Blog

Deklaratë e Majlinda Bregut ku denoncohen bllokimet e njëpasnjëshme që i ka bërë Edi Rama projektit të Xhamisë së Madhe, si kryetar bashkie e si kryeministër

“E mos e ngatërroni të vërtetën me të pavërtetën dhe me vetëdije të fshehni realitetin”. Eshte me vend kjo porosi nga Kurani i shenjte, për këdo harron të vërtetën e ndërtimit të xhamisë së Tiranës.

Nëse ka një përgjegjës sot për vonesën e ndërtimit të Xhamisë së Madhe, ai është Edi Rama.

Për 11 vite si kryetar i Bashkisë së Tiranës, ai u bë pengesë dhe bllokoi mundësitë për ngritjen e këtij objekti kulti, kaq të nevojshëm për besimtarët muslimanë.

Për 11 vite si kryetar i Bashkisë së Tiranës, ai nuk i dëgjoi dhe nuk u konsultua as një ditë të vetme me përfaqësuesit e komunitetit, por tentoi t’u shesë atyre një projekt të dizenjuar në ateliene e interesave të tij, në kundërshtim me ligjet dhe me kodin etik të komunitetit musliman.

Dhe kur me ndryshimin e drejtimit të Bashkisë së Tiranës, zëri i komunitetit u degjua, xhamia u pojektua, trualli u negociua sepse natyrisht akush nuk mund te pranoje të falet në një objekt kulti ku nuk është respektuar e drejta e pronësisë, shfaqet sërish Edi Rama që e bllokoi projektin.

Kjo është historia armiqësore e Edi Ramës me aspiratën e ligjshme të besimtarëve muslimanë. Një bllokues serial, sa herë që i jepet mundësia.

Sot bëri hipokritin, duke u lënë në dorë një copë letër. Por para se t’u thotë ja ku e keni,  duhet të thoshte  se tashmë cështja është në gjykatë, dhe projekti është vënë në rrezik, vetëm e vetëm për shkak të Edi Ramës dhe trilleve të tij personale.

Ai nuk mund të lajë duart me Xhaminë që e ka bllokuar prej 13 vitesh tashmë, 11 vite si kryetar bashkie e pothuaj dy vite si kryeministër. Nuk mund t’u lërë në derë besimtarëve një objekt të shenjtë kulti, me konflikt pronësie në mes.

Deklaratë e deputetes së Partisë Demokratike, Majlinda Bregu, 27 Nëntor 2014

Deputeti Boçi denoncon faktin se drejtori i emëruar nga Rama në krye të OSHEE në Lushnje, që ka abuzuar me biznesin e tij, me 1 milionë e 600 mijë lekë energji të papaguar, vazhdon të jetë në detyrë

Qeveria mbron vjedhjen që i bën vetë energjisë, me gënjeshtra të ulëta.

Ne denoncuam me prova faktin se administratorët e qeverisë, të emëruarit e Edi Ramës, janë hajdutë të energjisë.

Rasti i drejtorit të OSHEE në Lushnje, që vidhte energji me biznesin e tij, dhe nuk e paguante duke qenë debitor me 1 milionë e 600 mijë lekë, është emblema e keqqeverisjes.

Të pamundurit, ata që nuk paguajnë dot 10 mijë lekë drita se nuk kanë punë, se nuk kanë mundësi të ushqejnë fëmijët, kjo qeveri i con në burg. Ndërsa hajdutët e mëdhenj me biznese nga pas, Edi Rama dhe Ilir Meta i bëjnë drejtorë të energjisë.

Në vend të ndjesës dhe nxjerrjes para ligjit të përgjegjësve të këtij skandali, Edi Rama sulmoi opozitën.

Edi Rama mashtroi kur tha se drejtori i Lushnjes ishte shkarkuar nga puna një javë më parë.

Mediat zbuluan dje se drejtori i energjisë për Lushnjen, vjedhësi i 1 milionë e 600 mijë lekë energji, vazhon detyrën, dhe është në punë edhe sot që flasim.

Edi Rama nuk mjaftohet me emërimin e hajdutëve të energjisë si drejtorë të energjisë. Për ti mbrojtur kur kapen me presh në duar ai është gati të gënjejë, të mashtrojë dhe të shpifë.

