Blog

Dyshja Rama-Meta rrëzuan amendamentet e opozitës me forcën e kartonit por jo të arsyes, duke djegur në fakt një mundësi për të përmirësuar jetën e shqiptarëve në kushtet e një varfërie ekstreme, të një papunësie ekstreme, dhe të shtrëngesës së përditshme të jetesës. 

Edi Rama dhe Ilir Meta megjithëse janë çdo ditë në ekran nga mëngjesi në darkë, ende nuk kanë gjetur një moment për të shpjeguar publikun dhe qytetarët, pse refuzuan të ulin çmimin e energjisë elektrike dhe çmimin e naftës.

Dyshja Rama-Meta, rrëzuan amendamentet e opozitës me forcën e kartonit por jo të arsyes, duke djegur në fakt një mundësi për të përmirësuar jetën e shqiptarëve në kushtet e një varfërie ekstreme, të një papunësie ekstreme, dhe të shtrëngesës së përditshme të jetesës.

Duke refuzuar të ulë çmimin e energjisë elektrike me reduktimin e TVSH-së në 6 përqind, Edi Rama po konfirmon publikisht, se ai ka gënjyer me premtimin e tij elektoral, dhe ka gënjyer qëllimisht, pasi nuk e ul me 14 përqind çmimin e energjisë edhe kur i jepet mundësia, edhe kur këtë ia kujtojnë qytetarët e vendit me dhimbjen e tyre të përditshme, e me zërin e protestës në sheshet e vendit.

Nuk tërhiqet nga mashtrimi dhe e pranon se mashtrim ka qenë.

Duke refuzuar të heqë taksën e qarkullimit të naftës, Edi Rama po u thotë në mënyrë cinike qytetarëve të vendit se ne, Shqipëria, duhet ta mbajë patjetër çmimin më të lartë të karburantit në rajon, sepse kështu dëshiron ai, edhe pse varfëria është më e madhja në rajon e më gjërë, edhe pse të ardhurat janë më të ulëtat në rajon e më gjërë.

Kur refuzon të përmirësosh jetën e qytetarëve e të lehtësosh mjerimin e tyre në dy pika që kanë të bëjnë me çdo produkt të përditshëm të konsumit, me dy cështje që kanë të bëjnë drejtpërdrejt me xhepin e tyre, atëherë i ke refuzuar ata si qënie, me dinjitetin dhe të drejtat që kanë.

Por qytetarët nuk janë spektatorë pasivë të lojërave të Edi Ramës. Ata analizojnë, kujtojnë dhe reflektojnë. Dhe shumë shpejt do të marrin vendimin e duhur. Ora e të vërtetës po vjen.

Deklaratë e koordinatores Reila Bozdo, 11 Prill 2015

Tre kushtet e opozitës për kandidatët: Të painkriminuar, të mos rrisin taksat dhe të dëgjojnë zërin e qytetarëve. 

Kryetari i Partisë Demokratike Lulzim Basha është njohur sot me shqetësimet e banorëve të Krujës dhe Fushë- Krujës. Qytetarët janë ankuar per abuzimet e mëdha me faturat e energjisë elektrike dhe rritjen e çmimit, pamundësinë për të siguruar bukën e fëmijëve, mbylljen e bizneseve, rënien e  fuqisë blerëse dhe pasigurinë e madhe që ekziston për jetën dhe pronën. 

Pronare “Fast—Food”: Nuk ka ku të shkojë më keq më. Është shumë dobët në krahasim me më parë.

Basha: Ka rënie?

Pronare “Fast—Food”:  Nuk nxjerrim dot ushqimin e fëmijëve. Shumë dobët.

Basha: Sa veta jeni të punësuar?

Pronare “Fast—Food”: Unë vetë. Ka punuar në emigracion për të hapur këtë dyqanin. Tani çfarë të paguajmë? Jam gati ta mbyll fare.

Banor i Krujës: Dy vite më parë kam punuar në ndërtim, tani pas dy vitesh jam pa punë. Kam 5 fëmijë. Nuk marr asnjë lek në Shqipëri. Thesin e miellit e kam marrë pa lek. Jam pa asistencë as ndihmë ekonomike.

Banor i Komunës Thumanë: Unë nuk kam pare me pagu dritat, as ujët. Të vijë Edi Rama ose Ilir Meta tek shpija ime të shohin çfarë gjendje kam në shpi.

Banore e Komunës Thumanë: Dua të them se është hequr ndihma ekonomike për familjet në nevojë. Qeveria aktuale e ka hequr dhe kjo është një shqetësim për gjithë komunitetin. Kanë qenë 85 persona me ndihmë ekonomike, jepet vetëm tek 30 prej tyre. Ndërkohë që pjesa tjetër jetojnë në varfëri të skajshme.

Invalid pune: Prej dy vitesh më kanë hequr ndihmën ekonomike, edhe pse kam një sëmundje shumë të rëndë në trup. Kam dy fëmijë. Jetoj me një dhomë, pa drita, fëmijët e mi jetojnë pa bukë. Më mirë të vijnë të më vrasin sesa të jetoj kshu. Jam i sëmurë. Kam shku tek Veliaj për ndihmën sociale, më kanë nxjerrë pastrueset. Të vijnë të më shohin. Jam i sëmurë, nuk i kam bërë gjë kurrë kujt, nuk kam vjedhë, nuk kam ndjekje penale. Dua vetëm të shoh ata fëmijë të qeshin si gjithë fëmijët e tjerë.

Basha: Sigurisht që nuk ke vjedhur. S’ke bërë as trafik droge, se përndryshe do të ishe kandidat për kryetar bashkie.

Banor i Krujës: Kemi mbetur mes katër rrugëve sepse këta investojnë vetëm për njerëzit e vetë. Energjinë nuk kemi me çfarë ta paguajmë. Ne jetojmë me bujqësi por ata u japim vetëm një pjesë kredi e naftë. Nuk kemi marë asgjë. 

Banor i Krujës: Këtu është bërë më keq se në Kukës. Të rinjtë janë pa punë. Këtu përveç gëlqeres dhe gurit s’ka punë tjetër. Hallet e Krujës janë të mëdha. Kemi shpresë të ju. Ka familje pa bukë ndërsa Edi Rama dhe Ilir Meta rritën dritat.

Kryetari i PD deklaroi se qytetarëve u është vrarë e sotmja dhe e ardhmja nga një qeveri e pandjeshme për hallet e tyre, pa sy për dhimbjen e tyre, pa veshë për ankesat e tyre, pa shpirt që të ofrojë zgjidhjen qoftë edhe më minimale për mjerimin, skamjen, papunësinë, pamundësinë që është ulur këmbëkryq në çdo vatër krutane, si në çdo vatër shqiptare. 

“Dy vjet më parë erdhën në këto rrugë me tam-tame të mëdha, u premtuan krutanëve ulje taksash, çmimesh, rritje të fuqisë blerëse, vende të reja pune, parajsën e turizmit por çfarë ka ndodhur?! Çfarë ka ndodhur këtu, në këtë qytet? Vendet e punës janë pakësuar, janë mbyllur sepse taksat janë rritur, çmimet janë bërë të papërballueshme, çmimet e shportës dhe efekti ndihet drejtpërdrejt në pamundësinë e kryefamiljarëve krenarë të këtij qyteti por shkojnë kokëulur para fëmijëve të tyre, pasi një pjesë e madhe e tyre nuk u jep dot as bukën e përditshme pa u zhytur më shumë në borxh. 

Një pallat i tërë këtu në Krujë e ndjeu rilindjen , kur i morën nga i pari tek i fundit dhe i rrasën në birucë për faturat abuzive e të larta të energjisë që sot janë dyfish më të larta, afrofe dhe abuzive e të dërguara jo nga nëpunës të ndershëm të shtetit por nga një kast hajdutësh që i thotë vetes OSHEE. 

