Blog

Deklaratë e deputetit Ristani, pas dëshmisë së qytetarit mbi vrasësit e bankierit Santo. Shpërfillja e dëshmisë nga Policia konfirmon përfshirjen e qeverisë në këtë krim të rëndë mafioz

Dëshmia tronditëse e një qytetari sot në News 24 në lidhje me vrasjen e bankierit Artan Santo, është një akuzë e rëndë për Policinë e Shtetit, dhe forcon dyshimet se pas ekzekutimit mizor të financierit dhe botuesit të njohur, qëndrojnë segmente të qeverisë.

Qytetari denoncon publikisht se ka pasur prova dhe emra të vrasësve, dhe ia ka dhënë ato Drejtorit të Përgjithshëm të Policisë.

Por qytetari është shpërfillur nga policia pasi ndihma që ai ka dhënë për zbardhjen e ngjarjes nuk është marrë në konsideratë.

Informacionet që ka dhënë ai, janë hedhur në kosh.

Qytetari i është përgjigjur thirrjes publike të autoriteteve, për të dhënë informacion,  por ai është përballur me heshtjen dhe indiferencën e policisë.

Shpërfillja, lënia në rrugë e dëshmitarit, për raste të rënda kriminale, ku qeveria ka interesa, është kthyer tashmë në fenomen. Mjaft të kujtojmë këtu dëshmitarin e rastit Sinani, apo dëshmitarin për cështjen Frroku, për të kuptuar se besimi i publikut tek Policia ka rënë, dhe me këtë qeveri, ka rënë vlera e bashkëpunimit të qytetarëve për zbardhjen e vrasjeve mafioze.

Sipas medias emrat e deklaruar nga dëshmitari nuk i janë paraqitur prokurorisë, që do të thotë se ndaj tyre nuk janë kryer veprimet e duhura ligjore për të shkuar te personat e denoncuar e për ti ndaluar ata.

Reagimi i sotëm i krerëve të Policisë së Shtetit, ishte i turpshëm, një presion i hapur ndaj medias që publikoi dëshminë, dhe një përpjekje tjetër e stilit të sigurimit të shtetit për të mbuluar të vërtetën.

Reagimi i Policisë ishte gjithashtu një përpëlitje për të larguar përgjegjësinë, dhe për të zbehur dëshminë tronditëse, ende pa u shfaqur ajo.

Por pyetjet që ngre sot cdo shqiptar janë;

Pse nuk reagoi policia pas dhënies së informacionit për personat e përfshirë në vrasje?

Kush e urdhëroi policinë të mos lëvizte gishtin për të bërë atë që e ka për detyrë, zbardhjen e vrasjes?

Kush ka forcën apo fuqinë t’i imponohet me një mënyre të tillë policisë?

Cfarë motivesh bllokuan hapat që merren edhe në rastet rutinë, e jo më për këtë vrasje të bujshme të stilit mafioz?

Përgjigja është evidente për cdo shqiptar, për cdo njeri me mend në kokë.

Motivi ka qënë fshehja dhe mbulimi i vrasësve.

Motivi është ai që Partia Demokratike e ka denoncuar prej kohësh.

Vrasja është lejuar të ndodhë.

Pas vrasjes qëndron qeveria.

Deklaratë e deputetit të Partisë Demokratike Arben Ristani, 13 Tetor 2014

Deklaratë e Enno Bozdos mbi vendimin e fundit të qeverisë, që prek shumicën e qytetarëve që konsumojnë deri në 300 kw orë në muaj

Ministri Financave deklaroi dje nga Uashingtoni se çmimi i energjisë do të rritet.

Fasha mbrojtëse deri në 300 kw/orë në muaj për shtresat në nevojë do të hiqet, dhe cmimi i aplikuar me pas do të jetë një çmim i mesatarizuar. Sot shumica e popullsisë shpenzon deri në 300 kw/orë në muaj.

Në praktike, kjo do të thotë se të gjithë konsumatorët do të paguajnë më shumë, e në veçanti do të paguajnë ata konsumatorë që shpenzojnë deri në 300 KW. Praktikisht, këta konsumatorë janë shtresat më të varfra e në nevojë të popullsisë, janë pensionistet, të papunët, gratë kryefamiljare, studentet dhe familjet e reja, invalidët dhe personat me aftësi të kufizuar. Pra, do të goditen rëndë të varfrit dhe ata me të ardhura të pakta.