Nuk ka reforma, por represion për qytetarët dhe favore për hajdutët dhe shkelësit e ligjit. Nuk ka shtet ligjor, por pashallëk të Ramës që i ndan shqiptarët në të nënës dhe të njerkës.

Ndaj shqiptarët janë të revoltuar. Ndaj protesta nuk do të ndalet.

Deklaratë e deputetit të Partisë Demokratike, Luçiano Boçi, 27 Nëntor 2014

Kryetari i Partisë Demokratike, z.Lulzim Basha zhvilloi sot një takim me Kryetarin e Parlamentit të Turqise, z.Cemil Çiçek, i cili ndodhet për një vizitë zyrtare në vendin tonë.

Bashkëpunimi mes dy vendeve, vecanërisht në rrafshin ekonomik dhe situata politike në Shqipëri dhe në rajon ishin temat kryesore të bashkëbisedimit mes kreut të opozitës dhe kryeparlamentarit turk.

Në takim u ritheksua angazhimi i përbashkët për të bashkëpunuar ngushtësisht për konsolidimin e mëtejshëm të miqësisë mids të dy popujve dhe kombeve.

Njoftim për shtyp i Partisë Demokratike, 26 Nëntor 2014

Zonja dhe zotërinj,

Edi Rama gënjeu dje publikisht, kur tha se paska krijuar 81 mijë vende të reja pune për një vit. Ky është i vetmi kryeministër në Europë  që vetë i prodhon, vetë i njofton, vetë i propagandon  më bujë gënjeshtrat e tij të trasha. As nuk skuqet, as nuk e vret mendjen për faktin se arritjet e tij imagjinare nuk kanë asnjë konfirmim në realitetin e jetës së përditshme gjithmonë e më të vështirë të shqiptarëve, në treguesit në  stanjacion dhe recension të zhvillimit ekonomik dhe shoqëror të vendit, por vetëm demagogji që tashmë është thelbi i qeverisjes së tij propagandistike.

Vetëm në qeverisjen propagandistike “Rama-Meta” vendet e punës  rriten vrullshëm, ndërkohë që po sipas të dhënave zyrtare, ekonomia shënoi një rënie prej -0.61% në tremujorin e dytë të vitit, në vazhdim, në  krahasim me një vit më parë; sektorët me rënien me të madhe janë pikërisht ato që sjellin dhe garantojnë qëndrueshmërinë dhe punësimin: industritë, ndërtimi dhe transporti, etj, ku  rëniet janë dyshifrore. Ndërkohë sipas statistikave zyrtare, vetëm në tremujorin e dytë 22 mijë shqiptarë humbën vendet e tyre të punës, krahasuar me të njëjtën periudhë të vitit paraardhës. Shifër që me siguri është më e lartë se kjo shifër zyrtare.

Mijërat e Ramës janë “punësuar” në hava, në letrat e tij të bakallit dhe ky është cinizmi më i madh. Papunësia në rritje dhe shpunësimi masiv i shqiptarëve janë dy nga plagët më të mëdha të kohës që jetojmë, plagë që nuk po kurohen me zgjidhje sipas premtimeve të Edi Ramës në fushatë, por që po thellohen edhe më shumë me gënjeshtrat e tij të trasha e të patretshme.

Për fat të keq, kryeministri i vendit po tregon se nuk ka ndërmend të reflektojë, të shohë realitetin në sy, të dëgjojë protestën e përditshme dhe reale të qytetarëve të vendit.

Mashtrimi masiv i Edi Ramës është një tjetër lajthitje halucinante. Vetëm në bunkerin e tij të ri mund të ketë vende pune e parajsa si ato që ai  deklaron.

Nuk ka punë për të rinjtë, nuk ka punë për të diplomuarit, nuk ka punë në fshat, nuk ka punë për fermerët, nuk ka punë në qytet, nuk ka punë askund. Edi Rama nuk ka hapur as edhe një vend të ri pune që ditën që ka ardhur në pushtet por ka bërë shkatërrimin e dhjetëra mijëra vendeve të punës me politikat e tij të gabuara, arrogante dhe të paligjshme.

