Blog

Këshilltarët bashkiakë të Tiranës, shpjeguan qëndrimin e Partisë Demokratike për buxhetin e kaluar dje në kundërshtim me disa ligje.

Kreshnik Çollaku, Kryetar i Këshilltarëve demokratë, tha se Erion Veliaj mund të vazhdojë të qeverisë në forma joligjore, por Tirana sot është pa buxhet. Ai tha se “Mbledhja e djeshme nuk ishte një mbledhje e Këshillit Bashkiak, por një teatër me këshilltarë pa mandat, çka e detyroi Partinë Demokratike të braktisë sallën. Në mungesë të një pakete fiskale dhe mbi të gjitha duke u nisur për një debat serioz, të ndershëm dhe të drejtë, ishte një sale e manipuluar, me individë të cilët ishin ulur në karriket e këshilltarëve por pa asnjë mandate për t’u sjellë dhe votuar si këshilltarë bashkiakë”.

Fabian Topollaj, tha se ligjërisht buxheti nuk quhet i miratuar, sepse pavarësisht blerjeve korruptive të disa këshilltarëve, Erion Veliaj, nuk ka zhvilluar akoma proçedurën ligjore të zëvendësimit të 7 këshilltarëve, që morën mandate deputetësh.

“Ata që votuan dje janë 7 njerëz si gjithë të tjerët, pa mandate këshilltari bashkiak”- thaTopollaj, i cili theksoi se buxheti i  kaluar dje është një noterizim i korrupsionit të ErionVeliajt në Bashkinë e Tiranës.

Topollaj tha se buxheti shkel igjin e prokurimit publik, sepse jep rreth 10 milionë dollarë për shtesa kontratash, duke e bërë një buxhet në interesa korruptive klientelsite dhe jo në interes të qytetarëve.

ArjanaÇelaanalizoi aspektin fiscal të buxhetit dhe tha se buxheti u miratua pa u shoqëruar me paketën fiskale, edhe pse ky është një detyrim ligjor. Në vitin 2018 hyn në fuqi rritja e dy taksave të reja, taksa e ndërtesës dhe taksa e pronës, që do ta rrisin edhe më shumë koston e jetesës për familjarët dhe bizneset. Për shumë prej tyre rritja e taksave do të jetë e papërballueshme.

Arjana Çela tha se në vend të rritjes së taksave, Bashkia e Tiranës duhet të kishte krijuar stimuj fiskalë, sepse ekonomia e Tiranës kontribuon me 40% të ekonomisë kombëtare. Është e vërtetë se taksat vendore caktohen nga parlamenti, por ligji i jep të drejtë Bashkisë së Tiranës të ulë taksat me 30 %.

Partia Demokratike ka propozuar:

​

·        Uljen me 30% të taksës së ndërtesës si për familjarët, edhe për subjektet tregtarë.

·        uljenme 30% të taksës bujqësore

·        uljen me 30% të taksës së fjetjes në hotel

·        ulje dhe kategorizim të taksës së ndikimit në infrastructure për ndërtimet e reja.

·        Shfuqizim të plotë të taksës së përkohshme për ndërtimin e infrastructures arsimore.

Për tarifat Partia Demokratik e ka propozuar:

·        Uljen me 50% të tarifave për pastrimin dhe largimin e mbeturinave

·        Uljen me 50% të tarifës përzënien e hapësirave publike.

·        Shfuqizim të plotë të tarifave për dhënien e liçencës për tregtimin e karburanteve

Arjana Çela tha se buxheti i Bashkisë parashikon një rritje të shpenzimeve operative në vend të shpenzimeve në investime.

¼ e shpenzimeve të bushetit të BashkisësëTiranës, shkon për shpenzim e personelit. 32 punonjës të rinj do t’ishtohen numrit të përgjithshëm prej 6200vetësh.

Vetëm 1% e totalit të shpenzimeve e zë program përzhvillimin ekonomik, bujqësor, rural dhe pyjeve.

