Blog

Dje, Ministri i Brendshëm, njoftoi pezullimin e gjithë sektorit të luftës kundër krimit ekonomik, ne gjithë vertikalen e vet në shkallë Republike, me arsyen e paarsyeshme të gjoja dekonspirimit të një aksioni policor nga një apo dy individë të veçantë.

Do te ishte naive të mendohej se kjo po bëhet vetëm në shenjë hakmarrje ndaj kësaj strukture policore sepse ishte kjo që hetoi evazionin fiskal të kompanisë farmaceutike të familjes Tahiri.

Ky akt është shumë më i rendë dhe me shumë më tepër pasoja negative se ç’mund të mendohet.

Së pari ky akt pason vazhdën e veprimeve brutale dhe arbitrare, në shkelje flagrante të ligjit, të marra nga Kryeministri Rama dhe ministri Tahiri, të cilët shkrinë brenda natës gjithë trupën drejtuese të policisë së Shtetit për ta zëvendësuar atë me njerëz që nuk kanë as arsimin përkatës, as gradën përkatëse dhe as përvojën e kërkuar nga ligji.

Për më tepër, ky akt godet një strukture policore, pjesë e departamentit të luftës kundër krimit të organizuar, të konsultuar, trajnuar dhe mbështetur nga ICITAP dhe PAMEGA dhe të shquar për rezultatet pozitive të vlerësuar në të gjitha progres-raportet ndërkombëtare, përfshirë edhe këtë të fundit ku puna e këtij departamenti vlerësohet veçanërisht në kapitullin 24 të Progres-raportit të Bashkimit Europian për Shqipërinë.

Së dyti, kjo goditje e pashembullt i jep një kohë lirie të plotë veprimeve të të gjithë strukturave kriminale objekt i punës dhe i hetimit të këtij sektori policor.

Së treti, ky akt tërësisht antiligjor demotivon çdo strukturë tjetër të Policisë së Shtetit, në punën e tyre të përditshme në luftë me krimin, sepse ato tashmë perceptojnë qartë, në vijimësi, faktin që ligji nuk i mbron, struktura nuk i mbron, mekanizmat e karrierës nuk i mbrojnë dhe aq me pak mund t’i mbrojnë rezultatet në pune.

E gjithë Policia e Shtetit është tashmë nën gijotinën e vendosmërisë së Kryeministrit Rama dhe ministrit Tahiri për të dalë mbi ligjin.

Mjafton t’ju kujtojmë këtu përcaktimin e nenit 7 të ligjit “Për Policinë e Shtetit” i cili përcakton se “Në përgjegjësitë e ministrit nuk përfshihet drejtimi operacional i Policisë”

Është i qartë tashmë qëllimi ogurzi i këtyre njerëzve për të hequr nga radhët e policisë të gjithë profesionistët e përkushtuar dhe për t’i zëvendësuar ata me çetën apo bandën e interesave dhe militantëve të Partisë Socialiste.

Basha: “Qytetarët në këmbë për liritë dhe ligjin!

Basha: “Rama spekulon, Komisioni Europian nuk është avokat i aktit antikushtetues që shkelmoi konsensusin”

Kryetari i PD, Lulzim Basha, në mbledhjen e grupit parlamentar të Partisë Demokratike deklaroi se Edi Rama gënjeu dje, kur i atribuoi Komisionit Europian, avokatin e një akti antikushtetues që ka shkelmuar konsensusin, të cilin Komisioni e ka çmuar më shumë se referendumin.

“Por paturpësia që ka shoqëruar trajektoren e aktit normativ, shënoi një kulm të paimagjinueshëm dje, kur kryeministri i vendit, për të kompleksuar e mashtruar deputetët e tij, që këta të votojnë symbyllur sot si turmë pa tru, deklaroi se progres –raporti i Komisionit Europian mbështet aktin e tij normativ! Kjo është një  gënjeshtër 24 karatëshe, që vetëm zoti Rama merr guximin ta thotë. Guximi i tij për të spekuluar në këtë shkallë, me një dokument serioz të Komisionit Europian dhe për t’i atribuar këtij Komisioni avokatinë e një akti antikushtetues, që ka shkelmuar konsensusin që vetë  ky Komision e ka çmuar me shumë se referendumin, tregon se sa i madh është oreksi i z. Rama për të  shkallmuar administratën publike, për interesat e tij të  ngushta klienteliste” – deklaroi Basha.

Zoti Basha ka theksuar se Partia Demokratike do ta vazhdojë betejën e saj në Gjykatën Kushtetuese dhe me çdo formë e mjet demokratik, për të ndaluar aktin normativ dhe çdo akt tjetër të paligjshëm të kësaj qeverie.

“Sot, Edi Rama me Ilir Metën nuk po ndryshojnë  thjesht një ligj të votuar me konsensus, por po përcaktojnë  vijën e sjelljes me opozitën, me publikun, me ligjin: arrogancë, arbitraritet, përplasje, paligjshmëri. Sot, ata po sfidojnë në mënyrën më të papërgjegjshme gjithë kulturën politike moderne e bashkëkohore, që na thotë se konsensusi nuk është një çështje numrash, por një çështje e vullnetit politik për të punuar së bashku për vendin. Partia Demokratike do ta vazhdojë betejën e saj në Gjykatën Kushtetuese dhe me çdo formë e mjet demokratik, për të ndaluar aktin normativ dhe çdo akt tjetër të paligjshëm të kësaj qeverie. Ne presim që Gjykata Kushtetuese të bëjë drejtësi. Ne kemi lëshuar dje apelin: “Në këmbë për liritë dhe ligjin!”, për të zgjedhurit tanë vendorë, apel të cilin sot bashkë me demokratët dhe opozitarët në tërësi, do t’ia drejtojmë publikut mbarë” – deklaroi kreu i PD, Lulzim Basha.

Fjala e Kryetarit të PD Lulzim Basha në mbledhjen e Grupit Parlamentar:

Dje, Komisioni Europian rekomandoi marrjen e statusit të vendit kandidat për Shqipërinë. Sot, shumica e pacilësuar, Rama-Meta ka vendosur të votojë aktin normativ famëkeq për nëpunës civil, duke vulosur ekzekutimin për herë të parë gjatë 22 viteve demokraci dhe pluralizëm të konsensusit midis mazhorancës dhe opozitës, të konsensusit që bëri të mundur pikërisht heqjen e pengesave të fundit, ndonëse me vonesë për marrjen e statusit.

Dje, ishte një ditë feste për të gjithë shqiptarët. Sot, shumica e pacilësuar po regjistron një ditë të zezë për parlamentarizmin dhe jetën politike shqiptare. Progres raporti i Komisionit Europian që u publikua dje theksonte si fjalë kyçe për Shqipërinë, gjithpërfshirjen. Sot, shumica e pacilësuar po përgjigjet flakë për flakë me arrogancë, me arbitraritet të skajshëm, me peshkim mandatesh, për të siguruar numrat e ekzekutimit të konsensusit dhe mprehjes se hanxharëve kundër administratës publike. E gjithë kjo ngjan të jetë hakmarrja e bllokuesve të statusit, ndaj zhbllokimit të tij.

Siç filloi tinëzisht dhe siç po votohet sot paturpësisht, akti normativ është nga ato ngjarjet   ku sintetizohen dhe kondensohen tiparet e kundërshtarit tonë politik që sot ka në duar fatet e qeverisjes së vendit. Një moment shumë i shëmtuar ishte e ashtuquajtura ftesë për dialog dhe konsensus, që na drejtoi kryeministri Rama dhe pas tij edhe kryetari i Kuvendit Meta.

Me një megalomani të pashoqe, na ftuan të ulemi, por të mos diskutojmë, sepse akti normativ nuk diskutohet, na ftuan të japim konsensusin për prishjen e njëanshme të konsensusit nga ana e tyre, na ftuan të pudrosim me farsën e dialogut për muhabet faktin e kryer. Dhe kur u përballën me argumentet tonë të shumtë juridikë dhe politikë dhe me kërkesën tonë të prerë për tërheqjen e kushtit të tyre, aktit normativ, si rruga e vetme e arsyeshme për të filluar dialogun dhe gjetjen e zgjidhjeve, ata e hoqën fare maskën e hipokrizisë.

