Blog

Harta e familjeve politiko mafioze është një instalacion për të simboliziar qeverinë e Edi Ramës në 5 vitet e fundit.

Për herë të parë, gjatë qeverisë së Ramës Shqipëria mori kudo në Perëndim imazhin e një vendi që, me mbeshtetjen e qeverisë, prodhon dhe trafikon vetëm kanabis dhe krim, duke u cilësuar gjerësisht në botë si Kanabistan.

Harta është rreth 2 metra e gjysëm e lartë dhe mban emrat e personave të akuzuar publikisht ose që janë dënuar vetë për krime të rënda, ose që kanë lidhje të forta me trafikun e drogës dhe krimin e organzuar me vend.

Në hartë janë emrat e Mark Frrokut,  Arben Ndokës, Armando Prengës, deputetët e qeverisë të përjashtuar për vrasje, prostitucion,trafik droge. Janë emrat e Vangjush Dakos, Qazim Sejdinit, Elvis Roshit, kryebashkiakëve të lidhur me krimin e organizuar dhe trafikun e drogës, si dhe të njerezve të afërt politikë të Edi Ramës, Fatmir Xhafaj, Saimir Tahiri, Granoz Ruci e Taualnt Balla.

Bashkë me Balilin, Eskobarin e Ballkanit që kontrollon Sarandën dhe nuk kapet nga policia, harta e drogës dhe e familjeve mafioze me mbështetje qeveritare, është dëshmia se Edi Rama bashkëqeveris me krimin e organizuar.

Në Sheshin Skënderbej shfaqet statuja e Drejtësisë me portretin e Edi Ramës, që simbolizon kapjen politike të drejtësisë për t’i shërbyer krimit dhe korrupsionit.

Statujën e Drejtësisë 3 metra të lartë e mbajnë 10 të rinj të maskuar si Edi Rama, Fatmir Xhafaj, Saimir Tahiri, Agron Xhafaj, Moisiu Habilaj për të treguar se Drejtësia është vënë në shërbim të trafikut të drogës, krimit të organizuar dhe qeverisë së lidhur me të.

Një simbol tjetër i shpërfytyrimit të Drejtësisë nga pushteti është portreti i Ramës që ka zëvendësuar sytë e mbyllur të Drejtësisë së barabartë për të gjithë me syrin që ai i shkel krimit për ta favorizuar dhe mbrojtur atë.

Peshorja e drejtësisë, që duhet të ishte e barabartë, peshon nga mbrojtja e Saimir Tahirit, Fatmir Xhafajt dhe parave të tyre të drogës, ndërsa Kushtetuta, që mbron të drejtat e qytetarëve të zakonshëm, është zhvlerësuar nga drejtësia politike e Edi Ramës.

Raporti ka të paktën një muaj që ka dalë dhe Edi Rama nuk u kujtua të ftonte për diskutimin e këtij raporti. Përkundrazi, u vërsul për të marrë meritat për këtë raport dhe për të treguar me gisht opozitën si pengesë për rrugëtimin europian te Shqipërisë.

Sot, Edi Rama e sjellë këtë raport këtu në një përpjekje të mjerë për të mbuluar atë që i ka ndodhur në Samitin e Sofjes, atë që i kanë thënë copë në sy drejtuesit e institucioneve europiane, kryeministrat e vendeve anëtare.

Ai e ka futur me ngut dhe në panik për një arsye të vetme: për të vazhduar fushatën e tij mjerane për të gjetur një fajtor për mesazhin që i kanë dhënë edhe mbrëmë për 3 orë me rradhë: se ti Edi Rama, Fatmir Xhafaj dhe qeveria jote e lidhur me krimin dhe korrupsionin jeni të vetmet pengesa.

Pra, pas kthimit nga Sofja, ku ia thanë copë në sy se Edi Rama nuk ka bërë detyrat e shtëpisë, madje akoma më keq, i ka katranosur keq e më keq ato, filloi t’i bjerë dajres së shpuar se opozita, armiku i brendshëm, po saboton projektin europian të shqiptarëve. Edhe sot ka ardhur t’i bjerë kësaj dajreje për të thënë se jemi ne pengesa. Natyrisht, ky qëndrim qesharak është shprehje e panikut që të ka kapur e nuk të lëshon.

Ti e di fare mirë, më qartë se kurrë më parë se ti Edi Rama ke dështuar të plotësosh kushtet që Shqipërisë t’i hapen bisedimet për t’u bërë pjesë e familjes së madhe europiane.

E keni parë? Nuk i mbajnë më leqet. Dridhet nga pyetja e thjeshtë e një gazetareje 25 vjeçare. I merret fryma sa herë përballet me të vërtetat. Edi Rama, ti dhe propaganda jote shkërrmoqeni nga ballfaqimi më i thjeshtë me hallexhinjtë e këtij vendi.

Paniku të ka kthyer në fis. Të ka kthyer në fis se kërkon armikun e brendshëm që, për ty, si për çdo autokrat të korruptuar e të lidhur me krimin, është opozita. Je përgatitur pra t’u thuash shqiptarëve se nëse nuk hapen negociatat në qershor, fajin e ka opozita.

Dua t’i kujtoj sot Edi Ramës, baronëve të tij të drogës dhe të krimit se nuk i quajti Partia Demokratike avionët e drogës mushkonja. Jo! Ishte ti Edi Rama.

Nuk i fshehu Partia Demokratike trafikantët që kërkoheshin në operacion ndërkombëtar në makinat e deputetëve. Ishte ti Edi Rama!

Nuk e zhduku Partia Demokratike kërkesën e Interpolit për të ekstraduar deputetët e inkriminuar, si Mark Frroku. Ishe ti Edi Rama!

Nuk e vuri Partia Demokratike Saimir Tahirin Ministër të Brendshëm. Ishe ti Edi Rama. Nuk e lidhi Partia Demokratike Saimir Tahirin me bandën e Habilajve. Nuk ia la Partia Demokratike Audin dhe skafin e ministrit narkotrafikantëve për të bërë trafik droge me imunitet zyrtar.

Nuk e zgjodhi Partia Demokratike, por ti Edi Rama, edhe Ministrin tjetër të Brendshëm me vëlla të dënuar për  trafik ndërkombëtar droge që nuk kishte shlyer asnjë ditë dënim e vazhdonte dhe vazhdon të jetë bosi i drogës në Vlorë, një nga kokat e krimit të organizuar në Shqipëri.

Nuk i siguroi Partia Demokratike mbrojtje dhe lehtësira për të vazhduar trafikun e drogës dhe pastrimin e parave. Nuk e ndryshoi PD ligjin për të mos e ekstraduar Agron Xhafajn. Nuk e vuri PD policinë e Vlorës dhe Drejtorin e Përgjithshëm të Policisë në varësi të Agron Xhafajt. Jo! Këtë e bëre ti Edi Rama me Fatmir Xhafajn.

Nuk i caktova unë deputetët dhe kryetarët e bashkive trafikantë, kriminelë, përdhunues nga Arben Ndoka e Mark Frroku tek Armanda Prenga dhe Elvis Roshi me shokë. Këto nuk i bëra unë, nuk i bëri Partia Demokratike. Këto i bëre ti Edi Rama. Prandaj, çfarëdo daulleje të shpuar t’i biesh sot këtu nga kjo foltore, të vërtetës nuk i ikën dot.

Ti Edi Rama, Fatmir Xhafaj dhe qeveria jote e lidhur kokë e këmbë me krimin dhe korrupsionin jeni e vetmja pengesë për hapjen e negociatave të Shqipërisë me Bashkimin Europian.

Po ta them edhe një here, se ke humbur totalisht arsyen midis avujve të pluhurit të bardhë dhe delirit të ERTV-së, Bashkimi Europian nuk është ERTV. As BE, as shqiptarët nuk i hanë më broçkullat dhe gënjeshtrat që këput nga mëngjesi deri në darkë. Bashkimi Europian do dhe pranon vetëm fakte dhe rezultate.