Mateo Spaho shpjegoi se ky është buxheti më i madh, sepse rritja e taksave është më e madhe se asnjëherë më parë.

Ai renditi disa element që i cilësoi si skandaloze.

“Së pari, ky buxhet financon zëvendësimin e palmave të autostradës me kosto 600 mijë, para të cilat janë hedhura në kosh, me zëvendësimin me pisha me vlerë 2.5 milionë euro. Janë rreth 6 km ku do të jenë të mbjellura rreth 300 e ca pisha, në total i bie 5.5 milionë lekë të vjetra 1 pishë. Jo vetëm paratë për pishat po jepen kur Autoriteti Rrugor Shqiptar ka miratuar projektin përfundimtar, me kosto 1 milionë euro, për zgjerimin e autostradës. Një projekt që nuk ka vend për pishat 2.5 milione euro.

Skandali i skandaleve qëndron në faktin se Bashkia e Tiranës për vitin e ardhshëmpretendon të arkëtojë 32 miliard lekë të vjetra nga lejet e ndërtimit. Po flasimpër 60 kulla, në qendër të Tiranës dhe brenda Unazës, me rreth 50 apartamente secila, çdo apartament 100 m².”-theksoi Mateo Spaho

“Ne besojmë se ky është fillimi i një potenciali të një krize të apartamenteve, të vlerës së tyre, të dyqaneve të cilën Bashkia e Tiranës rrezikon ta provokojë në mënyrë shumë serioze, për shkak se tregu nuk duket se e ka një kërkesë të tillë.

Po goditet Tirana, po goditen xhepat e qytetarëve të Tiranës, pasi vitin e ardhshëm Bashkia e Tiranës planifikon  t’u marrë nga xhepat e bizneseve dhe familjeve të Tiranës rreth 130 miliard lekë”-tha Mateo Spaho.

Kryetari i Partisë Demokratike, Lulzim Basha, priti në takim kryetarin e Parlamentit të Maqedonisë, z.Talat Xhaferri, me të cilin ndau vlerësimin dhe kenaqësinë që sjell caktimi i tij në krye të Parlamentit në vendin fqinj, si një shenjë kjo e emancipimit politik dhe progesit të shoqërisë maqedonase, si tregues i ecjes përpara në realizimin e të drejtave të shqiptarëve, dhe si pikë kulmore e bashkejetesës demokratike.

Partia Demokratike, tha z.Basha, e ka interesin e shqiptarëve dhe interesin kombëtar, në krye të qëndrimeve dhe vokacionit të saj politik.

Basha tha se PD ka mbështetur dhe ka nxitur vazhdimisht respektimin dhe përmbushjen e plotë të Marrëveshjes së Ohrit dhe integritetin territorial të Republikës së Maqedonisë, si një interes strategjik i vendit tonë.

Kryetari i Partisë Demokratike nënvizoi se përmbushja e plotë e Marrëveshjes së Ohrit me avancimin e mëtejshëm të të drejtave të shqiptarëve dhe gjuhës shqipe atje, është rruga drejt sigurisë dhe stabilitetit në Maqedoni dhe më gjërë në rajon.

Partia Demokratike, theksoi Basha, do të vazhdojë të mbështesë pa u kursyer procesin e integrimit të Maqedonisë në NATO.

Duke u ndalur në zhvillimet e brendshme, kryetari i opozitës, vuri në dukje se rreziku kryesor që kanos ëndrrën europiane për Shqipërisë dhe vendet e tjera të rajonit, është korrupsioni dhe krimi i organizuar i lidhur me qeverinë.

“Korrupsioni dhe krimi I lidhur me qeverinë, janë armiku numër një i demokracisë, i ekonomisë, i qytetarëve”, u shpreh Basha, duke theksuar se përgjigja ndaj këtyre fenomeve është ngritja dhe konsolidimi i institucioneve të pavarura, sidomos atyre të drejtësisë.

