Blog

Sot Edi Rama tha që shqiptarët janë të varfër sepse nuk dinë të aspirojnë. Dhe ashtu si shqiptarët arratisen sot, nga burgu i varfërisë, nga burgu i papunësisë, sot Edi Rama u arratis nga përgjegjësia e tij si burrë shteti, u arratis nga përgjegjësia që ka për t’i drejtuar shqiptarët drejt zhvillimit ekonomik. Sot ai bëri deklaratën e rradhës duke konfirmuar edhe një herë që situata është e rëndë, nuk ka drejtim dhe kjo është arsyeja pse nuk po krijohen vende të reja pune, investimet e huaja po bien, po bie edhe ekonomia përditë edhe më shumë. Po e shohim që po shkon drejt zymtësisë. Nuk është një çudi që edhe zgjedhjet lokale që kemi përpara, me futjen e kandidatit ministër, të jenë një shëmbëlltyrë, një fotokopje e keqe, e keqqeverisjes, e betonit 11 vjeçar të ish-kryebashkiakut Rama. Më 21 qershor shqiptarët duan ta mbyllin një herë e mirë këtë kapitull tallës ndaj dinjitetit të tyre. Tallës ndaj ekonomisë dhe kursimeve të tyre. Mjaft më, nuk mundet një qeveritar, një burrë shteti të tallet në këtë formë me qytetarët dhe jemi të bindur se më 21 qershor do të jetë një mësim shumë i madh për demokracinë shqiptare dhe në veçanti për tiranasit të cilët nuk duan kurrësesi të rishohin edhe një herë betonizimin që ka karakterizuar këtë qytet për më shumë se 11 vite.

Njoftim për shtyp i Partisë Demokratike, 28 Prill 2015

Kryetari i Partisë Demokratike Lulzim Basha prezantoi kandidatët për kryebashkiakë në Gramsh z.Kodhel Çala, në Cërrik z.Qamil Boja, në Belsh z.Asqeri Kuqja dhe në PeqinAlbert Kreçi.

Shqipëria tha z.Basha, ka dy vjet që ecën në rrugën e gabuar.  Mjerimi dhe varfëria kanë pushtuar çdo familje, ndërsa qeveritarët tallen me bukën e fëmijëve të shqiptarëve. Mazhoranca është zhytur në korrupsion duke kërkuar ryshfete edhe për një vend pune si pastruese.

“Kam takuar sot, sikundër dje dhe ditët e kaluara, nëna kryefamiljare që qanin se s’kishin bukë t’u jepnin fëmijëve, që mbanin me ujë me sheqer foshnjen 10 muajshe, baballarë që hidhninin kokrrën e lotit sepse ministri i mirëqenies personale u ka hequr asistencën për djalin se i ishte prerë vetëm një dorë e i duhej pritur edhe tjetra që të përfitonte asistencën. Sa ka shkuar rryshfeti për vendin e punës në Cërrik”?

Banor: 2 mijë euro.

“2 mijë? Pazar i ulët qenka se diku kishte shkuar 3 mijë e diku tjetër 5 mijë”.

Kjo mazhorancë nuk ka mbajtur asnjë premtim, tha Basha, dhe shembulli më i mirë është energjia elektrike çmimi i së cilës është rritur, ndërsa faturat afrofe janë dy dhe tre fishuar.  Sot kërcënon shqiptarët se do t’u marrë edhe shtëpitë, theksoi kryetari i Partisë Demokratike.

“Na u premtua se çmimi i energjisë do ulej. Porn ë fakt çfarë ka ndodhur, e kanë rritur çmimin e energjisë për plotë 77% të konsumatorëve. E sikur kjo të mos mjaftojë, faturat afrofe vazhdojnë të bëjnë kërdinë. E sikur të mos mjaftojë kjo, qeveria ka sjellë të enjten e kaluar në parlament dhe planifikon këtë të enjte të kalojë një projekt-ligj i cili parashikon t’ju marrë shtëpitë shqiptarëve që nuk paguajnë dot faturat e kripura të energjisë.

