Blog

Deputeti Mima, i referohet raportit të “Global Petrol Prices”, burimi më prestigjioz i fushës, të dhënat e të cilit hedhin poshtë propagandën e kryeministrit. Rama gënjeu publikisht, raporti tregon se çmimi i naftës ka rënë dy herë më shumë nga sa deklaron kryeministri. Por Rama i bëhet krah tregtarëve të tij që blejnë më lirë në tregjet ndërkombëtare dhe ia shesin shumë më shtrenjtë qytetarëve tanë

Para dy ditësh Kryeministri i vendit publikoi një pikturë me ngjyra, të cilen nuk do ta komentonim nëse do të ishte thjesht një nga pikturat e tij, por meqënëse Kryeministri e quan ate një info-graf dhe mbi cdo ngjyre ka një shifer, por pa referuar burimin, detyrohemi të sqarojme publikun shqiptar mbi të vërtetën, duke iu referuar burimit prestigjoz “Global Petrol Prices”, sipas të cilit vetem në tremujorin e fundit:

1.     Ne Greqi, çmimi ka rene me 9%, dhe jo 5.3% sic deklaron Kryeministri, ose 70% më shumë

2.     Në Itali, çmimi ka rënë me 6.7%, dhe jo 4.8% sic deklaron Kryeministri, ose 40% më shumë.

3.     Në Francë, çmimi ka rënë me 7.4%, dhe jo 4% sic deklaron Kryeministri, ose 85% më shumë.

4.     Në Maqedoni, çmimi ka rënë me 10%, dhe jo 4.8% sic deklaron Kryeministri, pra mbi dy herë më shumë.

5.     Në Hollandë, çmimi ka rënë me 8.8% dhe jo 4.4% që deklaron Kryeministri, pra rënie dy herë më shumë.

Në shkalle globale, cmimet e shitjes me pakicë të diezelit, vetëm gjatë tremujorit të fundit, kanë rënë mesatarisht me 16.2%, pa përmendur këtu që vetëm në SHBA cmimi ka rënë nga 3 dollarë galloni në rreth 2 dollarë galloni, pra ka rënë rreth 50%.

Pyetja e sotme për Kryeministrin është se përse ai, duke fshehur shifrat e vërteta,  u bëhet krah klienteve të tij, të cilët e blejnë naftën në tregjet ndërkombetare shumë më lirë se një vit më parë, ndërkohë që ia shesin shqiptareve me çmime pothuajse të pandryshuara?

Me ftesë të Kancelares Gjermane Angela Merkel, Kryetari i Partisë Demokratike, Lulzim Basha po merrë pjesë në kongresin e 27-të të CDU që nis punimet sot në Keln. Zoti Basha do të takohet me drejtues të lartë të CDU-së,  partisë që prej tre mandatesh qeverisë gjermaninë dhe ka një rol të rëndësishëm në politikën e BE-së.

PD dhe CDU kanë intensifikuar bashkëpunimin mes tyre si në nivel politik ashtu dhe mes grupeve parlamentar duke ngritur dhe grupe të përbashkëta  pune për këtë qëllim. Drejtues të Grupit Parlamentar të CDU-së në Bundestag dhe përfaqësues të kësaj partie në Parlamentin Europian mes të cilëve dhe kryetari i Grupit Parlamentar të PPE-së,  kanë mbështetur fuqimisht aksionin e Partisë Demokratike për ruajtjen dhe konsolidimin e standardeve demokratike që do të përafronin më tej Shqipërinë me Bashkimin Europian dhe që janë cënuar rëndë nga mazhoranca Rama-Meta.

Zoti Basha do të ketë takime dhe me drejtues  të lartë të institucioneve të BE-së, të partive të qendrës dhe qendrës së djathta europiane si dhe të PPE-së të ftuar gjithashtu të marrin pjesë në kongresin e CDU-së që drejtohet nga Kancelarja Angela Merkel.

Partia Demokratike organizoi në Qytetin Studenti një forum të hapur me dëshmi e kujtime nga lëvizja studentore e dhjetorit ’90. Mesazhi i lirisë dhe i Shqipërisë Europiane mbetet aktual dhe një thirrje për rininë e sotme që të jetë aktive për vlerat që aspiron Shqipëria

Partia Demokratike organizoi sot një forum të hapur “Drejt Lirisë”, me rastin e 8 dhjetorit, Ditës së Rinisë, në Qytetin Studenti aty ku 24 vite më parë nisi lëvizja më e madhe për liritë e të drejtat njerëzore.

“Marshimi dhe thirrjet për liri e demokraci, gjunjëzuan regjimin e së keqës. Tirana u bashkua me lëvizjet antikomuniste të Berlinit, Pragës, Varshavës dhe Budapestit, në atë rikthim të endërruar europian. Aty bota mbarë kuptoi vokacionin perëndimor të popullit shqiptar”, u shpreh kryetari i Partisë Demokratike.

Basha tha se ne vijmë këtu çdo 8 dhjetor, e do të vazhdojmë të vijmë për të përkujtuar me nderim Lëvizjen Studentore të Dhjetorit të 90-ës. “Ne vijmë këtu se këtu janë rrënjet tona të lirisë”, tha Basha.

Kryetari i opozitës u shpreh se tendencat e kthimit prapa në mendësitë dhe praktikat e vjetra të sundimit të oligarkisë në vend të sundimit të ligjit, si ato që manifeston dyshja Rama- Meta janë në kundërshtim flagrant me frymën dhe vlerat e Lëvizjes prej nga jemi nisur si vend dhe si shoqëri.

“Liria dhe dija janë dy anë të medaljes që ndërtuan perëndimin por që janë po aq të rrezikuara tek ne, sa 24 vjet më parë. Njerëz të paditur kanë kapur shtetin dhe me forcën e pushtetit po ju marrin lirinë njerëzve të ditur”, tha Basha i cili shpalli dhe nisjen e projektit “Drejt lirisë”, që do të jetë një udhëtim dhe evokim i përballjeve më madhore shqiptarëve me diktaturën.