Basha bëri të ditur se opozita në Shqipëri do të luftojë deri në fund, për Kushtetutën, dhe për drejtësinë e pavarur që lufton krimin e korrupsionin.

Kryetari i opozitës Lulzim Basha i përcolli sot ambasadorit amerikan Donald Lu kundërshtimin e prerë të Partisë Demokratike për zgjedhjen antikushtetuese të një Prokurori të Përgjithshëm të Përkohshëm.

Në një takim në selinë e Partisë Demokratike, Zoti Basha bëri të qartë se mos krijimi i Këshillit të Lartë të Prokurorisë, uzurpimi i kompetencave të KLP-së nga parlamenti, zgjedhja e një prokurori të përgjithshëm me shumicë të thjeshtë, zgjedhja e prokurores pa kaluar vetingun, janë puç antikushtetues i cili ka futur në krizë sistemin e drejtësisë, ka shkatërruar procesin politik në vend dhe po prodhon një krizë destablizuese për vendin.

Zoti Basha pohoi se të gjitha këto veprime kanë qenë të paramenduara dhe të planifikuara nga Edi Rama për të zgjedhur një kryeprokuror që kontrollohet plotësisht prej tij, me qëllim shkatërrimin e hetimeve për dosjet kriminale të Saimir Tahirit, Vangjush Dakos dhe politikanëve të tjerë të lidhur direkt me vetë Ramën.

Kryetari Basha theksoi se interesat e shqiptarëve dhe të SHBA shërbehen vetëm duke dënuar kthimin e Shqipërisë në një vend të drogës dhe krimit, duke mos toleruar lidhjet e qeveritarëve me drogën dhe krimin dhe duke kërkuar nxjerrjen para drejtësisë të tyre.

Kryetari i Partisë Demokratike i shprehu ambasadorit amerikan qëndrimin e pandryshueshëm të PD për të bërë të gjitha përpjekjet që vendi t’i rikthehet kushtetueshmërisë dhe politikanët e lidhur me krimin, nga Saimir Tahiri tek Vangjush Dako, të përfundojnë para drejtësisë. Asnjë kompromis dhe asnjë interes pragmatik politik nuk do ta ndryshojë këtë qëndrim.- u shpreh Basha.

Kryetari i opozitës e siguroi ambasadorin Lu se në përputhje me parimet më themelore të demokracisë amerikane, opozita dhe qytetarët shqiptarë do të qëndrojnë me të gjitha mjetet dhe format demokratike në mbrojtje të Kushtetutës dhe demokracisë dhe kundër kapjes së drejtësisë nga Edi Rama, klanet e drogës dhe grupet kriminale që bashkëqeverisin me të.

Nënkryetari i Kuvendit dhe i Partisë Demokratike, Edi Paloka iu përgjigj Kryetarit të Kuvendit, Gramoz Ruçit, sipas të cilit  në Parlament nuk ka ndodhur ushtrim dhunë ndaj deputeteve në këto 27 vjet.

Përgjigja e plotë e zotit Paloka.

“Në këto 27 vjet ka ndodhur që deputetë të opozitës janë vrarë dhe sulmuar fizikisht brenda Parlamentit.

Por si asnjëherë në këto 27 vjet, kriminelët, vrasës, trafikantë droge dhe prostitutash, u ngritën në piedestal si anëtarë të Parlamentit.

Si asnjëherë në këto 27 vjet, Garda e Republikës u përdor për të bllokuar foltoren e Parlamentit duke i hequr dhunshëm opozitës të drejtën e fjalës.

Të gjitha këto kanë dhe më shumë se kaq kanë ndodhur sa herë vendi dhe Parlamenti është drejtuar nga partia e Gramoz Ruçit.”​

Dua ta  nis këtë komunikim përmes medias me të gjithë qytetarët shqiptarë që na ndjekin në një konstatim të qartë dhe të thjeshtë.