Ky është realiteti sot në Krujë i çmimeve të larta, taksave të larta, çmimeve të papërballueshme të karburantit e faturave të kripura të energjisë. E çfarë bëjnë këta? Tallen nga mëngjesi në darkë me njerëzit

Dje e patë në Kuvend, ku ne çuam propozimet për heqjen e shtesës së taksës prej 240 lekë /litër mbi karburantet që i ka vënë Edi Rama, se si u tallën si hijena, se si refuzuan që të përmbushin premtimin e tyre sepse ishte premtim i tyre për të ulur me 14% taksën, TVSH-në mbi energjinë. I hodhën poshtë që të dyja, i hodhën poshtë të dyja pa u skuqur, pa u zverdhur. Po pse e bëjnë këtë?! E bëjnë këtë sepse nuk i tremben gjykimit të krutanëve e bëjnë këtë sepse nuk  llogarisin edhe krutanët, e bëjnë këtë se llogarisin te krimi dhe kriminelët. Ju e dini këtë fort mire, por ora e përgjigjes po vjen. Ora e përgjigjes po vjen nga Kruja dhe gjithë Shqipëria. Çfarë përgjigje do ti japë Kruja Rama-Metës që po e merr edhe përgjigjen e fundit nga xhepi i krutanit dhe po e lë pa shpresë, pa bukë, pa punë, pa të ardhme. Premtuan uljen e çmimit të energjisë dhe të naftës dhe i kanë çuar më të larta se kurrë më parë. A do ta pranojë Kruja këtë? A do ta ulni kokën ju? A do të pranoni të trajtoheni si bagëti? Unë e di që jo!” – theksoi zoti Basha. 

Zoti Basha theksoi se Edi Rama dhe Ilir Meta tallen me qytetarët duke u sjellë persona të inkriminuar për kandidat, siç ndodhi dhe në rastin e Krujës, ku kandidati i propozuar është i skeduar si trafikant droge. 

“Nuk mjafton që u kanë hapur plagë Krujës e krutanëve, po i hedhin dhe kripë plagës duke sjellë këtu në Krujë fytyrat e shëmtuara të krimit të lidhur me pushtet, të pushtetit të veshur me petkun e krimit, siç është rasti i njerëzve që kërkuan votën këtu me 23 qershor e që duan prapë të vijnë këtu me 21 qershor, ndërkohë që i kanë hesapet e hapura me drejtësinë italiane. Po të fusësh emrin e Artur Bushit në “Google”, çfarë del?! Del një aferë korruptive, kriminale. Kriminale, sepse është e lidhur me trafikun e drogës dhe korruptive sepse do t’i dalin petët lakrorit shumë shpejt. Kjo është oferta e dytë. Erdhën me mashtrime dhe gënjeshtra dhe prodhuan mjerim dhe varfëri, tani herën e dytë duan ta marrin me krim, me presion. Kështu i trajtojnë njerëzit këta, si dele, si bagëti. Edhe delja dhe bagëtia trajtohet me më shumë dinjitet se sa ç’trajton dyshja Rama-Meta Krujën, krutanët, banorët e kësaj zone, banorët e gjithë Shqipërisë.” 

Në Fushë- Krujë tregtarët u ankuan për taksat e larta abuzimet me çmimin e energjisë gjobat dhe faturat afrofe,  shpërthimet me tritol dhe vjedhjet. Sipas qytetarëve të Fushë- Krujës sa herë që njoftohet Policia ankohet se nuk ka karburant për t’u ardhur në ndihmë banorëve.    

Tregtari: Dobët fare, s’ka blerës

Basha: Sa ka që ka ra xhiro

Tregtar: Po një vit e këtej ka…, s’po hapet asnjë perspektivë.

Basha: Po taksat?
Tregtar: Taksat na kanë mbërthy shumë keq

Basha: A është rrit çmimi i transportit?

Tregtari: Po, është rrit shumë, i naftës, dëgjojmë në televizor ndryshim shumë, ndryshim s’ka.

 Tregtari: Kemi fillu edhe ne me rujt veten kur i thonë llafit për arsye se ka pas shumë grabitje, kanë grabit edhe komshinjtë  e mi këtu afër. Tani kam fillu tu marr masat e sigurisë për vete.

Basha: Po policia?

Tregtari: Policia, vijnë pas gjysmë ore, i kam marrë unë në telefon kur është grabit edhe komshiu. Kur erdh policia, iu blloku edhe rruga e s’arriti kush me i kap. Ju mbaron nafta zakonisht

Basha: kur vjen krimi, mbaron karburanti. Naftën e merr krimi, policisë i lenë ujin.

 Tregtari: Dritat na i kanë pre komplet, , kan fut afrofe, si u ka desh qejfi, me një copë dyqan me drita të thjeshta, ka fut 200 mijë, ka fut 180 mijë afrofe pa e dit fare se kam kontratë, as kam vu firmë, absolutisht. Kur vjen puna, vjen e më shkëput dritat dhe jam errësirë. Ke për të dal edhe tutje e do i shohësh të gjithë andej, komplet janë me gjenerator, pa drita fare.

Basha: Po faturat, i keni paguar?

Tregtari: I kanë pru afrofe fare, pa lidh asnjë lloj kontrate, asnjë lloj emri, vetëm me llampa 200 mijë lekë drita.

Tregtari: Vijnë tregtarët në punë dhe ka raste nga mëngjesi në darkë nuk bëjnë asnjë lloj pune, absolutisht. Me tatimet e të gjitha, ka shkuar në zero gjithçka.

Qytetar : Po tallen me moshën e tretë, me pensionistët. Mua mi kanë mbajt letrat dy vjet e dy muaj, pa më dhënë pensionin. Unë kam një librezë të rregullt, i lëmë sistemet që kalojnë por drejtësia të shkojë në vend, të verifikohet.

Qytetar: Këtu po bëhet tmerr i zi o kryetar 

Së bashku, në një aksion të fuqishëm politik deri më datën 21 qershor, – theksoi kryetari i PD, do  t’i tregojmë kësaj qeverisjeje se shqiptarët nuk e pranojnë zgjedhën e varfërisë dhe zgjedhën e krimit, se veglat e vjetra të diktaturës nuk mund t’i pranojmë të rikthehen e të riciklohen si mjete sundimi nga pinjollët e diktaturës.  

“Të ngrihemi këtu në Krujë e në çdo qytet tjetër, të ngrihemi në Tiranë në një protestë të pandalshme për të treguar me forcën e sovranitetit popullor se nuk e pranojmë këtë regjim dhe për të kulmuar me votën tuaj më 21 qershor , për të ndëshkuar me votën tuaj e për t’i hapur me votën tuaj rrugë ofertës sonë të re. 

Cila është oferta jonë e re? Së pari, oferta jonë e re është oferta e një qeverie për njerëzit,  që nuk vjen t’ju shohë një herë në katër vjet e t’ju marrë votën e pastaj ju harron fytyrat, por që të rrinë këtu me ju, të qajnë hallet me ju, të gjejnë zgjidhjet me dhe për ju;  e faljes pa dallim të kamatë-vonesave abuzive dhe faturave afrofe për krutanët e gjithë qytetarët e tjerë të vendit që kanë rënë pre e këtij instrumenti të poshtër, të ulët të nënshtrimit ekonomik, në këtë kohë të vështirë krize, e uljes së taksave”- deklaroi kreu i PD. 

Kryetari i PD ka bërë të ditur para qytetarëve të Krujës dhe Fushë – Krujës e përmes tyre të gjithë Shqipërisë se kandidatët e PD dhe aleatëve të saj do të duhet të nënshkruajnë një kontratë me tre pika para se të konfirmohen si të tillë.

