Blog

Deklaratë për media e zëdhënëses së Partisë Demokratike, Laura Vorpsi:

Revanshi politik i mazhorancës së re, presioni dhe largimi i nëpunësve të shtetit me metodën e vjetër të luftës së klasave, po mbizotëron në çdo zyrë të administratës shtetërore. 

E gjithë administrata është nën presion, ankth dhe pasiguri për vendin e punës dhe vazhdimin e karrierës, në respekt të meritës.

Nga sot, Partia Demokratike ka hapur në faqen e saj zyrtare një portal të ri, “Denonco presionin dhe largimin nga administrata”, që do të jetë i aksesuseshëm 24 orë në ditë.

Në këtë portal çdo nëpunës, do të marrë këshillim falas për të gjitha të drejtat e nëpunësve, do të mund të denoncojë çdo rast të presionit politik për t’u dorëhequr nga detyra dhe çdo akt për largimin e padrejtë nga administrata.

Partia Demokratike i bën thirrje Edi Ramës, të ndalë presionin mbi administratën, dhe revanshin për spastrimin e saj.

Partia Demokratike fton çdo nëpunës që të denoncojë rastet e presionit apo largimit dhe i garanton ata se do ndërmarrë të gjitha masat për të çuar para drejtësisë të gjithë ata që përdorin pushtetin për të dhunuar të drejtat e nëpunësve, ushtrojnë presion e ndikim të paligjshëm ndaj tyre dhe abuzojnë me pushtetin për të larguar nga puna stafet profesioniste duke i zëvendësuar me listat e militantëve politikë.

Sotiraq Stratobërdha, është kandidati i Partisë Demokratike dhe aleatëve të saj për Kryetar Bashkie në zgjedhjet vendore që do të zhvillohen në Bashkinë e Korçës, më 3 Nëntor 2013.

Kandidatura e tij u propozua nga shoqëria civile dhe qytetaria korçare dhe u mbështet fuqishëm nga të gjitha strukturat e Partisë Demokratike Dega Korçë dhe aleatët e saj.

Sotiraq Stratobërdha ka lindur në qytetin e Korçës në vitin 1961, në një familje qytetare dhe atdhedashëse. Është diplomuar në  jurisprudencë në Universitetin e Tiranës dhe ka kryer kualifikime pas-universitare në Kanada. 
Sotiraq Stratobërdha është një nga qytetarët me një jetë aktive civile dhe profesionale që prej fillimeve të sistemit pluralist. Gjatë legjislaturës parlamentare 1992-1996 z. Stratobërdha u zgjodh deputet, përfaqësues i Korçës në Kuvendin e Shqipërisë.

Sotiraq Stratobërdha ëshë modeli i qytetarit të angazhuar korçar. Ai ka dhënë një kontribut maksimal në organizime të shoqërisë civile dhe lëvizjeve qytetare në mbrojtje të interesave të qytetit dhe qytetarëve të Korçës dhe në promovimin e traditës, urbanistikës qytetare dhe trashëgimisë së gjithanshme pozitive të qytetit të Korcës.
Kandidimi i Sotiraq Stratobërdhës gëzon mbështetje të madhe nga qytetarët e Korçës që shohin tek ky qytetar i përkushtuar një garant të zërit të tyre dhe të interesit publik e qytetar për të gjitha vendim-marrjet e rëndësishme për Korçën dhe banorët e saj.

Deklarata për media e deputetit të Partisë Demokratike Gent Strazimiri:

Prej disa ditësh, shtypi ka dhënë informacion tejet shqetësues mbi lidhjet e Ministrit të Brendshëm me të ndjerin Elvis Doçi, pronar lojrash fati, i cili u ekzekutua në një atentat mafioz para pak ditësh në Tiranë.

Ngjarja është mbuluar me mister, por mbi të gjitha, me heshtjen fajtore të vetë Ministrit të Brendshëm, Sajmir Tahiri.