Dje është konsumuar një puç kushtetues dhe vendi është futur në një spirale anormaliteti.

Dje, Edi Rama ka shkelur dhe ka dhunuar Kushtetutën në mënyrë flagrante, qëllimi ka qenë kapja politike e prokurorit të përgjithshëm. Qëllimi i vërtetë është që përmes kapjes dhe emërimit të një kryeprokurori nën kontrollin politik të Edi Ramës, të  mbyllen sa më parë dosjet e krimit që implikojnë bashkëpunëtorët e tij më të afërt dhe vetë Edi Ramën.

Unë dua të përshëndes dhe të falënderoj përzemërsisht të gjithë qytetarët që iu përgjigjen thirrjes së opozitës. Protesta e djeshme dhe protestat që do të vijojnë janë një reagim i qytetarëve kundër puçit kushtetues të qeverisë.

Shqiptarët e dinë se Kushtetuta nuk i përket asnjë partie; është e të gjithë qytetarëve dhe të gjithë e kanë për detyrë ta mbrojnë atë. Kur Kushtetuta dhunohet, dhunohet çdo njeri pavarësisht prej bindjeve politike, pavarësisht prej statusit të tij apo të saj në shoqëri.

Protesta e djeshme dhe protestat që do të vazhdojnë janë shprehje të revoltës qytetare kundër mashtrimit nga Edi Rama me reformën në drejtësi. Qytetarët kanë besuar tek reforma në drejtësi, kanë besuar tek vetingu, tek pastrimi i sistemit nga gjyqtarët dhe prokurorët e korruptuar dhe të kapur politikisht, por në fakt dje është provuar katërcipërisht se Edi Rama është i vendosur në rrugën e tij antireformë.

Parlamenti nuk është ai që patë dje me një shumicë të marrë peng nga krimi dhe paratë e drogës. Parlamenti është Kushtetuta, janë ligjet, nuk janë as karriget, as kartonat e deputetëve dhe aq më pak kartonat e vjedhur dhe të trafikuar, siç e patë dhe siç e pa gjithë bota dje, nga Taulant Balla dhe ushtarët e tjerë të Edi Ramës në sallën e Parlamentit.

Ajo çfarë është e rëndë nuk është sjellja e opozitës në Parlament, por është sjellja e Edi Ramës me Kushtetutën, nuk janë tymueset, por është thyerja dhe dhunimi i Kushtetutës. Ka vetëm një shkatërrim, ka vetëm një dhunim është shkatërrimi dhe dhunimi i Kushtetutës nga Edi Rama; kjo do të ketë pasoja të rënda për stabilitetin dhe për demokracinë në vend.

Shqipëria nuk mund të ketë dy standarde kur vjen fjala tek shteti ligjor dhe tek demokracia, ka vetëm një standard, standardi perëndimor, standardi euroatlantik, standardi europian, standardi amerikan. Në çdo vend të botës nëse do të zbulohej se ministri i Brendshëm është koka e trafikut dhe se Policia ka funksionuar si organizatë kriminale në mbështetje të trafikut, qeveria do të ishte rrëzuar.   Në Amerikë, në Gjermani, në Bruksel nuk tolerohet një situatë si në Shqipëri, atje qeveritë bien për shumë më pak. Në çdo vend perëndimor Saimir Tahiri duhet të ishte në burg dhe Kryeministri duhet të ishte në hetim.

Dua të theksoj edhe një herë faktet, Kushtetuta nuk lejon asnjë hapësirë tjetër përvecsse zgjedhjen e Prokurorit të Përgjithshëm nga Këshilli i Lartë i Prokurorisë me 3/5 e votave të Kuvendit. Kjo është Kushtetuta.

Kushtetuta kishte caktuar prillin e këtij viti si afatin e fundit për zgjedhjen e Këshillit të Lartë të Prokurorisë, pra 8 muaj më parë duhej të ishte zgjedhur Këshilli i Lartë i Prokurorisë, 8 muaj para mbarimit të mandatit të Kryeprokurorit. Për këtë arsye Kushtetuta nuk lejoi asnjë periudhë kalimtare apo të përkohshme.

