Blog

Kandidatja për bashkinë e Durrësit, Grida Duma bashkëbisedoi me gratë e një biznesi fason në Durrës mbi përpjeket që bashkia do të ofrojë për kushte më të mira pune e paga më të larta. Paketa bashkiake e subvencionimit do të paguajë sigurimet e grave në nevojë dhe të rinjve të sapopunësuar duke sjellë një shtesë në rrogë të paktën me mbi 20 mijë lekë të vjetra në pagat minimale.

“Është detyrim i çdo qytetari të pagujë taksat por ama duhet edhe punësim. Unë jetoj me qera dhe kam dy fëmijë. Punoj vetëm unë. Atëhere çfarë duhet bëj unë? Duhet punë që të paguaj gjelbërimin, shkollën e fëmijëve”, tha një punonjëse.

“Gjithandej papunësia ka rritur në 40 % për të rinjtë. Një shifër krize dhe varfërie. Në rastin e të rinjve dhe të rejave do subvencionojmë me paketë sigurimesh. Duhet domosdosmërisht një rritje rrogash. Ju edhe 20 mijë apo 30 mijë lekë ju bën punë. Do ti ulim taksat plotësisht. Por do heqim edhe taksën e pasurisë që është dyfish por taksat e gjelbërimit e pastrimit që paguajnë këto biznese nuk mund të jenë të barabarta me bizneset e mëdha se këtu fitohet shumë pak”, tha Duma.

Njoftim për shtyp i Partisë Demokratike, 26  Maj 2015

Kandidati për kryetar Bashkie në Tiranë, Halim Kosova u takua dhe pa nga afër kushtet e jetesës së banorëve të komunitetit egjiptian në zonën e Njësisë 4 në Tiranë. Kosova u angazhua që Bashkia do të mbajë detyrimet e saj për çdo banor të qytetit.

“Desha asistencë, jam me dy fëmijë me të meta mendore edhe ato një herë na i vendosin një herë jo. I heqin. Edhe asistencën na e kanë hequr, edhe drita na kanë sjellë nga 30 milionë lekë. Me çfarë do t’i paguajmë ato drita ne?”, shprehet një banore.

“Varfëria ekstreme, ku njeriu çohet në mëngjes ose shtrihet për të fjetur dhe nuk ka çfarë ti japë fëmijëve për të ngrënë, jam i sigurtë që është një terren i përshtatshëm nga parti ose politikanë të caktuar për të blerë votën. Puna e parë, nuk duhet të guxojë asnjë njeri që të vendosë dorë te lekët e shtresës më të varfër që ekziston në vendin tonë, siç jeni ju. Bashkia ka detyrimet e veta karshi çdo qytetari në gjithë territorin e saj dhe unë jam angazhuar që çdo banor duhet të gëzojë të njëjta të drejta në qytetin e Tiranës. Bashkia ka menduar të ngrejë një zyrë juridike që do të jetë përkrah meje, në mënyrë që të mbledhë të gjithë problemet e qytetarëve dhe ekspertët, juristët e kësaj zyre të bashkisë do të gjëmojnë dhe do të vrapojnë për të zgjidhur problemet që keni ju. Pra filloni, përgatituni midis jush që për këtë lagjen këtu të keni një zë të fortë. Kur them një zë të fortë, jo një njeri. Po bëhuni disa burra dhe disa gra me kurajo që mblidhni dhe mendime të të tjerëve, që t’iu kem përkrah, pra për të zgjidhur dhe për të mbajtur nën kontroll që ato që do nis unë nga bashkia, t’iu vinë ju, t’iu përkthehen ju në të mirë apo jo”, tha Halim Kosova.

“Familja ime ka qënë në operim dhe shpëtimin e asaj familje, nuses time dhe fëmijes time, foshnjës time ka qënë Halim Kosova që ka bërë të mundur jetesën e të dy palëve. Faleminderit z.Halim Kosova”, shprehet një banor.

Njoftim për shtyp i Partisë Demokratike, 26  Maj 2015

Kandidatja për bashkinë e Durrësit, Grida Duma ka vijur takimet me banorët e lagjes nr 5 në qytet. Qytetarët ankohen për mungesën e madhe të shërbimeve ndërsa biznesi për taksat e larta dhe rënien e fuqisë blerëse.