Ministri i Financave nuk pati guximin ta deklaronte këtë gjë në Tiranë. Ai zgjodhi Washingtonin sepse kryeministri por edhe ministrat i kishin garantuar shqiptaret në Tiranë, se cmimi energjise nuk do të rritej. Shqiptaret morën sigurinë e plotë nga Rama se energjia nuk do të preket. Shqiptarët madje morën premtimin nga Rama, para zgjedhjeve, se cmimi energjisë do të ulej ndjeshem. Sot, pas një viti qeverisjeje, Rilindasit bënë pikërisht të kundërtën, rritën cmimin e energjisë.

Opozita e ka paralajmeruar prej kohësh këtë skenar. E kemi paralajmëruar kur kemi denoncuar megaskandalin e “Aferes CEZ”, ku qeveria Rama fali 500 milionë euro fatura të papaguara, madje i dhuroi atyre edhe 95 milionë euro të tjera. Pa llogaritur këtu faktin se qeveria hoqi dorë nga 3 miliardë USD dëme, që kompania i ka shkaktuar shtetit shqiptar.

Sikur kjo aferë e Edi Ramës të mos kishte ndodhur, rritja e çmimit nuk do të ishte e nevojshme, sepse këto para të falura nga qeveria, do të investoheshin në infrastrukture për ta bërë të mundur permirësimin e treguesve të kompanisë së shpërndarjes.

Fakti është se Rama në opozitë premtoi ulje të cmimit të energjise, ndërsa sot pasi i ka falur CEZ-it 600 milionë euro, ua faturon këtë gjë familjeve shqiptarë, e vecanerisht të varfërve dhe shtresave në nevojë. Rritja e çmimit të energjisë do të jetë gjithashtu goditje e rëndë edhe për ekonominë, veçanërisht në këtë recesion që e ka mbërthyer atë.

Ne i kërkojmë maxhorancës të mos rrisë në asnjë mënyrë çmimin, sepse shqiptarët nuk duhet të paguajnë një rritje cmimi për të cilin ata kanë paguar tashmë; sepse gjysma e energjisë në rrjet vidhet dhe për këtë nuk ka përse të penalizohen pikërisht qytetarët korrekt dhe të ndërgjegjshëm.

Deklaratë e Enno Bozdos, 12 Tetor 2014

Deputeti Halimi denoncon aktin e fundit të dyshes Rama – Meta. Delegacionet e përhershme pasqyrojnë sipas Kushtetutës e Rregullores së Kuvendit, përbërjen e Parlamentit

Edi Rama dhe Ilir Meta dëshmuan sërish se arroganca me Kushtetutën dhe drejtimin e parlamentit janë projekti i tyre për eleminimin e hapësirave parlamentare për opoziten dhe shndrrimin e parlamentit në një oborr personal.

Përjashtimi i Partisë Demokratike nga delegacioni i përhershëm në Unionin Parlamentar Botëror, vërtetoi skenarin autoritarist të dyshes Rama-Meta për ta kthyer Parlamentin edhe zyrtarisht në një sistem oligarkik, ku zëri i opozitës nuk duhet të dëgjohet, ku opozita nuk duhet te  përfaqësohet.

Ky skenar nisi me zhdukjen e konsensusit politik, me blerjen e dy deputetëve për të arritur shumicën arbitrare, u zhvillua më tej me arrogancën ndaj cdo propozimi të Partisë Demokratike, u konsolidua  me moszbatimin e vendimeve të Gjykatës Kushtetuese që i jepin të drejtë pakicës të hetonte qeverinë, dhe kulmoi me instalimin e skuadrave të dhunës për ti mbyllur gojën opozitës.

Vetëm një ditë pasi Bashkimi Europian, me instrumentin e tij më të rëndësishëm, raportin vjetor, i kërkon mazhorancës të instalojë dialogun e të krijojë kushtet që opozita të ushtrojë të drejtat e saj kushtetues, Ilir Meta dhe Edi Rama përjashtojnë Partinë Demokratike nga delegacioni i përhershëm në një prej institucioneve më të rëndësishme sic është Unioni Parlamentar Botëror.