E gjithë procedura e ndjekur nga Rama nuk është thjesht dhe vetëm antikushtetuese, por është e sajuar aty për aty, nuk është e shkruar në asnjë ligj, në asnjë rregullore, asnjë dokument, thjesht Komisioni i Ligjeve uzurpoi të gjitha kompetencat e një institucioni tjetër kushtetues të pavarur nga Parlamenti që është Këshilli i Lartë i Prokurorisë dhe prodhoi farsën, prodhoi puçin antikushtetues.

Kushtetuta ndalon gjithashtu që Kryeprokuror apo dhe prokuror i thjeshtë të zgjidhet dikush që nuk e ka kaluar vetingun. Kryeprokurori u zgjodh me më pak se me votat e gjysmës së Kuvendit, duke bërë këtë rastin e vetëm në historinë e Shqipërisë ku Kryeprokurori zgjidhet më më pak se 50% të votave dhe votimi është nul dhe i pavlefshëm sepse është kryer në shkelje flagrante të rregullores.  Ky është një detaj sepse natyrisht më e rënda është thyerja dhe dhunimi i Kushtetutës.

Natyrisht të gjitha këto fakte, jo opinione por fakte të çojnë në të njëjtin përfundim: Prokurori i Përgjithshëm është një emërim politik i Edi Ramës, në fakt Kryeprokurori sot është Edi Rama. arsyeja dhe misioni është mbrojtja e vetvetes, pra misioni i Kryeprokurorit të kapur politikisht është të mbrojë Ramën.

Nuk ka njeri në Shqipëri dhe jashtë vendit sot që të besojë se

Ø  Edi Rama dhunoi Kushtetutën,

Ø  goditi reformën në drejtësi,

Ø  emëroi një kryeprokuror pa veting,

Ø  vodhi votat e opozitës,

Ø  përdori Gardën për t’i hequr të drejtën e fjalës opozitës brenda në Parlament

që të zgjedhë një kryeprokuror që çon përpara drejtësisë Saimir Tahirin, Vangjush Dakon apo ministrat e tij të korruptuar. Natyrisht që nuk ka njeri që e beson këtë.

Ngutja për të zgjedhur një kryeprokuror pa veting dhe në shkelje të Kushtetutës ka për qëllim ndalimin e hetimit për njerëzit më të afërt të Edi Ramës, të akuzuar për trafik ndërkombëtar droge dhe bashkëpunim me krimin e organizuar për Saimir Tahirin, për Vangjush Dakon, për dosjen e “Xibrakës”, për Qazim Sejdinin dhe ministrat e korruptuar.

Zgjedhja antikushtetuese dhe pa veting e Kryeprokurorit është tregues i panikut të Edi Ramës, për faktin e thjeshtë sepse përditë po zbulohen fakte të reja sesi Saimir Tahiri e ka venë Policinë e Shtetit në shërbim të Habiljave dhe të trafikut ndërkombëtar të drogës, fakte që po zbulohen nga hetimi në Itali apo nga raporti i Shërbimit Informativ Shtetëror me 127 oficerë të lartë të Policisë të përfshirë për të cilën Edi Rama e ka ditur prej vitesh dhe nuk ka vepruar. Sepse ka qenë pjesë e skemës, ka qenë motivuese dhe përfituese e drejtpërdrejtë i skemës që e ktheu Policinë e Shtetit nën drejtimin e Saimir Tahirit në një organizatë kriminale në funksion të kthimit të Shqipërisë në nyjën kryesore të drogës në Europë.

Po dalin fakte të reja sesi Edi Rama ka vënë shtetin në shërbim të Balilajve, jo thjesht dhe vetëm mos ekzekutimit të urdhrit ndërkombëtar për arrest nën presion të autoriteteve europiane dhe amerikane, të DEA-s amerikane, por edhe fakti që deri para pak ditësh Balilajt kanë fituar tendera nga Edi Rama me vlera afro 850 mijë euro për mbrojtjen e objekteve shtetërore.

