Blog

Deputeti Luciano Boçi denoncon prishjen selektive të ndërtimeve dhe paraqet raste konkrete te favorizimit të klientelës qeveritare

Edi Rama po dëshmon cdo ditë se qytetarët e vendit nuk janë të barabartë para ligjit.

Ligji nuk vepron njësoj dhe zbatohet sipas dëshirave, interesave dhe lidhjeve që kanë njerëzit me Kryeministrin.

Prishjet selektive të ndërtimeve, shembja e pasurisë, e mundit e djersës, e bukës së gojës për disa, me një të rënë të lapsit, dhe lejimi për miqtë e qeverisë po ndodhin ditën për diell në sytë e të gjithë qytetarëve.

Po i tregojmë sot publikut tre raste tipike të bujarisë së Kryeministrit, ku ligjin e bën Maliqi.

Në këtë foto, dallojmë një lokal përballë Inxhinierisë së Ndërtimit, që i ka mbijetuar shembjes. Të gjithë godinat e tjera janë rrafshuar. Vetëm kjo ka mbetur. Qytetarët janë dëshmitarë të dy standarteve të Edi Ramës.

Kjo shtesa këtu, përballë Maternitetit të Ri, është pa leje, dhe ka zënë hapësirë publike. Nuk është shembur sepse pronari i saj është i lidhur me Edi Ramën dhe ligji nuk bën më efekt.

Ky lokali këtu po hedh shtat në një zonë të qytetit të Shkodrës, ku nuk është ndërtuar asnjëherë. Po lejohet sepse është marrë në mbrojtje nga një deputet i mazhorancës, mik me Edi Ramën.

Ka me dhjetra e qindra raste të tjera në Shqipëri, të lejimit të ndërtimit pa leje, të moszbatimit të ligjit njësoj për të gjithë.

Qytetarët janë të revoltuar nga trajtimi preferencial që bën Edi Rama.

Partia Demokratike i fton qytetarët të protestojnë dhe të kundërshtojnë me cdo mjet aktet e bandës së zuzareve, që u heqin bukën e gojës të pamundurve, dhe lënë pas gërmadha me urdhërin e Kryeministrit, dhe po me urdhërin e tij lejojnë sarajet e miqve në mes të qytetit, në bregdet e kudo.

Partia Demokratike do të jetë në krah të qytetarëve për të ndalur këtë dhunë mafioze të kapobandës Kryeministër, i cili po shkel me këmbë mundin e djersën e shqiptarëve, në kohën kur papunësia është rritur, taksat janë rritur, cmimet janë rritur, dhe varfëria ka pllakosur vendin.

Ky është Edi Rama dhe standardet e tij. Nëse je kriminel të mbron e të bën deputet, nëse ke një dyqan që mban familjen, të hedh në rrugë.

Deklaratë e deputetit të Partisë Demokratike, Luçiano Boçi, 23 Tetor 2014

Deputeti Mima i kërkon qeverisë të mos rrisë taksën e qarkullimit, që do të rëndojë mbi industrinë dhe konsumatorët familjarë

Pas lajmit të keq zyrtar për rritjen e çmimit te energjise elektrike nëpërmjet heqjes së fashës mbrojtëse prej 300 kilovatësh, sot, një tjeter lajm i keq ka mbërritur, ai për rritjen e taksës së qarkullimit me 120 lekë të vjetra për çdo litër karburant nga 1 janari 2015. Ky lajm është tronditës për industritë por edhe konsumatorët familjare në këto kohë kur kriza është ulur këmbëkryq në vend dhe ka kafshuar me dhëmbet e saj mijëra biznese e dhjetra mijëra vende pune.

Ky lajm i keq për shqiptarët është baraz me 80-90 milionë dollarë në vit të cilat qeveria i merr direkt nga xhepat e çdo qytetari shqiptar,  por shuma që do t’u merret atyre indirekt është disa herë më e madhe se e mësipërmja duke rënduar në kostot e mallrave e shërbimeve që e kanë transportin element përbëres të tyre.