E bëjnë këtë,  në kundërshtim të hapur dhe injorim të Kushtetutes së vendit, e cila në nenin 75 pika 2, e detyron dyshen Rama Meta, të zbatojnë Rregulloren e Kuvendit, gërmë më gërmë e pikë për pikë. E bëjnë si gjithmonë me arrogancë duke shkelur në mënyrë flagrante atë që Kushtetuta u kërkon të respektojnë, Rregulloren e Kuvendit e cila në nenin 7, pika 3, e detyron kryetarin e Kuvendit që në përbërje të delegacioneve të pasqyrojnë përbërjen politike të Kuvendit. Përbërje e cila vjen nga vullneti i të përfaqësuarve, vullneti i sovranit.

Përbërje e delegacionit sipas Kushtetutes do të thotë hapësirë kushtetuese për opozitën e vendit. Këtë thotë qartë dhe troc Kushtetuta e Republikes, këtë e thotë qartë dhe troc Regullorja e Kuvendit, e zeza mbi të bardhë.

Por te jesh autoritarist dhe arrogant me Kushtetuten dhe ligjin, të kthesh parlamentin në një ambjent monopartiak, dhe monist në cdo drejtim, ku të gjithë lavdërojnë partinë e qeverinë, e thurin ditirambe për udhëheqësit, tërësisht të shkëputur nga realiteti, duke shkelur Ligjin Themelor, dhe eleminuar hapësirat demokratike të opozites, është të rrisësh akoma më shumë distancën nga rruga europiane dhe ta drejtosh vendin në rrugën e oligarkisë orientale dhe diktatorëve dritëshkurtër.

Ajo që pretendon Kryetari i Godinës së Kuvendit, është mjerane, pasi opozita ka refuzuar të jetë pjesë e qokave të Metës, ka refuzuar të shërbejë propagandën e tij për t’u dukur tek të huajt ai që në të vërtetë nuk është. Shpura që kërkon të ketë me vete Meta është një klonim artificial që nuk përfaqëson përbërjen politike sipas sovranit dhe Kushtetutës,  por përfaqëson vetëm dhe vetëm propagandën që nuk e blen më askush.

Ta bëjmë të qartë për cdo shqiptar, se ajo që denoncon opozita, është përjashtimi anti-kushtetues, jo si lëshim i Ilir Metës e Edi Ramës, por si një e drejtë Kushtetuese që i takon opozitës së vendit, si e drejtë e cdo opozite në cdo vend demokratik dhe europian.

Por me këtë akt,  antikushtetues, antieuropian dhe të paprecendent në këto 23 vite demokraci, Ilir Meta dhe Edi Rama po thellojnë arbitraritetin e pushtetit të tyre oligarkik, por harrojnë se sa të pabesueshëm dhe po aq qesharake janë bërë në sytë e cdo shqiptari, në sytë e cdo partneri.

Shihni se si është kthyer e enjtja e parlamentit, një prodhim i Kinostudios Shqipëria e Re.

Ndaj në emer të Partisë Demokratike i bëjme thirrje dyshes Rama-Meta të heqin dorë nga shkelja me arrogancë e Kushtetutës së vendit, të dëgjojnë Brukselin që foli qartë, dhe ti japin opozitës atë që i takon: hapësirën kushtetuese parlamentare.

Deklaratë e deputetit të Partisë Demokratike, Eduard Halimi, 12 Tetor 2014

Propaganda qeveritare nuk mund të zëvendësojë krizën ekonomike që ndjejnë dhe përjetojnë shqiptarët sot.

Kryeministri përsëri u krekos se ekonomia shqiptare po rilind, koncept ky që ndoshta ne e mendojmë ndryshe dhe qytetarët po e provojnë se çfarë do të thotë.

Duke u përpjekur të fshihet pas realitetit të Rënies së Rritjes Ekonomike, z.Rama nuk arrin të dallojë se në tremujorin e parë të këtij viti kërkesa për mallra dhe shërbime në treg ishte përafërsisht 200 milionë dollarë më pak nga sa ekonomia është e aftë të furnizojë. Të dhënat nga Banka e Shqipërisë flasin se hendeku midis prodhimit të mundshëm edhe atij real është thelluar së tepërmi këtë vit, kështu që nuk kemi një rritje natyrale të ekonomisë, por një thellim të krizës.