Duke kujtuar ato kohë të vështira, z.Sali Berisha tha se vetëm studentët, vetëm ata mund të çelnin portat e lirisë për shqiptarët.

“Atë që bënë ata nuk mund ta bënte askush por nuk do të ishte e mundur pa bashkimin e qytetarëve të Tiranë dhe në veçanti të punëtorëve të Tiranës, në veçanti të punëtorëve të ndërmarrjeve të Tiranës, të cilët vërshuan në mënyrë të paimagjinueshme në këtë shesh të mbështesnin dhe të mbronin studentët, sepse diktatura do të bënte çdo gjë, që të gjente një zgjidhje kundër tyre, çka ishte më e rënda ose do gjente zgjidhje të tjera, por vërshimi masiv i punonjësve të Tiranës e shndërroi këtë qytet në kështjellën e pamposhtur të lirisë”, u shpreh Berisha.

Arben Imami tha se ne i kthehemi dhjetorit 1990 për shkak se ai është akti i themelimit të Shqipërisë moderne.

“Çdo popull në momentet më të vështira historike, por jo vetëm në ato momente, në të gjithë jetën e tij, thelbin e jetës së tij, të jetës politike të përbashkët, i drejtohet aktit të themelimit. Siç i drejtoheshin romakët themelimit të Romës, siç i drejtoheshin athinasit themelimit të Athinës, ashtu i drejtohen themelimit të tyre amerikanët me Kushtetutën e tyre. Duhet të vijmë të gjithë këtu si një vend i bekuar për të kuptuar se cilat janë themelet tona”, tha Imami.

Eduard Selami kujtoi se frika ishte prezente ne atë kohë, ishte pjesa më e rëndë ku diktatura bënte të mundur ekzistencën e saj.

“Dhe ata që vranë frikën në fillim ishin studentët. Dhe nëse ka një nga meritat e shumta dhe ka shumë dëshmitarë këtu në sallë që Azem Hajdari ka, është ishte vërtet ai që e vrau frikën dhe çante i pari. Unë mendoj se mënyra më e mirë për të vrarë frikën është ta zëvëndësosh atë me shpresën dhe kjo u bë. Dhe frika u la tej dhe pas saj ishte shpresa për një Shqipëri më të mirë, shpresa për një Shqipëri më të lirë, shpresa për një Shqipëri si gjithë Europa”, tha Selami, i cili i bëri thirrje të rinjve të jenë aktivë, pasi nuk do të kishte shërbim më të madh për lëvizjen e Dhjetorit se sa rinia e sotme të jetë aktive.

“Në këtë përvjetor të 24-të, më shumë se kurrë më parë, është përmendur emri i diktatorit dhe fjala burg nga dyshja Rama-Meta apo nga ata që ne kishim menduar se i kishim rrëzuar përfundimisht në dhjetor të 90-s. Që të mos përmendet më emri i diktarorit duhet angazhimi dhe sinteza e tre brezave, intelektualët e viteve 90, studentët e vitit 90, e brezave studentorë të këtyre viteve”, tha Bislim Ahmetaj.

Piktori Ardian Isufi, kujtoi proverbin latin se më shumë dije të bën më të lirë. “Pra liria, vjen nëpërmjet kulturës dhe emancipimit të saj. Deri dje arti dhe estetika e tij është parë si një fenomen i izoluar. Sot në fakt, arti është një formë e re, një formë e artit të angazhuar ku studentët dhe të rinjtë duhet patjetër ta gjejnë vetveten. Sot publiku ka një gjithëpërfshirje dhe arti në vetvete jep dhe çështje të reja siç janë çështjet e përfaqësimit dhe të politikës, çështjet sociale dhe shoqërore të cilat të gjitha bashkë tregojnë dhe bëjnë një gjithëpërfshirje komplekse”, tha Isufi.

Pjesë e forumit Drejt Lirisë ishin edhe përfaqësues të rinisë së sotme.

“Ndonjëherë ne shpejtohemi dhe mendojmë që mirëqenia ka lidhje drejtpërdrejt dhe vetëm me aspektin ekonomik dhe të mirat materiale, por sot në të gjithë vendet dhe shoqëritë moderne, në krye të vlerave njerëzore mbeten liritë dhe të drejtat themelore të njeriut dhe demokracia si formë e organizimit të jetës shoqërore. Por sot jemi 24 vite më mbrapa dhe shikojmë që demokracia dhe liritë e të drejtat themelore kanë në mënyrë të shpejtë një degradim vërtet të frikshëm”, tha Fabian Topallaj, duke përmendur të drejtën e cënuar nga qeveria për arsimin e lartë apo edhe dhunën që ka ushtruar policia ndaj studentë të shkencave të natyrës vetëm se protestuan për kushte më të mira laboratorike.

Pedagogia Merlinda Hoço tha se demokracia pa liri nuk ka vlerë.

“Por ka dhe një burim tjetër shumë të rëndësishëm që i ushqen këto të dyja dhe i mban gjallë dhe ajo është dija”.

Hoco shtoi se liria është e kërcënuar, pasi dija është e kërcënuar. “Tarifat e studimit janë rritur për çdo student të nivelit Bachelor dhe Master të cilët duan të investojnë në dije. Po në fund të ditës në çfarë përkthehet kjo? Kjo përkthehet në libra më pak, përkthehet në burim informacioni më pak. Nga ana tjetër kuotat janë ulur. Një pjesë e mirë e studentëve, nuk kanë mundësi ekonomike që ta vazhdojnë këtë studim, arsimim apo thellim të dijes”, tha Hoco.

