Blog
Prononcim për mediat i Kryetarit të Grupit Parlamentar, Paloka për ngjarjet në Lazarat
Kryetari i grupit parlamentar demokrat, Paloka, denoncon mashtrimin e Kryeministrit dhe fshehjen e të vërtetës në lidhje me mosmarrëveshjen për truallin (më tepër…)
-“Kërkohet konsensus, gjithpërfshirje dhe dialog me opozitën”-“Kërkohet zbatim i vendimit të gjykatave dhe dekriminalizimi i Kuvendit e Administratës Publike” Të nderuar përfaqësues të medias, të nderuar zonja dhe zotërinj Bashkëqytetarë Faleminderit për këtë komunikim përmes ekranit në një ditë të rëndësishme për Shqipërinë siç është publikimi i progres-raportit për vitin 2014, raport i cili mu dorëzua para gjysëm ore zyrtarisht nga ambasadorja e Bashkimit Europian në Tiranë. Ky raport i cili ka qarkulluar tashmë dhe ka qënë subjekt i komenteve gjatë gjithë ditës, nuk lë vend për hamendësime. Eshtë i qartë, objektiv dhe përfshin në masë të madhe shqetësimet dhe problemet me të cilat vendi është përballur, një pjesë e mirë e të cilave kjo opozitë i ka denoncuar në mënyrë të përditshme e të përjavshme. Në veçanti raporti bën një kontrast përsa i përket zhvillimeve negative nga qershori e këtej, zhvillime të cilat kanë pamundësuar që raporti të ketë qoftë edhe një referencë të vetme, qoftë një premtim apo sugjerim për hapjen e negociatave, ndonëse në qershor në Tiranë, përfaqësuesit e lartë të Bashkimit Europian thanë se hapja e negociatave brenda vitit ishte e mundshme nëse plotësoheshin prioritetet. Raporti reflekton shqetësim në rritje të Bashkimit Europian sikundër të shoqërisë shqiptare dhe të shqiptarëve për krimin e organizuar, korrupsionin, si dhe për krizën ekonomike. Raporti denoncon frymën konfliktuale të qeverisë, shkeljen e Kushtetutës, të vendimeve të Gjykatës Kushtetuese që kanë pamundësuar së bashku me dhunën e organizuar në parlament, rolin mbikqyrës të opozitës. Raporti denoncon mungesën e konsensusit për reformat, në veçanti për reformën territoriale por edhe për reformat në tërësi. Dhe sot në Parlamentin Europian, europarlamentarët me pyetjet e tyre kryqëzuan jo Komisionerin për Zgjerim, por Edi Ramen për depërtimin e krimit në parlament dhe në administratën e lartë shtetërore, moszbatimin e vendimeve të Gjykatës Kushtetuese, kapjen e institucioneve të pavarura, prishjen e konsensusit politik, për goditjen që i bënë votës së lirë dhe të ndershme më shitblerjen e turpshme të votave në Korçë dhe amnistimin e këtij krimi në Parlament. Ndryshe nga raportet e tjera, siç nuk ka ndodhur asnjëherë, për herë të parë në progres-raportin e 2014 shprehet shqetësimi për moszbatimin e Kushtetutës dhe të vendimeve të Gjykatës Kushtetutese. Prandaj zbatimi i ligjit, kriteri numër një për tju afruar paradhomës së Bashkimit Europian është potencuar kësaj radhe më shumë se çdo herë tjetër si një problem madhor për vendin. T’i kërkosh qeverisë të respektojë Kushtetutën dhe vendimet e Gjykatës Kushtetuese dhe vendimet e gjykatave në tërësi vetëm 3 muaj pas marrjes së statusit të vendit kandidat, është thellësisht alarmuese. Në raport thuhet qartë se shumica duhet të marrë masa për respektimin e plotë të rolit mbikqyrës të opozitës në parlament pa asnjë vonesë! Vlerësimi për punën e parlamentit nis me rezolutën e propozuar nga opozita në nëntor për integrimin europian dhe mbaron me degradimin në përdorimin e dhunës në parlament që çoi në largimin e opozitës. Administrata publike Në raport theksohet se konsensusi që u arrit në parlament nuk mund të hidhet poshtë me një Akt Normativ të njëanshëm të qeverisë, siç ndodhi. Dhe si rrjedhojë e këtij veprimi arbitrar, largimet masive nga puna, e nëpunësve civilë e