Blog

Kryetari i Partisë Demokratike, Lulzim Basha priti sot George Soros, në një takim ku u diskutua mbi situatën aktuale dhe sfidat e Shqipërisë.

Kreu i Partisë Demokratike tha se Shqipëria ka bërë një përparim domethënës në këto 23 vite, por standartet e arritura po kërcënohen nga kursi antidemokratik i dyshes Rama-Meta, e cila është në kërkim të pushtetit absolut.

Z.Basha e njohu z.Soros me ngushtimin e hapësirave institucionale për opozitën, me goditjen fizike dhe kërcënimin e përfaqësuesve të saj në sallën e Kuvendit nga një kontigjent i lidhur me krimin që Edi Rama i ka futur enkas në parlament për këtë qëllim.

Z.Basha theksoi më tej se standarteve të demokracisë liberale në vend po i kanoset një rrezik i  madh nga presioni i përditshëm i qeverisë ndaj medias, shoqërisë civile, dhe institucioneve të pavarura.

Duke u ndalur tek drejtësia, z.Basha shprehu shqetësimin e thellë se mazhoranca po e zëvendëson reformën në këtë sistem, me kapje të drejtësisë duke bërë shkarkime të paligjshme, duke emëruar militantë, dhe duke i bërë presion të hapur gjyqtarëve.

Deklaratë e kryetarit të Partisë Demokratike:

Ka vetëm një vend në Europë dhe në planet ku  rënia 40 përqind e çmimit të karburanteve  në  tregun global nuk reflektohet thuajse fare në çmimet e karburanteve në tregun e brendshëm. Ky vend është Shqipëria e dyshes së oligarkëve, Rama-Meta.

Në njërën anë, janë taksat e larta që ka vendosur kjo qeveri, ndër më të lartat në Europë e në botë.Në anën tjetër është kontrabanda, nxitur dhe koordinuar nga qeveria, nga kupola mafioze qeveritare me klientët e saj që operojnë në fushën e prodhimit, importimit dhe tregtimit të karburanteve. Qeveria, me vetëdije, i lejon këta kliente të blejnë 40% më lirë dhe t’ja shesin popullit 40% më shtrenjtë.

 Sot, kam dalë në këtë foltore për një problem jashtëzakonsht të mprehtë që prek ditë për ditë jetën e qytetarëve shqiptarë, mirëqënien e tyre, kursimet e tyre, bukën e gojës, dhe thellon mjerimin dhe varfërinë e më të pamundurve mes nesh.

Në gjithë botën, prej më shumë se 3 muajsh çmimi i naftës ka hyrë në një spirale të përshpejtuar rënie. Sot në tregjet botërore nafta është rreth 40 përqind më e lirë se tri muaj më parë.

Konsumatorët kudo në botë po blejnë sot nënprodukte nafte me çmim më të lirë, ç’ka ndikon drejtpërsërdrejti në mirëqenien dhe rritjen e kursimeve në xhepat e tyre.

Ata po kështu po përfitojnë nga çmime më të ulura që vijnë nga ulja e kostove të mallrave e shërbimeve, të cilat e kanë transportin një zë përbërës nga më të rëndësishmit e këtyre kostove. Kjo ka rritur fuqinë blerëse dhe po jep ndikim edhe në rritjen e konsumit kudo në botë.

Ka vetëm një vend në Europë dhe në planet ku  rënia 40 përqind e çmimit të karburanteve  në  tregun global nuk reflektohet thuajse fare në çmimet e karburanteve në tregun e brendshëm.

Ky vend është Shqipëria e dyshes së oligarkëve, Rama-Meta.

Çmimi i karburanteve në Shqipëri vazhdon të jetë ai që ka qenë tre muaj më parë, ndër më të lartët në botë. Jo pak më i lartë, por shumë më i lartë se çmimi në vendet e zhvilluara të Europës. Dhe kur fuqia blerëse e shqiptarëve është 3 herë më e vogël se fuqia blerëse mesatare e konsumatorëve Europianë atëherë çmimi i naftës në Shqipëri përbën një rekord “Guiness”.

