Blog

Deklaratë për shtyp e deputetit të Partisë Demokratike Arben Ristani:

Qeveria e “Rilindjes” e kryerilindasit Rama, që në ditët e para të pushtetit të saj, tregoi qartësisht në sytë e shqiptarëve, alergjinë për shtetin, ligjin dhe institucionet.

Përveç të tjerave, përveç bëmave që opozita po i denoncon përditë, Kryeministri dhe Ministri i tij i Brendshëm,  me urdhra të pashkruara, anti-ligjore e krejtësisht alogjike, po përdor Policinë e Shtetit gjoja për të goditur ndërtimet pa leje.

Partia Demokratike e vendosur për funksionimin e plotë të shtetit ligjor, denoncon përpara publikut shqiptar, përdorimin e policisë së shtetit, në të ashtuquajturën “fushatë kundër ndërtimeve pa leje”, ku efektivat e Policisë së Shtetit, detyrohen të dalin derë më derë, jashtë detyrës së tyre funksionale, duke marrë kompetenca të institucioneve të tjera, si në rastin konkret të Inspektoriateve të Ndërtimit.

Bazuar në “denoncimet” në portalin e “Rilindjes”, e të shoqëruar nga eksponentë të Partisë Socialiste në bllok, lagje, fshat a qytet, Policia e Shtetit po detyrohet të regjistrojë në disa formularë, shpikje e rilindjes, të bllokojë dhe të prishë, në mënyrë anti ligjore dhe politikisht selektive, ndërtimet e qytetarëve.

Sjellim në vëmendje të publikut se opozita e djeshme mori votat e shqiptarëve duke premtuar se do të legalizonte pa pagesë ndërtimet e tyre, ndërsa sot në pushtet, po bën të kundërtën.

Rrugës për të vajtur në fshatin ku dikush ka ndërtuar pa leje, në tokën e tij, një dhomë shtesë se marton djalin, policia kalon pranë këtij pallati…, edhe këtij tjetrit… edhe këtij tjetrit…. të gjithë pronë dhe ndërtime të deputetëve të RILINDJES apo të të afërmve të tyre dhe është e detyruar të mbyllë sytë, për shkak se asnjë prej tyre nuk është denoncuar në portalin e RILINDJES “Stop Rrënimit”.

Duke shprehur edhe njëherë mbështetjen për shtetin ligjor dhe Policinë e Shtetit në kryerjen e detyrave të saj, Partia Demokratike kërkon nga qeveria dhe Ministri i Brendshëm, të ndalë diskriminimin, persekutimin politik si dhe përdorimin antiligjor të institucioneve të shtetit.

Përpara ligjit janë të gjithë të barabartë, edhe Sajmiri, edhe Koço, edhe Sadriu apo çdo qytetar tjetër i Republikës.

Kryetari i opozitës z. Lulzim Basha zhvilloi një takim të veçantë me Ministren e Punëve të Jashtme të Republikës së Italisë znj. Emma Bonino.

Gjatë bisedës u diskutua në lidhje me bashkëpunimin e ngushtë mes Shqipërisë dhe Italisë dhe mbështetjen thelbësore që Italia i ka dhënë integrimit të vendit në BE, anëtarësimit të Shqipërisë në NATO, liberalizimit të vizave, dhe bashkëpunimin për projektet strategjike si Gazsjellësi-Trans-Adriatik. 

Z. Basha falënderoi znj. Bonino për kontributin e saj të çmuar në mbështetjen e Shqipërisë dhe shqiptarëve gjatë gjithë aktivitetit të gjerë politik.

Znj. Bonino vleresoi reformat dhe transformimin e Shqipërisë në këto vite. Duke iu referuar zgjedhjeve të 23 Qershorit ajo theksoi se mbarëvatja e tyre është një meritë e qeverisjes së Partisë Demokratike. 

Duke iu referuar situatës aktuale politike në vend dhe debatit maxhorancë opozitë në lidhje me prishjen e konsensusit mbi ligjin e administratës civile, znj. Bonino theksoi se mesazhi i Brukselit është, se parimi më i rëndësishëm që do të vlerësohet në procesin e integrimit të Shqipërisë në BE është ai i gjithëpërfshirjes.

Deklarata e plotë e Kryetarit të Partisë Demokratike Lulzim Basha në konferencën për shtyp mbajtur në selinë e PD-së.

Sonte të detyruar nga një seri gënjeshtrash seriale kobndjellje dhe zindjellje dhe mungese elementare të koncepteve për ekonominë dhe aspekteve publike dhe shtetërore të politikave ekonomike dhe fiskale, Partia Demokratike nis një proces transparence ndaj qytetarëve shqiptarë, partnerëve tanë ndërkombëtarë.
Ka disa ditë që kryeministri Rama, po rreket të krijojë një imazh të degraduar të ekonomisë së vendit, të financave publike, pikërisht nëpërmjet mashtrimeve, shifrave të paqena, fakteve të fabrikuara.

Zoti Rama thotë se ekonomia shqiptare është në kolaps dhe më keq do të jetë.

Ne i themi qytetarëve shqiptarë, se ekonomia e tyre, ndonëse nën shtrëngesën e fortë të darës së krizës europiane dhe veçanërisht efekteve të ekonomive të vendeve fqinje të Greqisë dhe Italisë, nuk ra asnjëherë në recesion gjatë viteve 2009-2012 e në vijim.