Është e qartë se, pas çmontimit të sistemit me të thjeshtë tatimor që vendi kish pasur ndonjëherë, qeveria nuk ka ndërmend të ngreje një sistem tatimor të aftë për të vjelë ato tatime e taksa qe janë të vështira për t’u administruar por mjaftohet me prezantimin e elementëve shtesë vetëm nga burimet e lehta për t’u taksuar. Partia Demokratike i thotë qeverisë me zë të lartë: “Mos e bëj këtë rritje të rrezikshme të çmimit të karburanteve, analizoje me kujdes situatën në të cilën ndodhet vendi, analizo përvojat e vendeve  evropiane dhe do ta shohësh që nuk ke nevojë të rrisësh taksën e qarkullimit, pasi aq para mund t’i gjesh, fjala vjen, tek mirëadministrimi i akcizave, ku evazioni është ulerites, megjithë makiazhin qeveritar me uljen e planit.

Deklaratë e deputetit të Partisë Demokratike, Florion Mima, 23 Tetor 2014

Ndërprerja e marrëdhënieve me Kuvendin është pasojë e asgjesimit të debatit parlamentar nga dyshja Rama-Meta. Me qëllimin e vetëm për të ndalur transparencën dhe llogaridhënien parlamentare para qytetarëve, Rama-Meta shkelin Kushtetutën dhe ligjin, refuzojnë zbatimin e vendimeve të Gjykatës Kushtetuese. Por për të shuar fjalën e lirë në Kuvend nuk janë mjaftuar me kaq. Edi Rama ka instaluar në Kuvend individë me rekorde kriminale të cilët i përdor për skenare dhune kundër opozitës. Opozita mund të përballet fizikisht me këta horra dhe urdhëruesin e tyre Rama, por skenaret e gjakderdhjes nuk janë zgjidhje por përshkallëzim drejt një konflikti civil me pasoja të pallogaritshme për vendin. As nënshtrimi i Partisë Demokratike para krimit dhe aleatëve të tij politikë nuk ka për të ndodhur kurrë!

E vetmja zgjidhje është rikthimi i Parlamentit në normalitet. Për këtë arsye opozita ka propozuar një marrëveshje shumicë-opozitë me garanci dhe mbikqyrje të faktorit ndërkombëtar ku shumica të angazhohet të mos verë më kurrë në pikëpyetje sovranitetin e Kushtetutës dhe vendimeve të gjykatave si dhe të punojë bashkë me opozitën për të çmontuar mekanizmin që promovon krimin në Kuvend dhe në strukturat shtetërore.

Partia Demokratike është më e vendosur se kurrë të paguajë çdo çmim në mbrojtje të demokracisë dhe lirive themelore. Papunësia në rritje, varferia, pasiguria dhe depresioni ekonomik si dhe arroganca e paligjshmëria qeveritare janë prodhim i drejtpërdrejtë i degradimit të shtetit ligjor dhe demokracisë parlamentare nga dyshja Rama Meta. Kush mbyll sytë apo e shikon me syze rozë këtë realitet gabon rëndë dhe gënjen veten. Nëse nuk ka reflektim, Partia Demokratike do të udhëheqë qytetarët në protestat më masive dhe popullore deri në rrëzimin e atyre që mendojnë se janë mbi ligjin dhe Kushtetutën.

Deklaratë e deputetit të Partisë Demokratike, Edi Paloka, 21 Tetor 2014

Kryetari i Partisë Demokratike priti në takim Kryetarin e Komisionit për Marrëdhëniet me Jashtë të Senatit italian. z. Pier Ferdinando Casini.

Z. Basha i shprehu Presidentit Casini mirënjohjen për mbështetjen dhe ndihmën e çmuar që Italia, Senati italian dhe ai personalisht i kanë dhënë Shqipërisë në të gjitha fushat, e në veçanti në projektin madhor të integrimit europian dhe anëtarësimit në NATO, ku Italia u shndërrua në avokate të Shqipërisë.

Basha ndahu me Presidentin Cazini  shqetësimin se shkelja e vazhdueshme e Kushtetutës, refuzimi i kontrollit demokratik opozitar përmes komisioneve parlamentare hetimore, injorimi dhe moszbatimi i vendimeve të Gjykatës Kushtetuese dhe të gjykatave të vendit, mohimi i fjalës së lirë të opozitës përmes ushtrimit të dhunës verbale dhe fizike nga elemente kriminalë të mazhorancës në Kuvendin e Shqipërisë, të orkestruar dhe drejtuar nga Kryeministri Rama, kanë reduktuar në zero çdo hapësirë demokratike për opozitën duke e detyruar atë të ndërpresë marrëdhënien me Kuvendin.

