Blog

Kryetari i Partisë Demokratike, Lulzim Basha prezantoi kandidatin për kryetar të Bashkisë së Vlores z. Genc Deromemaj. Zoti Basha ka ndarë me banorët e Vlorës shqetësimin për eksodin masiv të qytetarëve që ka prekur çdo fshat dhe qytet të vendit, nga jugu në veri. Kreu i opozitës theksoi se përgjegjës për këtë eksod janë dyshja sundimtare Rama-Meta që çdo ditë po varfërojnë shqiptarët dhe pasurojnë veten.

“Shqiptarët pyesin se çfarë po ndodh, vlonjatët pyesin si erdhën deri këtu, si arritën në më pak se dy vjet ta fusin ekonominë në krizën më të thellë që ka njohur në 15 vite, të mbyllin me mijëra biznese, të shkaktojnë eksodin e kapitalit që solli eksodin e investimeve, të vendeve të punës dhe tani eksodin e shqiptarëve. Si ia dolën të nxjerrin mijëra të rinj në rrugë, pa punë, shkollë, pa perspektivë, pa shpresë, si ia dolën t’ia hedhin një populli të tërë që i premtuan se do ia ulnin taksat, çmimet, se do të ulnin çmimin e energjisë ndërkohë që e rritën për 77% të shqiptarëve, rritën taksat e po i rrisin edhe më tej?! Çmimet u rritën, karburanti paguhet më shtrenjtë sot në Vlorë se sa në Berlin e Paris.

Pyesin vlonjatët, pyesin shqiptarët si erdhën deri këtu, si ia dolën t’i mashtrojnë e t’u thonë shëndetësia do të jetë falas, kur sot paguhet nën dorë më shtrenjtë e gjendja e spitaleve është e mjerueshme, si ia dolën të flasin për legalizime falas?! E vetmja gjë që bën ky palo kryeministër është një version i dobët dhe i pagëlltitshëm i “Portokallisë”, me leje legalizimesh që vetëm falas nuk janë. Si erdhën deri këtu? Pse po ikin shqiptarët? Pse po largohen shqiptarët nga vendi i tyre, aty ku peshojnë e duhet të peshojnë më rëndë se kudo tjetër, pse po ikin nga sytë këmbët dhe kur e shohin se azil nuk jepet, që askush nuk i pret me krahëhapur.

Erdhën deri këtu sepse varfëria është pesëfishuar, numri i shqiptarëve që jetojnë me 1 dollarë në ditë është pesëfishuar, është rikthyer në gjendjen ku ishte në vitin 2005, erdhën deri këtu sepse 20 mijë familje shqiptare nuk marrin më ndihmë ekonomike, nuk kualifikohen më për ndihmë ekonomike dhe e di pse?! Sepse iu gjendet një karrige në shtëpi, një tavolinë në shtëpi dhe kur gjen tavolinë e karrige nuk kualifikohesh më për ndihmë ekonomike, sepse duhet të jetë si në mesjetë që të përfitosh ato 16 mijë lekë të mjera që merr sot ajo pakicë që i merr, ndërkohë që fatura minimale e energjisë është 35 mijë lekë dhe po s’pate ta paguash, çfarë të pret?!

Si erdhën deri këtu, kur papunësia ka shkuar në 20%, me 35% e të papunëve, nën moshën 30 vjeç? Ndërkohë, arbitrariteti, arroganca, pashpirtësia e qeverisë bën kërdinë. Mbi 8 mijë të larguar nga administrata publike, nëpunës civilë, me dhjetra mijë të tjerë të larguar nga sektori privat sepse kompanitë mbyllen, investitorët i vënë kyçin, bizneset e vogla mbyllen sepse nuk paguajnë dot taksat.

Mbi 8 mijë ndërtesa në proces legalizimi, të prishura, me leje apo në proces legalizimi ndërkohë që sarajet e qeveritarëve lartësohen ditë për ditë, nga Surrojt në Qeparo. Arroganca, arbitrariteti dhe paligjshmëria, mjerimi, skamja dhe papunësia janë arsyet e eksodit. Eksodi i shqiptarëve është denoncimi më i fuqishëm i keqqeverisjes, dështimeve, është prova më e saktë se sa u përket shqiptarëve dhe halleve të tyre, këta e kanë lëshuar timonin, pa duar. Po për vete?! Për vete janë zhytur në luks të shfrenuar. 600 milionë euro të shqiptarëve po i bëjnë rrush e kumbulla, palma dhe kulla, qendrat e qyteteve të investuara jo më herët se 10 vjet përpara rindërtohen përsëri në tendera, gjysma e parave të së cilave shkojnë për pushtetarët e korruptuar. Kurrë s’ka qenë hendeku më i madh midis qytetarëve që vuajnë për bukën e gojës, që vuajnë për një vend pune, që nuk arrijnë do të paguajnë faturat dhe qeveritarëve të kredhur në luks që krekosen majë sajeve të tyre, që mbushin xhepat ndërkohë që populli vuan e rënkon, që fërkojnë duart kur njerëzit largohen, sepse u gënjen mendja se u largohen votat kundër e nga ana tjetër i bëjnë presion Europës, “shiko se ç’ju bëjmë ne!”. Ky është një rikthim i dhimbshëm në kohët më të zeza, kur sundonin jo oligarkët e sotëm por skalioni i fundit i mënxyrës që kapi për fyti këtë vend për 50 vite.

Si do të shpëtojmë? Si do të shpëtojmë nga këta?! Duke ikur nga vendi ynë, duke ikur nga Vlora apo duke pranuar ofertën që po na sjellin për zgjedhjet lokale, ofertën e komiteteve ekzekutive, ku askush nuk është pyetur për ndarjen territoriale, ku në vend që të zvogëlohej hendeku mes pushtetarit vendor dhe qytetarit, po zmadhohet aq sa nuk i del koha në 4 vite askujt të takojë qytetarët kudo që janë e jo më t’i pyesë për hallet, jo më të kujdeset për hallet e tyre?! Komiteti ekzekutiv është përgjigjja. Jo vetëm kaq por në traditën më të mirë të byrosë, i caktojnë vetë kryetarët e kandidatët për komitetin ekzekutiv.

E kanë vendosur dhe këtu se kë do të sjellin për kryetar të komitetit ekzekutiv. Do të sjellin dikë që do të zbatojë urdhrat e shefit e shefi kësaj radhe është Koço Kokëdhima. Nuk i mjaftojnë sarajet e Qeparoit, do t’i ngrejë sarajet edhe këtu, në mes të Vlorë, t’ua përplasë në fytyrë vlonjatëve. E kanë zgjedhur kandidatin që do të marrë urdhrat nga Koçua, do të punojë për Koçon, do të japë hesap te Koço. Vlonjatët, çfarë janë këta? Kush pyet për vlonjatët? Vlonjatët, merru taksën, merru votën, bleju votën, ulja kokën, mbyllja gojën! Prandaj edhe nuk guxojnë të dalin në dritë të diellit, janë mbyllur në një zyrë të errët aty  5 vetë, Koçua thotë, ja kryetari i komitetit ekzekutiv, ky do të jetë”, tha Basha.

Zgjidhja, theksoi kryetari i Partisë Demokratike, nuk është largimi i shqiptarëve por largimi i së keqes në pushtet që po u merr frymën qytetarëve.
“Kështu mendojnë këta se mund ta kalojnë, kështu mendojnë se mund t’ua hedhin, duke shkelur, nëpërkëmbur, shpërfillur, braktisur popullin e tyre dhe në fund fare edhe duke e përqeshur.  A mund ta pranojë Shqipëria diçka të tillë ? A mund ta pranojë Vlora diçka të tillë? A ka në Vlorë bijë dhe bija nënash sot që t’i dalin përballë kësaj mënxyre? Unë shoh shumë rreth e qark këtu, të rinj të viteve ’90 që u çuan një herë me guxim dhe brezin tjetër të të rinjve që është gati, i njeh dhe i di sakrificat e prindërve të vet për liri, për çlirim nga dhuna, nga terrori, për mirëqenie bazuar mbi djersën e ballit, me krahun e punës.

