Blog

Drejtuesi i Departamentit të Mjedisit dhe Pyjeve në Partinë Demokratike, Jamarbër Malltezi denoncon skemën korruptive. Kompania ALB-Garden, mori 75% të fondeve. Rama-Meta caktuan djalin e donatorit të fushatës në krye të tenderimit në Ministrinë e Mjedisit

Sot jemi këtu për të treguar një rekord Gines që ka shënuar dyshja Rama-Meta, duke caktuar në krye të tenderave te pyllëzimit në Ministrinë e Mjedisit, një person, i cili i jep babait të tij plot 1.2 milionë dollarë ose 75% të fondit vjetor.

I gjithë fondi vjetor për pyllëzimin prej 1.6 milionë USD, u nda mes dy firmave zyrtarisht sponsorizuese të dyshes Rama-Meta.

Buletini zyrtar tregon se ALB-Garden, me përfaqësues z.Pjetër Trashaj, ka perlarë 1.2 milionë dollarë nga kjo Ministri, pra 75% të të gjithë fondit. Organizuesi i dokumentacionit teknik të tenderave në Ministri është i biri i pronarit që fiton tenderat dhe përjashton të tjerët.

Pas ardhjes në pushtet, Rama-Meta gjetën mënyrën më të drejtpërdrejtë për të shpërblyer donatoren e saj. I caktuan të birin shef në Ministrinë e Mjedisit, dhe ai i tenderon babait të tij herë pas here miliona nga taksat e qytetarëve të vendit. Deri më sot, plot 1.2 milionë dollarë.

Ky është shembull i sistemit korruptiv dhe shëmbëlltyra e oligarkisë që ka ngritur Rama-Meta.

Abuzim, përfitim, korrupsion, në format dhe madhësitë më ulëritëse.

Teksa qytetaret vuajnë në papunësi, mjerim, errësirë dhe kërcënohen burg, oligarkët ndajnë milionat me klientët e tyre dhe këto miliona ju duken gogla.

Zëdhënësja Nebijaj denoncon deformimin e përmbajtjes së bisedës së Ramës me Kryetarin e PPE, cka e detyroi z.Weber të përgenjështrojë deklaratat e qeverisë. Gënjeshtra mjerane, kauza e opozitës është e drejtë dhe ka mbështetjen e Europës

Abuzimi dhe mashtrimi publik si tipar i Edi Ramës, u shfaq edhe me përpjekjen e tij për të deformuar deklaratat e kryetarit të PPE, zotit Weber.

Një akt skandaloz e i paprecedentë, kur një kryeministër përmes zëdhënësit të tij tashmë të cerfifikuar si shpifës, shtrembëron, manipulon një bisedë, duke u rrekur të ndërtojë një realitet që nuk ekziston.

Kjo e ka detyruar z.Weber të përgenjështrojë publikisht deklarimet e rreme të zëdhënësit të Ramës.

Manipulimet e Ramës në funksion të propagandës së tij, janë tregues i politikës aspak serioze dhe i amatorizmit në ndërtimin e raporteve me partnerët tanë të rëndësishëm europianë.

Edi Rama po bën gjithcka, deri tek deformimi dashakeq i përmbajtjes së bisedave me zyrtarët e lartë europianë, për të bërë të duket ndryshe, atë që nuk mund të duket ndryshe.

Inkrimimimi i politikës dhe parlamentit është i papranueshëm për Europën.

Dhunimi i fjalës së lirë të opozitës në parlament nga deputetët e inkriminuar është i papranueshëm për Europën.

Moslejimi i opozitës për të ushtruar të drejtat e saj kushtetuese, është i papranueshëm për Europën.

Shkelja e Kushtetutës dhe moszbatimi i vendimeve të gjykatave janë të papranueshme për Europën.

Këto janë të vërtetat e mëdha, që e bëjnë kauzën e opozitës të drejtë, dhe e bëjnë mjerane përpjekjen e Edi Ramës me manipulime deklaratash përmes papagallit të tij Balla.

Mesazhi i kryetarit të Partisë  Demokratike në 24 vjetorin e themelimit: Liria dhe përgjegjësia, gjeneza jonë dhe rruga e Shqipërisë europiane 

Të dashur demokrate dhe demokratë,

Të nderuar deputetë të Partisë Demokratike dhe opozitës, drejtues të Partisë Demokratike dhe pushtetit vendor,

Shkëlqësi ambasadorë, përfaqësues të trupit diplomatik,

Të nderuar përfaqësues të medias, përfaqësues të besimeve fetare,

Miq dhe të  ftuar,

Zonja dhe zotërinj,

Jemi mbledhur sot për të kremtuar një ngjarje madhore në historinë e Shqipërisë – themelimin e Partisë Demokratike të Shqipërisë.