“Një gjë ju premtoj, një kusht kam për çdo kandidat të PD dhe çdo kandidat që vjen të garojë me PD nga aleatët; të plotësojë kontratën me tre pika me qytetarët e vet:

E para, të mos ketë rekorde kriminale Nuk pranon ky popull të udhëhiqet nga kriminelë nuk pranon Kruja të udhëhiqet nga kriminelë;

E dyta, të zotohet se asnjë taksë nuk do të rrisë në 4 vjet, të gjitha taksat do i ulë në maksimumin që jep ligji;

E treta dhe më e rëndësishmja, të zotohet që dera e tij apo e saj do të jetë e hapur 24 orë për qytetarët, hallet e problemet e tyre. 

Kush kërkon besimin e krutanëve, kush kërkon besimin e bashkëqytetarëve në emër të PD duhet patjetër të firmosë një kontratë të tillë në shesh të qytetit, para të gjithë bashkëqytetarëve të vet. Këtë fjalë ju a jap sot dhe do ta mbaj për Krujën e për çdo bashki tjetër të vendit për zgjedhjet e ardhshme të 21 qershorit. 

Ne do të flasim me votë në 21 qershor por ne nuk do të rrimë të heshtur sepse zullumi po trashet ditë për ditë, laku po shtrëngohet në fytin e shqiptarëve, ndaj ju siguroj se bashkë me përpjekjen tonë madhore demokratike me qytetarët e Shqipërisë, për t’u rezervuar më 21 qershor përgjigjen dinjitoze që shqiptarët gjithmonë u kanë rezervuar atyre që mendojnë se mund t’i sundojnë, ne ditë për ditë duhet të jemi në këmbë për të drejtat tona.

Këtu nga Kruja, dua t’i jap një mesazh dyshes Rama-Meta. As korrupsioni galopant që bëni me fondet që vidhni nga xhepat e qytetarëve të pamundur të Shqipërisë, as aleanca juaj me krimin nuk do ju shpëtojë nga ora e llogarisë. Ora e llogarisë po vjen dhe llogaria thotë: Rama ik, Meta ik! 

Le t’i hapim rrugë një oferte të re, për një të ardhme të re, le të angazhohemi me krutanët e krutanet më të mira, për të ndërtuar atë ekip që politikën e heq si lak në fytin e qytetarëve dhe e kthen në instrument për të përmirësuar jetën e qytetarëve e heq nga duart e qeverisë dhe e kthen në duart e qytetarëve! Fjalën e keni ju, të drejtat i keni ju, radhën e keni ju. Askush nuk guxon t’ju a marrë, ndaj ushtrojeni me mençuri, trimëri kurajë, për interesat tuaja, veten e fëmijët tuaj!”. 

Zoti Basha i ka konsideruar shpifje për të hequr vëmendjen nga kriza ku keqqeverisja i ka futur shqiptarët akuzat e bëra nga ministri i Brendshëm ndaj tij. 

“Shpifjet dhe akuzat e lodhura e të vjetra të planifikuesve të dhunës ndaj institucioneve, të të njëjtëve që sot kanë kriminalizuar institucionet nuk mund të heqin vëmendjen nga akti kriminal i djeshëm i hedhjes poshtë të amendamenteve tona për uljen e çmimit të naftës dhe energjisë. Çdo akrobaci, çdo përpjekje për t’i trajtuar shqiptarët apo mediat e shqiptarëve si dele ka dështuar me turp. Ajo e djeshmja nuk është tjetër veçse një përpjekje e dështuar me një qëllim, që shqiptarët të harrojnë se Edi Rama dje jo vetëm dështoi të mbante premtimin por në mënyrë kriminale, kur ne i dhamë shansin e dytë të mbante këtë premtim, e shkeli për herë të dytë, duke shkelur e poshtëruar shqiptarët për çmimin e energjisë dhe dje pranoi ta mbajë çmimin e naftës më të lartin në rajon, duke mos pranuar amendamentin tonë për heqjen e taksës që ai e shtoi me 240 lekë për litër. Kjo do të thotë që çdo shqiptar dje që mund të përfitonte 10 mijë lekë në muaj nga ulja e taksës së energjisë nuk e përfiton këtë, kjo do të thotë që për çdo shqiptar kosto e rritur e bukës, ujit, vajit, sheqerit, miellit për shkak të rritjes së taksës së karburantit do të vazhdojë të mbetet e lartë sepse Edi Ramës nuk ia ndien për hallet që po kalojnë shqiptarët, të djathtë e të majtë. 

Këto janë çështjet e vërteta që bashkojnë shqiptarët, të djathtë e të majtë, të tjerat janë përralla të njerëzve të intoksikuar nga krimi lidhjet me krimin dhe substancat narkotike që vetë shokët e tyre i denoncojnë se i marrin ditë për ditë në hundët e tyre të pista” –deklaroi z. Basha.

Njoftim për shtyp i Partisë Demokratike, 10 Prill 2015 

Refuzimi i dy Amendamenteve për uljen e çmimit të energjisë dhe uljen e çmimit të naftës, nuk ishte refuzim i propozimeve të opozitës, por refuzim për të ndihmuar qytetarët, për të lehtësuar jetën e tyre. Refuzoi pikërisht dyshja Rama-Meta, të cilët premtuan në fushatë çmime më të ulëta dhe kosto më të lira jetese, por në fakt po u jepin shqiptarëve përditë më pak të ardhura dhe më shumë shpenzime. 

Mazhoranca konfirmoi dje se qeverisja e saj nuk është asnjë ditë në shërbim të qytetarëve.

Refuzimi i dy Amendamenteve për uljen e çmimit të energjisë dhe uljen e çmimit të naftës, nuk ishte refuzim i propozimeve të opozitës, por refuzim për të ndihmuar qytetarët, për të lehtësuar jetën e tyre.

Refuzoi pikërisht dyshja Rama-Meta, të cilët premtuan në fushatë çmime më të ulëta dhe kosto më të lira jetese, por në fakt po u japin shqiptarëve përditë më pak të ardhura dhe më shumë shpenzime.

Mazhoranca nuk pranoi që familjet shqiptare të kursenin 112 milion USD nga xhepat e tyre duke hequr një barrë të rëndë që nuk i shkon vetëm atyre që përdorin automjetin. Taksa e qarkullimit, e cila në amendamentin drejtuar Kuvendit, u kërkua që të hiqej, prek në mënyrë të drejtë për drejtë produktet kryesore në treg.

Për shkak të saj, përdoruesit e makinave apo mjeteve të ndryshme të transportit paguajnë 1000 lekë taksa sa herë që blejnë naftë. Ndërkohë që secili nga konsumatorët që blen një produkt në treg paguan indirekt koston e kësaj takse në shërbimin apo produktin e blerë.

Pushteti e ka më të kollajtë t’u heqë nga xhepi shqiptarëve 112 milion USD në vit nga kjo taksë, ndërkohë që bizneset pranë qeverisë dhe paaftësia e një administrate të politizuar i shkaktojnë një dëm prej 1 miliard eurosh në formën e evazionit fiskal.

Ky është alarmi që ka lëshuar Banka Botërore me raportin e djeshëm, mbi këtë shkallë të panjohur korrupsioni në vend që fajëson drejtpërdrejt qeverinë e praktikat e saj.

Sot bizneset e ndershme e kanë më të pamundur të mbijetojnë për shkak të korrupsionit, ngaqë qeveria i ndan bizneset, disa të nënës, disa të njerkës.

Dje, mazhoranca, kishte mundësinë të mbante një nga premtimet e saj në fushën e energjitikës. Amendamenti i dërguar pranë Kuvendit, nga Partia Demokratike, lidhej drejtpërdrejt me premtimin e kësaj mazhorance për uljen me 14 përqind të TVSH-së së energjisë elektrike, e cila do të kompensonte sadopak rritjen e çmimit të energjisë me heqjen e fashës të mbrojtur.