Basha tha se 21 qershori është ora e llogaridhënies për keqqeverisjen, premtimet e pambajtuara dhe varfërinë ku e ka zhytur vendin dyshja Rama –Meta.

“Punët nuk po ecin në drejtimin e duhur. Punët po ecin në drejtimin e gabuar. Numëri i personave që jetojnë në kufijtë e mjerimit është pesëfishuar. Ta ngrejë dorën se cili fermer sot subvencionohet për naftën. Kush e paguan naftën sot më lirë se para dy vitesh? Zgjedhjet e 21 qershorit nuk janë dhe nuk mund të jenë kurrë vetëm zgjedhje vendore. Ato janë zgjedhje ku do të ushtojë nga gjiri i qytetarëve të bashkuar, të djathtë e të majtë, vendimi dhe gjykimi i drejtë politik me votën tuaj për keqqeverisjen Rama-Meta”, tha Basha.

Njoftim për shtyp i Partisë Demokratike, 28 Prill 2015

Kandidati për kryebashkiak, Halim Kosova, takohet me prindër dhe punonjës të çerdheve në Tiranë. Cilësia e edukimit në këtë moshë, vendimtare për të ardhmen e shoqërisë dhe qytetit. 

Kandidati për kryetar Bashkie në Tiranë, Halim Kosova u takua dje me prindër që kanë fëmijët në çerdhe, dhe ndau me ta ide dhe përvoja se si mund të përmirësohet ky shërbim jetik për fëmijët.

Kosova tha se investimi tek cilësia e shërbimit dhe edukimit të fëmijëve në çerdhe, është investim për të ardhmen e komunitetit dhe të qytetit.

“Kur bëhet fjalë për fëmijët, është e pamundur që në dorë ta ketë vetëm prindi, apo ta ketë vetëm edukatorja, apo ta ketë vetëm sistemi. Eshtë një trekëndësh i artë midis politikave, punës tuaj të dashur prindër që është një shtyllë shumë e rëndësishme e këtij trekëndëshi por edhe puna e këtij stafi të palodhur”, u shpreh Albana Canollari, kordinatorja e këtij takimi.

“Në çerdhe do doja që gjërat për fëmijën, vizualisht ta bëheshin më të prekshme. Që do të thotë ajo që mësohet nga ana teorike të arrihet të bëhet diçka nga ana e prekshme me dorë. Nuk e di se sa do arrijmë ta implementojmë këtë”, u shpreh një nënë që kishte fëmijën ne cerdhen numër 35 në kryeqytet.

Kandidati Kosova tha se periudha e çerdhes është periudhë e rëndësishme në jetën e një fëmijë, pasi është koha kur formësohet karakteri.

“Të gjithë sëbashku do bëjmë më të mirën. Ju me syrin kritik që çfarë duhet të përmirësohet dhe ne me detyrimin moral por edhe ligjor për të bërë më të mirën, të çojmë në drejtimin e duhur edukimin e këtyre fëmijëve dhe mirërritjen e tyre drejt rrugës e cila, unë gjithmonë e them, është një rrugëtim pafund. Asnjëherë nuk ka fund. Unë kam ardhur këtu t’iu them që do krijojmë linja të thjeshta por frytdhënëse se si ne bashkarisht të bëjmë më të mirën. Po bëmë më të mirën për qytetin kemi investuar për të ardhmen, dhe fëmijët janë e ardhmja e këtij qyteti, kështuqë thjeshtë le të bëjmë më të mirën për ta sepse nga ata varet dhe e ardhmja e shoqërisë, e familjes”, tha Kosova.

Kandidati për kryebashkika theksoi rëndësinë e ruajtjes së komunikimit mes Bashkisë dhe qytetarëve për cështjet më të mprehta.