24 vjet më pare, ne shqiptarët bashkë me Partinë Demokratike nisëm procesin e pakthyeshëm të Shqipërisë së lirë, demokratike dhe europiane. Ne u ndamë nga e kaluara e hidhur, nga diktatorët dhe ideologjitë e së keqes. Fituam të drejtat tona dhe e futëm Shqipërinë në rrugën e kombeve të lira. Sot është rasti të kujtojmë me krenari se jemi pjesë e kësaj trashëgimie, se i kemi rrënjet tona në mobilizimin më të madh të lirisë dhe ndryshimeve demokratike në historinë e kombit shqiptar

Me gjithë zemër i uroj jo vetëm demokratëve por gjithë shqiptarëve: Gëzuar 24 vjetorinë e lirisë, gëzuar themelimin e Partisë Demokratike. Gëzuar në veçanti, të dashur demokrate dhe demokratë në mbarë vendin, ju që jeni ekzistenca, jeta, trupi dhe shpirti i kësaj partie. Gëzuar të dashur simpatizantë dhe qytetarë të lirë të vendit që ndani ndër vite fatin tuaj, arritjet dhe shpresat e jetës tuaj me vlerat dhe misionin e Partisë Demokratike.

Si çdo komb që respekton historinë, edhe ne i kthehemi rrënjëve të lirisë tonë si një burim i pashtershëm vlerash, forcë dhe frymëzimi. Ne kujtojmë ato tre ngjarje të shënuara të dhjetorit 1990, sepse janë të lidhura në një trinitet, siç lidhen dielli, rrezja dhe drita.

• Me 8 dhjetor shpërtheu Lëvizja Studentore;

• Me 11 dhjetor lëvizja mori përmasa popullore dhe imponoi pluralizmin politik;

• Po atë mbrëmje, duke u gdhirë 12 dhjetor, shqiptarët themeluan dhe shpallën partinë e parë politike të tipit perëndimor, me një program thellësisht demokratik dhe pro europian.

Në lidhjen e tyre organike secila prej tri ngjarjeve madhore ka veçorinë e saj.

• Lëvizja studentore me idealizmin dhe kurajon e saj mposhti frikën dhe krijoi një lidhje të fuqishme me qytetarët dhe intelektualët e Tiranës.

• Pluralizmi i diktuar nga ky bashkim krijoi gjithëpërfshirjen dhe izoloi nomenklaturën komuniste që sundonte për afro gjysëm shekulli.

• Krijimi i menjëhershëm i Partisë Demokratike jetësoi pluralizmin e vërtetë dhe i mbylli dyert manipulimeve të regjimit për një pluralizëm fasadë.

Studentët dhe intelektualët vendosën menjëherë në mbrëmjen e shpalljes së pluralizmit për krijimin e një partie të madhe popullore, për krijimin e Partisë Demokratike. Ky ishte një moment që ndryshoi rrjedhën e historisë. Partia Demokratike u bë zëdhënësja e revoltës popullore antikomuniste.

Në një kohë rekord themeluesit hartuan programin e parë, programin e lirisë që ngritën peshë një popull të marrë peng nga shtypja dhe dogmat. Pa mjete, pa financa, pa përvojën dhe literaturën e nevojshme demokratike, mes shumë veshtirësish dhe pengesash, themeluesit ndezën pishtarin e demokracisë në mbarë Shqipërinë. Ata u përballën me partinë-shtet dhe me shtetin policor, vranë frikën me guximin e tyre.  Këta heronj të gjallë të  demokracisë organizuan brenda një kohë të shkurtër një parti politike nga njëri cep i vendit në tjetrin, ndërtuan alternativën e parë perendimore të Shqipërisë dhe e udhëhoqën me mençuri atë drejt suksesit.

Ne kthehemi çdo vit për ta ritreguar këtë histori dhe nuk biem kurrë në përsëritje. Kështu ndodh  gjithmonë  me  gjenezën e  një  rilindje të vërtetë, që është provuar e tillë në dritën e produktit  të saj. Ajo nuk konsumohet kurrë, jeton në nderimin e brezave, udhëton me ta, udhëton me ne.  Kjo është gjeneza e Partisë Demokratike.

Duke u kthyer në ato ditë dhe muaj të fillimit, ne konstatojmë  me krenari se Partia Demokratike përcaktoi lirinë  si substancë  të antikomunizmit.

• Partia Demokratike lindi si parti e lirisë dhe atdhetarisë.

• Partia Demokratike përqafoi përgjegjësinë politike e qytetare në vend të aventurizmit politik;

• Partia Demokratike zgjodhi tolerancën në vend të luftës së re të klasave,  zgjodhi gjithëpërfshirjen në vend të diferencimit idelogjik, krahinor apo fetar, zgjodhi dashurinë në vend të urrejtjes.

