Blog

Kryetari i Partisë Demokratike, z. Lulzim Basha priti në një takim Drejtorin e Përgjithshëm për Zgjerimin, Christian Danielsson. Zoti Basha falënderoi Komisionin Europian, për rekomandimin për dhënien e statusit të vendit kandidat.

Zoti Danielsson ka vlerësuar përpjekjet e bëra gjatë mazhorancës së PD, për të përmbushur detyrimet për marrjen e statusit të vendit kandidat dhe nënvizoi se duhet punë dhe përkushtim, për të përmbushur kushtet e vendosura për hapjen e negociatave. Drejtori i Përgjithshëm për Zgjerimin, Christian Danielsson ka vlerësuar përkushtimin e opozitës, për të mbështetur procesin integrues të vendit.

Kryetari i PD ka garantuar Drejtorin e Përgjithshëm për Zgjerimin, Christian Danielsson, se opozita është e përkushtuar të bëjë gjithçka, për hapjen sa më parë të negociatave për anëtarësimin në BE. Duke folur për situatën aktuale politike në vend, z. Basha shprehu shqetësimin për shkeljen e kushtetutës dhe ligjeve, agresivitetin ndaj opozitës, fushatën e sulmeve ndaj presidentit të Republikës dhe institucioneve të pavarura: KLD, ILDKP, INSTAT, KQZ, etj nga mazhoranca.

Në takim, zoti Basha nënvizoi goditjen që mazhoranca i bëri konsensusit për ligjin e nëpunësit civil, përmes një akti antikushtetues normativ, duke nëpërkëmbur parimet e dialogut dhe gjithpërfshirjes. Emërimet në kundërshtim me ligjin, në kupolën drejtuese të Policisë së Shtetit, ndëshkimi kolektiv i drejtorisë së krimit ekonomik, emërimet jo transparente dhe jo meritokratike në administrimin e financave dhe pasurive publike të shqiptarëve kanë qenë një tjetër temë e diskutimit, mes zotit Basha dhe zotit Danielsson. 

“Qeveria çdo ditë po zëvendëson profesionistët në administratën publike, me militantë  dhe emërime klienteliste, duke rënë ndesh me parimet e stabilitetit dhe vijimësisë, që nënvizohen në progres-raportin e Komisionit Europian”

Kryetari i opozitës, shprehu shqetësim për aktin normativ për buxhetin, si një akt të paligjshëm, pasi qeveria mund të marrë hua për të financuar investimet publike, por jo për të mbuluar rroga apo shpenzime operative. “Përmes aktit normativ, – theksoi zoti Basha, – i cili në mënyrë të paprecedentë ligjëron heqjen dorë nga qeveria të mbledhjes çdo muaj, të 80 milionë dollarëve më pak se parashikimi, pritet të përkeqësojë treguesit e zhvillimit ekonomik të vendit dhe të cënojë rëndë mirëqenien e çdo shqiptari”.

Kryetari i opozitës Lulzim Basha, do të marrë pjesë në Samitin e Partisë Popullore Europiane, i cili zhvillohet më 24 tetor në Bruksel nën drejtimin e Kryetarit në detyrë të PPE dhe kryetar i grupit të PPE në Parlamentin Europian z. Joseph Daul.         

Samiti i PPE, i paraprin mbledhjes së Këshillit Europian që do të mbahet në datat 24-25 tetor.

Në këtë Samit marrin pjesë personalitete të politikës europiane; si Presidenti i Këshillit Europian Herman Van Rompuy, Presidenti i Komisionit Europian Jose Manuel Barosso, kryetarë shtetesh dhe qeverish dhe liderë të opozitës së partive të qendrës së djathtë nga vende të BE-së dhe atyre jo anëtare; si Kancelaria e Gjermanisë Angela Merkel, Kryeministri i Spanjës Mariano Rajoy, Kryeministri i Luksemburgut Jean – Claude Juncker, Kryeministri i Suedisë Fredrik Reinfeldt,  Kryeministri i Polonisë Donald Tusk ,  Kryeministri i Hungarisë Viktor Obran, Kryeministri i Greqise Antonis Samaras, Presidenti i Rumanisë Taraian Basescu, Kryeministri i Letonise Valdis Dombrovskis, Zëvendëskryeministri Italian Angelino Alfano,  Zëvendëskancelari Austriak Michael Spindelegger, Kryeministri i Maqedonisë Nikola Gruevski dhe udhëheqësit e opozitës Bojko Borisov nga bullgaria, Janez Jansa nga Sllovenia , Andrius Kubilius nga Lituania, Jan Figel nga Sllovakia etj.