“Ideja ime kjo është që si të krijojmë në Bashkinë e ardhshme të Tiranës mundësi që çdo grup interesi të ketë mundësinë të përcjelli mendimet në mënyrë që ta bëjmë se s’bën një lidhje me qytetarin dhe me të gjitha nevojat e tij në të gjitha aspektet e jetës”, pohoi Kosova.

Njoftim për shtyp i Partisë Demokratike, 28 Prill 2015

Kandidati Kosova pohoi se në Tiranë është 1/3 e Prodhimit të Brendshëm Bruto ndaj vëmendja e qeverisë dhe e pushtetit lokal duhet të jetë këtu, duke shprehur bindjen se mund të bëhet shumë për nxitjen e sipërmarrjes dhe punësimit.

Kandidati për kryetar Bashkie të Tiranës, Halim Kosova, u takua sot me tregtarët e fruta perimeve dhe tregut elektrik pranë Shkollës së Baletit dhe dëgjoi nga afër problemet dhe kërkesat e tyre. Tregtarët shprehën shqetësimin për rënie e fuqisë blerësë dhe të mbylljes në masë të biznese.

“Kjo gjë është e dukshme për vetë faktin se ditë për ditë në QKR, minimalja, mbyllen 30 biznese ditë për ditë, që do të thotë 1.000 biznese në muaj. Në vit i thonë 12.000 biznese, 30.000 janë gjithë e gjithë”, tha një tregtar.

Kandidati Kosova u tha tregtarëve se do të bëjë të pamundurën që shqetësimet e biznesit të jenë pjesë e programit të tij. Z.Kosova pohoi se në Tiranë është 1/3 e prodhimit të brendshëm bruto ndaj vëmendja e qeverisë dhe e pushtetit lokal duhet të jetë këtu, duke shprehur bindjen se mund të bëhet shumë për nxitjen e sipërmarrjes dhe punësimit.  Ai u angazhua për një menaxhim me transparencë të taksave të tregtareve, që ky kontribut atyre t’u kthehet në shërbime.

“Ajo që është e rëndësishme është që njerëzit duhet ta shohin në realitet atë që paguajnë, sadopak. Ajo duhet ti kthehet në një të mirë. Në qoftëse ti i jep, shkatërrohesh. Ti i jep, më keq. I jep prapë, më keq. Atëherë krijohet një ide sikur po jap po s’po shkon në drejtimin e duhur ajo që jap. Kjo është shumë e rëndësishme , që njerëzit të binden për ato që paguajnë”, tha Kosova.

Njoftim për shtyp i Partisë Demokratike, 27 Prill 2015

Partia Demokratike dënon përpjekjet e përditshme të dyshes Rama-Meta për të penguar procesin e dekriminalizimit.

Sa më shumë nxjerrin pretekste dhe sabotojnë këtë proces jetik për vendin dhe të ardhmen e tij, aq më shumë vërtetojnë në sytë e publikut se nuk e duan dekriminalizimin, se nuk ndahen dot nga inkriminimi masiv që kanë mbjellë në çdo zyrë e institucion.

Pasi kriminalizuan administratën dhe Parlamentin, sot e mbrojnë deri në fund skemën e tyre dhe duke u bërë avokatë të trafikantëve të drogës e të prostitucionit, që i kanë nxjerrë sërish si përfaqësuesit e tyre duke i kandiduar për kryetarë bashkie.

Dyshja Rama-Meta përpëlitet e nxjerr gjithfarë justifikimesh, për të mbrojtur trafikantët dhe kriminelët që i kanë në Parlament dhe në listat e kandidatëve për kryetarë bashkie, që i përdorën më parë dhe mbahen me shpresë t’i përdorin prapë për të blerë votat.

Shqiptarët sot vuajnë për bukën e gojës ndërsa kandidati socialist për Bashkinë e Policanit, Adriatik Zotka është kallzuar penalisht për fshehje të 1.5 milionë eurove.

