Blog

Partia Demokratike i bën thirrje qytetarëve të bashkohen në protestë kundër rritjes së çmimit të dritave, kundër të keqes, varfërisë e padrejtësisë që po shkakton qeveria

Dy milionë e 100 mijë shqiptarë të varfër, të zhytur në borxhe, pa punë, në antkh për bukën e gojës dhe pa shpresë për të ardhmen, do të vuajnë edhe më shumë nga vendimi që ka marrë Edi Rama për të rritur cmimin e energjisë elektrike.

Janë dy milionë e 100 mijë shqiptarë që konsumojnë më pak ose deri në 300 KW në muaj, të mbrojtur deri tani me anë të cmimit 77 lekë për kilovat.

Edi Rama e hoqi fashën mbrojtëse për këtë kategori që është rreth 77 përqind e konsumatorëve.

Cmimi i energjisë elektrike është edhe sot shumë i lartë, krahasuar me të ardhurat e qytetarëve dhe duke ditur se kostoja e prodhimit tek ne është më e ulëta në Europë.

Por rritja dramatike që ka vendosur të bëjë Edi Rama, është vdekjeprurëse.

Me heqjen e fashës mbrojtëse, fatura mujore për 2 milionë e 100 mijë shqiptarë do të jetë deri në 70 përqind më e shtrenjtë.

Vetëm një pushtues do të sillej kështu me popullin e tij.

Eshtë Edi Rama që premtoi uljen e cmimit të energjisë elektrike me 20 përqind, pasi u zotua se do të hiqte TVSH-në.

Eshtë Edi Rama që premtoi rilindje, legalizim e shëndetësi falas, 300 mijë vende pune.

Po shihni ku e katandisi vendin. Papunësi, varfëri, pasiguri. Rritje të cmimeve, rritje të cmimit të energjisë, rritje të cmimit të naftës.

Deri ku do të shkojë e keqja që ska fund me këtë kryeministër, me këtë qeveri.

Shqiptarët nuk ia kanë për borxh oligarkut Rama dhe skotës së tij.

E keqja nuk do të ndalet derisa ne të gjithë sëbashku ta ndalim.

Partia Demokratike i bën thirrje qytetarëve të ngrihen, dhe të bashkohen në protestë, nga Jugu në Veri, nga Lindja në Perendim.

Askush nuk mund të luajë me jetën dhe të ardhmen e shqiptarëve.

Ka ardhur koha që të gjithë sëbashku ti themi ndal të keqes që ka mbërthyer vendin.

Ka ardhur koha të ngrihemi e ti ndalim.

Deklaratë e koordinatores Grida Duma, 25 tetor 2014

Prononcim për mediat i deputetit Noka pas vizitës në komisariatin ku po mbahet z.Fratari. “Arrestim pa asnjë dokument të bazuar në ligj. Hakmarrje e pastër për akuzat që ka bërë biznesmeni”

“Ne erdhëm të takojmë ish të përdjekurin politik dhe biznesmenin e nderuar z.Fratari, të cilin e kanë arrestuar pa asnjë dokument të bazuar ligjor. As me vendim vendim gjykate, as me prokurori. Kjo është një hakmarrje e pastër politike e Edvin Ramës i cili priti momentin të bëhej kryeministër dhe të nxjerrë të gjithë dufin dhe vrerin që kishte ndaj akuzës që z.Fratari i ka bërë kohë më parë për korrupsion. Ju e mbani mend dhe të gjithë qytetarët e vendit e kujtojnë fare mirë faktin që, Dine Fratari, ka akuzuar z.Rama se i ka kërkuar 1 milionë dollarë për leje ndërtimi. Erdhi momenti që ai të hakmerret. Një hakmarrje e verbër e një njeriu me mentalitet bizantin. Ajo që është edhe më e dhimbshme është se nuk lejojnë që t’i jepen as medikamentet pasi ai ka problem shëndetësore, nuk e kanë lejuar të takojë as avokatin. E kanë arresuar sikur të ishte një vrasës serial, dhe ta trajtosh kështu një biznesmen dhe qytetar të nderuar do të thotë që kjo është fundi i çdo norme demokratike të funksionimit të shtetit ligjor. Kemi një shtet policor. Disa e sotme tregon se Edi Rama po vazhdon gjuetinë e shtrigave të së premtes. Nuk është e premtja e parë që arreston qytetarë. Pra është dita që po vazhdon gjuetinë e tij të shtrigave, dhe një hakmarrje e pastër”.

Prononcim i deputetit të Partisë Demokratike, Flamur Noka, 24 Tetor 2014

Deputeti Bogdani denoncon paaftësinë e Kryeministrit për të lobuar. Ndërkohë që shteti serb ishte vënë në lëvizje, Edi Rama shkruan statuse, harxhon miliona për lobistë personalë, dhe ka prioritet vizitën në Beograd.