Deklarata e plotë e z. Bardh Spahia

Ministri i Shëndetësisë është qytetari më pak i informuar në vend për sektorin që ai mbulon.

Prej disa javësh në krye të Shëndetësisë ai ka pasur kohën e mjaftueshme të mësojë për disa shërbime të rëndësishme të spitaleve.

Kështu, mund të ishte informuar se trajtimi i të gjithë rasteve me kancer në Shqipëri është tashmë falas.

Ligji nr 10383, i datës 24 shkurt 2011, pika e, parashikon përfshirjen në marrjen e shërbimit shëndetësor falas të shumë kategorive, ndër të cilat dhe kategorinë e të sëmurëve me kancer.

Nëse Ministri i Shëndetësisë i kësaj qeverie do ta kishte këtë informacion, atëherë me siguri nuk do të ishte bërë qesharak dy ditë më parë kur premtoi se qeveria e tij do ta ofrojë falas këtë shërbim.

Të premtosh një gjë që është realizuar me kohë, do të thotë të mashtrosh. Mashtrimi publik është i dënueshëm. 
Shëndetësia shqiptare ka mjaft sfida, dhe kërkon njerëz seriozë që të përballen me to. 
Mashtruesit nuk janë personat e përshtatshëm për të drejtuar shëndetësinë, ata në fakt kanë nevojë të trajtohen seriozisht nga mjekësia.

Deklarata e plotë për shtyp e deputetit tw PD-sw Florion Mima:

Sot, kryeministri i ri i vendit, ka shkarkuar, në thyerje totale të bazës ligjore, pa asnjë argument dhe tërësisht jashtë të gjitha procedurave ligjore në fuqi, Drejtoren e Institutit të Statistikave, zj. Ines Nurja, një eksperte karriere e statistikave kombëtare, duke e zëvendësuar atë me z.Gjergj Filipi, drejtor i Institutit ‘Agenda’, tashmë edhe haptazi jo të pavarur.

Sot, të gjitha paralajmërimet e Partisë Demokratike lidhur me fushatën e spastrimeve politike dhe emërimeve të reja klienteliste e aspak meritokratike, po vërtetohen katërcipërisht.

Sot, kuptohet qartë qëllimi i atentatit ndaj konsensusit me shtyrjen e futjes në fuqi të ligjit për nëpunësin civil.

Statistikat e vendit, një krenari kombëtare e cituar pa përjashtim në të gjitha raport-progreset e Bashkimit Evropian, kanë pësuar sot atentatin më të rëndë dhe paralajmërimi tjetër i Partisë Demokratike për kapjen e statistikave të vendit dhe vendosjen e tyre nën thundrën e kryeministrit të ri të vendit, është sot plotësisht i vërtetuar.

Kryetari i Partisë Demokratike, z. Lulzim Basha priti në një takim drejtorin politik të Ministrisë së Jashtme të Austrisë, ambasadorin Jan Kickert, i cili shoqërohej nga drejtori i sektorit për Ballkanin Perëndimor, në Ministrinë e Jashtme të Austrisë, z. Johann Sattler.

Kryetari Basha falënderoi z Kickert, për mbështetjen dhe ndihmën e jashtëzakonshme e të vazhdueshme që Austria i ka dhënë Shqipërisë gjatë gjithë këtyre viteve, në të gjitha fushat e bashkëpunimit dypalësh dhe në veçanti në procesin e integrimit të Shqipërisë në Bashkimin Europian.

Z. Kickert konfirmoi angazhimin dhe vendosmërinë e qeverisë austriake, për të vijuar të ndihmojë dhe të mbështesë Shqipërinë, në të gjitha fushat dhe në hapat e mëtejshëm të procesit të anëtarësimit në BE, por njëkohësisht edhe për punuar ngushtësisht edhe me opozitën shqiptare, në forcimin dhe konsolidimin e marrëdhënieve dypalëshe dhe integrimit të Shqipërisë.

Duke u ndalur tek rekomandimi i Komisioni Europian, për statusin e vendit kandidat, në takim u theksua se kjo përbën një tjetër vlerësim të punës dhe të arritjeve të rëndësishme të qeverisë së PD, gjatë 8 viteve të shkuara, por njëkohësisht edhe vlerësim të veçantë për zgjedhjet e 23 qershorit, si zgjedhjet më të mira të zhvilluara ndonjëherë në Shqipëri, në përputhje me standardet ndërkombëtare por edhe për qëndrimin thellësisht demokratik të qeverisë së Partisë Demokratike ndaj rezultatit.