Të vetmet vende pune që Edi Rama i paguan me taksat e shqiptarëve, janë numri i madh i shërbëtorëve politikë në Kryeministri për të sulmuar me normë ditore opozitën në rrjetet sociale, për të intimiduar dhe nënshtruar median, numri i madh i policëve që ka shtuar se i duhen për shtetin policor, numri i madh i xhandarëve të INUK-ut, se i duhen atij për të shembur e shkatërruar selektivisht pronat e atyre që nuk janë në oborrin e tij politik apo nuk shtrojnë xhepat e korrupsionit të rilindur qeveritar në këtë sektor.

Edi Rama nuk ka krijuar asnjë mundësi punësimi. Në realitet, nuk ka ndihmë për fermerët, nuk ka investime në sektorët strategjikë, nuk ka asnjë kantier të ri ndërtimi.

Me taksat e reja që ka vendosur, edhe më shumë shqiptarë do të humbin vendet e punës dhe plagët e mëdha do të përkeqësohen më tej.

Ndaj Shqipëria është në protestë. Ndaj protesta nuk ndalet. Partia Demokratike e ka detyrim t’u prijë dhe do t’u prijë protestave shesh më shesh, rrugë më rrugë,  kudo në Shqipëri.

Por Partia Demokratike dhe opozita nuk do të mjaftohen vetëm me  denoncimin e së keqes dhe me  organizimin e protestave qytetare. Sot pasdite, në orën 17.00, Grupi Parlamentar i PD-së do të paraqesë e argumentojë publikisht 31 amendamente për paketën e re fiskale dhe projektbuxhetin e ri. Këto amendamente synojnë të korigjojnë me sa është e mundur në situatën aktuale, kursin e marrë të përkeqësimit të  sigurtë të gjendjes ekonomike dhe shoqërore të shqiptarëve.

31 amendamentet tona synojnë lehtësimin nga një anë të barrës fiskale nga kurrizi i qytetarëve shqiptarë dhe mosprivilegjimin në anën tjetër  të klientelëve të paracaktuar të qeverisë.

Synojnë frenimin e luksit qeveritar në kurriz të shqiptarëve dhe destinimin e parave publike për zgjidhje që mbështesin sipërmarrjen prodhuese, punësimin, bujqësinë, arsimin dhe shtresat në nevojë.

Protesta popullore e të shtunës ishte një shans që iu dha qeverisë për të reflektuar, shans të cilin qeveria po e shpërdoron më një verbëri të pashembullt.

Amendamentet e opozitës janë një tjetër shans tjetër për të evituar më të keqen. Do të donim që qeveria të mos e shpërdorojë edhe këtë shans me verbëri të pashembullt.

E ka thënë At Zef Pllumi: qorri më i  madh nuk është ai që nuk sheh  nga sytë, por ai që nuk sheh nga mendja.

Faleminderit!

Deklaratë e Kryetarit të Partisë Demokratike, Lulzim Basha, 26 Nëntor 2014

Deputetët demokratë analizojnë pasojat dramatike që do sjellë buxheti në shëndetësi, në çështjet sociale e në shtresat në nevojë. Banorët e Bregut të Lumit rrëfejnë mjerimin ku ndodhen.

Deputetët demokratë të Komisionit parlamentar të çeshtjeve sociale dhe shëndetësisë, u mblodhën sot në zonën e Bregut të Lumit  me pjesëmarrjen e banorëve të minibashkisë 8, 9 dhe 11. Në takim merrnin pjesë dhe ekspertë të pavarur të shëndetësisë dhe kryetarët e minibashkive.

Kryetarja e komisionit Albana Vokshi tha se buxheti 2015 është hartuar pa transparence pa dëgjuar asnjë zë të qytetarëve apo grupeve të interesit. Zonja Vokshi tha se opozita në drejtimin e kryetarit Basha po zhvillon takime në cdo qytet me grupe sociale për të zbërthyer buxhetin e krizes dhe varfërisë së shqiptarëve.

Banorët të cilët morën pjesë në takim shprehën shqetësimin e tyre në lidhje me heqjen e energjisë elektrike.

– Jam e papunë dhe më kanë hequr dritat, tha një grua, vajza ime e vogël mëson pa drita, shtoi ajo.

