Blog

Deklarata për media e zëdhënëses së Partisë Demokratike Laura Vorpsi:

Dy ditë më parë, Partia Demokratike ngriti shqetësimin për praninë e vëllait të Kryeministrit, Olsi Rama në një delegacion zyrtar në Izrael.

Pyetjet që bëri Partia Demokratike janë pyetjet e cdo shqiptari.

A është Olsi Rama përfaqësues i biznesit?

A është ai përfaqësues i qeverisë, në këto takime?

Pse gjendej në një delegacion me zv-Kryeministrin dhe Ministrin e Bujqësisë?

Reagimi i Kryeministrit ishte zhgënjyes. Asnjë transparencë dhe asnjë përgjigje për pyetjet tona. Nga verifikimi, rezulton se Olsi Rama nuk ka pasur dhe nuk ka asnjë biznes të regjistruar në Shqipëri. Atëherë, edhe një herë po pyesim sot, cili është roli i vëllait të Kryeministrit në të tilla vizita dhe në të tilla delegacione zyrtare jashtë vendit?

Deklarata për media e zëdhënëses së Partisë Demokratike Laura Vorpsi:

Një delegacion me përfaqësues të biznesit shqiptar, ku bënin pjesë dhe zv/Kryeministri dhe Ministri i Bujqësisë, si dhe vëllai i Kryeministrit Rama, ka vizituar së fundmi Izraelin.

Duke i vlerësuar nismat që rrisin marrëdhëniet dhe shkëmbimin mes Izraelit dhe Shqipërisë, ne kemi disa pyetje për z.Rama.

A është z. Olsi Rama, përfaqësues i ekzekutivit?

A është vëllai juaj përfaqësues i biznesit, dhe nëse po, a ka lidhje aktiviteti i tij me qeverinë dhe zyrtarët e lartë të delegacionit?

A është Olsi Rama i ftuar, turist, kureshtar i zakonshëm, apo cili është roli i tij në këtë vizitë?

Mbetemi me shpresën se Kryeministri do të bëjë transparencë, ashtu siç ai ka premtuar

Silvi Bardhi, deklarata për media:

Me ndryshimet në arkivën qëndrore të shtetit, Kryeministri Edi Rama ka arshivuar një herë e mirë standartet kulturore, propagandën e tij për meritokracinë, dhe premtimet e tij për cilësi në qeverisje.

Askush nuk pret më që Kryeministri Rama të tregojë respekt për personalitetet si Nevila Nika, një historiane e njohur, ekspertja më e mirë e arkivave të vendit, zotëruese e 5 gjuhëve të huaja, dhe një punëtore e palodhur në këtë institucion prej më shumë se 35 vitesh.

Edi Rama i fshin me një të rënë të lapsit të tilla kontribute.

Por me emërimin që ka bërë, askush nuk pret më që Kryeministri të tregojë respekt për pasurinë shpirtërore të vendit, për dosjen e madhe të letrave shqipe, për margaritarin e arkivave të shtetit.

Kryeministri i ka zbritur standardet cilësore në nivelin 0, dhe ka treguar se nuk gëzon asnjë lloj ndjeshmërie ndaj institucioneve të veçanta si arkiva e shtetit.

Me mënyrën e shkarkimit, duke i dërguar dorazi zonjës Nika fermanin e zi, përmes zëvendësuesit të saj, zoti Rama ka konfirmuar dhe një herë largësinë e tij të madhe me etikën dhe respektin ndaj dinjitetit human.

Kryeministri po manifeston çdo ditë babëzinë barbare në kontrollin e cdo institucioni dhe është e qartë se personalitetet e shquara të vendit i bëhen atij pengesë në këtë ambicie të pafre.

Personalitete si Nevila Nika apo Zhani Ciko, i zënë rrugën projektit të kryeministrit për të sunduar kudo. Mediokriteti është i vetmi aleat që ai mund të ketë në rrugën e tij.

Fjala e plotë e Kryetarit të Partisë Demoktratike z.Lulzim Basha në Korçë:

“Të dashur qytetarë të Korçës, zonja e zotërinj, i nderuar kandidat i PD dhe i “Aleancës Qytetare”, për Korçën, z. Sotiraq Stratobërdha, të dashur përfaqësues të Korçës në Kuvendin e Shqipërisë, zonja dhe zotërinj!

Më lejoni t’ju përshëndes me respekt dhe nderimin më të madh për ju dhe qytetin tuaj, këtë perlë, jo vetëm të juglindjes së Shqipërisë por të civilizimit shqiptar, ku qëndron prej kohësh, si simbol i veçantë i këtij qytetërimi dhe i këtij patriotizmi, brez pas brezi, me kontributin tuaj, emri i qytetarisë korçare. Unë drejtoj tashmë prej dy vitesh, Bashkinë e Tiranës, kryeqytetit, më të madhin në vend dhe sigurisht jam krenar për Tiranën time, Tiranën tonë, Tiranën e tiranasve, korçarëve, shkodranëve, vlonjatëve, dibranëve e kujtdo tjetër që jeton aty dhe ku sot pulson zemra e madhe e vendit dhe kombit shqiptar, por duke e kthyer paksa prapa vështrimin në histori, me gjerdanin e çmuar por modest të qytetarisë shqiptare shohim Korçën dhe dy-tre qendra të tjera që shndrrijnë, prijnë dhe tregojnë rrugën nëpërmjet vlerave të së shkuarës dhe paralajmërojnë të ardhmen e qytetarisë shqiptare. Shohim Korçën, qytetin, polisin që këtu në Korçë ka lindur i tillë, ka jetuar i tillë, jeton i tillë dhe do të mbetet i tillë, sa të rrojë Shqipëria, siç thotë një ndër këngët patriotike të qytetarisë së vjetër korçare.  
Me të gjithë miqtë e mi, nga të katër anët e Shqipërisë kam ndarë që nga fëmijëria dhe kemi ndarë prejardhjen tonë gjeografike, që nga bankat e shkollës, universitetit, përvojave të punës, jashtë Shqipërie, këtu në Kosovën fqinje ku kam punuar për disa vite, natyrisht në Shqipëri, edhe në Bashkinë e Tiranës ku drejtoj, edhe në aulën e Kuvendit kur isha parlamentar dhe sa herë kemi folur për prejardhjen gjeografike, kemi ndarë mendimin se është vërtet bukur, madje një privilegj i natyrës të jesh nga Korça, të kesh lindur e të jesh rritur në Korçë.

Kjo është përshtypja e përgjithshme e pjesës tjetër të vendit për Korçën. Kjo është e vërteta, sepse Korça vazhdon t’i udhëheqë shoqet e saj, edhe pse ka kaluar më shumë se një shekull, që kur poeti ynë kombëtar Naim Frashëri shkroi poezinë e tij të famshme, për hapjen e shkollës së parë shqipe në Korçë. Kjo është përshtypja e përgjithshme e qytetarëve shqiptarë për Korçën dhe jo vetëm nuk ndryshon, por forcohet dita ditës.