Sot kam në krahun tim njërin prej këtyre të rinjve, njërin prej këtyre djemve të Vlorës që nuk pranon që bashkëqytetarët e tij, që populli i Vlorës pasi është mashtruar, pasi është nëpërkëmbur, pasi është shtyrë në dëshpërim dhe eksod nga kjo politikë e zezë e mjerimit dhe varfërisë për qytetarët, e kamjes dhe e luksit për qeveritarët dhe ai të poshtërohet me caktimin e kandidatëve për komitetin ekzekutiv nga Byroja e Koços dhe miqve të tij. Ky djalë, ky burrë, ky vlonjat nuk vjen para jush, thjesht dhe vetëm si kandidat i një partie politike, thjesht dhe vetëm si kandidat i opozitës por vjen si qytetari, si djali, si burri, si vlonjati për vlonjatët që kërkon besën tuaj, punën tuaj, djersën tuaj, mundin tuaj, për t’ia marrë  Vlorën tuaj oligarkëve për t’ia kthyer njerëzve që e kanë me tapi, dem bama dem, vlonjatëve.

Kjo është arsyeja që ndër dhjetëra kandidatura dinjitoze u ndalëm tek ky qytetar i Vlorës, u ndalëm tek ky burrë, tek ky djalë sepse në fytyrën e tij do të shihni fytyrën e mijëra djemve të Vlorës, në mendjen e tij do të lexoni mençurinë e mijëra vlonjatëve dhe me vendosmërinë e tij për t’i rikthyer Vlorën vlonjatëve do të lexoni vullnetin plebeshitar të vlonjatëve të djathtë, të majtë e pa parti.

Zonja dhe zotërinj, është kënaqësia ime më e madhe t’ju prezantoj kandidatin tuaj dhe kryetarin e ardhshëm të bashkisë së Vlorës, Genc Deromemaj” theksoi Basha.

Kandidati për kryetar të Bashkisë së Vlorës, Genc Deromemaj u shpreh i bindur se vlonjatët do të votojnë për alternativën që do të punojë për ta.

“Ndjehem shumë i vlerësuar dhe i privilegjuar në këto momente që Partia Demokratike dhe kryetari i saj z.Lulzim Basha midis shumë kandidaturave të tjera dinjitoze më besoi këtë garë, këtë garë për Vlorën. Kjo garë nuk është e imja personale, është e jona, e përbashkët, e popullit të Vlorës. Në këtë garë ne do të tregojmë se Vlorës duhet t’i kthejmë besimin, një gjë të shumë munguar, shumë të merituar, do t’i kthejmë vlerën që Vlora përfaqëson.

Si përfaqësues politik dhe individ, krenar dhe me vlerat që na karakterizojnë moshën dhe integritetin tone, ju premtoj se do të jem një administrator i juaji, i popullit tonë, i Vlorës. Do të jem i denjë dhe më besoni që do t’ia arrijmë, do t’ia arrijmë të gjithë bashkë. Politikat tona nuk janë politika ekstreme, janë politika për popullin, me popullin, janë në shërbim të njerëzve, qytetarëve të Vlorës, janë në shërbimin tonë.

Kam besimin se Vlora dhe vlonjatët janë fisnikë, i karakterizon një mençuri e rrallë, kësaj radhe do të jenë të aftë dhe të zgjuar të vendosin për veten e tyre, t’ia kthejnë Vlorën vlonjatëve, t’ia kthejnë Vlorën dhe pjesa më e munguar e saj, t’ia kthejnë Vlorën neve qytetarëve, të gjithëve bashkë, të mirës tonë. Të gjithë bashkë do t’ia arrijmë! Vlora jonë !” theksoi Deromemaj.

Njoftim për shtyp i Partisë Demokratike, 22 Prill 2015

Një skeme tipike mafioze e blerjes së votës për zgjedhjet e 21 Qershorit është zbuluar nga Prokuroria në arrestimin e inspektorëve të lojërave të fatit dhe tatimorëve.

Nga përgjigjet e realizuara nga Prokuroria të cilat media i bëri publike, rezulton se inspektorët e shtetit janë në shërbim të partisë në pushtet ku në mënyrë të organizuar favorizohen biznese të caktuara për t’u marrë votën për Lëvizjen Socialiste për Integrim.

“LSI –në, LSI-në ndihmoje”. Këto janë fjalët e inspektorëve të lojërave të fatit që kishin ngritur një grup mafioz të gjobave ndaj disa bizneseve dhe favorizimeve për vota për biznese të tjera.

Partia Demokratike e ka paralajmëruar që herët që dyshja Rama-Meta ka instaluar një oligarki në vend e cila beson vetëm në blerjen e votës.

Kjo skemë mafioze është e shtrirë në çdo qelizë të shtetit, ku bandat e pushtetit gjobisin biznese e kryejnë favorizime për të blerë votën.

Mijëra biznese sot e kanë lakun në fyt nga kjo frymë mafioze ndërsa mijëra biznese të tjera janë mbyllur. Sot shumica e shqiptarëve janë në kufinjtë e mbijetesës, ndërsa mijëra prej tyre kanë marrë rrugët e eksodit për shkak të kësaj qeverisje oligarkike që nuk llogarit qytetarët.

I bëjmë thirrje prokurorisë që këtij hetimi ti shkojë deri në fund për të zbardhur çdo përgjegjësi në këtë skeme mafioze të blerjes së votës e cila dënohet rëndë sipas ligjit shqiptar.

I bëjmë thirrje qytetarëve shqiptarë që të mos bien pre e presioneve mafioze nga bandat e veshura me pushtet por ti bashkohen referendumit popullor më 21 Qershor për të rrëzuar oligarkinë Rama-Meta nga pushteti.

Deklaratë e zëdhënëses së Partisë Demokratike, Oriela Nebijaj, 22 Prill 2015

E turpshme si një anëtar i këtij kabineti që u kujdes dy vjet për mirëqenien personale e ndan Shqipërinë në tonën dhe të tyre. Njerëzit po ikin se qeveritarë dhe zotëria në fjalë kujdesen vetëm për mirëqenien e tyre. Qytetarët i kanë zhytur në mjerim, papunësia është rritur, çmimet po ashtu. Këta kredhen nëpër ekrane me suksese imagjinare. Shqiptarët po marrin rrugët e botës ndërsa këta janë strukur në luksin e siguruar nga lekët e shqiptarëve.

Reagim i Partisë Demokratike,  22 Prill 2015

Ema Andrea: Ishte një nga ato takime të sinqerta dhe pa premtime boshe e me fjalë të cilat e dimë që nuk do të bëhen realitet.

Kandidati për kryetar të  Bashkisë së  Tiranës, zoti Halim Kosova, ka zhvilluar sot një bashkëbisedim informal me artistët.  Takimin me artistët të kandidatit zotit Kosova, e shoqëroi lajmi i hidhur i ndarjes nga jeta të një artisti të shquar, Met Begës. Zoti Kosova ka ngushëlluar familjen, miqtë dhe të afërmit e tij.

“Kënaqësisë që unë pata sot dhe këtij informacioni shumë të vlefshëm, në fund iu bashkua një lajm shumë i hidhur, që shumë i nderuari Met Bega, paska humbur jetën dhe me këtë rast unë i shpreh familjes ngushëllimet më të thella. Jo vetëm sepse e kam pasur shumë mik, por sepse ka dhënë shumë për qytetin, ka dhënë shumë për artin. Ngushëlloj jo vetëm familjen, por të gjithë artistët të cilët kanë humbur një koleg, kanë humbur një mik, kanë humbur një shok. Për Metin dhe për shumë të tjerë që kanë ëndërruar diçka më mirë por që nuk i arritën, por që mendimet e tyre dhe eksperiencat e tyre  janë të vlefshme,  do te mobilizohemi edhe më shumë në të ardhmen per artin dhe artistët.