“Çdo ditë është mjerim dhe unë jam gati në falimentim. Si unë janë shumë njerëz dhe taksat janë dyfishuar. Na pëlqeu që the do ulësh taksën e sipërfaqes. Na ke përprahje ne njerëzit që duan veten e vetë”, u shpreh një librashitës në këtë lagje i cili i dhuroi një liber të Migjenit kandidates Duma.

“Taksat do të shkojnë patjetër në kufi limit sepse besoj vetëm tek zhvillimi ekonomik me taksa të vogla”, tha Duma.

“Më erdhi Vangjushi që sot është kundërshtari juaj dhe i thashë që do të fal një libër. E pyeta cili është libri i fundit që ke lexuar. Po tallesh me mua më tha ?! Atëhere i thashë cili është benzi I fundit që ke blerë. Një njeri që nuk mban libra për mua është i mbaruar”, u shpreh librashitësi.

“Kam qënë prej 20 vitesh komisioner i PS-së dhe jam i mashtruar. Tani po ngrejnë edhe çmimin e ujit dhe me taksat na morën shpirtin”, u shpreh një banor tjetër.

Njoftim për shtyp i Partisë Demokratike, 26  Maj 2015

Kryetari i PD-së Lulzim Basha u takua me banorë të Petrelës dhe Vorës.  Mungesa e mbështetjes dhe subvencioneve për bujqësinë, rritja e çmimit të energjisë  dhe fuqisë blerëse kanë qenë shqetësimet që banorët e Petrelës i kanë shprehur kryetarit të opozitës. Dy vjet më parë, Edi Rama u premtoi subvencione, ulje të çmimit te naftës dhe subvencione por edhe pse qeveria po bën dy vjet në pushtet, banorët shprehen se nuk kanë parë ende asgjë. Zoti Basha theksoi në fjalën e tij që Rama-Meta, jo vetëm nuk mbajtën premtimet por votuan kundër dhe propozimeve të Partisë Demokratike për t’u ardhur në ndihmë fermerëve. 

“Premtuan që do të hiqnin akcizën e naftës për bujqësinë, premtuan një fond prej 40 milionë dollarësh në vit për bujqësinë. A kanë parë gjë fermerët e Petrelës nga këto fonde? Sa prej jush kanë marrë subvencione në këto dy vite? Ne i çuam propozimet  që ju të paguanit më pak kur blini farërat, fidanët, lëndët e tjera të para, propozuam të hiqej  taksa e qarkullimit, naftën që përdorni ju dhe këta i rrëzuan pa argument, prandaj nuk vijnë këtu  të flasin për këto probleme, harxhojnë orë e orë  të tëra duke sulmuar opozitën, duke sulmuar kandidatët e opozitës. Pse e bëjnë këtë? Sepse po mos të bëjnë këtë , duhet të japin përgjigje për premtimet e pambajtuara, sepse po nuk bënë këtë, duhet t’ju ofrojnë ju një zgjidhje, po zgjidhje nuk kanë” 

Lideri i opozitës Lulzim Basha u ka kërkuar qytetarëve që ditën e votimit të kujtojnë premtimet e pambajtura të Edi Ramës dhe Ilir Metës, mungesës së përpjekjeve për të bërë diçka për hallet dhe problemet e qytetarëve dhe të vlerësojnë ofertën e PD nëse ajo është e duhur për të futur në rrugën e zgjidhjes problemet me të cilat ndeshen qytetarët sot. 

“Në 21 qershor, unë kërkoj që gjithsecili prej jush të mbajë mend tre gjëra. Nëse këta i mbajtën premtimet e para dy viteve apo jo? Nëse këta bënë diçka për t’i mbajtur premtimet apo jo? Dhe së treti, të vlerësoje nëse për ju, platforma  ime funksionon  dhe kjo është platforma e uljes së taksave,  kjo është platforma e uljes së çmimit të energjisë dhe e faljes së kamatë-vonesave për të gjithë shqiptarët, kjo është platforma e  rritjes së rrogave dhe pensioneve, kjo është platforma e subvencioneve  për bujqësinë, e uljes së çmimit të naftës. Në 21 qershor, me votën tuaj  ju do të mund të arrini atë që opozita nuk arriti dot në parlament, sepse këta kishin kartonat” 