Megjithë thirrjet e përditshme të opozitës, mazhoranca jo vetëm që nuk ka reflektuar për kriminalizimin e Kuvendit dhe ngjarjet e papranueshme të dhunës ndaj deputeteve të opozitës të faktuara dhe me pamje filmike por kanë vijuar dhe intensifikuar fushatën e kapjes se institucioneve te pavarura, Shkollën e Magjistratures, gjykatat e vendit dhe së fundmi Këshillin e Lartë të Drejtësisë. Përmes pseudo komisioneve hetimore mazhoranca ne shkelje te pavarësisë se pushteteve dhe në kundërshtim me Kushtetutën e vendit propozon ndërprerjen e mandateve të dy antarëve të këtij institucioni.

Në këtë situatë të rëndë të demokracisë parlamentare, Partia Demokratike kërkon që shumica të reflektojë dhe të marrë përsipër duke dhënë garanci të plota politike të matshme edhe nga faktori ndërkombëtar se nuk do të përsëriten më në të ardhmen shkeljet e ligjit themelor të shtetit shqiptar dhe vendimeve të gjykatës Kushtetuese si dhe për të nisur një bashkëpunim shumicë-opozitë për të çmontuar mekanizmin që promovon krimin në Parlament dhe strukturat shtetërore.

Beteja e përditshme e vendosur e opozitës në mbrojtje të demokracisë, bëri te ditur zoti Basha është dhe mbetet e vetmja mënyrë për ti vënë fre revanshit të kësaj mazhorance për zëvendësimin e demokracisë në Shqipëri me një regjim oligarkik.

Partia Demokratike tha zoti Basha  është e vendosur në ruajtjen e standardeve demokratike që shqiptarët me aq mund kanë ndërtuar gjatë këtyre viteve.

Njoftim për shtyp i Partisë Demokratike, 20 Tetor 2014

Reagimi i zëdhënëses Nebijaj pas skandalit me delegacionin shqiptar në Samitin e Euro-Azisë, i cili braktisi punimet për kazinonë e Sanremos

Tirana zyrtare është përfshirë në një skandal me përmasa të padëgjuara më parë. Në Samitin e Euro- Azisë që po mbahet në Milano, me pjesëmarrjen e 53 shteteve dhe mjaft liderëve botërore si Kancelarja Merkel, Presidenti Italian Napoletano, Kryeministri kinez etj,

delegacioni shqiptar i kryesuar nga Ministrja e Mbrotjes Mimi Kodheli, ka braktisur punimet për të shkuar në kazinotë e Sanremos.

Lajmi është publikuar në mediat italiane më prestigjoze si e përdishmja Corriere della Sera, e cila u hap me samitin e Euro-Azisë, por lajmin e përmbylli me sjelljen e pazakontë të delegacionit shqiptar që merrte pjesë në këtë samit kaq të rëndësishëm.

Gazeta Corriere della Sera raportoi se “një grup i madh i delegacionit shqiptar, sapo ka mundur, ia ka mbathur për në Liguria. Jo për të parë detin, por për kazinonë e Sanremos”.

Partia Demokratike e denoncon ashpër këtë skandal të rëndë dhe e cilëson sjelljen e delegacionit shqiptar si të papërgjegjshëm. Mbathja nga punimet e këtij samiti të rëndësishëm për të shkuar në Kazino, tregon arrogancën e qeverisjes së vendit, që nuk ndalet para asnjë lloj etike dhe norme zyrtare. Ky skandal vjen pas zhdukjes një javë të kryeministrit Rama jashtë vendit, ku nuk bëri transparencë, ku nuk tregoi se ku shkoi dhe as kë takoi.

Partia Demokratike i bën thirrje opinionit publik dhe qytetarëve shqiptarë të dënojnë këtë akt të shëmtuar të zyrtarëve të qeverisë shqiptare.