Pse nuk reflektohet në Shqipëri ulja me 40 përqind e çmimit të karburanteve në tregun global?

Arsyeja është  e dyfishtë: Në njërën anë janë taksat e larta që ka vendosur kjo qeveri, ndër më të lartat në rajon, Europë e në botë.

Në anën tjetër është kontrabanda, evazioni, informaliteti gjigand, i lejuar,  nxitur dhe koordinuar nga qeveria, nga kupola mafioze qeveritare me klientët e saj që operojnë në fushën e prodhimit, importimit dhe tregtimit të karburanteve.

Qeveria, me vetëdije, i lejon këta kliente të blejnë 40% më lirë dhe t’ja shesin popullit 40% më shtrenjtë. Këto shuma marramendëse parash, që paguhen padrejtësisht nga konsumatorët, qytetarët shqiptarë,  nuk shkojnë në arkën e shtetit, nuk shkojnë për rritjen e pensioneve, të rrogave, nuk shkojnë për rritjen e ndihmës ekonomike të qytetarëve në nevojë, nuk shkojnë për shkolla dhe spitale, nuk shkojnë për ndërtim infrastrukture, për hapje vendesh të reja pune, nuk shkojnë për dëmshpërblimin e pronarëve, të përndjekurve politike.

Këto para, thjesht dhe vetëm vidhen. Nga ata që e komandojnë këtë treg, nga duopoli qeveri-kliente.

Ky është një skandal i përmasave të panjohura më parë: skandal politik, skandal ekonomik dhe financiar, skandal i përmasave gjigande korruptive.

Ky  megakorrupsion është ulur këmbëkryq në Shqipëri që me ardhjen e dyshes Rama-Meta në pushtet. Eshtë poshtërim dhe fyerje për shqiptarët që nuk mund, nuk duhet dhe nuk do të pranojnë të vidhen e të varfërohen në mënyrë kaq cinike e të paskrupullt, vetëm e vetëm se qeveritarët kanë vendosur të pasurohen në kurriz të tyre.

Rama dhe Meta, qëndrojnë si taksidarë të pamëshirshëm mbi xhepat dhe ekonominë personale dhe familjari të cdo shqiptari.

Po varfërojnë përditë cdo vatër, e po majmen përditë ditë veta ata dhe klientela e tyre.

Shqipëria në këmbë, Shqipëria në protestë është e vetmja përgjigje për oligarkët!

Deputetë të Partisë Demokratike dhe drejtuesit e Departamenteve zhvilluan sot një bashkëbisedim me studentët e drejtësisë, në lidhje me rëndësinë që ka ndërgjegjësimi për efektet dramatike që sjell në shoqëri dhuna në familje. Dënohet neglizhenca e qeverisë, në projekte dhe fonde

Deputetët demokratë dhe drejtues të departamenteve të Partisë Demokratike, organizuan një audiencë me studentë të Fakultetit Juridik, Universiteti Luarasi, në lidhje me dhunën në familje. Takimi i titulluar ‘’Të gjithë bashkë kundër dhunës  për një Shqipëri europiane’’, synoi ndërgjegjësimin dhe trajtimin ligjor të dhunës në familje.

Dekani i Universitetit z.Dariel Sina, tha se takime të të tilla janë të një rëndësie të veçantë nisur nga përballja dhe shkëmbimi i opinioneve mes parlamentarëve dhe studentëve veçanërisht për tema të nxehta si ajo e dhunës.

Kryetarja e Komisonit të Çështjeve Sociale, Vokshi, tha se Universiteti mbetet gjithmonë një mjedis ideal për trajtimin e çështjeve sociale dhe me ndjeshmëri të lartë si ajo e dhunës ndaj gruas dhe në familje.

