Blog

Kryetari i Partisë Demokratike deklaron se tërheqja e qeverisë dhe pranimi i kërkesës së opozitës për shlyerjen e detyrimeve me këste të përballueshme, ishte lëvizje e detyruar nga protesta e qytetarëve. Basha përsërit kërkesën për faljen e kamatvonesave mbi faturat abuzive, pezullimin e pagesave për faturat e ankimuara, dhe trajtimin e shpejtë të ankesave të qytetarëve. 

Protesta e fuqishme e qytetarëve kundër arbitraritetit të qeverisë, e detyroi Edi Ramën të kthehet nga kursi i tij i marrë, i ndëshkimit kolektiv, i burgosjes së qytetarëve për shkak të pamundësisë për të shlyer faturat e larta dhe abuzive të energjisë elektrike.

Edi Rama nuk u la qytetarëve asnjë alternativë tjetër përpos qelisë së burgut, asnjë mundësi, nuk hapi asnjë vend pune, por mbylli me dhjetëra mijë të tillë,  nuk krijoi asnjë mundësi për familjet që mezi ushqejnë fëmijët.

Ne, opozita, Partia Demokratike kërkuam në mënyrë të përsëritur, që qeveria të aplikonte një sistem ku t’u jepte mundësi qytetarëve të shlyenin detyrimet e tyre me këste të përballueshme. Kërkuam shansin që detyrimet e ligjshme të paguheshin me këste të përballueshme dhe të arsyeshme.

Por Edi Rama insistoi në kursin e tij të marrë, duke u shtrënguar qytetarëve të vendit lakun në fyt. Kërkoi t’u marrë edhe kacidhen e fundit, por kur u mori dhe kacidhen e fundit dhe qytetarëve u mbeti vetëm shpirti, i plasi edhe në burg, me aksione policore banditeske që nuk kursyen as gra, kryefamiljarë, e vajza të mitura.

Dhe teksa tundte kërbacin mbi qytetarët e pamundur, vetë ai, Edi Rama, solli në krye të OSHEE-së, hajdutë të pashembullt të energjisë, persona më precedentë penalë, militantë të verbër pa asnjë arsimim, të zhytur në  abuzime e korrupsion,  te cilët nëpërmjet abuzimit me mbifaturim apo vendosjes se faturave aforfe, sollën mundësi reale mospagimi nga qytetaret.

Tërheqja që bëri sot Edi Rama nga kursi i tij i marrë është një lëvizje e detyruar nga bashkimi i zërit të qytetarëve në protestën e madhe popullore të 22 nëntorit.

Nuk është një zgjedhje e tij, të jemi të qartë. Zgjedhja që bëri Edi Rama, ishte e kundërta, ishte kundër zërit të qytetarëve, kundër kërkesave të përsëritura të tyre dhe të opozitës.

Ai refuzoi të dëgjonte shqetësimin e tyre, refuzoi të dëgjonte zërin e tyre, derisa u përball me protestën e madhe të 22 nëntorit në Tiranë. I gjendur përballë sovranit që nuk e mban dot me policë, sado ti shtosh ata, ai u detyrua të sprapset.

Prandaj, kjo është një fitore e qytetarëve. Eshtë një fitore e bashkimit të zërit të qytetarëve në protestë.

Por deri tani, zgjidhja e plotë dhe përfundimtare është ende larg.

Sot dua të përsëris propozimin e Partisë Demokratike:

-për faljen e të gjithë kamatvonesave të debitorëve të energjisë elektrike të akumuluara ndër vite si pasojë e abuzimit me faturën  e energjisë elektrike nga ana e shtetit.

-Pezullimin e pagesës së faturave, për të gjithe rastet për të cilat ka një ankimim si mbifaturim, pezullimin e menjëhershëm të ekzekutimit të këtyre faturave dhe mosnderprerjen e energjisë për qytetarët.

-Ngritjen e një sistemi verifikimi të shpejtë për të gjitha ankesat e akumuluara për këtë çështje, për t’i kthyer përgjigje në kohë qytetarëve dhe për të shmangur në kohë pagesat dhe akumulimin e faturave abuzive dhe kamatvonesave.

Partia Demokratike i inkurajon qytetarët dhe çdo familje në vend, të shlyejnë detyrimet e njohura dhe të pakontestuara të energjisë elektrike.

Por ne nuk do të lejojmë për asnjë moment eksperimente kriminale mbi shoqërinë, mbi qytetarët, pabarazinë para ligjit, dhe dhunimin e të drejtave themelore të garantuara nga Kushtetuta dhe ligji.

Kjo e sotmja është një arritje e demokracisë, e protestës dhe bashkimit të zërit të qytetarëve si fuqi supreme dhe e papërballueshme nga çdo qeveri. Ky është mësimi sot.

Protesta jonë e drejtë, protesta e qytetareve do të vazhdojë derisa të gjitha kamatvonesat të falen e të eleminohen nga sistemi i faturimit bashkë me faturat abuzive.

Vetëm protestat do ta ndalin planin e çmendur të Edi Ramës për rritjen e çmimit të energjisë, rritjen e taksave dhe përkeqësimin e mëtejshëm të ekonomisë, që është futur tashmë në recensionin Rama-Meta, përmes politikave të tyre të papërgjegjshme.

Deklaratë e Kryetarit të Partisë Demokratike, Lulzim Basha, 2 Dhjetor 2014

Deklaratë e Sekretarit të Përgjithshëm, Arben Ristani ku denoncohet modeli i Ramës si ai i drejtorit të OSHEE Tropojë, person me precedent penal, që ka 16 milionë e 900 mijë lekë energji të papaguar

Shqipëria është në protestë sepse padrejtësia dhe pabarazia po arrin kulmin.