Kryetari Basha theksoi se rekomandimi për marrjen e statusit është një lajm i gëzueshëm për të gjithë shqiptarët dhe është për të ardhur keq që statusi erdhi me kaq vonesë, për shkak të bllokimeve dhe qëndrimit jo konstruktiv të opozitës së Partisë Socialiste.

“Shqipëria e meriton statusin dhe Partia Demokratike do të japë kontributin e saj për marrjen e statusit në dhjetor dhe do të bëjë gjithçka, për hapjen e negociatave për anëtarësim” – deklaroi z. Basha.

Më tej, në takim u diskutua mbi situatën aktuale politike në vend. Z. Basha shprehu shqetësimin jo vetëm të opozitës shqiptare, për sfidimin e hapur të shtetit ligjor, fushatën e sulmeve që mazhoranca ka ndërmarrë ndaj institucioneve të pavarura si dhe për klimën e panikut, për sa i përket situatës financiare e fiskale në vend.

“Konceptimi i qeverisjes, si një fushatë kundër ligjit dhe kushtetutës, kundër institucioneve të pavarura, kundër konsensusit dhe kundër të vërtetave ka në themel jo vetëm mungesën e vizionit dhe programit të kësaj mazhorance por dhe përpjekjen për të instaluar me shpejtësi në Shqipëri, praktikën e mungesës së transparencës dhe llogaridhënies, si pararojë e instalimit të kleptokracisë” – theksoi z. Basha, gjatë takimit me drejtorin politik të Ministrisë së Jashtme të Austrisë.

Kryetari i Partisë Demokratike, z. Lulzim Basha, priti në një takim përfaqësuesit e Bankës Botërore, Drejtorin Ekzekutiv z. Piero Cipollone dhe Drejtoreshën për Rajonin e Europës Juglindore znj. Ellen Goldstein, me të cilët pati një bashkëbisedim dhe shkëmbim idesh lidhur me bashkëpunimin e suksesshëm shumëvjeçar mes Bankës Botërore dhe Shqipërisë, arritjet e Shqipërisë veçanërisht nën qeverisjen e demokratëve, si edhe me pikëpyetjet që po shoqërojnë zhvillimet ekonomike dhe fiskale në këto muaj të parë të qeverisjes socialiste. 

Ai bëri një ekspoze të situatës makroekonomike dhe makrofiskale si dhe të zhvillimeve më të fundit që kanë pasuar rotacionin politik në Shqipëri. Ai i shprehu bashkëbiseduesve shqetësimet e lindura përgjatë një muaji të qeverisjes së re socialiste, që kishin të bënin me fusha të tilla si: ligji i nëpunësit civil, Akti Normativ për ndryshimet në ligjin e buxhetit, anulimet e koncesioneve të ligjshme në menyrë të njëanshme nga Qeveria socialiste, prognozat aspak optimiste lidhur me zhvillimet ekonomike në vend si dhe pasigurinë që po zë gjithmonë e më shumë vend në planet e konsumatorëve dhe biznesplanet e investitorëve.

Z. Basha, në veçanti u ndal në zhvillimet në fushën e administrimit fiskal, fushë e cila është bërë arenë e emërimeve politike dhe aspak meritokratike, emërime të cilat po kushtëzojnë borxhimin e mëtejshëm të vendit në nivele të panjohura më parë. Z. Basha informoi bashkëbiseduesit lidhur me detaje të Aktit Normativ për ndryshimet në buxhet si dhe me shkeljet e dukshme ligjore që e bashkëshoqërojnë këtë akt, i cili sanksionon marrjen e huave të reja, jo më për investime publike siç e kërkon ligji, por tashmë edhe për shpenzime administrative dhe operacionale.

Kreu i opozitës, gjithashtu u kërkoi bashkëbiseduesve që të vazhdojnë të jenë pranë Shqipërisë, si deri më sot, me programe dhe projekte zhvillimi dhe në të njëjtën kohë paraqiti idetë e tij lidhur me prezantimin e kushteve monitoruese, strikte ndaj Qeverisë shqiptare për të qenë në gjendje që të përfitojë nga kreditë dhe programet e tjera të mbështetjes buxhetore nga Banka Botërore.