Aktivistët dhe kandidati i PD në Vorë është vënë nën presionin e hapur të pushtetit dhe bandave të lidhura me to. E njëjta gjë po ndodh në Malësi të Madhe, Shkodër, Vaun e Dejës, Durrës e shumë qytete të tjera. Nga Vora, kryetari i opozitës e ka cilësuar këtë shenjë dëshpërimi të Edi Ramës dhe Ilir Metës që u vjen nga revolta popullore, për t’u dhënë ndëshkimin më të madh që ka ndodhur në 25 vite demokraci, për keqqeverisjen e tyre. Kryetari i Partisë Demokratike theksoi se këto presione të dëshpëruara vetëm rrisin bashkimin e shqiptarëve për fitore, ndërsa garantoi se përgjegjësit do të marrin ndëshkimin ligjor. 

“Edhe në këto ditë, në këto javë ku shqetësimi më i madh i shqiptarëve është papunësia, është varfëria nuk e kanë mendjen  as të ofrojnë zgjidhje për ju, as të hapin mundësi për ju, as të krijojnë punë për ju. Ditë e natë  janë vërsulur  me tatimorë,  janë vërsulur  me xhandarë, janë vërsulur me  banditë, u janë vërsulur aktivistëve të opozitës, u janë vërsulur kandidatëve të opozitës, u janë vërsulur punëdhënësve. Asgjë nuk do të na bëni, përveçse do të shtoni vendosmërinë tonë, guximin tonë, bashkimin tonë për fitore, nuk do t’i shpëtoni llogaridhënies, ora e drejtësisë po afron”

Njoftim për shtyp i Partisë Demokratike, 26  Maj 2015

Fjala e kryetarit të Partisë Demokratike  Lulzim Basha ne hapjen e fushatës elektorale të Partisë Republikane në qytetin e Durrësit

Zonja dhe zotërinj,

Vëllezër e motra, zoti kryetar i Partisë Republikane, mik i dashur Fatmir Mediu, zonja Mediu,

Të nderuar miq, i dashur Bob, i dashur Sten, i dashur Niki,

I dashur miku ynë, deputeti i Durrësit Agron Duka,

Zonja të nderuara,

E nderuar kandidate e koalicionit, kryebashkiake e ardhshme e Durrësit, Grida Duma,

Së pari, më lejoni t’ju sjell përshëndetjet më të përzemërta nga votuesit, simpatizantët, mbështetësit tanë në komunat e Tiranës që ashtu si  në Durrës sot prekin, shumëfishojnë entuziazmin tonë, frymën e fitores që këtu nga Durrësi përfaqësohet nga Grida Duma, në Tiranë nga Halim Kosova e anembanë Shqipërisë nga kandidatët tanë, kandidatët e integritetit, kandidatët e natyrës së vërtetë njerëzore, të punës dhe dinjitetit.

Vëllezër e motra, në këtë hapje të  fushatës elektorale të aleatëve tanë, të miqve tanë, të bashkëluftarëve tanë në 25 vite të Shqipërisë demokratike, të Partisë Republikane të Shqipërisë, ndjej bashkë me ju frymën e fitores që po përhapet shpejt shtëpi më shtëpi, lagje më lagje, komunë më komunë, fshat më fshat

Miqtë tanë amerikanë na kujtuan me fjalët e tyre parimin e shenjtë të demokracisë, atë të vendimmarrjes nga qytetarët me votë të lirë, atë të drejtimit të vendit, jo nga një grusht njerëzish, por nga një populli i tërë që vendos dhe delegon me votë qeverisjen qëndrore dhe qeverisjen vendore. Një popull po kështu i cili me votë kërkon llogari, vendos notën, jep mesazhin,  siç do ta japin shqiptarët mesazhin e përgjithshëm të zgjedhjeve vendore, të ndaljes  së të keqes, të ndaljes së varfërisë dhe marshimit të saj, të papunësisë, të pamundësisë, duke zgjedhur dhe përqafuar ofertën më të mirë.

Për një muaj, vëllezër e motra, zonja e zotërinj, të dashur aleatë republikanë, demokratë, opozitarë por edhe ju votues të majtë që na ndiqni, për një muaj opozita ka shpalosur ofertën e saj. Oferta e cila përbëhet në radhë të parë nga një ekip i shkëlqyer kandidatësh, njerëzish me vlera të padiskutueshme të integritetit moral, qytetar, profesionalë dhe menaxherialë siç është Grida Duma, emblematika e nisjes së re, ripërtëritjes dhe frymës së fitores së PD dhe opozitës, në këto zgjedhje.