Partia Demokratike u rrit duke luftuar  për këto  vlera. Ajo u ngrit si forcë e kalimit paqësor të vendit në demokraci ndonëse përballej me diktaturën me të egër të Europës.

Këto janë vlerat e ADN-së sonë, e identitetit tonë si forcë politike. Studentët, intelektualët, themeluesit dhe nismëtarët e Partisë Demokratike nga qendra në bazë i nxorrën nga shpirti i tyre liridashës, i përftuan në përballjet epike me rregjimin e kohës, madje edhe në përballjet për diversitetin e mendimeve  brenda llojit. Me këto vlera  dhe  përmes tyre fitoi demokracia, fitoi Shqipëria. Me këto vlera dhe përmes tyre Partia Demokratike lindi e madhe dhe mbeti e madhe.

Kundërshtarët tanë politikë të së majtës dhe veglat e tyre janë përpjekur gjithmonë të përbaltin përmes mashtrimit këtë pasuri kombëtare. E kanë kot. E vërteta e Lëvizjes  Studentore, sikurse ajo e themelimit të Partisë Demokratike të Shqipërisë është  shkruar në arenë, me akte, me vepra, me vlera, me arritje që vendi dhe shoqëria shqiptare nuk i kishin njohur kurrë më pare dhe sot i nderojnë me respekt.

Këto ngjarje do të mbesin monumente të kurajos civile dhe  ndërgjegjes demokratike shqiptare.

Në çdo përvjetor historia kërkon heronjtë e saj. Me nderim dhe mirënjohje të thellë kujtojmë sonte ata që nuk i kemi më midis nesh:

• Azemin të parin,  prisjësin dhe heroin e Lëvizjes Studentore,  themeluesin dhe  drejtuesin e lartë të Partisë Demokratike;

• Kujtojmë  dhe nderojmë tre themelues të tjerë, anëtarë të kryesisë së parë të PD-së, Gramoz Pashkon, Pjetër Arbnorin dhe Ali Spahinë;

• Kujtojmë me dhimbje akoma të freskët më të fundit e këtij panteoni politik Sokol Olldashin dhe Ferdinand Ponen.

Emra të tjerë demokratësh që nuk jetojnë më, kalojnë në këtë çast në mendjen e secilit prej nesh. Nderim  dhe mirënjohje për të
gjithë. Janë ndarë nga jeta, por nuk janë ndarë prej nesh. Na mungojnë fizikisht, por na frymëzojnë të gjithëve me shembullin e  tyre, na japim kurajo dhe besim për të shkuar përpara.

Duke kujtuar protagonizmin konstant të Partisë Demokratike në të gjitha ngjarjet  e mëdha të të demokracisë, nderimi dhe mirënjohja ime u drejtohet sonte gjithë demokratëve, nga i pari tek i fundit, nga ai dhjetorit të vitit 1990 tek ai i dhjetorit të vitit 2014. Ne të gjithë bashkë, jemi familja e madhe demokrate në shtëpinë e madhe të lirisë, që ka bërë histori  e do të vazhdojë të bëjë histori pozitive vlerash në këtë vend.

Kemi fatin të kemi mes nesh shumë prej themeluesve të orës dhe vijës së parë, protagonistë të ndryshimit dhe udhëtimit europianoperendimor të Shqipërisë të këtyre viteve. Nderim dhe mirënjohje në radhë të parë për liderin historik të Partisë, Sali Berishën, i cili më shumë se askush ka meritën historike që e mbajti të madhe dhe të fortë Partinë Demokratike, e mbajti alternativë në ditë të mira dhe në ditë të këqija. Me Doktor Berishën dhe themeluesit e tjerë të spikatur, Partia Demokratike është më e fortë, më e bashkuar, më e urtë dhe më e mençur. Themeluesit, qëndrestarët, vazhduesit dhe të rinjtë janë një trup i vetëm politik, janë pjesë e së tërës që nuk bëjnë dot pa njëra tjetrën. Kjo është Partia Demokratike.

Me këtë trashëgimi të vyer ne po rindërtojmë forcën tonë politike. Një vit me parë:

• Ne folëm  për sfidat  e  ringritjes përmes analizave realiste dhe zgjedhjeve të lira në parti.

• Ne folëm për reflektim dhe korigjim, për bashkim dhe ribashkim, për hapje dhe përtëritje.

• Ne folëm për shndërrimin e Partisë Demokratike në shtëpi të madhe të lirisë.

• Ne folëm për gjenerimin e demokracisë pjesëmarrëse, mbështetur tek  parimet e konsultimit,  transparencës dhe llogaridhënies të përhershme para qytetarëve dhe em qytetarët shqiptarë.

• Ne folëm për konsolidimin e një opozitë të fortë dhe ballore, të mbështetur në fakte, argumente dhe sigurisht në  doktrinën  tonë politike si forcë e qendrës së djathtë.