Fabjola Bregu u ndal tek problemet e administraës publike.

“Ajo çfarë ndodh prej një viti, me çështjet e administratës publike, është një lloj përballje e frikshme e mijëra qytetarëve shqiptar me padrejtësinë dhe kundërligjshmërinë. Sot, Gjykatat në vend janë të mbingarkuara me çështje të punonjësve të larguar nga administrata dhe ka konstatuar në pjesën më dërrmuese të rasteve shkelje flagrante të ligjit”, tha Bregu duke theksuar se për rininë sot, dyert e administratës janë hermetikisht të mbyllura.

Belind Këlliçi, kreu i Departamentit për të Përndjekurit dhe ish-Pronarët u shpreh se Partia Demokratike është e vetmja që ofron alternativën Europiane dhe që mirëpret të rinjtë që duan dhe aspirojnë të kontribojnë për vendin e tyre. “Nuk besoj se ka të ri sot që nuk ushqen një ndjenjë keqardhje për sistemin të cilin dyshja qeverisëse Rama-Meta ka instaluar në vend, në qeverisje e në administratë. Të gjithë
e shohim se ka shefa, drejtorë dhe deputetë që kanë një të kaluar kriminale. Besoj se kjo nuk është aspak aspirata mbi të cilën u ngjiz lëvizja e 24 viteve më parë në këtë sallë dhe në mënyrë absolute nuk mund të jetë kjo aspirata e të rinjve sot”, tha Këllici.

Besart Kadia tha se është shqetësues fakti se sondazhet tregojnë që një në dy të rinj do të largohet nga Shqipëria.

“Dua t’u kujtoj rastin e dy të rinjve shqiptar që u dogjën të gjallë në kërkim të, ose në përpjekjen e tyre për të ndërtuar jetën në Angli. Ky është një fakt rrënqethës, që tregon se të rinjtë akoma mundohen të largohen nga Shqipëria, nga familja e tyre dhe gjejnë këto mënyra kaq ekstreme që ne mendonim se i kishim lënë pas. Të dhëna të reja tregojnë që, në vitin 2014, dhe këto janë të dhëna zyrtare, janë rreth 5000 shqiptarë që kërkojnë azil në vendet perëndimore që janë vende shengen dhe jo shengen”, u shpreh Kadia.

Mesazhi i Kryetarit të Partisë Demokratike në ditën e Rinisë. 

Basha: “Nderim, mësim, reflektim. Ky është 8 dhjetori ynë. Kam kënaqësinë e madhe të njoftoj se pas pak javësh starton viti i njezët e pesë vjetorit të lëvizjes demokratike studentore, intelektuale dhe popullore. Duke e konsideruar këtë Lëvizje finalizimin historik të një përpjekje të gjatë, plot sakrifica sublime, vuatje të papërshkrueshme dhe akte të pabesueshme heroike të shqiptarëve të lirë kundër dikaturës, kam nderin të shpall projektin “Drejt lirisë” që do të jetë një udhëtim dhe evokim i përballjeve më madhore shqiptarëve me diktaturën”.

Të dashur miq, ish studentë por përjetë dhjetoristë, pjesëmarrës në  Lëvizjen e  Dhjetorit të lavdishëm 1990, pedagogë të atyre ditëve.

Të dashur të rinj e të reja, studentë të Universitetit  të Tiranës,

studentë të të gjitha universiteteve

Zonja dhe zotërinj të pranishëm,

Jam i lumtuar dhe i gëzuar të ndodhem me ju sot, në Qytetin “Studenti”, në qytetin e parë të lirisë, mbas gjysëm shekulli diktature. 24 vjet më parë, këtu filloi lëvizja më e fuqishme për liri dhe të drejta njerëzore në historinë tonë. Studentët e Universitetit të Tiranës shkruan një faqe të lavdishme të paparaleltë dhe hapën një epokë të re për Shqipërinë. U mposht frika, triumfoi guximi dhe nisi rruga e ndryshimit. Me këngën – kushtrim lirie, “se mjaft në robëri”, studentët dolën nga këto godina, të pasigurtë për jetën e tyre, por të vendosur të jepnin gjithçka për lirinë e Shqipërisë. Dhe ia dolën. Marshimi dhe thirrjet për liri e demokraci, gjunjëzuan regjimin e së keqës. Tirana u bashkua me lëvizjet antikomuniste të Berlinit, Pragës, Varshavës dhe Budapestit, në atë rikthim të endërruar europian. Aty bota mbarë kuptoi vokacionin perëndimor të popullit shqiptar.

Ndaj vijmë këtu çdo 8 dhjetor, e do të vazhdojmë të vijmë për të përkujtuar me nderim Lëvizjen Studentore të Dhjetorit të 90-ës. Në këtë pelegrinazh të përvitshëm lirie, të kujtojmë misionin e përjetshëm për një ‘Shqipëri si gjithë Europa’. Ne vijmë këtu se këtu janë rrënjet tona të lirisë.

· Këtu ra diktatura më e  egër e kontinentit tonë.

· Këtu kulmoi liria. Përplasjet kurajoze të studentëve gjunjëzuan shtetin policor, sigurimin dhe diabolizmin e diktaturës.

· Këtu u  finalizua dhe u shpall publikisht nga lideri i Lëvizjes Studentore, Azem Hajdari fitorja e pluralizmit politik në Shqipëri.

· Këtu ndodhi bashkimi i shumëpritur i Shqipërisë me vendet e tjera të Europës ish-komuniste që kishin hedhur ndërkohë zgjedhën e komunizmit.

· Këtu u hodhën bazat ideore të demokracisë, ekonomisë së tregut dhe zgjedhjeve të lira.

· Këtu nisi rrugëtimi i Shqipërisë së lirë.

· Këtu nisi çlirimi i madh nga tirania dhe dogmat dhe prangat e saj.