Basha: “Akti Normativ është përgatitja e krizës “Rama”, recensioni i atij që erdhi me premtimin e rilindjes dhe rrezikon të sjellë rrëzimin”

Kryetari i PD, Lulzim Basha e ka konsideruar aktin normativ të qeverisë për ndryshimin e buxhetit si të paligjshëm dhe rrezik për stabilitetin financiar të vendit. Në mbledhjen e grupit parlamentar të PD, zoti Basha deklaroi se është hera e parë që një qeveri heq dorë në këtë shkallë, pa asnjë arsye të përligjur, nga mbledhja e taksave dhe tatimeve. Për çdo muaj, theksoi zoti Basha parashikojnë të mbledhin 80 milionë dollarë më pak se plani.

“Është  hera e parë që një qeveri heq dorë në këtë shkallë, pa asnjë arsye të përligjur, nga mbledhja e taksave dhe tatimeve. Është hera e parë që shohim se si një qeveri, e sheh dështimin, si shpëtim nga premtimet që nuk mund t’i mbajë, apo si përfitim për klientelën e saj. Kjo do të jetë një fatkeqësi e madhe dhe e paparashikueshme, për vendin dhe çdo shqiptar. Rishikimi i buxhetit 2013, kështu siç ka ardhur, është ëndrra më e keqe, makthi më i madh që kjo qeveri u ofron shqiptarëve; është një minë me sahat kundër stabilitetit financiar dhe me gjerë, është rruga e rrokullisjes drejt recensionit për herë të parë, të ekonomisë shqiptare, që u rezistoi gjithë këto vite dallgëve të krizës globale, është formula dhe përgatitja e krizës “Rama”, recensioni i atij që erdhi me premtimin e Rilindjes dhe rrezikon të sjellë rrëzimin”  deklaroi kryetari i PD Lulzim Basha.

Zoti Basha tha se akti normativ është i paligjshëm duke argumentuar se në bazë të ligjit qeveria mund të marrë borxh vetëm për investime.

“Paligjshmëria po bëhet çdo ditë simotër e mazhorancës Rama-Meta. Parimi i sundimit të ligjit, si parim bazë i funksionimit të demokracisë po zëvendësohet me sundimin e Ramës, si praktikë e shkatërrimit të demokracisë. Po e demonstrojnë hapur se nuk qeverisin dot me ligj, se vizioni që shfaqin është në papajtueshmëri organike me shtetin ligjor, gjë që e tregojnë edhe në fjalorin që përdorin, kur thonë  me mburrje, si qëmoti, se janë këtu për të udhëhequr.

Jo zotërinj, nuk jeni për të udhëhequr, por për të qeverisur si shërbëtorë të bindur e të përkushtuar të ligjit, përndryshe, duhet ta dini se jeni jashtë sistemit demokratik, me të gjithë pasojat!” u shpreh zoti Basha.

Kryetari i PD Lulzim Basha, tha se pavarësisht tentativave për të nxirë performancën ekonomike të vendit që trashëgoi nga qeverisja demokratike të dhënat e institucioneve ndërkombëtare janë të pakontestueshme për stabilitetin makro-ekonomik.

“Ekonomia shqiptare, – citohet në progres-raport – ka vazhduar të ruajë qëndrueshmërinë makroekonomike. Shqipëria ka bërë progres të mëtejshëm, drejt shndërrimit në një ekonomi tregu funksionuese. Në vijim të rritjes me 1.6% në vitin 2012, ekonomia shqiptare pritet të shkojë rreth 2% në këtë viti dhe të përmirësohet lehtësisht edhe në 2014” – vë  në dukje FMN.  Rritja e eksporteve mbetet e fuqishme favorizuar nga përmirësimet strukturore në ekonomi dhe një kurs i favorshëm këmbimi. Papunësia mbetet e stabilizuar në 12.8% dhe indeksi i inflacionit në 2.1%. Qytetarët kanë të drejtë të pyesin: Pse keni ardhur në pushtet zotërinj, kur jo vetëm nuk e bëni dot më mirë, por planifikoni për ta bërë shumë më keq? “theksoi kryetari i PD Lulzim Basha.

Zoti Basha u ka kërkuar ligjvënësve të  djathte që në seancën plenare të së enjtes t’u dëshmojnë qytetareve rrezikun që i kanoset mirëqenies së tyre nga Akti Normativ antiligjor i qeverisë.

Fjala e kryetarit te PD Lulzim Basha në mbledhjen e grupit parlamentare:

Të nderuar deputetë,

Të enjten në seancë plenare, ballafaqohemi me rishikimin e buxhetit të shtetit, si aktin e parë real që mazhoranca Rama-Meta ndërmerr në fushën e ekonomisë, në kuadrin e strategjisë së shpallur të saj, për të paraqitur vendin në një krizë të thellë dhe financat e vendit jashtë kontrollit.