Sonte, një vit më pas, ringritja e Partisë Demokratik është një realitet. Zgjedhjet e reja,  bashkimi, hapja dhe përtëritja janë në një proces dinamik i pandalshëm.

 “Partia Demokratike- Shtëpi e Lirisë”, nuk është një sllogan por një realitet. Demokracia pjesëmarrëse është bërë një alternativë e prekshme për ata që kanë më shumë nevojë më shumë se kushdo tjetër, për qytetarët. Takimet dhe bashkëbisedimet tona të hapura me ta, me konsultimet me grupet e interesit, propozimet tona politike dhe protestat masive popullore që kemi drejtuar janë pasqyrimi i zërit të Shqipërisë së vërtetë.

Opozitarizmi ynë ndaj qeverisë ka venë në fokus çështje madhore që lidhen:

• me shkeljen flagrante të kontratës me zgjedhesit nga kjo qeveri;

• me dhunimin e shtetit ligjor,

• me minimin e themeleve të demokracisë;

• me kriminalizimin e Kuvendit të Shqipërisë, politikës dhe administratës së lartë shtetërore;

• me përkeqësimin e thellë të gjendjes ekonomike  dhe shoqërore të qytetarëve.

Dekriminalizmi i Kuvendit është për ne kushti i domosdoshëm për funksionimin e tij si një institucion i fjalës së lirë, i debateve të shendetshme dhe dialogut të nevojshëm në të mirë të vendit. Kemi sakrifikuar e po sakrifikojmë për këtë objektiv jetik për demokracinë- kemi ndëprerë marrëdhëniet me Kuvendin – një masë inekstremis për një virtyt inekstremis,  por jemi të vetëdijshëm se qytetarët shqiptarë pa përjashtim e çmojnë, madje edhe vetë kundërshtaërt tanë politikë do ta çmojnë lart vlerën e betejës tonë kur partitë të vendosin bashkarisht flakjen e mekanizmit që promovon trafikantë  dhe kontigjentë të krimit të organizuar në Kuvendin e Shqipërisë. Shpresojmë se kjo ditë nuk është larg.

Bashkë  me 24 vjetorin e themelimit të Partisë Demokratike, ne kremtojmë edhe Nisjen e Re që ishte deviza jonë politike e këtij viti. Nisja e re po maturohet dhe do vazhdojë pa u ndalur. Ne përfaqësojmë të ardhmen e këtij vendi dhe shqiptarët presin shumë prej nesh.

Bashkimi, rinovimi, demokracia pjesmarrëse nuk janë një proces i mbaruar por një rrugëtim i përhershëm. Ndonëse ndihemi më të bashkuar se kurrë në historinë tonë politike, kjo nuk mjafton. Bashkimi bën fuqinë dhe ky proces nuk do ndalet.

Me ketë rast, në ketë ceremoni përkujtimi dhe kremtimi, kur demokratët ndihen më të  bashkuar se asnjeherë tjetër më parë në historinë e tyre të përbashkët, unë i bëj thirrje përsëri dhe i shtrij përsëri dorën vëllazërore të pajtimit, mireseardhjes dhe respektit në shtëpinë e hapur të demokratëve cilitdo që për një arsye a tjetër mungon akoma në ribashkimin tonë apo ndihet zemërthyer për arsye që do të duhet dhe do t’i shterojmë duke punuar së bashku për qëllimin e përbashkët, për Nisjen e re, për alternativën e re, për fitoren.  Nuk ka vend për ndasi. Të bashkuar do ngremë një alternativë të re, alternativën fituese për demokratët dhe gjithë shqiptarët.

Vëllezër dhe motra, zonja dhe zotërinj.

Shqipëria po kalon momente të vështira. Shumë nga arritjet 24 vjeçare janë vënë në pikëpyetje. Shoqëria është në pragun e mbijetesës. Zëri i Shqipërisë reale na thërret. Ne e dëgjojmë dhe duhet t’i dalim zot.

Ky vend na ka thirrur gjithnjë për punë të mëdha dhe ne i jemi përgjigjur. Koha po afron sërisht. Ne po përgatitemi. Ne po hapemi, po shtrihemi në çdo familje shqiptare. Kemi nevojë të bashkohemi me këdo që ka besuar ndonjëherë apo beson sot tek Partia Demokratike. Të hapur dhe bindes edhe për më skeptikët.

Ne po përfaqësojmë sot interesat e shumicës morale dhe numerike të shqiptarëve. Ne duhet të mbrojmë të gjithë ata që ndjehen të harruar, të braktisur, të shpërfillur. Ne duhet të jemi me ata që nuk përmbushin dëshirat legjitime për një jetë më të mirë. Lidhja jonë e re duhet të kalojë kufijtë tradicionale të ndarjeve politike.