punonjësve të administratës publike kapin, sipas shifrave të dhëna nga vetë autoritetet këtu, 6000 të larguar, ndërkohë që 2/3 e vendimeve të Gjykatës të Shkallës së parë janë në favor të punonjësve të larguar padrejtësisht, dhe në raport kërkohet zbatimi i këtyre vendimeve. Institucionet e pavarura Raporti thotë qartë se pavarësia e institucioneve të pavarura është cënuar seriozisht nga mënyra e shkarkimit dhe emërimit të drejtuesve dhe të bordeve të këtyre institucioneve duke përfshirë rastin e AMA-s, dhe kërkon rikthimin e të gjitha funksioneve statutore dhe pavarësinë e institucioneve. Krimi dhe korrupsioni Raporti thotë se qeveria nuk ka një qasje strategjike për të luftuar krimin e organizuar në territorin e vet dhe se krimi i organizuar është një sfidë shumë e madhe për Shqipërinë. Përveç shqetësimit për korrupsionin dhe kërkesës për luftën ndaj tij, ka dhe konstatime të drejtpërdrejta si përshembull tek prokurimet publike ku thuhet se ka rritje galopante të prokurimeve të drejtpërdejta dhe pa shpallje, ç’ka do të thotë korrupsion masiv me paratë e taksapaguesve shqiptarë. Alarmi i rritjes së azilkërkuesve Për herë të pare, pas vitit 2010 kur shqiptarët përfituan nga liberalizimi i vizave, nga heqja e vizave, Shqipëria renditet në vend të dytë për numrin e azilkërkuesve, dyfish më shumë se viti i kaluar, thotë raporti. Dhe e lidh ketë jo vetëm me pamjaftueshmërinë e masave të marra por edhe me kriterin ekonomik. Ashtu si edhe raporte të tjera dhe tashmë edhe vetë INSTAT-i qeveritar pranon krizën ekonomike, edhe raport-progresi konstaton rënie të likuiditeteve, të kapitalit, të parave, ulje të besueshmërisë në ekonomi që do të thotë më pak kreditim, më pak konsum, dhe rritje drastike të numrit të papunëve. Reforma e gjyqësorit Në reformën e gjyqësorit, një tjetër prioritet kyç për avancimin e Shqipërisë drejt Bashkimit Europian, raporti thotë se duhet të përvijohet me një qasje konstruktive , bashkëpunuese të të gjithë aktorëve përfshirë Komisionin e Venecias, etj. Raporti thekson qartë se 3 ligjet e miratuara me urgjencë në seancën e fundit në parlament ishin fragmentare dhe u bënë jashtë procesit gjithpërfshirës, pa konsultime duke përjashtuar ekspertizën ndërkombëtare. Me këtë rast Komisioni Europian thekson se pikërisht ky nuk duhet të jetë shembulli që duhet ndjekur, pasi procesi duhet të jetë gjithpërfshirës konsensual dhe i çertifikuar nga Komsioni Venecias dhe ekspertët e tjerë europianë dhe amerikanë. Liria e shprehjes dhe media Qeveria ka dështuar në adresimin e prioriteteve të përcaktuara, thotë raporti, por ne e dimë fare mirë se pas kësaj fjalie fshihen probleme të mëdha dhe të përkeqësuara në raport me lirinë e medias, me lirinë e fjalës në Shqipëri, disa prej të cilave rëndojnë drejtpërdrejt mbi gazetarët, mbi profesionalizmin e tyre. Presionet që ushtrohen mbi ta në forma të ndryshme përmes apo mbi pronarët e mediave, pa dyshim nuk i kanë shpëtuar syrit vëzhgues të Bashkimit Europian. Bllokimi i pushtetit vendor Qeveria pengoi ushtrimin nga ana e pushtetit vendor të kompetencave ligjore, thotë raporti. Shkon më tej duke thënë se ka diskriminim financiar të njësive vendore mbi baza politike, dhe mbetet një sfidë transparenca dhe planifikimi për fondet e akorduara njësive të qeverisjes vendore nga qeveria. INUK Flet edhe për INUK-un, kur thotë se Gjykata Kushtetuese urdhëroi mospërfshirjen e Inspektoriatit Ndërtimor Urbanistik Kombëtar në shkatërrime në kundërshtim dhe në ndërhyrje të pushtetit vendor dhe kërkon transparencë në procesin e vendimmarrjes. E në fakt vendimmarrja në INUK ngjason me vendimmarrje të organizave terroriste. Kërkohet dialog me opozitën Mesazhet për perkeqësimin e situatës politike janë të qarta. Qeveria thuhet në raport, ia përsëriti edhe komisioneri Fyle sot, ka përgjegjësinë të krijojë të gjitha kushtet që opozita të luajë rolin e saj mbikqyrës në parlament. Zbatimi i vendimeve të Gjykatës Kushtetuese për rolin mbikqyrës të opozitës në Parlament është një hap dhe hapi tjetër ka të bëjë