Duke pasur parasysh fjalët e bukura dhe premtimet e mëdha të kryeministrit Rama si dhe duke u nisur nga përvoja e njohur se çdo ndryshim qeverie, madje çdo ndryshim në nivelin drejtues të doganave dhe tatimeve, sjell impulse të reja pozitive në performancën e ekonomisë dhe financave, bashkëqytetarët tanë mund të kenë pritur me të drejtë një ndryshim pozitiv në buxhet, që do mbështetej në rritjen e të ardhurave të mbledhura nga qeveria e re. Kujtojmë këtu se, 120 milionë dollarë më shumë mblodhëm ne, në 3 muajt e fundit të 2005, apo tre muajt e parë të tranzicionit, 120 milionë dollarë më shumë se plani i tyre.

Në pamundësi, shqiptarët kanë pritur e presin që kjo qeveri e fjalëve të mëdha, të ruante në vija të përgjithshme trendin e trashëguar nga qeveria jonë, gjatë tetë muajve të parë të këtij viti, si më  e pakta, por jam i bindur se askush nuk ka pritur një ndryshim të buxhetit, si ky që kanë sjellë me një akt tjetër normativ, që mbështetet jo në rritjen, as mbajtjen në të njëjtin nivel por rënien më drastike, pa asnjë logjikë ekonomike,  të të ardhurave të mbledhura dhe thellimit me dorë të rëndë, madje me kazmë, të borxhit publik.

U çorrën kur ishin në opozitë kundër borxhit publik, edhe pse ne e menaxhuam me profesionalizëm të lartë, në funksion të stabilitetit makro-fiskal dhe makro-ekonomik, pa rrezikuar asnjëherë daljen e tij jashtë kontrollit.  Dhanë  alarme të rreme prej amatorësh e spekulantësh, e paraqiten borxhin si gogol, mbollën iluzione, më saktë gënjeshtra që do të plasë me sot a me nesër dhe thanë se më të ardhur ata në pushtet, këtij borxhi, këtij “gogoli” do t’i vinin fre. Dhe çfarë po bëjnë tani, që  kanë ardhur në pushtet!? Po e trefishojnë. Po marrin hua, jo aq sa mund të marrin me planin, pa rritur kufirin e borxhit publik të miratuar, afro 15 miliardë lekë, apo 150 milionë dollarë, por tre herë më shumë, afro 40 miliardë lekë apo 400 milionë dollarë. Në  tetë muaj, qeveria demokratike mori 35,7 miliardë lekë, sipas planit, 40 miliardë duan të marrin këta në tre muaj.

U çorrën kur ishin në opozitë kundër korrupsionit, evazionit dhe keq menaxhimit të  financave. Premtuan edhe këtu botën e tyre të re. Dhe çfarë po bëjnë, tani që kanë ardhur në pushtet!? Duan të ligjërojnë me akt normativ një katastrofë, një krim financiar në mos mbledhjen e të ardhurave. Për çdo muaj, parashikojnë të mbledhin 80 milionë dollarë më pak se plani. 15 milionë më pak se plani mblodhi qeveria e kaluar, në tetë muajt e parë të vitit, 4 herë më pak, qeveria e tyre, për pjesën e mbetur të vitit. Kësaj i thonë “të të zërë mallkimi” i gënjeshtrave dhe mashtrimeve që i ke bërë popullit tënd, për t’i marrë votën.

Ne parashikuam dhe u thamë shqiptarëve se do t’i braktisnin një nga një premtimet e tyre populiste dhe demagogjike. Parashikuam se në përballjen e tyre me ekonominë  reale dhe qeverisjen reale do të  ndaheshin nga “tra la–la”-të, do të uleshin me këmbë në tokë. Kishim menduar e shpresuar se do të vinin mend, por
nuk kishim parashikuar se do t’u iknin në drejtimin e kundërt, se do të kërkonin ta bënin keq e me keq me dorën e tyre,  me dashjen e tyre; se do të kërkonin t’i vinin zjarrin, për të zhdukur çdo gjurmë të gënjeshtrave elektorale, pse jo të korrupsionit dhe abuzimeve që pritet të pasojnë  këto ndryshime në buxhet.