Ti di dhe do vetëm llafe boshe, gënjeshtra, mashtrime, shpifje, trillime, poshtërime, sharje, fyerje dhe kërcënime kundër qytetarëve të tu, kundër gazetarëve, kundër opozitës, madje edhe kundër europianëve që ta thonë copë në sy të vërtetën:

• Se mbreti është lakuriq
• Se Shqipëria nën regjimin tënd është kapur tërësisht nga krimi dhe korrupsioni
• Se ekonomia është në krizë me zero investime të huaja
• me biznesin vendas nën thundrën e taksave që vetëm rriten, me papunësinë rekord
• me media të kapura
• me një vend që eksporton drogë dhe importon plehra
• me një grusht klientësh të tu Edi Rama dhe të ministrave të tu të megakorruptuar, të cilët kontrollojnë gjithçka; koncesione, PPP, inceneratorët vdekjeprurës, që po paguhen me qindra milionë euro nga lekët e taksave të shqiptarëve për të mbushur xhepat e Edi Ramës, të  Arben Ahmetajt me shokë, ndërkohë që helmojnë fëmijët e shqiptarëve,
• me varfëri të shtuar,
• me emigracion që rritet çdo ditë
• me rini të pashpresë dhe prindër të dëshpëruar në kufijtë e panikut.

Edi Rama ti je arkitekti dhe autori i gjithë këtyre gjëmave, je ti po kështu që mohon gjithçka.

Dikush të akuzoi Ministrin e Brendshëm me dëshmi dhe material audioviziv se mbron vëllain trafikant të drogës. Ti, Edi Rama në vend që të merreshe urgjentisht me ministrin dhe vëllain trafikant të drogës, fillove sulmin ndaj dëshmitarit, ndaj denoncuesit, ndaj gazetarëve, ndaj opozitës.

Ekspertizën na e nxorre brenda 12 orëve. Po ku e bëre ekspertizën Edi Rama? Kush ta dha? Ku e çove? Ti je një gënjeshtar dhe vazhdon të bësh atë që ke bërë këto 5 vjet sepse mbron kriminelët. Këtë ke bërë në çdo rast, kur kriminelët e tu janë bërë publikë, që t’i mbrosh, justifikosh dhe të shpëtosh.

Kujtohuni të gjithë, kështu bëri me Mark Frrokun, me Arben Ndokën, me Armando Prengën, me Elvis Roshin, me Saimir Tahirin, kështu po bën tani me Agron Xhafajn dhe Fatmir Xhafajn. Kështu bëri me drogën. Ju kujtohet kur u thoshte shqiptarëve këtu nga kjo sallë se “avionët janë mushkonja”. Ju kujtohet kur ju thoshte “nuk ka drogë, jeni të marrë se thoni që mbillet drogë”. Ju kujtohet se fliste për Elvis Roshin, “si një i ri i papjekur në emigracion”, njësoj siç flet sot për Agron Xhafën.

Largimi i kontrolluar dhe në fshehtësi me urgjencë i Agron Xhafajt është ekspertiza e plotë e audiopërgjimit. Agron Xhafaj nuk u largua për të kryer dënimin si njëri i penduar. Po të kishte qenë kështu, do ta kishte bërë me parë këto 15 vjet, do ta kishte bërë më parë këto 8 vjet, që nuk ka nevojë të marrë vizë për të shkuar në Itali, falë Partisë Demokratike.

E vërteta është se ai u largua si pjesë e një plani kriminal për të shpëtuar Fatmir Xhafajn dhe mbi të gjitha për t’i shpëtuar hetimit në Shqipëri të aktivitetit të tij kriminal. U largua i shoqëruar me temenara nga policia.

Veprimet e prokurorisë Rama-Xhafaj që e lanë të largohej janë skandaloze. Nëse ndaj tij ka filluar hetim, pse e lanë të ikte? Nëse nuk ka filluar hetim, pse nuk ka filluar?

Vetë largimi i Agron/Geron Xhafës, 15 vjet pasi ishtë shmangur drejtësisë, 10 orë pas publikimit të audiopërgjimit është jo vetëm prova, por është edhe akti për ta shmangur nga ballafaqimi me dëshmitarin, për t’i dhënë kohë krimit të organizuar që ta kërcënojë dhe ta blejë me para.

Njeriu që mban krimin në këmbë u zhduk në mes të natës duke i zhdukur zërin, fytyrën dhe pamjen. Fatmir Xhafaj dhe Edi Rama ofruan të gjithë infrastrukturën shtetërore për ta pritur në orën 22:00 të natës në prokurori, gjoja për të dhënë zërin, në vend që t’i vinin hekurat dhe për ta degdisur, izoluar me nderime policore, larg hetimit në Shqipëri.

1. Ku është Agron Xhafaj?
2. Çfarë dënimi po vuan?
3. A po e vuan dënimin?
4. Në cilin burg ndodhet?
5. Përse nuk foli me zë direkt në televizion apo në telefon?
6. Përse e hoqën menjëherë nga Shqipëria?

Fatmir Xhafa dhe Agron Xhafaj funksionojnë si kokat e një familje mafioze, që kanë ofruar të gjithë infrastrukturën shtetërore, së pari, që i vëllai të vazhdojë të jetë, koka e krimit në të gjithë Shqipërinë dhe së dyti, të largohet i qetë jashtë Shqipërisë.

7. A ka biseduar Fatmir Xhafaj vetë me prokurorët e çështjes së të vëllait?
8. A i ka çuar fjalë veglave politike të Edi Ramës dhe Fatmir Xhafës, Arta Markut dhe Donika Prelës?
9. A u ka bërë presion të zbatojnë urdhrat e tij për të mos zbatuar ligjin, i cili detyron prokurorinë të kërkojë ndalimin e një shtetasi të dyshuar për trafik droge.
10. Përse policia dhe prokuroria nuk kërkuan menjëherë bllokimin e pasaportës dhe ndalimin e daljes jashtë vendit të Agron Geron Xhafajt?
11. Kush e njoftoi policinë? Kush e njoftoi Edi Ramën? Kush e njoftoi Fatmir Xhafën për identitetin e dëshmitarit X, menjëherë pas publikimit të videopërgjimit nga Partia Demokratike?

Natyrisht, këto janë pyetje vetëm retorike, përgjigjet sot i di dhe i njeh çdo shqiptar.

Zonja dhe zotërinj,

Vëllezër dhe motra,

Sot shteti ka rënë.

Familja mafioze Xhafaj me mbështetjen direkte të Edi Ramës ka shkelur dhe shkel çdo minutë ligjet dhe Kushtetutën e vendit për të mbrojtur Agron Xhafajn, për të mbrojtur Fatmir Xhafajn,

Shkelet në mes të ditës ligji antimafia. Ligji antimafia, është një ligj i miratuar në vitin 2010 me një arsye të vetme: për t’i dhënë garanci të plota Bashkimit Europian se Shqipëria e asaj kohe do të kishte jo vetëm vullnetin, por edhe kornizën ligjore për të goditur ashpërsisht krimin dhe pasuritë e krimit.

Në çdo sistem normal dhe juridik, barra e provës është tek akuzuesi, por për të luftuar mafian, shteti italian futi në forcë, Ligjin Antimafia që është një ndër ligjet më të suksesshme në luftën kundër krimit të organizuar. Pak vende në Europë e kanë, por shumë vende në Europë duan ta adoptojnë. Ne e adoptuam në vitin 2010.

Çfarë thotë Ligji Antimafia?

“Nëse dikush dyshohet, ka indicie se është pjestar i krimit të organizuar, apo se merret me trafik droge, pasuritë e këtij personi, pasuritë e familjarëve të këtij personi verifikohen, sekuestrohen dhe nëqoftëse nuk justifikohen nga aktiviteti ekonomik, konfiskohen pa gjyq”.