Edi Rama ka futur një ndasi kriminale në shoqëri.

Miqtë e Edi Ramës janë në një anë, të privilegjuar, hajdutë të energjisë, persona me precedent kriminalë.

Në anën tjetër janë të pamundurit, ata që duan punë e dinjitet, që trajtohen si armiq nga Edi Rama.

Këta qytetarë të pabarabartë kërkojnë një punë, një mundësi për të ushqyer familjen, për të paguar dritat.

Të tjerët, ata që vjedhin energjinë në shuma të mëdha, të dënuarit për vepra të rënda penale, janë të preferuarit e Kryeministrit. E kanë respektin e Edi Ramës, promovohen dhe praktikisht qeverisin vendin.

Kemi këtu rastin e drejtorit të OSHEE-së së Tropojës. 16 milionë e 900 mijë lekë drita të papaguara.

Me Edi Ramën kryeministër, vajza të mitura gjenden sot në burg se nuk kanë mundësi të paguajnë energjinë.

Me Edi Ramën kryeministër, hajdutët e pacipë të energjisë, abuzuesit e pashembullt, janë administratorë të energjisë.

Drejtori i Edi Ramës në Tropojë, ka edhe një të kaluar problematike.

Ja ku kemi këtu vendimin. Eshtë dënuar për armëmbajtje pa leje, dhe largim nga vendi i qëndrimit.

Shqipëria është në protestë, sepse nuk mund të durojë eksperimentet kriminale të Edi Ramës.

E ka kthyer vendin në laborator të dhunimit të qytetarëve të ndershëm, dhe gradimit të hajdutëve dhe personave të dënuar.

Ky është realiteti i përditshëm.

Qytetarët do të ngrihen cdo ditë.

Kjo e keqe do të ndalet.

Deklaratë e Sekretarit të Përgjithshëm, Arben Ristani, 2 Dhjetor 2014

Kryetari i Partisë Demokratike: Kryesia e re, ndërthurje e përfaqësimit dhe harmonisë

Anëtarët e kryesisë, cdo ditë në kontakt me qytetarët e vendit që po vuajnë nga papunësia, varfëria dhe arbitrariteti i qeverisë

Së pari shpreh kënaqësinë time që drejtoj  këtë mbledhje të parë të Kryesise së re të Partisë Demokratike të Shqipërisë.

Dje politika mori një leksion demokracie. Ne zgjodhëm përmes një procesi konkurues të ndershëm dhe transparent forumet tona drejtuese. Asnjë parti në historinë politike të Shqipërisë nuk ka reformuar lidershipin në qendër dhe në degë, bazuar tërësisht në votën e lirë të anëtarësisë.

Kemi hyrë në epokën e lirisë dhe sovranitetit të qytetarëve dhe anëtarëve të partive. Dhe kësisoj kemi paralajmëruar se po i vjen fundi mentalitetit të kazermës që i kthen partitë dhe shtetin në aksesorë sundimtarësh.

Sot Partinë Demokratike, opozitën e vendit, nesër qeverinë.

Ndryshimi ka nisur dhe do të vazhdojë papushim.

Dua t’ju uroj suksese të gjithë anëtarëve të kryesisë së PD-së në këtë mbledhje të parë, të uroj dhe njëherë gjithsecilin prej të zgjedhurve të rinj, Sekretarin e Përgjithshëm, sekretarët dhe drejtuesit e Departamenteve, dy nënkryetarët e votëbesuar së bashku me kryesinë e grupit parlamentar, kryetarët dhe nënkryetarët demokratë të komisioneve parlamentare.

Dy janë fjalët kyçe që shprehin më mirë se të tjerat përbërjen e këtij ekipi: Përfaqësim, harmonizim.

Përfaqësim dhe harmonizim i përvojave, karrierave, kontributeve, moshave, gjinive, duke ruajtur si kriter përbashkues vlerat politike dhe intelektuale të gjithsecilit.

Përfaqësimin dhe harmonizimin i prodhoi dhe i vulosi vota e lirë, ndaj kemi arsye ta konsiderojmë festë dhe leksion të demokracisë votimin e djeshëm.

Partia Demokratike është sot më e fortë me kryesinë e re, me ekipin e ri.

Me këtë Kryesi, me ju, të gjithë demokratët janë sot edhe më të fortë, edhe më optimistë në sfidat e opozitarimit, të Nisjes së Re dhe të fitorës.

Zonja dhe zotërinj, anëtarë të kryesisë.

Mbledhja jonë e parë zhvillohet në kohë të vështirë për vendin.

Përballë kemi një mazhorancë që po e përkeqëson përditë jetën e shqiptarëve.

Rritje papunësie, rënie ekonomike, rritje taksash , rritje çmimesh, është ajo çfarë ka bërë qeveria Rama-Meta për qytetarët.

Siç u dëshmua dhe në protestën e 22 nëntorit , shqiptarët kanë sot më shumë se kurrë nevojë për shpresë prandaj i kanë kthyer dhe po i rikthejnë sytë nga Partia Demokratike. Eshtë detyrimi ynë të jemi me ta dhe përkrah tyre në këtë përballje me keqqeverisjen e qeverisë Rama–Meta dhe recesionin të prodhuar nga Rama-Meta.

Situata po shkon keq e me keq, kriza ekonomike po thellohet. Ndërsa qeveria vazhdon të bëjë sehir, nuk  dëgjon rënkimin e qytetarëve që nuk arrijnë në një masë të madhe as të sigurojnë  bukën e përditshme pa u zhytur në borxhe.