· Këtu nisi lirimi i të burgosurve, të internuarve dhe të përsekutuarve politikë në Shqipëri.

· Këtu nisi nderimi, lartësimi dhe rehabilitimi i të vrarëve mizorisht nga regjimi barbar.

· Këtu lëshoi rrënjët e para dinjiteti i njeriut të lirë.

· Këtu u fituan të drejtat universale që kishin qenë mollë e  ndaluar për shqiptarët.

· Këtu  lindi Partia Demokratike, forca e ndryshimeve të mëdha europianizuese.

Ky qytet, ky kampus është vendi i qendresës dhe idealizmit. Është Meka dhe Jeruzalemi i lirisë dhe demokracisë shqiptare.

Qyteti “Studenti”  është  e do të mbetet një vend i shenjtë, një tempull lirie  për shqiptarët e lirë brez pa brezi. Studentët e dhjetorit janë e do të mbeten krenaria jonë.

8 dhjetori i vitit 1990 është realisht dita e bardhë e historisë së vendit tonë. Lëvizja e Dhjetorit dhe ndryshimi politik i saj janë Rilindja e vërtetë e Shqipërisë europiane dhe moderne, pas dekadave të izolimit dhe robërisë.

Çdo komb ka nevojë që herë pas here të kujtojë trashëgiminë e tij më të vyer. Nuk është asnjeherë e tepruar. Kjo bëhet më nevojshme në ato vende ku ka akoma nostalgjikë që nderojnë diktaturat.

Ne njerëzit e lire të kësaj bote nuk duhet të rreshtim së treguari të vërtetën. Nuk duhet të rreshtim së foluri për vlerat, së luftuari për lirinë. Nuk duhet të rreshtim sepse kombet që nuk dallojnë të mirën nga e keqja, që barazojnë engjëjt me mostrat, rrezikojnë të humbasin liritë e fituara.

Në emër të Partisë Demokratike shpreh nderimin dhe mirënjohjen e pakufishme:

–         për gjithsecilin nga studentët e lëvizjes demokratike pa dallim;

–         për të gjithë pedagogët dhe intelektualët që mundësuan ndryshimin e madh;

–         për të gjithë qytetarët e Tiranës dhe mbarë vendit që e shndërruan në lëvizje të fuqishme mbarëkombëtare.

Nderim, respekt për ju brez pas brezi.

Esenca e lëvizjes së dhjetorit ishte përbashkuese e të gjithë shqiptarëve, jo përçarëse e tyre. Ishte një lëvizje që lindi nga dashuria e studentëve për vendin, për njerëzit, për familjet, për prindërit, afërmit e tyre dhe për lirinë.

Ishte rrebelimi kundër varfësirë, shtypjes dhe izolimit. Një rrebelim në emër të ëndrrës së madhe të lirisë dhe hapjes, një rrebelim që kërkonte t’i merrte me vete në rrugët e reja të së ardhmes nënat, baballarët dhe gjithë kombin. Ajo zgjoi këdo dhe i bëri të kuptonin drejt ç’ishte komunizmi që kishin jetuar dhe trashëguar.

Në frymë, mesazhe dhe veprime ajo lëvizje mbart vetëm vlera. Madje edhe debatet brenda dhe rreth saj, e lartësojnë. Sepse janë shprehje e diversitetit dhe lirisë së fituar.

Ndryshe nga shumë lëvizje të tjera, shqiptarët më pas nuk i humbën, por i fituan të drejtat e mohuara. Eshtë e qartë si drita e diellit se ajo ishte një lëvizje atdhetare. Ishte një lëvizje që i sillte shëndet një kombi të dhunuar. Atdhedashuria u bashkua me konceptet e reja të lirisë, demokracisë dhe europianizmit.

Kjo lëvizje ishte drejtimi shpëtimtar në udhëkryqin e kohës. Ajo shikonte përpara. Studentët dhe intelektualët ndonëse të rritur në vendin më të izoluar të planetit, shpallën lirinë si themel dhe substancë të antikomunizmit.

Me 8 dhjetor, bashkohet natyrshëm rinia me lirinë, si për të na treguar se liria është rinore dhe rinorja është flaka e pashuar e lirisë.

Me 8 dhjetor ne kujtojmë dhe nderojmë kreun e studentëve, liderin e  lëvizjes, themeluesin e Partisë Demokratike, heroin e demokraci
së, Azem Hajderin, shembullin e sakrificës të madhe të forcave të reja demokratike dhe europiane shqiptare përballë hakmarrjes së forcave të vjetra. Përkulemi para veprës dhe kujtimit të tij, përkulemi para veprës së shokëve të tij dhe gjithë studentëve që u ngritën këtu 24 vjet më parë.

Ne vijmë këtu për të nderuar, por edhe për të mësuar. Guximi i studentëve të dhjetorit, pastërtia dhe vizioni i tyre për të ardhmen kanë një rezonancë që shtrihet në kohë. Sa herë kam ardhur këtu para se të zgjidhesha kryetar i Partisë Demokratike dhe tani që mbaj këtë detyrë, zbuloj diçka të re, mësoj dhe frymëzohem nga ky qytet lirie. Me sa duket ngjarjet e mëdha politike dhe sociale që ndryshojnë përgjithmonë shoqëritë, kapin një permasë hyjnore. Ato fitojnë një simbolikë të shenjtë, ku lidershipi dhe vlerat që mbarten rrezatojnë frymëzim dhe urtësi për të gjithë.

Kjo traditë lirie udhëton me brezat, frymëzon demokratët e rinj dhe gjithë rininë shqiptare. Liria dhe atdhedashuria janë busulla jonë e mendjes dhe zemrës.