Edhe këto 6 muaj të vitit 2013 pati rritje pozitive dhe ishte vetë partneri i qeverisë Fondi Monetar Ndërkombëtar, i cili deklaron se rritja deri në fund të vitit 2013 do të jetë afro 2%, pra më e lartë se vendet e tjera të Ballkanit.

Edi Rama thotë se të ardhurat fiskale kanë rënë në mënyrë drastike për shkak të keqadministrimit nga qeveria mëparshme, veçanërisht në 8 muajt e vitit 2013.

Ne u themi sot qytetarëve shqiptarë, se të ardhurat fiskale (tatime+dogana) për këto 8 muaj të vitit 2013 kanë patur një rënie prej 4,3%, krahasuar me të njëjtin 8 mujor të vitit 2012. Kjo rënie ka ardhur si rezultat i një rritjeje ekonomike më të vogël këtë vit, se sa vitin që shkoi, i efekteve në buxhet të lehtësirave fiskale të miratuara para zgjedhjeve dhe vazhdimit të rritjes së eksporteve shqiptare në krahasim me importet çka sjell zvogëlim të TVSH-së neto në tregtinë ndërkombëtare të vendit.

Rënia prej vetëm 4.3%, nuk ka ardhur, pra siç pretendon z. Kryeministër nga shthurja e administratës fiskale, ndonëse në një vit zgjedhor e ndonëse Edi Rama me papërgjeshmëri të plotë dhe mëndje të çartur i bëri thirrje biznesit, disa muaj rresht para zgjedhjeve, të mos paguante detyrimet fiskale.

Edi Rama thotë se qeveria ka shpenzuar të gjithë deficitin e programuar për të gjithë vitin dhe ka lënë arkën e shtetit bosh.

Dhe këtu shfaqet edhe një herë paaftësia e tij për të kuptuar funksionimin e shtetit dhe konceptimin e arkës së shtetit si një kuletë dhe jo si një realitet dinamik.

Për 8 muajt e vitit 2013, qeveria e mëparshme ka shpenzuar vetëm 34 mld të deficitit vjetor të programuar dhe miratuar në Parlament, nga 49 mld në tërësi, pra krejtësisht sipas planit vjetor dhe qeverisë Rama, i mbeten edhe 15 mld rezervë deficiti të programuar sipas buxhetit për më pak se tre muaj.

Vetëm një mendje si e tij mund të alarmohet nga ky fakt.

Deri në fund të vitit, nëse qeveria e re punon me të njëjtin ritëm, si qeveria e mëparshme gjatë 8 muajve të fundit, me zero përmirësim ka vend për panik as në mbledhjen e të ardhurave dhe as për deficitin.

Edi Rama thotë se është rritur borxhi i fshehtë dhe tashmë atij i duhet, që vetëm për formalizimin e borxhit të fshehtë dhe deficitin e pritshëm deri në fund të vitit, ta rrisë borxhin me 9-10% më shumë se niveli aktual me të cilin e mori qeverisjen në dorëzim.

9 deri në 10 përqind më shumë, 1.5 mld Euro.

Shifrat e borxhit të fshehtë ndaj bizneseve dhe operatorëve te shërbimeve “sipas verifikimeve” të Ramës po rriten dita ditës me gallop, tha 600 milionë, e bëri 1 miliard dhe tani si përqindje ndaj PBB-së po na e deklaron 1.5 mld Euro.

Ne i themi shqiptarëve se borxhi i Shqipërisë është i matur, i mirë-administruar dhe nuk është rritur sipas shifrave dhe përkufizimeve absurde të Edi Ramës.

Në 2005 vendi trashëgoi një borxh prej 57.4% të PBB-së, arritëm ta ulim ne 53.4% në vitin 2007 dhe ndonëse u përballëm me krizën më të madhe të ekonomisë botërore, të Europës dhe fqinjëve tanë, partnerëve tanë më të mëdhenj tregtarë dhe ekonomik Greqisë dhe Italisë, e mbyllëm vitin 2012 me një borxh të çertifikuar nga institucionet ndërkombëtare prej 61.9% të PBB.

Në këto 8 muaj, i ashtuquajturi borxh i fshehtë faktik nuk qëndron as si koncept dhe as si vlerë dhe shifrat dhe faktet për të do t’i bëhen transparente publikut ditë për ditë duke nisur nga sot.

Është e vërtetë që disa kompani kanë avancuar me shpejtësi në punët publike, por kjo ka qenë zgjedhje e tyre për të kapur kufirin e 70% të punimeve të kryera në mënyrë që të marrin pjesë në tendera të tjerë publikë. Përshpejtimi i punimeve në këtë rast nuk mund të shndërrohet në borxh të shtetit. Pagesat, sipas përcaktimeve ligjore, bëhen në kohën e caktuar sipas kontratës përkatëse dhe janë të parashikuara në planin afatmesëm buxhetor.

Është e vërtetë gjithashtu, që disa biznese mund të kenë derdhur kontribute tatimore, bazuar në parashikime dhe si parapagim më shumë seç rezulton pas faktit, pra pas kontrollit tatimor, por këto nuk janë borxhe të shtetit por gjendje kreditore e biznesit e cila i shërben atij për të shlyer detyrimet fiskale në muajt e ardhshëm.