Po kështu, ne kemi diskutuar dhe qarë së bashku hallet tuaja problemet që po kalon vendit. Në asnjë moment, për asnjë çast nuk kemi folur për interesa të ngushta të pushtetit politik, asnjë betejë e jona në këto dy vite nuk ka qenë për interesat tona politike. Kur keni ngritur zërin fuqishëm kundër rritjes së taksave, kundër rritjes së çmimit të energjisë, kundër rritjes së taksës së qarkullimit dhe çmimit të naftës, kemi përfaqësuar interesat tuaja, bukën e gojës të familjeve tuaja dhe të fëmijëve tuaj.

Kur kemi dërguar në Parlament amendamentet tona kemi bërë detyrën tonë jo vetëm si opozita por edhe si alternativa e qytetarëve shqiptarë. Amendamente që kanë pasur si qëllim të ofrojnë një zgjidhjë, të ofrojnë një mundësi, madje t’i ofrojnë një mundësi edhe dyshes Rama-Meta, për të mbajtur premtimet që solemnisht i kanë braktisur që ditën që morën votën.

Premtuan 300 mijë vende pune dhe unë ua them sot, unë dhe Fatmir Mediu, opozita, dëshiruam dhe uruam që të kishin sukses sepse për ne 300 mijë vende pune janë më të rëndësishme, pakrahasueshmërisht më të rëndësishme se çdo interes tjetër politik i opozitës, sepse interesi ynë më i mirë është interesi i qytetarëve shqiptarë.

Po ku janë vëllezër e motra? Ku janë 300 mijë vende pune?

Dy vite kanë kaluar asnjë vend i ri pune por Shqipëria është zhytur në papunësi të thellë, 7 në 100 shqiptarë kanë humbur vendet e punës.

Sot në takime me sipërmarrës të mëdhenj lajmet  të trishtuara ma mbushën shpirtin me dëshpërim të thellë, qindra punonjës të tjerë janë larguar nga puna nga sipërmarrje të cilat janë nën darën e taksave të larta, kredive të pamundura, konkurrencës së pandershme, monopolit dhe korrupsionit qeveritar.

200 njerëz kam larguar nga puna, më tha një investitor i huaj dhe e di që janë në mes të katër rrugëve. Disa herë iu drejtova qeverisë për të zgjidhur poblemet e arbitraritetit të taksaver të larta, e konkurencës së pandershme, jo për mua po për këta të punësuar, nuk deshën t`ia dinë. Pse? Ku e ka mendjen Edi Rama dhe Ilir Meta nëqoftëse jo tek hallet e njerëzve, në qoftëse jo tek papunësia.

Premtuan taksa të ulura për 97% të shqiptarëve, cili prej nesh, cili prej jush paguan sot më pak?

Kush fiton më shumë? Kush jeton më mirë?

Vetëm një grusht njerëzish, as socialistë, as demokratë, as republikanë, as të djathtë, as të majtë, vetëm një bandë që e ka kapur për fyti Shqipërinë, vetëm oligarkia jeton më mirë, vetëm për ta Shqipëria është në drejtimin e duhur.

Drejtim i duhur të duket vendi,  kur javë për javë bredh si turist, kur një javë shkon në muzeun e Mercedezit e në javën tjetër në muzeun e Ferrarit, pa pyetur se aty 100, 200 apo 500 metra më tej ka një kamp refugjatësh ku për turpin tënd, për faqen e zezë të kësaj qeverie për herë të parë në 25 vite nuk ka më vetëm sirianë po ka edhe shqiptarë që ky kryeministër dhe ky kryetar i Kuvendit i ka çuar refugjatë.

Ne uruam dhe bëmë gjithçka, madje i çuam edhe propozime ligjore për të ndryshuar këtë situatë por ata i hodhën poshtë.

Ne ju bëmë thirrje ju dhe sëbashku me ju manifestuam para dyerve të tyre për t`i paralajmëruar por prapë e bënë veshin shurdh, e bënë syrin qorr, dhuna e kartonave të oligarkisë refuzoi jo  propozimet tona por interesat tuaja, uljen e taksave, rritjen e pagave, rritjen e e pensioneve, rritjen e ndihmës sociale, hapjen e vende të punës, këtë refuzuan  në oligarkinë e pashpirt të kartonave  në Parlament.