Ky është Ligji Antimafia dhe ka për qëllim:

Së pari, të shkatërrojë çdo motiv të krimit të organizuar. Sepse, nëse ky ligj zbatohet, asnjë kriminel, asnjë anëtar bande, asnjë trafikant, nuk i gëzon dot frutet e krimit. Ato konfiskohen pa gjyq.

Së dyti, Ligji Antimafia ka për qëllim t’i heqë krimit të organizuar mjetet financiare me të cilat mund të vazhdojë, të rrisë dhe të thellojë perandorinë kriminale.

Ligji Antimafia nuk mbulon vetëm pasuritë e personit të dyshuar për aktivitet kriminal, por mbulon edhe familjarët e këtij personi, duke përfshirë, prindërit, fëmijët dhe vëllezërit.

Pra në bazë të Ligjit Antimafia, Agron Xhafaj dhe pasuritë e tij, Fatmir Xhafaj dhe pasuritë e tij, e gjithë anëtarët e familjes Xhafaj, duhet t’i nënshtrohen një kontrolli të imët të pasurive të tyre, pasurive në emër të tyre, pasurive të cilat dyshohet se janë fshehur në emra të tjerë dhe këto pasuri duhet të konfiskohen.

E dëgjuat Fatmir Xhafaj kur e pyetën gazetarët: A je ti subjekt i Ligjit Antimafia? Teorikisht po tha, praktikisht jo!

Lapsus apo e vërteta?

Po të ishte lapsus, gjysma e së keqes, por ishte e vërteta.

Fatmir Xhafaj siç e ka pranuar, është në parim, subjekt i Ligjit Antimafia, sepse vëllai i tij nuk është thjesht i dyshuar si anëtar i një organizate kriminale. Vëllai i tij nuk është thjesht i dyshuar si trafikant droge. Vëllai i tij është i dënuar si anëtar i një organizate ndërkombëtare kriminale. Vëllai i tij është i dënuar si një nga krerët e një organizate kriminale të trafikut të drogës.

Pra, përgjigja është, po. Fatmir Xhafaj është subjekt i Ligjit Antimafia, njësoj si Agron Xhafaj, por praktikisht jo, thotë Fatmir Xhafaj dhe këtu ose është lapsusi ose e vërteta e vetme që ka thënë këto dy javë.

Natyrisht sa kohë që ai është Ministër i Brendshëm nuk ka si Ligji Antimafia të veprojë mbi të a kohë që ai është shefi qeveritar i policisë, e cila ka për detyrë të nisë procesin e verifikimit të aseteve të dyshuara që vijnë nga aktivitete kriminale, sa kohë që ai është shefi politik i Arta Markut dhe i Donika Prelës, praktikisht ligji nuk ka fuqi mbi të, siç nuk kishte për 4 vjet fuqi mbi Saimir Tahirin.

Ligji ka fuqi vetëm për Dritan Zaganin, i cili rrëmbehet në mes të natës, burgoset, torturohet dhe detyrohet të largohet në azil. Ligji ka fuqi vetëm për të mbajtur në burg kuksianët e pafajshëm, që u ngritën për mbijetesë kundër traut që Edi Rama u vuri te shtëpia, por jo për Agron Xhafaj e aspak për Fatmir Xhafaj.

Ja pra, këtu e ka degdisur Shqipërinë ky që do të bilbilosë këtu për t’i dhënë vetes së tij alibinë se njeri tjetër nuk e beson, se opozita po bllokon integrimin europian të Shqipërisë.

Shqipëria është i vetmi vend në Ballkan, Europë dhe në botë ku Ministri i Brendshëm është subjekt i ligjit antimafia. Ai që ka për detyrë ta zbatojë këtë ligj, është vetë subjekt i këtij ligji. Fatmir Xhafaj është i vetmi rast në botë ku ditë pas dite, orë pas orë, zgjat agoninë e tij dhe të shefit të tij me një arsye: të shkatërrojë provat, të kompromentojë hetimin, të garantojë pasurinë dhe pushtetin e familjes mafioze Xafaj. Dhe për këtë dje, PD ka marrë denoncime nga buyrime të sigurta me prova dhe fakte se familja mafioze Xhafaj, me inkurajimin dhe mbrojtjen e Edi Ramës, është thelluar në skenarin kriminal për të mbuluar krimin, për të mbrojtur Agron Xhafajdhe Fatmir Xhafaj.

Të paktën 200.000 euro i janë ofruar një të afërmi të Dëshmitarit X nga persona me rrezikshmëri të lartë shoqërore, vrasës të skeduar nga Vlora dhe Fushë Kruja për të mohuar dëshminë e bërë publike.

Ky është shteti i Edi Ramës. I gjithë shteti dhe banditët, miqtë e këtyre, me të cilët hanë e pinë dhe vjedhin vota për të vazhduar për të ushqyer pushtetin e tyre kriminal, që e kanë mbushur këtë sallë me deputetë gojëkyçur, se nuk vijnë këtu as në emër të qytetarëve dhe as në emër të socialistëve, por në emër të bandave me të cilët vodhën votat, ky shtet ka vetëm një prioritet: jo të ndihmojë qytetarët, jo të shpëtojë qindra e mijëra familja nga katastrofa ekonomike që i kërcënon ditë për ditë por të mbrojë kriminelët me të cilët ka ardhur në pushtet dhe me të cilët ndajnë pushtetin.

Kjo është arsyeja e vetme pse vazhdojnë të mbahen pas atyre karrigeve. Ky është shteti mafioz, shteti i kapur, siç thotë raporti i DASH, siç thotë deklarata përfundimtare e Samitit të Këshillit Europian të Sofjes.

Ligji antimafia nuk zbatohet. Ligji më i rëndësishëm për luftën kundër krimit të organizuar nuk zbatohet. Shkelet me të dyja këmbët ligji i vettingut në polici. Kërkohet që edhe polici roje i depos në fshatin më të largët të Ersekës, të tregojë lekët sesi ka blerë televizorin, të tregojë faturën sesi ka blerë biçikletën, ndërsa Fatmir Xhafaj, Ministri i Brendshëm nuk i nënshtrohet vettingut për këtë arsye.

Ne iu kërkuam dhe iu premtuam votën tonë në këtë sallë për ligjin e vettingut të policies, nëse do të niste nga Fatmir Xhafaj. Por ju e refuzuat, Edi Rama e refuzoi, Fatmir Xhafaj e refuzoi. Tani e kuptojmë të gjithë se pse:

Që këta gardiste dhe policët anëembanë Shqipërisë të mbahen nën terrorin e vettingut, por Fatmir Xhafaj t’i shpëtojë ligjit antimafia.

Që këta t’i heqin nga puna, nëse nuk tregojnë faturën e një motoçiklete apo një frigoriferi, por Fatmir Xhafaj dhe Agron Xhafaj të zotërojnë rrjetet e basteve, ndërtimet që ngrihen nga Vlora në Tiranë, Pogradec dhe Maqedoni, kompani që furnizojnë policinë e shtetit me pajisje, aktivitet ekonomik mafioz i shtrirë anëmbanë Shqipërisë.

Këto janë arsyet dhe të vërtetat që i dimë ne, që i di Vlora dhe i ka marrë vesh e gjithë Shqipëria. I dinë edhe partnerët, sepse Edi Ramës ia thanë copë në Sofje në sy: “Ik në shtëpi se s’ke bërë detyrat”. Dhe akoma më keq siç e ka dëgjuar edhe mbrëmë për 3 orë: “Jo vetëm që s’ke bërë detyrat, por me këto që ke bërë e po bën, ti je pengesa e vetme për hapjen e bisedimeve të anëtarësimit për Shqipërinë Europiane”.