Me këtë themel lirie dhe idealizmi ne ndërtuam në dy dekada endrrën europiane. Nuk ka dyshim se Shqipëria e hapur, Shqipëria në NATO, Shqipëria e lëvizjes së lirë, Shqipëria  e rrotacionit demokratik të pushtetit, Shqipëria kandidate në Europë, janë  pjesë e profecisë reale dhe e bilancit pozitiv historik të lëvizjes së dhjetorit 1990.

Flas në emrin e brezit tim, e brezit tuaj më të rinj, por edhe të aktorëve kryesorë të dhjetorit 1990, kur them se ne të rritur me trashëgiminë e dhjetorit 1990, refuzojmë çdo kthim prapa drejt të vjetrës, drejt të shkuarës, drejt së keqes.

Por tendencat e kthimit prapa në mendësitë dhe praktikat e vjetra  të sundimit të oligarkisë në vend të sundimit të ligjit, si këto që manifeston dyshja Rama- Meta janë në kundërshtim flagrant me frymën dhe vlerat e Lëvizjes prej nga jemi nisur si vend dhe si shoqëri.

Pothuajse 50 vjet më parë, Presidenti John Kennedy u tha studentëve të Universitetit të Vanderbilt-it, se liria pa dijen është gjithnjë në rrezik dhe se dija pa lirinë është gjithnjë e kotë.

Liria dhe dija janë dy anë të medaljes që ndërtuan perëndimin por që janë po aq të rrezikuara tek ne, sa 24 vjet më parë. Njerëz të paditur kanë kapur shtetin dhe me forcën e pushtetit po ju marrin lirinë njerëzve të ditur.

Rikthimi në ditët më të këqija të konfliktualitetit, të ushyqerit nga kjo shumicë e konfliktit politik dhe shoqëror me opozitën, me shoqërinë civile, dhe me qytetarët përmes akteve të përditshme  të arrogancës, paligjshmërisë, arbitraritetit, shpërfilljes, nëpërkëmbjes dhe shfrytëzimit, hedhja në erë e urave të dialogut e komunikimit dhe kultivimi i urrejtes deri në prishjen e bashkëjetesës demokratike- të gjitha këto janë antidhjetori, janë antirinia, janë antiperspektiva.

Ne nuk kemi kontestuar e nuk kontestojmë rrotacionin, përkundrazi, ne e kemi mundësuar me qeverisjen tonë demokratike. Por ne kontestojmë dhe nuk do të pajtohemi me kthimin prapa në format hibride të shtetit policor në vend të shtetit ligjor dhe të së drejtës. Kontestojmë dhe nuk pajtohemi me asnjë lloj forme të kufizimit dhe goditjes së lirive si vlerë e vlerave. Kontestojmë dhe nuk pajtohemi me asnjë lloj forme, të organizuar apo spontane, të drejtpërdrejtë apo të tërthortë të rehabilitimit të diktatorit Enver Hoxha.

Mjaft studentë të dhjetorit, të dashur miq, ishin bij dhe bija me prindër komunistë apo me biografi të mirë, siç thuhej ne terminologjinë e rregjimit të atershëm.  Kjo nuk i pengoi të ngriheshin. Qoftë këta, qoftë studentët e tjerë zhvilluan atëherë konceptin modern se gjithëkush ka të drejtë të ndryshojë dhe sidomos kanë të drejtë të ndryshojnë në liri ata që që janë mbajtur në një rregjim të mbyllur skllevërish pa të drejtë zgjedhjeje.

Por askush nuk mund të vijë me Enverin, askush nuk mund të pretendojë se ka ndryshuar duke porositur apo tundur portretet e Enverit. Enveri dhe tirania kundër të cilës u ngritën studentët dhe qytetarët e lirë shqiptarë nuk mund të ndryshojë kurrë, kjo nuk ndryshon kurrë.

Si 24 vjet më parë kur rinia i bënte thirrje pasardhësit të Enver Hoxhës të hiqte dorë nga diktatura ne i drejtohemi Ramës dhe Metës:

–         Të heqin dorë nga trashëgimia e diktatorit Hoxha;

–         Të heqin dorë nga përqendrimi i pushtetit në dy duar;

–         Të heqin dorë nga dhunimi i të drejtave tona;

–         Të heqin dorë nga kriminalizimi i politikës.

Nderim, mësim, reflektim. Ky është 8 dhjetori ynë. Në këtë kuadër, kam kënaqësinë e madhe të njoftoj se pas pak javësh starton viti i njezët e pesë vjetorit të  lëvizjes demokratike studentore, intelektuale dhe popullore. Duke e konsideruar këtë Lëvizje finalizimin historik të një përpjekje të gjatë, plot sakrifica sublime, vuatje të papërshkrueshme dhe akte të pabesueshme heroike të shqiptarëve të lirë kundër dikaturës, kam nderin të shpall projektin “Drejt lirisë” që do të jetë një udhëtim dhe evokim i përballjeve më madhore shqiptarëve me diktaturën.  

Përballja ka qenë dhe  është  ngjarja dhe vlera e pavdekshme e 8 Dhjetorit që duhet ta evidentojmë e lartësojnë si një pasuri të  kohës dhe brezave. Përballja e martirëve, e të burgosurve dhe të persekutuarve politikë, e qytetarëve të thjeshtë, e studentëve të dhjetorit 24 vite më parë dhe e studentëve sot. Përballja për lirinë, që mbahet e meritohet duke luftuar çdo ditë për të, duke vështruar përpara, në horizontin e ëndrrës sonë të madhe të integrimit europian të Shqipërisë.

Rroftë Rinia shqiptare.

Zoti e bekoftë Shqipërinë.