Por, vëllezër e motra 21 qershori po afron dhe më 21 qershor kartonat nuk i ka Edi Rama, kartonat nuk i ka Ilir Meta, kartonat i keni ju, kartonat i kemi ne.

Ndaj më 21 qershor unë ju ftoj, ne ju ftojmë  t`i bashkojmë këto kartona me një votë plebishitare me dy mesazhe:  me Votën tonë të ndalim të keqen, t`i japim mesazhin, mësimin  dhe  ndëshkimin e merituar qeverisë së mashtrimeve, qeverisë që i  theu premtimet dhe e la popullin e vet në ditën më të zezë por me votën tonë  le të  përqafojmë platformën tonë, platformën e Grida Dumës për Durrësin , platformën e uljës së taksave, platformën e dëgjimit të zërit tuaj, e komunikimit me ju dhe jo shpërfilljen ndaj jush, e njërzillëkut me ju dhe jo arrogancës ndaj jush, e punës për ju dhe për ju dhe jo për bandat e për oligarkitë, Durrësit për durrsakët dhe jo të Durrësit për oligarkinë.

Vota juaj për Grida Dumën  është votë për dinjitetin tuaj, është votë për një qytet , për një bashki që punon ditë e natë për ju, ju e vëtëm ju.

Por vellezër e motra , vota  e 21 qershorit për opozitën është edhe votë për ,platforën tonë kombëtare, për uljen ne  taksave  dhe rivendosjen e taksës së sheshtë por  taksës së sheshtë më të ulët në Ballkan , ky është zotimi i Luzlim Bashës,kjo është platforma e opozitës .

Pë faljen e kamat-vonesave të energjisë elektrike dhe të ujit të pijshëm  dhe uljen me 25 për qind të çmimit të energjisë, për reduktimin e çmimit të naftës përmes reduktimit të taksës së qarkullimit, për nxjerrjen nga frigoriferi të rrogave dhe pensioneve, për rritje të pagave dhe te pensioneve për punë dhe dinjitet për të gjithë shqiptarët.

Vëllezër dhe motra, kësaj platforme i përgjigjet realiteti shqiptar, hallet tuaja janë prioriteti ynë,  platforma jonë është zgjidhja e këtyre halleve, dyshja Rama-Meta shpërdridhen përditë nëpër ekrane flet për çfarë i do qefi por jo për hallet tuaja.

Thotë se ky nuk është momenti, se këto zgjedhje nuk mund të jenë për papunësi, se ky nuk është momenti për të folur për çmimet, për taksat në qoftëse këto janë hallet tuaja kryesore ne qoftëse këto janë problemet tuaja kryesore ku ka moment më të mirë se për t’i zgjidhur sot.

Ndaj dua t’ju them, dua  t’ju shpall këtu edhe një herë publikisht se me votën e 21 qershorit qeveria do të pranojë platformën tonë ose për ndryshe do të largohet.

Taksa të ulta, ulje çmimesh, punë dhe dinjitet për shqiptarët për këtë ofrojmë bashkëpunimin tonë, për këtë ofrojmë zgjidhjet tona, për këtë jemi gati të shtrijmë dorën e bashkëpunimit me këdo por nëse interesat e shqiptarëve nëpërkëmben nëse qeveria vazhdon rrugën e saj pa krye ka një dhe vetëm një rrugë përballja me popullin sovran deri në fund.

Ndaj ju ftoj ta kthejmë kohën e mbetur deri më 21 Qershor me një punë të përditëshmë e të përnatëshme  krah për krah me njëri tjetërin , demokratë e republikan njësoj si Grida Duma dhe Agron Duka që me shëmbullin e punës së tyre të pa mohushme cdo ditë të avancojmë drejtë fitores së Durrësit e cila është fitorja  e juaj, fitorja e durrësakëve, fitorja e çdo njeriu qe dëshiron punë dhe dinjitet, fitorja e shqiptarëve !

Zoti e bekoftë Durrësin!

Rroftë aleanca midis PD dhe PR !

Fitore, fitore, fitore, fitore!