pikërisht me adresimin e problemit të dhunës së organizuar apo organizimit të dhunës kundër opozitës në Kuvend. Që reformat të jenë të qëndrueshme dhe thelbesore duhet të jenë domosdoshmërisht gjithpërfshirëse dhe konsensuale. Duhet dialog dhe konsensus për reformat që na çojnë drejt BE-së. Apo, siç ua kemi thënë zotërinjve apo përsëritur shpeshherë edhe nga kjo dhomë, në Bruksel shkohet me opozitën jo kundër saj, me qytetarët shqiptarë dhe jo kundër interesave të tyre, me Kushtetutë dhe zbatim të ligjit dhe jo në shkelje të tyre. Opozita e përkushtuar në përmbushjen e kritereve E përshëndesim këtë raport, dhe shpreh angazhimin tim dhe të Partisë Demokratike, në emër të opozitës, për të luajtur rolin tonë në përmbushjen e objektivave, në përmbushjen e kritereve për hapjen sa më parë të negociatave. Kemi kërkuar dhe kërkojmë përmbushjen e këtyre kritereve jo vetëm thjesht për hir të procesit, por sepse ky vend ka nevojë për to. Dhe ne duam që elitat politike të jenë të painkriminuara, të kenë sjellje politike të qytetëruar dhe benda ligjit. Sepse duam dhe kemi nevojë për një shtet ligjor ku të gjithë janë të barabartë përpara ligjit dhe ku ligji dhe Kushtetuta zbatohen njësoj për të gjithë dhe nuk shkelen në rradhë të parë nga qeveria dhe parlamenti. Ne duam ndarje dhe balancim të pushteteve dhe jo kapje dhe nënshtrim të tyre. Konsensus dhe gjithpërfshirje në çështjet thelbësore të ndërtimit të shtetit, as më pak as më shumë, përsërit Bashkimi Europian. Liri ekonomike dhe respektim të të drejtave të njeriut e jo nëpërkëmbje të tyre. Liri të medias, shoqërisë civile dhe zgjedhje të lira e të ndershme dhe jo me modelin famkeq të shitblerjes së votës që të gjithë shqiptarët e panë, siç ndodhi në Korçë. Brukseli foli qartë Për fat të keq kryeministri i vendit edhe sot bëri strucin. Nuk e di, tha, çfarë do opozita. Nuk e lexon dot në raport, veshët e tij nuk e dëgjojnë dot se çfarë thotë Brukseli se çfarë i tha sot edhe miku i tij Fyle nga aula e parlamentit europian, se çfarë i thanë europarlamentarët, se çfarë i thotë komisioni se çfarë i ka thënë dhe i thotë opozita në mënyrë të përsëritur. Rikthimi i jetës parlamentare mund dhe duhet të bëhet vetëm kur Edi Rama, si përgjegjësi kryesor për situatën e krijuar, të reflektojë, të flasë, të bëjë një mea-culpa të madhe për katranosjen që i ka bërë Kuvendit, në mënyrë që të krijohen premisat për të shkuar drejt një marrëveshjeje shumicë dhe opozitë që do të zgjidhte njëherë e mirë çeshjen e sovranitetit të padiskutueshëm të vendimeve të Gjykatës Kushtetuese, që do të zgjidhte njeherë e mirë çeshtjen e dekriminalizimit të Kuvendit të Shqipërisë dhe mbarë administratës publike, duke e çmontuar në themel deri në vidhën e fundit mekanizmin që promovon trafikantë, vrasës, pengmarrës në Kuvendin e Shqipërisë dhe në administratën shtetërore. Shpresoj ta ketë dëgjuar sot, nëqoftëse jo, transmetojeni prapë nesër.
Deklaratë e zëdhënëses Oriela Nebiaj
Qeveria ka nisur një përndjekje masive ndaj mësuesve profesionistë e me përvojë, për ti detyruar të lënë punën, që ti zëvendësojë ata me militantë partie.
Në shumë raste, kjo fushatë spastrimi po bëhet për interesa korruptive, pasi qeveritarët i nxjerrin këto vende pune në ankand dhe ia japin prurësit më të mirë.