Deputetja Tabaku denoncon rastin e kryetarit të komunës së Edi Ramës, faturat e të cilit janë anomalisht të ulëta, deri në 1 mijë e 100 lekë të vjetra në muaj. Megjithë favorizimin që i bën oligarkut lokal OSHEE, ai sërish është debitor me 350 mijë lekë. Por ligji nuk vepron mbi të zgjedhurit e Edi Ramës

Jemi sot këtu për të denoncuar botën paralele, mes oligarkëve në pushtet dhe qytetarëve të pamundur, që po vuajnë nga faturat abuzive të energjisë, nga kamatvonesat milionëshe mbi këto fatura, që po vuajnë nga errësira që ka shkaktuar qeveria.

Qytetarët që nuk paguajnë dot energjinë, se nuk kanë mese të ushqehen, nuk kanë asnjë të ardhur ekonomike, janë me qirinj sot.

Por qeveria nuk i trajton të gjithë njësoj. Ja kemi këtu kryetarin socialist të Komunës Otllak. Eshtë debitor me 350 mijë lekë, energji që e ka shpenzuar por nuk e ka paguar.

Një i ri u nda nga jeta dje në Mëzez në një përpjekje të dëshpëruar për të siguruar drita në shtëpi, për familjen e tij në gjendje të mjeruar ekonomike. Kjo familje nuk ka energji se është debitore.

Por kryetari i komunës së Edi Rama edhe pse është debitor, ka energji, dhe ai nuk ka asnjë problem as me ligjin, as me OSHEE-në.

Kemi parë dhe kemi denoncuar këto kohë, fatura abuzive dhjetra milionëshe ndaj qytetarëve të pamundur që nuk kanë tjetër gjë në shpëti pos televizorit e llampave ndricuese.

Shihni sa e ka faturën mujore kryetari i komunës së Edi Ramës, oligarku i tij lokal. 1400 lekë të vjetra në muaj. Një mijë e 100 lekë të vjetra të muaj. Ja pra cdo të thotë të jesh i lidhur me pushtetin. Të jesh pjesë e Shqipërisë së oligarkëve.

Pabarazia para ligjit, trajtimi i qytetarëve me armiqësi dhe i favorizimi i njerëzve të lidhur me Edi Ramën është një padrejtësi revoltuese.

Kjo qeveri nuk le zgjidhje tjetër përpos përballjes me qytetarët.

Protesta masive popullore do ta ndalë të keqen.

Deputeti Pollo e cilëson shkelje të ligjit testin që organizoi kryeministri, për interesa klienteliste. Eshtë e përcaktuar se kandidati për mësues kalon në një proces konkurimi, në shkollën ku dëshiron të punojë dhe që ka post vakant. Janë mësuesit e prindërit e nxënëseve të asaj shkolle në një komision vlerësimi që vendosin se cili është më i përshtatshëm për t’u punësuar. Nuk mund dhe nuk duhet të licensohen punonjësit që kanë vite pune në sistem, licensimi vlen për të diplomuarit që punësohen për herë të parë përmes provimit të shtetit.

Në zakonin e keq të mohimit apo nxirjes së gjithçkaje që është krijuar në Shqipëri para ardhjes së tij në pushtet, në vijim të fyerjeve ndaj mësuesve të cilët, kur ishte shef opozite, i quante analfabetë, të gjithë e padallim, Edi Rama në fjalimin e fundit arriti kulmin e brutalitetit gjuhësor dhe ofendimit të  shkollës shqipe por dha edhe sinjalin se po nis një raprezalje politike-klienteliste  siç ka bërë me nëpunësit civilë.

Partia Demokratike ka një mesazh të thjeshtë për mësueset e mësuesit tanë:

Mbajeni kokën lart për gjithçka keni bërë e po bëni për shkollimin e fëmijëve e të rinjve. Qytetarët ju nderojnë; nxënësit ju duan. Ju keni merituar shumë e meritoni edhe me shumë.

Gjatë qeverisjes së PD-së u dyfishuan investimet në arsim, si në paga ashtu edhe në godina shkollore, laboratore, etj. Reforma e shumëanëshme në arsimin parauniversitar ishte themelore dhe ka nevojë për konsolidim. Në interesin më të mirë të shoqërisë.

Ka korrupsion, klientelizëm, abuzime dhe sëmundje të tjera që prekin dhe shoqërojnë sfidat e progresit, përfshirë arsimin. Lufta kunder tyre është bërë e duhet të behët me vendosmëri, në vazhdimësi. Qeveria Rama-Meta ka patur avantazhin se ka trashëguar nga një ligj shumë të mirë për arsimin parauniversitar që është miratuar para dy vitesh në Kuvend me 91% të votave, me konsensus mazhorancë-opozitë.

Mirëpo çfarë doli qartë nga fjalimi i kryeministrit e nga faktet publike?

Doli se qeveria e tij nuk ka zbatuar ligjin në fuqi, por ka lejuar përkeqësimin e situatës duke politizuar në ekstrem drejtoritë arsimore rajonale, duke vendosur gjithandej militantë partiakë. Duke i lejuar, nxitur, urdhëruar ata të shkelin këtë ligj e të bëjnë vetë emërime, kuptohet kundrejt favoreve në para e në natyrë; ndërkohë që sipas ligjit kompetenca e emërimit nuk është e ministrit apo drejtorit rajonal por është e komisionit të vlerësimit në shkollën ku krijohet posti vakant.

Doli gjithashtu. se për të mbuluar dështimet e bujshmë në fushën e investimeve konkrete në shkolla dhe për shkollën, kryeministri merr si një alkimist i keq disa probleme reale që i ka përkeqësuar shumfish në qeverisjen e tij, dhe çfarë bën? I përzien dhe kërkon t’i japë ngjyrën e këtyre problemeve gjithë sistemit, për të mos thënë gjithë historisë së arsimit, duke fyer, kërcënuar e shantazhuar si kurrëndonjeherë gjithë mësuesit e Shqipërisë.