Qytetarët burgosen dhe shtyhen drejt vetëvrasjes për 30 mijë lekë të vjetra ndërsa trafikantët e drogës dhe protistucionit janë sot kandidatë për kryebashkiakë, si Artur Bushi në Krujë, Ervin alias Elvis Roshi ne Kavajë e gjetkë.

Qytetarët burgosen se lyejnë shtëpitë e tyre ndërsa ministri i Mirëqenies Personale Erjon Veliaj, dhe pse është kallzuar penalisht, u mor në mbrojtje nga Policia pasi ndërtoi vetë pa leje.

Qytetarët po ikin natën, kanë marrë rugët e eksodit dramatik ngaqë e kanë të pamundur të jetojnë në kushtet e varfërisë e mjerimit, ndërsa qeveritarët s’duan tia dinë të zhytur në luks e në korrupsion galopant.

Fjalë dhe demagogji prodhon me shumicë dyshja Rama-Meta ndërsa shton listën e të inkriminuarve në garën për zgjedhjet e 21 qershorit. Asgjë dhe asnjë shpifës i  dënuar me vendim gjykate, si Taulant Balla, nuk do t’a ndalë procesin e dekriminalizimit. Partia Demokratike kërkon të procedohet me shpejtësi për miratimin e amendamentit ligjor që pengon kandidimin e të inkriminuarve.

Kush e ka vullnetin politik për të ndalur krimin në këto zgjedhje, Partia Demokratike që propozon pengimin me ligj të kandimimit të të inkriminuarve, apo Partia Socialiste që refuzon ta bëjë këtë?

Një mirënjohje të veçantë për Ambasadën e Shteteve të Bashkuara të Amerikës një aleate e madhe e Shqipërisë në këtë proces jetik për të sotmen dhe të ardhmen e vendit.

Njoftim për shtyp i Partisë Demokratike, 27 Prill 2015

Kryetari i Partisë Demokratike Lulzim Basha prezantoi kandidatët për kryetar bashkie në Elbasan z.Ardian Turku, në Prrenjas z. Bajazit Karriqi dhe në Librazhd z.Fadil Brazhda.

Në Elbasan z. Basha u prit nga qytetarët të cilët donin t’i tregonin në prani të mediave shqetësimet e tyre të mëdha. Një qytetare i tha z.Basha se u detyrua të hiqte vajzën nga fakulteti pasi nuk kishte mundësi ekonomike sepse e kishin hequr nga puna. Një zonjë shprehu shqetësimin për pamundësinë për të siguruar bukën e gojës dhe se askush nuk i dëgjonte shqetësimet e tyre.

Qytetare: Kam punuar 7 vjet. Kam 5 muaj pa punë. Kam blerë me listë, verifikojeni. Hoqa gocën nga shkolla se e kam në shkollë të lartë dhe e kam në shtëpi.

Banore: Jam pensioniste. Marr 136 mijë lekë. Burri pa punë, çuni 33 vjeç pa punë, çuni 28 vjeç pa punë, çuni 25 vjeç pa punë. Dy nuse në shpi po hajmë dynjanë. Po zihemi për koren e bukës, po vritemi.

Banore:  E kam litarin në fyt. Një herë tentova të pi helm, më shpëtoi policia. Këtë herë do ta pi para bashkisë. Kam 3 vjet qe vuaj nga tumori në gjoks. Jam mbytur në borxhe. Frigorifer s’kam, gjë s’kam, 70 mijë lekë drita me vijnë. Më datë 14 kisha marrëveshjen me pagu 10 mijë lekë, ata me 14 në mëngjes erdhën dhe mi prenë dritat.

Kryetari i Partisë Demokratike u ka bërë thirrje të gjithë qytetarëve të majtë e të djathtë të bashkohen dhe të refuzojnë me votën e tyre politikën e nënshtrimit,  varfërimit, arrogancës që ka çuar qytetarët në kufijtë e mbijetesës, ndërsa qeveritarët pasurohen çdo ditë.