Me pretekstin se kanë më pak orë nga sa duhet, qeveria po u bën presion mësuesve profesionistë, me eksperiencë të madhe në mësimdhënie.
Ky persekutim është në kundërshtim të hapur me ligjin “Për arsimin parauniversitar në Republikën e Shqipërisë” dhe me Udhëzimin “Për procedurat e emërimit dhe largimit nga puna të mësuesit në institucionet e arsimit parauniversitar”.
Ligji jep garanci për mësuesit dhe parashikon qartë rastet e shkarkimit të tyre kur hasen shkelje të rënda. Ligji gjithashtu siguron profilizimin, trajnimin dhe aftësimin e mësuesve për përditësimin e dijeve.
Shkaku që ka gjetur qeveria, për orët mësimore është thjesht një maskë për të mbuluar interesin klientelist e korruptiv të qeveritarëve e të drejtuesve të arsimit në rrethe.
Gjuetia e shtrigave është shtrirë në gjithë rrethet e vendit, cka ka krijuar sot që flasim një gjëndje kaosi dhe ankthi tek nxënësit dhe mësuesit.
Kjo është një goditje e pabesë që i bëhet arsimit nga Kryeministri i vendit në cdo nivel të tij. Pasi la në rrugë mijëra studentë me corbën e tij klienteliste të universiteteve, Rama po bën gati hedhjen në rrugë edhe të mësuesve profesionistë.
Mësuesi është një prej kolonave të rëndësishme të shoqërisë tonë, dhe ne i bëjmë thirrje Edi Ramës të heqë dorë nga kjo trysni, nga ky shantazh që po ushtron ndaj tyre. Ne kërkojmë që në shkollat tona të kthehet menjëherë ligjshmëria, rregulli, respekti dhe dinjiteti për mësuesin.
Bode: INSTAT nuk mbulon dot treguesit e përkeqësuar dhe rrëzon propagandën bajate të qeverisë. Ekonomia e vendit është zvogëluar krahasuar me të njëjtën periudhë të vitit të kaluar .
INSTAT-i i qeverisë njoftoi dje rezultatet për vlerësimin e ecurisë së ekonomisë kombëtare për 3 Mujorin e dytë të 2014, duke konfirmuar atë që qytetarët shqiptarë si konsumatorë dhe njerëzit e biznesit e kanë thënë dhe e thonë çdo ditë: ekonomia e vendit në tremujrin e dytë të këtij viti ka rënë me -0.61 pikë përqindje në krahasim me tremujorin e dytë të vitit të kaluar. E thënë ndryshe, INSTAT-i i qeverisë, edhe pse me metodikë të modifikuar në përllogaritjen e treguesit sintetik të ekonomisë, nuk mundi dot t’i mbajë më iso kryeministrit dhe tellallëve të tij në paradën e përditshme mediatike për gjoja suksese dhe progres.
Sipas rezultateve të raportuara, rënia e Prodhimit të Brendshëm Bruto me -0.61 pikë përqindje, nga 2 pikë përqindje që ka programuar qeveria, përbën paralajmërimin fatkeq për ecurinë e mëtejshme të ekonomisë së vendit. Kjo para së gjithash për faktin se degët kryesore të ekonomisë, ato që krijojnë punësimin dhe garantojnë qëndrueshmëri, kanë pësuar rënien më të madhe.
Industria gjatë tremujorit të dytë të këtij viti shënoi një rënie prej 1,29 pikë përqindje krahasuar me tremujorin e dytë të vitit 2013. Dhe për më tepër, brenda këtij grupi, rritja në industritë e nxjerrjes së mineraleve me 7.56%, nuk mundi të mbulojë rënien e thellë në industritë përpunuese me -6.62% apo të energjitikës me -29.20%.
Dega e ndërtimit në tremujorin e dytë të vitit 2014 shënon një rënie prej 22,39 % krahasuar me tremujorin e dytë të vitit 2013, çka përbën gjobën e rëndë që duhet të paguajë ekonomia e vendit për shkak të politikave bllokuese në investimet publike, veprimeve antiligjore dhe terrorit policor në ndërtimet e qytetarëve.
Dega e Transportit, shënon një rënie me 23,05% krahasuar me të njëjtin tremujor të një viti më pare, duke dëshmuar kështu se rënia në qarkullimin e mallrave dhe të njerëzve në nivele të tilla, përbën faktin e autentik të zvogëlimit të këmbimeve tregtare dhe të konsumit.