Meqenëse dje në Komisionin e Sigurisë, zoti Tahiri ka kërkuar në mënyrë të përsëritur “sugjerimet” dhe “bashkëpunimin” tonë, në mënyrë shumë bashkëpunuese po i sugjerojmë të sqarojë opinionin publik për një sërë pyetjesh që qëndrojnë si hije mbi kokën e tij:

– Zoti Tahiri, cila është lidhja që keni me viktimën Elvis Doçi i njohur si pronar lojrash fati ekzekutuar në mënyrë mafioze para pak ditësh në Tiranë?

– A ka lidhje vrasja e tij me operacionin e koduar “Fund Marrëzisë” aq të pompuar nga ju personalisht?

– Zoti Ministër i Brendshëm, a keni komunikuar me viktimën dhe personat që e shoqëronin vetëm pak përpara krimit?

– A jeni i gatshëm të autorizoni Prokurorinë të këqyrë tabulatet e telefonit tuaj?

Ndiqni sugjerimet tona zoti Ministër, bashkëpunoni vullnetarisht me organet hetimore, sepse e vërteta do të dalë dhe bashkëpunimi do t’ju sillte lehtësira!

Neni 48, pika “dh”, i Kodit Penal!

Deklarata për media e deputetit të Partisë Demokratike Arben Ristani: Partia Demokratike, në mënyrë të përsëritur, me qëllim që të ngulisë mirë në mëndjen e çdo shqiptari, denoncon fuqimisht shkeljet e ligjit në emërimet në Policinë e Shtetit dhe vendosjen e kontrollit partiak mbi të. Shkelja e ligjit dhe kontrolli partiak mbi Policinë e Shtetit, janë rrezik i shtuar për demokracinë dhe me pasoja të rënda për jetën e qytetarëve. Partiakët socialistë të emëruar në drejtimin e policisë së shtetit në kundërshtim me kriteret ligjore, janë ogur i keq për të ardhmen e rendit dhe sigurisë në vend, siç është bërë e qartë edhe këto ditë ku krimi po merr jetë njerëzish në mënyrë të pandalshme. Nuk ka si të ndodhë ndryshe kur: 1- Drejtori i Përgjithshëm i Policisë së Shtetit, nuk ka shkollimin përkatës për detyrën që ka marrë, nuk ka gradën dhe përvojën që kërkon ligji dhe për më tepër është militant partiak. I ka shërbyer Partisë Socialiste si numërues i parë i saj në zgjedhjet e fundit elektorale, në Qarkun Tiranë. 2- Dy zëvendësdrejtorët e Përgjithshëm të Policisë, Sokol Bizhga dhe Altin Qato janë emëruar në kundërshtimin me ligjin sepse nuk kanë gradën që kërkon ligji për pozicionin e punës, për më tepër njëri nga nën drejtorët është nën efektin e masës disiplinore të marrë ndaj tij. 3-Drejtori i SHKB, Arben Skendo, është përsëri një militant partiak. Ai është një nga kontribuesit financiar të fushatës së fundit të Partisë Socialiste dhe renditet në listën zyrtare të donatorëve. 4-Drejtori i Personelit i Policisë së Shtetit, Xhevahir Karaj, militant i partisë socialiste. Ai ka qenë kandidat për deputet i Partisë Socialiste. 5- Të 12 drejtorët e policisë në qarqe, janë emëruar në kundërshtim me ligjin sepse asnjëri prej tyre nuk ka gradën që kërkon ligji për pozicionin e punës 6- Drejtori i Policisë së Burgjeve, Enrik Sulejmani, është arrestuar në 20 prill të vitit 2003 për trafik të qenieve njerëzore, teksa kishte detyrën e shefit të Komisariatit të Rinasit. Këta janë njerëzit që drejtojnë sot policinë e shtetit shqiptar, të gjithë të emëruar në kundërshtim me ligjin, të gjithë militantë partiak dhe ne që presim nga ata rend dhe siguri.