Dje, mazhoranca u dëshmoi shqiptarëve se sa përzemër i ka ajo braktisjen e premtimeve me të cilat ka marrë votat e tyre, duke rrëzuar Amendamentin. Qeveria dështoi të kthente përgjigje se përse nuk pranon që të mbajë premtimet me të cilat u kërkoi votat shqiptarëve.

Opozita prej gati dy vitesh ka propozuar 65 amendamente që kanë të bëjnë me uljen e çmimeve dhe lehtësimin e jetës së qytetarëve. Mazhoranca gjithnjë ka refuzuar.

Por ballafaqimi me popullin dhe me të vërtetën po vjen.

Shqiptarët më 21 qershor do t’i kthejnë përgjigjen e merituar kësaj mazhorance arrogante, që ka braktisur qytetarët dhe vetë është zhtyrur në korrupsion galopant.

Shqiptarët do të përqafojnë ofertën e re që ka të bëjë drejtpërdrejt me jetën e qytetarëve, me taksa të ulëta, me cmime të ulëta, ofertën që sjell zhvillim, punësim, siguri e dinjitet.

Deklaratë e deputetes së Partisë Demokratike, Jorida Tabaku, 10 Prill, 2015

Kryetari i Partisë Demokratike, Lulzim Basha priti sot kryetarin e Partisë Demokratike Shqiptare të Maqedonisë, Menduh Thaçi në një takim ku u diskutua për situatën politike në Maqedoni.

Kryetari Basha, rikonfirmoi mbështetjen e plotë të Partisë Demokratike për kauzën e drejtë të avancimit të të drejtave të shqiptarëve në Maqedoni dhe përmirësimin e statusit të tyre ekonomik dhe shoqëror.

Në këtë kuadër, Partia Demokratike mbështet zbatimin e plotë të Marrëveshjes së Ohrit, dhe nxit pa asnjë rezervë bashkëpunimin mes dy partive shqiptare në Maqedoni.

Duke shprehur këtë qëndrim, Basha tha se bashkëpunimi mes dy partive shqiptare në Maqedoni është në përputhje të plotë me vizionin e Partisë Demokratike për avancimin e të drejtave të shqiptarëve të Maqedonisë në frymën e integrimit europian dhe euroatlantik të vendit.

Njoftim për shtyp i Partisë Demokratike, 9 Prill 2015

Qytetarët shprehen të shqetësuar për shëndetin e vënë në rrezik nga shpërthimi i puseve të naftës. Kërkohet rimbursim dhe ndërhyjre e menjëhershme e qeverisë. Deputeti Mihaj dhe përfaqësuesit e PD takojnë banorët.

Banorët e Marinzës në Fier shprehen të indinjuar nga ndotja e shkaktuar pas shpërthimit të puseve të naftës një javë më parë. Ata thonë se ndotja është në shkallën më të lartë të rrezikshmërisë, si në ujë, toka, të mbjella dhe ajër.

Shqetësimet e banorëve i dëgjuan nga afër deputeti i Partisë Demokratike, Bedri Mihaj, i shoqëruar nga Kryetari i Partisë Demokratike në Fier, Luan Baçi, Kryetari i Komunës dhe i Bashkisë Roskovec.

Banorët shfaqën shqetësimin e tyre në lidhje me shëndetin e vënë në rrezik gjatë këtyre ditëve. Ata i bënë të ditur deputetit Mihaj raportet mjekësore të cilat vërtetonin gjendjen e përkeqësuar shëndetësore.

Deputeti Mihaj kërkoi që shërbimi mjekësor t’u ofrohet falas këtyre banorëve të cilët rrezikojnë jetën duke vazhduar të jetojnë në zonën e kontaminuar nga fenoli e metani.

“Është detyrë e kësaj mazhorance që të qajë hallet e banorëve e të monitorojë rreptësisht këtë ambient. Të përpilojë strategjinë se si mund të veprohet me këta njerëz. Me të drejtë banorët kërkojnë kushte jetesese, por në radhë të parë duhet të kenë kushte të pastra mjedisore. Këtu është një problem se kur njerëzit ngrenë zërin, kërkojnë zgjidhje, vijnë, premtojnë dhe asgjë nuk bëhet. Ne si deputetë të opozitës gjithmonë do të ngremë zërin fort, për kushtet e jetesë”, tha Mihaj.

Deputeti Mihaj vuri në dukje diskriminimin që u bëhet banorëve duke mos u lënë hapësira për shfrytëzimin e tokave të tyre për bujqësi e blegtori. Monitorimi periodik i shëndetit të banorëve dhe i ambientit është prioritar, tha Mihaj. Nese mazhoranca propagandon për check-up falas nga mosha 45-60 vjeç, atëherë ta fillojë nga Marinza, u shpreh Mihaj.

Ai theksoi se rimbursimi është i domosdoshëm për banorët, jo vetëm në dëmet materiale por edhe ushqimore. Këtu duhet të ndërhyjë qeveria.

Njoftim për shtyp i Partisë Demokratike 8 Prill 2015

Qytetarët e Elbasanit ngrenë shqetësimin për ndikimin që ka në jetën e tyre landfillimi që ndërtoi Edi Rama, pa transparencë, në shkelje të ligjit, dhe pa respektuar kriteret teknike. Pikëpyetje të mëdha u ngritën në takimin e departamenteve të PD me banorët, studentët e intelektualët e qytetit.

Departamenti i Mjedisit dhe i Antikorrupsionit në Partinë Demokratike organizuan dje një tryezë të hapur me qytetarë të Elbasanit lidhur me impianin e djegies së mbetjeve në këtë qytet. Kreu i departamentit të Mjedisit Jamarbër Malltezi e cilësoi këtë impiant si të nxituar, pa studim, korruptiv e madje që do të sjellë dëme për banorët e zonës. “Kontrata është nënshkruar pa analizë dhe studim. Leja mjedisore është dhënë dy muaj pas kontratave. Nuk është konsultuar me banorët e kësaj zone ku do të ndërtohet landfilli. Nuk është parashikuar depozitimi i hirit të këtyre mbetjeve që cilësohen mbetje të rrezikshme”, tha Malltezi, i cili u bëri thirrje organeve ligjore të nisin një hetim në lidhje me ndërtimin e këtij impiani.

Janë 15 pikëpyetje mjedisore që nuk kanë përgjigje nga qeveria si dhe 14 pikepyetje ligjore të procedurave që janë shkelur haptazi. Sipas ekspertëve, koncesioni nuk është shpallur në buletinin e APP-së, është lidhur kontratë për ndërtim TEC pa treguar se sa para do investohen nga buxheti i shtetit, nuk ka as leje mjedisore dhe as modelim të gazrave. Brenda 1 dite (16-17 Dhjetor) janë kryer 9 procedura ligjore përfshirë afatet e ankimimit, shqyrtimit të ankimimit, komenteve me shkrim nga ministritë e tjera, hartimit të draft-kontratës, negociimit të kontratës, etj. Qytetarët e pranishëm në takim hodhë dyshime për një aferë të rëndë nga ana e qeverisë me pasoja në shendetin e tyre.

Në takim morën pjesë këshilltarët bashkiake, kryetari i Qarkut, kryetari i Komunës Bradashesh, OJQ mjedisore, intelektualë, pedagogë dhe studentë të cilët nuk u pajtuan më këtë investim të dyshimtë të qeverisë.