Në Vlorë, Edi Rama deklaroi se 1/3 e mësuesve janë jashtë profilit, domethënë rreth 11 mijë mësues. Të hënën tha se ishin rreth 1800 jashtë profilit. Së fundmi u shpreh se Shqipëria ka 177 mijë nxënës kur në fakt ka 550 mijë syresh. Luhatjet shifrore nuk i vijnë dhe aq nga kujtesa e dobët apo humori labil por parasëgjithash nga obsesioni i tij për të hequr nga puna “të huajt” e për të vënë aty “të vetët”.

Dje ndërmori nje testim të pabazuar në ligj e pa përdorim ligjor vetëm e për të hequr vemendjen nga skandali i të emëruarve të tij; skandal të cilin e cilësoi si majë ajsbergu por refuzoi të merrte përgjegjësi për këtë ajsberg të krijuar e zmadhuar këto 14 muaj nga qeveria e tij.

Jam sot këtu për ta denoncuar  formën dhe përmbajtjen e këtij qëndrimi skandaloz, që irriton mësuesit e ndershëm e të përkushtuar, qindra-mijëra prindër e nxenës, të cilët, megjithëse kohërat kanë ndryshuar, vazhdojnë ta kenë të shenjtë figurën e mësuesit.

Jam këtu për të  denoncuar projektin e raprezaljes që ka në mendje ky kryeminsitër me alibitë e lodhura që paraqet çdo javë.

Në emër të Partise Demokratike i kërkoj sot Edi Ramës të harrojë eksperimentet e revanshit dhe klientelizmit në arsim. Të respektojë ligjin dhe vetëm ligjin nga germa e parë në germën e fundit.

Sepse në kundërshtim me te gjithë normën ligjore në fuqi e praktikën e konsoliduar z.Rama kërkon të fusë në licensim të gjithë arsimtarët, pavarësisht diplomës si mësues që ata zotërojnë, pavarësisht kualifikimit të certifikuar prej shtetit shqiptar, vitet e punës e përvojën që kanë apo edhe pavarësisht liçensës të marrë vitet e fundit përmes Provimit të Shtetit.

Kundër ligjit kjo, pasi është e përcaktuar se kandidati për mësues kalon në një proces konkurimi, në shkollën ku dëshiron të punojë dhe që ka post vakant. Janë mësuesit e prindërit e nxënëseve të asaj shkolle në nje komision vlerésimi të cilët vendosin se cili nga konkurruesit është më i përshtatshëm dhe do të punësohet.

Nuk mund dhe nuk duhet të licensohen punonjësit që kanë vite pune në sistem, licensimi vlen për të diplomuarit që punësohen për herë të parë përmes provimit të shtetit.

Problemet e arsimit nuk përballohen duke ngritur furtunë nëpër govata, por me ligj. Dhe ligji në fuqi e zgjidh me realizëm e drejtësi edhe problemin e mësuesve pa asimin përkatës.

U bëj thirrje gjithë mësuesve, prindërve gjithashtu, të refuzojnë dhe të protestojnë me forcë kundër cdo veprimi të qeverisë që shkel ligjet në fuqi.

Ne do të ftojmë mësuesit dhe qytetarët në protesta masive të pandalshme. Derisa arbitrariteti dhe revanshi qeveritar të ndalet.

Banorët e fshatit Xarë ofruan dy herë më shumë për të marrë tokat, po qeveria ia bëri dhuratë Kokëdhimës. Policia presion që fermerët të mos denoncojnë. Salianji: Akt skandaloz korruptiv dhe shkelje të të drejtave të banorëve. 

Partia Demokratike denoncon një skandal të dyfishtë në fshatin Xarë të rrethit të Sarandës. Banorët e këtij fshati, të njohur si kultivuesit më të mëdhenj të mandarinës në Shqipëri, janë përjashtuar padrejtësisht nga një ankand për marrjen e një tokë të fshatit me qera. Pavarësisht se shoqata e banorëve të fshatit ka ofruar dyfish më shumë qera për përdorimin e kësaj tokë, e drejta iu dha një shoqate tjetër që banorët e akuzojnë si pjesë e oligarkisë në pushtet Rama-Kokëdhima. Drejtuesi i Departamentit Për të Drejtat e Njeriut dhe Liritë Themelore në Partinë Demokratike, Ervin Salianji u takua me banorët e këtij fshati ku evidetoi edhe një skadal tjetër. Më 7 dhjetor fshatin e viziton Kryeministri Edi Rama për Festën e Mandarinës, ndërsa banorët që kanë kundërshtuar ankandin, janë kërcënuar nga shefi i komisariatit nëse ata i drejtohen Kryeministrit për këtë çështje.

“Kjo ngjarje ka një vit që vazhdon. Toka është e fshatit Xarë dhe kërkon ta marrë Dhimo Kote, i cili është nga Mursia. Bëmë disa greva dhe nuk e mori dot. Shteti na tha do të bëjmë ankand. Ne nuk u tërhoqëm dhe ankandin e çuan nga Saranda në Tiranë për në ministri. U futëm në ankand por nuk e hapën ofertën. Por pasi e hapën ofertën të firmosur nga 5 anëtarët, një sekretari i thamë se po bëhen manipulime. Dhe si përfundim u bë manipulimi. Toka e Kishës që është 8 hektarë e mbjellë, nuk e kishim në ankand sepse nuk na takon. Ajo është tokë e mbjellë. Por z Dhimo kërkon ta marrë atë tokën e Kishës”, tha një prej banorëve të fshatit.

“Nesër kemi Festën e Mandarinës në fshat dhe vjen kryeministri. Unë si kryeplak nuk jam ftuar për shkak të kontradiktave që kemi me Kryetarin e Komunës për tokat”, tha kryeplaku i fshatit.