 Zoti Kosova ka dëgjuar sygjerimet e tyre se si qyteti mund t’i dedikojë më shumë hapësira, mundësi dhe resurse artit dhe artistëve. Pas takimit, aktorja e njohur Ema Andrea u shpreh: “Unë ju falenderoj që na konsideruat, falenderoj që na dëgjuat fjalën. Shpresoj që çfarë diskutuam, çfarë propozuam, si artistë të lirë, të jetë e mundur të realizohet. Në formë shumë të sinqertë ishte një nga ato takime të sinqerta dhe pa premtime boshe e me fjalë të cilat e dimë që nuk do të bëhen realitet. Folëm sinqerisht për problemet tona se si mundet arti dhe kultura e të gjitha zhanreve të jenë më produktive edhe në të mirë të kryeqytetit.

A mund të dimë më mirë se cilat janë konkretisht problemet e artit?

Problemet e artit sot janë problemi i centralizimit, folëm për artin në periferi, folëm për artin në edukim, për mundësitë e të qenit autonom, jo vetëm të institucioneve por edhe të artistëve të lirë. Besoj se i keni ndierë se këto janë shqetësimet në përgjithësi të artit sot që zhvillohet në institucione  të mbyllura ose në pak institucione, ka pak mundësira dhe mundësitë që do të krijojë bashkia. Ne propozuam dhe dëgjuam njëri-tjetrin që të mund të krijohen lehtësira për krijimtari për artistët, aq sa të mundet një institucion të na i krijojë. Besoj diskutuam dhe më vjen mirë që folëm,”- theksoi zonja Andrea.

Njoftim për shtyp i Partisë Demokratike,  21 Prill 2015

Ministri i Mirëqënies Personale është përgjegjës për realitetin e pashpresë të mijëra familjeve shqiptare që shohin largimin nga Shqipëria si mundësinë e vetme.

Erion Veliaj ka lënë një gjurmë të rëndë në rritjen e varfërisë në vend, në rritjen e papunësisë, në rrënimin e mijëra familjeve në vend.

Ai është bashkautor me Edi Ramën, në këtë realitet të pashpresë për mijëra familje që kanë marrë rrugët e kurbetit nga pamundësia për të jetuar në kushte esktremisht të vështira, ku vetëm në muajin Mars ka mbi 3000 azilkërkues sipas autoriteteve gjermane.

Sot ai duhet të pranonte përgjegjësinë e tij për skemën shkatërrimtare ekonomike e sociale të aplikuar në vendin tonë prej dy vitesh.

Skemë e cila ka lenë mbi 20,000 familje realisht në nevojë jashtë ndihmës sociale.

Skemë e cila ndryshe nga premtimi i 300,000 vendeve të punës e ka rritur papunesinë nga 13.4% që ishte në 18% sot, sipas INSTAT, nga keto mbi 34% të rinj.

Skemë që ka ulur pensionet në tërësi dhe ka vështirësuar pensionet për gratë në veçanti, duke u rritur atyre moshën e pensionit dhe duke hequr vitet e arsimit nga skema.

Skemë që ka ulur përfitimet e lejës së lindjes për nënat 17% deri në masën 35%.

Si minister i kësaj qeverie, ai është mbështetës i çdo mase të kësaj qeverie që ka vështirësuar jetën e qytetarëve, me rritjen e taksave, me rritjen e çmimit të energjisë, me prishjen e pronave të ndertuar me djersën e shqiptarëve të ndershëm.  Ai nuk ka kundërshtuar asnjë herë të vetme asnjë vendim të kesaj qeverie që në këto dy vite i ka përkeqësuar kushtet e jetesës qytetarëve shqiptarë.

Ka qënë vetë personalisht i përfolur për përfshirje në disa afera korrupsioni, duke mos qënë kështu në krye të ministrisë të mirëqenies sociale në shërbim të qytetarit, por në shërbim të mirëqënies personale.

Deklaratë e deputetit të Partisë Demokratike Gerti Bogdani, 20 Prill 2015

Basha: Rama-Meta  godasin qytetarët e pamundur dhe mbrojnë mafiozët e kriminelët 

Kryetari i Partisë Demokratike, Lulzim Basha ka prezantuar kandidatin për kryetar bashkie në Vaun e Dejës, z. Zef Hila. 

Lideri i opozitës ka ndarë me banorët e Vaut të Dejës shqetësimin për situatën e rëndë ekonomike në vend. Papunësia është rritur dhe varfëria ka zënë vend në çdo familje shqiptare.  Siç po dëshmohet çdo ditë – theksoi z. Basha, shqiptarët kanë humbur besimin te kjo qeveri, duke iu rikthyer rrugës se eksodit. Kryetari i PD theksoi se eksodi nuk është zgjidhja por bashkimi i shqiptarëve më 21 qershor dhe me votën e tyre të largojnë të keqen që ka mbërthyer vendin. 

“Më 21 qershor do të votojmë të gjithë bashkë, për t’i treguar Ilir Metës dhe Edi Ramës se banorët e kësaj zone nuk e ulin kokën para poshtërimit, nuk mund ta pranojnë politikën e lakut në fyt që i lë pa bukë në tryezat e tyre, ndërkohë që mbush kontot dhe valixhet e qeveritarëve të korruptuar Ilir Meta dhe Edi Rama. I godasin qytetarët e pafajshëm e të pamundur, po i mbrojnë mafiozët e kriminelët Ilir Meta dhe Edi Rama që ulen e hanë në sofrën e tyre”-  theksoi kryetari i PD, Lulzim Basha. 

Kryetari i PD ka shpalosur ofertën e re e cila do të çojë vendin drejt ringritjes. Ulja e taksave e çmimit te naftës dhe karburanteve, zhvillimi ekonomik dhe hapja e vendeve të reja të punës është mënyrë për të dalë nga kjo situatë ekonomike, deklaroi z. Basha. 

“Pas 21 qershorit na pret një rrugë tjetër, e shpresës, e ringritjes, e mirësisë, e përpjekjeve tona për të ulur çdo taksë, për t’i çuar të gjithë paratë në zhvillimin e ekonomisë që hap vende të reja pune për ju, për të detyruar këta që të ulin çmimin e energjisë dhe naftës. Për këtë nuk mjafton fitorja, për këtë duhet një fitore plebishitare e thellë që i ka rrënjët në zemërimin tuaj dhe i ka frytet në shpresën tuaj për një të ardhme më të mirë që do ta bëjmë së bashku”. 

Zef Hila, kandidat për kryetar bashkie i Vaut të Dejës theksoi se projekti i tij do të mbetet zhvillimi ekonomik dhe punësimi. Shfrytëzimi i çdo hapësire ligjore për uljen e taksave do të jetë në qendër të angazhimit të z. Hila, sikundër theksoi se dyert e bashkisë do të vazhdojnë si deri më sot të jenë të hapura për hallet dhe problemet e qytetarëve. 

“Bashkia e Vaut të Dejës do të jetë një model, do të marrë një fytyrë të re, për një zhvillim, punësim, dinjitet” – theksoi kandidati për kryetar i Bashkisë së Vaut të Dejës Zef Hila.

Njoftim për shtyp i Partisë Demokratike, 20 Prill 2015

Kryetari i Partisë Demokratike, Lulzim Basha ka prezantuar sot në Shkodër kandidaten për kryetare të Bashkisë znj.Voltana Ademi. Me zonjën Ademi, theksoi kryetari i Partisë Demokratike, Shkodra do të dijë të ecë përpara drejt horizonteve të reja, të mirëqenies, taksave të ulëta, punësimit, zhvillimit e qytetarisë, ndonëse kjo nuk është një sfide e lehtë pasi varfëria, papunësia dhe pasiguria janë sot prezent në çdo cep të vendit.