Por paturpësia që ka shoqëruar trajektoren e aktit normativ, shënoi një kulm të paimagjinueshëm dje, kur kryeministri i vendit, për të kompleksuar e mashtruar deputetët e tij, që këta të votojnë symbyllur sot si turmë pa tru, deklaroi se progres –raporti i Komisionit Europian mbështet aktin e tij normativ! 
Kjo është një  gënjeshtër 24 karatëshe, që vetëm zoti Rama merr guximin ta thotë. Guximi i tij për të spekuluar në këtë shkallë, me një dokument serioz të Komisionit Europian dhe për t’i atribuar këtij Komisioni avokatinë e një akti antikushtetues, që ka shkelmuar konsensusin që vetë  ky Komision e ka çmuar me shumë se referendumin, tregon se sa i madh është oreksi i z. Rama për të  shkallmuar administratën publike, për interesat e tij të  ngushta klienteliste.

Ai e ka fyer rëndë administratën, thjesht duke e kërcënuar nëpërmjet lënies zbuluar pa mbrojtje ligjore, në mëshirë të  revanshit të skuadrës së tij politike. 
Kjo është administrata që përmbushi detyrat anëtarësimit të vendit në NATO. Është administrata që implementoi kërkesat e paketës për liberalizmin e vizave dhe lëvizjen e lirë të shqiptarëve në zonën Shengen. Është administrata e reformave të mëdha, që çuan në rekomandimin për statusin e vendit kandidat.

Këtë administratë, të cilën e konsiderojmë pasuri kombëtare, mbrojmë ne me qëndrimin tonë të vendosur dhe aspak zyrtarët politikë apo nëpunësit e veçantë që provohet se abuzojnë me detyrën. Mbrojmë këtë administratë, mbrojmë ligjin, mbrojmë Kushtetutën, mbrojmë konsensusin, si vlerë e vlerave, mbrojmë  nevojën për paqe, bashkëjetesë dhe bashkëpunim politik me mendje të hapur, që kaq shumë i duhen vendit.

Sot, Edi Rama me Ilir Metën nuk po ndryshojnë  thjesht një ligj të votuar me konsensus, por po përcaktojnë  vijën e sjelljes me opozitën, me publikun, me ligjin: arrogancë, arbitraritet, përplasje, paligjshmëri. Sot, ata po sfidojnë në mënyrën më të papërgjegjshme gjithë kulturën politike moderne e bashkëkohore, që na thotë se konsensusi nuk është një çështje numrash, por një çështje e vullnetit politik për të punuar së bashku për vendin.

Duke iu drejtuar qytetarëve, siç kemi bërë gjithë këtë periudhë, dua të përsëris me forcë se ligji po shtyhet dhe konsensusi po vritet, jo sepse ky ligj është i pazbatueshëm, por ngaqë ky ligj e bën të pazbatueshme reprezaljen dhe “vitin zero” që Edi Rama ka në mendje për administratën publike dhe gjithë piramidën shtetërore.

Kjo nuk është më një ide, por një projekt
që ka nisur të zbatohet që ditën e parë të instalimit të kësaj qeverie në pushtet, me shkarkime kolektive të paligjshme, si në një situatë pushtimi,  ku spikat shkarkimi në një ditë i gjithë  drejtuesve të policisë së shtetit, por votimi i sotëm nuk e bën kurrsesi të ligjshëm dhe kushtetues aktin normativ.

Partia Demokratike do ta vazhdojë betejën e saj në Gjykatën Kushtetuese dhe me çdo formë e mjet demokratik, për të ndaluar aktin normativ dhe çdo akt tjetër të paligjshëm të kësaj qeverie. Ne presim që Gjykata Kushtetuese të bëjë drejtësi. Ne kemi lëshuar dje apelin “Në këmbë për liritë dhe ligjin!” për të zgjedhurit tanë vendorë, apel të cilin sot bashkë me demokratët dhe opozitarët në tërësi, do t’ia drejtojmë publikut mbarë.

Kryetari i Partisë Demokratike z.Lulzim Basha priti në takim Ambasadorin e Bashkimit Europian në Shqipëri z.Ettore Sequi i cili i dorëzoi zyrtarisht Progres-raportin të Komisionit Europian për Shqipërinë për vitin 2013.

Pas takimit Ambasadori i Bashkimit Europian në Shqipëri z.Ettore Sequi, dha këtë prononcim për mediat:

“Faleminderit shumë. Unë mendoj që kjo është një arritje shumë e rëndësishme. Dëshiroj që për kët të njohim dhe ti japim merita të gjitha forcave politike. Dhe të njohim kontributin që ka dhënë qeveria e mëparshme, pra opozita e sotme për arritjen e këtij rezultati.

Ne besojmë se integrimi evropian është një proces kombëtar dhe kërkon pjesëmarrjen e të gjithëve, kërkohen fjalët kyçe që ne përdorim, gjithëpërfshirje, bashkëpunim dhe dialog.

Dëshiroj shumë që të shfrytëzoj këtë rast për të falënderuar në mënyrë të veçantë ish-Ministren e Integrimit Europian dhe sot kryetaren e Komisionit Parlamentar për Çështjet e Integrimit Europian. Të nderuarën znj. Majlinda Bregu me të cilën ne kemi pasur mundësi dhe shansin që të bashkëpunojmë në të kaluarën për të arritur pikërisht në këtë rezultat që ne shohim sot.

Jam shumë i sigurt që ne do të vazhdojmë të bashkëpunojmë edhe për të arritur rezultate më të mëdha në të ardhmen.

Ky është urimi im dhe është ajo që unë mendoj”.

Me pas Kryetari i PD-së Lulzim Basha në një deklaratë për mediat theksoi:

Partia Demokratike vlerëson Progres-raportin e Bashkimit Europian si një fotografim realist të përparimit të Shqipërisë dhe ecurisë së reformave të arritura në qeverisjen e Partisë Demokratike.

Progres-raporti konstaton se gjatë 12 muajve të fundit Shqipëria ka bërë përparim thelbësor, të qenësishëm në reforma që prekin të gjitha fushat; nga gjyqësori, përmirësimi i luftës kundër krimit të organizuar dhe korrupsionit, deri tek prokurimet publike dhe doganat.

Progres Raporti konstaton se Shqipëria përkundër krizës ekonomike globale arriti të ruajë stabilitetin makroekonomik dhe rritjen pozitive ekonomike, duke shënuar edhe uljen e papunësisë, në kontrast me situatën diametralisht të kundërt tek vendet partnere kryesore ekonomike.

Progres-raporti përgënjeshtron kësisoj me fakte nihilizmin e kryeministrit, i cili investon përditë energjitë dhe kohën e tij e të bashkëpunëtorëve të tij për një fushatë nxirëse dhe mohuese, në vend që të qeverisë.

Në mënyrë të veçantë përshëndes rekomandimin e Komisionit Europian për dhënien e statusit të vendit kandidat tashmë që tre kushtet themelore, miratimi i tre ligjeve në Kuvend është kryer. 
Një vëmendje e posaçme ndaj Shqipërisë për këtë vlerësim pozitiv i është kushtuar zhvillimit të zgjedhjeve të përgjithshme në vend, të cilat Partia Demokratike edhe në kushtet e një bojkoti institucional të opozitës në KQZ, ja doli t’i organizojë me sukses të plotë.

Është ky progres i arritur gjatë mazhorancës së Partisë Demokratike, që bindi Komisionin Europian për të propozuar dhënien e statusit të vendit kandidat.

Sot është një ditë e gëzuar për mbarë qytetarët shqiptarë, që mbështesin prej vitesh, në mënyrë konstante dhe pothuajse unanime integrimin e vendit në Europë. Ne ketë ngjarje është e ftuar të gëzojë edhe qeveria aktuale, pavarësisht se nuk i bëri detyrat e saj kur ishte koha. Nuk ka sens që Kryeministri të bëjë sot modestin që nuk gëzon, kur nuk ka akoma punë për të treguar. Nuk ka sens të mburret se nuk po shan opozitën e tij, kur sot është dita për t’i drejtuar një falënderim publik kësaj opozite që përgatiti kur ishte në qeveri marrjen e statusit.

Por ky nuk është moment për të rënë në vetkënaqësi. Kjo është koha për të parë drejt së ardhmes që na pret për të hapur sa me shpejt negociatat e anëtarësimit në Bashkimin Europian. Partia Demokratike zotohet për të bërë gjithçka për hapjen e negociatave për anëtarësim. Shqipëria e meriton. Shqiptarët e meritojnë.

Tashmë kryeministri Rama ka një sfidë madhore përpara që të dalë nga sindroma e vitit zero, e të ndalë panikndjelljen,  alarmpërhapjen se Shqipërinë e paska marrë në gjendje katastrofike e alarmante, siç pëlqen ta cilësojë.

