Blog

Deklaratë e deputetit Eduard Halimi, ku dënohet nxitimi i madh me të cilin mazhoranca ndryshoi dje tre ligje, për interesa klienteliste e për të kapur drejtësinë e administratën. Thirrje Partisë Socialiste për të shkëputur kontratën me krimin.

Në seancën e djeshme në Parlament, me nxitim të madh, pa konsensus, pa bashkëpunim, pa gjithpërfshirje, u ndryshuan sërish dy nga  tre ligjet që u miratuan me konsensus në maj të 2013, ligjet e nevojshme për marrjen e statusit të vendit kandidat.

1 Dje njëanshmërisht u ndryshua Ligji i Nëpunësit Civil. Ligj që u ndryshua me akt personal te Rames natën e 30 shtatorit dhe për të cilin u shpreh Gjykata Kushtetuese. U ndryshua jo për ta bërë më profesionale administraten publike dhe në sherbim të qytetareve dhe biznesit, por vetëm për ta degraduar edhe me tej situatën e rëndë në të cilën ndodhet. U ndryshua vetëm e vetëm për të lehtësuar qeverinë në spastrimet dhe hedhjen në rrugë të mijëra specialistëve dhe për ti zëvendësuar ata me njerëz që vijnë nga jashtë sistemit në masën 15%, duke hapur dyert dhe dritaret për miltantet dhe njerëzit që u investuan me kryeministrin në zgjedhjet politike, sipas kontrates që beri me ta.

2.      Dje, u ndryshua dhe Ligji për Reformën Territoriale, pa asnjë konsesus dhe pa pyetur asnjë nga qytetaret e asaj zone, jo me qëllimin për të permirësuar variantin e mëparshëm, por për ta bërë atë edhe me klientelist se sa ishte më parë.

3 Po dje, po njëanshmërisht u ndryshua edhe  Ligji për Gjykatën e Lartë, pa asnjë konsultim, pa asnjë diskutim dhe pa asnjë përfshirje të partnerëve ndërkombëtarë, sic u ra dakort në tryezën e përbashkët të 6 Tetorit për Reformën në Drejtësi.

Për Partinë Demokratike kjo është rruga e gabuar, nuk është rruga e konsesusit dhe bashkëpunimit. Kjo është rruga e gabuar e reformave në vend dhe asaj të drejtësisë në vecanti.

Kjo është rruga e kontrollit të sistemit të drejtësisë.

Kryeministri i vendit, ashtu si të gjithe shqiptarët e njohin, ka një kontratë me krimin e organizuar në vend. Dhe është krimi i organizuar që kërkon kontrollin e sistemit të drejtesisë, është krimi i organizuar që kërkon kontrollin e cdo vendi pune në administratë, dogana, tatime, pika të kalimit kufitar.

Partia Demokratike i bën thirje edhe njëherë sot Partise Socilaliste: Mos e degradoni Shqipërinë deri në këtë pikë. Mos e degradoni sistemin e drejtësisë, dhe administratën publike deri në këtë pikë.

Te ndaleni ne kapjen  e sistemit te drejtesise, ne kapjen dhe degradimin e administrates publike.

Te ndaheni nga kontrata që Kryeministri ka bërë me krimin e organizuar.

Ti dalim zot vendit për ta cliruar nga krimi i organizuar që ka kapur politikën e kërkon të kapë drejtësinë e administratën.

Kjo që po bëni është rruga e gabuar, rrugë e cila ka vetëm një fund.

Prononcim i Kryetarit të PD pas takimit me Raporterin për Shqipërinë në Parlamentin Europian z.Knut Fleckenstein

“E kam nënvizuar që prej shtatorit se opozita kërkon të jetë në Kuvend, por në një Kuvend që funksionon sipas ligjit dhe Kushtetutës, që nuk i shkel dhe nuk i nëpërkëmb ato; në një kuvend i cili përfaqëson interesat e qytetarëve shqiptarë dhe jo interesat e grupeve kriminale.