Nga ana tjetër, janë të njohura shifrat e detyrimeve të prapambetura të bizneseve ndaj shtetit, të cilat së bashku kapin shifrën e 78 miliardë lekësh dhe janë disafish më të larta se gjendja kreditore e bizneseve ndaj shtetit, diferenca është natyrisht një e ardhur e pritshme e shtetit në muajt në vijim.

Në çdo rast, të dy këta komponentë nuk përbëjnë pjesë të konceptit të borxhit të shtetit, por administrohen nga Kodi Tatimor dhe Doganor i Republikës së Shqipërisë, një fakt, mungesa e njohurisë të së cilit, mund të çojë në ngelje provimi edhe studentët e ekonomisë të vitit të dytë.

Edi Rama po zbaton strategjinë e tij të vetme, të nxirjes përmes gënjeshtrës.

Duke manipuluar shifrat dhe duke ngatërruar konceptet elementare ekonomike dhe fiskale, Edi Rama, me qëllimin e qartë që të përshkruajë situatën shumë të keqe në krahasim me gjendjen e vërtetë synon:

•Së pari: të shesë për sukses për një farë kohe përmirësimin virtual të gjendjes, ndërkohë që ajo sot për sot është shumë më stabël sesa tabloja e kobshme, por false që ai pikturon çdo ditë para shqiptarëve. 
•Së dyti: të krijojë një rezervë të padukshme dështimesh me probabilitet 95% siç i thanë ekspertët ndërkombëtarë që vetë i ftoi në konferencën e Partisë Socialiste, pra të krijojë brezin e sigurisë së dështimit.
•Së treti: më shqetësuesja për shqiptarët, të krijojë një mekanizëm për mundësi abuzimi me fondet publike, me taksat, me doganat e shqiptarëve në favor të klientelës dhe nëpërmjet këti
j mekanizmi të mbajë peng bizneset dhe mediat.

I themi Edi Ramës se asnjë nga këto synime nuk ecin, pasi demokratët dhe opozita janë përballë tij, me të gjitha dokumentet dhe të dhënat e certifikuara ndërkombëtarisht dhe nuk do të lejojë mashtrimin e shqiptarëve dhe abuzimin me taksat dhe të ardhmen e tyre.

Ndaj, në ditët në vijim, ne do të komunikojmë sistematikisht dhe do të komunikojmë drejtpërdrejt me qytetarët shqiptarë për faktet dhe shifrat, të detajuara për secilën nga çështjet e trajtuara më sipër në këtë komunikim.

Së fundmi, i them Edi Ramës, se e ka të kotë me këto gënjeshtra. Por ndryshe nga kur ishte në opozitë dhe gënjeshtrat e tij sillnin dëm të moderuar, sot duhet ta kuptojë se me përgjegjësinë e tij të Kryeministrit, gënjeshtrat janë me kosto të rëndë për ekonominë e vendit dhe çdo shqiptari.

Gënjeshtrat dhe kobndjellja e tij janë faktor paniku dhe rreziku për ekonominë, ndaj duke e siguruar se gënjeshtrat s’do t’i pijnë ujë si propagandë, i kërkojmë që të përgjegjësohet e të ndalë menjëherë zindjelljen dhe panikun, i cili është faktori më i dëmshëm për ekonominë shqiptare dhe qytetarët tanë.

Ne do të bëjmë çmos ta ruajmë ekonominë nga paniku që po shkakton vetë Kryeministri por s’marrim dot përsipër të kurojmë vesin e gënjeshtarit, psikikën e frikacakut dhe paaftësinë evidente të zotit Kryeministër.

Deklarata për media e zëdhënëses së Partisë Demokratike Laura Vorpsi:

Kush shkon në spital, e ka një hall.

Edi Rama shkoi sot në spital, dhe halli i tij i madh është se ka premtuar shëndetësi falas për të gjithë, dhe sa më shumë kalojnë ditët, aq më shumë del në dritë ky mashtrim elektoral.

Mashtrimin e Edi Ramës për shëndetësi falas, nuk ka mjek që ta kurojë.

Z.Rama vazhdoi të denonconte sot punën që ka bërë në spitalet tona për vite me radhë aleati i tij kryesor që e ka drejtuar këtë sistem, pavarësisht arritjeve dhe reformave të bëra.

Z.Rama nuk u tha asgjë mjekëve dhe infermierëve se kur do të zbatojë taksën e tij progresive që do t’i ndihmojë ata të kenë të paktën 40 mijë lekë më shumë të ardhura në muaj, sic ka premtuar publikisht.

Z.Rama foli për shumë gjëra sot mes mjekëve dhe infermerëve, por nuk tha asgjë për tezën e tij për shendëtësi falas.  Kryeministri i ka tashmë të gjithë mekanizmat dhe kompetencat për të realizuar premtimin e tij elektoral, dhe nuk mund të justifikohet me asgjë. 

Nëse tek z.Rama ka dy personalitete, njëri që premton shëndetësi falas, dhe tjetri që nuk thotë asgjë për këtë tezë kur gjendet në spital, atëherë kemi të bëjmë me një devijim shqetësues, një diagnozë e rrezikshme, e cila kërkon të trajtohet me seriozitet nga mjekët, dhe ky shërbim duhet të jetë vërtet falas, në mënyrë që të mos i kushtojë shtrenjtë gjithë shqiptarëve.