Dhe me pas të bindë edhe vendet anëtare të Bashkimit Europian se ai është seriozisht i angazhuar për të ecur përpara në procesin e integrimit europian të vendit.

Qeveria dhe Kryeministri Rama duhet të bëjnë të tyren. Për këtë arsye duhet te përmbushin kërkesat e BE-s për hapjen e negociatave ku spikasin dy parime të pakapërcyeshme të Europës siç janë, shteti i së drejtës dhe gjithpërfshirja nëpërmjet dialogut politik.

Partia Demokratike përshëndet fillimin e negociatave për Marrëveshjen e Stabilizim Asociimit për Kosovën, duke shpresuar që ato të mbyllen sa më shpejt.

Të zgjedhurit vendorë të Partisë Demokratike do të jenë mbrojtës të fuqishëm të lirive dhe të drejtave të çdo qytetari shqiptar, pa dallim ngjyrash politike. Kryetari i Partisë Demokratike Lulzim Basha, në mbledhjen e parë të Konventës së të zgjedhurve vendorë demokratë, ka nënvizuar fjalën “Përgjegjësi”, si parimin themelor të funksionimit të pushtetarëve vendorë të PD-së: 
“Përgjegjësi për të mbajtur deri në fund premtimet para zgjedhësve, përgjegjësi për të mbrojtur me forcën e ligjit qytetarët, familjet, pronën dhe pasuritë e tyre nga çdo lloj arbitrariteti i veshur me pushtet, përgjegjësi për të mbrojtur dhe zbatuar standardet më të përparuara të autonomisë vendore, përgjegjësi për t’ju përgjigjur sfidave të reja që lidhen me ndryshimin e pushtetit në nivel qendror në zgjedhjet politike të këtij viti”, tha ai.

Zoti Basha deklaroi se është detyrim i Partisë Demokratike, t’i bëhet sot barriere arbitraritetit të qeverisë, që me vendimet e fundit e ka vendosur veten mbi ligjin dhe Kushtetutën. 
Kryetari i PD-së, ka theksuar se ligji dhe vetëm ligji është qasja e drejtë dhe e pagabueshme për zgjidhjen e problemeve. 

“Si opozitë, si Parti Demokratike, por edhe si të zgjedhur vendorë, ne jemi shumë të shqetësuar me serinë e akteve arbitrare antiligjore të kryeministrit Rama në startin e tij të qeverisjes. Qeverisja ka nisur si një fushatë kundër konsensusit, ligjeve dhe Kushtetutës së vendit. Vetë kryeministri po tregon ditë për ditë me aktet që po ndërmerr, se ligji nuk është rruga, por pengesa që duhet rrëzuar, duhet shkelur me këmbë, duhet flakur matanë, për ta kaluar ai me veprën e tij të zhbërjes. Nuk po flas sot për aktin normativ famëkeq dhe shumë bëma të tjera të stampës arbitrare, të denoncuara ditë për ditë para publikut nga opozita. Po ndalem tek vendimi i fundit, “Për unifikimin e kompetencave të Inspektoriatit të ndërtimit”, që i hap rrugë shembjes së ndërtimeve me leje, në bazë të vlerësimit të kryeinspektorit. Ky është një akt pa precedent, që gjen justifikim vetëm në filozofinë e qeverive me frymë junte, një vendim që godet hapur Kushtetutën, ligjet e tjera të vendit, parimet dhe moralin e demokracisë. Askush të mos ketë iluzionin më të vogël, se abuzimet mund luftohen në mënyrë abuziviste; askush të mos vetëgënjehet, se ka marrë mandat për të zhbërë shtetin ligjor, duke dashur t’i mbivendosë shtetin e fantazive të tij. Ky është  leximi më i gabuar i votës së popullit, me pasoja negative të paimagjinueshme”.

Përpara kësaj situate, zoti Basha ka kërkuar nga të zgjedhurit vendorë të PD-së, të përgatiten për të mbrojtur me mjete demokratike Kushtetutën dhe ligjet e vendit.  
“Të jemi në këmbë, për liritë dhe ligjin! Të mos lejojmë për asnjë arsye cënimin e tyre, të përgatitemi të mbrojmë sëbashku me çdo mjet demokratik Kushtetuten e vendit, korpusin ligjor, pasuritë dhe pronat e ligjshme që njerëzit i kanë siguruar me mund dhe me djersë dhe që janë pasuri e vendit! Te kjo Konventë që po nis jetë sot, publiku shqiptar, pa dallim ngjyrash politike, do të ketë një mbrojtëse të fuqishëm të lirive dhe të drejtave të fituara me përpjekje të mëdha” – u shpreh z. Basha.

Mazhoranca e para 23 qershorit theksoi ai, plotësoi kushtet dhe kriteret për të merituar statusin e vendit kandidat. Zoti Basha tha se Statusi, është i gatshëm në tavolinë dhe kjo qeveri, nuk ka çfarë të bëjë tjetër vetëm të shkojë në Bruksel e ta marrë në emër të shqiptarëve.

“Partia Demokratike plotësoi një nga një të gjitha kriteret dhe kushtet. Status, i cili pritet i gatshëm në tavolinë dhe që kjo qeveri, nuk ka çfarë të bëjë tjetër vetëm të shkojë në Bruksel e ta marrë në emër të shqiptarëve.Për ne pushteti nuk ka qenë e nuk do të jetë ndonjëherë qëllim në vetvete. Mirëqenia, zhvillimi dhe integrimi i vendit tonë në Europë kanë qenë dhe janë qëllimet e politikës sonë. Duke fituar statusin, falë standardeve që vendosëm dhe zgjedhjeve që zhvilluam në 23 qershor, ne kemi arsye të plota të reklamojmë protagonizmin tonë në arritjen e një suksesi të ri historik në rrugën e integrimit europian të vendit, duke ndarë këtë gëzim të ligjshëm me të gjithë qytetarët shqiptarë”, u shpreh kryetari i PD-së Lulzim Basha.

Në fjalën e tij, kryetari i PD Basha është ndalur edhe tek decentralizimi. Në qeverisjen e Partisë Demokratike, pushtetit vendor i kaluan në administrim sistemet e ujësjellës – kanalizimeve, investimet u pesëmbëdhjetëfishuan, në krahasim me vitin më të mirë të qeverisjes socialiste, u arrit që  buxhetimi me pjesëmarrje të  bëhet një normë e punës së njësive vendore. U realizuan në nivel vendor reforma epokale, si dixhitalizimi i gjendjes civile, prokurimi elektronik, proceset one-stop shop për bizneset, etj. Përballë një rekordi pozitiv në këtë drejtim, të shënuar nga qeverisja e PD-së, në 8 vitet e qeverisjes së saj, gjendet sot një program konfuz i qeverisë së re, lidhur me autonominë vendore. 

“Programi i saj për autonominë vendore është konfuz dhe në hava, si shumë çështje të tjera të programit të ashtuquajtur të Rilindjes, të cilit me shtyrjen në kalendat greke të premtimeve themelore, nga vetë zoti Rama dhe me fshirjen fare të shumë premtimeve të tjera, i ka mbetur vetëm emri. Nga ana tjetër, duhet të presim draftimin e buxhetit të ri të shtetit, për të kuptuar se çfarë ka mbetur në këtë qeveri nga standardi i qeverisjes së Partisë Demokratike, për të mbështetur me fonde dhe projekte pushtetin vendor. Por shenjat janë se sfidat për të cilat po flasim, do të jenë jo sfida por sfidime nga ana e qeverisë. Do të jenë të mëdha, të shumëllojshme. Ne duhet të përgatitemi, për tu përballuar me situata nga më të vështirat, duke filluar me ato financiare e duke vazhduar me ato të paligjshmërisë dhe arbitraritete të qeverisë”, theksoi kreu i PD, Lulzim Basha.

Nga Konventa e të zgjedhurve vendorë demokratë,  Zoti Basha ka kërkuar pjesëmarrjen e përfaqësuesve të shoqatave të të zgjedhurve vendore, në të gjitha vendimarrjet e rëndësishme që lidhen me funksionimin e këtij pushteti, përfshirë dhe reformën administrativo-territoriale.