Procesi që sapo ka nisur është një proces komunikimi. Mendoj se i vlen rezultatit që presim jo vetëm ne si opozitë, por edhe qytetarët shqiptarë: një parlament mirëfunksional ku përfaqësohen interesat e tyre, ku flitet për interesat e tyre, ku zbatohet dhe respektohet Kushtetuta dhe Rregullorja e Parlamentit, ligjet, e ku fjala e lirë nuk kërcënohet dhe as nuk dhunohet nga përfaqësues të krimit të organizuar”.

Dekriminalizimi i Kuvendit dhe rikthimi i jetës parlamentare në binarët e Kushtetutës, ligjshmërisë dhe frymës së konsensusit për reformat madhore janë vendimtare për demokracinë dhe integrimin europian të Shqipërisë

Kryetari i Partisë Demokratike, Lulzim Basha, priti sot Eurodeputetin Knut Fleckenstein, Raporter për Shqipërinë në Parlamentin Europian dhe një nga dy të ngarkuarit e Parlamentit Europian për të ndihmuar në kapërcimin e krizës politike parlamentare në vendin tonë. 

Zoti Basha e falenderoi zotin Fleckenstein për përpjekjet e tij dhe për rolin pozitiv e ndihmën konkrete që ai dhe Eduard Kukan po japin në misionin e ngarkuar  për zgjidhjen e krizës parlamentare në vend.

Qytetarët shqiptarë dhe opozita nuk mund të pajtohen as me përdorimin e një grupi të strukturuar deputetësh me rekorde të krimit të organizuar, për të dhunuar, kërcënuar dhe shuar fjalën e lirë të opozitës në Kuvend dhe as me eliminimin e instrumentave të mbikqyrjes parlamentare  nga mazhoranca përmes shkeljes flagrante të Kushtetutës, ligjeve dhe vendimeve të Gjykatës Kushtetuese, theksoi zoti Basha. Dekriminalizimi i Parlamentit nuk është bamirësi ndaj opozitës, por domosdoshmëri për Shqipërinë, për interesat e qytetarëve shqiptarë dhe për rikthimin e jetës parlamentare.

Opozita përshëndet dhe mirëpret angazhimin dhe asistencën e Parlamentit Europian dhe institucioneve të tjera të Bashkimit Europian për një marrëveshje politike shumicë-opozitë që do ti hapë rrugë dekriminalizimit të Kuvendit dhe rikthimit të jetës parlamentare në binarët e Kushtetutës, ligjshmërisë dhe frymës së konsensusit për reformat madhore, janë vendimtare për demokracinë dhe integrimin europian të Shqipërisë, theksoi kryetari i Partisë Demokratike.

Qindra banorë dalin në shesh dhe kërkojnë që zëri i tyre të dëgjohet nga qeveria. Partia Demokratike mbështet kërkesat e qytetarëve që po vuajnë nga gjendja shumë e rënduar ekonomike, nga arbitrariteti i qeverisë me energjinë elektrike dhe nga dhuna e policies.

Qindra banorë të qytetit të Tropojës kanë protestuar për gjëndjen e vështirë ekonomike, për ndërprerjen arbitrare të energjisë elektrike, për dhunën e policisë, për varfërinë e thellë dhe mungesën e vëmendjes nga qeveria. Protestën e qytetarëve e ka mbështetur Partia Demokratike. Kryetari i për Tropojën, Xhevdet Hoxha tha se shqetësimet e banorëve janë të drejta, dhe kërkoi që zëri I tyre të dëgjohet nga autoritetet.

“Ka 7 muaj që më është bllokur pensioni që e marr prej 21 vitesh. Kam shkuar dy herë tek Instituti i Sigurimeve në Tiranë. Më thanë po të jesh tropojan më mirë mos më dil para”, u shpreh një qytetar.

 “Kam një dyqan me qera. Më shkëputen dritat dhe më vunë një sahat. E kanë zvarrit 40 ditë pa vënë sahatin dhe kemi qënë pa drita. Kam paguar edhe 400 mijë lekë”, ankohet një qytetar që po vuan mungesën e energjisë elektrike.

 “I bëjmë thirrje këtij populli, të madh e të vogël, të çohen në këmbë dhe ta mposhtin këtë klikë të paparë ndonjëherë kundër popullit të vetë”, apelon një banor i Tropojës.