– Unë jam vetë i shtatë në familje, i vetëm punoj, shitës ambulant. Si do t’i rris fëmijët e mi, mendon ky shtet për ne apo jo?-tha një tjetër banor.

– Kam faturën që më vjen edhe pse nuk kam drita, u ankua një grua. Më vjen fatura aforfe, kjo është tmerr ç’po na bën kjo qeveri, theksoi një grua pa të ardhura ekonomike të cilës ia kanë prerë energjinë.

Në takim u shprehën shqetësime edhe në sektorin e shëndetësisë.

– Kam vajzën sëmurë dhe askush s’e ka parë në spital, tha një nënë e shqetësuar pas neglizhencës së treguar ndaj saj.

Sektori i shëndetësisë është në pikën më të dobët. Mjekësia është hani i zi i korrupsionit dhe Rama e Beqja janë arkitektët e kësaj krize, tha zonja Vokshi. Monopoli i ilacceve është tenderuar nga klinetë pranë qeverisë duke sjellë ilaçe më të shtrenjta, vërehet mungëse e madhe e ilaçeve në spitale. Njerëzit në nevojë nuk kanë akses tek shërbimet shëndetësore, shtoi ajo.

Ish ministri i shëndetësisë Tritan Shehu tha se Buxheti 2015 nuk sjell prespektivë për shëndetësinë dhe fondet janë minimale në nivelin  2, 8 % te GDP-së.

Premtimet e Ramës për shëndetësi falas  janë iluzion dhe gënjeshtër. Rama nuk ka guxim të thotë që shëndetësia është falas pasi është e papërballueshme. Ndërkaq ekspertët theksuan se ilaçet e rimbursuara janë reduktuar ndjeshëm për të sëmurët kronikë dhe se listat e rimbursimit favorizojnë kompanitë e qeverisë. Ekspertët thanë se ndërkohë që investimet e Rilindjes në 2014 dhe 2015 për shendetësinë janë zero në dy vitet e qeverisjes së Partisë Demokratike kanë kapur mbi 100 milion dollarë.

Deputetja demokrate Jorida Tabaku tha se qeveria e Ramës po rëndon buxhetet familjare me 460 milion dollarë taksa që do paguhen direkt nga nevojtarët.

Kjo qeveri, tha zonja Tabaku, nuk mban përgjegjësi për njerëzit në nevojë dhe i diskriminon ata duke i prerë listat e ndihmës sociale. Ky buxhet nuk ofron vende pune nuk ndihmon as biznesin që të hapë vende të reja pune.

Nga një vend me taksa të ulëta konkurues tani nga Shqipërise po i ikin bizneset. 200 lek rriten pensionet nderkoh që çmimet janë galopante. 700 lek rimbursimi për energjinë ndërkohë që fatura rritet 2800 lek, shtoi ajo.

Deputeti Myqerem Tafaj tha se papunësia e të rinjve po kalon mbi 50 përqind. ‘’Ne e lame 13 përqind papunësinë, keta po e çojnë 20 përqind. Kanë goditur biznesin privat me taksa te larta dhe ai nuk përballon hapje të vendeve të reja, tha zoti Tafaj. Gjatë takimit deputetët dëgjuan problemet e shumta të banorëve ku të rinjtë që kishin mbaruar studime edhe jashtë Shqipërisë përballen me papunësine dhe show-n e qeverisë për kinse hapjen e zyrave të punës.

– Pensionistët ngritën zërin për fatura aforfe të energjisë dhe fatura të larta ilaçesh.

– Një nënë e papunë tha se nuk paguante dot ilaçet e vajzes dhe faturat e kamat vonesat e energjisë.

– Një invalid tha se i ishte hequr nga e drejta e invaliditetit.

Banorët ngritën dhe problemin për braktisjen që u ka bërë qeveria dhe shpërfilljen në ndërtimin e një shkolle dhe qendër ambulance në Bregun e Lumit.