Kjo është situata, kjo është gjendja, ndaj vendimi i opozitës për të nisur një valë protestash duke filluar nga javët e para të janarit është vendimi i duhur, është vendimi i drejtë dhe i përgjigjet thirrjes së qytetarëve, të qytetarëve shqiptarë të cilët nuk mund të pranojnë kurrë që Kushtetuta të dhunohet, e të nëpërkëmbet për të ruajtur, mbrojtur dhe lartësuar pushtetin autokratik dhe kriminal të një qeverie të bërë njësh me krimin dhe krimin e bërë njësh me qeverinë.

Pyetjet e gazetarëve

TV Klan: Z. Basha, ju thoni se dje mazhoranca ka konsumuar një puç kushtetutes, a do ta godisni në Gjykatën Kushtetuese vendimmarrjen e Parlamentit?

Basha: Për pyetjen e parë, dua t’i sqaroj të gjithë qytetarëve shqiptarë. Gjykata Kushtetuese, nuk është as zjarrfikës dhe as forcë paqeruajtëse. Gjykata Kushtetuese është një institucion juridik, i cili ka për detyrë të interpretojë paqartësitë në raport me zbatimin e Kushtetutës. Kushtetuta ështe qartë si drita e diellit. Askush nuk duhet ta mendojë, as të fshihet pas gishtit, se shpëtimi në krizën ku ndodhet vendi, ku institucionet janë zaptuar nga narkoshteti, ku kryeprokurori është emëruar politikisht në shkelje të Kushtetutës, do të vijë përmes proçedurave juridike apo apeleve dhe ankesave në Gjykatë Kushtetuese. Vetë Gjykata Kushtetuese është në presion, praktikisht e paralizuar si rezultat i ofensives se narkoshtetit. Ndaj e vetmja zgjidhje për këtë krizë të rëndë politike, të shkaktuar nga një narkomazhorancë dhe nga një narkokryeministër, është një përballje politike, e cila nisi dje dhe do të vazhdojë deri në përfundimin, me fitoren e plotë të kushtetutshmërisë, të lirisë, demokracisë dhe aspiratave të qytetarëve shqiptarë, për një Shqipëri të standardit europian dhe jo një Shqipëri të standardit të narkoshtetit.

TV Klan:  Dje ish-kryeministri Berisha, ka hedhur idenë e djegies së mandateve, në shenjë proteste ndaj vendimit të mazhorancës. E mbështesni këtë ide?

Basha : Opozita i ka diskutuar në detaje të gjitha opsionet dhe të gjitha opsionet mbeten të hapura. Vendimet e opozitës do të jenë në përputhje me interesin më të mirë të Shqipërisë dhe shqiptarëve.

Top Channel :  Z. Basha, ju e konsideruat votimin, nul, si një detaj por që është edhe në shkelje të rregullores së kuvendit, a do ta quani legjitim, gjithësesi? Se duke mos u ankuar, duke mos ndjekur veprimet institucionale u jep argumenta edhe të tjerëve lidhur me qëndrimet e opozitës.