‘’Ju si studente duhet të nxisni edhe më tepër frymën e dialogut, pjesëmarrjes, jo vetëm në kurrikulat akademike por dhe ato në tema shoqërore. Pse jo të promovoni audienca në aulën universitare për çështjet e dhunës ndaj grave, dhunës në familje dhe problematika të çështjeve të grave dhe barazisë gjinore, në takime me deputetë, politikanë, intelektualë dhe anasjelltas brenda në Parlament”.

Vokshi tërhoqi vëmendjen se vetëm nga statistikat zyrtare rezultojnë një mijë raste dhunimi të grave dhe fëmijëve më tepër se viti i kaluar, ndërkohë që qeveria nuk ka parashikuar asnjë fond në buxhet për ngritje qendrash rehabilitimi apo programe riaftësimi per viktimat e dhunës.

Partia Demokratike hartoi një amendim buxhetit për trajtimin e grave te dhunuara por kjo ra në vesh të shurdhët dhe në mospërfillje, tha Vokshi. Ajo solli në vëmendje se mentaliteti i dhunës zotëron brenda në Parlament ku kandidate për deputete spostohen nga lista për t’ia lenë vendin burrave të fortë të politikës.

‘’Studentet duhet edhe më shumë të përfshihen në nisma vullnetarizmi në ndërgjegjësimin e shoqërisë kundër dhunës ndaj grave. Eksperiencat evropiane veçanërisht ato britanike dëshmojnë për një sukses të madh të përfshirjes së të rinjve në fushatë sensibilizimi dhe të vetë grave që të mos heshtin ndaj dhunës. Nuk është turp të denoncosh, të dëshmosh. Heshtja vret. Zëri i grave të dhunuara është ndërgjegjia e shprishur e secilit prej nesh, mashkull apo femër qoftë. Evropa nuk mund të na pranojë me dhunë dhe liri e të drejta të cënuara njerëzore. Një model shoqërie të tillë s’mund ta afrojë dhe ta pranojë asnjë civilizim evropian”.

Deputetja Mesila Doda tha se nëse një grua nuk fuqizohet në politikë dhe në ekonomi, shoqëria do të dështojë. Zonja Doda shpjegoi lobimet e forta që deputetet demokrate kanë bërë në Kuvend për çështjen e kuotimit në listat fituese për gratë që konkurrojnë në politikë. Në këtë frymë, tha ajo, ne kemi kërkuar amendim të Kodit zgjedhor që 30% të jetë kuotim real dhe jo trukim i partive për të marrë mbështetjen e tyre.

Kryetarja e Komisionit të Integrimit, Majlinda Bregu, tha se beteja kundër dhunës nuk duhet të jetë beteja e grave për gratë por dhe e burrave dhe e gjithë shoqërisë pasi dhuna ndryshon familjen, deformon ekuilibrat brenda saj dhe të vetë shoqërisë.

Zonja Bregu ngriti me shqetësim heshtjen e institucioneve më të larta të drejtësisë si Prokuroria e Përgjithshme, KLD dhe vetë Ministria e Brendshme në kërkesën për informacion mbi vendimet e dhëna nga gjyqësori për gratë e dhunuara dhe për rolin që ka policia si palë në proces në përfaqësimin dhe mbrojtjen e viktimave në rastin kur gratë tërrheqin padinë.

Nuk ka ndjeshmëri dhe përgjegjësi në trajtimin e dhunës me bazë gjinore nga sistemi drejtësisë dhe institucioneve, tha ajo.

Në takim u fol për amendimet që i nevojiten Kodit Penal kundër dhunës me zhvillimet marramendëse të mediave sociale në komunikimin njerëzor. Duke iu përgjigjur interesimit të madh të studentëve për  trajtimin më dinjitoz social që shteti duhet ti bëjë viktimave të dhunës deputetet i propozuan studentëve, juristë të ardhshëm, të propozojnë vetë amendime ligjore dhe ti depozitojnë në Kuvend.