“Të zgjedhurit tanë vendorë janë e duhet të jenë aktivë dhe protagonistë në të gjitha çështjet e qeverisjes vendore, përfshirë reformën administrative-territoriale. Ne jemi ideatorët e parë të kësaj reforme, por ajo nuk mund të fabrikohet në zyra të mbyllura, nuk mund të lëshohet nga lart si rrufe. Ajo duhet të diskutohet e debatohet në mënyrë gjithpërfshirëse. Në këtë çështje kaq të ndjeshme duhet të marrim patjetër parasysh të drejtën e qytetarëve për të vendosur ata vetë, për territorin e njësive të tyre vendore dhe të riaktivizojmë bashkëpunimin ndërbashkiak e ndërkomunal” 

Kryetari i Partisë Demokratike Lulzim Basha deklaroi se PD do të vazhdojë të mbrojë interesat e qytetarëve, si interesat më të larta të qeverisjes.  
“Ne do të vazhdojmë të luftojmë për më shumë mirëqënie e demokraci. Partia Demokratike do të vazhdojë të konsiderojë interesat e qytetarëve, si interesat më të larta. Për ne, i pari është qytetari, kudo ku ai ndodhet”- deklaroi
z. Basha

Në vijim fjala e plotë e Kryetarit të PD-së Lulzim Basha në Konventë:

Të nderuar zotërinj kryetarë të bashkive e komunave, përfaqësues të Partisë Demokratike
Të nderuar Kryetarë të Këshillave vendore
Të nderuar Kryetarë të Këshillave të qarqeve
Të nderuar z. Mema dhe z. Plaku, Kryetarë të Shoqatave të qarqeve dhe komunave
Të nderuar ekspertë të fushës e përfaqësues të shoqërisë civile
I nderuar zv/Kryetar i Kuvendit 
Të nderuar zonja dhe zotërinj deputetë

Është hera e parë që mblidhemi në këtë format – kryetarë komunash, kryetarë bashkish, kryetarë të këshillave vendore, kryetarë të këshillave të qarqeve, të zgjedhur të gjithë nën siglën e një partie, që ka shënuar kthimin dhe udhëtimin historik të Shqipërisë drejt Perëndimit, epokën e re të Lirisë dhe Demokracisë në vendin me të  mbyllur të botës, Shqipërinë e zhvilluar të ditëve tona.

Kjo është Partia Demokratike, sigla e zemrës së mijëra e mijëra demokratëve, ku rreh prej më shumë se 22 vitesh pulsi i shëndetshëm i shpresës, ndryshimit dhe përparimit të Shqipërisë drejt Europës. 

Kjo është Partia Demokratike, shtëpia jonë e lirive, vizioni ynë i shtetit të së drejtës.

Kjo është Konventa e parë e të zgjedhurve të saj vendorë, një fuqi e madhe e demokracisë në Shqipëri, që po merr sot jetë në Tiranë, por do të jetë një forum i përhershëm në një rrugë të gjatë dhe të pandalshme.

Si kryetar i Partisë Demokratike dhe njëherësh si Kryetar i Shoqatës së Kryebashkiakëve të Shqipërisë, kam kënaqësinë e veçantë që në ditën e parë dhe në mbledhjen e parë  të kësaj Konvente t’ju përshëndes dhe t’ju falenderoj të gjithëve për praninë tuaj këtu, për kontributin e çmuar që keni dhënë dhe po jepni në përmbushje të misionit dhe detyrave që kemi marrë përsipër, duke shërbyer me besnikëri kontratën tonë me zgjedhësit, duke respektuar me fanatizëm kredon tonë “Të parët janë qytetarët”, duke mbajtur lart figurën e të zgjedhurve të Partisë Demokratike.

Për secilin prej nesh, duke filluar me mua si drejtues i bashkisë më të madhe të vendit, Tiranës, e deri tek këshilltari demokrat i komunës me të vogël, është nder, krenari dhe përgjegjësi të jemi të zgjedhurit e Partisë Demokratike në pushtetin vendor.

Dëshiroj të nënvizoj fjalën “Përgjegjësi”, si një fjalë kyçe të kësaj Konvente, si një parim të përhershëm të kulturës qeverisëse të demokratëve, por që duhet të spikasë akoma më shumë dhe të fitojë një përmasë të re në këtë periudhë dhe në vijimësi.

Përgjegjësi për të mbajtur deri në fund premtimet para zgjedhësve.

Përgjegjësi për të zbatuar një për një detyrat.

Përgjegjësi për të qëndruar ditë për ditë pranë qytetarëve, duke i dëgjuar, duke i konsultuar, duke kërkuar bashkë me ta zgjedhjet më të mira për problemet dhe hallet e tyre të përditshme.

Përgjegjësi për të mbrojtur me forcën e ligjit qytetarët, familjet, pronën dhe pasuritë e tyre nga çdo lloj arbitrariteti i veshur me pushtet.

Përgjegjësi për të mbrojtur dhe zbatuar standardet më të përparuara të autonomisë vendore, që kanë gjetur shprehje në legjislacionin tonë kombëtar dhe në marrëveshjet ndërkombëtare që Shqipëria ka nënshkruar dhe është e detyruar të zbatojë në këtë fushë.

Përgjegjësi për të mobilizuar të gjitha mundësitë dhe burimet vendore të zhvillimit, sado modeste qofshin, në funksion të zhvillimit të komunave, bashkive dhe qarqeve tona.

Përgjegjësi për të qenë zëri i kthjellët i shpresës, i së drejtës dhe pozitives në këtë vend.

Përgjegjësi për t’ju përgjigjur sfidave të reja që lidhen me ndryshimin e pushtetit në nivel qëndror në zgjedhjet politike të këtij viti.
Ka ndodhur rrotacioni. Në pushtet kanë ardhur forcat e së majtës. Ky është një fakt të cilin ne e kemi njohur, duke pranuar si dhunti të demokracisë europiane, që vetë qeveria e Partisë Demokratike ndërtoi në Shqipëri.

Pavarësisht nga rezultati që morëm në këto zgjedhje, ne jemi dhe duhet të jemi krenarë me arritjet e qeverisë sonë dhe Kryeministrit tonë, që organizuan dhe zhvilluan zgjedhjet më të mira në historinë e vendit, zgjedhje që hapën përfundimisht rrugën e Shqipërisë për të marrë statusin e vendit kandidat në Bashkimin Europian.

Status, për të cilin kjo Parti Demokratike plotësoi një nga një të gjitha kriteret dhe kushtet.

Status, i cili pritet i gatshëm në tavolinë dhe që kjo qeveri, nuk ka çfarë të bëjë tjetër vetëm të shkojë në Bruksel e ta marrë në emër të shqiptarëve.

Për ne pushteti nuk ka qenë e nuk do të jetë ndonjëherë qëllim në vetvete. Mirëqenia, zhvillimi dhe integrimi i vendit tonë në Europë kanë qenë dhe janë qëllimet e politikës sonë. Duke fituar statusin, falë standardeve që vendosëm dhe zgjedhjeve që zhvilluam në 23 qershor, ne kemi arsye të plota të  reklamojmë protagonizmin tonë në arritjen e një suksesi të ri historik në rrugën e integrimit europian të vendit, duke ndarë këtë gëzim të ligjshëm me të gjithë qytetarët shqiptarë.

Nga këndvështrimi demokratik rotacioni i pushtetit qëndror nuk duhet të krijojë asnjë problem për funksionimin normal të pushtetit vendor. Shqipëria demokratike ka bërë një kapërcim të madh cilësor në fushën e konsolidimit të pushtetit vendor, duke përshtatur dora-dorës standardet më të përparuara evropiane në legjislacionin e saj dhe duke bërë përpjekje të vazhdueshme për zbatimin me sukses në praktikë të këtyre standardeve.

Decentralizimi si një përmasë e pazëvendësueshme lirie dhe demokracie është një realitet i gjallë dhe i prekshëm në jetën tonë dhe qytetarëve tanë. Një kulturë e re ka lindur dhe po rritet në lidhje me autonominë vendore dhe vlerat e saj. Gjatë tetë viteve të Qeverisjes së Partisë Demokratike kjo kulturë decentralizimi dhe liberalizimi në tërësi, njohën një zhvillim pa precedent në historinë politike të vendit tonë.

Njohën një zhvillim, i cili ka prekur jo vetëm hallkën e menaxhimit të pushtetit dhe praktikat e tyre, por jetën e çdo qytetari shqiptar.

Pushteti vendor mori përgjegjësi dhe kompetenca shumë të rëndësishme në sektorët e administrimit të territorit, aseteve dhe shërbimeve vendore.