Njoftim për shtyp i Partisë Demokratike, 25  Maj 2015

Faktet tronditëse të publikuara sonte nga emisioni investigativ, Ca thu, në Agon Channel, nxjerrin në pah mekanizmin kriminal të vënë në lëvizje për të manipuluar zgjedhjet e 21 qershorit.

Në këto pamje që shihni në ekran, të sapotransmetuara nga Agon Channel, duket qartë se kemi të bëjmë me një bandë të mirëorganizuar që falsifikon kartat e identitetit të cilat janë planifikuar të shpërndahen e të kthehen në vota.

A ka dijeni Edi Rama dhe Ilir Meta për prodhimin në seri të këtyre kartave dhe a po dalin ato në treg sipas nevojave të tyre elektorale?

Kush ka sot nevojë për vota në Shkodër? Kush kërcënon nga foltorja e parlamentit se me 21 qershor do ta shohim rezultatin në Shkodër?

A kanë përgjegjësi Edi Rama kryeministër dhe Ilir Meta kryetar parlamenti për këtë aktivitet kriminal që ndodh në prag të zgjedhjeve?

Partia Demokratike i bën thirrje Prokurorisë të nisë menjëherë hetimet për këtë skemë kriminale të falsifikimit të dokumentave të identitetit, e të çojë deri në fund zbardhjen e mekanizmit për të zbuluar kokën e këtij trafikimi skandaloz në prag të zgjedhjeve.

Partia Demokratike i bën thirrje partnerëve ndërkombëtarë dhe vëzhguesve të OSBE-ODIHR-it, të shtojnë monitorimin përballë këtyre fakteve flagrante të cënimit të standarteve të zgjedhjeve të lira e të ndershme.

Partia Demokratike paralajmëron dyshen Rama-Meta të mbajnë duart larg votës se sovranit, pasi prekja e votës do të sjellë pasojat më të rënda për ta.

Deklaratë për media e deputetit të Partisë Demokratike, Edi Paloka, 25 Maj 2015

Kryetari i Partisë Demokratike, Lulzim Basha priti sot kryesuesen e misionit të vëshgimit të zgjedhjeve në Shqipëri, zonjën Audry Glover, dhe ndau me të shqetësimin për një sërë zhvillimesh e ngjarjesh që po cënojnë e po vënë në rrezik standardet e zgjedhjeve të lira e të ndershme.

Basha theksoi se dyshja Rama-Meta ka nisur të ngrejë skemën e manipulimit të votave, duke u bërë presion të hapur drejtorëve te administratës publike, për të blerë votat dhe për të marrë vota me çdo mënyrë.

Kryetari i PD-së shprehu shqetësimin edhe për dhunën e ushtruar ndaj anëtarëve dhe simpatizantëve të Partisë Demokratke gjatë tubimeve elektorale. Z. Basha solli në vëmendje rastin e Durrësit, ku militantët e PS dhunuan anëtarë të PD-së, rastin e Ersekës ku u tentua të goditet kryetari i opozitës, rastin e Malësisë së Madhe, ku pas takimit elektoral, policia ushtroi kontrolle ndaj simpatizantëve të PD-së, dhunën policiore ndaj simpatizantëve të Partisë Demokratike nëVorë dhe presionin e hapur që I bëhet kandidatit të Partisë Demokratike .

Dhuna policore dhe presioni ndaj disa kandidatëve janë një shembull i keq i përdorimit politik nga qeveria të Policisë së Shtetit me përpjekjen për të shantazhuar mbështetësit e opozitës.

Mazhoranca përmes KQZ tenton të eleminojë, duke mos lejuar kandidimin në disa zona të disa kandidatëve, aty ku Rama dhe Meta dyshojnë se këto alternativa tërheqin vota të shumicës.

Gjithashtu, përmes presioneve ndaj KQZ, mazhoranca përpiqet të eleminojë në tryezë kandidatin e opozitës për Kurbinin duke mos lejuar regjistrimin e tij.

Janë shumë shqetësuese tentativat për manipulimin e listave zgjedhore të konstatuara në Durrës, ku janë vendosur fiktivizht qindra qytetarë në lista, edhe pse vendbanimi i tyre nuk është në këtë zonë zgjedhore.