Kryeministri vazhdon të bëjë xhonglerin televiziv. Premtoi ulje të çmimit të energjisë. Premtoi ulje me 14 përqind të TVSH-së për energjinë.  Çfarë bëri. Jo vetëm nuk e uli, por po e rrit.

Mesatarizimi është mashtrimi, sepse mesatarizimi në fakt është rritje e çmimit të energjisë.

Këtë, shqiptarët e kanë të qartë sepse vetëm nga prezantimi i një çmimi unik, shqiptarët, do të duhet të paguajnë mbi 160 milionë dollarë më shumë ndërkohë që qeveria thotë se u ka vënë në dispozicion shtresave në nevojë vetëm 16 milionë dollarë për kompensim.

Xhongleri thotë se taksa e re e karburantit do të ulë çmimet. Por ajo që nuk u thotë shqiptarëve është se përse në vendin tonë çmimet e hidrokarbureve në Shqipëri janë ulur 5-7%, kur në botë janë ulur me 35%? Dhe përgjigja është se taksat e tij që nuk lejojnë që çmimi i hidrokarbureve në Shqipëri të jetë siç është në Europë dhe botë. Por është më i lartë sepse këto para shtesë, i merr qeveria.

Xhongleri thotë se është rritur konsumi e kanë rënë çmimet. E verteta është se konsumi ka rënë, çmimet e mallrave ushqimore janë rritur rreth 8-10%. Vetëm veza është rritur mbi 60%. Pagat e pensionet do të indeksohen me vetëm 2%; eksportet kanë rënë dhe defiçiti tregtar është në thellim.

Xhongleri thotë se ka hapur 81 mije vende të reja pune dhe këtu ka 3 topa që xhonglon në të njëjtën kohë. Instituti i Sigurimeve Shoqërore thotë se nuk janë hapur vende pune, por në të kundërt janë mbyllur 1 mijë të tilla. Statistikat e Administratës Tatimore dhe të Institutit të Sigurimeve Shoqërore sugjerojnë se të hyrat nga taksat e punës dhe kontributi i sigurimeve shoqërore dokumentojnë një rënie prej 1 mijë vende pune. Ndërkohë që INSTAT deklaron 22 mijë vende pune më pak.

Mashtrimi i madh me të cilën erdhën në pushtet, del si tullumbacja më e madhe. Pas mashtrimit për legalizime falas,  shëndetësi falas,  uljes se TVSH-së për çmimin e energjisë, tashmë një megamashtrim u konfimua dhe hapja e 300 mijë vendeve të reja të punës. Ditë për ditë mbyllen vende pune, ditë për ditë flaken në rrugë qytetarët këtij vendi.

Kjo është situata. Kjo është koha. Ky është momenti në të cilin jetojmë, ky është momenti i konstituimit të kryesisë së re të Partisë Demokratike.

Eshtë detyra jonë, e të gjithë sa jemi këtu, e deputetëve të Partisë Demokratike, të rinisim me vrull kontaktin e vazhdueshëm me qytetarët nga Jugu në Veri.

Ne do të jemi jo vetëm zëri i qytetarëve por do të vëmë në shërbim të tyre të gjitha kapacitet tona për t’u ofruar asistencë ligjore dhe për të denoncuar çdo padrejtësi që u bëhet atyre, të cilat në fakt sa vijnë dhe shtohen.

Në Partinë Demokratike kanë mbërritur me dhjetra denoncime të heqjes së mësuesve nga puna në një fushatë që po nis ethshëm dhe paligjshmërisht. Njerëz që kanë shërbyer për dekada në arsim, që kanë arsimin dhe profilin e duhur sipas ligjit.  Departamentet përkatëse duhet ti trajtojnë menjëherë të gjitha këto raste dhe t’i japin çdo personi  asistencën e nevojshme ligjore.

Sot nuk ka shqiptarë që nuk e di se çfarë qametesh ka mbjellur kjo mazhorancë në administratë. Nga persona me precendent kriminal të emëruar në krye të timoneve, lokalë dhe qendrorë, tek sekserë perversë që ofrojnë vende pune për favore seksuale, te drejtues të arsimit dhe të zyrave të pushtetit që përveç parave u bëjnë presion mësuesve dhe të miturve për favore seksuale. Kjo është e papranueshme,  kjo është e turpshme dhe është një përgjegjësi e dyshes Rama-Meta.

Me qindra denoncime kanë mbërritur në Partinë Demokratike sa i përket abuzimit me faturat e energjisë elektrike. Fatura afrofe, kamatvonesa abuzive dhe korrupsion ku u kërkohet qytetareve të japin para ose do t’u presin dritat pa asnjë të drejtë. Dosjet duhet të përgatiten me shpejtësi  dhe të shkojnë para organeve të Prokurorisë për t’i çuar këta bashibazukë para drejtësisë.

Por ky fenomen është një turp i madh, është një mënxyrë e madhe, është një përgjegjësi e dyshes Rama-Meta.

Sot me mijëra qytetarë e familjarë të këtij vendi nuk kanë energji elektrike, mijëra fëmijë janë të detyruar të mësojnë nën dritën e qirinjeve, sepse nuk kanë mundësi prindërit e tyre të paguajnë faturat e kripura dhe abuzive të shtypura me symbyllur në zyrat e OSHEE.

Me qindra studentë braktisin shkollën se nuk kanë asnjë mundësi të paguajnë tarifat e rritura.

Nga ana tjetër, drejtorët e OSHEE-së nga Jugu në Veri, nga Lushnja në Tropojë janë në radhën e parë të vjedhjes, abuzimit dhe shpërdorimit.