Zonja dhe zotërinj

Ligji Antimafia nuk zbatohet. Ligji i Vetingut për Policinë pret kokat e policëve të thjeshtë, por ruan Ministrin, vëllain e trafikantit të drogës. Dhe më e rënda nga të gjitha, Fatmir Xhafaj dhe Edi Rama janë  drejtëpërdrejt të përfshirë në një komplot shtetëror, mafioz për të mbyllur me metoda mafioze këtë aferë, këtë skandal të përmasave europiane.

Ky në vetvete është një krim i rëndë, i parashikuar nga ligjet penale të vendit. Vetë Edi Rama dhe Fatmir Xhafaj me hapat që kanë ndërmarrë, me fallsifikimin dhe deklaratat fallso për gjoja ekspertizën që e bëri në Surrel për 12 orë, me largimin pa i hyrë gjëmb në këmbë nga hetimi të Agron Xhafajt, përmes kërcënimit të bandave mafioze të  dëshmitarit,  të gazetarit, po konsumojnë vepra të rënda penale, më e pakta nga të cilat, është pengimi i drejtësisë. Kjo është Shqipëria.

Dy vjet më parë, në këtë sallë miratuam reformën në drejtësi. Pse e miratuam? Që politikanët e korruptuar dhe të lidhur me krimin dhe kriminelët, anëtarët e grupeve të organizuara kriminale të dalin para drejtësisë.

Ku jemi sot ?

Po bëhen përpjekje gjigande, që Sajmir Tahiri të shpëtojë pa u lagur, t’ia hedhë pa u lagur ose duke u njomur fare pak, duke u bërë presion prokurorëve dhe gjyqtarëve.

Ku jemi sot ?

Fatmir Xhafaj, Ministër i Brendshëm ka një detyrë dhe vetëm një detyrë, të shpëtojë vëllanë e vet dhe lëkurën e vet duke përdorur shtetin dhe bandat mafioze.

Ku jemi sot ?

Edi Rama nga mëngjesi deri në  darkë merret  vetëm me këtë çështje; mbrojtjen e kriminelëve, siç bëri në të kaluarën edhe sot, vetëm me mbrojtjen e kriminelëve. Vendi është pa qeveri. Të gjitha energjitë, e gjithë koha jonë i dedikohet luftës kundër kriminelëve që Edi Rama ka sjellë në këtë parlament, në godinat e qeverisë e kudo në institucione. E gjithë energjia dhe koha e Edi Ramës merret me mbrojtjen e tyre.

Prandaj Shqipërinë nuk e viztojnë më as delegacione ekonomike, as investitorë të huaj, por vetëm ministra të brendshëm, shefa policish, delegacione të inteligjencës, që kanë një dhe vetëm një qëllim,  të shohin sesi mund të kontrollojnë dëmin që kryen qeveria e Edi Ramës e lidhur kokë e këmbë me krimin.

Në një situatë normale Agron Xhafaj duhet të ishte sot në qeli duke u hetuar për vepra të reja penale. Fatmir Xhafaj, nëqoftëse do të kishte një fije nder, duhet ta kishte çuar atje vëllanë  e vet dhe menjëherë pas kësaj të jepte dorëheqjen dhe t’i nënshtrohej ligjit antimafia. Por kjo nuk ka ndodhur e nuk ka për të ndodhur sa kohë që Edi Rama është kryeministër.

Nëqoftëse do të ishim një vend sadopak normal, sa Maqedonia, prokuroria do të kishte marrë menjëherë në pyetje Fatmir Xhafën, Agron Xhafën, Edi Ramën, autorin e ekespertizës. Por nuk ka prokurori. Arta Marku, Donika Prela dhe ushtarët e tjerë të Edi Ramës janë aty vetëm për të garantuar që ligji të mos zbatohet. Prandaj u zgjodhën pa veting, prandaj u zgjodhën në shkelje të Kushtetutës.

Shteti ka rënë. Shteti është kapur totalisht. Ndaj vëllezër dhe motra ka mbetur ajo që I mbetet njerëzve të lirë, ajo që prej 200 vitesh ka sanksionuar Montesquie: “Kur ligji, Kushtetuta shkelen, kur qeveria qeveris jashtë ligjit dhe kushtetutës, është e drejta e Sovranit të marrë fatin në dorë”

Unë dua sot të ftoj të gjithë shqiptarët të bashkohen me qindra mijëra protestuesit, në protestën më të madhe kombëtare, të Shtunën në 26 Maj, në orën 11. 00.

Të bashkohemi si njerëz të lirë, sepse ne nuk mund të humbasim më energjitë, kohën tonë çdo ditë duke u marrë me kriminelin e radhës që na servir Edi Rama në politikë.

Të bashkohemi të shtunën për t’iu thënë Ndal këtyre kriminelëve dhe të gjithë politikanëve të lidhur me krimin.

Ta mbyllim njëherë e mirë këtë kapitull dhe të hapim kapitullin që meritoni ju, për një jetë më të mirë për ju, për shpresë për çdo shqiptar.

Të hapim kapitujt e ekonomisë!

Të hapim kapitujt e punësimit!

Të hapim kapitujt e shëndetësisë, të arsimit, të bujqësisë, të eksporteve.

Ne duhet t’i japim fund një skenari të përsëritur të paktën 5 herë gjatë këtyre 5 viteve.

Edi Rama e mbrojti, por ne, së bashku e larguam Armando Prengën.

Edi Rama e mbrojti, por ne, së bashku, e larguam Arben Ndokën. Edi Ram e mbrojti, por ne, së bashku, e larguam Mark Frrokun.

Edi Rama e mbrojti me valle dhe me këngë, por ne së bashku e larguam me turp dhe me votë Elvis Rroshin.

Edi Rama e mbrojti, por ne larguam Sajmir Tahirin.

Sot Edi Rama po mbron Fatmir Xhafajn, por ne do të largojmë atë, ne do të largojmë krimin nga çdo hallkë e shtetit dhe vetë kupolën mafioze me Edi Ramën në krye.

Mbajtja e statusquo-së është e pamundur.

Shqipëria nuk mund të jetë më në këtë gjendje.

Shqipëria nuk e meriton më këtë.

Shqipëria ka mjaftueshëm njerëz të ndershëm, të cilët mund t’i shërbejnë asaj.

Partia Socialiste ka njerëz të ndershëm që mund t’i shërbejnë popullit.

Ndaj, sot dua t’i drejtoj një thirrje të drejtpërdrejtë socialistëve të ndershëm shqiptarë, që ndjehen të neveritur nga kapja e partisë së tyre, lënia e partisë së tyre peng i krimit dhe drogës.

Ejani, ju ftojmë edhe ju të bashkoheni!

Bashkohuni në protestën kombëtare!

Bashkohuni me qytetarët shqiptarë!

Bashkohuni për një Shqipëri me qeverisje të ndershme dhe një Parti Socialiste të ndershme.

Prej 5 vitesh pushteti i socialistëve i është lënë kriminelëve.

Prej 5 vitesh pushteti i qytetarëve u është dorëzuar kriminelëve, por kemi treguar se jemi më të fortë se ta, ndaj le ta vazhdojmë këtë betejë të gjithë së bashku.

Çfarëdo që të thotë sot ky daulleshpuari, shqiptarët dhe bota e dinë fare mirë.

• Negociatat nuk hapen pa luftuar krimin dhe politikanët e lidhur me krimin.
• Negociatat nuk hapen me reforma në letër, me ligje që miratohen dhe nuk zbatohen, si ligji antimafia për Fatmir Xhafajn.
• Negociatat nuk hapen, pa e ndarë qeverisjen nga krimi.
• Nuk hapen negociatat në një vend ku të pafajshmit përfundojnë në burg, por politikanët e të pushtetshmit ia hedhin paq.
• Nuk hapen negociatat Edi Rama, siç ta kanë thënë edhe mbrëmë, pa zgjedhje të lira dhe të ndershme!
• Nuk hapen negociatat kur qeveria dhe mazhoranca burojnë nga krimi dhe paratë e drogës dhe jo nga votat e ndershme të shqiptarëve.