Pikepyetjet mjedisore dhe ligjore të impiantit të djegies së mbetjeve në Elbasan

Pikëpyetje mjedisore:

1.      A ka studim fizibiliteti?

2.      Cilat ishin alternativat e trajtimit të mbetjeve?

3.      Pse u zgjodh mënyra e djegies së mbetjeve dhe cilat janë alternativat e teknologjive të trajtimit?

4.      Kush e propozoi? Sa eksperiencë kishte propozuesi?

5.      Sa kushton dhe çfarë përfshihet?

6.      A përmirëson gjendjen mjedisore apo na rrezikon?

7.      Cilat do jene sasitë e shkarkimeve të gazrave?

8.      Pse nuk ka modelim të shkarkimeve të gazrave?

9.      Sa është kapaciteti mbajtës me emetime ndotëse të Elbasanit?

10. Pse shkelet ligji dhe nuk ka studim të thelluar të VNM?

11. Kush e ka vlerësuar? Cilët janë ekspertët?

12. Pse u shkel ligji dhe nuk pati proces të rregullt të dëgjesave publike?

13. Si merret leje mjedisore pa pasur një studim të thelluar të ndikimit në mjedis?

14. Si ndërtohet një TEC pa bërë modelim të shkarkimit te gazrave?

15. Ku do shkoje hiri i djegieve që është mbetje e rrezikshme?

Pikëpyetjet e procedurave ligjore:

1.      Kush e propozoi?

2.      Kur u krijua kompania që u shpall fituese?

3.      Sa eksperiencë të ngjashme ka kjo kompani?

4.      Sa buxhet ka kjo kompani?

5.      Pse nuk u shpall forma e procedurës koncesionare (psh. tender i hapur ndërkombetar)?

6.      Pse nuk u publikua as njoftimi i garës për kontratë dhe as njoftimi i fituesit të gares?

7.      Ku jane kriteret ligjore dhe teknike për vlerësimin e cilësisë, funksionale dhe mjedisore?

8.      Për cilat merita apo kapacitete zgjidhet operatori ekonomik i sapoformuar me 0 përvojë në fushë?

9.      Si lidh kontratë qeveria me VKM me subjektin pa leje mjedisore? Leja mjedisore marrë me 24 shkurt 2015, pra mbi 2 muaj pas lidhjes se kontratës me VKM

10. Komisioni i vlerësimit e shpall fitues kompaninë me 16 Dhjetor 2014 ndërsa një ditë me pas me 17 Dhjetor 2014 miratohet me VKM kontrata!

11. Kur u njoftua fituesi dhe humbësi? Kur u la kohë për ankimim?

12. Kur u konsultuan ministritë e tjera nësë kishin komente për të lidhur këtë kontratë?

13. Kur u hartua kontrata?

14. Sa është kosto e taksapaguesve dhe pse?

Njoftim për shtyp i Partisë Demokratike, 8 Prill 2015

-Këta prodhues të pakonkurueshëm zullumesh kanë gjetur të mbahen, si pas fijes së kashtës, pas shprehjes “çdo çudi zgjat tre ditë”. Pra nuk llogarisin të dalin nga cikli i skandaleve me llogaridhënie, me transparencë, me dorëheqje, me  reflektime dhe me korigjime adekuate për të mirën publike, por me të hedhur, me hile duke llogaritur lodhjen e njerëzve nga e keqja, mbulimin e të keqes me të keqe, harrimin.

-Nuk u mbyll për tre ditë dhe s’ka për t’u mbyllur as për tridhjetë e as për treqind fshehja e kërkesës së Interpol Brukselit ndaj deputetit të shumicës, Mark Frroku që përveçse një ortak i Edi Ramës në skemat e tij me deputetë të inkriminuar, është dëshmitari kyç i denoncimit të vrasjes me pagesë të dy deputetëve me porosi të kryetarit të Kuvendit, Ilir Meta.

-Ne ngulmojmë me forcë në kërkesat tona për dorëheqjen e kryetarit të Kuvendit,  Ilir Meta dhe ministrit të Brendshëm Saimir Tahiri, duke i konsideruar këto dorëheqje një kusht të domosdoshëm për çlirimin e hetimeve të krimeve të rënda  nga dara e pushtetit dhe njëherësh për një dekriminalizim të vërtetë që starton me shkurajimin dhe jo me inkurajimin e krimit nga krerët e qeverisë.

-Qytetarët e kanë kuptuar se Rama-Meta nuk e ndalojnë dot rënien, nuk e kthejnë dot rrotën e përkeqësimit. Me keqardhje përsëris se me ta keq e më keq do të bëhet. Marsi ishte më keq se shkurti, prilli më keq se marsi. Kriza, përkeqësimi dhe krimi janë produkti i tyre, janë fryti që prodhon kjo dyshe, janë “talenti” i  tyre, që vetëm te zeza u ka sjellë shqiptarëve

-Njëherësh me denoncimin ditë për ditë të dështimeve të tyre, ne kemi shpallur dhe po çojmë përpara komunikim intensiv me qytetarët ofertën  tonë të re. Ne e dimë si mund të ndalohet katastrofa, ne e dimë si mund të fillojë ngjitja, ne e dimë si mund të kthejmë zhvillimin. 

Dua ta nis këtë mbledhje javore të grupit parlamentar, duke  sjellë në  qendër të vemendjes katastrofën e shpërthimeve në zonën naftëmbajtëse të Marinzës me   pasojat të tmerrshme për jetën, shëndetin dhe pronat e banorëve. Në këtë emergjencë të rrezikut të madh të vazhdimit dhe përsëritjes së shpërthimeve në Marinzë dhe në gjithë zonën përreth unë shpreh solidaritetin tonë të plotë me familjet e goditura nga shpërthimet.

Për ne asgjë nuk është më parësore se sa rehabilitimi dhe mbrojtja e banorëve; asgjë, asnjë interes tjetër nuk qëndron mbi të drejtat dhe nevojat e qytetarëve. Ata, jeta e tyre, siguria e tyre është e para për ne.

Ndaj, i kërkojmë sot qeverisë:

Të marrë përgjegjësitë dhe të gjitha masat e duhura për dëmshpërblimin e plotë të familjeve dhe subjekteve të goditura nga shpërthimet, në bazë të evidentimit të saktë të dëmëve dhe vlerës së tyre.

Të marrë përgjegjësitë për zbulimin e shkaqeve të katastrofës, evidentimin e përgjegjësive konkrete të kompanisë “Bankers” dhe çdo subjekti e institucioni tjetër, përfshirë institucionet e shëndetit publik që i kanë lënë banorët pa asistencën minimale mjekësore, ndëshkimin konform ligjeve të shtetit shqiptar të  çdo subjekti apo individi përgjegjës për situatën e rëndë.

Marrjen e menjëhershme të masave për rehabilitimin e zonës së goditur, për mospërsëritjen dhe evitimin e shpërthimeve të ngjashme në gjithë zonën naftëmbajtëse.

Jemi duke ndjekur  nga afër zhvillimet në terren. Deputetët tanë së bashku me pushtetarët tanë vendorë kanë qenë që prej çastit të parë e çdo ditë pranë banorëve. Do të mbajmë qëndrimet tona në Kuvend dhe jashtë Kuvendit në  vartësi të përmbushjes nga qeveria dhe kombania “Bankers” të detyrimeve para  banorëve.

Të  nderuar deputetë,

Shqiptarët kanë ndjekur me vlerësim të lartë ushtrimin e shkëlqyer të përgjegjësive të grupit tonë parlamentar në seancën e javës së kaluar, që kishte në qendër të debatit skandalin e padëgjuar të fshehjes  së kërkesës së Interpol-Brukselit për deputetin e shumicës Mark Frroku, i akuzuar nga drejtësia belge për vrasje.