“Vota e 21 qershorit do të jetë akti më i madh i bashkimit të shqiptarëve, të djathtë e të majtë, edhe pse mund të mos ndajmë bindjet politike, edhe pse mund të jemi krejt të ndryshëm në pikëpamjet tona ideologjike, na bashkon mjerimi që ka kapluar vendin për shkak të politikës së mbrapshtë të Edi Ramës dhe Ilir Metës, na bashkon shqetësimi për t’u shkëputur nga politika e varfërimit, e lakut në fyt, e rripit që shtrëngohet, na bashkon dëshira për t’i shërbyer sa më mirë familjeve dhe fëmijëve tanë”, tha Basha.

Ai theksoi se populli është zhytur në varfëri dhe mjerim ndërsa kryeministri viziton fabrikat e Mercedes Benz-it në Gjermani, hap ekspozita pikture dhe për të vetmen gjë që nuk interesohet janë qytetarët shqiptarë që emigrojnë në të njëjtin qytet ku turisti kryeministër zhvillon vizita lluksi.

“Nuk iu rrihet këtu në Shqipëri nuk e shohin dot, nuk e ndjejnë dot dhimbjen e shqiptarëve si kryeministri turist që çdo fundjavë shkon dhe hap ekspozitat e tij nga Roma në Berlin, i fut dhe një të vizituar muzeut të Mercedes Benz-it në të njëjtin qytet, ku në të njëjtën ditë dhjetra shqiptarë përfundojnë si refugjatë”.

Koha e zullumit dhe regjimit të zullumit ka filluar numërimin mbrapsht, theksoi z.Basha, pasi shqiptarët janë më të bashkuar se kurrë për të marrë në dorë fatin e tyre.

“Më 21 qershor e keni ju në dorë qe ta merrni këtë fat dhe t’ia besoni atyre që do të japin përgjegjësi para jush, që do ta ndjejnë dhimbjen tuaj, do ta prekin atë dhe bashkë me ju do të kërkojnë rrugët e zgjidhjes. Rrugët e zgjidhjes që do të kalojnë me Partinë Demokratike dhe opozitën shqiptare nga ulja e mëtejshme e taksave, nga ulja e çmimit të energjisë, nga ulja e çmimit të karburantit, rritja e pensioneve dhe e rrogave“.

Njoftim për shtyp i Partisë Demokratike, 27 Prill 2015

Baltosja e përditshme e Partisë Socialiste dihet që nuk ngjit më. Çdo qytetar i Tiranës dhe i Shqipërisë e ka shumë të qartë dhe e di fare mirë se Lulzim Basha si kryetar bashkie i ka dhënë Tiranës pamjen dhe vizionin e një qyteti modern dhe europian. Me projekte për bulevardin e ri, me projekte për terminalin multimodal të pasagjerëve, për një transport publik modern, të gjitha këto projekte të bllokuara dhe të ndaluara nga Edi Rama në Këshillin Bashkiak të Tiranës. Një qytet me mbi 200 projekte të realizuara sot në infrastrukturë, dhe lagje në qytetin e Tiranës me shkolla dhe kopshte të reja. Po Edi Rama, çfarë gjurme la ai në qytetin e Tiranës si kryebashkiak. Të vetmen gjurmë që la është betoni i Tiranës dhe e vetmja gjurmë që po le sot në Shqipëri është eksodi, është ekonomia, është papunësia, është varfëria e qytetarëve shqiptarë. Qytetarë të cilët pyesin, ku është Edi Rama, ku është kryeministri i tyre turist i një populli që është sot në eksod, emigron. Por z. Rama duket se e ka fare të qartë që revolta e qytetarëve shqiptarë do ta ndëshkojë atë më 21 qershor. Ndaj sot fshihet, nuk përballet me qytetarët e tij dhe prezantimet e kandidatëve i bën ose duke ikur me vrap siç bëri në Tiranë, ose në salla të mbyllura dhe të errëta.