Ky është mesazhi i Brukselit, këtë ke dëgjuar për 5 vjet. Këtë ta thanë copë në sy në Sofje, këtë ta thanë fare qartë edhe mbrëmë miqtë tanë, që i duan të mirën Shqipërisë.

Ndaj, le të jemi të hapur e të drejtpërdrejtë me njëri-tjetrin. Është një e vërtetë e qartë, e thjeshtë, e kuptueshme për të gjithë Shqipërinë sot:

As opozita, as BE, as Holanda, as Macroni, as Merkeli, as Krishbaum nuk janë pengesa.

Edi Rama, ti je pengesa.

Fatmir Xhafaj është pengesa.

Qeveria jote e lidhur me krimin dhe korrupsionin janë pengesa për Shqipërinë europiane.

Ju jeni tradhtarët e vërtetë të popullit, që keni tradhtuar interesat e qyetarëve të thjeshtë për xhepat tuaja dhe pasuritë tuaja, duke u lidhur dhe duke u bërë njësh me krimin e organizuar dhe trafikantët e drogës.

Ndaj, ftoj të gjithë shqiptarët pa dallim:

Bashkohuni me qindra mijëra protestuesit ditën e shtunë, më 26 maj!

Ta çlirojmë Shqipërinë nga qeveria e lidhur me krimin.

Ta çlirojmë Shqipërinë nga qeveria më antieuropiane.

Ta bëjmë realitet ëndrrën tonë Për Shqipërinë si gjithë Europa!

Zoti e bekoftë Shqipërinë!

Deklarata e deputetit të Partisë Demokratike, Enkelejd Alibeaj

Krimi që ka kapur shtetin e Edi Ramës ka bërë një tjetër goditje kriminale sot. Ia ka arritur të bastisë mu në zemër edhe vetë organin i cili supozohet ta luftojë atë pa mëshirë.

Në Prokurorinë e Durrësit është grabitur serveri i të dhënave të çështjeve penale. Pikërisht në Prokurorinë e Durrësit ku pas denoncimeve të opozitës janë mbledhur të dhëna hetimore për disa nga çështjet më të rënda të krimit dhe të korrupsionit të qeveritarëve.

Para 2 javësh kësaj Prokurorie iu grabitën dokumenta të rëndësishme të hetimeve penale. Kryeprokurorja e Durrësit, Donika Prela jo vetëm që nuk mbajti përgjegjësi por u gradua nga shoqja e saj Arta Marku, me urdhër të Edi Ramës dhe Fatmir Xhafës si kryeprokurore e Krimeve të Rënda, në shkelje flagrante të Ligjit për Organet e Drejtësisë.

Ky akt sigurisht i ka trimëruar banditët e lidhur me pushtetin. Sot krimi ia beh mu në mes të zyrave te Prokurorisë dhe i pashqetësuar grabiti serverin e të dhënave të hetimeve penale për çështjet më të rëndësishme të krimit dhe korrupsionit të qeveritarëve.

Dje, një i burgosur me rrezikshmëri të lartë u arratis nga salla e gjyqit.

Të gjitha këto janë pasoja të kapjes së shtetit nga krimi, shteti i shpartalluar që mbron kriminelët dhe godet njerëzit e thjeshtë.

Vetëm në një vend ku qeveria është njësh me krimin mund të ndodh kjo.

Nuk ka si të ndodh ndryshe, kur në vend që të mbrojnë dëshmitarët dhe të sigurojnë provat, qëllimi i vetëm i Rama-Marku-Prela-Xhafës është si e si të mbrojë e të shpëtojë Fatmir e Agron Xhafën.

Nuk ka si të ndodh ndryshe, kur qeveria dhe Kryeministri po bejne ç’është e mundur të zhdukin provat e krimit më të rendë që ka kapur Fatmir Xhafën dhe Edi Ramën.

Nuk ka si të ndodh ndryshe, kur provat e verteta hetimore rrembehen nga banditët mu në zemër të prokurorisë,

kur kryeministri,  i servir prokurorise si prova ato që prodhon Edi Rama në mes të natës, sic ishte prova imagjinare e Edi Ramës, që mbron Agron Xhafën, vëllanë e Fatmir Xhafës, i certifikuar nga gjykatat italiane si bos i bandave ndërkombetare të trafikut te narkotikeve.

Nuk ka si të ndodhe të ndryshe kur kërconohet dhe tentohet të blihet deshmitari, prej bandave të lëshuara me mision nga qeveritarët dhe kërcënohet gazetari që denoncon krimin.

Nuk ka si të ndodh ndryshe kur kryeministri, Ministri i Brendshëm, drejtuesit e policisë, të gjithë këta në mbrojtje të Xhafajve, as që nuk pyeten nga prokuria, por merren në pyetje denoncuesit e krimit, opozita dhe gazetarët.

Kesaj qeverie të bërë njësh me krimin, që ka kapur prokurorinë dhe gjykatat, e që është vënë në mbrojtje të krimit dhe shkatërrim të provave, i ka ardhur ora t’i humbë vula njëherë e mirë.

Edi Rama dhe Fatmir Xhafa nuk mund të qeverisin më shqiptarët, sepse nuk përfaqësojnë interesat e shqiptarëve, por të krimit dhe korrupsionit ku janë zhytur kokë e këmbë. Ndaj sot më shumë se kurrë, çdo shqiptar, ka të drejtë dhe detyrim ndaj vetes, familjes, vendit, që të mos lejojë të humbasë të ardhmen e tij. Le të bashkohemi të gjithë, pa dallim të shtunën në ora 11.00 në Tiranë.

Bashkë jemi më të fortë se krimi dhe qeveria e Edi Ramës e lidhur me të.

Bashkë do t’i japim fund kapjes së shtetit nga krimi, do  të çlirojmë Shqipërinë nga makthi, do hapim kapitullin e shpresës dhe mundësive për jetë më të mirë për çdo shqiptar.

Rezoluta për Integrimin Europian që Partia Socialiste vetë e hartoi dhe e vetë e votoi, ishte një tekst plotë furçe dhe bojëra për makiazhin e fytyrës së qeverisë.

Nëse qeveria dhe Edi Rama do të donte një Rezolutë konsensuale atëherë do të lejonte që teksti i Partisë Socialiste normalisht, siç është vepruar gjithmonë, të shqyrtohej në Komisionin e Integrimit Europian.

Madje edhe në Këshillin Kombëtar të Integrimit Europian dy organe përgjegjëse të Kuvendit, për raportet me Bashkimin Europian dhe kështu është vepruar gjithmonë përmes diskutimeve, kompromiseve, është arritur pothuajse gjithmonë një tekst i përbashkët i cili është votuar konsensualisht.

Siç u arrit edhe deklarata me deputetët e Parlamentit Europian në shkurt të këtij viti.

Por qeveria nuk e do këtë dhe Edi Ramës ai Projekt-Rezolutë me furçe me bojëra i duhet vetëm për të hequr vëmendjen nga Agron Xhafaj dhe nga i vëllai i tij, që rri, i vdekur i pakallur, në postin e Ministrit.

Rruga për të korrigjuar këtë zullum dhe rruga për të korrigjuar shumë zullume të tjera dhe rruga për një Shqipëri Europiane është protesta e madhe e gjerë popullore.

Këtë të shtunë në orën 11.00 në sheshin qëndror të Tiranës.

Ju falemnderit!

Jam sonte në këtë orë të vonë të mbrëmjes para jush për të denoncuar thellimin e skandalit dhe  skenarit kriminal të Edi Ramës dhe Fatmir Xhafajt të cilët po përdorin shtetin e kapur dhe kanë hedhur në veprim strukturat e  krimit të organizuar nën urdhrat e tyre për të të kërcënuar dhe për ti bërë presion dëshmitarit x, shtetasit Albert Veliu dhe familjarëve të tij.