Sot, jam i nderuar të vij dhe të flas në Korçë, në këtë mbledhje, në këtë tubim që ngjan më shumë qytetar se sa elektoral, në kuptimin klasik të fjalës. Një falënderim të veçantë, dua t’u jap të gjithë qytetarëve korçarë, duke filluar nga shtabi i kandidatit tonë, strukturat e PD dhe aleatëve tanë, për mbështetjen e jashtëzakonshme që po i japin në këtë fushatë qytetare, kandidatit qytetar dhe qytetarit të Korçës, Sotiraq Stratobërdha. 
Zonja e zotërinj!
Në këto zgjedhje, demokratët konkurrojnë si opozitë dhe u takoi demokratëve të Korçës, rasti për t’u kthyer në kutitë e votimit dhe të udhëheqin bashkëqytetarët e tyre drejt kutive të votimit, pak muaj pas zgjedhjeve të përgjithshme, për arsye që dihen.

Kandidati që kemi përzgjedhur bashkërisht, është shprehje e respektit dhe e nderimit për këtë qytet dhe qytetarët, korçarë dhe korçare të cilëve u dhimbset, u bëhet vonë dhe i qajnë hallin qytetit të tyre. Kemi kandiduar personin që besojmë se ofron më së miri potencialin për të avancuar alternativën tonë për Korçën, për të vënë në qendër të programit dhe qeverisjes lokale të Korçës, jo kryetarin e Bashkisë, as shokët apo miqtë e tij personalë, por për të vënë në qendër të Bashkisë së Korçës qytetarin korçar, hallet e problemet e tij, shpresat e dëshirat e tij e të saj, për veten tuaj, për fëmijët dhe qytetin tuaj.

Sapo dëgjuam në mënyrë konçize por profesionale dhe shumë qytetare, përmbledhjen e platformës së kandidatit tonë Sotiraq Stratobërdha për Korçën. Me këmbë në tokë, realist, një njeri që e prek dhe e ndien dhimbjen dhe rënkimin e qytetit, për problemet me të cilat përballet, një njeri që prek dhe ndien shqetësimet e gjithsecilit prej jush dhe shumë e shumë të tjerëve jashtë kësaj salle, votues të PD apo jo, apo votues të kundërshtarëve tanë politikë që kanë tashmë më shumë se 6 vite, për të vënë në balancën e arsyes së shëndoshë të tyre zgjedhjet e bëra dhe rrugën përpara, për t’i bërë vetes pyetjen: A jemi aty ku duhej të ishim, në raport me qeverisjen vendore, a përfaqësohemi mirë në interesat tona nga kjo bashki e cila ndonëse duket se do t’i ndryshojë emri dhe kandidatura, nuk ndryshon asgjë në sjellje, tarafe, përqasje!?

Këtu, gjej rastin të bëjmë edhe një dallim tjetër evident, një dallim që është i qartë për të gjithë ata që kanë dëgjuar e takuar kandidatët në këto zgjedhje. Me të vërtetë, emrat i kanë njësoj, të dy janë Sotiraq, madje duket se Sotiraqi tjetër, në moshë është më i ri por rrugët i ka më të vjetra se Sotiraqi ynë. Mënyrat, përqasjet, botëkuptimet, objektivat janë të një mendësie tepër të vjetër, të një mendësie kur pushteti shikohej si një luks për t’u kontrolluar dhe shpërndarë vetëm mes miqve, ku praktikat e pushtetit lokal i largohen gjithnjë e më shumë transparencës e llogaridhënies, po kështu u largohen qytetarëve dhe po kështu të mirat e pushtetit vendor nuk janë më për qytetarët dhe pushtetarët bëhen gjithnjë e më shumë, jo një dritë shprese apo vizioni por një pengesë dhe një problem shtesë, në jetën e përditshme të qytetarit.

Me praktikën më të mirë të qeverisjes dhe vlerat më të mira të praktikave që ka pasur rastin t’i shikojë por edhe të jetë pjesë e tyre gjatë qëndrimit në Kanada, sot para jush vjen Sotiraq Stratobërdha, më i pjekur, më i aftë, më i vendosur, më i përkushtuar dhe definitivisht më i qartë se Sotiraqi tjetër, sa i përket asaj që u ofron qytetarëve të Korçës dhe qytetarisë korçare për ditët e ardhshme. U ofron transparencë, u ofron llogaridhënie, u ofron modesti, shërbim të përkushtuar ndaj qytetarit, jo arrogancë, as arbitraritet, as errësirë për vendimet kryesore që prekin çdo qytetar të Korçës, u ofron mbi gjitha atë që buron thellë nga zemra e tij dhe zemra e çdo qytetari korçar, dashurinë e pamatë për qytetin tuaj, për perlën e qytetarisë shqiptare, për Korçën tuaj,  për Korçën tonë.

Ndaj, tashmë aleanca për qytetarinë korçare dhe Partia Demokratike, e cila ka një lidhje të ngushtë dhe të fortë me Korçën e ka thënë fjalën e saj, kanë kandiduar jo thjesht një nga më të mirët e fondit tonë intelektual, potencialeve tona njerëzore por pa dyshim një nga bijtë më të mirë dhe të përkushtuar të Korçës ndër vite.

Siç thashë, Partia Demokratike ka një lidhje të ngushtë me Korçën, ka historinë e saj të pasur në këtë qytet, herë në pushtet, herë në opozitë. Që prej lindjes tonë, në dhjetor të vitit 1990, Partia Demokratike ka gjetur një mbështetje të madhe tek qytetaria korçare dhe s’mund të ndodhte ndryshe, sepse vlerat e lirisë, e demokracisë, dinjitetit individual që janë vlera themelore të Partisë Demokra
tike, janë tabani i qëndrueshëm dhe vlerë themelore e qytetarisë korçare. Kjo është arsyeja, se pse sot dua t’i bëj një apel pikërisht këtyre vlerave që e di se ndodhen thellë në shpirtin e çdo qytetareje dhe qytetari korçar, të çdo të moshuari dhe çdo të riu korçar dhe t’u bëj një apel që të hapin mendjet dhe zemrat e tyre dhe me zemër të hapur dhe me mendje të ftohtë, të gjykojnë përtej çdo paragjykimi, çdo përkatësie politike apo tarafore, të gjykojnë për shtëpinë tuaj të përbashkët që është Korça, por të gjykojnë me parametra të gjykimit modern, europian që përbëjnë palcën e qytetarisë korçare dhe jam i bindur se një gjykim i shëndoshë, i zhveshur nga çdo paragjykim do t’ju çojë drejtpërdrejt tek numri një,  Sotiraq Stratobërdha.