Njoftim për shtyp i Partisë Demokratike, 25 Nëntor 2014

Koordinatori i Partisë Demokratike, Salianji dënon trajtimin ndëshkues të qeverisë, dhe kërkon futjen e banorëve debitorë në sistem, por me këste të ulëta mujore të mundshme për gjëndjen e tyre të rënduar ekonomike 

Dhjetra banorë në zonën e Fushës së Aviacionit në Tiranë, gjenden prej javësh në errësirë, për shkak se janë përballur me fatura abuzive dhe aforfe, fatura që nuk kanë pasur mundësi të paguajnë. Një prej këtyre familjeve, me asnjë të punësuar, është faturuar për një muaj, në muajin qershor, me 1 milionë e 500 mijë lekë. Qeveria nuk i dëgjon shqetësimet e banorëve dhe nuk jep shpjegime për këto mbifaturime abuzive. E vetmja masë që merr qeveria, është ndërprerja e dritave, duke lënë të moshuar, prindër, fëmijë e nxënës, në errësirë prej javësh.

Banorët ankohen për trajtim preferencial, dhe selektiv nga autoritetet, duke akuzuar se dikush lihet në errësirë, ndërsa dikujt tjetër që është pranë qeverisë nuk i preken dritat. Banorët shprehen të gatshëm të paguajnë energjinë, por duhet ta shlyejnë me këste të ulëta mujore.

 “Siç dëshmohet nga qytetarët, nga banorët e njësisë 7 në Tiranë, prerjet e energjisë elektrike janë selektive. Kanë ardhur dhe kanë prerë energjinë tek njerëz që janë të pamundur, që nuk kanë krah qeveritar, të njerëzve të cilëve ua kanë blerë votën në zgjedhjet e 23 qershorit, dhe tani nuk japin asnjë llogari. Qytetarët pretendojnë se kanë fatura abuzive dhe aforfe nga ana e OSHEE-së. Qeveria dhe OSHEE-ja nuk u jep asnjë përgjigje. Qytetarët që marrin asistencë sociale apo kanë të ardhura prej 30 mijë lekësh të vjetra në muaj, qeveria u kërkon të paguajnë këste mujore prej 900 mijë lekësh për të paguar faturat e tyre aforfe”, tha kordinatori i Partisë Demokratike për denoncimet, Ervin Salianji i cili takoi banorët e lagjes.

Për Salianjin duhet krijuar mundësia që të gjithë qytetarët të paguajnë, por duhet gjetur mekanizmi stimulus, e jo ndëshkues.

“Ne inkurajojmë qeverinë që të formalizojë dhe të fusë në sistem të gjithë qytetarët që të paguajnë energjinë por është e papranueshme që qytetarë të cilët nuk kanë të ardhura, qytetarë që nuk kanë mundësi, ti kriminalizosh dhe të hapësh një plagë të re sociale dhe të mos i fusësh në sistem dhe tu lesh një mundësi për pagesë me këste. Qeveria duhet tu lerë një mundësi tjetër që pagesën ta bëjnë 10 mijë lekë të vjetra në muaj  dhe pjesën tjetër, atë që konsumojnë, ta paguajnë me faturën që vjen dhe jo me faturim aforfe, dhe jo 140 mijë lekë në muaj për dy persona të moshuar, por të paguajnë energji as sa harxhojnë. Kjo është zgjidhja. Një zgjidhje e pranueshme edhe për qytetarët edhe për qeverinë për ta formalizuar dhe për t’i futur në sistem ata që ajo i quan debitorë, dhe qindra debitorë të tjerë që i toleron sepse janë klientë dhe votuesit e saj”, u shpreh Salianji.

Njoftim për shtyp i Partisë Demokratike, 25 Nëntor 2014

Kryetari i Partisë Demokratike, Lulzim Basha priti në takim përfaqësuesit e FMN, z.Nadeem Ilahi dhe z.Jens Reinke, me të cilët ndau shqetësimin mbi situatën e sektorit energjetik në vend, ku dënoi aksionet selektive të qeverisë dhe faktin se Kryeministri kërcënon e ndëshkon qytetarët që s’kanë mundësi financiare, në vend se t’u japë atyre mundësi për të bërë shlyerjen e detyrimeve.

Basha tha se nuk ka një reforme në sektorin energjetik, por thjesht një masë shtrënguese në kurriz të shqiptarëve, duke rritur cmimin e energjisë, duke ua ndërprerë energjinë atyre që nuk kanë mundësi të paguajnë, pasi janë pa punë dhe në mjerim ekonomik.