Shikoni denoncimin më të fundit. Drejtori i OSHEE-së së Tropojës, kryesulmuesi i brigadave hajdute të Ramës e të Metës, me 16 milionë e 900 mijë lekë, sipas këtij denoncimi. Lekë të papaguara. Dhe për këtë është promovuar, është bërë drejtor i OSHEE-së në Tropojë.

Kjo është vetëm një pjesë e problematikës me të cilën ndeshen qytetarët sot.

E kam thënë dhe po e ripërsëris, ne do të jemi aty ku kanë nevojë qytetarët, ne do të jemi aty ku qytetarët kërkojnë mbështetjen tonë dhe kanë nevojë për mbështetjen tonë. Ne nuk do ti lëmë vetëm, do të jemi në anën e tyre, do të jemi në ballë të protestës së tyre. Protestë që sa vjen e shtohet, zgjerohet dhe bëhet gjithnjë e më e fuqishme.

Une dhe secili prej jush do të jemi cdo dite në kontakt te vazhdueshëm me qytetarët në cdo qytet dhe fshat të Shqipërisë. Kryesia e PD-së do të ketë vetëm selinë qendrore këtu në Tiranë, aktiviteti juaj i deputeteve dhe i imi do të jetë në cdo qytet, lagje, rrugë, komunë dhe fshat, krah për krah qytetarëve shqiptarë, në hallet, problemet e tyre dhe të vendosur për ti dalë zot halleve të tyre dhe fateve të Shqipërisë.

Ndaj edhe e sotmja nuk është dhe nuk mund të ishte vetëm një konstituim ceremonial. Eshtë një takim pune dhe në këtë rast duke përsëritur urimet më të përzemërta për anëtarët e kësaj kryesie, le të nsim nga rendi i ditës.

Njoftim për shtyp i Partisë Demokratike, 1 Dhjetor 2014

Partia Demokratike ka mbështetur dhe mbështet me forcë transparencën ligjore dhe institucionale për krimet e komunizmit dhe përgjegjësitë për këto krime, në bazë të rezolutave të Këshillit të Europës dhe praktikave më të mira Europiane.

Dyshja Rama-Meta katër vjet më parë kundërshtoi me forcë Ligjin për Lustracionin të propozuar dhe të miratuar nga Partia Demokratike.

Dyshja Rama – Meta ka risjellë sot në pushtet dhe pozicione drejtuese kuadro të larta të ish Sigurimit të Shtetit. Kjo është arsyeja se pse as transparenca ligjore dhe institucionale dhe as hapja e dosjeve nuk mund të bëhen nga kjo dyshe.

Edi Rama nuk ka asnjë interes dhe asnjë mundësi të bëjë transparencë të besueshme. Nuk mund të hapin dosjet vetë hartuesit e tyre që sot janë rikthyer në pushtet me Edi Ramën dhe Ilir Metën.

Kjo cështje është  aktivizuar javët e fundit nga Edi Rama dhe marionetat e tij politike dhe mediatike për të zhurmuar të gjithë problematikën e keq-qeverisjes. Për të larguar vëmendjen e opinionit publik nga braktisja e pashembullt e premtimeve elektorale dhe futja e vendit në krizë ekonomike. Nga skandalet e përditshme të qeverisjes dhe perspektiva akoma më e errët për vendin me rritjen e taksave dhe buxhetin klientelist. Nga kriminalizimi i qeverisjes dhe i parlamentit.

Partia Demokratike është e vendosur që së bashku me përfaqësuesit legjitimë të ish të përndjekurve politikë të jetë në ballë të përpjekjes për zbardhjen e krimeve të komunizmit dhe përgjegjësive për këto krime.

Por kjo nuk mund të arrihet as nga duart e pista të ish-persekutorëve të regjimit sot në qeveri dhe as me duar të tjera të përdorura për qëllimet e tyre.

Deklaratë e nënkryetarit të Partisë Demokratike dhe kryetarit të Grupit Parlamentar, Edi Paloka, 1 Dhjetor 2014

Edi Rama ka shpenzuar disa qindra milionë lekë për festat dhe dekorin e fundjavës, ndërkohë që Shqipëria është në mjerim, e teksa qytetarët nuk kanë 10 mijë lekë të vjetra të paguajnë dritat, sepse nuk kanë një vend pune.

Duke jetuar në botën e tij paralele, pa asnjë komunikim me jetën e vështirë të qytetarëve, Edi Rama e zgjidh me bujari qesen e qindra milionë lekëve, për koncerte, skenografi, e për medalje, para që në fund shkojnë tek firmat që kanë ngritur ministrat ose stafi i tij i ngushtë.

Media ka zbluar se janë rreth 300 milionë lekë që i ka marrë e njëjta kompani që shpërblehet nga Edi Rama sa herë ka një aheng qeveritar.

Media ka zbuluar se janë rreth 500 milionë lekë nga taksagapuesit, të dhëna për këngëtaren.

Eshtë zbuluar në media se janë rreth 50 milionë lekë të shpenzuara për dekorata për të ushqyer më së shumti ideologjinë që sjell konflikt e jo bashkim.

Dhe teksa Edi Rama bën gosti të shfrenuara për festat e tij qeveritare, media zbulon se një 17 vjecare në Pukë arrestohet, sepse ka motra dhe vëllezër më të vegjël për të mbajtur, e nuk jeton dot në errësirë, sepse nuk ka 10 mijë lekë të vjetra për të paguar dritat.

Shpenzimet e cmendura qeveritare, vijnë në një kohë, kur buxheti i ri parashikon ulje fondesh për të varfërit, për të pamundurit, për asistencën, për fermerët, për shëndetësinë e arsimin.