Me rënie prej -1.02% janë edhe Posta dhe Komunikacioni. Të vetmet degë me rritje sipas INSTAT-it të qeverisë janë Bujqësia me 3.18, Tregëtia dhe hoteleritë me 7.09 dhe shërbimet e tjera me 4.55%.
Të dhënat tronditëse për ecurinë e ekonomisë së vendit përgjatë këtij viti, në të vërtetë nuk kanë qenë as të papritura dhe as të panjohura për qytetarët shqiptarë. Sadoqë Rama kërkon ti fshehë sirtarëve të zyrave apo xhepave të qeveritarëve, qytetarët ia kanë lexuar dhe i dinë, sepse ata shohin sesi çdo ditë humbin vendet e punës, sesi çdo ditë u rriten çmimet, u pakësohen të ardhurat, u rriten taksat, u shtohet pasiguria për të nesërmen. Prej rreth një viti bankat kanë bllokuar, bile ulur kreditimin e ekonomisë, investimet në ekonomi janë mëse përgjysmuar, investitorët e huaj po largohen nga vendi.
Dhe shkaktarja kryesore e kësaj rrokullisje fatkeqe të ekonomisë së vendit, është vetë qeveria, janë rritjet progresive të taksave që skanë të ndalur, është pasiguria e përgjithshme që vjen nga arbitrariteti i qeveritarëve që nuk njohin më ligj; është brutaliteti i Ramës dhe shpurës së tij që ka krijuar një atmosferë asfiksuese për ekonominë e biznesin, është revanshi i pafre për tu hakmarrë ndaj çdo gjëje të aritur deri më sot nga shqiptarët.
Në tre tremujorë të qeverisjes Rama, dy janë me rënie ekonomike. Prisni se skeni parë asgjë akoma.
·Opozita ka vizionin, platformën dhe vullnetin për një reformë europiane të sistemit të drejtësisë
·Procesi kërkon Transparencë, Konsensus, Gjithpërfshirje dhe ekspertizë Europiane.
·Drejtësia dhe zbatimi i ligjit kërcënohen kur shumica dhe qeveria janë të parët që shkelin kushtetutën dhe ligjin dhe nuk zbatojnë vendimet e gjykatave.
I nderuar zoti President,
Z. Kryetar i Kuvendit
Z. Kryeministër
Të nderuar Kryetarë të Gjykatës së Lartë, Gjykatës Kushtetuese, gjykatave të vendit, gjyqtarë, ambasadorë, zonja dhe zotërinj.
Së pari, dua të përshendes iniciativën e Kreut të Shtetit dhe të shpreh konsideratën time, ne emër të opozitës, se kjo është forma e duhur e gjithëpërfshirjes, e rrugës për një reformë konsensuale që garanton qendrueshmërinë në kohë, të një reforme e cila duhet të mbetet brenda kornizës europiane.
Për arsye që dihen botërisht opozita ka ndërprerë marrdhëniet me parlamentin. Këto arsye lidhen drejtpërdrejt edhe me temën që na ka mbledhur sot në këtë sallë me ftesën tuaj zoti President.
Drejtësia është një nga temat e mëdha të konfliktualitetit politik sot në vend. Ajo ka të bëjë me sundimin e ligjit në Shqipëri. Ka të bëjë me sundimin e ligjit që është i lidhur ngushtësisht me zbatimin e Kushtetutës dhe ligjeve të vendit, në radhë të parë nga institucionet, në radhë të parë nga Parlamenti dhe nga Qeveria. Sundimi i ligjit dhe zbatimi i vendimeve të gjykatave janë të lidhura fort me njëra-tjetrën.
Ne jemi mbledhur sot në këtë tryezë, për të diskutuar për reformën në Drejtësi, për zbatimin e ligjit, ndërkohë që shumica ka vënë në pikëpyetje sovranitetin e vendimeve të Gjykatës Kushtetuese për herë të parë, e përsëris për të parën herë në këto 23 vite. Ndërkohë që ekzekutivi dhe agjensitë e tij vazhdojnë të cënojnë dhe dhunojnë haptasi interesat dhe të drejtat legjitime, ligjore dhe kushtetuese të qytetarëve të Republikës në shkelje jo vetëm të ligjit por edhe të vendimeve të gjykatave të vendit.