Një falenderim të zjarrtë u drejtoj sot të rinjve që kanë vërshuar në Partinë Demokratike. Ju jeni forca më e madhe lëvizëse e kësaj shoqërie. Idealizmi dhe optimizmi juaj është shpresa e ndryshimit të madh.

Në emrin tim por dhe në emrin e të rinjve demokratë ftoj sot çdo të ri të Shqipërisë të na bashkohet. Ejani në Partinë Demokratike. Merrni përgjegjësi në forcën e lirisë, të atdhetarisë, tolerancës, gjithëpërfshirjes dhe europianizmit. Ne jemi mbështetja e idealeve, shkollës, punës dhe sipërmarrjes. Ejani t’i vini shpatullat një lëvizje kombëtare që po konturohet. Ejani në lëvizjen më të madhe në histori për vlera, mirëqënie dhe Shqipëri europiane e perëndimore.

Të dashur miq,

2015 do të jetë viti i 25 vjetorit të rilindjes së madhe demokratike të Shqipërisë dhe popullit shqipta
r. Ju ftoj ta presim me dinjitetin e një vendi të lirë.

Do të jetë viti i udhëtimit  në  historinë e sakrificave dhe përpjekjeve shqiptare për liri  I ilustruar në projektin tonë “drejt lirisë”. Do të jetë viti i modernizmit të mëtëjshëm të Partisë Demokratike, viti i daljes së saj fuqishëm në pahun e kohës dhe shpresave të shqiptarëve si alternativa e re e zhvillimit dhe prosperitetit të tyre.

Ky vit i ri politik do e gjejë Partinë Demokratike më të fortë, më të organizuar, dhe më të rinuar se më parë. Ne po pergatitemi t’i prijmë përballjes së re të shqiptarëve me oligarkinë.

24 vjet më parë ne mposhtëm të keqen, dhe mund ta mposhtin kudo që shfaqet. Forca jonë qendron tek idealet dhe trashegimia që po u lëmë brezave. Jetën tonë politike duket se e ndjek si bekim dhe urdhër i shenjtë deviza: të shohim të ardhmen, ta arrijmë atë, ta bëjmë të sotme dhe trashëgimi të brezave. Kjo është Shqipëria jonë, kjo është Partia Demokratike – forca e endrrës, besimit dhe suksesit për të gjithë.

24 vite më parë ne ëndërruam një vend të lirë, e besuam dhe e bëmë. Në dy dekada Shqipëria është e lirë dhe më e begatë se kurrë më parë në histori. Por sfida dhe endrra vazhdon…

• Ne duam Shqipërinë e lirisë dhe mirëqënies për të gjithë;

• Ne duam ekonominë e fortë dhe punësim për shqiptarët;

• Ne duam një vend ku çdo shqiptar nga Jugu në Veri, nga Lindja në Perëndim realizon ëndrrën e tij;

• Ne duam Shqipërinë moderne dhe Europiane.

Ky është misioni ynë, kjo është sfida jonë si demokratë, qe me ndihmën e shqiptarëve dhe të Zotit, do ta bëjmë realitet.

Rroftë Partia Demokratike!

Zoti e bekoftë Shqipërinë!

Gëzuar!

Ridvan Bode hedh poshtë gënjeshtrat e Ramës për punësimin. Të gjitha shifrat tregojnë të kundërtën e propagandës së qeverisë. Dhjetra mijë qytetarë humbasin vendet e punës, dhe përzihen nga policia prej zyrave të punës. Mbi 300 mijë familje janë të pashpresa në kërkim të një të punësuari; më pak se 1 në çdo 3 të rinj të moshës 15-29 vjeç aktivë në tregun e punës është i punësuar; vetëm 1 në çdo dy femra kanë mundur të gjejnë një punë qoftë dhe të përkohshme.

Ditë më parë Kryeministri Rama tha një gënjeshtër të madhe, të cilën edhe oborri qeveritar e përqeshi, se, në tremujorin e tretë të këtij viti, ishin punësuar 81 mijë të papunë.

Dje nxorri tellallin e vet, INSTAT, për ta përgenjështruar kryeministrin, me një gënjeshtër të re: në tremujorin e tretë nuk janë punësuar 81 mijë, por 36 mijë vetë.

Kurse sot në Parlament, bëri avokatinë e kësaj gënjeshtre të re të INSTAT.

Realiteti, të cilit qeveria i largohet çdo ditë e më shumë, flet për të kundërtën. Dhjetra mijëra qytetarë që humbasin çdo ditë vendet e punës për shkak të ndrydhjes së ekonomisë, shkojnë në zyrat e punësimit dhe përzihen prej andej me policë.