Me forcën e fakteve të pakundërshtueshme, me forcën e arsyes dhe kurajos, deputetët demokratë argumentuan bindshëm dhe nxorrën në dritë të diellit para shqiptarëve fshehjen e qëllimshme të kërkesës së Interpol Bruskelit nga një strukurë vertikale partike dhe klanore, që nis me Edi Ramën, vazhdon me Saimir  Tahirin dhe mbyllet me shefin e zyrës së Intepolit, i importuar edhe ai në policinë e shtetit nga repartet politike të Partisë Socialiste.

Edi Rama kishte një mundësi ta linte veten jashtë implikimit të drejtpërdrejtë në këtë skandal: të largonte nga qeveria Ministrin e tij të Brendshëm, i cili ka mbushur e derdhur disa kupa me skandale të rënda dhe dështime spektakolare, por që me skandalin e fundit i vuri një vulë të madhe rekordeve të mëparshme.

Po çfarë bëri Edi Rama? Nuk e largoi ministrin e stërpërlyer. Përkundrazi. I rrahu shpatullat. Sepse edhe Tahiri, edhe ata të tjerët poshtë Tahirit që janë përlyer me këtë skandal, kanë qenë dhe janë nën urdhërat e Ramës, kanë zbatuar e zbatojnë si ushtarë të bindur urdhërat e tij. Edi Rama provoi edhe njëherë se çfarë është e turpshme, çfarë është e ndotur, çfarë është kriminale në qeverisjen e tij vjen prej tij, ka bekimin e tij. E panë gjithë shqiptarët si shkoi në parlament të krekosej si gjel me batuta gojëpisi e të dala boje, por përfundoi si pulë e lagur përballë  vendosmërisë dhe logjikës së hekurt të deputetëve tanë.

Rama-Meta i kanë bërë skandalet si buka që hanë. Këta prodhues të pakonkurueshëm zullumesh kanë gjetur të mbahen, si pas fijes së kashtës, pas  shprehjes “çdo çudi zgjat tre ditë”. Pra nuk llogarisin të dalin nga cikli i skandaleve  me llogaridhënie, me transparencë, me dorëheqje, me reflektime dhe me korigjime adekuate për të mirën publike, por me të hedhur, me hile duke llogaritur lodhjen e njerëzve nga e keqja, mbulimin e të keqes me të keqe, harrimin.

Nuk u mbyll për tre ditë dhe s’ka për t’u mbyllur as për tridhjetë e as për treqind fshehja e kërkesës së Interpol Brukselit ndaj deputetit të shumicës, Mark Frroku që përveçse një ortak i Edi Ramës në skemat e tij me deputetë të inkriminuar, është dëshmitari kyç i denoncimit të vrasjes me pagesë të dy deputetëve me porosi të kryetarit të Kuvendit, Ilir Meta.

Skandali ndjek skandalin. Sa iu hodhën hekurat Mark Frrokut, pasi plasi skandali i fshehjes së kërkesës së Interpol Brukselit, vjen akti tronditës, rrënqethës i shpalljes së pafajësisë së Arben Frrokut, të akuzuarit kryesor për vrasjen e komisar Dritan Lamaj. Ky akt i njollosur nga zhvlerësimi i dëshmive, zhdukja e dëshmitarëve dhe publikimi mafioz i identitetit të dëshmitarit të mbrojtur, si dhe  lidhjet e forta familiare  të gjyqtarit kryesor me Partinë Socialiste është kuptuar nga shqiptarët pa dallim për atë çfarë është: një tjetër arritje e mafias në kupolën e shtetit, një tjetër sprapsje e shtetit ligjor para shtetit të mafias një tjetër dorëzim i sovranitetit demokratik në duart e mafias së bërë njësh me qeverisjen e dyshes Rama Meta.

Njeriu që ka vendosur standartin e turpshëm të kërcënimit me gjuhë të ulët të gjyqtarëve me telefon për të mbajtur në burg fukarenj që nuk arrijnë të paguajnë dot faturat e kripura të energjisë nuk u ndje, nuk pipëtiu, nuk tha asnjë fjalë të vetme në publik për këtë vendim që tronditi mbarë opinionin publik dhe partnerët tanë.

Një tregues më vete, i pashoq në  Europë, është fakti se Rama-Meta sillen me  dyshimet e bazuara mbi fakte dhe prova dhe akuzat e opozitës si të ishin të pandehur, e jo si qeveritarë, jo si politikanë. “Nuk na kapni dot se nuk keni prova”- ky është  refreni i  tyre.

Mendjeshkurtësia u thotë se duhet t’i kapim duke porositur vrasje, duke urdhëruar fabrikimin e dëshmive, duke fshehur e urdhëruar fshehjen e kërkesave të  Interpolit, duke manipuluar apo blerë drejtësinë në pjesët e korruptuara të saj.

Nuk mbajnë përgjegjësi politike për fakte botërisht të njohura, që nuk kanë nevojë të hetohen nga organet e hetimit, siç është përshembull, përpjekja e Ilir Metës për t’ia faturuar ish-kryeministrit dhe ish kreut të PD-së planin për vrasjen e dy deputetëve në kohën kur Rama-Meta nuk kishin vendosur akoma ta shpallnin si inskenim.

Zullumet e tyre i kanë zënë rrugën Shqipërisë, i kanë bllokuar frymëmarrjen dhe arteriet zhvillimit.

Zullumet e tyre janë armiku i dinjitetit, paqes dhe normalitetit të shqiptarëve.

Ne do të vazhdojmë betejën tonë. Ne do t’i shkojmë deri në fund fshehjes së qëllimshme të kërkesës së Interpol Brukselit. Sepse kemi bindjen se në këtë  skandal është përmbledhur një pjesë e rëndësishme e historisë së krimit të veshur me pushtet dhe pushtetit të veshur me krim në qeverisjen Rama-Meta. Ky skandal është një prej nyjeve gordiane që duhet të presë me çdo kusht ligji, drejtësia dhe demokracia e re për të rrëzuar krimin nga pushteti dhe pushtetin e krimit.

Ne ngulmojmë me forcë në kërkesat tona për dorëheqjen e kryetarit të Kuvendit,  Ilir Meta dhe ministrit të Brendshëm Saimir Tahiri, duke i konsideruar këto dorëheqje një kusht të domosdoshëm për çlirimin e hetimeve të krimeve të rënda  nga dara e pushtetit dhe njëherësh për një dekriminalizim të vërtetë që starton me shkurajimin dhe jo me inkurajimin e krimit nga krerët e qeverisë.

Në ilustrim të këtij qëllimi kemi denoncuar dhe denocojmë me forcë dhënien e lagunës së Patokut një firme pa aktivitet, pa histori, e krijuar enkas para dy muajve për të marrë llokmën e paracaktuar sepse është e vëllait të deputetit të PS-së, Armando Prenga. Veç të tjerash, kjo është një sfidë që kryeministri Edi Rama po i bën personalisht misionit të dekriminalizimit. Deputeti Prenga, vëllai i përfituesit të lagunës së Patokut, apo vetë përfituesi, siç u shprehën të indinjuar  peshkatarët e vjetër të Patokut, është subjekt i dekriminalizimit për shkak të rekordeve të tij nga periudha e qëndrimit në Itali para se të bëhej deputet i Edi  Ramës.

I akuzuari dhe i shpalluri në kërkim për përdhunim, me Edi Ramën dhe Ilir Metën bëhet doganier në Korçë. I arrestuari për falsifikimin pasaportash, me Edi Ramën dhe Ilir Metën bëhet shef i IT në drejtorinë e Tatimeve në Korçë.

Këto raste, dhe qindra të tjera që Partia Demokratike ka denoncuar janë arsyeja madhore pse dekriminalizimi duhet bërë, pse vendi dhe qytetarët duhet të çlirohen një orë e më parë nga këta banditë të veshur me kollaro e pushtet nga Edi Rama e Ilir Meta.