Kryetari i opozitës, z. Lulzim Basha priti në një takim delegacionin e Parlamentit Europian, për marrëdhëniet me Shqipërinë, të kryesuar nga Eduard Kukan. Zoti Basha ka falënderuar euro-deputetët për mbështetjen që i kanë dhënë Shqipërisë, në rrugën e saj të reformave, të cilat çuan në rekomandimin për dhënien e statusit të vendit kandidat. Ky, sipas zotit Basha, është një hap shumë i rëndësishëm për Shqipërinë. Kryetari i opozitës garantoi delegacionin e Parlamentit Europian, se me të njëjtin përkushtim që PD në qeveri përmbushi detyrimet për rekomandimin per statusin e vendit kandidat, sot në opozitë është e përkushtuar të bëjë gjithçka, për hapjen sa më parë të negociatave për anëtarësimin në BE. Zoti Kukan ka vlerësuar përpjekjet e bëra nga PD dhe mazhoranca e djathtë, për të përmbushur detyrimet për marrjen e statusit të vendit kandidat,. Zoti Kukan ka vlerësuar si shumë të rëndësishëm përkushtimin e opozitës, për të mbështetur procesin integrues të vendit. Duke folur për situatën aktuale politike në vend, z. Basha shprehu shqetësimin për shkeljen e kushtetutës dhe ligjeve, agresivitetin ndaj opozitës, fushatën e sulmeve ndaj presidentit të Republikës dhe institucioneve të pavarura: KLD, ILDKP, INSTAT, KQZ, etj nga mazhoranca. Në takim, zoti Basha nënvizoi goditjen që mazhoranca i bëri konsensusit për ligjin e nëpunësit civil, përmes një akti antikushtetues normativ, duke nëpërkëmbur parimet e dialogut dhe gjithpërfshirjes. Emërimet në kundërshtim me ligjin, në kupolën drejtuese të Policisë së Shtetit si dhe në Ministrinë e Brendshme, ku kandidati për deputet i PS mban sot postin e drejtorit të personelit, ndëshkimi kolektiv i drejtorisë së krimit ekonomik, emërimet jo transparente dhe jo meritokratike në administrimin e financave dhe pasurive publike të shqiptarëve, shkarkimi i drejtoreshës së INSTAT, kanë qenë një tjetër temë e diskutimit, mes zotit Basha dhe delegacionit të Parlamentit Europian. Kryetari i opozitës shprehu shqetësim për aktin normativ për buxhetin, si një akt të paligjshëm, i cili pritet të përkeqësojë treguesit e zhvillimit ekonomik të vendit dhe të cënojë rëndë mirëqenien e çdo shqiptari. Që prej vitit 2009 është sanksionuar në ligj, që qeveria mund të marrë hua për të financuar investimet publike, por jo për të mbuluar rroga apo shpenzime operative. “Përmes aktit normativ, – theksoi zoti Basha, – në mënyrë të paprecedentë qeveria ligjëron heqjen dorë nga mbledhja çdo muaj, e rreth 80 milionë dollarëve, të cilat nuk dihet se ku do të përfundojnë”. Kryetari i opozitës e ka konsideruar përqasjen e qeverisë së re ndaj financave të vendit, rrezik për stabilitetin ekonomik.

Deklarata për media e zëdhënëses së Partisë Demokratike Laura Vorpsi: Dy ditë më parë, Partia Demokratike ngriti shqetësimin për praninë e vëllait të Kryeministrit, Olsi Rama në një delegacion zyrtar në Izrael. Pyetjet që bëri Partia Demokratike janë pyetjet e cdo shqiptari. A është Olsi Rama përfaqësues i biznesit? A është ai përfaqësues i qeverisë, në këto takime? Pse gjendej në një delegacion me zv-Kryeministrin dhe Ministrin e Bujqësisë? Reagimi i Kryeministrit ishte zhgënjyes. Asnjë transparencë dhe asnjë përgjigje për pyetjet tona. Nga verifikimi, rezulton se Olsi Rama nuk ka pasur dhe nuk ka asnjë biznes të regjistruar në Shqipëri. Atëherë, edhe një herë po pyesim sot, cili është roli i vëllait të Kryeministrit në të tilla vizita dhe në të tilla delegacione zyrtare jashtë vendit?