Deklarata për media e zëdhënëses së Partisë Demokratike, Oriela Nebijaj, 20 Tetor 2014

Deklarata e deputetes Eleina Qirici që denoncoi kaosin në arsim me mungesën e regjistrave në shkolla për shkak të interesave klienteliste të qeverisë. 

Sot, qeveria bëri propaganda me arsimin, por në realitet gjendja është dramatike. Ka kaluar një muaj nga fillimi i shkollës dhe asnjë klasë në Shqipëri nuk ka regjistër. Qeveria për interesa të pastra klienteliste ka lënë shkollat tona pa një prej dokumentave kryesore për mbarëvajtjen e mësimit.

Mungesa e regjistrave ka krijuar kaos dhe lidhet me faktin se qeveria ka vendosur t’ia japë prodhimin një shtëpie botuese e afërt me të. Për hir të këtyre interesave klienteliste, prej afër 40 ditësh, asnjë klasë në Shqipëri nuk ka regjister dhe mësimi zhvillohet pa dokumentimin më kryesor.

Kjo është mënyra se si e koncepton kjo qeveri arsimin dhe edukimin, si një mundësi në radhë të parë për të pasuruar klientet e saj duke i dhënë ekskluzivitetin e botimit të regjistrave për gjithë vendin.

Kësaj i shtohet dhe fakti se është menduar që regjistrat që do të prodhojë klienti i Edi Ramës, të shlyhen në çast me para në dorë. Partia Demokratike e denoncon me forcë këtë skandal dhe kërkon nga qeveria të sigurojë menjëherë bazën kryesore materiale për klasat e shkollat tona dhe nxenësit tanë.

Deklaratë për media e deputetes Eleina Qirici, 20 Tetor 2014

Kryetari i Partisë Demokratike priti në takim Senatorin e Shteteve të Bashkuara të Amerikës për shtetin e Konektikatit dhe anëtarin e Komisionit për marrëdhëniet me Jashtë të Senatit, z. Christopher  Murphy.

Z. Basha i shprehu Senatorin Murphy mirënjohjen për mbështetjen dhe ndihmën e cmuar që SHBA i ka dhënë Shqipërisë në këto dy dekada si për konsolidimin e demokracisë ashtu edhe për anëtarësimin në NATO dhe integrimin në Bashkimin Europian.

Kryetari i opozitës ndau me Senatorin Murphy shqetësimin për vendosjen në vend të praktikave autokratike dhe oligarkike, në kundërshtim me parimet themelore të demokracisë dhe shtetit ligjor.  Shkelja e Kushtetuetes dhe ligjeve nga ana e qeverise dhe mazhorances, moszbatimi i vendimeve te Gjykatës Kushtetuese e gjykatave te tjera, kapja e institucioneve të pavarura, infiltrimi i krimit në strukturat shtetërore, eleminimi i hapësirave institucionale të opozitës dhe skenarët e dhunës fizike kundër opozitës nga individë me rekorde kriminale të sjellë enkas në parlament nga kryeministri Rama, janë të papajtueshme me standartet e demokracisë euro-atlantike, theksoi zoti Basha.

Në këto kushte Partia Demokratike ka ndërprerë marrëdhëniet e saj me Kuvendin derisa shumica të reflektojë për përgjegjësitë e saj për këtë situatë të rëndë të demokracisë parlamentare, dhe të angazhohet publikisht për ti dhënë fund shkeljes së Kushtetutës dhe vendimeve të gjykatës Kushtetuese si dhe për të nisur një bashkëpunim shumicë-opozitë për të cmontuar mekanizmin që promovon krimin në parlament dhe strukturat shtetërore.

Partia Demokratike është e vendosur për të qëndruar fuqishëm në mbrojtje të vlerave të demokracisë, shtetit ligjor, të drejtave dhe dinjitetit të individit, si vlera të ndara me demokracinë e madhe amerikane, dhe si rruga e drejtë për të ecur përpara për mirëqënien dhe sigurinë e Shqipërisë dhe shqiptarëve.