Më të mëdha do të jenë shpenzimet qeveritare në vazhdim, sepse kështu i ka parashikuar Edi Rama me buxhetin e ri, teksa i ka rritur ato me 30 përqind krahasuar me një vit më parë.

Pikërisht për këtë verbëri për të parë realitetin e shqiptarëve në nevojë, pikërisht për këtë arrogancë të qejfeve të shfrenuara qeveritare, Shqipëria është në protestë. Dhe protestë do të ketë derisa kjo e keqe të ndalet.

Deklaratë e koordinatores Reila Bozdo, 1 Dhjetor 2014

Mesazhi i Kryetarit të Partisë Demokratike para Këshillit Kombëtar, me rastin e zgjedhjeve të forumeve të larta drejtuese: 

“Secili prej të zgjedhurve duhet të jetë çdo ditë pranë qytetarëve për t’i dëgjuar, për t’i mbështetur, që ata të ndjejnë se nuk janë vetëm në braktisjen e  madhe që u ka bërë dyshja Rama Meta”

“Përgjegjesi për të mos u dhënë paqe mashtrimeve, dështimeve, klientelizmit, krimit dhe korrupsionit qeveritar. Marrim përgjegjësi për të mbrojtur me çdo çmim demokracinë. Marrim përgjegjësi për të përgatitur alternativën e ringritjes së vendit dhe të ekonomisë”

Të nderuar anëtarë të Këshillit Kombëtar të Partisë Demokratike

Sot është një ditë e shënuar për Partinë Demokratike: zhvillojmë mbledhjen e parë të Këshillit të ri Kombëtar; do të votëbesojmë nënkryetarët, dhe anëtarët e kryesisë që vijnë si rezultat i detyrave të tyre në Grupin Parlamentar, do të zgjedhim sekretarët dhe krerët e departamenteve, të cilët, së bashku me kryesinë e Grupit Parlamentar, kryetarët dhe nënkryetarët demokratë të  komisionëve parlamentare do të përbëjnë Kryesinë e re të Partisë Demokratike.

Me ketë rast, kam kënaqësinë t’u uroj të gjithëve dhe gjithësecilin prej jush, për zgjedhjen tuaj anëtarë të Këshillit Kombëtar dhe të shpreh besimin tim të plotë se ky Këshill, përveçse forumi më i rëndësishëm i Partisë Demokratike nga një Kuvend Kombëtar në tjetrin, do të jetë një seli e  urtësisë e mençurisë, fuqi e pararojës në sfidat tona të opozitarimit sot dhe të qeverisjes nesër.

Në mbledhjen e sotme përmbyllet procesi i rëndësishëm i zgjedhjes së forumeve, dhe drejtuesve të rinj të Partisë në gjithë piramidën e saj.

Nga zgjedhjet e sotme do të dalë pjesa përfundimtare e që do të punojë çdo ditë, non stop, për të  intensifikuar e fuqizuar aksionin politik opozitar të partisë, për të çuar përpara Nisjen e Re dhe të gjitha synimet e objektivat që përcaktuam në Kuvendin Kombëtar, për të përgatitur programin tonë të detajuar politik, ekonomik, që do të jetë propozimi ynë i ri, alternativa jonë e re për Shqipërinë dhe shqiptarët.

Programet janë gjysma e punës. Njerëzit që angazhohen për hartimin dhe zbatimin e tyre janë pjesa tjetër. Një parti politike, sidomos kur është në opozitë, merr tiparet e përkushtimit të drejtuesve, të ekipeve, të gjithë atyre që drejtojnë.

Ja pse sot anëtarësia e gjërë e Partisë Demokratike dhe jo vetëm, ka drejtuar vemendjen te kjo mbledhje dhe pret produktin e saj. Opinioni publik po kështu.

Gara e parë e madhe është bërë për të ardhur këtu. Në këtë fazë ku kemi mbërritur, mbi këdo që  do të bjerë zgjedhja, do të bjerë drejt. Gara është mes më të mirëve.

Numri i madh i aplikimeve për këto funksione politike dhe sidomos cilësia e tyre e lartë dhe shumë e lartë, ishte lajmi i mrekulleshëm në një anë i angazhimit dhe vendosmërisë së aplikantevë për të marrë përgjegjësi dhe për të kontribuar në vijën e parë të opozitarimit dhe nisjes së re, dhe e vërteta po aq e mrekulleshme në anën tjetër e ekzistencës dhe ardhjes në Partinë Demokratike të individëve me vlera të spikatura si profesionistë, si ekspertë, si intelektualë, si qytetarë dhe sigurisht edhe si njerëz të apasionuar me politikën si përkushtim ndaj qytetarit.

Kur ka kaq shumë aplikantë cilësorë është e lehtë, por edhe vështirë njëkohësisht për të përzgjedhur ata që do ta vazhdojnë garën. Ata që nuk do ta vazhdojnë sot këtë garë kanë vlerësimin dhe nderimin tim të thellë, vlerësimin dhe nderimin e gjithë Partisë Demokratike; ata janë të gjithë pa përjashtim një vlerë e madhe e shtuar e burimeve njerësore dhe politike të PD-së, pjesë e ekipit të madh drejtues e kontribues që nuk ka qënë e nuk mund të jetë i kufizuar vetëm te një numër të zgjedhurish.

Nuk ka dyshim se duke marrë gjithsecili prej të zgjedhurve të rinj përgjegjësitë e veta, brenda përgjegjësisë së përbashkët, dhe duke punuar e jetuar politikisht në frymën e solidaritetit dhe kolegjialitetit bashkëkohor, Partisë Demokratike do t’i shtohen forcat, do të jetë shumë më efikase dhe kjo do të fillojë të ndihet menjëherë.