“Na morën në komisariat dhe na thanë që do të vijë Kryeministri në fshat për Festën e Mandarinës. Nuk do diskutoni, na thanë ,sepse ndryshe do të keni probleme më pas. Na tha shefi i komisariatit të mos flisni se do t’u hedh në lumë”, shpreh një prej fermerëve të fshatit Xarë.

Salianji e dënoi ashpër këtë skandal duke e cilësuar si një shkelje të rëndë të të drejtave të tyre. Pasi banorëve iu grabit toka në fshat nga njerëz të lidhur me oligarkinë në pushtet, atyre kërkohet ty mbyllet goja me kërcënime nga shefi i policisë, evidetoi Salianji.

“Jemi me banorët e fshatit Xarë të rrethit të Sarandës. Skandalet korruptive të qeverisë nuk kanë fund dhe nuk njohin territor. Fermerët e kësaj zone kanë bërë një ofertë për të përfituar këtë tokë pas nesh që është rreth 64 hektarë, pronë e fshatit. Kanë bërë një ofertë prej 50 mijë lekësh të reja për hektar. Ndërkohë që shoqata që e ka fituar ka bërë ofertën 25 mijë lekë të reja për hektar. Fituese nuk shpallet shoqata e fermerëve që e ka ofertën dyfish më të lartë por fitues shpallet shoqata tjetër që e ka çmimin dyfish më të ulët,  por ka një avantazh tjetër sepse është e lidhur me oligarkinë, është e lidhur me dyshen Rama-Kokëdhima dhe me kryetarin e komunës këtu që është oligarku i tyre lokal. Por skandali nuk përfundon këtu. Nesër në datën 7,  kryeministri vjen tek Festa e Mandarinës në fshat dhe qytetarët kërkojnë një të drejtë të tyre themelore për t’i kërkuar llogari zyrtarit që e paguajnë me taksat e tyre. Kërkojnë që nesër të shkojnë në takim dhe ti kërkojnë llogari se pse nuk e fitojnë ankandin këta qytetarë që kanë 500 mijë lekë të vjetra për hektarë por e fiton oligarku lokal me 250 mijë lekë për hektar. Çndodh në këtë rast?! Kryeministri lëshon bandën e tij lokale, shefin e komisariatit dhe i kërcënon qytetarët duke i thirrur në komisariat një më një, duke shkelur të drejtat dhe liritë e tyre themelore, që u garantohen me Kushtetutë e që i kanë fituar 24 vite më parë. i thërret dhe i kërcënon duke u thënë se nëse shkoni tek kryeministri dhe flisni unë do t’u hedh në lumë. Nuk ju bën dot asgjë. i bëjmë thirrje kryeministrit të shkojë dhe të marrë masa të menjëhershme për shefin e komisariatit i cili kërcënon qytetarët dhe i thërret në komisariat pa asnjë arsye. i kërkojmë kryeministrit dhe bandave të tij lokale t’i krijojë mundësi për t’i takuar dhe dëgjuar qytetarët për të shprehur shqetësimin e tyre dhe në rast se kryeministri dhe bandat e tij lokale nuk do lejojnë që këta qytetarë dhe fermerë të dëgjohen nesër për problemin e tyre, ne do të jemi këtu dhe me çdo mjet do t’i fusim për ti dëgjuar dhe për të qënë krah për krah e për të fituar këtë të drejtë që askush nuk ua mohon dot më”, tha Salianji.

Deklaratë e këshilltarit të Grupit Parlamentar për Financat, Dorian Teliti. Tregtarët e lidhur me dyshen Rama-Meta, e blejnë sot karburatin 40 përqind më lirë dhe e shesin 40 përqind me shtrenjtë për qytetarët tanë. Me këtë skemë, çdokush varfërohet gjithnjë e më shumë, dhe pasurohen gjithnjë e më shumë klanet e naftës të lidhura me Edi Ramën dhe Ilir Metën.

Çdo qytetar shqiptar që paguan sot naftën më të shtrenjë në botë, duhet të kujtohet se paratë po i nxjerr nga xhepi vetëm për një arsye, për interesat e Edi Ramës dhe Ilir Metës.

Interesat financiare të dyshes Rama-Meta sundojnë sot tregun në vend, dhe kjo është e vetmja arsye pse nafta në gjithë botën është 40 përqind më e lirë, vetëm në Shqipëri vazhdon të jetë njësoj e shtrenjtë.

Vazhdon të ketë cmimin më të shtrenjtë tek ne, dhe kjo tarifë bëhet katastrofike po të kemi parasysh se fuqia blerëse e jona është 3 herë më e vogël se mesatarja e Bashkimit Europian.

Shqiptarët paguajnë më shumë, sepse paguajnë për pasurimin e klientëve të qeverisë, paguajnë për pasurimin e Edi Ramës dhe Ilir Metës.

Tregtarët e lidhur me dyshen Rama-Meta, e blejnë sot karburatin 40 përqind më lirë në tregun botëror, dhe e shesin 40 përqind me shtrenjtë për qytetarët tanë. Me këtë skemë, cdokush varfërohet gjithnjë e më shumë, dhe me të njëjtin ritëm pasurohen gjithnjë e më shumë klanet e naftës të lidhura me Edi Ramën dhe Ilir Metën.

Ky është një skandal i pandodhur më parë, një korrupsion i pashembullt qeveritar që vjedh drejtpërdrejtë cdo ditë ekonominë dhe cdo qindarkë të shqiptarëve.

As në mesjetë, nuk kishte taksidarë kaq mizorë.

Afera e pisët me naftën është tipari i kësaj qeverisje, fytyra e oligarkisë Rama-Meta.

Kjo është nëpërkëmbje e qytetarëve.

Ndaj qytetarët janë në Protestë.

Dhe protestë do të ketë.

Do të ketë protestë derisa të ketë drejtësi, punë dhe dinjitet për qytetarët.