Mjafton të përmendim sot se gjatë qeverisjes së Partisë Demokratike u transferuan në pronësi të qeverisjes vendore,  sistemet e ujësjellës – kanalizimeve në përputhje të plotë me politikat dhe sugjerimet e institucioneve dhe partnerëve ndërkombëtarë. U inventarizuar të gjitha pasuritë publike në njësitë vendore dhe procesi është drejt përfundimit. Investimet në nivel lokal u pesëmbëdhjetëfishuan në krahasim me vitin më të mirë të qeverisjes paraardhëse socialiste. Falë edhe ndihmës së pakursyer të partnerëve tanë ndërkombëtarë, u arrit që  buxhetimi me pjesëmarrje të  bëhet një normë e punës së njësive vendore. Ne realizuam në nivel vendor re
forma epokale; si dixhitalizimi i gjendjes civile, prokurimin elektronik, proceset me një ndalesë të vetme për bizneset (one-stop shop), e tjerë. Këto arritje dhe shumë të tjera si stad i autononomisë së pushtetit vendor përbëjnë një garanci për të ecur përpara në marrëdhënie të hapura bashkëpunimi me qeverisjen qëndrore. Natyrisht, nuk do të ishim realistë po të thonim se me qeverinë socialiste gjërat do të shkojnë njëlloj si me qeverinë e Partisë Demokratike. Situata e krijuar në vend, kur të majtët kanë shumicën në qeverisjen qëndrore, është e tillë që dikton nevojën për bashkëjetesë pozitive mes pushtetit qëndror dhe atij vendor të zgjedhur që të dy me votë nga qytetarët.

Nga ana jonë ne ofrojmë vizionin e koabitacionit, që do të thotë, respekt dhe bashkëpunim i ndërsjellë në kufijtë e kompetencave të njohura me ligj; mbështetje konkrete të çdo reforme dhe akti që shkon në favor të decentralizimit dhe fuqizimit të autonomisë së pushtetit vendor. 

Sa më afër njerëzve, aq më i lartë është pushteti. Ky është koncepti modern për pushtetin në përgjithësi dhe për atë vendor në veçanti, koncept të cilin ne e kemi bërë pjesë të përqasjes sonë politike dhe duhet ta manifestojmë çdo ditë në punën tonë. Asnjë kompleks, asnjë tërheqje nga angazhimet tona para zgjedhësve për faktin se ka ndryshuar qeverisja qëndrore. 

Zonja e zotërinj,

Nuk dëshiroj të anticipoj sot natyrën e sfidave që na rezervon qeveria “Rama”. Programi i saj për autonominë vendore është konfuz dhe në hava, si shumë çështje të tjera të programit të ashtuquajtur të Rilindjes, të cilit me shtyrjen në kalendrat greke të premtimeve themelore nga vetë zoti Rama dhe me fshirjen fare të shumë premtimeve të tjera, i ka mbetur vetëm emri. Nga ana tjetër duhet të presim draftimin e buxhetit të ri të shtetit për të kuptuar se çfarë ka mbetur në këtë qeveri nga vizioni dhe standardi i qeverisjes së Partisë Demokratike për të mbështetur me fonde qeverisjen dhe projektet e pushtetit vendor.

Por, shenjat janë, se sfidat për të cilat po flasim do të jenë jo sfida, por sfidime nga ana e qeverisë. Do të jenë të mëdha dhe të lloj-llojshme. Ne duhet të përgatitemi për tu përballuar me situata nga më të vështirat, duke filluar me ato financiare e duke vazhduar me ato të paligjmërisë dhe arbitraritetet të pushtetit qëndror.
Si opozitë, si Parti Demokratike, por edhe si të zgjedhur vendorë ne jemi thellësisht të shqetësuar me serinë e akteve arbitrare dhe antiligjore të kryeministrit Rama në startin e tij të qeverisjes. Qeverisja ka nisur si një fushatë kundër konsensusit, kundër ligjeve dhe kundër Kushtetutës së vendit. Vetë kryeministri po tregon ditë për ditë me aktet që po ndërmerr se ligji nuk është rruga, por pengesa që duhet rrëzuar, duhet shkelur me këmbë, duhet flakur matanë për ta kaluar ai me veprën e tij të Zhbërjes.

Nuk po flas sot për aktin normativ famëkeq dhe shumë bëma të tjera të stampës arbitrare të denoncuara ditë për ditë para publikut nga opozita. Po ndalem tek vendimi i fundit “Për unifikimin e kompetencave të Inspektoratit të ndërtimit”, që i hap rrugë shembjes së ndërtimeve me leje në bazë  të vlerësimeve subjektive dhe pa paralajmërim të kryeinspektorit!  E gjitha kjo në emër të betejës së shpallur me shumë bujë për administrimin e territorit, që në mjaft bashki të administruara edhe nga Partia Socialiste ka rezultuar si në shprehjen: “U mbars mali e polli një mi”. 
Në vend që të nxirrte disa mësime nga përballja e parë me realitetin e gjallë, që ka probleme sigurisht, nganjëherë edhe të mprehta e të rënda, qeveria, me vendimin për prishjen e ndërtimeve me leje, ka shkuar shumë  larg në arbitraritetin e saj.  Ky është një akt pa precedent, që gjen justifikim vetëm në filozofinë e qeverive me frymë junte; një vendim që godet hapur Kushtetutën, ligjet e tjera të  vendit, parimet dhe moralin e demokracisë.

E përsëris: Jemi të vetëdijshëm se administrimi i territorit mbart probleme që kërkojnë zgjidhje. Secili prej nesh në territorin e njësisë së tij të qeverisjes vendore, po punojmë e duhet të punojmë më shumë dhe më mirë për të  ndryshuar pozitivisht gjendjen. Por problemet nuk mund të jenë kurrë një alibi apo një justifikim për një qasje abuziviste, si kjo që po demonstron qeveria Rama. Ligji dhe vetëm ligji është qasja e drejtë dhe e pagabueshme për zgjidhjen e problemeve. 
Demokracia e ka treguar vitalitetin dhe forcën e vetë të pathyeshme duke respektuar me fanatizëm parimin e madh të sundimit të ligjit, të shtetit të së drejtës. 
Edhe të keqen, edhe kriminalen demokracia e mposht dhe e ka mposhtur me ligj.

Historia ka treguar se çdo shmangie nga kjo doktrinë nga këto parime të shenjta dhe universale të qytetërimit perëndimor nga politikanë populistë dhe demagogë, që kanë ardhur me premtimin e një bote të re, ka prodhuar tiranë dhe tirani që u kanë kushtuar shumë shtrenjtë popujve respektivë. Për ne shqiptarët kjo nuk është një përrallë dimri, por një tragjedi e zgjatur dhe e përjetuar thellë në palcë, që ka shënuar jetën e disa brezave nën diktaturë.

Demokracia në botë dhe në Shqipëri është e fortë, e rrënjosur. Arbitrariteti nuk ka forcë të cënojë themelet e saj. Por dalja e kryeministrit të vendit mbi ligjin dhe Kushtetutën, prirja e tij për të zevendësuar parimin demokratik të sundimit të ligjit me parimin antidemokratik, parademokratik dhe parapolitik “ligji jam unë”, krijon amulli, shkel të drejta, provokon përplasje dhe konflikte, shkatërron paqen dhe kohezionin në shoqëri, me fjalë të tjera prodhon vetëm regres dhe largim të përshpejtuar nga Europa ku duam të shkojmë. 
Kurrë, kurrë ndonjëherë arbitrariteti nuk ka prodhuar një produkt më të mirë se liria. Me lirinë dhe ligjin ne futëm Shqipërinë në NATO. Me lirinë dhe ligjin e përgatitem vendin të bëhet anëtare e Bashkimit Europian. Me lirinë dhe ligjin mund dhe do të ecim përpara. Askush të mos ketë iluzionin më të vogël se abuzimet mund luftohen në mënyrë abuziviste. Askush të mos vetëgënjehet s’e ka marrë mandat për të zhbërë shtetin ligjor duke dashur t’i mbivendosë shtetin e fantazive të tij. Ky është  leximi më i gabuar dhe i rrezikshëm i votës së popullit, me pasoja të paparashikuara, negative, me pasoja të paimagjinueshme.

Nga kjo Konventë, ku shqiptarët shohin e duhet të shohin vazhdimisht një bastion të lirive dhe të drejtave të tyre kushtetuese dhe universale, në nivel vendor dhe kombëtar, ne sot lëshojmë apelin: të jemi në këmbë për liritë dhe ligjin. Të mos lejojmë për asnjë arsye cënimin e tyre. Të përgatitemi të mbrojmë së bashku me çdo mjet demokratik Kushtetutën e vendit, korpusin ligjor, pasuritë dhe pronat e ligjshme që njerëzit i kanë siguruar me mund dhe me djersë dhe që janë pasuri e vendit, pasuri kombëtare.