Kryetari i PD Lulzim Basha ka përzgjedhur universitetin “Aleksandër Xhuvani” në Elbasan, për të uruar të gjithë studentët që nisin sot vitin e ri akademik. Zoti Basha është ndalur në rëndësinë e lidhjes së shkollës me nevojat e tregut, ku një kontribut të veçantë ka dhënë dhe zoti Basha personalisht, duke dhënë ndihmën e tij në hapjen një vit më parë të dy degëve të reja në universitetin “Aleksandër Xhuvani”, degën e shkencave të aplikuara dhe atë të teknologjisë së informacionit dhe komunikimit.

Në mesazhin e tij, zoti Basha foli edhe për kërcënimin që po i bëhet sot diplomës së merituar nga diplomat fallco apo të blera, emërimit në bazë të meritës dhe rezultateve, me ato nepotike apo politike, mbi baza jo transparente dhe me rezultate te dobëta. 

“Diploma e merituar,  nëpërmjet përkushtimit, dijes, punës dhe investimit tuaj personal ndodhet nën kërcënimin e vazhdueshëm të diplomës fallco, të diplomës së blerë, të emërimeve nepotike apo politike, mbi baza jo transparente, me nota 5 apo 6 e jo për pozicione starti, por për pozicione që zakonisht shënojnë kurorëzimin e një karriere të suksesshme. Ky është një sulm frontal ndaj shkollimit, si vlerë, ndaj duhet dhe do të qëndrojmë fort, për të lartësuar vlerën e përkushtimit të studentëve tanë, për të lartësuar vlerën e diplomës që merret me meritë, për të lartësuar meritën“  – u shpreh kryetari i PD Lulzim Basha. 

Në fjalën e tij para studentëve të universitetit “Aleksandër Xhuvani”, zoti Basha ka kujtuar edhe studentët që humbën jetën në aksidentin tragjik të Himarës.

“Më lejoni të kujtoj ata studentë të cilët tragjedia për fat të keq do i lërë përgjithmonë në kujtesën tonë dhe prindërve të tyre si studentë. Janë pikërisht ata që humbën jetën në aksidentin tragjik të Himarës, të cilët do t’i kujtojmë me nderim por dhe me nostalgji në zemrat tona, për atë çka përfaqësonin për këtë universitet dhe familjet e tyre” – u shpreh zoti Basha. 

Fjala e plotë e kryetarit të PD, në nisjen e vitit të ri akademik, në universitetin “Aleksandër Xhuvani”, në Elbasan 

“Të dashur studentë të universitetit “Aleksandër Xhuvani”, e nderuar trupë pedagogësh, të nderuar drejtues të fakulteteve, prindër, përfaqësues të qytetit dhe qarkut të Elbasanit në Kuvendin e Shqipërisë, z. Kryetar i Këshillit të Qarkut!

Është kënaqësi të rikthehem sot, me rastin e fillimit të vitit akademik për universitetet e vendit, këtu në qytetin e Elbasanit, qytet të cilin kam pasur nderin dhe privilegjin ta përfaqësoj për më shumë se dy vjet në Kuvendin e Shqipërisë.  Ndihem shumë i nderuar që më keni ftuar të jem i pranishëm, pikërisht në ditën e parë të vitit akademik të universitetit tuaj. Me këtë rast, dua t’ju uroj nga zemra gjithsecilit prej jush, një vit të mbarë dhe të suksesshëm akademik. jam i sigurt se ju qe rifilloni apo filloni për herë të parë studimet prisni me padurim t’i përfundoni ato, ndërsa të tjerë kujtojnë me mall vitet që kanë lënë pas, jo vetëm për shkak të domethënies, të kohës së mirë dhe të kujtimeve të bukura që kemi si studentë por edhe për shkak të një reflektimi tjetër, të cilin sot dua ta ndaj me ju, me shpresën se do të ketë një domethënie në vitet tuaja të studimit: Sigurisht që studionim mirë, sigurisht që kemi studiuar mirë edhe ne ish-studentët por gjithmonë mundemi më mirë dhe jeta shpesh herë hedh dritë mbi pamjaftueshmëritë e vëmendjes në vitet e studimit. Me këtë refleksion të shkurtër personal, do të desha t’ju ftoj të përdorni maksimalisht ditët, javët, muajt, vitet tuaja të studimit, për t’u formuar në mënyrë sa më të plotë si individë me dije dhe horizont të gjerë por po kështu në përputhje me nevojat e tregut dhe të vendit.

Para se të hedh fare shkurt vëmendjen tek disa nga sfidat, jo vetëm të universitetit “Aleksandër Xhuvani” por të arsimit të lartë në Shqipëri, më lejoni të kujtoj ata studentë të cilët tragjedia për fat të keq do i lërë përgjithmonë në kujtesën tonë dhe prindërve të tyre si studentë. Jane pikërisht ata që humbën jetën në aksidentin tragjik të Himarës te cilët do t’i kujtojmë me nderim por dhe me nostalgji në zemrat tona për atë çka përfaqësonin për këtë universitet dhe familjet e tyre. 