Deputetja Jorida Tabaku duke iu përgjigjur pyetjeve mbi diskriminimin në paga të grave tha se femrave në Shqipëri u privohen shanset për të konkurruar në poste drejtuese në kompani biznesi apo instutucione, pengesë që ndikon dhe tek pagat. Zonja Tabaku tha se deputetët demokratë do paraqesin amendime ligjore për strehimin dhe punësimin profesional të grave në nevojë dhe kryefamiljare, si mundësi për jetë më të mirë për to dhe fëmijët. Ajo tha se motoja botërore kundër dhunës këtë vit ka qenë 50 me 50 që do të thotë se kjo kauzë kërkon angazhim të barabartë të burrave dhe grave për një shoqëri të zhvilluar.

Pjesëmarrës në panel, drejtues të departameneteve në Partinë Demokratike Tritan Shehu, Bashkim Shehu dhe Ervin Salianji, theksuan nevojën e ndryshimit të trajtimit të grave të dhunuara në komisariatet e policisë, nevoja për prezencën e psikologëve në mjediset e rendit dhe gjykatave si dhe trajtimit më profesional nga ana e shtetit i cili nuk shton qendrat pritëse për gratë e dhunuara.

Zoti Salianji tha se skandali i fundit i dërgimit të një nëne me fëmijën e mitur në komisariat, thyen të gjitha normat dhe konventat ndërkombëtare për të drejtat e fëmijëve.

Drejtuesit e departamenteve i bënë apel qeverisë të fokusojë vëmendjen tek integrimi shoqëror dhe ekonomik nëpërmjet hapjeve të vende të punës të grave të dhunuara e jo të shtojë buxhetet për rritjen e numrit të policëve.

Sekretari i Përgjithshëm, Arben Ristani denoncon emërimin nga Edi Rama në krye të OSHEE, të Dritan Celës, që aktualisht është nën hetim nga Prokuroria e Durrësit për 8 tendera që ka zhvilluar, ku dëmi i shkaktuar shtetit është 1.3 milionë dollarë

Edi Rama e plotësoi ciklin e inkriminimit të OSHEE-së, duke caktuar në krye të operatorit të energjisë një person që është nën hetim për korrupsion nga prokuroria e Durrësit.

Pasi caktoi, debitorë, hajdutë energjie, njerëz me precedent penalë nëpër degët e OSHEE-së në rrethe, Edi Rama ia besoi dy ditë më parë drejtimin e energjisë në vend, Ardian Celës, i cili është aktualisht nën hetim për favorizim në tendera.

Cela është paditur nga Kontrolli i Lartë i Shtetit në qershorin e vitit të kaluar, pas shkeljeve që ky institucion gjeti në tenderat që ai kishte zhvilluar në Bashkinë e Durrësit, si kryetar komisioni.

Media raporton se Kontrolli i Lartë i Shtetit ka gjetur abuzime në 8 tendera të zhvilluara nga i besuari i Edi Ramës, dhe sipas kontrollit, dëmi që ai ka shkaktuar është 1.3 milionë dollarë.

Aksioni policesk, arbitrar e brutal i Edi Ramës, ndaj qytetarëve që nuk kanë mundësi të paguajnë energjinë, se janë papunë dhe në mjerim ekonomik, ka cuar në qelitë e burgut, kryefamiljarë, prindër, motrën 17 vjecare që kujdeset për vëllezërit e motrat jetime.

Aksioni i Edi Ramës ka dërguar në komisariat edhe vajzën 5 vjecare të një gruaje të dëshpëruar që nuk paguan dot energjinë se nuk ka asnjë të ardhur.

Aksioni policeks i Edi Ramës ka detyruar një nënë nga Durrësi të ndërmarrë hapa ekstreme që i kushtuan jetën, vetëm e vetëm për të ndricuar vatrën e fëmijëve të saj, sepse qeveria nuk i krijoi asnjë mundësi për punë e dinjitet.

Aksioni policesk, brutal i Edi Ramës ka mbjellë errësirën në mijëra familje shqiptare që jetojnë në skamje, falë politikave të kësaj qeverie.