“Në këto kohë  ka pllakosur mënxyrë pas mënxyre, zullum pas zullumi, e keqe pas të keqes, që siç thonë shkodranët, korçarët, fierakët, durrsakët i ka kapur shqiptarët prej fyti e nuk i lëshon.  Kjo e keqe e ka emrin Edi Rama dhe Ilir Meta.

Është një e keqe e dyfishtë. Nga njëra anë, Rama-Meta janë tashmë të njohur për të madh e të vogël si njerëzit që premtuan vende pune por shkatërruan vende pune, si njerëzit që thanë se do të ulnin çmimin e energjisë por e rritën për të gjithë shqiptarët, si njerëzit që premtuan uljen e taksave për 97 % të shqiptarëve dhe i ngritën taksat për të gjithë, pra njerëzit që gatuan me duart e tyre, me papërgjegjshmërinë e tyre, me arrogancën e tyre, me mashtrimin që e kanë në shpirt e u lexohet në surrat krizën ekonomike, papunësinë dhe varfërinë që ka mbërthyer Shqipërinë cep më cep.

E keqja e dytë më e madhe është kjo. Tashmë që kriza ekonomike ka pllakosur dhe vetë shifrat e qeverisë nuk e fshehin dot, këta në vend që të reflektojnë, thonë se jemi në drejtimin e duhur, jemi në rrugën e duhur, thonë këta. Cila është rruga e duhur? Rruga e eksodit, ku shqiptarët 25 vjet pas eksodit historik të viteve ’91-’92 janë rikthyer përsëri në statistikat europiane si qytetarët me numrin më të madh të azil-kërkuesve në Europë, pas një vendi ku lufta civile po bën kërdinë, siç është Siria?!

Pse po ikin shqiptarët, pse po largohen shqiptarët, shkodranët, korçarët, krutanët, durrsakët, kuksiane, tiranasit, pse po largohen shqiptarët nga shtëpitë e tyre?! Pelivani kryeministër thotë se janë banda dhe organizata kriminale që e shkaktojnë këtë eksod. Dakord jam edhe unë. Por banda e ka emrin qeveria e Republikës së Shqipërisë, me në krye Ilir Metën e Edi Ramën. Është kjo bandë me banditë të rinj e të vjetër që ia doli dy vjet pas ardhjes në pushtet të rikthente eksodin;  ia doli të dyfishonte listat; ia doli të shpunësonte masivisht shkodranët e gjithë shqiptarët; ia doli të kthente krimin në sistem; ia doli të shkaktonte pasigurinë më të madhe që ky vend ka njohur që prej vitit të zi, 1997; ia doli të rikrijojë radhë të gjata të varfërisë e të dëshpërimit. Kjo është banda, kjo është organizata kriminale dhe askush tjetër përgjegjëse për eksodin dhe për çdo vuajtje të shkodranëve e shqiptarëve sot”, theksoi zoti Basha.

Kryetari i Partisë Demokratike, Lulzim Basha ka ftuar qytetarët të bashkohen rreth ofertës së opozitës për punë dhe dinjitet dhe për t’i dhënë fund qeverisjes së oligarkëve në pushtet.

“Sot, jemi mbledhur këtu  për të filluar së bashku një aksion të madh politik që bashkon të djathtë e të majtë sepse zgjedhjet e 21 qershorit janë edhe një sfidë e madhe për çdo shqiptar, për çdo shkodran. A do të pranojmë të ulim kokën para horrllëqeve, arrogancës, poshtërimit, varfërisë dhe krimit që kanë sjellë Edi Rama e Ilir Meta; a do të pranojnë të djathtë por edhe të majtë të votojnë projektin e tyre të vazhdimit të shtypjes së qytetarëve, të shtrydhjes së xhepave të tyre, vetëm e vetëm që një grusht njerëzish në krye të kupolës të pasurohen përtej imagjinatës, me miliona e miliona euro pasuri, këtu por edhe të transferuara në konto sekrete jashtë Shqipërisë, të lidhura ngushtë me klanet e kartelet më të rrezikshme të drogës e narko-trafikut?!

Vota e 21 qershorit është një armë në dorën e çdo shkodrani e shkodraneje, është një armë në dorën e çdo shqiptari e çdo shqiptareje, për të ngritur kokën, për t’u thënë ndal oligarkëve, për t’u thënë oligarkëve Rama-Meta dhe kohortëve të tyre kriminalë se shqiptarët nuk e pranojnë këtë poshtërim, se Shkodra nuk e pranon këtë poshtërim. Ne do i ndalim me fuqinë e votës, në 21 qershor dhe do të bëjmë gati portën e largimit të tyre pas 21 qershorit, jo vetëm nga Shkodra, Tirana, Durrësi por edhe nga qeverisja e vendit.

Sot, dua t’u them votuesve të zhgënjyer të së majtës, në Shkodër e komunat përreth, që përveç një mijë e një arsyeve të zhgënjimit tuaj, papunësisë, premtimeve të pambajtura, faturave të fryra, çmimeve të rritura, pasigurisë, prerjes në besë, poshtërimit nga dyshja Rama-Meta, ne demokratët ju shtrijmë dorën e bashkëpunimit dhe arsyeja tjetër se pse duhet të votoni e të bashkoheni me ne është bija e Shkodrës, përfaqësuesja e denjë e virtyteve më të mira të vajzave, nënave të Shkodrës, ekspertja e shquar e pushtetit vendor, drejtuesja e departamentit të pushtetit vendor në kryesinë e PD, zëri juaj i deritanishëm në Parlamentin e Shqipërisë që nuk e ka braktisur për asnjë moment Shkodrën, që e do Shkodrën, që është kujdesur për Shkodrën dhe shkodranët në detyra të ndryshme që i janë besuar dhe që nesër do kujdeset për çdo shkodran e shkodrane e do të luftojë për shkodranët si kryetarja e ardhshme e Bashkisë së Shkodrës, Voltana Ademi”, deklaroi Basha.
Kandidatja e Partisë Demkratike Voltana Ademi ka theksuar se ajo dhe stafi i saj do të punojnë me angazhim dhe përkushtim për t’i kthyer shpresën qytetarëve të Shkodrës që sot janë të braktisur nga qeveria.

“Me shumë emocion, me emocionin që përcillni ju, njerëzit, unë do filloj me atë që ne përfaqësojmë, me vlerat, parimet demokratike të Shkodrës, me vlerat parimet tona që i kemi ruajtur fortë, kemi besuar fortë, për të cilat kemi luftuar fortë, do të kërkojmë që ti mbajmë fort. Do ta bëjë Partia Demokratike, do ta bëj unë me Partinë Demokratike, do ta bëjnë njerëzit, qytetarët e Shkodrës, zonjat, zotërinjtë, të rinjtë, të rejat.

Ne, ajo që i  ofrojmë qytetarëve tonë, banorëve të Shkodrës, është besnikëria, ne do punojmë me besnikëri, me besnikëri ndaj parimeve të shenjta tonat që i kemi në gen, që kemi punuar dhe jetuar fort me vite me shekuj, janë tek ne dhe mendoj që njerëzit, ju më shumë se askush, e dinë që vetëm kështu ne mund të bëjmë të mundur që ta çojmë rritjen e zhvillimin e Shkodrës më tej, ta bëjmë atë një qytet, një Shkodër me të gjithë banorët e saj, në Malësi, në Shkodër, në bregdet, në fushë, kudo duke shfrytëzuar burimet krahasimisht më të mëdha, më tërheqëse që kjo bashki ka për t’i kthyer në burimin tonë kryesor të rëndësishëm për njerëzit, me njerëzit, në shërbim të njerëzve për mirëqenien e tyre. Do ta bëjmë këtë me ju, ne do ta bëjmë bashkë. Shkodra është e jona dhe ne i përkasim Shkodrës.