Sot, kemi fatin që ndodhemi në një vend ku ndërthurja e hapjes apo liberalizimit të  universiteteve dhe rritjes së  sektorit privat ka bërë të mundur një ofertë të shumëllojshme dhe të shtrirë në të gjithë vendin, një konkurrencë të shëndetshme midis publikes dhe privates e forcim dhe zgjerim të kapaciteteve të universiteteve publike, kudo në Shqipëri. Ky hap i ka dhënë fund një ankthi prej dekadash të prindërve tuaj por edhe tuajin personalisht dhe vëllezërve e motrave tuaja më të mëdha , ankthit nëse do ishte e mundur të studionit apo jone Universitet.  Përfundimi i këtij ankthi është natyrisht fillimi i një sfide tjetër, i një rrugëtimi tjetër që ka të bëjë me cilësinë e mësimdhënies por jam i sigurt se ashtu siç detajoi këtu rektori prof.Varoshi, konkurrenca e ndershme, përpjekja për të qenë gjithmonë një hap përpara universitetit tjetër, një hap më tej vitit që latë pas, do të mundësojë që edhe cilësia e mësimdhënies dhe në tërësi cilësia e universiteteve tona, të shkojë drejt përmirësimit.

Sfida e dytë është pa dyshim lidhja midis shkollës dhe nevojave të tregut e nevojave të vendit. Nga njëra anë, pa dyshim që investimi që ju, prindërit e pedagogët tuaj bëjnë në këto vite tek ju, ka të bëjë me zgjerimin e personalitetit të individit të lirë nëpërmjet dhënies së dijes por ky nuk është qëllimi i vetëm i universitetit. Qëllimi tjetër i rëndësishëm është që ju të dilni nga auditorët e universitetit, të përgatitur dhe me dije të cilat i nevojiten vendit dhe gjejnë vend në treg.

Në këtë emblemë të elitës së mendjes dhe dijes së gjuhës shqiptare që është  qytetit i Elbasanit me historinë e tij dhe në veçanti universiteti “Aleksandër Xhuvani”, ky investim shekullor nëpërmjet punës së pedagogëve dhe kërkuesve shkencorë ka marrë një formë të admirueshme dhe për shumëkënd të pakonkurrueshme të lidhjes mes arsimit me nevojat e tregut.

Sot, kjo lidhje ka fituar edhe dimensione të tjera me hapjen e degëve të reja, për të cilat kam qenë i ndërgjegjshëm dhe jam përpjekur të jap edhe unë ndihmën time, si për hapjen e degës së shkencave të aplikuara, apo atë të teknologjisë së informacionit dhe komunikimit, ku shpresoj dhe besoj që ata që do të ulen sot për herë të parë apo ata që do të vazhdojnë studimet, do të dalin nga këto banka të aftë dhe të zotë, për të zënë vendin e tyre në treg dhe për t’i ofruar Shqipërisë, dije dhe profesionalizëm. 

E treta dhe e fundit ka të bëjë me cilësinë e diplomës së merituar,  nëpërmjet përkushtimit, dijes, punës dhe investimit tuaj personal, e cila natyrisht ndodhet nën kërcënimin e vazhdueshëm të diplomës fallco, të diplomës së blerë, të emërimeve nepotike apo politike, mbi baza jo transparente, me nota 5 apo 6 e jo për pozicione starti, por për pozicione që zakonisht shënojnë kurorëzimin e një karriere të suksesshme. Ky është një sulm frontal ndaj shkollimit, si vlerë, ndaj duhet dhe do të qëndrojmë fort, për të lartësuar vlerën e përkushtimit të studentëve tan
ë, për të lartësuar vlerën e diplomës që merret me meritë, për të lartësuar meritën. Merita në universitete, merita në botën akademike është një pasuri kombëtare. Ju jeni pjesë e kësaj pasurie, trupa juaj pedagogjike është pjesë e kësaj pasurie, universitetet anembanë Shqipërisë janë pjesë e kësaj pasurie dhe për këtë ne nuk duhet të mjaftohemi vetëm duke u krenuar me ju, por ta mbrojmë atë me çdo kusht.

Edhe njëherë, vit të mbarë  akademik, suksese paçi këtë vit ju dhe familjarët tuaj!”

Kryetari i Partisë Demokratike Lulzim Basha deklaroi sot se opozita është e vendosur të mbrojë vlerën e konsensusit, si vlerë të kulturës europiane të politikë-bërjes dhe garanci për balancimin dhe kontrollin e pushteteve në demokraci. Duke iu përgjigjur pyetjeve të gazetarëve, lidhur me deklaratat e një dite më parë të kryetarit të Kuvendit Ilir Meta,  zoti Basha tha se deklaratat për dialog dhe bashkëpunim s’kanë asnjë kuptim, kur akti i parë i mazhorancës është prishja e konsensusit unanim të 30 majit. 

“Fjalët i merr era në qoftë se nuk shoqërohen me vepra. Stërbetimet për dialog dhe bashkëpunim me opozitën s’kanë asnjë kuptim, kur akti i parë është prita që i bëhet konsensusit unanim të 30 majit. Akti normativ i sjellë në Parlament nuk lë vend për diskutim. Këtë e di çdo kush, uroj ta dijë edhe kryetari i Kuvendit, që akti normativ o votohet, o hidhet poshtë, pra nuk ka vend për dialog. Në këtë kuptim, opozita është e vendosur të mbrojë vlerën e konsensusit, pikë së pari, si një vlerë të kulturës europiane të politikë-bërjes dhe pikë së dyti, si një garanci për balancimin dhe kontrollin e pushteteve në demokraci dhe sa kohë që arbitrariteti dhe abuziviteti janë fakte, nuk ka asnjë vlerë fjala e mirë. Fjala e mirë ka vlerë vetëm nëse shoqërohet me vepra të mira” – u shpreh kryetari i PD Lulzim Basha.

