Nënkryetarja e PD, Pampuri: Qeveria është shndërruar në një qeveri për një grusht oligarkësh me interesa të ngushta me qeveritarët nëpërmjet kontratave korruptive, PPP-të abuzuese

Postimi i plotë i nënkryetares së PD, Oriola Pampuri:

Përgjatë dy dekadave te fundit popullsia e Shqipërisë është plakur me ritme të shpejta, gati dy herë më shumë se norma mesatare e plakjes së popullsisë në vendet e BE.

Edhe pse plakja e popullsisë mund të duket si një proçes normal demografik i shteteve në zhvillim apo ato të zhvilluara, efektet socio-ekonomik që krijon kjo situatë, kërkojnë reagim dhe politika për ta përshtatur impaktin në ekonominë e vendit por dhe për tregun e punës.

Shqipëria shënon po ashtu thuajse  numrin më të lartë të papunësisë tek të rinjtë, mbi 32%, gjithashtu dhe numrin më të lartë të popullisisë +65vjeç përkundrejt popullsisë (rreth 14%), tipar ky dominues në vendet me nivel ekonomik të përparuar, ndryshe nga vendet në zhvillim si Shqipëria.

Mesatarisht Shqipëria humbet deri në 3% të PBB kosto oportune nga emigrimi çdo vit i profesionistëve. Qartazi për 11 vite me rradhë qeverisje të majtë, është përkeqësuar mjedisi i sipërmarrjes, mungesa e konkurencës, e meritokracisë, duke vijuar dhe me një përqasje ndaj shtresës së mesme jo stimuluese, si tatimi i ri ndaj mbi 200 profesioneve të lira, i cila përkeqëson zhvillimin dhe produktivitetin e tyre.

Politikat stimuluese mungojnë tërësisht, po ashtu financimi në inovacion, start-up, apo sektorët tradicional zhvillimor të vendit si Bujqësia dhe industria e lehtë përpunuese janë në nivele disa herë më të ulta se vendet e rajonit, çka i bën produktet shqiptare jo të konkurueshme as së brendshmi e as së jashtëmi.

Në këtë model qeverisje e për pasojë zhvillimi ekonomik ku qeveria është shndërruar në një qeveri për një grusht oligarkësh apo njerëzish me interesa të ngushta me qeveritarët nëpërmjet kontratave korruptive, PPP-të abuzuese, po e asfiksojnë ekonominë tonë të vogël, në një prodhim gjithnjë e më të shtrenjtë, gjë që ka krijuar një mjedis që po i shkurajon qytetarët që të ndërtojnë të ardhmen e tyre në vendlindje.

Shqiptarët meritojnë një qeverisje të pergjgjeshme, transparente por mbi të gjitha që orientohet drejt zhvillimit e mirëqënies.

Partia Demokratike e Shqipërisë, shumë shpejt do të prezantojë programin e saj qeverisës për ti dhënë frymëmarrje familjeve, biznesit, të rinjve dhe dinjitet pensionistëve e shtresave të tjera sociale. Ky program do të mund të diskutohet dhe konsultohet me grupet e interesit si dhe komunitetet lokale në çdo bashki të vendit.