Qytetarët e papunë, dhe me ekonomi të rrënuar, përballen me faturat abuzive të OSHEE dhe kamatvonesat mbi këto fatura.

Cfarë bën Edi Rama? Nuk ofron asnjë zgjidhje.

Emëron në krye të OSHEE, një person që është nën hetim për korrupsion. Ky është pra modeli i Edi Ramës.

Qytetarët e pamundur në burg, hajdutët e energjisë në OSHEE, dhe ai që është nën hetim për korrupsion me 8 tendera me 1.3 milionë dollarë dëm shtetit, Drejtor i Përgjithshëm.

Protestë dhe protestë do të ketë.

Bashkimi masiv, popullor, i qytetarëve për drejtësi, për punë e dinjitet, do ta ndalë të keqen.

Këshilltari ligjor i Partisë Demokratike, Gazmend Bardhi i kërkon prokurorisë të nisë hetimin. Kemi të bëjmë me shkelje të nenit 27 të Kushtetutës, të neneve 5 dhe 6 të Konventës Europiane për të Drejtat e Njeriut, të nenit 37 të Konventës Për të Drejtat e Fëmijëve, të Kodit të Procedurës Penale dhe Ligjit për Policinë e Shtetit.

Ministria e Brendshme, Policia e Shtetit, dhe Edi Rama e kanë thelluar në mënyrë kriminale skandalin e mbajtjes në komisariat të vajzës 5 vjeçare për më shumë se 8 orë.

Në çdo vend demokratik, Kryeministri dhe Ministri i Brendshëm do të ishin alarmuar, do të ishin vënë në lëvizje për të marrë masa ndaj përgjegjësve. E vetmja gjë që bën Kryeministri Rama janë sulmet ndaj opozitës, e cila nxori në dritë këtë abuzim.

Kemi të bëjmë me një shkelje të shumfishtë të nenit 27 të Kushtetutës, të neneve 5 dhe 6 të Konventës Europiane për të Drejtat e Njeriut, të nenit 37 të Konventës Për të Drejtat e Fëmijëve, të Kodit të Procedurës Penale dhe Ligjit për Policinë e Shtetit, të çdo norme e tradite.

I heq lirinë në mënyrë të paligjshme një vajze 5 vjecare, e cila vuan edhe nga shëndetësore sipas dëshmisë së mamasë së saj, duke e shoqëruar dhe mbajtur në komisariat për orë të tëra, dhe pastaj del e gjuan Partinë Demokratike nga frëngjitë e tij, pse bën detyrën dhe denoncon këtë akt kriminal.

Partia Demokratike i kërkon sot Prokurorit të Përgjithshëm dhe Prokurorisë së Shtetit të urdhërojë arrestimin e menjëhershëm të porositësve dhe ekzekutorëve të këtij akti të rëndë kriminal, për heqjen abuzive të lirisë së një vajzë 5 vjece.

Derisa Edi Rama dhe Ministri i tij, nuk shfaqin asnjë shenjë pendese, asnjë shenje reflektimi, duke mos nxjerrë përgjegjësit e përgjegjësitë, ne i kërkojmë Prokurorisë të nisë menjëherë procedimin penal ndaj policëve e shefave të tyre, ndaj gjithë segmentit që është përfshirë dhe kanë pasur dijeni për këtë vepër penale.

Kjo polici që nuk kursen as një vajzë 5 vjece, është e rrezikshme, nuk i shërben qytetarëve, është e shurdhër dhe e verbër, duke shërbyer politikisht Ministrin dhe Kryeministrin.

Ndaj ne inkurajojmë Prokurorinë të vihet në lëvizje sot për ti caktuar kufinjtë ligjorë bandës së Tahirit dhe Edi Ramës.