Është  hera e parë që një qeveri heq dorë në këtë shkallë, pa asnjë arsye të përligjur, nga mbledhja e taksave dhe tatimeve. Është hera e parë që mosrealizimeve të një qeverie në ikje, të përligjura dhe jo aq të mëdha sa të krijojnë tronditje në ecurinë e përgjithshme të ekonomisë, qeveria e re t’u përgjigjet me një gropë gjigande për njësi kohe në financat e shtetit, si kjo që planifikojnë me aktin normativ që kanë sjellë. Është hera e parë që një  qeveri planifikon një dështim të këtij lloji dhe të këtyre përmasave, me gjak të ftohtë. Është hera e parë që shohim se si një qeveri, e sheh dështimin, si shpëtim nga premtimet që nuk mund t’i mbajë, apo si përfitim për klientelën e saj. Kjo do të jetë një fatkeqësi e madhe dhe e paparashikueshme, për vendin dhe çdo shqiptar.

Rishikimi i buxhetit 2013, kështu siç ka ardhur, është ëndrra më e keqe, makthi më i madh që kjo qeveri u ofron shqiptarëve; është një minë me sahat kundër stabilitetit financiar dhe me gjerë, është rruga e rrokullisjes drejt recensionit për herë të parë, të ekonomisë shqiptare, që u rezistoi gjithë këto vite dallgëve të krizës globale, është formula dhe përgatitja e krizës “Rama”, recensioni i atij që erdhi me premtimin e Rilindjes dhe rrezikon të sjellë rrëzimin. 

Partia Demokratike dhe mbarë opozita do të përballen në komisione dhe në aulën e Kuvendit më këtë akt aventuresk të qeverisë, duke i rezervuar:    
– Ekspertizën më profesionale. Ky ndryshim nuk ishte i domosdoshëm. Faktet janë në tapet. Deputetët tanë i kanë demonstruar një për një dhe do të vijojnë t’i demonstrojnë në ditët në vijim. 
– Kritikën më të thellë, këtij akti që pritet të përkeqësojë treguesit e zhvillimit ekonomik të vendit dhe të cenojë rëndë mirëqenien e çdo shqiptari.
– denoncimin më të argumentuar. Ky ndryshim buxheti është i paligjshëm. Qeveria mund të marrë hua për të financuar investimet publike, por në asnjë rast për të mbuluar rroga apo shpenzime operative. Ligji është  i qartë. Qeveria i ka numrat për të ndryshuar këtë ligj, por duket qartë se i shijon më shumë ta sfidojë ligjin.

Paligjshmëria po bëhet çdo ditë simotër e mazhorancës Rama-Meta. Parimi i sundimit të ligjit, si parim bazë i funksionimit të demokracisë po zëvendësohet me sundimin e Ramës, si praktikë e shkatërrimit të demokracisë. Po e demonstrojnë hapur se nuk qeverisin dot me ligj, se vizioni që shfaqin është në papajtueshmëri organike me shtetin ligjor, gjë që e tregojnë edhe në fjalorin që përdorin, kur thonë  me mburrje, si qëmoti, se janë këtu për të udhëhequr.

Jo zotërinj, nuk jeni për të udhëhequr, por për të qeverisur si shërbëtorë të bindur e të përkushtuar të ligjit, përndryshe, duhet ta dini se jeni jashtë sistemit demokratik, me të gjithë pasojat!

Zonja deputete, zotërinj deputetë,
Shpresa e vetme e Ramës për t’i hedhur hi syve të publikut, qytetarëve shqiptarë, me aktin e tij të dytë famëkeq është  spekulimi pa cak dhe paraqitja me ngjyra sa më të errëta e gjendjes ekonomike që trashëgoi nga qeverisja jonë. Është rasti t’i kujtojmë pa u lodhur, çfarë shkruhet në progres-raportin e Bashkimit Europian për ekonominë shqiptare, një javë më parë dhe çfarë vlerësimesh e prognozash pozitive kanë bërë FMN dhe Banka Botërore, për performancën e ekonomisë shqiptare.

“Ekonomia shqiptare, – citohet në progres-raport – ka vazhduar të ruajë qëndrueshmërinë makroekonomike. Shqipëria ka bërë progres të mëtejshëm, drejt shndërrimit në një ekonomi tregu funksionuese. Në vijim të rritjes me 1.6% në vitin 2012, ekonomia shqiptare pritet të shkojë rreth 2% në këtë viti dhe të përmirësohet lehtësisht edhe në 2014” – vë  në dukje FMN. 