Ne do ta bëjmë atë me besnikëri, do punojmë bashkë dhe do vazhdojmë bashkë  ta udhëheqim atë për të mirën tonë dhe të fëmijëve tonë, do bëjmë atë që të rinjtë e të rejat që jetojnë sot në Shkodër sikurse të rinjtë e Europës ta shohin të ardhmen e familjeve të tyre në Shkodër gjithmonë, në një qytet europian për të cilën ne tashmë e kemi nisur rrugën e zhvillimit.

Do ta bëjmë bashkë dhe do fitojmë, do fitojmë të gjithë bashkë, PD do të fitojë në Shkodër, njerëzit populli i Shkodrës, të gjithë ne dhe kështu do të bëjmë të mundur që të jetojmë në qytetin më të lumtur që kemi dëshiruar të kemi gjithmonë duke punuar fortë, me vetëmohim, përkushtim, dashuri dhe bashkë me njëri tjetrin duke ja dhënë krahun njëri tjetrit dhe duke punuar me njëri tjetrin duke u parë sy më sy, duke qenë të sinqertë dhe dukë e bërë këtë të mundur realitet. Vetëm kështu ne mund ta bëjmë”, tha Ademi.

Njoftim për shtyp i Partisë Demokratike, 19 Prill 2015

Në takimin e organizuar në Vlorë nga Partia Demokratike u bashkuan shoqatat e ish të përndjekurve politike, ish te burgosurve, të internuarve, të dëbuarve si dhe Unioni Mbarëkombëtar i të Përndjekurve dhe Burgosurve Politike.

Departamenti për ish të Përndjekurit Politikë dhe Pronarët në Partinë Demokratike organizoi dje konventën kombëtare për “Pjesmarrjen në politikëberje të familjeve të të përndjekurve politike, si domosdoshmëri për demokracinë”.

Në këtë takim të organizuar në Vlorë nga Partia Demokratike u bashkuan shoqatat e ish të përndjekurve politike, ish të burgosurve, të internuarve dhe të dëbuarve si dhe Unioni Mbarëkombëtar i të Përndjekurve dhe Burgosurve Politike.

Më shumë se 500 pjesmarrësit e këtij takimi shprehën vullnetin për bashkimin e të gjithë shtresës së përndjekurve politikë rreth Partisë Demokratike, si dhe deklaruan nevojën imediate që ka vendi për përfshirjen e kësaj shtrese politike në vendimarrje dhe politikëbërje. Duke parë situatën kritike dhe duke bërë një analizë të aktualitetit politik, të përndjekurit u zotuan se do të bashkohen me Partinë Demokratike në këto zgjedhje vendore, si e vetmja alternativë dhe shpresë për vendin.

Në takim morën pjesë të përndjekurit nga qyteti Vlorës, Sarandës, Delvinës dhe Himarës. Në emër të Partisë Demokratike, konventën e përshëndeti Sekretari i Përgjithshëm, z. Arben Ristani, i cili theksoi vlerësimin që PD ka për këto grupime të shoqërisë, dhe pohoi rëndësinë që ka në Partinë Demokratike, Departamenti për të Përndjekurit dhe Pronarët, si department që përben dy shtyllat kryesore identitare të PD, të përndjekurit dhe pronarët. Z.Ristani u shpreh se aktualisht PD po harton një platformë të qartë dhe të mirëmenduar bashkëpunimi për të bërë të mundur angazhimin e të gjithë familjeve, fëmijëve, nipërve dhe mbesave të përndjekurve politikë, pranë Partisë Demokratike.

Në emër të shoqatës Antikomuniste Demokrate të Përndjekurve Politikë, Simon Mirakaj vlerësoi atë çfarë ka bërë Partia Demokratike, dhe u shpreh se ka ende për të bërë.

Në emër të Unionit Mbarëkombëtar të Përndjekurve dhe Burgosurve Politikë, Besim Ndregjoni shprehu zhgënjimin për qeverinë aktuale, dhe bëri thirrje për afrim pranë Partisë Demokratike dhe politikave të saj.

Në emër të Partisë të Drejtat e Mohuara e Re, z.Fatmir Hoxha, tha se sot më shumë se kurrë është jetike bashkimi me Partinë Demokratike.

Njoftim për shtyp i Partisë Demokratike 19 Prill 2015

Kryetarja e Lidhjes Demokratike të Gruas, deputetja Albana Vokshi mori pjesë në Forumin e  Grave deputete të Partive Popullore Europiane në Varshavë, me temë “Roli i grave në forcimin e demokracive  në Europën qendrore dhe lindore , një vlerësim i të kaluarës dhe së tashmes në cerek shekulli”.

Në konferencën e organizuar nga PPE dhe fondacioni Konrad Adenauer merrnin pjesë eurodeputete,  deputete të vendeve anëtare, kryetarja e Forumit të Grave të PPE ish eurodeputetja Doris Pack,  drejtuese të forumeve politike dhe  gra personalitete të Europës Lindore.

Në fjalën e saj, zonja Vokshi kërkoi mbështetjen e kolegeve në Parlamentin Europian dhe të vendeve të tjera  për dekriminalizimin e Parlamentit dhe institucioneve shqiptare, si një kauzë jetike dhe si domosdoshmëri  për forcimin e shtetit të së drejtës dhe integrimit europian të vendit. Zonja  Vokshi u shpreh se në betejën e dekriminalizimit të shtetit,  Partia Demokratike është përfshirë me seriozitet dhe angazhim të jashtëzakonshëm dhe po drejton një komision parlamentar  të posatçëm dhe se deputetet gra kanë një rol thelbësor.

“Nuk mund të ketë zhvillim, progres dhe të ardhme europiane, nëse qeveria dhe deputetët janë të kapur nga interesa kriminale dhe mafiozë. Ata mbajnë  peng aspiratat e shqiptarëve per progres”, tha Vokshi.

Kryetarja e Lidhjes Demokratike të Gruas një prezantim  të gjerë të sfidave dhe rolit historik të grave në shtetformimin shqiptar, sakrificat vetëmohuese të tyre si nëna dhe bashkëshorte në diktaturë, kalvari i gjatë i persekutimeve, pushkatimet me dhe pa gjyq ndaj grave intelektuale dhe të shtresave të ndryshme .  Zonja Vokshi njohu deputetet e djathta europiane me nismën ligjore të PD për dekomunistizimin e shoqërisë shqiptare si një proces i rëndësishëm për shkëputjen nga e kaluara më e errët dhe më e vuajtur që një vend ka patur në Europë.

“Mazhoranca aktuale e rrëzoi nismën duke e refuzuar me forcën e kartonave shkëputjen nga e kaluara kriminale” , tha zonja Vokshi  e cila shtoi se qeveria mbështetet  një draft ligjor të cunguar,  aspak në funksion të pastrimit të shtetit nga zyrtarët e ish diktaturës, apo gjyqtarët e atij sistemi.

Deputetja Vokshi tha se edhe pse kanë kaluar 25 vite demokraci,  gratë dhe vajzat në Shqipëri vuajnë privime të mëdha ekonomike, sociale, punësimi dhe të drejta njerëzore për shkak të diskriminimit dhe braktisjes nga qeveria dhe mazhoranca e kapur nga krimi dhe monopolet.

Vokshi shtoi se në zgjedhjet lokale përfaqësimi në rritje i grave dhe vajzave në drejtimin  e bashkive dhe këshillave bashkiakë me 50% do të rrisë  cilësinë e vendimarrjes në pushtetin lokal.