Sipas zotit Basha është e dënueshme dhe e papranueshme gjuha fyese e kryeministrit ndaj kandidatëve të opozitës, dhe presioni e kërcënimet që ai u bën qytetarëve kur thotë se do të bllokojë fondet nëse nuk votojnë kandidatët e tij.

Po ashtu, u denoncuan edhe rastet e vendosjes së qeverisë dhe aseteve të saj në shërbim të kandidatëve të majtë, si një shkelje flagrante e Kodit Zgjedhor.

Kryetari i Partisë Demokratike  u ndal dhe tek procesi I dekriminalizimit ku ndau shqetësimin për mungesën e vullnetit të mazhorancës për të miratuar aktet ligjore që do të ndalonin personat me precedentë kriminalë të garonin në zgjedhjet e 21 qershorit

Zonja Glover mbajti shënim rastet konkrete të paraqitura nga z.Basha dhe u angazhua për monitorim të thellë e serioz të situatës.

Njoftim për shtyp i Partisë Demokratike, 25  Maj 2015

Me një pjesëmarrje masive të mijëra qytetarëve të Shkodrës, Voltana Ademi, kandidate e Partisë Demokratike për kryetare Bashkie, hapi mbrëmjen e 24 majit fushatën elektorale për zgjedhjet e 21 qershorit 2015 me një miting madhështor në sheshin “Nenë Tereza”.

Gjatë fjalës së saj, Voltana Ademi është ndalur tek situata e rendë ekonomike që ka pllakosur Shkodrën nga qeverisja e majtë. Ajo ka kërkuar mbështetjen e banorëve të Shkodrës duke premtuar më shumë punë, dinjitet dhe mirëqenie.

“Të gjithë bashkë jemi të ndërgjegjshëm që situata ekonomike në vend por sidomos ajo në Shkodër ka pësuar një rënie dramatike përgjatë 2 viteve të fundit të qeverisjes Rama-Meta. Koalicioni majtë PS-LSI, ka mbjellur varfëri, varfëri ekstreme, papunësi,pasiguri për jetën, pa pasur një rrugë shpëtimi, shkodranët gjithnjë e më shumë po largohen nga Shqipëri pasivisht me gra dhe fëmijë si në fillim të viteve ’90. Qeveria thotë se këta njerëz ikin të mashtruar nga krimi i organizuar por i vetmi organizator dhe nxitës i kësaj të keqeje të madhe është dyshja Rama – Meta. Jemi këtu për të treguar vendosmërinë tonë për të rikthyer dinjitetin njerëzor nëpërmjet punës dhe përgjegjshmërisë. Ne duhet të bëjmë më shumë për Shkodrën tonë, Shkodrën e kulturës dhe traditës”, tha Ademi.

Kandidatja e së djathtës për Shkodrën Voltana Ademi theksoi se do t’i shërbeëj të gjithë qytetarëve në të njëjtën mënyrë, pa marrë parasysh nëse janë nga Bashkia apo Komuna, nëse vijnë nga një parti tjetër politike apo nga asnjë parti politike.

“Unë do të jem atje për t’ju shërbyer ju”, theksoi znj.Ademi.

Njoftim për shtyp i Partisë Demokratike, 25  Maj 2015

“Jemi këtu para Teatrit, për të dëshmuar një premtim të parealizuar të Bashkisë dhe kryetarit Filo e shefit të tij qeveritar Peleshi që nuk bënë asnjë investim për tetë vite.

Përballë Teatrit është Kulla që i bën karshillëk, kur lekët e saj duhet të investoheshin tek ky Teatër. Ky është institucioni më i rëndësishëm dhe më përfaqësues i artit të Korçës, ku çdo gjë është lënë pas dore me shpërfillje dhe heshtje tejet të gjatë. Me nisjen e fushatës,  pushteti lokal na ofron një projekt  të sajuar politik për t’iu imponuar komunitetit artistik se, vëmendja po kthehet tek ata. Brenda terreni i rrënuar dhe pa asnjë standard teknik dëshmon më së miri pa patur nevojë për komente.