Kryeministri shqiptar shpenzon miliona dollarë për lobizëm personal, miliona lekë për udhëtime turistike në SHBA, u jep qindra mijë euro miqve të vet pronarë mediash për organizime konferencash, por nuk gjen asnjë minutë kohë e asnjë qindarkë për të lobuar për Shqipërinë e kombëtarën tonë për vendimin në UEFA.

Ndërkohë, kryeministri serb u telefonoi të gjitha kancelarive dhe homologëve të vet për të lobuar, për t’u shpjeguar çfarë ndodhi dhe duke luajtur rolin e viktimës. Ndërsa kryeministri ynë tentoi të hiqej më europian se europianët, duke insistuar të zhvillojë vizitën në Beograd, aty ku u fishkëllye himni ynë kombëtar, aty ku u kënduan kore ‘vritini shqiptarët’, aty ku heronjtë e kombëtares u dhunuan në mes të fushës.

Ndërkohë që makineria e diplomacisë serbe u vu në lëvizje menjëherë dhe mbyti mediat ndërkombëtare me shtrembim faktesh, kryeministri ynë u mjaftua me disa statuse në facebook dhe disa cicërima në twitter.

Kjo padrejtësi e vendimit të UEFA vjen jo vetëm si rrjedhojë e lobimit serb, por edhe si mungesë e angazhimit të shtetit tonë. Ky  absurditet vendos shenjën e barazimit mes mllefit, racizmit dhe dhunës serbe dhe heronjve të kombëtares sonë.

Ky vendim vlerëson dhunën dhe racizmin, por vlerëson edhe qendrimin e Ramës që inisistoi për vizitën në Beograd dhe nuk e denoncoi fuqishëm atë akt të shëmtuar, sikur të mos kish ndodhur asgjë, e sikur të kishte barazi mes palëve. Ndaj edhe UEFA e kishte të lehtë të vendoste barazinë.

Duhet që këto ditë deri në shqyrtimin në apel, Kryeministri dhe diplomacia shqiptare ta marrin seriozisht çështjen e të lobojnë të paktën sa homologët e tyre serbë. Të bëjnë të pakten sa 1 e milionëta e asaj që bënë lojtarët tanë në fushë.

Deklaratë e deputetit të Partisë Demokratike, Gerti Bogdani, 24 Tetor 2014

Deklaratë e deputetit Keltis Kruja mbi standartet e dyfishta të INUK-ut të Edi Ramës që prish ndërtimet e të pamundurve dhe lejon ndërtimet e klientelës së tij

Prishjet selektive të ndërtimeve nga Edi Rama, po lënë pas jo vetëm gërmadha e varfëri, por po nxjerrin në dritë pabarazinë e qytetarëve.

Kjo padrejtësi është revoltuese e nuk mund të fshihet.

Në zonën përballë maternitetit të ri, fadromat e Edi Ramës kanë bërë hi shumë ndërtime. Po si ka mundësi që nuk preket shtesa e vëllait të Koco Kokëdhimës, e cila ka zënë 1 metër e gjysëm trotuarin ku duhet të kalojnë qytetarët.

Kjo foto e tregon qartë.

Në rrugën Mine Peza, fadromat e Edi Ramës kanë shembur dyqane e njësi me të cilat ushqehen familjet. Por ka mbetur në këmbë si provë e lidhjeve politike, ndërtesa Kryetarit të Partisë Socialiste për njësinë 10.

Zonën e Don Boskos, Edi Rama e ka përdorur për të bërë propagandë me prishjet që po bën. Po si shpjegohet që nuk preket lokali i Drejtorit të Personelit në Policinë e Shtetit, Xhevahir Karaj. Kjo foto është akuzë. Karaj është i paprekshëm pasi njihet edhe si  donator i Partisë Socialiste në zgjedhje.

Në Kombinat, është një lokal në mes të rrugës, në mes të lulishtes. Kuptohet nga emri se kush e ka. Quhet Dako Kafe dhe e zotëron djali i xhaxhait të Kryetarit të Bashkisë së Durrësit. Prishjet selektive të Ramës e kanë kursyer. Ja fotoja e këtij ndërtimi, dëshmi e standartit të dyfishtë të Edi Ramës.

Po në këtë zonë, në mes të hapësirës publike gjendet kjo ndërtesë e madhe që ka zaptuar lulishten. Pse lejohet kjo nga Edi Rama?!! Se i përket një funksionari të lartë të INUK.

INUK-u i Edi Ramës sigurisht nuk mund të prishë pronat e veta, të miqve të Kryeministrit, të funksionarëve të Partisë Socialiste, të klientelës qeveritare.