Tema tjetër e madhe e konfliktit politik shumicë – opozitë ka të bëjë me integritetin e ligjvënësve. Të asaj trupe që pretendon të luajë një rol reformues në drejtësi. Prania si kurrë më parë në trupën e ligjvënësve e subjekteve të sistemit të drejtësisë, të individëve që kanë qenë në bankat e të akuzuarve dhe më pas të dënuar për vepra penale të natyrës së krimit të organizuar – kompromenton rëndë motivet, kapacitetin dhe drejtpeshimin e tyre për të marrë përsipër për aq sa u takon rolin e tyre si reformatorë të drejtësisë.
Ne jemi sot në këtë tryezë për të konfirmuar vullnetin tonë. Opozita e sotme ndryshe nga ajo e djeshmja mbështet reformën në drejtësi, si një domosdoshmëri, si një nevojë për rrugëtimin tonë Europian. Ne vijmë në këtë tryezë me një vizion dhe me një platformë të cilën ekspertët tanë do ta elaborojnë në panelet pas këtij prezantimi.
Do më lejoni ta bëj fare të qartë para jush se ne mbështesim dhe kërkojmë zbatimin pa hezitim të një MODELI, NJË MODELI EUROPIAN për reformimin e drejtësisë.
Modeli europian bazohet në parimin e konsolidimit të pavarësisë, eficensës dhe llogaridhënies së sistemit të drejtësisë. Një reformë e cila bazohet në dy shtylla kryesore:
1-Reformimi i sistemit për të luftuar korrupsionin, i cili duhet të bëhet nga vetë sistemi dhe jo nga Qeveria. E thënë troç: Qeveria duhet të mbajë larg duart nga gjyqësori. Kapja politike e gjyqësorit është burimi më i keq i deformimit dhe korrupsionit në drejtësi.
2-Konsolidimi i pavarësisë së gjyqësorit nga politika dhe pushteti ekzekutiv, përmes forcimit të organeve vetqeverisëse, dhe rritjes së rolit të tyre në përgjegjshmërinë, transparencën dhe llogaridhënien e gjyqësorit para ligjit, para kushtetutës, para qytetarëve. Dhe askujt tjetër.
Modeli Europian që ne kërkojmë dhe mbështesim bën të mundur forcimin e eficensës dhe efektivitetit të sistemit të drejtësisë pa bërë kurban pavarësinë. Pa lejuar që reforma të kthehet në një alibi për ta futur drejtësinë në sqetullën e pushtetit e për ta kthyer atë në një shtojcë të tij.
A mund të ketë model europian të drejtësisë kur qeveria dhe shumica shkelin ligj dhe kushtetutën për të miratuar natën, pa asnjë konsultim dhe kundër thirrjeve të partnerëve ndërkombëtarë paketa ligjore të personalizuara që synojnë kapjen dhe nënshtrimin e sistemit të drejtësisë ndaj pushtetit politik të shumicës dhe ekzekutivit? Si në rastin e paketës së 31 korrikut kur u tentua kapja e KLD, Shkollës së Magjistraturës dhe Gjykatave Administrative me një goditje. Dhe kur shansi që u paraqit me dekretet e Presidentit të Republikës për të reflektuar mbi shkeljet evidente të ligjit dhe Kushtetutës, u hodh poshtë me arrogancë të pashoqe partizane.
Opozita po e ndjek këtë çështje deri në institucionet e ngarkuara me mbrojtjen e Kushtetutës, por ia vlen të rikujtojmë se kur partnerët i kërkuan shumicës të priste ardhjen e ekspertëve europianë, përgjigja ishte: jemi në emergjencë!! Erdhën ekspertët dhe e vetmja emergjencë ishte shkarkimi i anëtarëve të KLD! Asgjë tjetër nuk ka ndodhur. Kjo është e vërteta!
A mund të ketë model europian kur komunikimi publik i shumicës për këtë reformë është reduktuar në një anatemim jakobinesk të gjyqësorit në bllok, në përpjekje për të denigruar të gjithë gjyqtarët, e cila s’mund të jetë gjë tjetër veçse një premisë për t’u hedhur lakun e nënshtrimit politik.
Populizmi nuk është zgjidhje. Të flasësh në emër të popullit nuk është zgjidhje. Wshtë mungesë vizioni në rastin më të mirë, jorgan për të mbuluar axhendën politike në rastin më të keq.
Reforma kërkon vizion, kërkon platform. Deri tani kjo shumicë ka kaluar vitin dhe nuk ka prezantuar asnjë vizion dhe asnjë platformë.
Modeli Europian, sipas nesh, kërkon një proces TRANSPARENT, GJITHPËRFSHIRËS, ME EKSPERTIZË EUROPIANE DHE ME KONSENSUS.