Deklaratë për media e deputetit Gerti Bogdani, 27 Prill 2015

Kandidati për kryebashkiak, Halim Kosova bisedon me banorët e Pezës, të cilët nuk shesin dot prodhimin. Kosova premton treg të organizuar, dhe komunikim të drejtpërdrejtë me ta për hallet dhe shqetësimet.

Kandidati për kryetar Bashkie të Tiranës, Halim Kosova, u takua dhe bisedoi me fermerë të zonës së Pezës, për shqetësimet dhe kërkesat e tyre.

Banorët sollën në vëmendje mungesat që kanë, kryesisht, u ndalën tek pamundësia për të shitur mallin që prodhojnë.

“Njerëzit këtu janë shumë punëtorë dhe punojnë. Kanë prodhime bujqësore por nuk dinë ku ti çojnë”, u shpreh një banor.

“Çdo zonë në Tiranë ka karakteristikë të vetën një, dy, tre, pesë prodhime. Por cili është ai që s’do më të mirën, por duhet një arbitër që ti kombinojë këto gjëra që ti do bësh këtë, ti do bësh këtë, ti do bësh këtë, në mënyrë që Bashkia t’u rregullojë lehtësira në punën tuaj të përditshme, t’u rregullojë rrugwt e komunikimet sepse në fund të fundit duhet transportuar diçka, të rregullojë linjën se si kjo do të shkojë tek qytetari. Ti e prodhon perfekt dhe je i detyruar ta shesësh në kushte mizerabël. Kjo ta humb vlerën e djersës tënde se po i njëjti mall është. Kjo është një ide që ne po e diskutojmë dhe do ta diskutojmë edhe më në hollësi bashkë, që të gjithë ta dinë që në filan datë hapet tregu i madh i perimeve, i frutave të kësaj zone,  pra ndërtimi i tregjeve dhe i rrugëve se si ju t’i bini në mënyrë të organizuar. Unë mendoj që kjo do të jetë një nga prioritetet e mia”, tha Kosova.

Banorët e zonës shprehën shqetësimet e tyre për kushtet bazike të jetesës.

“Kemi 1 kilometër e pak rrugë që gjatë dimrit as kafshët nuk kalojnë jo më makinat”, pohon një banor.

“Jemi në rrënzë të Tiranës dhe nuk kemi ujë të pijshëm . Ka humbur shpresa, i ka vdekur shpresa”, shpreh revoltën një banorë tjetër.

“Këto kanë bërë si Veli Agai me Sulltan Sulejmanin dhe me shku me i kërku një hall atij, asistencën, e shkon e merr ai që ka 10 vjetë që e mer. Ky hallexhiu e merr miellin me listë, nuk i paguajnë dot më. Këta nuk njifen fare a janë shqiptarë a se çjanë, hallin e tyre nuk e pyet kush”, proteston një banor i Pezës.

Halim Kosova i dëgjoi me vëmendje banorët dhe u angazhua para tyre për punë dhe komunikim të drejtpërdrejtë për hallet e tyre.

“Nëqoftëse do të kem mundësi të bëj 10 gjëra, ta dini që 5 do deklaroj. Ato të pesta do i bëj se z’bën”, u shpreh Kosova. Kandidati i PD për Bashkinë e Tiranës theksoi se transparenca dhe mbajtja e kontaktit me qytetarin do të jenë si gur themeli në aktivitetin e tij.

“Puna e parë është transparenca. Unë dua të bëj një sistem transparence ku çdo njeri, çdo qytetar i kësaj zone të madhe që po bëhët gati 1/3 e Shqipërisë, ta dijë se ku po shkojnë lekët e veta. Ku shkojnë taksat. U grumbulluan kaq lekë. Me këto lekë do bëhet kjo, do bëhet kjo , do bëhet kjo. Dy gjëra kam si qëllim unë. Ekspertët padyshim që i kam në një krahë por qytetari dhe fshatari që është direkt, nuk e zgjidhën këtu problemin, komunikim direkt. Ky do jetë një nga prioritetet e mia, si të lidhet me qytetarin. Të gjithë bashkarisht do bëjmë diçka për të ecur në rrugën e duhur”, tha Kosova.