INUK është kthyer në një bandë zuzarësh që vepron sipas urdhërave politike të Edi Ramës. Ne do të jemi në krah të qytetarëve të vendit dhe i ftojmë ata të përdorin cdo mjet për të kundërshtuar dhunën qeveritare ndaj të pamundurve, dhe paprekshmërinë për ata që kanë lidhje me Kryeministrin.

Deklaratë e deputetit të Partisë Demokratike, Keltis Kruja, 24 Tetor 2014

Deklaratë e Albana Vokshit: “Si dhunues sistematik i grave, Edi Rama dhunoi dhe dje imazhin e grave dhe vajzave, me një provokim të ulët pa asnjë lidhje me realitetin dramatik të sëmundjes”.

Çdo vit në Shqipëri 250 gra humbin jetën nga kanceri i gjirit. Qeveria nuk ka planifikuar asnjë lekë për kujdesin shëndetësor për gratë. Nga premtimet e gënjeshtërta për shëndetësinë falas, Kryeministri vjen me buxhetin e shtuar të reklamave, duke nxjerrë gratë në dritaret e godinës qeveritare, pak a shumë si një plagjaturë “Red Light” në Amsterdam.

Si dhunues sistematik i grave, Edi Rama dhunoi dhe dje imazhin e grave dhe vajzave, me një provokim të ulët pa asnjë lidhje dhe mesazh me realitetin dramatik të sëmundjes.

Kanceri i gjirit prek cdo vit 500 gra në Shqipëri, një kërcënim serioz për jetën e gjysmës së popullësisë së vendit.

Statistikat rriten, ndërsa shumë gra në pamundësi ekonomike nuk mund të kryejnë  vizitën e përvitshme të mamografisë.

Aparaturat e mamografisë mungojnë në shumë qytete të Shqipërisë. Gratë në fshat nuk kanë asnjë mbështetje nga autoritetet shëndetësore për t’iu mundësuar vizitën e mamografisë.

Manipulimi i publikut me mjekësi falas nga Rilindja po sjell pasoja të rënda dhe në trajtimin e tumorit të gjirit. Me avancimin e sëmundjes, grave të prekura nga kanceri i gjirit nuk i’u mundësohet përkujdesje shëndetësore as në periudhën terminale. Madje, nga strukturat kompetente të mjeksisë ka reduktime të ndjeshme të invaliditetit tek pacientët me tumor në gji, një e drejtë kjo e cënuar rëndë jo vetëm nga ana mjekësore por edhe njerëzore.

Fshesa e spastrimeve në administratë ka shënuar dhe raste tragjike të largimit të grave me kimioterapi.

Në pavionin e Onkologjisë mungojnë medikametet dhe njerëzit vdesin në radhë për kimio-terapinë.

Kjo është gjëndja e shëndetësisë, ky është bilanci i Edi Ramës me këtë fenomen tronditës.

Ndaj, është turpëruese kur sheh Kryeministrin e vendit tend që paguan mijëra euro për të dhunuar gruan duke e trajtuar si objekt, në lagjen “kryeministrore”, njëlloj si në Amsterdam, dhe nuk paguan asnjë qindarkë për  t’iu mundësuar një jetë dinjitoze grave të prekura nga kanceri i gjirit.

Kjo sjellje fyese e Kryeministrit, është një tjetër dëshmi se ku shkon buxheti për shëndetin e grave.

Deklaratë e deputetes së Partisë Demokratike, Albana Vokshi, 24 Tetor 2014

Jam informuar për zhvillimet e sotme në Kuvendin  e Shqipërisë.

Dua të rikthesoj  se opozita  ka ndërprerë marrëdhëniet  me Kuvendin e jo për  t’i vënë njolla, siç tha sot në ligjërimin e  tij sërish demagogjik  zoti Rama,  por për të mos u pajtuar me njollat, për të mos iu bërë fasadë njollave  dhe për  t’i  hequr njollat  e pashoqe  që   i ka venë Kuvendit  shumica Rama-Meta me shpërfilljen skandaloze të vendimeve  të Gjykatës Kushtetuese dhe me kriminalizimin  e tij.

Këto janë dy çeshtjet e mëdha, për të cilat, përveç opozitës dhe opinionit publik shqiptar janë sensibilizuar në maksimun edhe partnerët  tanë  ndërkombëtarë, që nuk mund  të imagjinojmë  një Kuvend ku hidhen në kosh vendimet e gjykatës kushtetuese dhe ku shumica, apo sulltani i saj  krijon një repart azapësh kundër  opozitës.

Ne kemi propozuar një marrëveshje me garanci ndërkombëtare për  të dyja këto çeshtje.