Sot të dërguarit e Fatmir dhe Agron Xhafajt, njerëz të skeduar për vrasje të tipit mafioz nga zona e Vlorës dhe e Fushë Krujës i kanë ofruar një të afërmi të dëshmitarit x, Albert Veliu 200 mijë euro nga paratë e pista që familja mafioze Xhafaj përfiton nga trafiku i drogës dhe veprimtari të tjera kriminale, që ai të përgënjeshtrojë deklarimet e bëra publike.

Cdo përpjekje e Fatmir Xhafës dhe Edi Ramës për të kërcënuar, intimiduar apo për të blerë dëshmitarin x, thjesht i zhyt edhe më thellë Fatmir Xhafajn dhe Edi Ramën në skandalin ku janë përfshirë kokë e këmbë.

Plani për blerjen, kërcenimet ndaj dëshmitarit, intimidimi dhe sulmet ndaj gazetarit Jetmir Olldashi nxjerrin zbuluar frikën dhe përfshirjen e Fatmir Xhafajt dhe Edi Ramës në këtë veprimtari kriminale për të mbuluar narkoaferën e Agron Xhafajt.

10 ditë më parë, nga kjo sallë paralajmërova se Edi Rama dhe Fatmir Xhafaj, në bashkërendim dhe bashkëveprim me struktura kriminale dhe njerëz të krimit të organizuar, kanë vënë në lëvizje një skenar kriminal.

1.      Moho përgjimin.

2.      Kap, josh ose likuido dëshmitarin dhe familjen e tij.

3.      Shkatërro provat.

4.      Akuzo dhe kërcëno opozitën, gazetarët dhe cdo denoncues!

Presioni shtetëror dhe mafioz me paratë e krimit dhe të drogës është prova më e qartë e rënies shtetit dhe e kapjes së qeverisë Rama nga Mafia dhe organizatat kriminale të trafikut të drogës.

Hartimi dhe zbatimi i këtij skenari të presionit shtetëror dhe mafioz është arsyeja e vetme pse Fatmir Xhafaj mbahet me thonj pas karrikes së Ministrit të Brendshëm.

Duke dënuar ashpërsisht këto akte kriminale, dua ti përsëris sot Edi Ramës dhe Fatmir Xhafës paralajmërimin e prerë se për çdo hap që hedhin për të vënë nën presion Albert Veliun, dëshmitarin e familjes mafioze Xhafaj, si dhe gazetarin investigativ Jetmir Olldashi, përgjegjës do të jenë ata dhe do të marrin përgjigjen më të ashpër nga opozita dhe populli!

I paralajmëroj sot Edi Ramën dhe Fatmir Xhafajn para gjithë shqiptarëve dhe para gjithë botës: ndal presionit mafioz ndaj dëshmitarit Veliu dhe gazetarit Olldashi!

Të dashur bashkëqytetarë,

Kërcënimet dhe presionet e Edi Ramës dhe Fatmir Xhafajt janë rritur ethshëm pak orë para protestës tonë kombëtare të 26 majit.

Sepse ata kanë frikë.

E vetmja forcë që mund ta ndalë këtë të keqe është bashkimi ynë.

E vetmja forcë që mund ta mposhtë këtë të keqe është bashkimi ynë.

Ju ftoj të gjithëve të bashkohemi në protestën kombëtare të 26 majit për një Shqipëri të çliruar nga qeveria e lidhur me krimin.

Për një Shqipëri të çliruar nga qeveria anti popullore e Edi Ramës që ka tradhtuar interesat e qytetarëve duke bashkëpunuar haptas me krimin për pushtetin dhe pasurinë e tij.

Për një Shqipëri të çliruar nga qeveria anti-europiane që me rekordet e saj të bashkëpunimit me krimin dhe korrupsionin është kthyer në  pengesën për ëndrrën e të gjithë shqiptarëve për Shqipërinë si gjithë Europa.

Deklaratë e deputetit Gent Strazimiri

Për të mbrojtur veten dhe vëllezerit Xhafaj, Edi Rama është vënë në krye të një skenari kriminal mashtrimesh, manipulimesh dhe kërcënimesh kundër çdo denoncuesi të krimit me lidhje qeveritare.

Njësoj si me ekspertizën e zërit të Agron Xhafajt, duke bërë prokurorin, Edi rama hodhi mashtrimin e rradhës për drogën e Maminasit.

Siç e dinë të gjithë shqiptarët, Partia Demokratike nuk mbron kriminelët.

Kokaina e Xibrakës dhe kokaina e Maminasit, trafiku dhe laboratorët e kokainës në Shqipëri janë të Genci Xhixhës, Ermal Hoxhës, Olsi Ramës dhe shokëve të tij.

Edi Rama, nëse secilin prej tyre i ke në Partinë Demokratike, je i lutur të vish tani, sot, dhe t’i arrestosh!

Por e vërteta është se vetë i ke përcjellë në Kubë, Kolumbi e kudo tjetër me policët e tu narkotrafikantë të shpallur në kërkim, me dy ministrat e tu të brendshëm të lidhur me drogën dhe me vëllain tënd.

Partia Demokratike nuk është Partia Socialiste.

Ndryshe nga Edi Rama dhe PS, për ne droga është kanceri që po vret Shqipërinë.

Ka vetëm një rrugë për hapjen e negociatave: lufta kunder drogës dhe krimit, kunder kapjes së shtetit nga xhafajt, habilajt tahirët, nga Edi Rama dhe shpura e tij mafioze.

Shqipëria nuk mund të sakrifikohet për Sajmir Tahirin, vëllezërit Xhafaj, vëllezërit Habilaj dhe vëllezerit Rama.

Ftojmë të gjithë shqiptarët të bashkohen të shtunën me 26 maj në ora 11 në protestën kombëtare për Shqipërinë e çliruar nga qeveria e lidhur me krimin, për drejtësinë e barabartë për të gjithë, për Shqipërinë si gjithë Europa!

Komisioneri për Mbrojtjen e të Dhënave Personale i ka dhënë të drejtë Partisë Demokratike dhe ka urdhëruar Ministrinë e Arsimit “Për bllokimin e përpunimit të të dhënave personale të prindërve deri në momentin e përfundimit të hetimit”. 

Ministrja Nikolla shkel edhe këtë urdhër, duke vazhduar me mbledhjen e të dhënave personale të prindërve me qëllim përdorimin e tyre në funksion të manipulimit të zgjedhjeve. 

E njëjta skemë kriminale, me veshje të ndryshme ligjore është urdhëruar të ndiqet edhe nga Ministrja e Shëndetësisë, Manastirliu, duke vënë nën presion administratën në varësi të saj, në të gjithë Shqipërinë. 

Partia Demokratike do të ngrejë këtë shqetësim edhe në Komisionin Europian, pranë Komisionerit Europian për Mbrojtjen e të Dhënave Personale, sepse kjo është çështje e rëndësishme për çdo vend që kërkon të anëtarësohet në BE. 

Partia Demokratike i fton prindërit, mësuesit, mjekët, infermierët, të gjithë punonjësit e ndershëm, të bashkohen me protestën kombëtare të së shtunës për të larguar qeverinë që i shërben krimit dhe jo qytetarëve.

Deklarata e plotë e Kryetares së Komisionit të Arsimit, Albana Vokshi.

Pak kohë më parë, Partia Demokratike denoncoi publikisht shkeljen  e Kushtetutës dhe legjislacionit në fuqi në lidhje me urdhërat e lëshuar nga Ministrja e Arsimit Lindita Nikolla dhe Ministrja e Shëndetësisë Manastirliu për grumbullimin e të dhënave personale te prindërve të fëmijëve që ndjekin arsimin publik dhe të pacientëve në Qendra Shëndetësore.

Duke ndjekur rrugën institucionale, Partia Demokratike i kërkoi Komisionerit për Mbrojtjen e të Dhënave, të reagonte ndaj këtij skandali, si dhe dorëzoi zytarisht padinë penale në Prokurori për veprën penale “shpërdorim të detyrës” dhe “përdorim të funksionit publik për veprimtari politike ose zgjedhore”.