Pyetje – përgjigjet e plota të zotit Basha me gazetarët:

Z. Basha, dje kryetari i Parlamentit z. Meta ka deklaruar se opozita do të ketë të gjithë kohën e nevojshme, konform rregullores së Kushtetutës në Parlament. Ju do të vijoni të bojkotoni Parlamentin.

Kryetari i PD-së Lulzim Basha: Fjalët i merr era në qoftë se nuk shoqërohen me vepra. Stërbetimet për dialog dhe bashkëpunim me opozitën s’kanë asnjë kuptim kur akti i parë është prita që i bëhet konsensusit unanim të 30 majit. Akti normativ i sjellë në Parlament nuk lë vend për diskutim. Këtë e di çdo kush, uroj ta dijë edhe kryetari i Kuvendit që akti normativ, o votohet, o hidhet poshtë, pra nuk ka vend për dialog. Opozita është e vendosur të mbrojë vlerën e konsensusit,  si një vlerë të kulturës europiane të politikë-bërjes dhe garanci për balancimin dhe kontrollin e pushteteve në demokraci. Sa kohë që arbitrariteti dhe abuziviteti janë fakte, nuk ka asnjë vlerë fjala e mirë. Fjala e mirë ka vlerë vetëm nëse shoqërohet me vepra të mira.

Kjo do të thotë se opozitën do e shikojmë sërish jashtë dyerve të Parlamentit? 

Kryetari i PD-së Lulzim Basha: Kjo do të thotë se opozita shqiptare është në dialog të përhershëm me qytetarët shqiptarë, për këtë rrezik që i kanoset kaq herët, në një mëngjes të keq të kësaj mazhorance të re e cila e fillon jo duke u rrekur të plotësojë premtimet para qytetarëve,  por duke shkelmuar edhe ato të mira me të cilat u angazhua bashkarisht në të kaluarën jo fort të largët, siç ishte konsensusi.

Jeni konsultuar me Brukselin dhe a ka shanse që të keni realisht një takim me komisionerin Stefan Fyle, një takim i mundshëm është përfolur në media, z. Basha?!

Kryetari i PD-së Lulzim Basha: Partia Demokratike ka dialog të vazhdueshëm me të gjithë partnerët tanë europianë dhe amerikanë. Për këtë, të mos shqetësohet askush. Por askush të mos heqë vëmendjen nga ky atentat i rëndë që i ka ndodhur demokracisë dhe të mos kujtojë se Partia Demokratike apo opozita do të qëndrojnë të heshtur përballë tij. Ne do të kryejmë detyrën tonë para Kushtetutës, do të kryejmë detyrën tonë para qytetarëve, do të kryejmë detyrën tonë para demokracisë, do të kryejmë detyrën tonë para kulturës së re politike, duke qëndruar forcërisht, para vjetërsirave të shkelmimit të konsensusit dhe arbitraritetit që na serviren sot nga mazhoranca e re.

Deklarata për media e deputetit të Partisë Demokratike Oerd Bylykbashi:

Ditët e fundit doli sheshit farsa e Partisë Socialiste për gjoja paanshmërinë dhe apolitizmin e anëtarëve të saj në KQZ. Këto ditë Edi Rama shpërbleu me poste të larta në administratë ish-anëtarët e saj në Komisionin Qëndror të Zgjedhjeve për bllokimin që ata i bënë Komisionit.

Denar Biba dhe Albana Shtylla, me urdhër të Edi Ramës, bllokuan vendimmarrjen e KQZ-së, dhe me urdhër të tij braktisën detyrën në KQZ duke u dorëhequr në të njëjtën kohë. Këtë e bënë me pretendimin se ishin apolitikë. Me këtë veprim militant të dënueshëm ligjërisht, ata shkatërruan për llogari të Partisë Socialiste shkallën e parë ankimore, KQZ-në, me qëllim e vetëm që të varrosnin provat e vjedhjes prej tyre të mijëra votave dhe të një mandati në Lezhë si dhe shumë shkelje në zonat e tjera.

Për këtë sjellje, këta anëtarë të KQZ-së meritonin ndëshkim sipas Kodit Zgjedhor.  Por Edi Rama po i shpërblen për punën prej militanti të zellshëm politik. Ashtu sic dhanë dorëheqjen njëkohësisht, po njëkohësisht Denar Biba u emërua Kryetar i Komisionit të Prokurimeve Publike, ndërsa Albana Shtylla u emërua Sekretare e Përgjithshme e Kuvendit. Po kështu Ilirjan Muho u emërua Drejtor i Përgjithshëm i Hipotekave.

Sot nuk ka më shqiptar që ta besojë farsën komiko-tragjike të pavarësisë dhe depolitizimit te KQZ-së, që luajtën në Prill 2013 këta militantë partiakë, sipas regjisë së Edi Ramës. Shpërblimi i tyre me poste kyçe tregon haptazi se gjithçka bënë këta individë, e bënë si marioneta politike të mazhorancës së sotme.