Njoftim për shtyp i Partisë Demokratike, 27 Prill 2015

Pas prezantimit të kandidatit për kryetar bashkie në Konispol zotin Malo Myrtaj, kryetari i Partisë Demokratike Lulzim Basha është takuar me banorë të komunës Xarrë. Banorët i kanë kërkuar zotit Basha t’i ndihmojë që tokat e tyre të mos grabiten nga Koço Kokëdhima si dhe i kanë shprehur shqetësimet lidhur me  mungesën e  subvencioneve, pamundësinë për të siguruar bukën e përditshme,  ndërprerjen e ndihmës ekonomike, etj.

Banor: S’kemi marrë as subvencione, asgjë. “Po ke mik, do të hash fiq”, i thotë një llaf i urtë popullore.

Banor: Më përpara jepeshin 6 milion për ha, tanimë nuk jepen më. Këtu në fshatin tonë janë 60 ha tokë e përmbytur dhe janë 36 familje pa tokë fare sepse i merr Koçua ( Koço Kokëdhima) në mënyrë të padrejtë.

Invalid: Unë kam dy fëmijë. Pardje vajta në komision dhe ajo e komisionit më çoi për Tiranë. Unë kam dy fëmijë, jam njeri sakat, me një këmbë ku të ha? Merrja ndihmë sociale 99 mijë lekë, edhe atë ma prenë.

Banor: Dasmat e tyre i bëjnë me të gjitha, por hallet e popullit nuk i shikojnë fare.

Shitëse: Qeveria nuk vë dorë, ne shitësit çfarë do bëjmë?! Ja, unë jam bllokuar fare se mbajmë njerëzit me bukë. Kam dy blloqe, njërin e kam të madh fare, të vish ta shikosh nuk e lan dot njeri. Taksat u rritën.

Ndërsa në  Delvinë teksa po prezantonte kandidatin për kryetar bashkie. zotin Dhurim Alinani, një qytetare ka ndërprerë fjalën e zotit Basha për t’i treguar se si ai së bashku me gruan, vajzën dhe të vëllain ishin larguar nga puna.
Basha: Le t’i ngrenë duart ata që e paguajnë faturën e energjisë më pak se para një viti apo para dy vjetësh. Kush është futur në punë vitin e fundit të ngrejë dorën.

Qytetare: Zoti Basha mundem? Kam katër libreza, të pushuar nga puna, katër të pushkatuar ekonomikisht nga kjo qeveri. Turp të kenë!

Në Sarandë kryetari i Partisë Demokratike prezantoi Kreshnik Bozhon si kandidat për kryetar bashkie.

Ndërsa qytetarët janë në kufijtë e mbijetesës dhe si të vetmen zgjidhje shohin emigrimin, kryeministri është kthyer në një turist që çdo fundjavë bredh rrugëve të Europës.

Keqqeverisja ka marrë trajtat e pashpirtësisë me mënyrën se si  godet më të pamundurit. Duke iu rritur taksat e duke blerë palma, duke iu rritur çmimin e energjisë e duke ndërtuar kulla korrupsioni, duke u shembur të pamundurve djersën dhe gjakun e duke i lartësuar sarajet e tyre nga Surreli i Dajtit e deri në Qeparo. Populli refugjat, kryeministri turist. Edi Rama është kryeministri turist i një populli refugjat, theksoi Basha.

Kryetari i Partisë Demokratike Lulzim Basha ka prezantuar në Libohovë kandidatin për kryetar bashkie zotin Altin Çomo.
Basha shprehu bindjen se vota e 21 qershorit  do të jetë për projektin e shpresës, që të hap vende pune, të krijon mirëqenie. Që qytetarët mos ta kenë më alternativë ikjen si të vetmen shpresë, por të nisin të ndërtojnë pa asnjë pengesë të ardhmen e tyre në vendin tyre.