Të zgjedhurit tanë vendorë janë e duhet të jenë aktivë dhe protagonistë në të gjitha çështjet e qeverisjes vendore, përfshirë reformën administrativo-territoriale. Ne jemi ideatorët e parë të kësaj reforme. Por ajo nuk mund të fabrikohet në zyra të mbyllura, nuk mund të lëshohet nga lart si rrufe. Ajo duhet të diskutohet dhe debatohet në mënyrë gjithëpërfshirëse. Në këtë çështje kaq të ndjeshme duhet te marrim patjetër parasysh te drejtën e qytetarëve për të vendosur ata vetë drejtpërdrejt për territorin e njësive të tyre ven
dore dhe të riaktivizojmë bashkëpunimin ndërbashkiak.

Do të ketë një mbrojtëse të fuqishme të lirive dhe të drejtave të fituara me përpjekje të mëdha.

Ne do të vazhdojmë të luftojmë për më shumë mirëqenie dhe demokraci.

Partia Demokratike do të vazhdojë të konsiderojë interesat e qytetarëve si interesat më të larta.

Për ne qytetari ka qenë, është dhe do të mbetet i pari kudo që ai ndodhet!

Faleminderit.

Kryetari i PD, njëherazi kryetar i Bashkisë së Tiranës Lulzim Basha ka uruar sot besimtarët myslimanë, me rastin e festës së Kurban Bajramit. Urimin e tij për çdo shqiptar, pavarësisht nëse jeton brenda apo jashtë kufijve administrativë, zoti Basha e përcolli nga selia e Komunitetit Mysliman.

Zoti Basha kujtoi se janë aktet e mira, të nisura jo me qëllim përfitimi personal, por me qëllim për të lënë diçka të mirë, ato që e bëjnë shoqërinë të ecë përpara.

“Çdo besimtari mysliman shqiptar, në Shqipëri, Kosovë, Maqedoni, Mal të Zi, Luginë e Preshevës, shqiptarëve që jetojnë kudo në botë, dua t’u uroj: “Gëzuar Kurban Bajramin”! Sjelltë kjo festë sa më shumë gëzim, hare dhe po kështu shëndet e harmoni, për gjithsecilin prej jush, familjet tuaja dhe për çdo shqiptar! Kjo është një ditë kur kremtohet dashuria për Zotin dhe dashuria për njeri-tjetrin, si një forcë më e madhe se dashuria për vetveten. “Zoti na ka bërë sprovë për njeri-tjetrin”- thotë Libri i Shenjtë, ndaj si kjo ditë, çdo ditë duhet të kujtojmë se janë aktet e mira, të nisura jo me qëllim përfitimi personal, por me qëllim për të lënë diçka të mirë, për të bërë diçka të mirë, për njeri-tjetrin, për familjen, për shoqërinë, ato që e bëjnë shoqërinë të ecë përpara dhe që u falin lumturi, prindërve, fëmijëve dhe mbarë qytetarëve. Dua të falënderoj me këtë rast, të gjithë besimtarët, imamët dhe Klerin, të cilët bënë të mundur kremtimin e kësaj dite edhe sot, ndonëse në kushte jo optimale dhe shpresoj me ndihmën e Zotit, në vitet e ardhshme, çdo sprovë e mbetur, të tejkalohet me sukses!”

Duke iu përgjigjur interesimit të medias, lidhur me projektin e Xhamisë së madhe, ndërtimi i së cilës u ndërpre vetëm pak ditë para kremtimit të Kurban Bajramit,  zoti Basha ka uruar që qeveria dhe Komuniteti Mysliman të arrijnë të shndërrojnë në realitet ndërtimin e Xhamisë së madhe të Tiranës, i lënë në harresë për dekada me radhë.

“Pa dyshim, ka qenë një sprovë e madhe, një sprovë të cilën Bashkia e Tiranës, pas dekadash harrese e kaloi me sukses. Xhamia nisi punimet. Siç e dini, pas kësaj ka pasur një vendim i cili ka ndaluar punimet. Tashmë, çështja është midis Komunitetit Mysliman dhe qeverisë dhe unë uroj me gjithë zemër që projekti i Xhamisë të ecë përpara” – theksoi z. Basha.

Zoti Basha ka përcjellë urime për begati, shëndet, mbarësi dhe dritë për besimtarët myslimanë dhe çdo shqiptar, edhe nga selia e Kryegjyshatës Botërore të Bektashinjve. Zoti Basha uroi që së shpejti të inaugurohet edhe tempulli i tyre, kryeqendra botërore e bektashizmit.

“Kryegjyshatën Botërore të Bektashinjve, sot dua t’i drejtoj një thirrje edhe të gjithë vëllezërve e motrave të këtij komuniteti të cilët përfaqësojnë pa dyshim një ndër virtytet më unike të kombit tonë, atë të tolerancës e gjithpërfshirjes dhe t’i uroj “Gëzuar festën e Kurban Bajramit!”, t’u uroj dhe shpresoj sa më shpejt të inaugurojmë edhe tempullin e tyre, kryeqendrën botërore të bektashizmit. Uroj që kjo festë, bashkë me lajmet e mira, të vazhdojë të rrezatojë dritë dhe mirësi, jo vetëm mbi pjesëtarët e këtij komuniteti të madh dhe të shtrirë anembanë Shqipërisë dhe trojeve shqiptare por mbi çdo shqiptar të çdo besimi fetar, mbi çdo shqiptar, krijesë dhe besimtari të Zotit!”

Deklarata për mediat e zëdhënëses së PD-së Laura Vorpsi:

Me keqardhje vërejmë se argumentet e shumtë ligjorë e politikë të opozitës drejtuar dje me shkrim kryeministrit Rama dhe kryetarit të Kuvendit Meta kanë rënë në veshë që nuk duan të dëgjojnë.

Partia Demokratike përsërit se siç përcakton neni 101 i Kushtetutës, Akti Normativ nuk mund të ndryshohet nga Kuvendi. Ai ose miratohet siç ka ardhur, ose rrëzohet. Ndaj ndryshe nga rasti i një projekt-ligji që mund të ndreqet përmes procesit parlamentar, kjo është e pamundur me aktin normativ.

Është mazhoranca pra ajo që ka vënë kushte, dhe jo opozita. Shtyrja gjashtë muaj e hyrjes së ligjit në fuqi është kushti që Rama i ka vënë opozitës dy javë para se të conte ftesën për dialog.

Opozita nga ana e saj nuk ka vënë asnjë kusht, por i kërkon zotit Rama të heqë kushtin e tij, pra të tërheqë aktin normativ për të mundësuar dialogun.

Opozita i ka opsionet e zgjidhjes së kësaj krize dhe është e gatshme që nesër ti ofrojë ato në një tryezë parlamentare, por kjo ligjërisht është e pamundur dhe e pavlerë sa kohë akti normativ është në fuqi.

Konsensusi nuk është çështje numrash, por vullneti dhe vlerash të  bashkëndashme. Shqiptarët nuk i dhanë një shumicë të cilësuar kësaj qeverie. Nëse qeveria po tenton të fabrikojë  me marifete ekstrazgjedhore një  shumicë të cilësuar enkas për këtë rast, ky do të jetë një atentat i dyfishtë kundër konsensusit, me pasoja akoma më të rënda për vendin.

Nga qorrsokaku i aktit normativ nuk dilet me verbëri dhe arrogancë, por me mendje të hapur dhe me arsye.

Lideri i opozitës, z. Lulzim Basha, priti në një takim në selinë e Partisë Demokratike, Zv. Kryeministrin dhe Ministrin e Punëve të Jashtme të Greqisë, z.  Evangelos Venizellos.
Gjatë takimit u vunë në dukje arritjet në marrëdhëniet dypalëshe mes vendeve tona gjatë viteve të fundit, rritjen e shkëmbimeve tregtare dhe ekonomike, mbështetjen që Greqia i ka dhënë integrimit euro-atlantik të Shqipërisë dhe bashkëpunimit strategjik për suksesin e projektit të Gazsjellësit Trans-Adriatik, TAP.