Edi Rama po shpërblen kësisoj guerrilasit militantë që i shërbyen atij për të minuar parimet e zgjedhjeve demokratike, konsensusit dhe të shtetit të së drejtës. Me të tilla marioneta dhe mbi të tilla parime është bazuar rilindja e administratës së tij politike.

Kryetari i opozitës z. Lulzim Basha priti në një takim të veçantë në selinë e Partisë Demokratike të Shqipërisë, Ministrin e Punëve të Jashtme të Republikës së Turqisë, z. Ahmet Davutoglu.

Gjatë bisedës u diskutua në lidhje me trashëgiminë e fortë të marrëdhënieve Shqiptaro – Turke dhe mbi partneritetin e rëndësishëm strategjik, që ekziston prej kohësh mes dy vendeve tona. U bë një bilanc i hovit që morën marrëdhëniet Shqiptaro – Turke gjatë 8 vjeçarit të kaluar të qeverisjes së Partisë Demokratike dhe Kryeministrit Berisha, ku shkëmbimet tregtare mes dy vendeve u shtatëfishuan dhe Turqia u bë partner kryesor i Shqipërisë në lidhje me investimet e huaja, si dhe bashkëpunimin e ngushtë në fushën e energjisë, shëndetësisë, infrastrukturës, financës dhe telekomunikacionit.

Z. Basha theksoi se Partia Demokratike dhe opozita shqiptare, do të vazhdojnë të mbështesin fuqishëm partneritetin strategjik me Republikën e Turqisë dhe bashkëpunimin mes dy vendeve tona në rrafshin dypalësh dhe shumëpalësh.

Deklaratë për media e deputetit të Partisë Demokratike Aldo Bumçi:

Të nderuar qytetarë shqiptarë!

Jam këtu për t’ju bërë me dije atë që Kryeminstri Rama na e ka fshehur dhe duket se as që ka ndërmend të na e thotë.

Gjatë qëndrimit në OKB, z. Rama, e ka përfshirë Shqipërinë në një Aleancë të re të përbërë nga Etiopia, Gana, Haiti, Malawi dhe Senegali. Ky rrjet për mirëqeverisjen afrikane, na u shit si sukses i madh i marrëdhënies së tij personale me zyrën e Toni Blair, duke manipuluar mbi ndjenjat e mirënjohjes së thellë, që populli shqiptar ushqen ndaj këtij personaliteti botëror.

Kryeministri Rama e ka detyrim kushtetues të informojë shqiptarët se çfarë gjen të përbashkët ndërmjet Shqipërisë dhe Etiopisë, Ganës, Haitit, Malaëit dhe Senegalit. 
Kryeministri Rama, e ka detyrim në kuadër të Marrëveshjes së Stabilizim Asociimit, të informojë institucionalisht Bashkimin Europian, që Shqipëria është bërë anëtare e kësaj nisme.

Në kohën kur shqiptarët presin të marrin statusin e vendit kandidat në Bashkimin Europian, ky kryeministër u jep lajmin, se prioritet është bërë një aleancë e re, jashtë kësaj. 
Në kohën kur Shqipëria po mbyll vitin e katërt si vend anëtar i NATO-s, Edi Rama na zhvendos krejt jashtë këtij boshti, në rresht me botën e tretë pa na pyetur, pa na njoftuar, duke na gënjyer. Z. Rama, shqiptarët e kane zgjedhur vetë rrugën e tyre dhe modelin të cilit duan t’i përngjajnë, dhe ai është Bashkimi Europian, ai është NATO.

Deklarata për media e deputetit të Partisë Demokratike Ridvan Bode:

Qeveria e majtë prej tre javësh në detyrë, ka filluar një sulm të paprecedent dhe të paprincip kundër ekonomisë së vendit. Deklaratat e pandërprera se ekonomia e vendit është në një krizë të thellë dhe biznesi në prag të kolapsit, se financat e shtetit janë të falimentuara etj, janë pjesë e brutalitetit dhe arrogancës së pushtetit të Ramës, por nga ana tjetër dëshmon panikun dhe krizën e tij për menaxhimin e situatës, përballë mungesës së një programi të qartë reformash e masash të tjera për ti dhënë një përgjigje adekuate nevojave të tregut dhe institucioneve të tij, përballë presioneve të krizës globale.

Sikurse është konfirmuar nga raportet e njëpasnjëshme dhe të shumta të institucioneve ndërkombëtare, (FMN, BB dhe grupi i saj, Kompanitë e raitingut ndërkombëtar, divizioni ekofin i BE etj.) ekonomia shqiptare, në situatën e krizës më të thellë që ka njohur bota dhe sidomos hapësira europiane, nuk ran ë recession, nuk u përfshi në vorbullën e krizës. Ekonomia jonë ngadalësoi ritmin e saj të ritjes, konsumi pësoi rënie si rezultat edhe i rënies së dërgesave nga emigrantët, varfëria pësoi një ritje të lehtë në krahasim me 2008 duke mbetur më e ulët se në 2004, niveli i nvestimeve pësoi një tkurje të lehtë krahasuar me 2008 dhe të ardhurat e buxhetit u tkurën me rreth 1 pikë përqindje të PBB duke u ritur në vlerë absolute nga viti në vit.

