuar më shumë se sa duhet sidomos dy vite më parë. Problemet e vuajtjet vijnë nga fakti se këto kthehen ne letra e retorikë. Po unë nuk jam pjesë e kësaj bote politikanësh. Kam treguar se kur vendos objektiva, e caktoj standarde, unë u rri punëve mbi kokë, dhe asgjë nuk më ndalon ti çoj gjërat deri në fund.

Kam prezantuar në njësinë tuaj planin e detajuar pak ditë më parë, siç kam bërë në çdo zonë të Tiranës. Ju kam ftuar, dhe ju ftoj sërish, mbani shënime dhe më kërkoni llogari. Kërkoni llogari, rrisni pretendimet e drejta që keni, mos heshtni. Unë mirëpres cdo kërkesë, cdo ankesë, dhe mirëpres edhe protestën tuaj, nëse ju shkelen të drejtat.

Ju ftoj ta konsideroni buxhetin e Bashkisë si buxhetin e familjes tuaj. Bashkë do ti bëjmë llogaritë. Do të dini në çdo moment se sa shpenzuam, për cfarë i shpenzuam, ku shkuan paratë. Në dritë të diellit, në transparencë të plotë.

Unë e kam parë në çdo ditë të kësaj fushate, e kam kuptuar se ju e keni marrë vendimin për të sjellë në Bashki një menaxher të sprovuar, që nuk harxhon asnjë minutë të kohës për kalkulime politike, për interesa miqsh, e për karrierë.

Unë besoj pafund, se Tirana e ka pritur kandidatin me integritet. Tirana e ka pritur kandidatin që për 35 vite në kontakte të përditshme me qytetarët nuk ka pranuar të marrë një herë të vetme, diçka të vetme, në këmbim të shërbimit.

Tirana e ka pritur ofertën e ndershmërisë. Sepse tiranasit janë të ndershëm, janë punëtorë, kanë dinjitet. Tirana do punën e jo fjalët.

Kjo është lidhja më e fortë që kam unë me qytetarët e mi. Kjo është lidhja që do të mbajë bashkë. Nuk ka çmim që e prish këtë lidhje mes meje dhe banorëve të Tiranës. Thjesht ka ardhur momenti që këtë marrdhënie të fortë që kemi, ta zyrtarizojmë. Ta sjellim në fuqi me 21 qershor.

Lidhja jonë është e vërtetë, nuk ka nevojë për spote e postera që bëhen me paratë, mundin e djersën tuaj. Fitorja jonë është e përbashkët.

Pas 5 ditësh.

Të majtë e të djathtë

Burra e gra

Të rinj e të reja

Për Tiranën e punës e jo të fjalëve

Për Tiranën me ujë 24 orë

Për Tiranën e gjelbër e higjenike

Për Tiranën me taksa të ulëta

Për Tiranën me rrugë e trotuare

Për qytetin tonë të mrekullueshëm

Ju faleminderit

Njoftim për shtyp i Partisë Demokratike, 15 Qershor 2015

Sot është shënuar një incident në Pukë. Partia Demokratike hedh poshtë të gjitha aludimet se Partia Demokratike apo simpatizantë të saj kanë qenë të përfshirë në këtë incident.

Partia Demokratike në Pukë distancohet nga të gjitha aktet vandale dhe vazhdon të bëjë një fushatë të qetë dhe fituese.

Bëjmë me dije se personat të cilët ishin të përfshirë në incident ishin simpatizantë të PS-së dhe LSI-së.

Sipas informacioneve tona këta persona janë konfrontuar në lidhje me shpërndarje të hollash për fushatë.

Partia Demokratike i bën thirrje prokurorisë të hetojë dhe zbardhë shkaqet dhe autorët e dhunës dhe t’i vërë ata para drejtësisë.

Njoftim për shtyp i Partisë Demokratike, 15 Qershor 2015

Kandidatja për bashkinë e Durrësit, Grida Duma u takua me shoqatën e personave që nuk dëgjojnë. Në këtë takim të përzemërt, për të cilën ata nuk e kishin realizuar asnjëherë me kryetarin e bashkisë, Duma u shpreh se ata do të kenë një qendër të posaçme për aktivitetet e tyre si dhe do të jenë të përfaqësuar. Duma u shpreh se do të punojë fort edhe për punësimin e tyre.

“Kemi ardhur për të qënë bashkë sepse një pjesë e madhe e suksesit është që në mënyrën se si do bëjmë bashkinë e re të Durrësit, të jenë të përfaqësuar të gjithë. Duhet të keni së paku një qendër ku mund të qendroni, të organizoheni dhe të kryeni aktivitetet tuaja. Kjo qendër do të ketë një fond midis 150-200 mijë euro vetëm për projekte që kanë të bëjnë me qendrën. Nëpërmjet projekteve, do ta gjeni veten në egzekutimin e plotë të vendimeve të bashkisë. Propozoj që sipas vendimit që të merrni vetë një apo dy përfaqësues nga ju të jetë pjesë e Senatit të Durrësit”, tha Duma.

Njoftim për shtyp i Partisë Demokratike, 15 Qershor 2015