Të nderuar anëtarë të Këshillit Kombëtar,

Përgjatë maratonës politike për ringritjen dhe rinisjen e Partisë Demokratike pas rezultatit në zgjedhjet e 23 qershorit, ne realizuam regjistrimin dhe riregjistrimin e anëtarësisë së Partisë dhe krijuam për herë të parë një bazë të të dhënave, siç nuk e ka asnjë parti tjetër në vend.

Partia Demokratike numëron sot 105 mijë anëtarë të rregullt.

Në asnjë moment të jetës së saj kjo parti nuk ka qenë një parti  në letër. Përkundrazi, ka qenë dhe është një parti e gjallë e veprimit, e përballjeve në fushë të hapur me çdo lloj te keqe, e arritjeve, e zgjidhjeve, e punëve të mëdha, e veprave konkrete.

Por ka qenë jetike që të bëhej edhe ky formalizim në kuptimin më modern të fjalës, me qëllim që kur të votohen forumet dhe të zgjedhurit e Partisë Demokratike të dihet se po votojnë anëtarët e Partisë Demokratike, kur të promovohen apo angazhohen zyrtarë politikë të dihet se po vinë nga burimet njerëzore të Partisë Demokratike, kur të anëtarësohen anëtarë të rinj ata të marrin  sadisfaksionin dhe përgjegjësinë e bashkimit me një organizatë politike me rregulla, që i  njeh në çdo kohë dhe i vlerëson lart anëtarët e saj.

Përgjatë këtij viti, paralel me aksionin e regjistrimit, ne shpallëm Bashkimin dhe Ribashkimin, Hapjen dhe Përtëritjen; shpallëm kuvendimin e lirë dhe zgjedhjet e lira, shpallëm parimin e garës dhe vumë në themel të zgjedhjeve votën e anëtarëve. Të gjitha këto kanë bërë që në harkun e një viti Partia Demokratike të ringrihet  dhe  të niset  me energji të reja, e fortë, e freskët, e kthjellët, e  bashkuar dhe e fuqishme.

Partia ka bërë analiza, por nuk ka bërë harakiri.

Partia është përtërirë, por nuk është tjetërsuar.

Një plejadë drejtuesish të rinj në mbarë vendin janë zgjedhur me vote të lirë. Anëtërët e rinj të Këshillit Kombëtar, që nuk janë deputetë, apo drejtues të degëve, janë zgjedhur me votë të lirë nga Kuvendi më i madh në historinë e PD-së dhe çdo partie tjetër shqiptare. Sekretarët dhe krerët e departamenteve do të zgjidhen sot me votë nga Këshilli Kombëtar.

Detyrë e dorës së parë e gjithë të zgjedhurve, e drejtuesve të çdo niveli, e anëtarëve të Këshillit Kombëtar mbetet ajo që kam nënvizuar në takimin me kryetarët e rinj të degëve dhe dua ta përsëris sot me forcë: Përtëritja duhet të vazhdojë, hapja duhet të vazhdojë. Hapja si mendësi duhet t’u dëshmohet jo vetëm atyre që duan të anëtarësohen në Partinë Demokratike, por mbar
ë simpatizantëve, qytetarëve, intelektualëve, shoqërisë në tërësi.

Hapja është një koncept shumë i gjerë, është një sjellje, komportim njerëzor dhe demokratik,  hapja është të njohësh gjendjen e vendit, të jetosh me shqetësimet e qytetarëve; hapja është të  dëgjosh qytetarët, të reflektosh dhe të reagosh në bazë të shqetësimeve të tyre të drejta, të kërkosh dhe të vësh në lëvizje zgjidhje për qytetarët.

Për këtë hapje kam folur. Për këtë hapje flas sot me theks akoma më të fortë, duke parë  me sy e  prekur me dorë hendekun e jashtëzakonshëm  që është  krijuar midis qeverisë  oligarkike Rama –Meta dhe qytetarëve shqiptarë pa dalllim.

Ka njohur distancë dhe kontraste, në çdo kohë, Shqipëria e qeveritarëve me atë të qytetarëve.

Por kurrë nuk ka qenë kaq e madhe kjo distancë dhe kurrë nuk ka qënë ky kontrast si sot.

Shqipëria e qeveritarëve dhe ajo e qytetarëve janë sot dy botë të huaja për njëra-tjetrën.

Shqipëria e qeveritarëve fabrikon arritje fiktive për qytetarët.

Ajo e qytetarëve vuan mashtimet, dështimet dhe genjeshtrat e qeverisë.

Protesta e madhe popullore e 22 nëntorit solli në bulevard, përpara dritares së Edi Ramës,   Shqipërinë e revoltuar nga demagogjia dhe rrenat e tij. Protesta ishte klithja kundër përkeqësimit dhe varfërisë së shtuar, ishte paralajmërimi për të mos e bërë akoma më keq e më zi me rritjen e taksave, me rritjen e çmimit të energjisë, me uljen e investimeve publike, me rritjen e shpenzimeve, luksit dhe tashmë edhe korrupsionit të shfrenuar qeveritar me tenderimin pa garë të fondeve publike, që është një kthim alarmant prapa i kësaj qeverie në kohërat e korrupsionit të  ngritur në sistem.

Me shurdhërinë, verbërinë dhe kryenecësinë tipike të dy oligarkëve të regjur, Rama dhe Meta, u injorua zëri i protestës, zëri i qyetarëve, kërkesat e tyre. Injoruan paralajmërimet dhe argumentet e opozitës se me paketën e tyre të re  fiskale dhe  me buxhetin e ri të vitit 2015, ekonomia do të rrokulliset  në një reçesion edhe me të thellë,  me pasoja të rënda për sipërmarrrjen e ndershme, për familjet dhe individët pa dallim. Injoruan pa asnjë argument profesional, por vetëm me të folurën në delir të kryeministrit, 31 propozimet e opozitës.