Por kjo ekonomi përgjatë kësaj periudhe:
– mundësoi një ritje të pervitshme ndryshe nga sa ndodhi në ekonomitë e rajonit tonë ku ne 4 vite provuan dy here recession; Edhe për vitin 2013 në  të cilin Rama kërkon me çdo kusht krizë, sikurse u njoftua nga FMN disa ditë me parë, do të ketë një ritje ekonomike dukshëm më të lartë në krahasim me një vit më parë; Rama sot jep alarmin e remë për të justifikuar dështimin e tij të mundshëm për shkak të mungesës së një programi reformash të përshtatshme për tregu dhe ekonominë.

-mundësoi një nivel papunësie thuajse të njëjtë me atë të vitit 2008 (12.8%) dhe më të ulët nga 2004 (15%) krerjt ndryshe nga sa ndodh në rajon ku papunësia është rritur në mënyrë të pandërprerë nga 2008 duke arritur në 25% në fund 20012. Rama me alarmin e remë kërkon të lajë duart me premtimin e tij për punësimin e 1 milion të papunëve që deklaroi në fushatë;

-mundësoi një rritje të përvitshme të pagave dhe pensioneve duke rritur mbi 2 herë pagat e mbi 80% të punonjësve të administratës dhe po kështu të pensioineve të uilëta në fshat e në qytet; Rama me alarmin e remë kërkon të justifikojë bllokimin gjatë qeverisjes së tij të ritjes së paga e pensioneve;

-mundësoi një dyfishim të të ardhurave në buxhet me taksa 2.5 herë më të ulëta; Me alarmin e remë Rama kërkon të justifikojë rritjen progressive të taskave, dyfishimin e tyre mbi biznesin dhe të lajë duart me premtimet për biznese pa taksa e 95 përqind të qytetarëve që do tu uleshin taksat.

– mundësoi një dyfishim të investimeve të huaja direkte edhe në fund të 2012 në krahasim me 2004 duke qene ndër të parët në rajon si dhe një ulje të deficitit tregëtar të vendit me 1/3 në krahasim me 2004, Rama me alarmin e remë kërkon të justifikojë sulmin ndaj investitorëve të huaj disponues të disa koncebsioneve dhe biznesit në tërësi për të rivendosur regulla të reja loje për bizneset e të vetëve;

– mundësoi implementimin me sukses të programit më të madh që ka njohur vendi në rindërtimin e infrastrukturës, rrugëve, shkollave, energjisë elektrike, ujësjellësave, shëndetit public etj. Rama me alarmin e remë kërkon të justifikojë atë që ka vendosur prej kohësh në fakt, se investimet publike nuk do të jenë në axhendën e tij;

Bordi i drejtorëve të FMN, në dhjetor të vitit të kaluar, duke analizuar situatën ekonomike të rajonit, cilësoi ekonominë Shqiptare sit ë vetmen që përballë krizës globale ekonomia jonë ngadalësoi ritmet por nuk ran ë krizë dhe kjo falë politikave të kujdesshme makroekonomike si dhe reformave strukturore të ndërmara në kohën e duhur.

Çdo qytetar kur sheh kryeministrin dhe ministrat me radhë që nga mengjesi në darkë bërtasin me zë të lartë se sa keq është ekonomia e vendit, me të drejtë përpiqen të kuptojnë se çfar synojnë me këtë.

Të ishte se synohet të përbaltin atë që aritën shqiptarët anëembanë vendit nën qeverisjen e PD, do të ishte dëmi më i vogël që do të provonte gjithsejcili.
Në të vërtetë, ne mendojmë se ky është një panik që paralajmëron dështimin e një qeverisje të përçartur e pa program, klienteliste e okulte në ekzekutim, harbute dhe e dhunshme në shfaqje.

Ne mendojmë se nxirrja e situatës, përtej problematikës komplekse që ka shkaktuar presioni i krizës së zgjatur rajonale, synon të justifikojë larjen e duarve me premtimet elektorale për taksa të ulëta për 95 % të shqiptarëve, cmime të subvencionuar në bujqësi, ushqime pa tvsh, hapje të 350 mijë vendeve të punës e të premtimeve të tjera të pafund që i sollën në pushtet.

Ne mendojmë se kjo është parathenia e veprimit për rritjen e dyfishimin e taksave. Një situatë e jashtëzakonshme kërkon taksim të jashtëzakonshëm.
Ne mendojme se fryrja e paqene e borxheve, (600 milion USD deklaroi kryeminnistri kur situacione te papaguar te paraqitura nga biznesi jane rreth 100 milion USD) behet vetem per te justifikuar perpjekjen e qeverise per te ritur borxhin public me nje shifer te tille per te financuar qeverine e fryer dhe orekset e medha te kabinetit Rama per fonde publike qe nuk vijne nga mbledhja me e mire e taksave.

Ne mendojmë se nxirrja e situatës së vendit dhe përhapja e panikut nuk i shërben sigurisë së investitiorëve dhe konsumatorëve, por Rama kërkon alibinë e pastrimit të administratës dhe rialokimin e tregut me çdo çmim dhe vetëm për interesa jo publike. Qeveria ende nuk ka filluar punën dhe situate kërkon veprim të menjëhershëm. Qeveria e ka të domosdoshme të deklarojë një program konkret për çështjet e ekonomisë, por ajo vazhdon të përbaltë kuturu paraardhësit.  E nëse do vazhdohet gjatë kështu, atëhere ajo për të cilën çirret sot Rama, nuk do të jetë më një alarm i remë, porn je realitet fatal per shqiptaret.