Kryetari i Partisë Demokratike gjithashtu ka shprehur shqetësimin për mungesën e transparencës që tregon qeveria në lidhje me rritjen e cmimit të energjisë.

“Eshtë vetë qeveria që nuk shprehet se sa do të rritet cmimi, ndërkohë që KESH, OST dhe OSHE që janë agjensi shtetërore, kanë dërguar kërkesat për rritje cmimi. Pra, nga njëra anë qeveria kërkon rritje cmimi dhe nga ana tjetër nuk po ia thotë shqiptarëve sesa do të rritet cmimi”, u shpreh Basha.

Basha u kujtoi përfaqësuesve të FMN se qeveria erdhi në pushtet me premtime si; ulja e cmimit të energjisë, heqja e TVSH-së për energjinë, por nuk bënë asgjë përkundrazi e rritën cmimin e energjisë.

Duke u ndalur në buxhetin e vitit 2015, Kryetari Basha u shpreh i shqetësuar për faktin se janë rritur shpenzimet qeveritare ndërkohë që janë ulur investimet, janë ulur fondet për mbështetjen sociale, nuk është shtuar numri i infermierëve apo mësuesve, por i policëve dhe i punonjësve të INUK.

Basha tha se rritja e re e taksave është e papranueshme ndërkohë që rritja e një viti më parë ka dhënë pasoja dramatike në ekonominë e vendit. Një rritje e re do të thellojë recesionin e do të ketë pasoja katastrofike.

Njoftim për shtyp i Partisë Demokratike, 25 Nëntor 2014

Kryetari i Partisë Demokratike falenderon qytetarët që morën pjesë në marshimin më të madh të protestës në historinë tonë moderne, dënon faktin që kryeministri nuk dëgjon zërin e shqiptarëve por i fyen me arrogancë, dhe përsërit edhe një herë kërkesat ekonomike për të nxjerrë vendin nga mjerimi.

Dy ditë më parë, qytetarët shqiptarë nga të katër anët e vendit zhvilluan protestën më të madhe në historinë tonë moderne për kërkesat ekonomike dhe të drejtat shoqërore. Të rinj e të reja, burra e gra, të djathtë e të majtë e pa parti, u mblodhën dhe u bashkuan në protestën e halleve të përbashkëta. Qindra mijë qytetarë të tjerë i mbështetën shpirtërisht kërkesat tona.

Në bulevardin “Dëshmorët e Kombit” doli Shqipëria e mashtruar, Shqipëria e zhgënjyer, Shqipëria e harruar, Shqipëria e lënduar nga dyshja Rama-Meta. Protestuan njerëzit e rrezikuar nga rënia e ekonomisë, nga buxheti i rrënimit, nga taksat dhe tarifat e ekzagjeruara, nga varfëria, papunësia dhe mungesa e shpresës. Në protestën e të shtunës  ishte Shqipëria kundër taksave e tarifave të reja, kundër të thellimit të varfërisë, rritjes së çmimeve e karburanteve, Shqipëria kundër projektbuxhetit të ri të rrënimit të ekonomisë dhe pasurimit të oligarkisë qeveritare. Por, me ne në shesh ishte edhe Shqipëria e së ardhmes, Shqipëria e shpresës, e dinamizmit ekonomik dhe pasurive mendore e shpirtërore të shqiptarëve që kërkojnë liri dhe mundësi zhvillimi.

Protesta ishte edhe një manifestim i madh i vlerave dhe kulturës demokratike, moderne dhe europiane të qytetërimit perëndimor, i vlerave tona të vërteta.

Kam kënaqësinë dhe nderin e veçantë të falenderoj sot nga zemra, një për një të gjithë shqiptarët që erdhën, u mblodhën dhe protestuan të shtunën në Bulevardin “Dëshmorët e Kombit”. Dua të falenderoj sindikatat e pavarura, organizatat studentore dhe të shoqërisë civile, që dhanë  kontributin e tyre të çmuar për evidentimin e  problemeve reale të shqiptarëve.