Qeveria e cila përpiqet të fshihet pas ndonjë të dhëne statistikore që të dalë faqebardhë në sy të publikut, nuk sheh se të ardhurat për 95% të qytetarëve kanë rënë sërish duke i detyruar ata të ulin konsumin ose të rrisin borxhin, edhe atëherë kur bëhet fjalë për konsum në limitet mbijetesës.

Sot një në 3 shqiptar është i zhytur në borxhe për konsumin e përditshëm, dhe ky është një efekt i drejpërdrejtë i paketës fiskale.

Sot, papunësia ka shkuar në nivelin alarmant 17%, kryesisht në sektorët e industrisë e ndërtimit që duhet të ishin shtyllat e ekonomisë.

Kriza, që maskohet si rilindje e ekonomisë, nuk ka prekur vetëm të tashmen por edhe të ardhmen duke qenë se fëmijët që vijnë nga familje që kanë të ardhura poshtë 40% për nga niveli i mirëqenies, kanë shkëputur këtë vit marrëdhënien e tyre me shkollën.

Me sa duket qeveria që premtoi se do të trajtonte në mënyrë të barabartë të gjitha shtresat sociale ka menduar që të kontribuojë në shtresat që e përfaqësojnë atë më së miri në kuvend.

Ne nuk harrojmë se dje në opozitë, Rama e cilësonte krizë të thellë rritjen ekonomike me 3% dhe vlerësimin “BB”, ndërsa sot u dashka të jemi të lumtur dhe optimist kur ekonomia ka rënë me 3 përqind nga premtimi i qeverisë dhe kemi një vlerësim “B+”.

Në vend që ta shohim ekonominë përmes statuseve nga arena e mediave sociale, ne kërkojmë nga qeveria që të ulet e të përpiqet për të nxjerrë nga bataku ku ka futur vendin. Duke i kërkuar që të ulë në mënyrë të menjëhershme taksat dhe të rikthejë një regjim miqësor për bizneset e të përballueshëm nga qytetarët si e vetmja mënyrë për të kaluar këtë emergjencë kombëtare.

Deklaratë e deputetes së Partisë Demokratike, Jorida Tabaku,  11 Tetor 2014

Kryetari i Partisë Demokratike, Lulzim Basha priti në takim Kryetarin e Partisë së Bashkimit Demokratik për Integrim, të Maqedonisë, Ali Ahmetin.

Z. Ahmeti e informoi z.Basha për situatën aktuale në Maqedoni me theks të vecantë për gjendjen e të drejtave të shqiptarëve dhe përpjekjet për të konsoliduar zbatimin e tyre, si pjesë e qënësishme e stabilitetit të Maqedonisë.

Basha vlerësoi përpjekjet e bëra  dhe theksoi rëndësinë që ka zbatimi me rigorozitet i Marrëveshjes së Ohrit, si një pikë garancie për stabilitetin e Maqedonisë e më gjërë.

Basha nënvizoi se Partia Demokratike do të vazhdojë të jetë një avokate e plodhur të drejtave të shqiptarëve të Maqedonisë, dhe konsolidimit të demokracisë dhe integrimit euro-atlantik të vendit fqinj.

Njoftim për shtyp i Partisë Demokratike, 11 Tetor 2014

Deputetët Zeneli dhe Turku vizitojnë Lazaratin dhe dëgjojnë shqetësimin e banorëve për dhunën e përditshme policore e psikologjike në komunën e tyre.

Deputetët e Partisë Demokratike, anëtarë të Komisionit parlamentar të Sigurisë, Alban Zeneli dhe Adrian Turku vizituan dje Lazaratin dhe u takuan me banorët atje për të parë nga afër situatën e krijuar së fundmi. Deputetët patën gjtihashtu takime edhe me drejtuesit e Policisë së Gjirokastrës.

Zeneli dhe Turku dëgjuan nga afër shqetësimet e banorëve të Komunës dhe dënuan dhunën dhe presionin e vazhdueshëm që ushtron Policia në këtë zonë.