“Rritja e eksporteve mbetet e fuqishme favorizuar nga përmirësimet strukturore në ekonomi dhe një kurs i favorshëm këmbimi. Papunësia mbetet e stabilizuar në 12.8% dhe indeksi i inflacionit në 2.1%. Deficiti i llogarisë korrente ka ardhur në rënie në tre vitet e fundit. Bilanci i pagesave është me suficit, gjatë vitit 2013, favorizuar nga fluksi i investimeve të huaja direkte” . Këto janë citime të drejtpërdrejta, nga raporti i sipërpërmendur.

Të gjitha këto e të tjera, që deputetë tanë i kanë nënvizuar dhe do të duhet të vazhdojnë t’i nënvizojnë në diskutimet e tyre, janë  shkruar e zezë mbi të bardhë dhe janë referimi më bindës dhe profesional për tablonë e ekonomisë kombëtare. Ky është  realiteti. 

U kam kërkuar disa herë nga kjo seli zotërinjve të qeverisë, të maten me arritjet që shënuam ne. Le ti çojnë ato përpara! Le t’i mbajnë të paktën në nivelin ku i lamë ne! Le të mos na arrijnë,  duke pranuar me sinqeritet vështirësitë dhe paaftësinë  e tyre! Vetëm një gjë nuk e kemi pranuar dhe nuk do ta pranojmë, në asnjë mënyrë: Që ata të prodhojnë “vitin zero” që e kanë në mendje edhe në ekonomi, pra në tavolinat dhe xhepat e çdo shqiptari, për të justifikuar jo vetëm paaftësinë dhe amatorizmin e tyre, por edhe korrupsionin dhe abuzimet me pushtetin,  vizonin e tyre steril propagandistik për qeverisjen e vendin.

Sot i akuzojmë për paligjshmëri. Akti Normativ i ndryshimit të buxhetit është i paligjshëm. 
I akuzojmë për papërgjegjshmëri. Nuk është parë ndonjë herë një qeveri që të pretendojë  ta luftojë krizën, duke e thelluar atë. Nuk është parë  ndonjë qeveri që  të dekurajojë dhe shthurë në këtë shkallë mbledhjen e taksave dhe tatimeve.

Parti Demokratike, opozita, media e lirë dhe e pavarur, shoqëria civile, mbarë publiku shqiptar janë e duhet të jenë  në këmbë,  më të  vëmendshëm se kurrë, për të parë se ku do të përfundojë  kjo shumë  e stërmadhe parash që i hiqet me akt normativ, arkës sonë të përbashkët, buxhetit të shtetit me justifikimin se nuk mund të mblidhet.

Qytetarët kanë të drejtë të pyesin: Pse keni ardhur në pushtet zotërinj, kur jo vetëm nuk e bëni dot më mirë, por planifikoni për ta bërë  shumë më keq? Jemi të bindur se përballë këtij skandali, qytetarët me mendje të kthjellët i kanë sytë  nga opozita e tyre. Ne duhet të  jemi në  lartësinë e misionit tonë për t’i thënë:

Ndal, shkeljes së përsëritur të ligjit!
Ndal, rritjes marramendëse dhe te pakontrolluar të borxhit!
Ndal, uljes arbitrare të të ardhurave dhe zhvatjes së tyre, për xhepat e funksionarëve! 
Për t’i thënë këto me zërin e opozitës dhe për të vepruar me të gjitha mekanizmat politike dhe ligjore që kemi në dispozicion, që ky akt i mënxyeshëm të kthehet mbrapa.

Deklarata për media e deputetit të Partisë Demokratike Alban Zeneli:

Në prill të vitit 2003, Enrik Sulejmani u arrestua me akuzën e trafikimit të qënieve njerëzore. Të gjithë mediat kombëtare, por dhe ato ndërkombëtare, për javë të tëra, i treguan qytetarëve se si Rinasi, aeorporti i vetëm ndërkombëtar në vend, ishte kthyer në portën e trafikut të qenieve njerëzore.

Kryepolici i Rinasit, rojtari që qytetarët i kishin besuar portën, e përdori atë për trafik ndërkombëtar të qenieve njerëzore, duke i vënë një njollë të madhe policisë shqiptare në të gjitha mediat ndërkombëtare dhe duke e futur Shqipërinë në listat e zeza të trafikut. 

Por, pak ditë më parë, Enrik Sulejmani rilindi, u gradua, u emërua Drejtor i Pergjithshëm i Policisë së Burgjeve. Njeriu që u shkarkua nga një ish-ministër socialist sot me LSI-në si trafikant dhe njollë turpi i policisë së shtetit para 10 vitesh, u rilind pak ditë më parë duke u emëruar në krye të rreth 3000 policëve të burgjeve, dhe u ngarkua të ruaje të gjitha bandat e trafikut ndërkombëtar.