Njoftim për shtyp i Partisë Demokratike, 27 Prill 2015

Basha prezanton kandidatët për kryetar bashkie në Delvinë, Konispol, Sarandë, Libohovë.

Kryetari i Partisë Demokratike Lulzim Basha ka vijuar me prezantimet e kandidatëve për kryetarë bashkie në Delvinë zotin Dhurim Alinani, Konispol zotin Malo Myrtaj, në Sarandë zotin Kreshnik Bozho dhe në Libohovë Altin Çomo.

Situata e rëndë ekonomike ka qenë në qendër të shqetësimeve që banorët i shprehën zotit Basha. Si pasojë e papunësisë pasigurisë dhe pamundësisë për të përballuar jetën e përditshme, qytetarët kanë drejtuar sytë tek emigrimi.

” Një brengë tjetër, një brengë e vjetër që na rikthehet si një dramë e re, ajo e ikjes, e ikjes së familjeve të tëra në kërkim të shanseve për një jetë që nuk e gjejnë këtu. Në këto dy vite kanë humbur çdo shpresë, kanë humbur shpresën tek e sotmja dhe ç’është më e keqja, kanë humbur shpresën tek e nesërmja.

Zbarkoi me premtime të mëdha, aluçilante, për 300 mijë vende pune, për shëndetësi falas, për rend e siguri, për uljen e çmimit të energjisë, për uljen e çmimit të karburantit, për subvencione në bujqësi e në peshkim,  për uljen e taksave për 97% të shqiptarëve, e kur tha 97% të shqiptarëve  le t’i shohim ato duar të ngrihen, atyre që u është ulur taksa në këto dy vite ose të atyre që janë futur në punë këto dy vite, ose të atyre që paguajnë më pak faturën e energjisë se sa një vit apo dy vite më parë , spo ngrihen duar se s’ka sit ë ngrihen se e vërteta është krejt ndryshe,  dhe dhemb në çdo zemër, në çdo familje, në çdo vatër, në çdo qytet, por as për dhimbje nuk duan t’ja dinë! Nërsa qytetarët si pasojë e keqeverisjes së Rama-Metës kanë marrë rrugët e emigrimit, kryeministri tha zoti Basha sillet si turist çdo fundjavë rrugëve të Europës.

“Edi Rama është kryeministri turist i një populli refugjat për te cilin as nuk do t’ia dijë.
Si mendoni ju se do të hapin vende pune , duke ju rritur taksat e duke blerë palma, duke ju rritur çmimin e energjisë e duke ndërtuar kulla korrupsioni, duke ju shembur të pamundurve djersën dhe gjakun e duke i lartësuar sarajet e tyre nga Surreli në Qiparo.

21 qershori, tha kryetari i Partisë Demokratike është dita e gjykimit të madh për keqqeverisjen dhe dita kur shqiptarët me votën e tyre do t’i kthejnë shpresën qytetarëve të këtij vendi.

“Më 21 qershor vëllezër dhe motra, në radhë të parë e mbi të gjitha do të keni në dorë një instrument shumë të fuqishëm, të gjykimit me votë ,  të keqqeverisjes së këtyre 2 viteve, të politikës se  lakut në fyt për shumicën e luksit për pakicën. Vota juaj duhet të jetë vota për projektin, rrugën, shpresën, që të hap vende pune, të krijojë mirëqenie e të rikthjë lekun në duart e qytetarëve e jo  në xhepat e qeveritarëve. Që mos ta kemi më alternativën e ikjes të vetmen alternativë, por të nisni të ndërtoni pa asnjë pengesë të ardhmen tuaj dhe të ardhmen e fëmijëve tuaj në vendin tuaj”, tha Basha.

Njoftim për shtyp i Partisë Demokratike, 26 Prill 2015