Artistët që kanë aktruar dhe aktrojnë këtu janë krenaria e artit jo vetëm e Korçës, por dhe e Shqipërisë, që për fat të keq duhet të bëjnë art në kushte absurdi. Sot i bëjmë thirrje kryetarit të Bashkisë Filo dhe shefit të tij qeveritar të mos bëjë më propagandë  e show me Teatrin dhe aktorët, kur e vetmja arritje janë emocionet e aktrimit dhe duatrokitjet e pakursyera të publikut korçar.
Unë kam një projekt ambicioz për investime në Teatër të cilat do të jenë vendimet e para të Këshillit Bashkiak. Politikat e artit dhe të kulturës janë prioritare në programin e Bashkisë së re”.

Njoftim për shtyp i Partisë Demokratike, 25  Maj 2015

Kryetari i Partisë Demokratike Lulzim Basha ka vijuar turin e bashkëbisedimit me qytetarët në Lezhë dhe Shënkoll.  Z. Basha ka ndarë me banorët shqetësimin për situatën e rëndë ekonomike që po kalon vendi. Dyshja Rama-Meta jo vetëm nuk kanë mbajtur asnjë premtim por e kanë zhytur vendin në varfëri, papunësi dhe mjerim. Në dy vite kanë bërë të kundërtën e asaj që premtuan për të ardhur në pushtet, rritën taksat, çmimin e energjisë, naftën etj. Pasi nuk mbajtën asnjë premtim, tha zoti Basha, refuzuan dhe amendamentet e PD për ulje taksash, ulje të çmimit të energjisë etj.

“U çuam amendamentet për hallet e problemet e mëdha të Shqipërisë, për premtimet e tyre të harruara. Rrëzuan amendamentin tonë për uljen e tvsh për energjinë elektrike, nga 20 në 6%, në mënyrë që familjet shqiptare ta paguanin më lirë energjinë elektrike, rrëzuan amendamentin tonë për rritjen e rrogave e pensioneve. Të tilla amendamente rrëzuan një nga një, duke përfshirë amendamentin për punësimin e rinisë ku i propozuam të hiqnin taksat për ato biznese që punësojnë të rinj, për të paktën një vit. Refuzuan kështu, jo propozimet e opozitës por refuzuan hallet e problemet e qytetarëve”.

Nga Lezha, kryetari i PD-së Lulzim Basha ka shprehur gatishmërinë për të bashkëpunuar me qeverinë, nëse ajo do të pranojë ofertën e PD për ulje taksash, ulje të çmimit të energjisë dhe naftës,  investime që hapin vende pune dhe përmirësojnë cilësinë e jetës së qytetarëve. Këto, tha Basha janë interesat jetike të qytetarëve të cilat do i konfirmojnë dhe me votën e tyre të 21 qershorit, ky është prioriteti i PD.

“Po të pranojnë platformën tonë për uljen e çmimit të energjisë me 25% dhe faljen e kamatë-vonesave për energjinë e ujin anembanë Shqipërisë, për uljen e taksës në nivelin më të ulët në Ballkan, 9%, për rritjen e rrogave e pensioneve përtej indeksimit të inflacionit, për financimin me prioritet të sektorëve të diskriminuar, siç është sektori i bujqësisë, turizmi, për nxitjen e punësimit rinor, përmes një regjimi veçanërisht lehtësues për bizneset që hapin vende pune për të rinjtë, ne jemi gati të bashkëpunojmë sepse për ne pushteti nuk është qëllim më vete por është shërbimi ndaj jush, është qëllim i padiskutueshëm. 21 qershori është dita kur ne do i japim mesazhin tonë më të bashkuar e më të fortë që ka dhënë ndonjëherë Shqipëria demokratike”.

Në takimet me banorët e Shënkollit, z. Basha është njohur me shqetësimin e banorëve për faturat e larta dhe abuzive të energjisë elektrike, mungesën e subvencioneve, rritjen e çmimit të naftës, çka e ka bërë më të vështirë punimin e tokës dhe dhunën e presionin që policia ushtron ndaj tyre edhe kur dezinfektojnë produktet bujqësore.

“Nuk i shohin hallet tuaja, nuk duan t’i dëgjojnë hallet tuaja, papunësinë, varfërinë, taksat e larta, çmimet e papërballueshme të karburantit e energjisë ndaj dhe në 21 qershor thonë nuk është koha të merremi me hallet e shqiptarëve. Unë ju them sot nga Shënkolli, 21 qershori është dita e zgjidhjes së halleve tona”

Njoftim për shtyp i Partisë Demokratike, 25  Maj 2015