Tashmë, ju takon ju, bashkëqytetare dhe qytetarë të Korçës, që me votën tuaj të vlerësoni mençur mes alternativave që ju paraqiten. Ju ftoj pikë së pari, të dilni masivisht në votime! Pushteti më afër qytetarëve është pushteti më i madh, që ka të bëjë drejtpërdrejt me ju, ka të bëjë drejtpërdrejt me interesat tuaja, ndaj mos e lini këtë mundësi të artë për të thënë fjalën tuaj, për shtëpinë tuaj, për problemet tuaja, për dëshirat tuaja. Votoni masivisht, më 3 nëntor!
Ju ftoj të votoni kandidatin tonë, kandidatin tuaj, kandidatin që do t’ua kishte zili çdo bashki e Shqipërisë, pse jo edhe e kryeqytetit dhe jam i sigurt që nga programi i tij, deri tek zbatimi në terren dhe për këtë  qëndrojmë garant si Parti Demokratike dhe unë si kryetar i saj, se do të ketë zero firim apo humbje gjatë rrugës, sepse kjo është shumë e rëndësishme. Çfarë do të votoni, atë do të merrni!

Përtej nevojës për t’i dhënë një frymë qytetit tuaj, shpirtit korçar, përtej reflektimit të problemeve tuaja të përditshme dhe pritshmërive tuaja, në raport me këto probleme që janë dhe mbeten thelbi dhe përmbajtja e këtyre zgjedhjeve, ky do të jetë padyshim edhe një sinjal, një sinjal qytetarie, që i bie të lëshohet këtu nga Korça, për zhvillimet në shkallë vendi, në raport me paligjshmërinë, arbitraritetin, abuzivitetin dhe zhbërjen që po dëshmohet çdo ditë, si mentalitet për t’i lënë vendin shpejt dhe me vepra, fjalëve të bukura të rilindjes. 

Këto zgjedhje kanë të bëjnë drejtpërdrejt dhe në thelb me qytetarët e Korçës, hallet dhe problemet e tyre, ndaj me besimin më të plotë se kandidatura e zotit Stratobërdha dhe programi i tij do të votohen gjerësisht nga qytetarët e Korçës, për të mirën tuaj, për të mirën e qytetit tuaj, dua edhe njëherë t’ju garantoj se aleanca për qytetarinë korçare, Partia Demokratike, aleatët e saj, kandidati ynë janë dhe do të mbeten në dispozicionin tuaj në ditët dhe javën e ardhshme, për të bërë të mundur të sqaroheni për çdo çështje dhe detaj të programit të tij, rrugë më rrugë, shtëpi më shtëpi, sikundër i bëj thirrje çdo qytetari të angazhuar të Korçës, që të japin kontributin e tyre në këto ditë të mbetura, për të bërë të mundur që nëpërmjet transparencës, nëpërmjet zërit tuaj, por edhe nëpërmjet mundësisë për të dëgjuar dhe prekur së afërmi cilësitë e Sotiraq Stratobërdhës, të dini të bëni kontrastin midis dy kandidatëve me të njëjtin emër, po me vizione kaq të ndryshme dhe pritshmëri kaq të ndryshme, për secilin prej jush dhe familjet tuaja”.

Deklarata për media e zëdhënëses të Partisë Demokratike Laura Vorpsi:

Kryeministri Rama po shënon rekorde të reja në theqafjen e degradimit kulturor.

Me shkarkimin pas krahëve, të Drejtorit të Teatrit të Operës dhe Baletit, maestro Zhani Cikos, Kryeministri i ka vënë kazmën kontributit të palodhshëm të një jete të tërë për operën, muzikën dhe artin.

Zhani Ciko është një shërbëtor i përulur i kulturës tonë kombëtare, dhe është  një nder për vendin tonë që ai drejtonte Teatrin e Operës dhe Baletit.

Me një vendim të errët, me prepotencë të pashoqe, Edi Rama largoi nga detyra maestron e famshëm, pa pasur guximin t’i komunikonte atij as dhe dy fjalë. Asnjë falënderim për mundin e dhënë për artin dhe kulturën e vendit.

Zhani Ciko po përgatitej për koncertin e djeshëm të bamirësisë, dhe nuk ishte në dijeni të vendimit që Kryeministri kishte marrë ndërkohë.  Ai u lajmërua nga miqtë e tij në telefon, të cilët kishin dëgjuar në media për shkarkimin e tij.

“TURP”, e cilësoi me të drejtë Tenori i Famshëm Saimir Pirgu, dhe i turpshëm është trajtimi që Kryeministri i vendit i ka bërë maestros së palodhur, Zhani Ciko.

Deklarata për media e deputetit të Partisë Demokratike Gent Strazimiri:

Sot, në ditën e “Të rënëve të Policisë së Shtetit”, Rama dhe ministri i tij gënjyen paturpësisht duke “u premtuar” familjarëve të martirëve se do të bëjnë për ta ca gjëra të mira që në fakt janë bërë prej vitesh:si punësim për familjarët, shkollim për fëmijët, kredi të buta për strehim etj, e që Rama dhe qeveria e tij ka detyrimin t’i respektojë.

Tallazet dhe furtunat e jetës nuk parashikohen dot me ligj, dhe kësisoj përmirësimi i kuadrit ligjor dhe ndihmës ndaj tyre nuk do të njohë kurrë kufij, e vetmja gjë që zoti Rama duhet t’u kishte premtuar sot, do të duhej të ishte respektimi i ligjeve në fuqi të paktën për ta, dhe trajtimin e barabartë të martirëve, domethënë jo ndarjen e tyre si deri në vitin 2005 në “të vrarë në kohën e Berishës dhe të vrarë në kohën tonë”.

Kjo ka ndodhur sot! Ditën për diell!

Ndërkohe mbrëmë në orët e vona, në errësirë dhe me një gjakftohtësi kriminale, Ministri i Brendshëm ka vazhduar operacionin e koduar “fund administratës publike”, duke shkelur ligjin, duke nëpërkëmbur dinjitetin njerëzor të nëpunësve, mu në zyrat e shtetit.

Mbrëmë vonë, 70 zyrtarë të Ministrisë së Brendshme janë thirrur, për të marrë fermanin e zi të shkarkimit nga puna, pa paraqitur asnjë motiv. Janë thirrur dhe shkarkuar natën, pa asnjë shpjegim.

Me një operacion okult, ne stilin e opingës së “Partizanit Meke”, janë dënuar kolektivisht një pjesë e mirë e drejtorëve dhe specialistëve të Ministrisë së Brendshme.
Janë urdhëruar të paraqiten e të qëndrojnë në zyrat e tyre, e më pas thirrur një nga një, e nën presion u është kërkuar të firmosin pranimin për largim nga puna.