Z. Basha vlerësoi shumë të rëndësishme marrëdhëniet me shtetin fqinj dhe theksoi angazhimin e Partisë Demokratike për të mbështetur dhe nxitur më tej këto marrëdhënie, duke theksuar, që për të arritur nivele edhe më të larta dhe për të shfrytëzuar plotësisht potencialin që ekziston në marrëdhëniet Shqiptaro-Greke, ne duhet të trajtojmë në frymën e bashkëpunimit dhe fqinjësisë së mirë të gjitha çështjet e mbartura dhe t’i zgjidhim duke demonstruar vullnet të përbashkët dhe vizion europian, si dy nga popujt më të vjetër të rajonit.

Në këtë kuadër, z. Basha ngriti çështjen e anulimit të ligjit të luftës, si çështje e rëndësishme jo vetëm për shkak të perceptimit, por sidomos edhe të problemeve në lidhje me sekuestron konservative për pronat e qytetarëve shqiptare, veçanërisht atyre Çame.

Ndërsa z. Basha vlerësoi hapat e marra nga shteti Grek në ndërtimin e marrëdhënieve me shtetin e ri të Kosovës, ai theksoi rëndësinë e veçantë që ka për çdo qytetar shqiptar njohja e pavarësisë së Kosovës nga shteti Helen.

Z. Basha kërkoi angazhimin për zgjidhjen e problemit të toponimeve që ka vështirësuar lëvizjen në kufi të qytetarëve shqiptarë të lindur në Greqi.

Kryetari i Partisë Demokratike vlerësoi si bazë shumë të mirë dhe solide traktatin e vitit 1996 të “Miqësisë, Bashkëpunimit, Fqinjësisë së Mirë dhe Sigurisë” mes dy vendeve dhe inkurajoi ngritjen e komisioneve të përbashkëta sipas parashikimeve të këtij traktati për të nxitur dhe forcuar bashkëpunimin e mëtejshëm.

Z. Basha përshëndeti Zv.Kryeministrin dhe Ministrin e Punëve të Jashtme z. Venizellos për vizionin e Qeverisë greke për Presidencën e radhës të Bashkimit Europian dhe angazhimin për të nxitur dimensionin mesdhetar dhe Adriatiko-Jonian së bashku me Italinë në vitin 2014.

Deklarata për media e deputetit të Partisë Demokratike Eduard Halimi:

Dy ditë më parë nga Qeveria është botuar në këtë fletore zyrtare me numër 163/2013, Vendimi 932 datë 30.09.2013 “Për unifikimin kompetencave të INUK”. 

Sipas këtij vendimi, Edi Rama, Kryeministri ynë që zyrën e ka të vetën por pushtetin ia paska dhënë popullit, i jep të drejtë vetes së vetë të urdhërojë Kryeinspektorin,  që pa asnjë kufizim paraprak, në të gjithë territorin e vendit, të rrafshojë çdo ndërtim, mbi tokë apo nën tokë, të përfunduar apo të papërfunduar, përfshirë ato pa leje, por edhe atyre pronarëve me tapi, sipas një ndërtimi që:
1- E kanë me leje ndërtimi,  por që sipas Kryeinspektorit të Ramës leja e ndërtimit qenkërka e kundraligjshme, (pika 4 germa c e VKM)
2- E kanë me me leje ndërtimi, por po sipas këtij Kryeinspektori, paskan kryer ndonjë shkelje gjatë ndërtimit, (pika 4 germa b e VKM)
3- E kanë me leje ndërtimi, por që nuk e kanë mbaruar akoma ndërtimin brenda afatit dhe meqë ka kaluar afati duhet të shembet…(germa 5 pika c)
4- E kane tapinë e shtëpisë me leje legalizimi, por sipas Kryeinspektorit leja e legalizimit qenkërka e kundërligjshme. (pika 5 germa b)
5- E kanë shtëpinë  në proces legalizimi, por po sipas këtij Kryeinspektori, kot që presin sepse nuk do ju legalizohet, ndaj duhet të rrafshohet (pika 4 germa ç) 

Të gjitha këto ndërtime me leje gjithmonë, sipas këtij vendimi të Kryeministrit tonë do të rrafshohen siç thotë ai: pa asnjë kufizim…në të gjithë territorin e vendit (pika 1 germa 1 e kesaj VKM)
Pronat që shqiptarët kanë ndërtuar me leje, janë prona të ligjshme, të mbrojtura nga nenet 41 e 42 të Kushtetutës së vendit, neni 6 i Konventës Europiane të Drejtave të Njeriut, neni 1 i protokollit shtesë të saj dhe këto prona janë  të pacenueshme. Prona nuk mund të preket përveçse nga një proces gjyqësor. Sipas vendimeve të Gjykatës Kushtetuese të vendit, që në bazë të nenit 132 të Kushtetutës kanë fuqi detyruese të përgjithshme, leja e ndërtimit e dhënë nga autoritetet ligjore, mund të anulohet vetëm nga sistemi gjyqësor i vendit, (vendimi nr.6/2006)

Vendimi për të rrafshuar ndërtimet me leje, është arbitrar, antiligjor dhe antikushtetues.

PD i bën thirrje të gjithë punonjësve të rendit publik dhe nëpunësve të shtetit, të mos prekin pronat e ligjshme të qytetarëve shqiptarë, në zbatim të urdhrave arbitrare, antikushtetues dhe antiligjor të atyre, që janë verbuar nga pushteti dhe hakmarrja për pronat e shqiptarëve. Shkatërrimi i pronave të ligjshme të qytetarëve është krim dhe ndëshkohet.

PD i bën thirrje të gjithë qytetarëve shqiptare; Mos lejoni që pronat tuaja të preken nga gangsterët e pushtetit, që kërkojnë t’ju marrin djersen dhe gjakun tuaj, mundin tuaj dhe fëmijëve tuaj, në mënyrë arbitrare me justifikimin e vetëm se ata janë mbi ligjin.  
Mos ju nënshtroni veprimeve arbitrare as të urdhëruesve delirantë, dhe as të ekzekutorëve të verbër.

Njoftoni në kohën më të shkurtër deputetin tuaj të opozitës për të kërkuar ndihmën dhe mbrojtjen e të drejtave tuaja të ligjshme, pronën, djersën, gjakun tuaj.

Dokumentoni gjithçka me audio dhe video, nëse ndonjë punonjës i verbër i Policisë i bindet urdhrit arbitrar dhe antikushtetues për të shkatërruar pronën tuaj të ligjshme. Ata duhen të përgjigjen. Dhe ne ju garantojmë se do përgjigjen.

Prona juaj e ligjshme, është djersa juaj, është gjaku juaj dhe i fëmijëve tuaj. Mos lejoni ata që në emër të pushtetit duan t’ua shkatërrojnë pa pyetur për ligj, Kushtetutë, konvente dhe gjykata.

Ky vendim i Qeverisë është marrë në kundërshtim flagrant me Kushtetutën e vendit, me të paktën 20 vendime të Gjykatës së Strasburgut, me të paktën 5 vendime të Gjykatës Kushtetutës të vendit, që mbrojnë pronën private të ligjshme, garantojnë parimin e sigurisë juridike.

Ndaj dhe Partia Demokratike do t’i drejtohet brenda kësaj jave Gjykatës Kushtetuese për t’i kërkuar në mënyrë të menjëhershme, mbrojtjen e pronave të shqiptarëve dhe shpalljen si antikushtetues të tij.

Deri atëherë mos lejoni askënd t’ua prekë pronën tuaj të ligjshme.

Deklarata për media e zëdhënëses së PD-së Laura Vorpsi:

Për qeverinë shqiptare, mesa duket çdo ditë është dita e gënjeshtrës. Së fundmi, drejtoresha e doganave deklaroi se në dy vitet e fundit, Drejtoria e Doganave nuk paska bërë asnjë kallëzim penal mbi rastet e shkeljes së ligjit. Drejtoresha e doganave gënjen, dhe janë faktet që e nxjerrin atë zbuluar.

Për vitin 2012 administrata doganore ka bërë 55 kallëzime penale. Për vitin 2013, 45 kallëzime penale. Pra në dy vitet e fundit, doganat kanë bërë 100 kallëzime penale, dhe kjo është e dokumentuar dhe lehtësisht e verifikueshme. Si mundet që 100 kallëzime penale, të shihen nga qeveria e re dhe drejtoresha e re si 0 kallëzime penale?

Për dy vitet e fundit, janë sekuestruar mijëra koli me cigare kontrabandë, janë sekuestruar kontenierë me naftë kontrabandë, dhe janë kapur shumë raste të tentativës për të kaluar mallra kontrabandë. Të gjitha, raste të referuara në prokurori. Për këtë arsye, drejtoria e doganave ka marrë vlerësime të vazhdueshme nga Bashkimi Europian, dhe nga organizmat ndërkombëtare dhe këto janë reflektuar në raportet e tyre.