Njoftim për shtyp i Partisë Demokratike 18 Prill 2015

Mijëra qytetarë korçarë mirëpritën sot ofertën e re të Partisë Demokratike, për një mundësi të vërtetë për qytetin e tyre, që do të sjellë punë, do të ulë çmimet e naftës dhe energjisë e do të kthejë besimin e qytetarëve. Kryetari i Partisë Demokratike Lulzim Basha, i kërkoi qytetarisë korçare të bashkohet me alternativën e demokratëve për të ndalur rrënimin dhe varfërinë. Ai tha se Rama dhe Meta kanë braktisur qytetarët duke rrënuar mirëqënien e tyre.

“I kanë braktisur qytetarët dhe korçarët por janë sot të vetmuar se nuk gjendet një shqiptar i ndershëm që t’u shkojë pas. Se nuk u shkohet pas mashtruesve që premtojnë uljen e çmimit të energjisë dhe e rrisin atë. Nuk u shkohet pas atyre që premtuan 300 mijë vende pune, dhe po i nxjerrin njerëzit çdo ditë në rrugë me politikat e tyre. Premtuan uljen e taksave dhe i rritën çdo vit në mënyrë të pamëshirshme.

Premtuan drejtësi, por po u marrin shpirtin të pamundurve që s’kanë mundësi të paguajnë dritat, ndërkohë që i rrahin shpatullat deputetit të tyre këtu në Korçë që ka 205 milionë lekë debi të fabrikës së tij.

Premtuan rend dhe siguri, por krimi po bën kërdinë dhe njerëzit e krimit, të veprave më të urryera janë sot nëpër zyra e marrin vendime për ju, për fëmijët tuaj, marrin vendime për ne.

Këta janë mashtruesit që premtuan uljen e çmimit të naftës,  por po e mbajnë më të lartin në rajon me taksat e tyre, sepse kështu ka zgjedhur Edin Rama dhe Ilir Meta”, tha Basha.

Kreu i opozitës u shpreh se gjendja e fermerëve të Korçës dhe mbarë vendit është nën mjerim ndërsa qeveria u ka rritur taksat dhe nuk u jep asnjë mbështetje.

“Këta janë që premtuan ndihmë për fermerët, uljen e madhe të çmimit të karburantit për bujqësinë, por si është gjendja sot. Jo vetëm nuk punohet dot toka, e nuk prodhohet,  për shkak të çmimit të lartë të naftës, por nuk ka më as një kacidhe rimbursim. Sot paratë e arkës së shtetit, paratë e arkës së përbashkët që mbushet nga qytetarët me taksat e tyre, me taksat tuaja që dalin nga xhepat tuaj, që dalin nga goja e fëmijëve juaj,  i marrin tre katër vetë, që kanë lidhje me qeverinë, me klientelën e korruptuar të  Ilir Metës dhe  Edi Ramës”, u shpreh Basha.

Kryetari i Partisë Demokratike denoncoi maxhorancën për lidhjet e saj me krimin kur në prag të zgjedhjeve kanë vendosur të kandidojnë edhe trafikant droge.

“Çfarë ka të përbashkët Korça me këtë model me këtë hibrid të ndërthurjes së krimit me pushtetin, të shitblerjes së votës, të korrupsionit, të babazisë për të përfituar, të arrogancës, të  fodullëkut, të pashpirtësisë e pandjeshmërisë ndaj qytetarëve ?!

Ku janë sot, a kanë reflektuar pasi gjithë Europa u shokua, u trondit nga inkriminimi kokë e këmbë që i bënë administratës dhe shtetit. A kanë reflektuar pasi mbarë qytetarët  vendit u ngritën në këmbë në rrugë e në sheshe kundër krimit dhe sundimit të tij? Aspak! Vendosën të kandidojnë në Krujë një trafikant kokaine, po sfidojnë çdokënd. Kjo është sfidë ndaj jush, ndaj qytetarëve, ndaj partnerëve, ndaj Europës, ndaj Amerikës, ndaj së ardhmes sonë”, tha Basha.

Kreu i opozitës tha se Korça e kulturës meriton më të mirën, ndaj qytetarët korçarë do të ketë kryetar të ardhshëm të bashkisë një profesor të nderuar z.Gjergji Mero ndërsa banorët e Bashkisë së Maliqit mjekun e respektuar të qytetit Xhevdet Belishta. Ai u zotua se oferta e re dhe kandidatët e Partisë Demokratike në Korçë e mbarë vendin do të jenë një garanci me kontratën e nënshkruar, për të hapur dyert për qytetarët ndaj çdo halli të tyre dhe të krijojnë çdo lehtësi për mirëqënie.

“Kjo ofertë e re, ofertë që ofron rend dhe siguri, oferta që sjell zhvillim, oferta që ul taksat, oferta që ul çmimin e energjisë, ul çmimin e naftës, kjo ofetë bashkë me votën tuaj kundër rrënimit të jetës suaj të përditshme, do ta ndalë të keqen, do ta vë Korçën e Shqipërinë në punë, do ta ndalë eksodin dramatik, do të kthejë besimin e të rinjve. Kandidatët tanë janë të angazhuar dhe kanë firmosur një kontratë me Partinë Demokratike, por në fakt kontrata është me ju. Përpara se të vijnë këtu tek ju, kanë firmosur kontratën e garancisë për integritetin e tyre, për luftën që do të bëjnë për të ulur taksat dhe tarifat, për vullnetin e plotë për të qenë 24 orë në dispozicion të qytetarëve dhe banorëve të Bashkisë së re të Korçës”, deklaroi Basha.

Kandidati i Bashkisë Korçë, profesor Gjergji Mero u shpreh se ai do kthejë në punë qytetin e Korçës për të kthyer dinjitetin e munguar në qytet. “Do të respektoj kontratën me çdo njerin prej jush për të përmirësuar jetën e familjeve dhe fëmijëve tanë, për të bërë të mundur që të kemi më shumë dinjitet siç e ka pasur në traditën e vetë Korça”, tha kandidati Mero.

Mjeku Xhevdet Belishta tha se ai do t’u shërbejë qytetarëve të Maliqit sipas parimeve humane të profesionit të tij, për të qënë pranë tyre në çdo hall dhe problem. “Qytetarët e mi sot ndihen në braktisur, të harruar dhe në kufinjtë e mbijetesës. Ne mjekët flasim pak por punojmë shumë. Ju garantoj se fitores tonë do ti bashkëngjitet edhe Bashkia e Maliqit”, tha Belishta.

Fjala e kryetarit të Partisë Demokratike përpara qytetarëve korçarë:

Të dashur miq

Vëllezër dhe motra

Kryefamiljarë, të rinj e të reja

Të nderuar zonja e zotërinj

Korçarë të nderuar e krenarë, banorë të këtij rrethi që ka lartësuar si asnjë tjetër në histori virtytin e punës së ndershme, mençurisë dhe përparimit përmes vlerës dhe virtytit.

Në çdo qytet, rreth dhe krahinë të Shqipërisë përballemi me vlera unike me të cilat krenohemi.

Por në Korçë ndihemi të detyruar para qytetarisë e punëtorisë që buron nga tradita, historia, nga kultura, nga ky truall i prodhimit dhe i nderimit të punës, nga rrugicat, nga historia e saj po më e rëndësishmja që buron nga korçarët dhe korçaret, që dua ti përshendes pa dallim të mbledhur në këtë shesh, banorë të bashkisë së vjetër dhe bashkisë së re, banorë të Korrcës, Devollit, Maliqit kudo që jeni, kudo që jeni të majtë e të djathtë, myslimanë e ortodokse.

Vëllezër e motra, jemi mbledhur sot këtu jo siç e meriton ky qytet dhe korçarët për të festuar punët dhe djersën tuaj për të celebruar begatinë,  mirëqënien, apo një lajm të mirë. Nuk është kjo, fatkeqësisht, që na ka

Mjerimi, varfëria, hallet e mëdha të qytetit e komunave përrreth, na kanë bërë bashkë sot.