Kërkon TRANSPARENCË në rradhë të parë. Një autostradë europiane të vendimmarrjes, jo korsi emergjence në mes të natës, aq më pak shteg dhish nën pishtarin e çobanit që i prin kopesë. Të mos ndodhë ajo që nuk kish ndodhur në 23 vjet, ku ekspertëve europianë iu fshehën draftet e paketës verore. Të gjitha propozimet duhet të përgatiten para qytetarëve, para publikut, para aktorëve të sistemit, para partnerëve.
Procesi kërkon GJITHPËRFSHIRJE. Jo vetëm të aktorëve politikë. E përmendi Presidenti, e përmendi Kryetari i Kuvendit, duket edhe kreu i ekzekutivit ka reflektuar në këtë çështje ndaj nuk po zgjatem.
Procesi kërkon KONSENSUS me bazë të gjerë. Që garanton jetëgjatë
sinë e fryteve të reformës duke i ankoruar ato fort tek parimet e gjithëpranuara europiane të një drejtësie të drejtë, të shpejtë dhe të paanshme. Jo një reformë të njëanshme me fryte të helmuara nga axhenda politike që synojnë të ulin në gjunjë dhe të kapin drejtësinë.
Procesi kërkon EKSPERTIZË DHE MONITORIM EUROPIAN DHE EURO-AMERIKAN. Për të shmangur dhe parandaluar në të ardhmen ethet për ti rrëshqitur modelit europian dhe për ta zëvendësuar atë me modelin oligark të kapjes e jo reformimit të drejtësisë.
Natyrisht sindroma e vitit zero nuk është dhe nuk mund të jetë pikënisja për asnjë reforme të sukseshme. Zonja dhe Zotërinj, këtu jemi, këtu kemi qenë dhe dihet fare mirë se në çfarë gjendje ishte drejtësia para 10 vitesh. Infrastruktura e gjykatave ishte për faqe të zezë. 2-3 gjyqtarë në një zyrë 10 m2 e cila shërbente dhe si sallë gjykimi, por pa kompjutera dhe me zero trasparencë.
Në krye të çdo gjykate të vendit, nga shkalla e parë e deri në gjykatë të lartë dhe Gjykatën Kushtetutese, ishin ish-ministra, ish-zv.ministra, deputetë apo drejtues të forumeve të larta të Partisë Socialiste.
Megjithatë asnjë mandat nuk u ndërpre. U përmirësua infrastrukura e sistemit të drejtësisë, u ndërtuan apo rikonstruktuan mbi 30 godina të gjykatave dhe prokurorive. U dixhitalizua i gjithë sistemi i drejtesisë. Menaxhimi i çështjeve dhe sistemi dixhital janë ndër më të përparuarit në rajon ndërsa sistemi audio që po shkon drejt përfundimit dhe dy gjykata që kanë mbetur akoma raportohet të jetë unik në rajon.
Dhe këto janë hapa të duhura drejt transparencës. Jo vetë transparenca por parakusht për transparencën, e cila së bashku me monitorimin janë instrumentet bazë për luftën ndaj korrupsionit dhe vendosjen e besimit të publikut te drejtësia.
Siç e thashë më lartë, ekspertët tanë do të paraqesin, me rastin e kësaj tryeze, objektivat, instrumentet, platformën, vizionin tone. Jemi të hapur ta diskutojmë dhe kemi ardhur ta diskutojmë me të gjithë faktorët e përfshirë në këtë diskutim.
Më lejoni fare shkurtimisht të përmend se për ne, katër janë OBJEKTIVAT KRYESORE TË REFORMËS:
1.Së pari përmirësimi i transparencës, eficencës dhe llogaridhënies të të gjithë institucioneve të sistemit të drejtësisë, përmes rritjes së kontrollit dhe përmirësimit të mekanizmave të monitorimit të sistemit gjyqësor, me fokus të vecantë luftën ndaj korrupsionit dhe praktikave që e nxisin atë. Disa nga pyetjet që shtrohen për të arritur këtë objektiv kanë të bëjnë me faktin nëse:
-A mund të realizohet mbikëqyrje efektive e mbi 300 gjyqtarëve vetëm me 15 inspektorë?
-A mund të realizohet mbikëqyrje efektive nëse mbivendosen kompetencat e inspektimit, përmes ekzistencës së dy inspektoriateve, edhe pse kjo bie ndesh me rekomandimet e standardet europiane?