 “Edi Rama nuk i ka bërë llogaritë mirë me qytetarët dhe sidomos me qytetarët e Tropojës që po i dhunon duke i larguar nga puna, dhe duke futur edhe persona me presecedent penal. Policia e shtetit dhunon të drejtat dhe liritë themelore të njerëzve duke i mbajtur në dhomat e izolimit vetëm për një arsye sepse këta janë mbështetës së Partisë Demokratike”, tha Salianji

“Qindra familje janë larguar nga skema e ndihmës ekonomike me pretekste qesharake se ka një televizor apo një frigorifer në shtëpi. Shumë pensionistëe u është bllokuar apo heq pensioni me arsyen se gjoja do t’u verifikohet, kur ka pensionistë që kanë dalë prej 20 vitesh në pension. Asnjë investim nuk ka në Tropojë dhe e gjej momentin ti bëj thirrje Edi Ramës që të heqë zullumin nga Tropoja, të largojnë forcat e policisë. Të merret me nevojat e Tropojës, me hallet e Tropojës sepse Tropoja është në ditët më te zeza që ka kaluar ndonjëherë”, tha deputeti i Partisë Demokratike, Besnik Duzha.

Intervistë e Kryetarit të Partisë Demokratike Lulzim Basha nga Brukseli ku mori pjesë në punimet e Samitit të Partive Popullore Europiane

Pyetje: Partia Europiane Popullore ka një rol kyç tashmë në negociatat apo ndërmjetësimin mes mazhorancës dhe opozitës në Shqipëri për të zgjidhur ngërçin politik dhe çfarë ju është thënë sot?

Basha: Partia Popullore Evropiane është shprehur qartë me rezolutën e asamblesë politike dhe ka ecur një hap më përpara duke emëruar europarlamentarin Kukan si një nga dy negociatorët evropiane të cilët kanë marrë përsipër misionin e ndërmjetësimit midis opozitës dhe shumicës për një marrëveshje politike që do të mundësonte funksionimin normal të parlamentit. Do të mundësonte zbatimin e Kushtetutës, vendimet e Gjykatës Kushtetuese sot dhe të nesërmen, jo si një favor i njërës palë ndaj tjetrës, por si një detyrim për shtetin e së drejtës. Do të mundësonte procesin jetik për Shqipërinë në rrugëtimin e saj evropian, dekriminalizimin e Kuvendit dhe të institucioneve të larta publike.

Pyetje: Kemi marrë vesh në fakt nga burime të ndryshme se jeni afër arritjes së një marrëveshje dhe mesa duket palët janë dakord për të pestë pikat. Është e vertëtë?

Basha: Unë nesër do të takoj në Tiranë zotin Flekenshtajn dhe të hënën zotin Kukan. Shpresat dhe besimi im është që përmes reflektimit në përputhje me problemet kryesore që shkaktuan këtë gjendje, qe ishte përdorimi i dhunës me skenarë të mirëorganizuar në Kuvendin e Shqipërisë kundër opozitës si dhe shkelja flagrante e kushtetutës dhe vendimeve të Gjykatës Kushtetuese nga shumica, të tejkalojmë këtë situatë përmes një marrëveshje politike, do t’i hapim rrugë rikthimit të normalitetit të parlamentit të Shqipërisë.

Pyetje: Ministri i jashtëm i Sllovakisë, Lajçak, ka thënë se ai është optimist se në fakt Shqipëria mund të arrijë një marrëveshje shumë shpejt, madje është edhe një lloj dhurate ditëlindje për krishlindjet. Mund të jetë e arritshme kjo?

Basha: Unë nuk besoj në dhurata, besoj në vullnet të palëve për të kontribuar në përputhje me parimet, normat, standartet e Bashkimit Evropian për një Shqipëri evropiane e cila nis me një parlament që i bindet kushtetutës, që e zbaton atë, në një parlament të pastër nga influencat e krimit të organizuar, i denjë për përfaqësimin e qytetarëve shqiptarë. Dhe padyshim, nëse ka vullnet politik, kjo është në dorën e palëve. Në radhë të parë të shumicës që ka edhe përgjegjësinë kryesore për situatën e krijuar dhe së dyti edhe të opozitës shqiptare e cila e ka shprehur tashmë prej kohësh vullnetin për të ecur përpara.