Nuk ka punë në Korçë, s’ka zhvillim, nuk ka mirëqënie dhe ka humbur besimi.

Në fytyrat e të rinjve dhe tërejave të Korrcës, e burrave dhe grave të Korçës, që hasim kudo në çdo lagje e fshat nuk shohim melankolinë romantike e serenatave tuaja të mrekullueshme, por dëshpërimin e papunësisë, të skamjes, të pamundësisë.

Varfëria është sëmundja më e keqe, dhe ka hedhur rrënjë thellë edhe këtu si në gjithë vendin.

Por miqtë e mi, ashtu siç mençuria korçare u dikton brezave dhe historisë, dhimbja është një burim diturie, mesimi, për të gjetur e për të vënë gishtin, për të kuptuar mirë pse erdhëm deri këtu, cilat janë shkaqet që përfunduam këtu.

Vuajtja e korçarëve na bën syçelët, për të parë qartë burimin e papunësisë, varfërisë e mjerimit, autorët që i tregon me gisht çdo shqiptar sot, autorët e kësaj dare shtrënguese e asfiksuese janë Edi Rama dhe Ilir Meta.

Ata janë autorët dhe askush tjetër, sepse prej dy vitesh sundojnë e shtypin qytetarët, ndërsa vetë janë kredhur në kënaqësitë perverse të oligarkëve që nuk shohin përtej hundës së tyre, xhepit të tyre, familjes apo klientelës së tyre, nuk ndjejnë më larg se privilegjet e tyre.

Kjo është gjendja dhe kjo na ka mblehdur sot në Korrcë si kudo në Shqipëri.

Ata kanë sot pushtetin dhe paratë, por harrojnë se nuk kanë bërë asgjë, sepse nuk kanë me vete qytetarët, nuk kanë me vete korçarët, nuk kanë me vete shqiptarët. Ata i braktisën shqiptarët, të verbuar në luksin e korrupsionit të tyre, por janë të mjerë e nuk kuptojnë se ky shesh këtu sot, si çdo shesh, në çdo qytet e cep të Shqipërisë është pasuria më e madhe, luksi e drita më e madhe, është shpirti i lirë që kërkon punë e dinjitet, ligj e siguri. Ky shesh, ju korçarët e ndershëm dhe anembanë shqiptarët, ju jeni Shqipëria e vërtetë, e gatshme për t’u treguar vendin Ramës, Metës, kopjeve e filove të tyre këtu në Korçë e kudo.

I kanë braktisur qytetarët dhe korçarët por janë sot të vetmuar se nuk gjendet një shqiptar i ndershëm që t’u shkojë pas.

Se nuk u shkohet pas mashtruesve që premtojnë uljen e çmimit të energjisë dhe e rrisin atë.

Nuk u shkohet pas atyre që premtuan 300 mijë vende pune, dhe po i nxjerrin njerëzit çdo ditë në rrugë me politikat e tyre. Premtuan uljen e taksave dhe i rritën çdo vit në mënyrë të pamëshirshme.

Premtuan drejtësi, por po u marrin shpirtin të pamundurve që s’kanë mundësi të paguajnë dritat, ndërkohë që i rrahin shpatullat deputetit të tyre këtu në Korçë që ka 205 milionë lekë debi të fabrikës së tij.

Në burg shkojnë ata që skanë 30 mijë lekë të vjetra të paguajnë energjinë, se s’kanë mese, s’kanë punë e as të ardhura, në parlament e me privilegje ai që ka 205 milionë të papaguara. Pse nuk shkoi banda e gangsterëve famëkeqë të OSHEE-së tek fabrika e mikut të Edi Ramës e Ilir Metës për të hequr dritat e për të çuar në burg pronarin? Nuk shkoi se ligji sot nuk zbatohet njësoj. Sot nuk jemi të barabartë para ligjit. Rama e Meta tratojnë shumicën si të njerkës dhe disa pak si të nënës.  Të pamundurit dhunohen, miqtë e qeverisë favorizohen.

Premtuan rend dhe siguri, por krimi po bën kërdinë dhe njerëzit e krimit, të veprave më të urryera janë sot nëpër zyra e marrin vendime për ju, për fëmijët tuaj, marrin vendime për ne.

Pak ditë më parë  denoncuam dy karaktere të tillë, një përdhunes, tjetri falsifikator, që këta, psuediorilindja e famshme i çoi në doganë e në tatime, sikur të ishin më shembullorët e qytetit.

Këta janë mashtruesit që premtuan uljen e cmimit të naftës,  por po e mbajnë më të lartin në rrajon me taksat e tyre, sepse kështu ka zgjedhur Edin Rama dhe Ilir Meta.

Këta janë që premtuan ndihmë për fermerët, uljen e madhe të çmimit të karburantit për bujqësinë, por si është gjendja sot. Jo vetëm nuk punohet dot toka, e nuk prodhohet,  për shkak të çmimit të lartë të naftës, por nuk ka më as një kacidhe rimbursim. Sot paratë e arkës së shtetit, paratë e arkës së përbashkët që mbushet nga qytetarët me taksat e tyre, me taksat tuaja që dalin nga xhepat tuaj, që dalin nga goja e fëmijëve juaj,  i marrin tre katër vetë, që kanë lidhje me qeverinë, me klientelën e korruptuar të  Ilir Metës dhe  Edi Ramës.

Le të bëjmë një bilanc të shkurtër këtu në Korcë, në këto dy viteve. Asnjë premtim i mbajtur. Investimet sot janë 6 herë më pak. Asnjë shkollë e re, asnjë ujësjellës i ri. Bashkia, bashkia e drejtuar nga ky qyqari që mbeti nënkryetar, derisa ta largoni ju me votën tuaj në 21  Qershor, është kthyer në zyrë të ndarjes së privilegjeve dhe favoreve për një klan të ngushtë të peleshëshëve dhe  kapuranëve.

Miqtë e mi!

Korçarë të nderuar

A mund ta thotë dikush;

Çfarë ka të përbashkët Korça e kulturës që ka parë bot me sy, me këtë qeveri, me këtë parlament, me këtë administratë të lidhur me krimin dhe të mbushur me trafikantë e autorë të mynxyrave të lloje llojeve  e më të pabesueshmet ?!

Çfarë ka të përbashkët Korça e artit, e kulturës, e  serenatave me këtë palo bashkiak me këtë zëvendësues të oligarkut,  që u rrit në detyrë, që i ka marrë dinjitetin qytetit dhe ka ngritur këtu kullën shëmtuar e korrupsionit për hesap të Edi Ramës,  jo për hesap të korçarëve ?!

Më tha një zonjë tek vija këtu, i thonë kulla e flijimit në Korçë, kulla e turpit e quajti Aldo, por emri i vërtetë është kulla e korrupsionit . Kjo  ngrehinë e shëmtuar ti vret sytë,  sa me mungesën totale të estetikës, aq edhe me simbolin që është kthyer, të  keqqeverisjes që shtrëngon lakun në fytin e shqiptarëve.

Çfarë  ka të përbashkët Korça e kulturës, Korça e qytetarisë, Korça e respektit për njerëzit më këtë soj të urryer sundimtarësh që i fusin të rinjtë e Korcës të blejnë e shesin vota, i fusin në pazarin më të papranueshëm të këmbimit me lekë të së ardhmes tonë, të tregtimit të lirisë më të shenjtë të njeriut,  të drejtës  për të vendosur me vullnet të pastër për drejtuesit e vendit.

Çfarë ka të përbashkët Korça me këtë model me këtë hibrid të ndërthurjes së krimit me pushtetin, të shitblerjes së votës, të korrupsionit, të babazisë për të përfituar, të arrogancës, të  fodullëkut, të pashpirtësisë e pandjeshmërisë ndaj qytetarëve ?!