Një falenderim i veçante iu shkon të gjitha mediave që pasqyruan me profesionalizëm këtë ngjarje të madhe të opozitarizmit dhe qytetarisë shqiptare. Ne besojmë se media e lirë do të vazhdojë të ruajë pavarësinë, profesionalizmin dhe do të jetë zëdhënësja e axhendës së qytetarit, e axhendës së Shqipërisë reale.

Protesta konfirmoi hendekun e thellë midis një Shqipërie që digjet nga hallet e shumta dhe një qeverie që krihet.

Për fat të keq, Edi Rama, kryeministri i vendit, nuk doli dot nga bunkeri i Enverit as pas mbarimit të protestës. Nuk dëgjoi çfarë i thamë. Nuk i pa si qytetarë të mbarë Shqipërisë ata qindramijë protestues në bulevard.

Revoltën e një populli e pa si një sulm i armiqve të brendshëm. Nuk flet për reflektim, për zgjidhje, por i hedh benzinë zjarrit me gjuhën e tij të fyerjeve dhe arrogancës dhe vazhdim në rrugën e të keqes.

Në emër të Shqipërisë së revoltuar nga keqqeverisja dënoj me forcë qëndrimet provokuese të kryeministrit dhe i kërkoj:

-Të kuptojë situatën eksplozive të vendit dhe të reagojë në mënyrë të përgjegjshme.

-Të tregojë ndjeshmëri për Shqipërinë që vuan nga papunësia e varfëria për shkak të politikave të gabuara, arrogante dhe të papërgjegjshme të qeverisë së tij.

-Të dëgjojë zërin e qytetarëve që folën në protestën e të shtunës, por dhe të qindramijë të tjerëve që flasin me protestën e tyre të përditshme.

Në emër të shumicës së shqiptarëve që lufton për mbijetesë i kërkoj kryeministrit:

·Të ndalë çdo tentativë për rritjen e çmimit të energjisë elektrike dhe të anullojë menjëherë kërkesën që qeveria e tij ka çuar në këtë drejtim.

·Të heqë menjëherë TVSH e energjisë elektrike për të papunët, pensionistët, fermerët dhe kryefamiljarët që jetojnë në nivelin e varfërisë;

·Të rishqyrtojë paketën fiskale dhe buxhetin e vitit 2015 në konsultim me aktorët e rëndësishëm shoqërore, me sipërmarrjen, konsumatorët dhe shtresat në nevojë.

·Të heqë dorë nga rritja e çdo taksë, akcize apo tarife për vitin e ardhshëm.

·Të ulë në 10 për qind nivelin e taksimit maksimal.

·Të ndalë goditjen e paligjshme dhe selektive të pronave të shqiptarëve. Të mbajë premtimin për legalizim falas;

·Të anullojë rritjen e tarifave të universiteteve dhe të mundësojë rikthimin në auditore pa kosto të të gjithë studentëve që u goditën nga pseudoreforma e arsimit të lartë;

·Të ulë shpenzimet e shfrenuara qeveritare dhe t’i kalojë këto fonde tërësisht në mbështetje sociale dhe investime publike;

·Të kthejë në detyrë Policinë e Shtetit. Vrasjet, vjedhjet, krimi dhe aksidentet po shtohen çdo ditë.

Askush, asnjë shqiptar, përveç ministrave, rrjetit të tyre e tarafeve të tyre me persona të inkriminuar, me dëftesa e diploma falso e të zhytur në korrupsion, nuk është i kënaqur me këtë qeverisje.

Respektimi i Kontratës me shqiptarët nuk është çështje dëshire por detyrim. Z.kryeministër, mbaj premtimet për të cilat je votuar. Mos e trash më zullumin, je kthyer në barrën më të padurueshme për qytetarët e këtij vendi. Reflekto ose largohu.

Nëse kryeministri është i vendosur në rrugën e tij pa krye të shpërfilljes, arrogancës, papërgjegjshmërisë dështimeve dhe zullumit, protestat popullore nuk do  të ndalen, protestat popullore do të vazhdojnë akoma më të fuqishme deri në realizimin e objektivave të shpallura.

Deklaratë e Kryetarit të Partisë Demokratike, Lulzim Basha, 24 Nëntor 2014