Sekretarja për Marrdhëniet me Publikun, Grida Duma, denoncon rastin korruptiv skandaloz të agjensisë EAG, e cila mori miliona nga Agjensia për Mbrojtjen e të Drejtave të Fëmijëve, për një produkt që ishte prodhuar tashmë. Prokurimi u bë pasi EAG ishte shpallur fituese. Punonjësit u ankuan për shkeljen tek Rama, por nuk morën asnjë përgjigje.

Paraqesim sot para publikut fakte flagrante të standardit korruptiv të kësaj qeverisje.

Kompania e sapolindur EAG, e krijuar, e rritur, dhe e pasuruar me këtë qeveri nga taksat e publikut, është kapur në flagrancë në shkelje të hapur të ligjit, në shkelje të barazisë në tendera.

Parajsa financiare që EAG ka gjetur me Edi Ramën, nuk njeh asnjë kufi, asnjë procedurë, rregull, apo ligj.

Në maj të 2014 Agjensia Shtetërore për Mbrojtjen e të Drejtave të Fëmijëve, që varet nga Ministri Veliaj, ka vendosur të bëjë një prokurim i cili duhej sajuar me cfarëdo mjeti, mjaft që paratë t’i shkonin EAG.

Që paratë ti shkonin kompanisë ndërsa nuk gjendej se cfarë do të mund të justifikonte transfertën e shumës, u shpik që një nga shërbimet të ishte prodhimi i logos së re të faqes online të Agjencisë. Por fakti është se logoja e re e Agjensisë dhe web-i, ishin të prodhuara muaj më parë.

Pra agjencia, sipas fakteve, duket që i ka kaluar para  për produkte që nuk i ka ofruar fare EAG.

Funksionarë dhe punonjës të Agjensisë e kanë kuptuar se gjenden para një shkeljeje të rëndë ligjore, të friksuar se janë detyruar të bëhen pjesë e këtij abuzimi, i janë drejtuar Kryeministrit Rama dhe Ministrit Veliaj, ku i kanë sqaruar rrethanat korruptive.

Asnjë reagim, cështja është fshehur nga Veliaj dhe Edi Rama.

Heshtja, fshehja dhe mospërgjigjia ndaj denoncimit që i ka ardhur nga vetë punonjësit e Agjencisë, vërtetojnë bekimin e Edi Ramës ndaj kësaj afere.

Ky është një rast skandaloz i korrupsionit të pastër, e vjedhjes më të dy duart të taksave të qytetarëve të vendit.

Ky është realiteti në Shqipëri sot.

Edi Rama ka licensuar një mekanizëm korruptiv për ministrin e tij, e për stafin e tij të ngushtë që zotërojnë kompaninë në fjalë.

Del dhe bën propaganda, keqpërdor një grua zëvendësministre për 12 mijë lekë të vjetra të papaguara, nga ana tjetër me lejen e tij, një kompani disa mujore pasurohet pareshtur me fonde publike.

Në këtë mënyrë, me këtë skemë të pastër korrupsioni, EAG ka marrë deri tani nga dhjetra zyra qeveritare, 520 milionë lekë.

Ja pra kush është standardi, mënyra, shëmbëlltyra e kësaj qeveria.

E keqja po lëshon metastaza dhe korrupsioni qeveritar po bën kërdinë.

Po qytetarët nuk do të pajtohen.

Janë ngritur dhe do të ngrihen qytetarët për ta ndalur këtë babëzi të pashembullt.

Zëdhënësja Nebijaj denoncon keqpërdorimin që kryeministri po i bën rastit të gruas zëvendësministre për propagandë. Kjo nuk e shpëton Ramën nga abuzimet e tij me 600 milionë euro me aferën CEZ, nga emërimi në OSHEE i vjedhësve të energjisë, nga rritja që po i bën cmimit për 75 përqind të shqiptarëve, dhe nga caktimi në krye të operatorit të personit nën hetim për shkelje në tendera

Nuk gjen dot asnjë thes Edi Rama që të mbulojë zullumet që ka bërë me energjinë.

Po keqpërdor rastin e një zëvendësministreje debitore, për të bërë propagandë, por nuk ngjit kjo askund, tek askush.