Asgjë të përbashkët!  Asgjë të përbashkët nuk ka Korça e traditës, e shkollës së parë shqipe, e rilindjes, e serenatës, me këta sundimtarë primitive dhe eunukë që kanë bjerrë çdo vlerë e çdo parim.

Ndaj jam i sigurtë se edhe socialistët korçarë, nuk kanë e nuk gjejnë asgjë të përbashkët me dyshen Rama-Meta dhe fidanët e tyre këtu.

Miqtë e mi!

Ende pa u mbyllur një skandal, plas një tjetër  Dy vite zinxhir i pakëputur skandalesh, të padëgjuara më parë.

E patë se gjithë kupola e shtetit, Kryeministri, Kryetari i Parlamentit, Ministri i Brendshëm, të zgjedhurit e tyre në Kuvend u përfshinë në një histori kriminale, që të ngjeth mishtë, me akuzën e porositjes së vrasjes së dy deputetëve dhe me bashkëpunimin në fshehjen e ngjarjes. Edhe më kriminale se sa kjo skemë mafioze, që ka në bazë të saj vetëm interesa biznesi e pazaresh të ndyra , ishte makineria që u ngrit e u vu në lëvizje për mbylljen e hetimit, për mbulimin e të vërtetës.

Ku janë sot, a kanë reflektuar pasi gjithë Europa u shokua, u trondit nga inkriminimi kokë e këmbë që i bënë administratës dhe shtetit. A kanë reflektuar pasi mbarë qytetarët  vendit u ngritën në këmbë në rrugë e në sheshe kundër krimit dhe sundimit të tij? Aspak!

Vendosën të kandidojnë në Krujë një trafikant kokaine, po sfidojnë çdokë. Po, po. Kjo është sfidë ndaj jush, ndaj qytetarëve, ndaj partnerëve, ndaj Europës, ndaj Amerikës, ndaj së ardhmes sonë.

E dini çfarë ndodhi para disa ditësh këtu në Korçë? Ma thonin tek po vija këtu tek ju e me siguri që shumë qytetarë e kanë parë sepse ka ndodhur në mes të qytetit, në një orë të zymtë të ditës me shumë njerëz. Një gruaje i ra të fikët dhe kur u përmend tha se kishte 2 ditë pa ngrënë. Se ishte nëna e 3 fëmijëve dhe se shtrëngonte grushtin e saj me 200 lekë të vjetra , që nuk dinte a do ti blinte çibuk apo kothere për fëmijët e saj.

Këtu e ka sjellë punën Edi Rama dhe Ilir Meta dhe babëzia e tyre shpërdoron 3 milionë Euro për zyrat  bashkisë, 2.5 milionë Euro për kullën e korrupsionit që i marrin nga xhepat tuaj. Tani vijnë dhe kanë turpin e madh që nuk i zë e ju kërkojnë votën më 21 qershor.

Kërkojnë prej jush, këta që ju vunë përpara mjerimin, burgun, arrogancën, shtypjen, përbuzjen, pashpirtësinë, pasi morën lekët tuaj e i bënë rrush e kumbulla, pasi mbyllën mijëra vende pune e në vend që të hapin një të vetëm, vijnë këtu me Filo qyqarin, me çirakun që merr paratë që t’ia çojë shefit, që t’ja çojë shefit të tij. Vijnë me të, çfarë i thonë Korçës me Filo qyqarin, i thonë ulni kokat, zbrazni xhepat, jepni votat, mbyllni gojën, sepse mendojnë se mund të blejnë gjithçka me paratë e krimit dhe të korrupsionit. E kanë mirë apo e kanë keq? Gabim e kanë, apo jo? Nuk e blejnë dot shpirtin e korçarëve, nuk e blejnë dot të kaluarën e trafikantëve që kanë në krahë, nuk i blejnë dot gjynahet që kanë bërë me këtë popull. Nuk kemi ndërmend ti lejojmë, Korça do t’i thotë jo, Shqipëria do t’I thotë jo.

Sot jo vetëm mbështetësit tanë, por edhe ata votues të majtë që ndjehen të tradhëtuar në shpirt. Janë para dy zgjedhjesh, t’I thonë të ulin kokën e të bëjnë sikur nuk shohin, të poshtërohen e të shkelen me këmbë, të votojnë çirakun që vazhdon të ndajë paratë e t’ia çojë shefit, që t’ia çojë shefit të madh, apo t’I thonë me votë, ndal, nuk pranojmë më, jo më kështu, ndal!

Dhe unë kam besim se jo vetëm demokratët e Korçës por të gjithë korçarët kanë 1 mijë arsye për t’i thënë Jo, për të dhënë votën e tyre kundër , për të dhënë votën e tyre për shpëtim dhe për shpresë dhe jo për vazhdimin e kësaj mënxyre që nuk diskriminon, por ka kapur prej fyti të djathtë e të majtë, e pra sot, korçarët e urtë dhe punëtorë, kanë mundësi të votojnë jo vetëm për ato 1 mijë e një arsye, por edhe një arsye tjetër të madhe, për një qeverisje që ndihmon, që u del në krahë, që i stimulon, që e ka derën të hapur. Korçarët e kulturës, dijes, që duan të kenë bijtë më të mirë, bijat më të përgatitura në krye dhe ne që jemi gati bashkë me ta, janë gati të pranojnë për një arsye madhore ofertën tonë sepse ne vijmë tek ju me birin e kësaj krahine, me njeriun e dijes dhe të kulturës, me njeriun e suksesit, Rektorin e Universitetit të Korçës, prof. Gjergji Meron.

Ora e të vërtetës po vjen. Korça ka nevojë për këtë ofertë të re, për këtë qeverisje të re. ne dalim hapur para korçarëve duke votuar Gjergji Meron. Votoni për hallet dhe problemet tuaja dhe zgjidhjen e tyre. Votoni për qytetarinë, votoni për të sotmen dhe të nesërmen, votoni për njeriun që është i përkushtuar, jo ndaj shefit, e as ndaj shefit të shefit, por ndaj qytetarëve të Korçës, nga më i pari deri tek më i fundit, nga më i riu deri tek më i vjetri, të djathtë e të majtë.

Ndaj, kandidatët tanë janë të angazhuar dhe kanë firmosur një kontratë me Partinë Demokratike, por në fakt kontrata është me ju. Përpara se të vijnë këtu tek ju, kanë firmosur kontratën e garancisë për integritetin e tyre, për luftën që do të bëjnë për të ulur taksat dhe tarifat, për vullnetin e plotë për të qenë 24 orë në dispozicion të qytetarëve dhe banorëve të Bashkisë së re të Korçës. Kjo ofertë e re, ofertë që ofron rend dhe siguri, oferta që sjell zhvillim, oferta që ul taksat, oferta që ul çmimin e energjisë, ul çmimin e naftës, kjo ofetë bashkë me votën tuaj kundër rrënimit të jetës suaj të përditshme, do ta ndalë të keqen, do ta vë Korçën e Shqipërinë në punë, do ta ndalë eksodin dramatik, do të kthejë besimin e të rinjve, do ta bëjë për atë nënën që u këput në mes të pazarit, do ta bëjë për Brunilda Mekën që la dy jetimë të pashpirtësisë të xhelatëve të Edi Ramës dhe Erjon Veliajt këtu në Korçë, do ta bëjë për çdo korçare e çdo korçar dhe për të ardhmen tuaj.

A jeni gati?

Ne jemi gati!

Ora e së vërtetës po vjen, për punë dhe dinjitet, për rend dhe siguri, për ligj dhe drejtësi . Për Korçën qytetare, për Shqipërinë europiane, me Gjergji Meron, me korçarët.

Zoti e bekoftë Korçën,

Zoti e bekoftë Shqipërinë!

Njoftim për shtyp i Partisë Demokratike, 18 Prill 2015