Nuk u konsultuan me asnjë grup interesi. Vulosën me një votim sa për të kaluar radhën, si  paraardhësit e tyre politikë, buxhetin më arbitrar kundër qytetarëve dhe më klientelist për vete të dy dekadave të fundit.

Vazhdojnë të mburren me paratë që paskan përfituar një pjesë e punonjësve nga taksimi progresiv, sipas tyre, mbi të ardhurat. Vazhdojnë të reklamojnë sapunin për djathë. Për ta shitur nuk bëhët fjalë se nuk ua blen njeri.

Nuk thonë dhe nuk ua zë goja të thonë se përse nuk dhanë rrogën e 13 aq shumë të premtuar gjatë fushatës elektorale, dhe nuk dhanë as shpërblimin e fundvitit. Vlerat që nuk janë dhënë nga rilindasit dhe kostot shtesë që ka përballuar çdo shqiptar nga rritja e taksave, janë ku e ku më të larta se sa përfitimi që erdhi nga ndryshimi i tatimit mbi të ardhurat për fashën 30 mijë- 130 mijë lekë.

Kjo diferencë do të thellohet  më tej këtë vit me taksat e reja. Me një dorë jep me pikatore, me të dyja duart merr me garuzhde. Këtë thonë punonjësit buxhetorë për taksimin e famshëm progresiv. Por efektet zinxhir të paketës fiskale do të godasin buxhetin e çdo familjeje dhe ekonominë kombëtare në tërësi. Fuqia blerëse ka rënë do të vahdojë të bjerë, pasi rrogat nuk rriten deri në fund të 2016 sipas zotimit të kësaj qeverie dhe për pasojë të rritjes së çmimeve çdokush blen më pak. Rikujtojmë se edhe paga minimale në shkallë vendi nuk ka ndryshuar, ndonëse praktika e vendosur nga qeverisja jonë, ishte që çdo vit ajo rritej.

E kemi vërtetuar disa herë e do të vazhdojmë ta vërtetojmë me fakte të pakundërshtushme se  shendësia që u premtua  falas u kushton më shtrenjtë shqiptarëve,  arsimi po se po, legalizimet po kështu, çdo gjë është shtrenjtuar.

Këtë nuk ka nevojë ta provojmë ne, e provon xhepi i qytetarëve. Kemi provuar e do të vazhdojnë të provojmë me fakte të pakundërshtueshme demagogjinë e tyre, qeverisjen e tyre as socialiste, as liberale, as popullore, por  oligarkike, që përfaqëson, shërben dhe mbron interesat e një grushti pushtetarësh dhe klientelës së tyre nga bota e informalitetit e malavitës kriminale. Edhe po të mos e vertetonim ne, e vërteton përkeqësimi i vazhdueshëm i gjendjes në mbarë vendin. Edi Ramës nuk i ka mbetur gjë tjetër veçse të bëjë prestigjatorin për të shitur genjeshtrat e tij. Por edhe atë nuk e bën dot dy herë sepse qeverisja nuk është shfaqje.

Me këtë buxhet oligarkia Rama–Meta ka llogaritur t’i pjellë  gjeli dhe të vazhdojë të ngushtojë hapësirat e demokracisë  në vend. Jeta e qytetarëve në anën tjetër do të bëhet e do të vazhdojë të bëhet më e vështirë. Përballja është e pashmangshme, qytetarët nuk mund të pranojnë këtë gjendje. Partia  Demokratike dhe opozita do të jenë dhe do të jenë me ta, përkrah tyre, në ballë të protestave, jo me qasje populiste, por duke argumentuar me fakte dhe në mënyrë profesionale çdo fakt të keqqeverisjes, korrupsionit apo maskaradës.

Secili prej nesh, secili prej deputetëve, secili prej anëtarëve të Këshillit Kombëtar, çdo kryetar i degës, secili prej të zgjedhurve të çdo niveli duhet të jetë çdo ditë pranë qytetarëve për t’i  dëgjuar, për t’i mbështetur, që ata të kuptojnë e të ndjejnë se nuk janë vetëm në braktisjen e  madhe që u ka bërë qeveria, se Partia Demokratike është me ta, opozita është me ta për të ndaluar bashkë me ta të  keqen e për  të ndërtuar së bashku shpresen. Me besim, me  bashkim, me arsye.

E themi shpesh e  nuk do të rreshtim ta themi: Ne, Partia Demokratike  jemi  një parti e Lirisë. Etika e Lirisë është përgjegjësia. Ne jemi të lirë sepse jemi të përgjegjshëm, ne jemi të përgjegjshëm sepse jemi të lirë. Parimi i përgjegjësisë na ka mbedhur e na mban të bashkuar në  rrugën tonë. Ne marrim përgjegjësi para vendit. Ne marrim përgjegjësi para qytetarëve.

Marrim përgjegjesi për të mos u dhënë paqe mashtrimeve, dështimeve, klientelizmit, krimit dhe korrupsionit qeveritar.

Marrim përgjegjësi për të mbrojtur me çdo çmim demokracinë.

Marrim përgjegjësi për të përgatitur alternativën e ringritjes së vendit dhe të ekonomisë.

Një moment përgjegjësie i Këshillit Kombëtar është zgjedhja sot e ekipit të ri drejtues të Partisë.