Ndërkohë që inkriminimi i qevrisjes rama meta prodhon çdo ditë skandale, rendi po rrokulliset përditë, pasiguria është shtuar frikshëm siç ishin dje vrasjet tragjike në Vlorë apo dalja e maskave në akset kombëtare.

Krimi dhe kriza ekonomike, pasiguria dhe rrokullisja e ekonomisë janë anë të së njëjtës medalje në qeverinë Rama-Meta. Një qeveri që ka ngritur krimin në sistem dhe është bërë njësh me të nuk mund të ndërtojë kurrë një ekonomi të shëndoshë.

Ta harrojnë, dhe me sa kam parë, e kanë harruar shqiptarët. Ta harrojë dhe me sa po shohim, e ka harruar edhe vetë qeveria. Shqipëria në fakt nuk qeveriset në pikpamje ekonomike. Ekonomia jonë është si një anije pa timonier në dallgët e fatit. Eshtë pasqyra më qartë e papërgjegjshmërisë, paaftësisë, korrupsionit dhe  babëzisë së një oligarkie që është sulur të përfitojë sa të mundet dhe ku të mundet për vete.

Kemi shpalosur e analizuar në vijimësi në mbledhjet e grupit treguesit e gjendjes ekonomike sipas të dhënave zyrtare të INSTAT-it. Trendi kostant ka qënë gjithnjë  përkeqësimi. Por rënia dhe rrokullisja në dy muajt e parë të vitit 2015 ka marrë shpejtësinë dhe intensitetin e një fundi katastrofik.

1.Totali i të ardhurave për dy muajt e parë të vitit përveçse rezulton më i ulët  sesa planifimi (325 milionë lekë më pak), rezulton edhe me i ulët sesa fakti i periudhës janar-shkurt 2014 (703 milionë leke më pak).

2.Të ardhurat nga “tatimet dhe doganat” rezultojnë 691 milionë lekë më pak sesa e njëjta periudhë e vitit të kaluar (nga doganat -422 milionë lekë dhe nga tatimet -269 milione lekë).

3.TVSH rezulton 266 milionë lekë më pak sesa janar-shkurt 2014. Asnjë qindarkë nuk është paguar për rimbursimin e TVSH-së.

4.Tatim fitimi rezulton plot 921 milionë lekë me pak sesa plani i dy-mujorit, dhe 312 milione lekë më pak sesa janar-shkurt 2014.

5.Ndonëse u rritën akcizat, kemi një mosrealizim prej 961 milione lekë në krahasim me planifikimin dymujor qeveritar.

6.Gjithashtu, ndonëse u rrit tatimi mbi të ardhurat personale, dy muajt e parë të vitit aktual janë tronditës përsa i përket të ardhurave nga ky zë. Kemi një mosrealizim prej 628 milionë lekë në krahasim me planin, dhe njëkohësisht të ardhurat e dy muajve të pare të 2015 janë 579 milione lekë më të ulëta sesa të ardhurat e dy muajve të parë të vitit 2014.

7.Ndonëse papunësia është në rritje, shpenzimet për pagesën e papunësisë gjatë periudhes janar-shkurt 2015 janë 26 milionë lekë më pak sesa plani dhe 82 milionë lekë më pak sesa e njëjta periudhë e vitit të kaluar.

8.Edhe pagesat për ndihmën ekonomike janë 571 milione lekë më të ulëta sesa plani i dy-mjujorit dhe 2604 milionë lekë më të ulëta sesa fakti janar-shkurt 2014.

9.Ndonëse çmimi i energjisë u rrit për shumicen dërrmuese të konsumatorëve shqiptarë, asnjë qindarke nuk u shpenzua gjatë dy-mujorit të parë të 2015 për “kompensimin për shtresat në nevoje”, zë i cili do përdorej për të ulur disi efektet negative të ndryshimit të skemës së tarifimit dhe heqjes së fashës mbrojtëse prej 300 kw.

10.Shpenzimet kapitale rezultojne 1.9 miliardë lekë më të ulëta sesa plani prej 5.4 miliardë lekë, ku pjesa më e madhe e mosrealizimit është të financimi i brendshëm, prej pothuajse 1.5 miliardë lekë.

Këto janë vetëm një pjesë e shifrave që ilustrojnë dështimin e dyfishtë të kësaj qeverie.

Dështim me planin e saj për ketë vit.

Dështim në raport me treguesit e saj para një viti.

E mbani mend si mburreshin kur erdhën në krye të qeverisjes se nuk do të mateshin me qeverinë tonë, por do të mateshin me veten e tyre. Tani nuk e thonë më. Tani e kanë lëshuar pa duar, siç më thanë disa qytetarë në Vlorë javën e  shkuar.

Gjendja e ekonomisë i padit si; të paditur, të papërgjegjshëm, të paaftë që nuk u  gjendet shoku, por edhe të pacipë që nuk u gjendet shoku. Nuk bëjnë dot detyrën e tyre më elementare, ekperimentojë sa në dogana, sa në tatime me zgjidhje që  kundërmojnë era korrupsion, nga ana tjetër u kanë lidhur lakun në fyt shumicës dërmuese të qytetarëve me çmimin e rritur të energjisë elektrike, me çmimin e rritur të karburanteve, me çmimin e rritur të arsimimit, me çmimin e rritur të shërbimit shendetësor, me tarifat e kripura të korrupsionit në çdo sportel ku qytetarët paraqiten për të marrë shërbimet që u takojnë.

Vetëm marrin nga qytetarët. Nuk u kthejnë asgjë atyre.

Qytetarët e kanë kuptuar dhe po e kuptojnë çdo ditë e më qartë se varfëria e tyre, varfëria dhe përkeqësimi në Shqipëri kanë në themel një qeveri totalisht të paaftë për të prodhuar zhvillim, totalisht arbitrare për t’u marrë atyre kacidhen e fundit.

Qytetarët e kanë kuptuar dhe po e kuptojnë se Rama-Meta nuk e ndalojnë dot rënien, nuk e kthejnë dot rrotën e përkeqësimit. Me keqardhje përsëris se me ta  keq e më keq do të bëhet. Marsi ishte më keq se shkurti, prilli më keq se marsi. Kriza, përkeqësimi dhe krimi janë produkti i tyre, janë fryti që prodhon kjo dyshe, janë “talenti” i  tyre, që vetëm te zeza u ka sjellë e do tu sjellë shqiptarëve deri sa t’i kenë në krye.

Në këto kushte, njëherësh me denoncimin ditë për ditë të dështimeve të tyre, ne kemi shpallur dhe po çojmë përpara komunikim intensiv me qytetarët ofertën  tonë të re. Ne e dimë si mund të ndalohet katastrofa, ne e dimë si mund të fillojë ngjitja, ne e dimë si mund të kthejmë zhvillimin.

Qytetarët shqiptarë masivisht dhe në mënyrë të përsëritur, i janë bashkuar thirrjes së Partisë Demokratike për uljen me 14 përqind të TVSH-së së energjisë elektrike, dhe për heqjen e taksës së qarkullimit për karburantet, që janë sot 24 lekë të reja për litër.

Përllogaritja e këtyre taksave tregon se qytetarët dhe bizneset paguajnë për çdo litër karburant, 1008 lekë taksën-rama. Kjo e ka shndërruar Shqipërinë në vendin ku paguhet më shtrenjtë karburtanti, edhe pse kemi të ardhurat më të ulëta në Europë.

Abuzimi i qeverisë rama-meta me qytetarët, veçanërisht me ata në nevojë, u thellua e arriti kulmin me rritjen nga 7.7 lekë, në 9.5 lekë të çmimit të energjisë. Që do të thotë efektivisht një rritje prej 25 përqind për shumicën e qytetarëve ndërkohë që të ardhurat e tyre janë më pak se sa vitin e shkuar. Efektet po i ndjejnë qytetarët prej dy muajsh, duke paguar gati dyfishin e tarifës.