“Ne kemi ardhur këtu në lidhje me shqetësimin e jo vetëm disa banorëve por të gjithë Komunës së Lazaratit, për dhunën e ushtruar nga policia ndaj familjeve të kësaj Komune. Në rradhë të parë ne morëm kontakt me drejtues të Policisë së Qarkut të Gjirokastrës. Më pas morëm kontakt edhe me disa të ndaluar për shkak të kësaj ngjarjeje, jo me të gjithë të ndaluarit por me dy të arrestuarit që në prezencë time edhe të deputetit Turku pranuan që dhuna policore ishte e jashtëzakonshme brenda familjes së tyre. Brenda policisë dhuna nuk ishte ushtruar, por aty nuk ishin marrë në pyetje asnjë moment. Përveç informacioneve e kemi konstatuar edhe vetë një prezencë shumë të madhe policore, jashtë çdo lloj norme jo vetëm ligjore por edhe logjike. Për shkak të kësaj edhe reagimi i qytetarëve është mëse i drejtë. Ne i kemi kërkuar dhe i kërkojmë qeverisë shqiptarve dhe krerëve të Policisë Shqiptare që në mënyrë absolute që ndaj familjeve që banojnë në këtë Komunë të ndalohet një orë më përpara diskriminimi e dhuna policore që ushtrohet në çdo moment”, u shpreh deputeti Zeneli.

Deputeti Turku, dënoi presionin psikologjik dhe kriminalizimin që qeveria po i bën gjithë komunitetit atje.

“Nuk është aq e lehtë të japësh një përgjigje se çfarë do të ndodhi me këtë fshat, unë në shtesë të dhunës fizike, dhunës policore që kolegu im përmendi dhe që konstatohet nga të gjithë banorët në atë pritje të qindra vetëve, në atë takim me qindra vetë aty në sheshin e fshatit, do thoja që ka një problem tjetër shumë madhor. Pas një aksioni të para katër muajve të Policisë së Shtetit pritej që tashmë të ishte çliruar nga “kriminelët” le të themi që pretendonte policia në këtë fshat, dhe të ishte vendosur një marrëdhënie e ngrohtë midis komunitetit dhe policisë, dhe të ishte kthyer tashmë qetësisë, normaliteti. Në fakt ajo që më trondit, që konstatoj, është që ekziston një klimë tejet e acaruar midis komunitetit pa dallim, votues të së majtës dhe të së djathtës. Ata ndihen të kërcënuar le të themi nga Policia, nga ekzistenca ditë dhe natë e katër patrullave dhe forcave të tjera policore pas orës 11 të natës që, me kapuç në kokë, sorrollaten në emër të ruajtjes së qetësisë apo kapjes së elementëve të ndryshëm. Tashmë ky fshat me mbi 1.200 shtëpi, ka rreth 300 persona që janë nën hetim, ka rreth 60 të arrestuar që prej katër muajsh nuk e shohin akoma sallën e gjyqit. Ka disa të ndaluar në ditën e djeshme dhe të sotme në orët e natës dhe që akoma s’janë pyetur në dhomat e komisariatit. Pra është një gjendje pothuajse lufte ose armiqsore, psikologjike. A mund të zgjidhet kështu problemi midis forcave të rendit, midis ligjit nga njëra anë dhe një komuniteti të tërë nga ana tjetër, duke kriminalizuar ose vënë nën një trysni forcash policore, nën një trysni psikologjike një komunitet i tërë prej rreth 5000 banorësh, sigurisht përgjigjen unë mund ta jap që tani, jo nuk mund të zgjidhet kështu”, u shpreh Turku.

Njoftim për shtyp i Partisë Demokratike, 10 Tetor 2014

Deputeti Bylykbashi dorëzon në Kushtetuese kërkesën për shpalljen e pavlefshme të ndarjes territoriale. “Kjo maxhorancë kërkon të konsolidojë oligarkinë Rama-Meta, e cila kërkon të krijojë edhe oligarkët lokalë” (më tepër…)

Kryetari i grupit parlamentar denoncon aktin e mazhorancës menjëherë pasi BE kërkon dialog dhe krijimin e kushteve që opozita të ushtrojë të drejtat e saj

(më tepër…)