Sot, falë presionit ndërkombëtar dhe vendosmërisë  sonë, u njoftua nxjerrja nga sirtaret dhe venia  në rendin e dites e  dy kerkesave të  vjetra të  opozitës  për  ngritjen e dy komisioneve hetimore. Zbatimi i kushtetutës dhe vendimeve të Gjykatës Kushtetutese janë një detyrim. Qeveria dhe shumica kanë  qenë prej disa muajsh në shkelje flagrante të këtij detyrimi. Sot vendosen të zbatojnë kushtetutën!

Po çfarë garancish ka se  nuk do t’i shkelin prapë, siç kanë bërë kur kanë shkelur e grisur konsensusin për ligjin e nepunësit  civil dhe  vendimin e gjykatës kushtetuese për këtë çështje? Asnjë garanci.

Si opozitë ne kemi   vështirësi të  pranojmë që  zbatimi i vendimeve  të gjykatave  prej qeverisë të  varet nga humori i saj, nga  dhe konjukturat e ditës.  Ndaj kemi kërkuar  e ngulmojnë për një marrëveshje me garancinë e miqve dhe partnerëve më të mirë  ndërkombëtarë të Shqipërisë. Për të dyja çeshtjet madhore të konfliktit.

 Në lidhje me dekriminalizimin e Kuvendit, zoti Rama vazhdon të mos e shohë të vërtetën drejt në sy. Vazhdon të fshihet pas gjethes së fikut, vazhdon të bëjë dorëjashtin, kur është ai  autori dhe përgjegjësi  numër  një i promovimit të trafikantëve në politikë, në administratën e lartë  dhe brenda në Kuvend. Eshtë ai që i ka zgjedhur me dorë si të  tillë, që  i ka përdorur dhe i përdor si të  tillë për t’i mbyllur gojën opozitës, që i ka në punë  dhe në aktivitet  si të tillë  me  mandatet e Partisë Socialiste në xhepa.

Zoti Rama ka detyrimin të flasë hapur me shqiptarët për këtë fenomen nga më të shëmtuarit që ka njohur jeta politike e vendit gjatë dy dekadave të fundit.

Ka detyrimin të distancohet publikisht dhe politikisht  nga fenomeni në përgjithësi dhe nga dhuna në Kuvend në veçanti.

Kjo është qasja që pret opozita,  që pret publiku, që presin ndërkombëtarët. Spekullimet meskine me “ e ka kush e ka”   u vlejnë vetëm trafikantëve me mandate dhe pa  mandate.

Njoftim për shtyp i Partisë Demokratike, 23 Tetor 2014

Deputeti Ristani bën 4 pyetje publike për Kryeministrin në lidhje me mbrojtjen e kreut të organizatës kriminale të drogës nga deputetët e shumicës. 

Ka një fakt publik sot.

Edi Rama është vënë në mbrojtje të organizatorit të trafikut të drogës nga zona e Vilunit drejt Italisë.

Edi Rama ka ndaluar aksionin e Policisë, ka hedhur poshtë punën e gjatë të shërbimeve shqiptare dhe shteteve fqinje, duke mos lejuar arrestimin e kreut të organizatës mafioze.

Eshtë Edi Rama, sepse ky imunitet që ka krimi sot, buron nga Kryeministri që ka ngritur sistemin e personave të paprekshëm, që i ka dhënë pushtet mbi ligjin disa deputetëve të tij, të cilët në të vërtetë drejtojnë trafikun e paligjshëm.

Kur deputetë të Edi Ramës fusin në makinë, dhe shpëtojnë trafikantin nga aksioni i Policisë, kemi në realitet instalimin e sistemit mafioz. Kemi kapjen e shtetit nga mafia.

Këtë fakt sot e dinë gjithë shqiptarët, të cilët, kanë drejtuar gishtin nga Edi Rama.

Dhe cfarë bën Kryeministri, sulmon opozitën që denoncon rënien e shtetit, vënien e tij në shërbim të krimit.

Këto marifete të ulëta, nuk e nxjerrin në dritë Edi Ramën dhe nuk e shpëtojnë dot nga pyetjet;

Kush janë deputetët që ofrojnë imunitet për kriminelët dhe i shpëtojnë ata nga aksioni i Policisë?

A ka mes tyre, deputet që ndiqet nga organet ligjzbatuese të vendeve të Bashkimit Europian për vepra të rënda penale?

Cila është marrdhënia që Edi Rama ka me këta deputetë?

Cilat janë interesat që i bëjnë këta deputetë të dalin mbi ligjin, mbi rendin, mbi shtetin?

Deklaratë e deputetit të Partisë Demokratike, Arben Ristani, 23 Tetor 2014