Me bindjen se do ta përmbushni me sukses, ju uroj punime dhe votim të mbarë.

Njoftim për shtyp i Partisë Demokratike, 30 Nëntor 2014

Kryetari i Bashkisë së Tiranës, njëherësh kryetar i PD Lulzim Basha, ish kryeministri Sali Berisha, deputetë, drejtues të pushtetit vendor, të qarkut, veteranë etj janë përulur sot me nderim dhe mirënjohje përpara të rënëve për lirinë dhe demokracinë e Shqipërisë.

Kurora me lule janë vendosur pranë monumentit “Nënë Shqipëri”. Personalitete të larta kanë bërë sot homazhe dhe në nderim të viktimave të komunizmit. Ata vendosën kurora me lule pranë memorialit që përkujton 22 intelektualët shqiptarë të ekzekutuar nga regjimi komunist, me pretekstin se në 21 shkurt 1951 kishin shpërthyer një bombë në ambasadën sovjetike në Tiranë. Ata u ekzekutuan në mesnatë, në afërsi të urës së Beshirit, 15 km larg Tiranës, të lidhur dorë për dorë me zinxhir dhe u varrosën në një gropë të përbashkët.

Ne fjalën e tij pas homazheve, kryetari i PD Lulzim Basha theksoi se është detyrim që idealin e lirisë për të cilin dhanë jetën kaq shumë shqiptarë, mos t’ia sakrifikojmë kurrë axhendave të ngushta politike, rreziqeve të reja apo të vjetra që shfaqen e rishfaqen në paketime të ndryshme.

“Të vetëdijshëm për çmimin e lartë, ndër më të lartët që kemi paguar për lirinë tonë si shtet, për lirinë tonë kombëtare, përmes luftërave të fundit çlirimtare në Europë, siç ishte lufta për pavarësinë dhe lirinë e Kosovës, siç ishte lufta për të drejtat e barabarta të shqiptarëve në Luginën e Preshevës apo në Maqedoni kemi përgjegjësinë e madhe që idealin e lirisë për të cilin kemi sakrifikuar kaq shumë, mos t’ia sakrifikojmë kurrë axhendave të ngushta politike, rreziqeve të reja apo të vjetra që shfaqen e rishfaqen në paketime të ndryshme por të luftojmë fort e pa kompromis për të thelluar sa më shumë dimensionin e lirisë, lirisë së individit, lirisë së fjalës, lirisë së besimit, lirisë së zgjedhjes, lirisë së sipërmarrjes” – deklaroi z. Basha .

Zoti Basha ka vizituar sot familjet e dëshmorëve Akil Sakiqi, Bardhyl Salillari dhe heroit të demokracisë, Azem Hajdarit.

Deklarata e kryetarit të Bashkisë së Tiranës, njëherësh kryetar i Partisë Demokratike pas homazheve në Varrezat e Dëshmorëve:

“Gëzuar ditën që bashkon shpirtrat e të gjithë shqiptarëve, ditën e Flamurit, ditën e Pavarësisë! Gëzuar këtë festë të madhe të lirisë, sakrificës për atdheun tonë, kombin tonë! Gëzuar po kështu 70 vjetorin e çlirimit të Shqipërisë nga okupatorët nazifashistë!

Pavarësia e Shqipërisë, liria e Shqipërisë në të gjitha dimensionet e saj i ka rrënjët në sakrificën sublime të mijëra e mijëra shqiptarëve, burra e gra, të rinj e të reja, intelektualë, patriotë, trimave të cilët ndër shekuj mbajtën të gjallë flakën e lirisë kombëtare, identitetit kombëtar të një prej qytetërimeve më të vjetra të Europës.

Sot është një ditë nderimi, së pari për sakrificën e tyre, për besimin e tyre hyjnor në ditën e Shqipërisë, në orën e Shqipërisë, të Shqipërisë së lirë, Shqipërisë së pavarur, Shqipërisë demokratike, Shqipërisë europiane.

Liria në të gjithë dimensionet e saj, liria si pavarësi, liria nga pushtimi nazifashist, liria nga diktatura komuniste kërkoi dhe mori sakrifica të mëdha nga ky komb, ndaj sot ne përulemi me nderimin më të thellë para të gjithë atyre që nuk u stepën para sakrificës sublime, dhënies së jetës, gjakut të tyre për këtë liri që gëzojmë sot.

Të vetëdijshëm për çmimin e lartë, ndër më të lartët që kemi paguar për lirinë tonë si shtet, për lirinë tonë kombëtare, përmes luftërave të fundit çlirimtare në Europë, siç ishte lufta për pavarësinë dhe lirinë e Kosovës, siç ishte lufta për të drejtat e barabarta të shqiptarëve në Luginën e Preshevës apo në Maqedoni kemi përgjegjësinë e madhe që idealin e lirisë për të cilin kemi sakrifikuar kaq shumë, mos t’ia sakrifikojmë kurrë axhendave të ngushta politike, rreziqeve të reja apo të vjetra që shfaqen e rishfaqen në paketime të ndryshme por të luftojmë fort e pa kompromis për të thelluar sa më shumë dimensionin e lirisë, lirisë së individit, lirisë së fjalës, lirisë së besimit, lirisë së zgjedhjes, lirisë së sipërmarrjes.

Duke e bërë këtë nderojmë amanetin e mijëra e mijëra dëshmorëve të kombit dhe i japim kuptimin e vërtetë pavarësisë dhe lirisë që festojmë sot.

Edhe njëherë, gëzuar këtë festë të madhe që bashkon shpirtrat e gjithë shqiptarëve!

Njoftim për shtyp i Partisë Demokratike, 28 Nëntor 2014