Administrata Publike, as nuk është plaçke lufte, e as stalla e kooperativës ku xhahilët vendosnin për “therje te detyruar” të gjësë së gjallë për t’i shtruar gostinë të deleguarit të Partisë.

Partia Demokratike dënon fuqishëm këto akte brutale të shkeljes së ligjit dhe dinjitetit human të nëpunësve të shtetit dhe qytetarëve të vendit, dhe kërkon ndërprerjen e menjëhershme të trajtimit të nëpunësve të administratës si “kolaboracioniste” dhe shkarkimin e tyre me lista të zeza të përpiluara në zyrat e Partisë Socialiste.

Deklarata për media e deputetit të Partisë Demokratike Arben Ristani:

Partia Demokratike denoncon përsëri Kryeministrin Rama dhe Ministrin e Brendshëm Tahiri, të cilët po vendosin ditë pas dite nën kontroll të plotë partiak, policinë e shtetit.

Në kundërshtim të hapur me ligjin, dy ditë më parë, është emëruar në detyrën e drejtorit të personelit të policisë së shtetit, kandidati për deputet i Partisë Socialiste në zgjedhjet e fundit në Fier, Xhevahir Karaj.

Ligji për Policinë e shtetit ndalon rreptësisht përfshirjen në këto struktura të personave me lidhje dhe me vokacion partiak.

Kandidati për deputet i një partie, është shërbëtor i kësaj partie, është militant i kësaj partie, është pjesë thelbësore e kësaj partie.

Është e qartë se Kryeministri në bashkëpunim me Ministrin e Brendshëm kanë caktuar drejtor të personelit në policinë e shtetit një politikan, një shërbëtor të partisë, i cili do të bëjë maksimumin për të përfaqësuar dhe mbrojtur interesat e Partisë Socialiste, dhe jo interesat e shtetit dhe të publikut.

Shkelja e ligjit të policisë së shtetit e nisur me emërimin e Drejtorit të Përgjithshëm të Policisë vazhdoi më tej me shkarkimet kolektive të drejtuesve të lartë të policisë.

Shkelja e ligjit dhe e çdo standardi vazhdoi me shkrirjen e strukturës së hetimit te krimit ekonomik duke e lënë vendin dhe sot që flasim pa mbikëqyrjen e kësaj strukture. 

Shkelja e ligjit vazhdon me arrogancë të pashoqe me emërimin politik të  drejtorit të personelit.

Kur Kryeministri, ministri dhe drejtuesit më të lartë të policisë së shtetit, shkelin ligjin, çfarë garancie duhet të presin qytetarët nga kjo qeveri?

Këto janë ditët më të errëta për policinë e shtetit.

Është kjo arsyeja pse krimet shtohen, pse pasiguria e jetës rritet dhe pse aksidentet po marrin përditë e më shumë jetë njerëzish.

Kur qeveria sillet si bandë që nuk njeh ligjin, atëherë elementët kriminalë dhe të rrezikshëm për shoqërinë gjejnë terrenin më të përshtatshëm për të lulëzuar.

Ne i kërkojmë qeverisë të ndalë shkelmimin e ligjit dhe të kthejë mbrapsht aktet e paligjshme që po e dëmtojnë rëndë policinë e shtetit, dhe po rrisin pasigurinë e qytetarëve në vend.

Deklarata për media e deputetit të Partisë Demokratike Arben Ristani:

Partia Demokratike denoncon përsëri Kryeministrin Rama dhe Ministrin e Brendshëm Tahiri, të cilët po vendosin ditë pas dite nën kontroll të plotë partiak, policinë e shtetit.

Në kundërshtim të hapur me ligjin, dy ditë më parë, është emëruar në detyrën e drejtorit të personelit të policisë së shtetit, kandidati për deputet i Partisë Socialiste në zgjedhjet e fundit në Fier, Xhevahir Karaj.

Ligji për Policinë e shtetit ndalon rreptësisht përfshirjen në këto struktura të personave me lidhje dhe me vokacion partiak.

Kandidati për deputet i një partie, është shërbëtor i kësaj partie, është militant i kësaj partie, është pjesë thelbësore e kësaj partie.

Është e qartë se Kryeministri në bashkëpunim me Ministrin e Brendshëm kanë caktuar drejtor të personelit në policinë e shtetit një politikan, një shërbëtor të partisë, i cili do të bëjë maksimumin për të përfaqësuar dhe mbrojtur interesat e Partisë Socialiste, dhe jo interesat e shtetit dhe të publikut.

Shkelja e ligjit të policisë së shtetit e nisur me emërimin e Drejtorit të Përgjithshëm të Policisë vazhdoi më tej me shkarkimet kolektive të drejtuesve të lartë të policisë.

Shkelja e ligjit dhe e çdo standardi vazhdoi me shkrirjen e strukturës së hetimit te krimit ekonomik duke e lënë vendin dhe sot që flasim pa mbikëqyrjen e kësaj strukture. 

Shkelja e ligjit vazhdon me arrogancë të pashoqe me emërimin politik të  drejtorit të personelit.

Kur Kryeministri, ministri dhe drejtuesit më të lartë të policisë së shtetit, shkelin ligjin, çfarë garancie duhet të presin qytetarët nga kjo qeveri?

Këto janë ditët më të errëta për policinë e shtetit.

Është kjo arsyeja pse krimet shtohen, pse pasiguria e jetës rritet dhe pse aksidentet po marrin përditë e më shumë jetë njerëzish.

Kur qeveria sillet si bandë që nuk njeh ligjin, atëherë elementët kriminalë dhe të rrezikshëm për shoqërinë gjejnë terrenin më të përshtatshëm për të lulëzuar.

Ne i kërkojmë qeverisë të ndalë shkelmimin e ligjit dhe të kthejë mbrapsht aktet e paligjshme që po e dëmtojnë rëndë policinë e shtetit, dhe po rrisin pasigurinë e qytetarëve në vend.

Basha: “Qeveritë demoratike shërbejnë sipas ligjit dhe kushtetutës, nuk i sfidojnë ato për megallomani udhëheqje”

Basha, liderëve në PPE: “Mbështesni statusin kandidat të Shqipërisë, monitoroni praktikat antiligjore të mazhorancës!”

Kryetari i opozitës Lulzim Basha mori pjesë në samitin e Partisë Popullore Europiane. Në nisje të samitit, kryetari në detyrë i PPE dhe kryetari i grupit të PPE në Parlamentin Europian, z. Joseph Daul ka bërë prezantimin formal të kryetarit të ri të PD, Lulzim Basha. Në bisedat që zoti Basha zhvilloi me personalitete të larta të BE dhe drejtues të qeverive pjesëmarrëse në këtë samit, si presidenti i Këshillit Europian, Herman Van Rompuy, presidenti i Komisionit Europian, Jose Manuel Barosso, kancelarja e Gjermanisë, Angela Merkel, kryeministri i Suedisë Fredrik Reinfeldt, zëvendës-kancelari austriak, Michael Spindelegger, kryeministri i Hungarisë, Victor Orbán, kryeministri i Greqisë, Antonis Samaras, zëvendës-kryeministri italian Angelino Alfano etj, u ka kërkuar mbështetje për dhënien e statusit të vendit kandidat Shqipërisë në muajin dhjetor, sikundër i ka garantuar se opozita do të bëjë gjithçka, për hapjen e shpejtë të negociatave për anëtarësim.