Opozita mbështet pa asnjë rezervë çdo investim drejt një historie të re marrëdhëniesh mes fqinjve në rajon, me shikim nga e ardhmja europiane e të gjithë vendeve dhe popujve të rajonit, theksoi zoti Basha. Kjo kërkon shkëputje nga stigmat e racizmit dhe fobive dhe që ky investim të shkojë drejt konsolidimit të vlerave dhe standarteve demokratike në të gjitha vendet e rajonit dhe jo flijimit të tyre nën petkun e një stabiliteti të rremë antidemokratik.

Deklaratë e deputetit Bylykbashi që dënon farsën e hetimit të maxhorancës mbi KLD-në, duke e cilësuar vendimin e sotëm të Komisionit si minim të reformës në drejtësi. 

Sot, Kuvendi mbylli kapitullin e hetimit farsë parlamentar mbi KLD, që kishte për qëllim vetëm shkarkimin e dy anëtarëve të saj dhe zëvendësimin e tyre me komisarët e kuq të mazhorancës.

Me vendimin e sotëm për të miratuar raportin që gjykon mbi punën e KLD dhe propozon ndërprerjen e mandateve kushtetuese të anëtarëve të saj, ky komision shkel rëndë pavarësinë e pushteteve dhë thyen Kushtetutën. Gjykata Kushtetuese ka thënë qartë se Kuvendi nuk është organi suprem dhe nuk mund të hetojë e të gjykojë mbi aktet që janë kompetencë e organeve ‎të pushteteve të tjera.

Raporti i sotëm i miratuar nga jakobinët e mazhorancës ishte veçse akti i fundit i farsës parlamentare që Edi Rama dhe Ilir Meta e kamufluan si hetim parlamentar. Nuk ka shqiptar që nuk e di tashmë që vendimi për shkarkimin e ‎dy anëtarëve të KLD ka qenë marrë që para se ky komision gijotinë të ngrihej.

Akti i sotëm i komisionit të hetuesisë parlamentare, është një nga aktet më të rënda të shkeljes së Kushtetutës dhe parimit të ndarjes së pushteteve. Me një ligj antikushtetues duke i dhënë fuqi prapavepruese, dhe duke shkelur me të dyja këmbët vendimet e Gjykatës Kushtetuese për ndarjen dhe pavarësinë e pushteteve, ‎Rama dhe Meta po uzurpojnë edhe drejtësinë.

Kjo mazhorancë, pasi ka uzurpuar çdo hapësirë të opozitës në parlament, injoron zbatimin e vendimeve të Gjykatës Kushtetuese për hetimin parlamentar mbi mazhorancën, e ka kthyer përfundimisht Kuvendin në një gijotinën jakobine.

Nuk kishte asnjë dyshim, se ligji i KLD, i miratuar me nxitim më 31 korrik, kundër thirrjeve të ndërkombëtarëve për të mos nxituar dhe për konsultim me Komisionin e Venecias, ‎kishte vetem një qëllim, kapjen politike të KLD nëpërmjet shkarkimit të anëtarëve të saj.

Madje sot, në komision u bë thirrje që të shkarkohen edhe anëtarët e KLD që vijnë nga gjyqësori. Me ligjin e sapomiratuar, kjo mazhorancë ka krijuar instrumentin për t’i shkarkuar të gjithë anëtarët e KLD që nuk i nënshtrohen asaj. Ky është fundi i pavarësisë së gjyqësorit.

Veprimi i sotëm është një minë në themelet e reformës në drejtësi e cila si gur themeli duhet të ketë pavarësinë e gjyqësorit. Këtë pavarësi e kërkon edhe BE dhe Këshilli i Evropës. Ky akt, jo vetëm që cënon standardet europiane dhe kushtetuese, por vë në pikëpyetje seriozitetin dhe qëllimet e kësaj reforme.

‎Për këtë arsye i bëjmë thirrje përsëri komunitetit ndërkombëtar që me qëllim sigurimin e një reforme të vërtetë dhe konsensuale në drejtësi, ta ndjekë nga afër dhe të frenojë menjëherë këtë agresion antikushtetues ndaj pavarësisë së gjyqësorit të kësaj mazhorance. Partia Demokratike shpreh besimin se Gjykata Kushtetuese do garantojë paprekshmërinë e Kushtetutës dhe parimeve të saj.

Deklaratë e deputetit të Partisë Demokratike, Oerd Bylykbashi, 18 Tetor 2014