Deklaratë e Këshilltarit ligjor të Partisë Demokratike, Gazmend Bardhi, 4 Dhjetor 2014

Partia Demokratike denoncon skandalin që po ndodh me aksionin policesk ndaj qytetarëve që nuk shlyejnë dot faturat e larta dhe abuzive të energjisë. Salianji: “Akt në kundërshtim me ligjin e Konventat Ndërkombëtare Për të Drejtat e Njeriut dhe të Mbrojtjes së të Drejtave të Fëmijëve”.

Partia Demokratike ka denoncuar sot një rast skandaloz të arbitraritetit dhe aksionit polices të qeverisë ndaj qytetarëve të pamundur për të shlyer energjinë. Dy ditë më parë, policia ka mbajtur të shoqëruar në komisariatin numër 3 në Tiranë, një fëmijë 5 vjec. Fëmija është marrë bashkë me nënë e saj, e cila është arrestuar pasi nuk përballon dot faturat e larta të energjisë, teksa është pa punë dhe pa mbështetje ekonomike.

Drejtori i Departamentit për të Drejtat e Njeriut në Partinë Demokratike, Ervin Salianji ishte sot para ambjenteve të komisariatit numër 3 ku denoncoi rastin.

“Marrëzia, papërgjegjshmëria dhe pashpirtësia e kësaj qeverie nuk ka fund. Tek ky komisariat, Komisariati nr 3 në Tiranë, është shoqëruar dhe mbajtur e izoluar kjo fëmijë 5 vjeç, çka duket nga fotot që vajza është mbajtur për një kohë të gjatë në qelinë e izolimit, në kundërshtim me Konventën Europiane të të Drejtave të Njeriut, Deklaratën për Mbrotjen e të Drejtave të Fëmijëve dhe Deklaratën e Pekinit. Shoqërimi i fëmijës është bërë për shkak se nëna e saj nuk ka mundësi të paguajë energjinë elektrike”, u shpreh Salianji.

Përfaqësuesi i Partisë Demokratike nënvizoi dy standardet që manifeston qeveria.

“Qeveria po arreston dhe po shoqëron njerëzit e pamundur dhe të varfër, fukarenj, dhe po promovon kriminelët, personat me precedent penal, vjedhësit e energjisë, duke i bërë drejtorë. Qeveria po lejon në rrugë kriminelët dhe po izolon si persona me rrezikshmëri të lartë shoqërore fëmijët. Identitetin e vajzës nuk e bëjmë të ditur për shkak se është minorene por në datën 30 nëntor, sipas dëshmisë së nënës së vajzës së ndaluar me inicialet N.N, janë izoluar në komisiariat”, tha Salianji.

Njoftim për shtyp i Partisë Demokratike, 3 Dhjetor 2014

Sekretarja e Marrëdhënieve me Publikun dënon skemën e Kryeministrit, larg realitetit që nuk njeh gjendjen dhe vështirësitë ekstreme të qytetarëve dhe familjeve ne vend. E vetmja zgjidhje, falja e kamatvonesave, pezullimi i faturave abuzive, dhe shqyrtimi i ankesave të abonenteve.

Edi Rama po provon çdo ditë se nuk e njeh realitetin dhe vështirësitë ekstreme ku jetojnë shqiptarët.

Kryeministri që po e zhyt në varfëri çdo vatër, çdo familje të vendit, del dhe thotë se shqiptarët i paskan paratë për të paguar energjinë, por nuk duan ta paguajnë atë.

Paguajeni në dorë, thotë dhe ai do tregohet bujar, do u falë 80 përqind të kamatës.

Kjo është skema e tij për pagesat, një skemë hiç më pak se sa kriminale.

Kryeministri i akuzon qytetarët, të cilët mbijetojnë çdo ditë, se i paskan paratë të fshehura diku, po thjesht nuk duan të paguajnë energjinë.

Shqiptarët, z.Rama nuk kanë me çfarë ta paguajnë energjinë!

Nuk kanë me se të paguajnë, sepse ke mbyllur dhe nuk ke krijuar asnjë vend të ri pune!