“Kam kërkuar pikë së pari mbështetjen nga të gjithë partitë simotra në pushtet, duke nisur me kancelaren Merkel dhe më të gjithë udhëheqësit e tjerë të qeverive apo koalicioneve të djathta në BE, për të konfirmuar rekomandimin pozitiv të Komisionit Europian, për statusin e Shqipërisë  si vend kandidat për anëtarësim në BE si dhe vendosmërinë e PD, që edhe në opozitë të vazhdojë të kontribuojë në të gjithë forcat dhe mënyrat, për përshpejtimin e trajektores europiane të vendit dhe hapin tjetër në këtë trajektore, që është hapja e negociatave”

Zoti Basha i ka njohur drejtuesit e qeverive të vendeve anëtare të BE dhe krerëve të Unionit Europian me situatën në Shqipëri, duke u ndalur në mënyrë të veçantë në shpërfilljen që mazhoranca po i bën shtetit ligjor, vlerave të gjithpërfshirjes dhe dialogut.

“Në takimet dypalëshe bëra një prezantim të situatës politike në vend, veçanërisht për shqetësimet tona edhe në këtë fazë të hershme të mazhorancës së re, për shpërfilljen totale të parimeve të shtetit ligjor, për një fushatë kundër kushtetutës, ligjshmërisë, ligjit, vlerave të konsensusit, gjithpërfshirjes dhe dialogut si dhe për disa prej shqetësimeve që kanë të bëjnë me vijmësinë dhe stabilitetin e administratës publike dhe stabilitetin e trupave të veçantë që kanë të bëjnë me shtetin ligjor, me zbatimin e ligjit, siç është policia, institucionet e pavarura dhe frymën konfliktuale, në raport me to. Qeveritë e zgjedhura në çdo vend demokratik binden dhe shërbejnë sipas ligjit dhe kushtetutës dhe nuk udhëheqin përtej ligjit dhe kushtetutës. Sigurisht kërkova me forcë mbështetjen për statusin kandidat, si diçka që Shqipëria dhe shqiptarët e meritojnë, që vjen pas një progres-raporti objektiv të Komisionit Europian, progres-raport i cili fotografon periudhën e fundit të qeverisjes së koalicionit të PD. Ky pa dyshim është edhe një hap i cili do të ndihmojë në një vëmendje më të madhe të BE, institucioneve të BE dhe vendeve anëtare, ndaj zhvillimeve politike në Shqipëri. Këtu, jo vetëm nuk ka asnjë paradoks por ka një vizion të qartë të opozitës shqiptare e cila duke mbështetur dhe konsideruar si jashtëzakonisht të rëndësishëm statusin kandidat dhe procesin e integrimit europian të vendit, jo vetëm vazhdon me koherencë përqasjen që ka pasur edhe në mazhorancë, jo vetëm mbështet një aspiratë e cila mbështetet nga mbi 90 për qind e shqiptarëve por po kështu shtrin shinat e një opozite të fortë modern dhe europiane që shikon edhe procesin e integrimit europian, si një proces që ndihmon në mekanizma të kontrollit, të llogaridhënies së një demokracie parlamentare dhe jo si një proces që përdoret, për të mbajtur peng apo diktuar axhendat e ngushta politike të një partie apo një partie tjetër”.

Ndërsa në takim, çështje kryesore ka qenë kriza ekonomike dhe financiare me të cilën përballet BE, zoti Basha ka shprehur shqetësimin, për faktin se qeveria në Tiranë po minon arritjet ekonomike të vendit dhe po cënon stabilitetin makro-ekonomik.

“Ne lamë një situatë makro-ekonomike të stabilizuar, me rritje ekonomike siç e dëshmon edhe progres-raporti, jo atë rritje që stimuluam në 4 vitet e para të qeverisjes, pasi për shkak të krizës globale që ka mbërthyer edhe Europën, rritja ekonomike ra dhe kjo u ndie edhe në aftësinë e ekonomisë për të prodhuar më shumë vende pune për vit, por e lamë vendin në një situatë makro-ekonomike stabël, çka është më e rëndësishme e lamë vendin në një situatë fiskale dhe financiare stabël, ku borxhi megjithëse u rrit, sikurse u rrit në çdo vend fqinj dhe në çdo vend të Europës, ajo ishte më e ulta në rajonin e Europës Juglindore. Ndërkohë, shohim përsëri, përmes një përpjekje jo transparente, anti-ligjore në thelb siç është akti normativ që diskutohet në Parlamentin e vendit, për të përdorur “muskulin” politik, për të shkatërruar themelet e këtij stabiliteti financiar përmes katërfishimit brenda natës së huasë së shtetit, të cilat për më shumë nuk përdoren siç trumbetohet nga mëngjesi deri në darkë për të likuiduar fatura të papaguara të biznesit, fatura që janë po kështu të planifikuara për vitin në vazhdim por planifikohet të përdoret për shpenzime operative, planifikohet të përdoret për shpenzime qeveritare, shpenzime luksi në një kohë krize, shtim ministrish në një kohë krize dhe çka është më shqetësuese një planifikim me dashje, gjakftohtë i përkeqësimit 4 herë të mbledhjes së taksave, në krahasim me 8 muajt e parë të këtij viti. Pra, qeveria e zgjedhur që zakonisht duhet të mbledhë të paktën njësoj por zakonisht më shumë taksa se qeveria paraardhëse (ky është një rregull thuajse i përgjithshëm i rotacionit normal të qeverive) jo vetëm që nuk e bën këtë por publikisht deklaron se do të mbledhë 4 herë më pak se sa mblodhi qeveria paraardhëse. Kjo natyrisht është një minë me sahat për stabilitetin ekonomik të vendit, për mirëqënien e qytetarëve shqiptarë, për stabilitetin shoqëror të vendit dhe është tërësisht kundër frymës që u diskutua sot, ku në një diskutim të hapur midis organeve të BE, komisionit nga njëra anë dhe Parlamentit nga ana tjetër u vu theksi tek nevoja për disiplinë fiskale, për transparencë, bashkëpunim dhe dialog për çdo çështje që ka të bëjë me shpenzimet, sepse shpenzimet dhe kontrolli i tyre janë një tregues shumë i rëndësishëm i përgjegjshmërisë së çdo qeverie europiane apo kombëtare dhe natyrisht edhe vendeve aspirante, në raport me stabilitetin e vendit, në raport me mirëqënien e qytetarëve”.