Drejtoresha e doganave gënjen, pasi me sulmet ndaj administratës së mëparshme kërkon të fshehë emërimet politike që ka bërë e po bën në dogana, sic janë ato të caktimit të drejtuesve dhe zyrtarëve të lartë të Partisë Socialiste në rrethe, si kryedoganierë, si në rastin e Durrësit, Rinasit, Shkodrës dhe Sarandës.

Tiranë, 13 tetor 2013

Drejtuar: Z. Edi Rama, Kryeministër dhe Kryetar i Partisë Socialiste

Për dijeni: Z. Ilir Meta, Kryetar i Kuvendit dhe Kryetar i LSI

Z. Vangjel Dule, Zv. Kryetar i Kuvendit dhe Kryetar i PBDNJ

I nderuar z. Rama,

Në përgjigje të letrës suaj, në emër të opozitës ju shpreh qëndrimin tonë për sa vijon.

Miratimi me konsensus i Ligjit 152/2013 “Për Nëpunësin Civil” ishte një nga tre kushtet që iu parashtruan Shqipërisë nga Komisioni Europian për të formalizuar dhënien e rekomandimit për statusit e vendit kandidat për dhe shqyrtimin e tij nga Këshilli Europian. Për fat të keq, refuzimi i konsensusit nga Partia Socialiste pamundësoi këtë proces edhe në dhjetorin e 2012-tës edhe në pranverën e 2013-tës.

Arritja e konsensusit u evidentua si qëllim e kusht më vete nga përfaqësuesit e lartë të Komisionit Europian të cilët, publikisht, e cilësuan konsensusin ndërpartiak më të rëndësishëm se madje edhe vetë aprovimi i tre ligjeve përmes një referendumi.

Pas negociatash të gjata dhe pasi u humb çdo shans për marrjen e statusit të vendit kandidat para zgjedhjeve parlamentare të 23 qershorit, ligji “Për Nëpunësin Civil” u miratua me konsensus unanim në Kuvendin e Shqipërisë më 30 maj 2013. Me kërkesë të vetë Partisë Socialiste hyrja e ligjit në fuqi u shty nga 15 ditë pas botimit në Fletoren Zyrtare në datën 1 tetor, njëkohësisht duke njehsuar datën e hyrjes në fuqi me atë të fillimit të efekteve, ndërsa u përcaktua se Këshilli i Ministrave duhet të përgatisë aktet nënligjore brenda 3 muajsh nga hyrja në fuqi e ligjit, pra brenda datës 31 dhjetor 2013.

Theksojmë se këto përcaktime të ligjit sikundër i gjithë ligji u miratuan me konsensus dhe u votuan me unanimitet.

Një ditë pas konstituimit të qeverisë së re, opozita mësoi nga burime jo-zyrtare synimet e mazhorancës për të zhbërë konsensusin e 30 majit duke anulluar efektet ligjore të Ligjit për

Nëpunësin Civil për një periudhë 6 mujore pas datës 1 tetor përmes një akti normativ të Këshillit të Ministrave.

Për më shumë se dhjetë ditë, opozita i bëri thirrje publike e në mënyrë të përsëritur mazhorancës, ju personalisht dhe z. Meta, për të mos shkelur konsensusin e arritur me 30 maj.

Duke injoruar këto thirrje, mbrëmjen e 30 shtatorit, vetëm pak orë para hyrjes në fuqi të ligjit, Këshilli i Ministrave nëpërmjet një akti normativ anuloi konsensusin parlamentar të 30 majit dhe zhbëri efektet e votës unanime në Kuvend.

Shkelja e njëanshme e konsensusit është një akt i paprecedent në historinë 23 vjeçare të demokracisë shqiptare. Ky akt ka pasoja të rënda për klimën politike në vend dhe evidenton para opozitës por edhe para mbarë qytetarëve shqiptarë pabesueshmërinë tuaj për t’iu përmbajtur angazhimeve tuaja më solemne, siç është konsensusi parlamentar.

Në bindjen tonë, prekja nëpërmjet një akti normativ të miratuar vetëm nga Këshilli i Ministrave e çdo ligji të miratuar nga Kuvendi me shumicë të cilësuar, aq më shume unanime në këtë rast, është një akt arbitrariteti i skajshëm anti-kushtetues si dhe shprehje e një përçmimi jo vetëm ndaj konsensusit parlamentar si vlerë por edhe ndaj parlamentit si institucioni më themelor i republikës.

Në letrën tuaj, ju shpreheni se nuk keni dëgjuar nga opozita asnjë alternativë tjetër që e zgjidh më mirë problemin e krijuar nga mungesa e akteve nënligjore. Natyrisht që s’kishit si ta dëgjonit pasi nismën e ndërmorët njëanshmërisht e në fshehtësi të plotë nga sytë e publikut e të opozitës. Nëse do të donit të dëgjonit zgjidhjet alternative nga opozita, do të duhej që, në momentin më të parë, të shtronit çështjet konkrete që ju preokuponin dhe të kërkonit mirëkuptim e bashkëpunim për të gjetur zgjidhjen e arsyeshme dhe konsensuale.

Nëse do të kishit vepruar kështu ne do të kishim dhënë të gjithë mirëkuptimin tonë si dhe do të ofronim të gjitha kapacitetet teknike të opozitës për të trajtuar e zgjidhur çështjet – ato të qenësishme e jo të sajuara – për zbatimin e ligjit të ri, çështje të cilat, të paktën nga këndvështrimi juridik, ishin e janë lehtësisht të kapërcyeshme e në kohë shumë të shpejtë – çështje ditësh e jo muajsh – pa patur fare nevojë për shtyrjen që ju i bëtë zbatimit të ligjit të ri.

Për më tepër, faktet e këtyre ditëve të fundit tregojnë se veprimet tuaja mbi administratën janë jo vetëm në kundërshtim të hapur me frymën e ligjit të ri për nëpunësin civil por edhe në shkelje flagrante të ligjit të vjetër dhe ligjeve të tjera në fuqi, veprime këto që parathonë qartë se çfarë do të pësojë administrata deri më 1 prill 2014.

Sa i përket argumenteve tona në lidhje me aktin normativ, opozita ka folur fare qartë, se akti normativ i qeverisë është antikushtetues. Argumentet tona janë bërë publike dhe janë shtjelluar qartësisht edhe në ankimin tonë në Gjykatën Kushtetuese, ankim i cili në vetvete demonstron se opozita e sotme sillet në respekt të plotë të demokracisë dhe shtetit ligjor, në respekt të institucioneve kushtetuese të vendit, ndryshe nga ajo e djeshmja.

Ky akt normativ është edhe antikonsensual vetiu. Vetë natyra e aktit normativ përjashton edhe dialogun e jo më konsensusin. Siç përcakton neni 101 i Kushtetutës akti normativ nuk mund të ndryshohet nga Kuvendi. Ai ose miratohet ose rrëzohet. Ndaj, ndryshe nga rasti i një projekt-ligji që mund të ndreqet përmes procesit parlamentar, kjo është e pamundur me aktin normativ.

Në gjithë këtë kontekst, ftesa për të dëgjuar arsyet tuaja se pse kërkoni të prishni konsensusin, vjen dy javë pasi prishjen e konsensusit e keni bërë fakt të kryer përmes aktit normativ.

Nëse mazhoranca kërkon me të vërtetë të gjejë rrugën e humbur të dialogut dhe arsyetimit me opozitën atëherë zgjidhja është e thjeshtë dhe evidente; tërhiqni aktin normativ me të cilin u shkelmua konsensusi e bashkë me të edhe besueshmëria juaj për t’ju përmbajtur angazhimeve tuaja.

Ky nuk është kusht. Kjo është rruga e arsyes për të gjetur zgjidhjen së bashku.

Për çdo nevojë të përligjur le ti drejtohemi procedurave normale parlamentare dhe frymës së konsensusit gjithëpërfshirës. Një ligj i miratuar me konsensus mund dhe duhet të ndryshohet vetëm me konsensus.

Në këtë frymë opozita është e gatshme të dialogojë dhe të ofrojë konstruktivitetin e saj për këtë çështje dhe për çdo çështje që ka të bëjë me interesat madhore të vendit dhe qytetarëve shqiptarë.

Me respekt,

Lulzim Basha
Kryetar i Partisë Demokratike të Shqipërisë