Kjo është përgjigja zyrtare nga Komisioneri për Mbrojtjen e të Dhënave që ka nisur proçesin e hetimit administrativ për Ministrinë e Arsimit.  Nëpërmjet urdhërit të datës 4 maj Komisioneri ka urdhëruar “bllokimin e përpunimit të të dhënave personale deri në momentin e përfunidmit të hetimit”.

Pavarësisht këtij vendimi, Ministrja Nikolla, e urdhëruar nga Rama, vazhdon me insistim shkeljen e ligjit për grumbullimin e të dhënave personale të prindërve me qëllim përdorimin e tyre në funksion të manipulimit të zgjedhjeve.

Legjislacioni në fuqi e ndalon rreptësisht përdorimin apo përpunimin e të dhënave pa ditur qëllimin. Qeveria nuk ka nxjerrë asnjë akt ligjor apo nënligjor që të përcaktojë qëllimin për të cilin po merren të dhënat personale. Ajo po e bën këtë në shkelje të ligjit “Për bazat e të dhënave shtetërore”, ku neni 4 përcakton që ato krijohen me ligj të veçantë apo VKM.

Sot dyshja Rama – Nikolla duhet të sqarojë publikisht, përse po kërkojnë sërish në shkelje të Ligjit të dhënat personale te mbi 70% të shqiptarëve!

Partia Demokratike do të ngrejë këtë shqetësim edhe në Komisionin Europian, pranë Komisionerit Europian Për Mbrojtjen e të dhënave personale, si dhe të gjitha institucioneve përgjegjëse për këtë çështje kaq sensitive për çdo vend që kërkon të aderojë në Bashkimin Europian.

Partia Demokratike fton të gjithë prindërit të refuzojnë të japin të dhënat e tyre personale tek një bandë kriminale që kërkon t’i përdorë ato për manipulimin e zgjedhjeve; t’i përdorë si mjet shtrëngues për të deklaruar votën në këmbim të ruajtjes së vendeve të punës, jo vetëm në shtet, por edhe në kompani private.

Partia Demokratike i bën thirrje Prokurorisë të mos flejë mbi padinë që ne kemi dërguar dy javë më parë!

Partia Demokratike ka të dhëna se e njëjta skemë kriminale, me veshje të ndryshme ligjore është urdhëruar të ndiqet edhe nga Ministrja e Shëndetësisë, Ogerta Manastirliu, duke vënë nën presion, kësaj rradhe, të gjithë administratën në varësi të saj, në të gjithë Shqipërinë.

Partia Demokratike i bën thirrje punonjësve të administratës të refuzojnë të firmosin formularin e shpërndarë nga Ministria e Shëndetësisë! Të denoncojnë veprimet e paligjshme të bandës në pushtet.

Partia Demokratike i fton prinderit, mësuesit, mjekët, infermierët, të gjithë punonjësit e ndershëm, të marrin pjesë në protestën kombëtare të së shtunës!

Të bashkohemi, pavarësisht bindjeve politike, për të larguar qeverinë e lidhur me krimin, pengesën e vetme për Shqipërinë europiane.

Që kur shqiptarët u njohën me skandalin Xhafaj, Edi Rama po zbaton një skenar kriminal që synon mbylljen e hetimeve pa vënë para drejtësisë vëllain e ministrit të Brendshëm për trafik droge.

Pjesë kryesore e këtij skenari është mohimi i zërit të Agron Xhafajt, që i siguroi Dëshmitarit X gjetjen dhe transportin e hashashit me garancinë se Policia nën varësinë e vëllait të tij Ministër i Brendshëm, do ti hapte rrugën.

Edi Rama i mashtroi shqiptarët duke thënë se ka bërë një ekspertizë të zërit në një agjensi të specializuar, por ai akoma nuk ka treguar se cila është kjo agjenci.

Edhe Fatmir Xhafaj tha të njëjtën gjë po atë ditë, por as njëri, as tjetri nuk bëjnë publik emrin e agjencisë që na paska bërë ekspertizën.

Rama dhe Xhafaj ministër nuk bënë transparencë para shqiptarëve, siç kanë detyrimin ta bëjnë, jo se e ashtuquajtura ekspertizë nuk përbën provë, por sepse asnjë agjenci e specializuar nuk do t’i thoshte të zezës të bardhë!

Fatmir Xhafaj e di që zëri në përgjime është i të vëllait. E di që Dëshmitari X dhe gazetari Jetmir Olldashi thonë të vërtetën. Prandaj e largoi me urgjencë të vëllain trafikant pa ua nxjerrë më parë shqiptarëve me zë dhe me figurë që ta bënin vetë identifikimin dhe të gjykonin të vërtetën.

Edhe Edi Rama e di që Agron Xhafaj është koka e trafiqeve në Vlorë, prandaj gënjeu për ekspertizën e zërit dhe nuk iu përgjigj gazetarëve për emrin e agjencisë. Për të mbajtur në këmbë pushtetin e tij të inkriminuar, Edi Rama është bërë pjesë e skenarit për të mbuluar veprat kriminale të Fatmir dhe Agron Xhafajt.

Pjesa e dytë e këtij skenari është imponimi ndaj Prokurorisë të pranojë si ekspertizë të zërit të Agron Xhafajt rezultatin e paracaktuar nga vetë Edi Rama. Prandaj Fatmir Xhafaj vazhdon të qëndrojë në detyrë: për të vazhduar manipulimin dhe shkatërrimin e provave, nëpërmjet kukullave të tij në Prokurori Arta Marku dhe Donika Prela.

Ka ardhur koha që, të gjithë bashkë, t’i themi ndal pengmarrjes së shtetit nga krimi!

Partia Demokratike ka thirrur të shtunën tjetër më 26 Maj një protestë kombëtare për të bashkuar shqiptarët në një zë: Fatmir Xhafaj ik!

Shqiptarët nuk mund të pranojnë më të qeverisen nga krimi!

Shqiptarët nuk kanë më kohë për të humbur, duke parë sesi qeveria e tyre refuzohet nga Europa për shkak të lidhjeve me krimin e organizuar, një herë me Saimir Tahirin dhe tani me Fatmir Xhafajn.

Ju ftoj të gjithëve, të shtunën në orën 11.00, pa dallime partiake të bashkohemi në protestën kombëtare, për t’i dhënë mesazhin Europës se shqiptarët europianë refuzojnë një qeveri antieuropiane!

Se duam një qeverisje të ndershme, e cila do të realizojë kushtet për hapjen e negociatave.

Se duam luftën dhe jo mbrojtjen e krimit të organizuar dhe korrupsionit.

Se duam drejtësinë e barabartë për të gjithë dhe jo drejtësinë  e kapur.

Ju ftoj të gjithë në protestën kombëtare, të shtunën me 26 maj në orën 11.00.

Falemnderit!​

Deklarata e plotë e kryetarit të Partisë Demokratike, Lulzim Basha

Jemi sot në këtë dalje për mediat për një arsye të veçantë. Ditën e sotme mediat shqiptare, por jo vetëm, janë dominuar nga martesa e princit Harry me princeshën Megan, të cilëve natyrisht iu urojmë një martesë të lumtur, sikundër është Shtëpisë Mbretërore të Britanisë së Madhe. E uroj këtë personalisht si kryetar i Partisë Demokratike, natyrisht edhe si “Qytetar Nderi i Londrës”. Dhe për këtë aryse besoj, shpresoj dhe uroj që kjo të ketë qenë arsyeja e vetme nuk është mundësuar transmetimi i drejtpërdrejt i një tjetër dëshmie të rëndësishme sa i përket skandalit të familjes mafioze Xhafaj dhe skandalit tjetër të përpjekjes për ta mbuluar këtë veprimtari kriminale nga vetë Fatmir Xhafaj dhe vetë Edi Rama.