Papunësia dhe mjerimi kanë arritur në nivelet më të larta të 20 viteve të fundit dhe qytetarët e demonstrojnë këtë çdo ditë publikisht.

Edhe pse fabrikon një gënjeshtër të re punësimesh, INSTAT është i detyruar të pranojë se :

-mbi 300 mijë familje janë të pa shpresë në kërkim të një të punësuari në familje;

-më pak se 1 në çdo 3 të rinj të moshës 15-29 vjeç aktivë në tregun e punës, është i punësuar;

-vetëm 1 në çdo dy femra kanë mundur të gjejnë një punë qoftë dhe të përkohshme;

-megjithë “sukseset” e qeverisë niveli i papunësisë është më i lartë krahasuar më një vit më parë dhe në nivelet më të larta historikisht të këtij treguesi.

Absurditeti i deklarimeve për rritje punësimi nga ana e Qeverisë dhe INSTAT qëndron në faktin se ky punësim shtesë paska ndodhur kryesisht në degët e industrisë me një rritje prej 7.8% dhe në ndërtim me 6.2%, pikërisht degët që një muaj më parë u raportuan me rënien më të thellë ekonomike respektivisht me 8 dhe 22%, dhe për më tepër kur ndërtimi mbetet tërësisht i bllokuar sipas akteve të nxjerra nga qeveria.

Hapja e vendeve të reja të punës ka nevojë për investime shtesë, ka nevojë për fonde e reforma të thella në ekonomi.

Sipas statistikave të vetë INSTAT dhe institucioneve të tjera, të dhënat flasin për ndrydhje të mëtejshme të mundësive për të mbajtur të paktën vendet ekzistuese të punës, pale për të shtuar të reja kur:

-kredia për ekonominë është më e ulët krahasuar me një vit më parë,

-fitimet e kompanive deklarohen rreth 30% më të ulëta;

-Investimet në ekonomi sipas dhomave të tregtisë janë më pak se gjysma e një viti më parë;

-BSH njofton se investimet e huaja direkte në 9 mujorin e vitit 2013 kanë qënë 32 % më të larta se këtij viti.

-investimet publike janë rreth 40% më pak;

-në çdo 4 lek të prodhuara gjatë vitit 2014, 3 lekë i ka marë qeveria përmes rritjes së taksave dhe vetëm 1 lekë i është lënë qytetarëve dhe biznesit;

Të vetmet “reforma” të ndërmarra nga qeveria për punësim dhe mirëqënie janë rritja progresive e taksave dhe rritja e çmimit të energjisë, të cilat sigurisht që pakësojnë punën dhe rrisin varfërinë.

Tashmë askush nuk ka ndonjë dyshim se gënjeshtra dhe demagogjia boshe janë të vetmet armë që kjo qeveri përdor më tepër për t’iu qasur halleve të qytetarëve të vet. Papunësia e mjerimi nuk kanë nevojë për to, dhe as për talljet e INSTAT në modelin e shpirtrave të vdekur të Gogolit për të regjistruar të punësuar të rinj. Njëlloj si Cicikovi, pakëson nxënësit e studentët me 68 mijë vetë, dhe këta i deklaron të vetëpunësuar vetëm për qëllime statistike.

Eshte qeveria, me shterpësinë e programeve të saj për shëndoshjen e ekonomisë, me pasivitetin e saj përballë rrënimit të përditshëm ekonomik, me arbitraritetin antiligjor që rrit pasigurinë ndaj qytetarëve e investitorëve, me arrogancën e saj ndaj qytetarëve, që rrit papunësinë, vërfërinë dhe mjerimin me një shpejtësi tragjike.

Lulzim Basha në kongresin e CDU me ftesë të kancelares Angela Merkel

Kryetari i Partisë Demokratike, Lulzim Basha me ftesë të kancelares Angela Merkel, mori pjesë në kongresin e 27-të CDU-së që u zhvillua në Këln. Në këtë kongres, kancelarja Merkel u rikonfirmua për të tretën herë në krye të CDU. Të ftuar në kongresin e CDU ishin liderë të partive të qendrës dhe qendrës së djathtë të BE, drejtues të PPE dhe të institucioneve të BE.

Ndërsa e ka uruar për rizgjedhjen kancelaren Merkel, z.Basha e konsideroi atë shembull frymëzimi për çdo lider që synim të punës dhe aktivitetit politik ka zhvillimin ekonomik të vendit dhe mirëqenien e qytetarëve. Z.Basha shprehu mirënjohjen për mbështetjen e madhe që kancelarja Merkel i ka dhënë Shqipërisë në rrugën e integrimit euro-atlantik dhe europian dhe në procesin e liberalizimit të vizave, ku qëndrimi i Gjermanisë ishte vendimtar për Shqipërinë.