Ai që porten që lidhte Shqipërinë me boten, e shndërroi në portën e trafikut ndërkombëtar, sot pas 10 vitesh po i besojnë çelësat e qelive të trafikantëve.

Por, kjo nuk është pengesë për mazhorancën Rama – Meta. Pa asnjë kriter, pa asnjë konkurs, në mungesë të plotë të transparencës me publikun, në kundërshtim të hapur me ligjin, ata emëruan në pozicionin më të lartë të policisë së burgjeve, kryegardianin, një krye të akuzuar për trafik ndërkombëtar, duke kërcënuar sigurinë publike në vend.

Këto janë standartet e kësaj qeverie.

Edhe vende me despotizëm dhe mungesë të theksuar të ligjit, edhe vende si ato ku na ka futur në listë kryeministri i vendit, nuk ndodhin arbitraritete kaq të mëdha me emërimin e njerëzve në postet me te rëndësishme që kanë të bëjnë me sigurinë publike të qytetarëve.

Sulejmani është në serinë e shkeljeve të ligjit me emërimet që janë bërë në Policinë e Shtetit. Shkelësit serialë të ligjit në këtë rast kanë shkuar shumë larg. 

Të emërosh të akuzuarin për një nga krimet më të rënda në këtë vend, për një krim që Shqipëria është renditur në listat më të zeza ndërkombëtare, për një fenomen që e kanë vuajtur shqiptarët, është një tallje e madhe me qytetarët e vendit, një tallje e madhe me të gjitha përpjekjet që janë bërë deri më sot për të arritur disa standarde në polici, në burgje e kudo.

Me këtë emërim, kjo qeveri ka rënë moralisht, ende pa mbushur të 40-at.

Në Aktin Normativ Nr. 6, datë 4.10.2013 “Për disa ndryshime dhe shtesa në ligjin nr. 119/2012 “Për buxhetin e vitit 2013”, Qeveria Rama ka miratuar nivelin e huamarrjes së re vjetore në shumën 240 milionë dollarë, ku mbi 90 milionë dollarë shkojnë për shpenzime operative.

Në nenin 57 të ligjit Nr.9936, datë 26.6.2008 “Për Menaxhimin e Sistemit Buxhetor në Republikën e Shqipërisë” përcaktohet se: “Këshilli i Ministrave është i vetmi autoritet në nivel qendror që ka të drejtën e marrjes së huave për financimin e projekteve të investimeve nga institucionet ndërkombëtare, shtetet ose personat juridikë, në përputhje me dispozitat Kushtetuese dhe me ligjet në fuqi. Ai është i vetmi autoritet që jep garanci shtetërore të huasë.”

Siç mund të shihet, Akti-Normativ i cituar më sipër është në kundërshtim të plote me ligjin organik, i cili rregullon procesin e buxhetimit dhe menaxhimin financiar të vendit, dhe krijon një precedent të rrezikshëm për prishjen e stabilitetit ekonomik dhe financiar të vendit duke marrë borxhe për të paguar pagat e nëpunësve apo kryer shpenzime të tjera për administratën publike.

Gjatë 8 viteve te qeverisjes së Partisë Demokratike borxhi jo vetëm nuk është përdorur për shpenzime rutinore operative, por nga 5.4 miliardë dollarë investime, 4 miliardë janë mbuluar me borxh dhe pjesa tjetër nga të ardhurat.

Për këtë arsye, jam sot këtu si Kryetar i Grupit Parlamentar të Partisë Demokratike që t’i kërkojmë Kryetarit të Parlamentit që në bazë të kompetencave që ka, ta kthejë këtë Akt Normativ në qeveri dhe të mos e paraqesë për miratim në seancën plenare të Kuvendit të Shqipërisë. Siç e theksova edhe më sipër ky është një akt i paligjshëm sepse Qeveria e ka mundësinë e marrjes së huave vetëm për investime dhe projekteve të investimeve dhe jo për shpenzime të administratës, siç ka parashikuar me këtë Akt Normativ, ku 90 milionë dollarë parashikohen të përdoren për shpenzimet e administratës.  Ky Akt Normativ është antiligjor dhe i kërkojmë Kryetarit të Parlamentit t’ia kthejë qeverisë për ta hartuar në përputhje me ligjin.