Zoti Basha ka bërë të ditur se opozita është e angazhuar të bëjë transparencën e akteve antiligjore dhe antikushtese që ka ndërmarrë qeveria dhe mazhoranca e re, mes të cilëve është dhe akti normativ për buxhetin i cili në kundërshtim me ligjin, i hap rrugë marrjes së borxhit për shpenzime operative dhe jo për investime. 

“E gjithë vëmendja jonë si opozitë është të ushtrojmë përgjegjësitë që na ngarkon shoqëria, qytetarët, ligji dhe rregullat e demokracisë. Natyrisht, në këtë kuadër thirrja jonë ndaj çdo institucioni partner, si Banka Botërore apo
Komisioni Europian të jetë e vëmendshme ndaj akteve të papërgjegjshmërisë, aq më shumë në kushtet e mungesës së transparencës dhe ilegjitimitetit, siç është rasti i aktit normativ i cili është në kundërshtim me ligjin e 2009 që e ndalon qeverinë shqiptare të marrë borxh për shpenzime operative, rroga apo për luksin e vet dhe e detyron të marrë borxh vetëm për investime që në fund të fundit i kthehen si vlerë e shtuar ekonomisë dhe qytetarëve shqiptarë. Në këtë kuadër, insistimi ynë është sigurojmë nëpërmjet të gjithë mjeteve, mbikëqyrjes opozitare në Parlament, transparencës para publikut shqiptar, dialogut të përhershëm me qytetarët dhe grupet e interesit, që qeveria e mazhorancës Rama-Meta të ndalë këtë revansh të shfrenuar kundër kushtetutës, ligjit, konsensusit, bashkëpunimit, të vërtetave dhe kundër stabilitetit ekonomik dhe financiar të Shqipërisë. Ka qenë një punë e vështirë e përditshme, për ta mbajtur Shqipërinë në parametra stabël ekonomikë, për të siguruar që rritja aq sa ishte, 1.7%, 2%, të ishte rritje dhe jo krizë dhe nëse nuk vazhdohet me këtë sens disipline, nëse nuk vazhdohet me këtë sens transparence, madje të përmirësohet më tej se për këtë janë votuar, atëherë vendi rrezikon të zhytet në një krizë të përmasave të paparashikuara, atë që unë dje e quajta para grupit parlamentar, formula dhe përgatitja e krizës “Rama” dhe për këtë siç e thashë, akti normativ është një minë me sahat, është një alarm që bie për të gjithë ne”.

Fjala e plotë në Kuvend:

Zonja deputetë,

Zotërinj deputetë,

I nderuar zoti Kryesues i Seancës,

Të dashur qytetare dhe qytetarë,

Parafolësi nuk meriton përgjigje pasi është i ndëshkuar njëherë nga kryetari i tij por vetëm do t’iu them një moment nga një nga shtetarët më kryesorë të BE-së. 
Tek po ecja me të në një korridor më pyet, mirë Sali, se Edi Rama është kaq antishqiptar, kjo është evidente për çdo njeri, po si ka mundësi ata njerëz që janë rreth tij, pranojnë të shkelmojnë interesat kombëtare të vendit siç i shkelmon ai. Përgjigjja ime ishte e thjeshtë: “Ata kanë vetëm interesa personale”. Dhe kjo ishte e qartë më shumë se çdo gjë tjetër.

Kam ardhur këtu për të diskutuar për një problem që është problem kryesor sot, debate në media, publik, midis zyrtarëve, problem ekonomik. Për çdo vend të lirë anëtar i NATO, ekonomia është e para, ekonomia është e dyta, ekonomia është e treta dhe normal që debati për të duhet të jetë më i gjallë se çdo gjë tjetër.

Në të 40-at e qeverisë dhe nuk e them në rrafshin e zisë, por sot është dita e 40 e juaja. Ju sillni sot verdiktin, sillni sot në Parlament një dekret me të cilin ndëshkoni çdo fëmijë shqiptar, çdo të papunë shqiptar, çdo të punësuar shqiptar, çdo të sëmurë shqiptar, çdo shtatzënë shqiptare, çdo të moshuar shqiptar, vendin në tërësi. Bravo. Pasi u rreshtuat në aleancë me Haitin, tani vendosni këtu ta shtyni me shpejtësinë më të madhe drejt recesionit dhe krizës.

Kjo është një vepër makabre. Sigurisht dije mirë se kushërira jote u bë drejtoreshë tatimesh ndaj dhe vjen dëgjon këtu sipas kushërirës, por ç’të bëjnë shqiptarët, të cilët në vend se të shohin një shpresë, është e vërtetë që votuan dhe ne nuk e kemi mohuar, por atyre tani, ajo votë iu kthehet në një dorë të zezë që futet në xhepat e tyre. Ajo votë iu kthehet në një lugë që u merr kafshatën para gojës, ajo votë iu kthehet në një gërshërë që u pret ilaçet, u pret edhe shpresën e fundit. Dhe në një ata që ushqehen me havjar dhe aragosta çdo natë, e bëjnë ata, të cilët marrin dhurata nga Koçot dhe stërKoçot pikturat e Shën Galit me 200 mijë euro dhe zhduken brenda natës 600 ikona dhe këtu derdhin lotë.

Ç’është kjo? E keni shndërruar këtu në një teatër tragjikomedie të paimagjinueshme. Ekonomia shqiptare, Shqipëria është pjesë e sistemit ekonomik rajonal, europian, botëror. Është në vëzhgim të vazhdueshëm nga të gjithë institucionet ndërkombëtare, të gjitha ato papërjashtim pohojnë se Shqipëria ruajti rritjen ekonomike, se rritja ekonomike në Shqipëri ra në 5 vitet e fundit nga 8% në 1.7%, por përsëri mbeti 4 herë më e lartë se sa rritja mesatare e rajonit. Përsëri Shqipëria, e cila pati fatin e keq madhor, dy partnerë, dy fqinjët e saj kryesorë t’i bien në krizë të papërsëritur prej 80 vjetëve të fundit. Shqipëria pati fatin e saj të keq të jetë në këtë kohë krize në një vend jashtë Bashkimit Europian dhe do të ndëshkohej rëndë nga direktivat barrë, e cila urdhëroi bankat europiane në vendet jo anëtare t’i shpallë me risk 100% dhe të ulin kredinë dhe ky është realiteti i bankave shqiptare, të cilat nuk kreditojnë më shumë se 50-60% të kusimeve nga 86% që është norma optimale e kreditit.