Kryetari i Partisë Demokratike, Lulzim Basha, ka marrë mbështetjen e drejtuesve të lartë të CDU-së për përpjekjet e PD në mbrojtje të standardeve demokratike të arritura në Shqipëri.

Në takimet që kryetari i Partisë Demokratike ka pasur me drejtues të lartë të CDU,  Partisë Popullore Europiane dhe të institucioneve të BE është shprehur shqetësimi për gjendjen e demokracisë dhe shtetit ligjor në Shqipëri. Bashkëbiseduesit theksuan se cënimi i pavarësisë së institucioneve, moszbatimi i vendimeve të gjykatave dhe sjellja në kundërshtim të hapur me normat e shtetit ligjor janë të papranueshme për vendet demokratike dhe veçanërisht për vende që aspirojnë të bëhen pjesë e Bashkimit Europian. Ata shprehën mospajtimin e tyre të plotë për infiltrimin në administratë dhe në Kuvend të personave të inkriminuar, të cilët përdorën dhunën dhe kërcënimet për të sulmuar opozitën në parlament, me skenarë të orkestruar.

Z.Basha theksoi se pavarësisht krizës së rëndë parlamentare dhe të demokracisë në vend si rezultat i veprimeve të dyshes Rama-Meta, Partia Demokratike është angazhuar fuqishëm për të gjetur rrugët e rikthimit të kushtetuetshmërisë dhe normalizimit të jetës parlamentare.

Në këtë kuadër edhe në Këln bashkëbiseduesit diskutuan mbi propozimet e Partisë Demokratike për një marrëveshje politike shumicë – opozitë që do i jepte fund shkeljes së Kushtetutës, vendimeve të Gjykatës Kushtetuese dhe mohimit të  instrumenteve të mbikqyrjes parlamentare si dhe do të adresonte çështjen e mprehtë të mekanizmit që promovon krimin deri në Kuvendin e Shqipërisë.

Kryetari i Partisë Demokratike theksoi se pavarësisht përpjekjeve të opozitës, për fat të keq, dyshja Rama-Meta ka refuzuar deri tani cdo angazhim në këtë drejtim, duke pretenduar herë se nuk ka dijeni për cështjet e ngritura nga opozita e herë  se kushtet e opozitës tashmë qenkan plotësuar.

Kjo mungesë reflektimi nga drejtuesit e shumicës është një tregues i mungesës së deritanishme të vullnetit politik nga kryeministri Rama për të marrë përgjegjësinë që i takon për këtë situatë të krijuar në vend.

Nga ana tjetër, kreu i opozitës vlerësoi dhe mirëpriti angazhimin e përfaqësuesve politikë të së djathtës dhe të majtës në Parlamentin Europian, të cilët duke vlerësuar me shqetësim situatën politike në Shqipëri kanë shprehur gatishmërinë për të kontribuar në adresimin e krizës parlamentare në vend.

Intensifikimi i bashkëpunimit mes PD dhe CDU ishte temë e rëndësishme e takimeve të z.Basha me drejtues të lartë të kristian – demokratëve gjermanë. Kryetari i PD dhe drejtues të CDU dhe Fondacionit Konrad Adenauer kanë diskutuar mbi bashkëpunimin dhe mbështetjen për Partinë Demokratike dhe rolin e saj në integrimin europian të Shqipërisë. Projekte konkrete në drejtim të trajnimit dhe zgjerimit të kapaciteteve të Partisë Demokratike si dhe hartimit të një programi në funksion të alternativës fituese për Partinë Demokratike janë prioritetet e bashkëpunimit mes dy partive simotra PD dhe CDU.

Qytetarët denoncojnë abuzimet në arsim, shëndetësi, ndihmë sociale. Papunësia e korrupsioni po mbysin qytetin dhe fermerët. Drejtuesit e Partisë Demokratike do mbajnë forume në çdo qytet. 

Deputetët demokratë të komisionit të Çështjeve Sociale dhe dhe drejtues Departamentesh e Sekretariatesh të Partisë Demokratike ishin sot në Lushnjë për të analizuar dhe trajtuar krizën dhe rrënimin që ka mbërthyer këtë qytet në cdo drejtim.

Lushnja që siguron një të tretën e prodhimit bujqësor kombetar me mbi 51 mijë hektar tokë bujqësore sot lëngon nga varfëria, mjerimi social dhe bllokimi iprodhimeve bujqësore.