Përveç protestave e bashkimit në shesh të zërit të qytetarëve, Partia Demokratike ka paraqitur në Kuvend prej dy muajsh e gjysëm amendamentet për ndryshimin e Ligjit për Taksat Kombëtare dhe ndryshimin e Ligjit për TVSH duke propozuar; Heqjen e rritjes së Taksës së Qarkullimit dhe rikthimin në nivelin e mëparshëm; dhe uljen me 14% të TVSH për energjinë elektrike sipas vetë premtimit elektoral të Edi Ramës.

Asnjë reflektim nga qeveria, nga Edi Rama.

Ulja e dy taksave të sipërpërmendura është vetëm hapi i parë në sprapsjen e politikës së futjes së duarve të qeverisë në xhepat e qytetarëve dhe sipërmarrjes që ka sjellë edhe asfiksimin e ekonomisë kombëtare dhe individuale.

I bëjmë thirrje qeverisë dhe shumicës parlamentare të shqyrtojnë pa vonesë dhe të aprovojnë propozimet tona. Nesër bashkë me pranimin e amendamenteve tona  është rasti të nisim nga puna për një pakete masash për nxjerrjen e ekonomisë nga kriza ku e ka futur vendin rritja e taksave, paligjshmëria dhe arroganca e qeverisë rama-meta.

Nëse nuk ka reflektim, nëse qeveria e lakut në fyt për qytetarët dhe luksit prej sheiku për qeveritarët do të refuzojë sërish të hapë sytë dhe veshët, e pret përballja më masive dhe vendimtare me popullin e vet, të djathë e të majtë që nuk mbajnë dot më, nuk durojnë dot më dhe që nuk mund të gëlltisin më, dhe as të ushqejnë fëmijtë e tyre me lugën boshe e të ndryshkur të mashtrimeve të dyshes Rama-Meta.

Fjala e Kryetarit të Partisë Demokratike Lulzim Basha, në mbledhjen e Grupit Parlamentar, 8 Prill 2015

I akuzuari dhe i shpalluri në kërkim për përdhunim, me Edi Ramën dhe Ilir Metën bëhet doganier në Korçë. I arrestuari për falsifikimin pasaportash, me Edi Ramën dhe Ilir Metën bëhet shef i IT në drejtorinë e Tatimeve në Korçë. Këto raste, dhe qindra të tjera që Partia Demokratike ka denoncuar janë arsyeja madhore pse dekriminalizimi duhet bërë, pse vendi dhe qytetarët duhet të çlirohen një orë e më parë nga këta banditë të veshur me kollaro e pushtet nga Edi Rama e Ilir Meta.

Çfarë mund të ndodhë me një të denoncuar për përdhunim, të shpallur në kërkim nga policia në prill të vitit 2010?

Me Edi Ramën dhe Ilir Metën, një person i tillë bëhet doganier.

Kjo ka ndodhur me Elton Bashollin në Korcë. Nëse bëni një kërkim në arkivë do t’iu dalin dhjetra lajme për këtë ngjarje të rëndë, ku një e re nga ky qytet e ka denoncuar pas dhunimit seksual, dhe ndaj tij ka filluar procedimi.

Sot është doganier i Edi Ramës dhe Ilir Metës, gjë që e tregon edhe ai vetë në Facebookun e tij.

Po me një të arrestuar në Korcë, në korrik të vitit 2011, për falsifikim pasaportash, për paisje me këtë dokument të personave që kishin probleme me drejtësinë në vendet e BE-së, çfarë mund të ndodhë?

Me Edi Ramën dhe Ilir Metën, ai bëhet specialist i IT-së, në Drejtorinë e Tatimeve të Korcës.

Relis Mulla u arrestua dhe ndaj tij nisi procesi hetimor në korrik të vitit 2011, pasi kishte prodhuar dhjetra pasaporta përmes falsifikimit të të dhënave, për persona me precedentë në Europë. Në atë kohë, Mullai punonte pranë kompanisë Aleat që prodhonte pasaportat.

Arkiva është e pasur me lajme për këtë ngjarje të rëndë.

Sot, falsifikatori i pasaportave është specialist i IT, në zyrën e Tatimeve, pikërisht ay ku janë të dhënat konfidenciale të qytetarëve dhe bizneseve.

Ky është modeli që kanë instaluar në administratën publike dhe në postet kyçe Edi Rama dhe Ilir Meta. Përdhunues e falsifikatorë në punët më të kërkuara. Aty ku i shërbejnë partisë.

Inkriminimi është skandaloz dhe tronditës. Eshtë e qartë se banditët, keqbërësit, llumi i punëve të zeza, janë kërkuar, kanë bërë kontratë me Edi Ramën dhe Ilir Metën. Dhe janë sot nëpër poste ku zhvasin e dhunojnë qytetarët e vendit.

Ndaj Edi Rama dhe Ilir Meta nuk e duan dekriminalizimin, ndaj i bëjnë rezistencë, e pengojnë atë.

Po këto raste, dhe qindra të tjera që Partia Demokratike ka denoncuar janë arsyeja madhore pse dekriminalizimi duhet bërë, pse vendi dhe qytetarët duhet të çlirohen një orë e më parë nga këta banditë të veshur me kollaro e pushtet nga Edi Rama e Ilir Meta.

Deklaratë për media e zëdhënëses së Partisë Demokratike, Oriela Nebijaj, 8 Prill 2015

Me një tender të dyshimtë, në shkelje të të gjithë kritereve teknike, vëllai i deputetit të Edi Ramës, ka arritur të fusë në dorë këtë aset të çmuar edhe pse ka një kompani të ngritur enkas, prej 2 muajsh. Ky është një rast i pastër i gërshetimit të lidhjeve kriminale me korrupsion e biznes qeveritar.

Ndërsa dekriminalizimi është kthyer në nevojë jetike dhe në urgjencë kombëtare, Edi Rama, autori i inkriminimit masiv  të institucioneve e parlamentit, jo vetëm nuk po reflekton, por po bën të kundërtën, po bën edhe biznes me lidhjet e tij kriminale.

Dhënia e lagunës së Patokut, një prej pasurive kombëtare, vëllait të deputetit Armando Prenga, është padyshim thellimi i inkriminimit.

Me një tender të dyshimtë, në shkelje të të gjithë kritereve teknike, vëllai i deputetit të Edi Ramës, ka arritur të fusë në dorë këtë aset të çmuar edhe pse ka një kompani të ngritur enkas, prej 2 muajsh.

Kemi këtu dokumentat që tregojnë se kompania e vëllait të deputetit Prenga ka dalë fituese, ndonëse është krijuar vetëm dy muaj më parë.

Kështu, Armando Prenga për të cilin ka informacione për aktivitet kriminal në Itali dhe vende të tjera të Europës, me identitet të ndryshuar për shkak të problemeve me drejtësinë, po i forcon lidhjet me Edi Ramën përmes biznesit korruptiv dhe në kurriz dhe dhjetra peshkatarëve që mbanin familjet e tyre deri më sot me këtë aktivitet në Lagunën e Patokut.

Ky është një rast i pastër i gërshetimit të lidhjeve kriminale me korrupsion e biznes qeveritar.

Kjo është skema e inkriminimit në veprim dhe këtë po bën Edi Rama, me ndarje favoresh të majme me të inkiriminuarit që ka futur në administratë, në zyra, në partinë e tij e deri në parlament.

Partia Demokratike paralajmëron Edi Ramën dhe ortakët e tij se nuk do ta njohë këtë kontratë korruptive dhe do ta anullojë atë në momentin më të parë kur të marrrim përgjegjësitë për vendin.

Deklaratë e kreut të Departamentit të Sigurisë, Bashkim Shehu, 7 Prill 2015