Nuk ngjit se mbarë opinioni publik e di se Edi Rama i fali kompanisë CEZ me një aferë të pastër korruptive e kundër interesave të shqiptarëve, 600 milionë euro.

Solli në krye të OSHEE hajdutët më të mëdhenj të energjisë dhe persona me precedent penalë.

Po gjobit me fatura abuzive mijëra familjarë.

Po rrit cmimin e energjisë elektrike për më shumë se 75 përqind të qytetarëve, pikërisht ata që kanë më pak mundësi të paguajnë.

Ka vënë drejtor të përgjithshëm, njeriun e tij, i cili po hetohet për një seri abuzimesh që ka bërë me fondet publike, për një dyzinë tenderash kur ishte në Bashkinë e Durrësit.

Ja ku është dosja që Kontrolli i Lartë i Shtetit ka dërguar në prokurori për një nga rastet. Shkelje të barazisë në tendera, dhe është bërë kallëzim penal ndaj tij.

Kështu që, fletërrufetë e tij dhe lincimi publik që po i bën një gruaje zëvendësministre nuk e ndihmojnë aspak të fshihet pas gishtit.

Edi Rama është i identifikuar në sytë e  gjithë qytetarëve si abuzuesi më i madh me energjinë, bashkë me cirakët e tij, hajdutë të pashembullt.

Deklaratë e deputetit Alban Zeneli, mbi përkeqësimin e përditshëm të rendit dhe sigurisë publike. Kur policia është e zënë me porositë e shefit të madh; maskat lulëzojnë, vrasjet shtohen, nxënësit shkojnë me armë në shkollë, aksidentet rriten, konfliktet thellohen e zgjidhen me armë mes qytetarëve.

Krimi po konfirmon cdo ditë me të madhe se po fiton terren.

Kur Partia Demokratike shpreh shqetësimin për situatën e përkeqësuar të rendit dhe sigurisë publike, Edi Rama nxjerr zëdhënësin dhe sulmon opozitën.

Por duhen vetëm pak orë që krimi të tregojë se po e vendos ai rendin, dhe vetëm pak orë për të kuptuar se sa mjeran është reagimi i Edi Ramës.

Reagimi i Edi Ramës duhej të ishte kthimi i Policisë së Shtetit në detyrë. Fokusimi i saj tek rendi dhe siguria publike, tek lufta 24 orëshe ndaj grabitësve, ndaj personave me rrezikshmëri shoqërore, ndaj konflikteve që lënë pas viktima.

Policia duhet të tregojë këtë përkushtim me gjithë instrumentat që ka.

Por në realitet, policia po urdhërohet të tregojë forcë kundër qytetarëve të pamundur, kundër pronave të ligjshme, kundër të varfërve që nuk kanë mundësi të paguajnë energjinë.

Kur policia është e zënë me porositë e shefit të madh; maskat lulëzojnë, vrasjet shtohen, nxënësit shkojnë me armë në shkollë, aksidentet rriten, konfliktet thellohen e zgjidhen me armë mes qytetarëve.

Kjo është situata dramatike që po përjetojnë qytetarët e vendit sot.

Partia Demokratike e denoncon me forcë lënien e rendit në qorrsokak.

Ne nuk mund ta lejojmë Edi Ramën të thellojë kursin e tij të papërgjegjshëm, që po sjell pasiguri për jetën.

Eshtë detyra e parë dhe me e rendësishme e cdo qeverie.

Eshte pika e parë e kontratës.

Braktisja e kësaj detyre, është braktisja e qytetarit.

Deputeti Halimi theksoi se Partia Demokratike nuk do ta njohë hartën e interesave politike e klienteliste. Rama dhe Meta shkelën vazhdimisht Kushtetutën dhe vendimet e Gjykatës Kushtetuese për të mbuluar zullumin e korrupsionit e inkriminimit. 

Bashkëkryetari i një shumice të krijuar jo me votat e lira të qytetarëve shqiptarë, por me mandate të trafikuara dhe pazare të pista pas zgjedhjeve, që ka në përbërje deputetë të dënuar dhe në kërkim për trafik ndërkombëtar droge dhe qëniesh njerëezore, deklaroi pak orë më parë se qenkësh partizan i vendimeve të Gjykatës Kushtetuese;  se harta teritoriale nuk qenkësh politike, e qenka në favor të qytetarëve dhe se opozitës dhe popullit opozitar i janë njohur  të drejtat për t’u dëgjuar dhe për të marrë pjesë në këtë proces.