-A mund të realizohet mbikëqyrja nëse nuk ngrihet një mekanizëm i shpejtë dhe efikas i vlerësimit dhe analizimit të ankesave të qytetarëve kundër veprimtarisë së gjykatave, që t’iu sigurojë qytetarëve zgjidhje të problemeve?
-A mund të jetë përgjegjës KLD për gjëndjen e gjyqësorit, kur ekskluzivitetin e procedimit disiplinor të gjyqtarëve e ka Qeveria?
-A mund të flasim për luftë kundër korrupsionit kur nuk konsolidojmë rregullat dhe kriteret që lidhen me emërimin, promovimin apo transferimin e gjyqtarëve, me qëllim që ato të bazohen tërësisht dhe vetëm në parimin e meritokracisë, profesionalizimit dhe profilizimit të gjyqtarëve?
-A mund të flasim për efektivitet të punës së gjyqtarëve nëse nuk krijojmë garanci ligjore efikase për ruajtjen e jetës dhe dinjitetit të tyre?
Objektivi i dytë ka të bëjë me:
Konsolidimin e pavarësisë së sistemit gjyqësor, duke shmangur çdo ndikim të papërshtatshëm të pushtetit legjislativ dhe ekzekutiv në veçanti, të politikës në përgjithësi, duke konsoliduar dialogun dhe bashkëpunimit ndërinstitucional, ku çdo pushtet bën detyrën e vet pa ndërhyrë në pavarësinë e pushtetit tjetër.
-A mund të flasim për pavarësi të sistemit gjyqësor, nëse ndërhyet dhe deformohet procesi i seleksionimit të kandidatëve për magjistraturë?
-A mund të flasim për pavarësi të sistemit gjyqësor dhe Gjykatës së Lartë, kur kandidaturat e përzgjedhura nga rradhët e profesionistëve të drejtësisë, rrëzohen pa asnjë argument që lidhet me meritën e kandidatit, por vetëm për shkak të preferencës politike të një shumice të caktuar?
-A mund të flitet për pavarësi kur raportohen telefonata të orëve të natës ndaj gjyqtarëve nga njerëzit më të pushtetshëm në këtë vend për t’ju bërë presion për çështje të caktuara ku qeveria apo shumica janë palë?
Objektiv tjetër i rëndësishëm është:
Përmirësimi i kuadrit ligjor të procedurave gjyqësore, për të garantuar respektimin e të drejtës për proces të rregullt sipas jurisprudencës së GJEDNJ, çka kërkon përafrim të sistemit të drejtësisë penale dhe civile me standardet e BE-së, për të reduktuar kohëzgjatjen e procedimeve penale dhe civile, si dhe uljen e ngarkesës së gjyqtarëve.
Dhe së fundmi, vendimet janë një gjë, zbatimi i tyre është një gjë tjetër.
Përmirësimi i procedurave të ekzekutimit për të mundësuar ekzekutimin e vendimeve gjyqësore të formës së prerë në kohë dhe pa sorollatje të pafund, mbetet një sfidë terminale për reformën në drejtësi.
Zonja dhe Zotërinj, masa e suksesit në reformën e drejtësisë është vendosja e besimit mes qytetarëve dhe drejtësisë. Vendosja dhe konsolidimi i këtij besimi, mes qytetarëve dhe Drejtësisë.
Prandaj objektivat e kësaj reforme: lufta ndaj korrupsionit, një drejtësi efikase, llogaridhënëse dhe transparente nuk mund të ndahen kurrë nga çelsëi i suksesit: Pavarësia e gjyqësorit.
Procesi transparent, gjithpërfshirës, me ekspertizë europiane dhe me konsensus, i orientuar drejt një modeli europian në të cilin forcimi i pavarësisë së gjyqësorit mbetet celësi. Këto janë për ne parakushti i suksesit.
Por siç thashë në krye të fjalës sime, e gjitha kjo është dhe mbetet një iluzion sa kohë që shkelësja e parë dhe më e madhe e Kushtetutës, ligjeve dhe vendimeve të gjykatave është vetë shumica, është vetë qeveria.
Faleminderit
Kryetari i Partisë Demokratike uron besmitarët muslimane nga Kavaja, në ditën e festës së Kurban Bajramit
Deputeti Halimi vlerëson nismën e Presidentit për tryezë. “Reforma duhet të garantojë rrugën europiane. Jo në korsinë e emergjencës, siç është kryeministri, që kërkon ti bëjë ndërhyrjet sot, t’i botojë sot, të hyjnë në fuqi natën, t’i shkarkojë gjyqtarët sot, t’i vendosë njerëzit e tij sot”.