Shqiptarët nuk kanë mese të paguajnë, sepse faturat që kanë vendosur xhelatët e tu të OSHEE-së, janë abuzive, janë kriminale. Dhe dhjetë herë më shumë janë abuzive dhe kriminale kamatvonesat mbi to.

Shqiptarët, falë këtij kryeministri kanë humbur 22 mijë vende pune, falë këtij kryeministri hasen sot me çmime të rritura, me taksa të rritura, dhe me të njëjtën pagë e pension, pavarësisht se jetesa është shtrenjtuar.

Ndaj gjoja-skema e paraqitur dje është vetëm hedhje hi syve.

Nëse kryeministri i ka sytë e zënë, nga qeverisja me klientët e për klientët e tij, mbarë opinioni publik e sheh qartë se ky është një marifet i papranueshëm, për të kaluar radhën.

Shqiptarët, z.Rama nuk kanë me çfarë ta paguajnë energjinë.

Kjo është një lojë e paturpshme që ky kryeministër luan me popullin e tij. T’u marrësh kacidhen e fundit qytetarëve, t’u marrësh dhe lirinë duke i arrestuar e burgosur, kur nuk u ka mbetur asgjë pos shpirtit, është thjesht sjellje prej gangsteri.

Hajdutëria e energjisë,  afera më korruptive e kohëve moderne, më e madhja në gjithë rajonin, ndarja e 600 milionë eurove me kompaninë CEZ, nuk mbulohet duke zhvatur nga xhepat e shqiptarit të thjeshtë.  Një ndarje ku me siguri ka hisen e tij dhe kryeministri, si autor i gropës më të madhe financiare që i është krijuar vendit dhe pasurisë publike.

Ka vetëm një zgjidhje, falje të kamatvonesave, pezullim të faturave abuzive, shqyrtim të shpejtë të ankesave të abonentëve.

Errësira që ka mbjellë kjo qeveri në shtëpitë e qytetarëve është kriminale.

Por shqiptarët dalin në dritë, dhe e treguan këtë me 22 nëntor!

Do ta tregojnë sërish!

Ne jemi me ta, dhe protesta nuk ndalet derisa të ketë drejtësi.

Derisa e keqja të marrë udhët.

Deklaratë e Sekretares për Marrëdhënien me Publikun, Grida Duma, 3 Dhjetor 2014

Kryetari i Partisë Demokratike: Ndal rritjes së cmimit të energjisë. Rama jashtë realitetit të krizës ekonomike ku ka futur shqiptarët

Të nderuar qytetarë shqiptarë.

Dy fjalë përshkruajnë përpjekjen e dëshpëruar të kryeministrit sot.

Hi syve.

Asgjë më shumë nuk është qëndrimi i Kryeministrit për energjinë, për gjëndjen e dëshpëruar ku janë sot mijëra familje e qytetarët shqiptarë për shkak të faturave abuzive, dhe malit abuziv me kamatvonesave abuzive për shkak të faturave abuzive.

Asnjë zgjidhje nuk ofron me gjasme skemën e prezantuar.

Protesta masive qytetare e 22 nëntorit në Tiranë, marshimi kundër padrejtesisë e detyroi të bënte një hap pas, por Rama e la sërish lakun në fytin e të pamundurve.

Ai vazhdon të lërë në fuqi faturat abuzive, dhe kamatvonesat mbi to. Ai ka gjobitur padrejtësisht qytetarët e vendit, dhe tani u thotë se gjoba e padrejtë mbetet në fuqi, ju do ta paguani atë, por duke e zgjatur dhimbjen dhe agoninë.

U ofron një vdekje të ngadaltë dhe të dhimbshme, në vend të gijotinës që vendosi në shesh deri para protestës popullore.

U thotë qytetarë, nëse paguani gjobën e padrejtë, malin me kamatvonesa mbi faturat abuzive, nëse e paguani në dorë, atëherë do të keni ulje. Vetëm gangsterët sillen kështu.

Në mënyrë kriminale, Edi Rama ka zbuluar subkoshiencën e tij  ku pretendon se qytetarët kanë me se, po nuk duan të paguajnë.