Për këtë arsye jemi sot këtu pasi kemi siguruar përmes medias dëshminë e gazetarit investigativ Jetmir Olldashi të cilën ju ftojmë ta ndiqni live transmetimin, se intervista ka qenë para një ore. Ta ndjekim live atë që nuk u transmetua dot live nga mediat shqiptare, nga selia e Partisë Demokratike.

(Transmetohet deklarata e plotë e gazetarit Jetmir Olldashi)

Jo vetëm në profesionin e gazetarit por në çdo shoqëri që aspiron të ndërtojë mundësi të drejta për njerëzit, për prindërit, për fëmijët, e vërteta është e rëndësishme.

Kjo është e vërteta, jo gënjeshtrat e Fatmir Xhafajt, as mashtrimet kriminale të Edi Ramës. Edi Rama edhe dje gënjeu pacipësisht duke pretenduar se ia ka bërë në Surrel ekspertizën dhe se i paska dalë falso.

Kur gazetarët i kërkuan se në cilën agjenci e ka bërë ekspertizën brenda 24 orëve heshti dhe i bëri bisht përgjigjes. Kjo për një arsye të thjeshtë: Edi Rama është pjesë e këtij skenari, e këtij komploti për të mbuluar veprat kriminale që janë denoncuar.

Vepra e parë kriminale; Agron Xhafaj vazhdon të jetë një nga kokat e drogës në Shqipëri, bosi i drogës në Vlorë. Kjo është arsyeja se përse, ndërkohë që u mbrojt dhe u mbajt këtu në kundërshtim të hapur me vendimin e drejtësisë italiane dhe në kundërshtim të hapur me ligjin shqiptar derisa ligji u ndryshua nga Fatmir Xhafaj, pa pritur pas denoncimit u përcoll në fshehtësi të plotë dhe me urgjencë që Prokuroria Rama-Marku –Prela të thotë : Ne nuk e kapim dot! Nuk e hetojmë dot!

Vepra tjetër penale përfshin drejtpërdrejtë Fatmir Xhafën, ministrin e Brendshëm, i cili këto 8 apo 9 ditë të denoncimeve ka heshtur dhe ka gënjyer dhe ka shpenzuar shumicën dërrmuese të kohës së tij për të mbuluar veprat penale të vëllait të vet me një skenar kriminal.

Dua t’u kujtoj qytetarëve shqiptarë se çdo akt për moskallëzim krimi, apo akoma më rëndë, për mbulimin e krimeve, është një krim i rëndë i parashikuar nga ligjet penale të vendit, sikundër në çdo vend normal.Fatmir Xhafa dhe Edi Rama, janë sot të dyshuar për veprën penale të mbulimit të veprimtarisë kriminale të Agron Xhafajt, të mbulimit të veprimtarisë kriminale të mosveprimit të ligjit antimafia, të mbulimit të veprimtarisë kriminale të falsifikimin të dokumentave zyrtare dhe korrupsionit të zyrtarit të lartë në detyrë. Këto janë arsyet, përse Fatmir Xhafaj vazhdon të qëndrojë në detyrë. Për të vazhduar manipulimin për të shjatërruar provat, për të intimiduar apo joshur këdo që tregon të vërtetën ashtu siç është, dhe jo ashtu siç gënjen Edi Rama dhe Fatmir Xhafa. Por qytetarët shqiptarë e kanë të qartë se insitucionet publike të vendit, ato që paguhen me taksat tuaja, me taksat tona, për të mbrojtur ligjin, për të mbrojtur qytetarët dhe për të ndëshkuar krimin, sot nën kontrollin e Edi Ramës dhe Fatmir Xhafajt bëjnë të kundërtën. Mbrojnë kriminelët duke shkelur ligjin dhe godasin qytetarët e pafajshëm dhe të veçanti ata që guxojnë të denoncojnë lidhjet e tyre kriminale.

Dua të shpreh sot, mbështetjen e plotë dhe totale dhe admirimin tim personal për shqiptarë kurajozë, dhe gazetarë të klasit europian, si gazetari investigativ Jetmir Olldashi, si gazetarja e mbrëmshme Ambrozia Meta, dhe çdo gazetar tjetër që këto ditë e këto javë ka vendosur përkundër presionit të jashtëzakonshëm që e di, që ushtrohet në forma dhe mënyra të ndryshme, të shpalosë të vërtetën tronditëse.

Shqipëria është sot një shtet i kapur nga krimi.

Qeveria sot është një organizatë e strukturuar kriminale me Ministër të Brendshëm, anëtar të  familjes mafioze Xhafaj, që kontrollon drogën dhe aktivitetin kriminal në qytetin e Vlorës.

Në krye të kësaj kupole qëndron Edi Rama.

Institucionet e kapura, jo vetëm nuk funksionojnë, por po bëjnë dhe do të vazjdojnë të bëjnë gjithçka siç bënë me përcjelljen e Agron Xhafajt, që ligji të mois veprojë.

Dhe një nga garancitë për këto sot, është vazhdimi i qëndrimit të Fatmir Xhafajt në detyrën e Ministrit të Brendshëm, post nga i cili vazhdon intensivisht ethshëm aktivitetin për shkatërrimin e provave, të veprave të shumta kriminale që janë faktuar e po faktohen.

Ndaj me 26 maj, të shtunën në orën 11.00, ju ftojmë të gjithë ju, qytetarë shqiptarë!

Të rinj e të reja, burra dhe gra, demokratë e socialistë, të bashkohemi në protestën kombëtare për të çliruar Shqipërinë nga qeveria e lidhur me krimin.

Për të çliruar Shqipërinë nga zgjedha dhe tirania e krimit të organizuar, të bërë njësh me Edi Ramën, Agron Xhafajt, Fatmir Xhafajn dhe pushtetarët e tjerë në vend.

Për të zhbllokuar rrugën europiane të Shqipërisë, që sot ka vetëm një pengesë.  Kapjen e shtetit, qeverinë e lidhur me krimin, Edi Ramën, Fatmir Xhafajn, aleancën e tyre me kriminb për pushtetin dhe pasurimin e tyre.

Ju ftoj të gjithëve, të shtunën në orën 11.00, të bashkohemi në protestën kombëtare, për t’i dhënë mesazhin Europës, se Shqipëria dhe shqiptarët europianë, do bëjnë gjithçka që qeveria antieuropiane e lidhur me krimin dhe drogën, t’i hapë rrugë, përmes çlirimit të vendit nga kjo qeverisje, një qeverisje të ndershme e cila do të realizojë kushtet për hapjen e negociatave.

Luftën dhe jo përgëdheljen dhe mbrojtjen e krimit të organizuar.

Luftën ndaj korrupsionit, drejtësinë e barabartë për të gjithë përmes një drejtësie të vërtetë dhe jo false, me prokurorë të kapur e me gjyqtarë të kapur.

Që nga qytetari më i thjeshtë e deri tek politikani më i pushtetshëm, pa përjashtim, të barabartë para ligjit.

Pa zgjidhur këtë, Shqipëria nuk ka shpresë, t’i  hapet dera e Europës.

Pa zgjidhur këtë, nuk ka asnjë mundësi, që ne t’i dedikojmë energjitë dhe kohën tonë çështjeve më urgjente, që preokupojnë ju, ekonomisë, punësimit, mirëqenies, shëndetësisë, arsimit të fëmijëve tuaj.

Ndaj më lejoni t’jua përsëris edhe një herë këtë ftesë sot, duke cituar siç citoi dje një mik amerikan fjalët e kandidatit për President dhe vëllait të Presidentit Kenedi, Robert Kenedi: E ardhmja nuk dhurohet, ajo është në duart tona dhe e nesërmja përcaktohet nga veprimi apo mosverpomi ynë.

Ju ftoj të gjithë në protestën kombëtare, të shtunën me 26 maj në orën 11.00.

Falemnderit!