Me të gjithë këta faktorë negativë, Shqipëria u mbajt, u mbajt se u bënë reforma strukturore, u mbajt se u zgjerua liria ekonomike, u mbajt se u zvogëlua qeveria dhe Shqipëria u vendos në 10 administratat më të vogla në botë, u mbajt se u bënë përpjekjet më të jashtëzakonshme për të thithur investimet e huaja dhe në kulmin e kësaj krize Shqipëria ia doli të 3-fishojë investimet e huaja, të marrë çdo vit mbi 1 miliard investime të huaja 4 vitet e fundit. Në kulmin e kësaj krize, Shqipëria ia doli të rrisë me 316% eksportet e saj.

Në kulmin e kësaj krize, Shqipëria ia doli të paraqitet në tregjet financiare ndërkombëtare dhe eurobondi i saj, i cili fillimisht u shit me interesa 7.8% të shitet sot me një interes shumë më të ulët, kjo është dëshmi e një stabiliteti të qartë financiar. Shqipëria padiskutim përjetoi vështirësi serioze. Ranë evidencat, ranë mundësitë e eksporteve në Itali dhe në Greqi, por megjithatë u mbajt dhe u mbajt nga 3 faktorë. U mbajt para së gjithash se bëmë çdo gjë për një disiplinë fiskale dhe i dolëm të rrisim të ardhurat çdo vit, u mbajt sepse bëmë gjithçka për të investuar dhe për ata që njohin ABC-në e ekonomisë e kanë të qartë se në kushte krize investimet publike janë jetike për të punësuar njerëzit, për të mbajtur rritjen. U mbajt sepse bëmë çdo gjë për të thithur investimet e huaja dhe në këtë kohë dëm i tyre u bënë dy projektet më të mëdha të historisë dhe të rajonit, kaskada e Devollit dhe projekti Trans Adriatik, të cilët lartësuan emrin e Shqipërisë si një vend i sigurtë, si një vend serioz, si një vend i përshtatshëm për investimet e huaja.  Rritja ekonomike u mbajt duke u përpjekur dhe zgjeruar liritë fiskale. Natyrisht, ky 2% i pamjaftueshëm dhe i domosdoshëm do të ishte që cilido që do të ishte në pushtet të bënte çdo gjë për të ecur më tutje. Shqiptarët kanë nevojë jetike për rritjen.

Çfarë po bëni? Ju po sillni me shpejtësi recesionin me papërgjegjshmërinë më të madhe, një gropë që ekziston në psikologjinë e një njeriu që ka zero njohuri në ekonomi, një gropë që ekziston në mendjen e tij, doni ta shndërroni në gropë për çdo shqiptar, po është ai dhe vetëm ai.

Në rast se FMN thotë se Shqipëria pati rritje, piktori dështak flet për gropë, në qoftë se BB flet për rritje, piktori dështak flet për krizë dhe gropë. Në qoftë se “The Economist” shkruan për rritje, piktori dështak shkruan për krizë dhe gropë. Në qoftë se Komisioni Europian përsërit çdo tre muaj se Shqipëria ka rritje, piktori dështak flet për gropë dhe krizë.

Ku jemi këtu? Vetëm Enveri sillej në këtë mënyrë, vetëm ai thoshte se unë e kam drejt dhe gjithë bota e ka gabim. Por kjo është një lojë makabër në tavolina, në vendet e punës, në ilaçet, në librat, në mirëqenien e çdo shqiptari. Kujt doni t’ia shisni ju këto? Dilni lakuriq më keq se ai që doli në plazhe. Po, po. Se ajo është individuale. Qeveri unike në Europë, në botë dhe që thotë se doganat dhe tatimet pasi vendos kushërinjtë e vet, nuk do të realizoni kaq, por 4 herë më shumë se ç’ka qenë deficit. Nuk do të jeni 2 miliardë lekë mangut, por do të jeni 8 miliardë lekë mangut në muaj. Po ç’do të thotë kjo? Kjo është se jeni përgatitur të vendosni sistemin e kleptokracisë. Publikisht dhe drejtpërdrejt. Sigurisht se po të emërosh administratorët e Koços në “Albpetrol” nuk ka më taksa nga “Albpetroli”. Sigurisht se po t’u japësh doganën e Durrësit klaneve kriminale nuk ka më realizime. Sigurisht po t’iu lesh në kontroll portet dhe aeroportet grupeve kriminale që ishin më 2005, doganat, tatimet do të bien në pikiatë. Pa diskutim, si mund të paraqiteni para shqiptarëve e t’u thoni se do u kërkoni doganave të rrisin deficitin 4 herë më shumë.

Ku e keni përgjegjësinë ju? Po ju nuk keni interesa kombëtare, s’keni interesa publike, keni interesa personale.

Po si t’u lejojmë ne të rrisni evazionin fiskal 4 herë? (Pusho ti se ti ke kushërirën aty, mbron kushërirën). Të kujt janë paratë? Tuajat janë paratë? Kujt ia merrni ju këto? Ja u merrni varfanjakëve shqiptarë dhe u qani hallin, lani duart me fjalime bosh të shkruajtura nga Lorenc Vangjeli etj. Edhe një herë.

Ju i dëgjuat këta çfarë ju folën, unë do t’u lexoj juve këtu çfarë kanë shkruajtur këta për ekonominë shqiptare në relacionin e dekretit famëkeq, me të cilin po zhvillojnë skenarin e dytë alla Papandreu në Shqipëri. Urdhëroni; çfarë shkruajnë këta; rritja ekonomike shqiptare në 3-mujorin e parë është 1.7 për qind, rritja ka ardhur nga kërkesa e huaj dhe stimuli fiskal, përsa i përket performancës së tremujorit të dytë theksojmë se, ka pasur një rritje ekonomike lehtësisht më të lartë se tremujori i parë. Punësimi në tremujorin e dytë të 2013 është rritur me 3.4 për qind krahasuar me të njëjtën periudhë të një viti më parë. Vetëm nga sektori privat shkruhet në relacionin e tyre, por këta harrojnë dhe nuk goxojnë të lexojnë relacionin që kanë sjellë këtu. Vetëm nga sektori privat në periudhën janar-qershor rezulton se janë rritur 12 mijë e 265 kontribues si rezultat i hapjes së bizneseve të reja. Dëgjoni ju populli i gropës se si edhe gropë u hapin bizneseve të reja. Rezulton, thotë, se bilanci tregtar i mallrave është përmirësuar bilanci si problem më kryesor i ekonomisë, është përmirësuar me 28 për qind. Në vitin e gropës tuaj se kryetari juaj, transferat e emigrantëve kanë një rënie të fortë thotë relacioni, duke rënë me 26 për qind në tremujorin e parë të këtij viti. Por, investimet e huaja direkte në 6 muajt e parë të vitit kanë qenë përkatësisht 32 dhe 13.3% më të larta. Unë ua kam shkruar këtë relacioni?! Vazhdojmë. Sepse kur ua shkruajmë ne thonë jo, kur i shkruajnë vete…i bëri armiku thonë. Rreth 90 për qind të deficit të llogarisë korente është financuar nga investimet e huaja dhe ky raport mbulimi nga investimet e huaja është më i larti si mesatare në historinë e tij me rreth 60%. Raporti i mësipërm vlerëson në tërësi pozicionin e jashtëm të Shqipërisë, norma e inflacioni në tremujorin e dytë ishte 2.2%, stoku i kredive në lekë deri në korrik 2013 është rritur me 7.4%, stoku i depozitave është rritur me 2.4%. Niveli i kredive me probleme deri në korrik 2013 është 23.8% dhe është ulur krahasuar me qershorin më parë me 0.4%. Stoku i borxhit shtetëror me 31 gusht sipas relacionit që keni paraqitur këtu, o gruparë që flisni nga mëngjesi në darkë vetëm për gropën, kjo thotë se është 60% e prodhimit të brendshëm. Garancia e brendshme për KESH-in është 1.5% e PBB-së, garancia e jashtme 2.4% e PBB-së. Ju keni frikë t’i lexoni këto. Po nuk folët nga alfa tek omega për gropë ju përjashtojnë.