Kriminale sepse është përgjegjësia e tij të njohë realitetin e dhimbshëm të Shqipërisë reale ku jetojnë shqiptarët jashtë luksit kryeministror.

Mijëra familje në vend janë në kufinjtë e mbijetesës. Qindra mijëra të tjera jetojnë në kufinjtë e varfërisë ekstreme. Pjesa më e madhe e qytetarëve, e pensionistëve, e kryefamiljareve, e shtresave në nevojë, nuk kanë me se të paguajnë.

U thotë paguajani xhandarit, plus 20 %, tua fal 80 përqindëshin. Me çfarë të paguajnë?!

Me çfarë ti paguajnë kur nuk ka hapur asnjë vend pune por ka mbyllur sipas INSTAT-it 22 mijë të tillë, kur në fakt shifra është shumë më e lartë. Me çfarë të paguajnë kur rrogat nuk janë rritur, zyrtarisht janë ngrirë. Pensionet nuk janë rritur, por çmimet janë rritur, taksat janë rritur. Me çfarë t’i paguajnë?!

Faturat që the se do ti falje, se ishin abusive, dhe u bëre thirrje qytetarëve që të mos i paguajnë.

Premtove dritën e parajsës, por solle errësirën e ferrit.

Premtoi ulje të cmimit të energjisë, me uljen drastike me 6% të TVSH-së. Mos kujto se shqiptarët kanë harruar. Nuk e bëri, dhe tani po bën gati rritjen e çmimin të energjisë.

Vetë u kërkoi qytetarëve të mos paguajnë faturat e energjisë, u kërkoi që të mos i njohin faturat e energjisë sepse kur të vije zotrote do t’i rishikoje.

Jo vetëm nuk e ke bërë këtë, por ke mbjellë në çdo familje të vendit mjerimin e faturës abuzive, e sot mbi to kamatvonesat abuzive. Të gjithë këtë skemë kriminale Kryeministri e vuri në jetë pasi në mënyrë korruptive fali apo ndoshta ndau 600 milionë Euro të shqiptarëve detyrime të njohura nga hajdutja më e madhe e kohërave, kompania CEZ- sha në Shqipëri.  E vuri në jetë me xhahilët e OSHEE-së, me hajdutët më të paskrupullt të asaj që ka qef ta quajë pasuria e përbashkët, debitorë si ai i Lushnjës apo i Tropojës, deri në 17 milionë lekë, që ti i ke emëruar, me rekorde kriminale. Ia ke varur mëlçitë ujkut në qafë.

Kjo është pra politika e Edi Ramës me dritat, me energjinë. Një terr i pashpirt.

Një likuidim i kacidhes më të fundit të shqiptarëve, dhe kur atë nuk e gjen më, ndëshkim me burg.

Por qytetarët e këtij vendi treguan se nuk lejojnë padrejtësi. Nuk e pranojnë të keqen.

Prandaj sot në emër të Shqipërisë në protestë po përsëris kërkesën tonë, kërkesën e qytetarëve shqiptarë;

Fali kamatë-vonesat e faturave abuzive që the se do t’i anulloje sa ishe në fushatë. Mos e rrit çmimin e energjisë asnjë qindarkë, por mbaj premtimin për uljen e tij. Merr masa të menjëhershme për pezullimin e çdo fature abuzive dhe adresimin me precedencë dhe urgjencë të ankesave të qytetarëve për faturat abuzive dhe korruptive të OSHEE-së.

Ky regjim, kjo mendësi mesjetare, që nuk sjell dritë por errësirë, që nuk sjell zhvillim, por mjerim, që nuk njeh ligj, por thellon pabarazinë, dhe avantazhon zuzarët dhe kriminelët, që nuk bashkon por fut ndasi mes qytetarëve duhet të ndalet. Dhe do të ndalet.

Deklaratë e Kryetarit të Partisë Demokratike, Lulzim Basha, 2 Dhjetor 2014