Janë vendimet e Gjykatës Kushtetuese që janë bllokuar nga Rama dhe Meta jo për një ditë, as për dy, por për 6 muaj me qëllimin e vetëm për të fshehur sa është e mundur para qytetarëve, llumin në të cilën zhytet çdo ditë e më tepër mazhoranca e votave të blera, e deputetëve të trafikuar dhe deputetëve trafikantë; llumin në të cilën ndodhet administrata qendrore e emëruar personalisht nga dy bashkëkryetarët, administratë që është kthyer në folenë e korrupsionit dhe favoreve seksuale duke degraduar gjithë administratën e shtetit e duke e kthyer nga në shërbim të qytetarëve, në shërbim të shefave të korrupsionit.

Ata që urdhëruan bllokimin e vendimeve e Gjykatës Kushtetuese, për të fshehur llumin ku është zhytur parlamenti me deputetë të inkrimuar dhe familjare të tyre pjesë të mafias ndërkombëtare dhe trafikut ndërkombëtar, sot dolën për të folur për Kushtetutën dhe hartën politike të bashkëfirmosur si një hartë e interesave të errëta të Edi  Ramës, Ilir Metës dhe  kujtdo tjetër  që u përfshi në këtë farsë.

Një hartë që nuk do t’u ofrojë qytetarëve asgjë të mirë për modernizimin e shërbimeve. Një përpjekje brutale për të shtrirë dhe unifikuar pushtetin oligarkik të qeverisjes së sotme qendrore me qeverisjen e ardhshme vendore e për ta shndruar pushtetin vendor, ashtu siç kanë shndruar e po shndrojnë çdo ditë pushtetin qendror, me llumin e njerëzve të krimit, të mafias dhe një administrate të korruptuar.

Ajo që bashkëkryetari e etiketoi sot si proces me opozitës është dhe mbetet një farsë që nuk ka lidhje me të vërtetën.

E nisën pa opozitën dhe e përfunduan pa opozitën, siç nuk ka ndodhur kurrë gjatë këtyre njëzet e tre viteve  pa gjithëpërfshirje, pa konsensusin politik dhe qytetar.

E nisën gjoja me konsultime me komunitetet vendore por thirren vetëm të bindurit e klanit dhe injoruan zërat e arsyeve kundër.

E nisën dhe e mbyllen duke i sfiduar hapur miqtë dhe aleatët me pazaret e ulta deri kriminale, që bënë në një parlament ku bota e krimit përcakton shumicën dhe ka çelësat e vendimarrjes.

Organizuam tri konferenca kombëtare dhe kemi konkluduar me një rezolutë në të cilën kemi përbledhur paketën e propozimeve tona për reformën administrative-territoriale.

Rama dhe Meta nuk e dhanë kurrë konsensusin në Kuvend për këtë çështje por u investuan fuqishëm në një mënyrë mafioze të vepruari për të instaluar përfundimisht politikën e konfliktualitetit, që ka goditur në themel bashkëjetesën demokratike në Shqipëri.

Demokracia shqiptare sot është në udhëkryq. Por që kemi bindjen se nuk do të mbetet, nuk do të qëndrojë, nuk do të zgjasë si e tillë.

Harta politike e dyshes Rama-Meta është e papranueshme dhe nuk do të pranohet kurrë.

Fjala e fundit është e qytetarëve, është e sovranit që ka gjithë të drejtën të ngrejnë gishtin e akuzës ndaj qeverisë oligarkike që refuzoi t’i pyeste, që kanë të gjithë të drejtën të shprehen dhe të vendosin zbatimin e drejtpërdrejtë të Kushtetutës si  ligji suprem i pushtetit të popullit, që kanë gjithë të drejtën të vendosin me një demokraci direkte dhe të drejpërdrejtë.

Ne do të jemi me ta dhe përkrah tyre në çdo hap dhe në çdo ditë.