Kam këtu analizën e Bankës së Shqipërisë dhe s’ka nevojë të ndalem, sepse lexova analizën tuaj, ku armiku i klasës u ka shkruar ju dhe ju e keni shpërndarë vetë. A ka gjë më të rëndë se në këtë situatë, ku vjet e kemi pasur më të vështirë për ekonominë e Shqipërisë. Merrni shifrat dhe të dhënat. Ne erdhëm në Parlament dhe vendosëm të shkurtojmë shpenzimet me 19 miliardë lekë dhe vendosëm të rrisim borxhin, gjithsej vetëm 6 miliardë lekë. Ky ishte qendrimi ynë. Po ju çfarë po bëni zotërinj? Ju me skemën e Papandreut po bëni, po shkurtoni 16 miliardë dhe po merrni borxh 40 miliardë për 3 muaj. Ju që të cilët katër vite rresht nuk latë fjalë e mallkim për Sali Berishën për borxhin, i cili në katër vite e rriti 4%, ju në 4 muaj e rrisni dhjetë më shumë se unë, 4.5%. Po si po ua bëni qytetarëve këtë? Ne e rritëm borxhin 4%, por bëmë tunelin e Elbasanit, e rritëm borxhin me 4% dhe ndërtuam autostradat e jugut, e rritëm 4% dhe ndërtuam autostradën e Hanit të Hotit, e rritëm borxhin 4% dhe financuam mijëra fermerë e projekte, e rritëm me 4% dhe ndërtuam qindra shkolla, ujësjellësa, kanalizime. Nuk përdorëm një qindrarkë të vetme për rroga e pensione. Po çfarë ndodh me ju? Ia dorëzuat doganat klaneve. Ua vendosni kushërinjtë mbi to që të vidhni si lukuni paratë e qytetarëve shqiptarë e shkoni e merrni borxh, duke bërë që ta ngordhni biznesin. Në vend që ato kredi të shkojnë tek biznesi, ju i prisni edhe më tej oksigjenin dhe leshini bankat pas Bonove të Thesarit dhe natyrisht është investimi më komod e i sigurtë dhe ato nuk kanë pse të mos i blejnë. Për këtë votoni ju sot? Në ndërgjegjen tuaj shoqërore nuk mbetet asnjë gjurmë. A keni njerëz të varfër e të sëmurë në zonat tuaja?  A keni njerëz pa shtëpi në zonat tuaja? A keni njerëz që nuk kanë as fasule e makarona siç thotë kryetari juaj? Po kapardisen me librin e vajit që e sigurojnë si ndihmë, a keni të moshuar që numërojnë kafshatën dhe s’kanë të blejnë ilaçet? Atëherë, ku i çoni ju 240 milionë dollarë që ua hiqni doganave dhe takimeve me një të rënë të lapsit për të krijuar gropën në mendjen e kryetarit tuaj. Ju po shkatërroni administratën. Ku është kushërira, e cila s’ka ardhur sot, me shpirtin e të ndjerit Spiro Kolekës, dhe me një gjysmë tjetër ndjek ekspertët në çdo ministri për t’i përzënë. Sikur të mos ishte një zyrtare. Po demotivoni çdo gjë. Keni marrë një fushatë të egër kundër bizneseve, sulmesh, dhe zotërinj i them kryetarit tuaj se çdo qindarkë që do të gjesh si keqadministrim, filloje nga Sali Berisha deri tek zyrtari më i thjeshtë dhe dërgojë në Prokurori. Unë do të qëndroj në ato që kam thënë. Ke ndërtuar pallatin nuk ke faturë, po ndërton vilën dhe s’ke faturë. Këto janë evidente dhe s’po të them për të tjerat akuza. Merr Brionen me avion privat për të qepur kostumet. S’ke një faturë. U zhdukën 600 ikona në një natë dhe s’ke faturë. Unë i them këto dhe ja ku është ai se ka blerë mandatin me projektin e të birit të vet.

Së fundmi, keni vendosur të rrihni gjoksin me vendimet e mia. Bëni vendimet tuaja dhe mos bëni kështu. Del ky ministri i Shëndetësisë dhe zotohet se në tetor gratë shtatzëna do ta kenë falas këtë shërbim dhe tërë punonjësit tallen me të. Një gënjeshtar profesionist që del në ekran e gënjen. Nëse doni të mburreni bëjeni me vendimet tuaja.

Prandaj dhe në qoftëse doni të mburreni, mburruni me vendimet tuaja se deri tani në 40 ditë keni dëgjuar nga ju, qoftë nga ministri në fjalë, ballokume nga ministri tjetër, 100 ditë të pastrojmë kioskat që të vijnë monopolet.

Edhe një herë, thirrja ime është kjo, mos e votoni këtë akt. Është e turpshme do të hyni në Guiness, do të dëmtoni vendin, është dëshmia më flagrante e instalimit të sistemit të kleptokracisë, rritja me 4 herë e mosrealizimit në tatime dhe në dogana, e tha ministri juaj vit elektoral u ulën me 2.6%, por shikoni sa u ulën në vitin tuaj elektoral. Në vitin tuaj elektoral u ulën 10 herë më shumë, merrni të dhënat, ne kemi bërë gjithçka edhe atë periudhë vere kur u thërrisnit se është qeveri kujdestare kemi bërë gjithçka për të ruajtur disiplinën shqiptare, jo për ju, por për qytetarët. Dhe e prumë me 2% në një vit elektoral minus. Ju në vend që t’i falenderoni, po çoni në postet më nevralgjike të doganave një që ka 0 njohuri. Ku është ministri, shpiku një  taksë të re sot, tatimfitimet duhen shtuar, injoranca financiare nuk mund të ketë emër tjetër veçse emrin e ministrit të Financave. Të gjitha këto i kisha për qeverinë Rama-Meta.