Deputetja Vokshi tha se u zgjodh Lushnja për rrënimin e sistemit të arsimit që kulmon me skandalin e rryshfeteve dhe favoreve sexuale te drejtoreshës se arsimit. Vokshi tha se buxheti i krizës tregoi dhe një herë fytyrën antisociale që ka qeveria e Edi Rames. Duke theksuar se vetëm protesta duhet të jetë përqasja ndaj kësaj qeverie dhe mazhorance, Vokshi u shpreh:

“Në Lushnjë punësimet bëhen me zarfin 5 mijë euro. Mësuesëve iu shkelet dinjiteti dhe disa prej tyre janë shtërnguar të përfliten për histori të ulëta, nën presionin e drejtoresha të PS-së, të punësuara në zyrat e partisë. Testi kombëtar “Mësues për Shqipërinë”, është konkursi ” Lekë për Partinë”, zyrtaret e larte te Ministrise deklaruan se nuk do te punesohen te gjithe fituesit e konkursit. Eshte e patolerushme qe intelektualet te perqafojne kete skeme korrupsioni qe jo vetem shkaterron institucionet arsimore , por shkaterron te ardhmen e Shqiperise”.

Premtimet e Kryeministrit ne Lushnje, tha deputetja Vokshi ishin me 5 fishim të prodhimit vendas dhe mbështetje për fermerët. Pushimet masive nga puna, sigurisht qe do të kenë konkurse te reja me pagesen 5 mije euro. Me korrupsionin në Europë, kjo është motoja e Kryeministrit.

Deputeti i qarkut të Fierit Kozma Dashi tha se problemet që po rëndojn jetën e shqiptarëve jane ulur këmbëkryq në çdo vatër.

Deputeti i Fierit tha se Lushnja dëshmon krizën dhe dështimin e qeverisë vecanërisht në bujqësi ku subvecionimet për fermerët dolën skema mashtrimi dhe favoret bëhen vetëm për grupet klienteliste.

Deputeti Bedri Mihja u përqëndrua tek dështimi i mjeksisë falas reformë e cila nuk mund të realizohet kurrë në një fushë që nuk sjell të ardhura por vetëm kosto. Sipas deputetit Mihja falas duhet të ishte bujqësia me heqjet e kostove të lesticideve karburante dhe veglave, nisma që do sillnin rritje të prodhimit dhe të ardhura për fermerët.

Drejtuesi i departamentit te sigurise dhe rendit Bashkim Shehu tha se dhe në Lushnje po kryhet terror policor ndaj popullsisë ne emër të vendosjes së ligjit dhe pagesës së faturave afrofe të energjisë. Ai ftoi qytetarët të dëshmojnë dhe të depozitojnë cënimin e të drejtave të njeriut.

Gjatë audiencës interaktive me deputetët demokratë dhjetra mësues mjekë e infermierë dëshmuan se janë dëbuar nga puna për motive politike ose dhe për hapje vende pune për militantë. Largimet e këtyre ekspertëve me mbi 20 vite eksperience pune ka ndodhur nga drejtues pa arsim përkatës dhe të komanduar nga selitë e PS dhe LSI.

Tronditëse ishte dëshmia e ish drejtoreshës së arsimit e cila tha se brenda një dite janë pushuar 65 drejtora që kishin emër në historinë e shkollës së qytetit. Pjesëmarrësit kërkuan nga deputetët demokratë të kërkojnë publikisht anulimin e emërimeve militante dhe me urdhëra partiake, pa konkurse dhe merita profesionale të drejtorëve të rinj dhe mësuesve nga radhët e fanatikëve PS LSI.

Deputeti Luciano Boci njëherësh shefi i departamentit të Arsimit tha se ministrja Nikolla duke cënuar rëndë ligjet me udhëzime dhe urdhëra partiakë po i bën sport arsimit dhe mësuesve fisnikë të këtij vendi. Me konkurseve fiktive pa asnjë kriter shkencor dhe profesional por vetëm filtrime partiake, Rama dhe Nikolla i detyruan mësuesit të hyjne në testime si akte denigruese për arsimtarët që janë të certifikuar dhe të arsimuar me grada.

Nevila Xhindi drejtuesja e sekretariatit të Shoqërisë civile në PD tha se duhet nxitur reagimi qytetar dhe ai i vetë nxënësve si rezistencë ndaj emërimit të të paaftëve dhe miltantëve si drejtorë gjimnazesh dhe shkollash nëntëvjecare.

Doktrina e majtë e kesaj qeverie për politika sociale ka dështuar krejtësisht, tha znj Xhindi.

Më tej të pranishmit ngritën shqetësimet e shumta në sistemin e shëndetësisë ku mungon cilësia e shërbimeve dhe nuk ka asnje ulje në cmimin e ilaceve.

Eksperti Gazmend Koduzi tha se sistemi i shëndetësisë ka dështuar ku depistimi falas është rërësisht manipulim korrupsioni. Ai tha se ka fryme terrori në mjekësi dhe mjekët nuk ndihen aspak të motivuar në misionin e tyre.

Ndër të tjera në takim u ngritën dhe cështjet e mosrritjes së pensioneve, pagave dhe mohimit të shpërblimit të fundvitit.