Basha: Më lejoni në rradhë të parë të them se, kjo nuk është një çështje burokracie, as peticionesh, por është një çështje e mprehtë politike. Shqipëria gjendet në një krizë të gjithanshme politike, ekonomike, kushtetuese, në një krizë të thellë besimi. Këtë e tregojnë shifrat e shqiptarëve që vazhdojnë të largohen nga vendi në mënyrë të frikshme, pavarësisht apeleve të vendeve anëtare të BE-së, për ta ndalur. Kjo nuk ndalet, për një arsye të thjeshtë, sepse në Shqipëri ka rënë shteti. Kur shteti ligjor ka rënë, kur narkoshteti ka pushtuar çdo hapësirë, detyra kryesore e opozitës është të ftojë qytetarët, duke vetëdijesuar qytetarët për këtë të vërtetë, t’i ftoj të bashkohen me të gjitha mjetet demokratike, për t’u përballur, për të rikthyer shtetin ligjor, për të rikthyer Kushtetutën. Kjo është arsyeja se përse ne kemi bërë thirrje dje dhe në javët e ardhshme, për bashkimin e qytetarëve, pavarësisht bindjeve të tyre politike, por që bashkohen tek Kushtetuta. Sepse Kushtetuta nuk është e Partisë Demokratike, as e Partisë Socialiste, është e çdo qytetari dhe është themeli i bashkëjetesës demokratike. Në këtë kuptim nuk dua të jap asnjë iluzion asnjë shqiptari, as protestuesve, as atyre që do të vijnë nesër, se kjo krizë e thellë politike që Edi Rama e ka shkaktuar për të mbrojtur bashkëpunëtorët e tij, të kapur në flagrancë si bashkëpunëtorë të krimit të organizuar, mund të zgjidhet me peticione ligjore. Pa dyshim që një mandat i fituar në mënyrë antikushtetuese është nul dhe i pavlefshëm. i tillë është edhe mandati i fituar dje. Por nuk është thjesht nul dhe i pavlefshëm. Askush të mos ketë asnjë iluzion. Kryeprokurori në Shqipëri që prej ditës së djeshme është vetë Edi Rama. Dhe arsyeja përse e ka bërë këtë, është thjesht ekzistenciale, jo thjeshtë për Sajmir Tahirin dhe Vasgjush Dakon, por për vetë atë. Dua t’i them çdo shqiptari, të reflektojmë se ku kemi qenë 5 muaj më parë. As Edi Rama dhe për fat të keq askush nuk e përmendte problemin e drogës, përkundrazi, na sulmonin dhe na akuzonin ne si opozitë. Këto janë faktet, siç e dini fare mirë. Në pak muaj e vërteta ka dalë në pah dhe nuk ka më kthim prapa në rrugën para nxjerrjes para drejtësisë të atyre që e katandisën Shqipërinë në një vend të drogës dhe të krimit. Beteja jonë është e gjatë, por fundi i saj është i pashmangshëm. Sajmir Tahiri, Vangjush Dako, Qazim Sejdini, Habilajt, Balilajt, Ahmetajt, Gjiknurët, herët a vonë do të përgjigjen përpara drejtësisë. Qeverisja e Edi Ramës politikisht, ka marrë fund. i vetmi mision është, të shpëtojë kokën e tij. Nuk do t’ia dalë dot, as paratë e drogës, as kriminelët nuk e shpëtojnë dot sikundër nuk e shpëton dot as një kryeprokuror i zgjedhur në mënyrë antikushtetuese. Herët a vonë Edi Rama do të përgjigjet, jo vetëm për përgjegjësitë e tij politike, por edhe për përgjegjësitë e tij para drejtësisë, për aleancën me krimin dhe për kthimin e Shqipërisë në një vend hambar të drogës dhe krimit. Mburoja e përkohshme që ka votuar dje, është një mbrojtje e përkohshme. Mobilizimi i qytetarëve, i opozitës, do të mundësojnë që vendi të kthehet në shinat e kushtetuetshmërisë, normalitetit, demokracisë dhe Reformës së vërtetë në Drejtësi.

Top Channel: Gjithashtu folët edhe për një valë protestash. Nëse ndodheni përballë situatës që kandidaturat për zgjedhjen e anëtarëve nga Kuvendi për Këshillin e Lartë të Prokurorisë, ju do të merrni pjesë në Kuvend me fillimin e sesionit të ri, për zgjedhjen e këtyre anëtarëve dhe më pas për zgjedhjen e Prokurorit të Përgjithshëm?

Basha :  Këshillit të  Lartë të Prokurorisë i kanë futur një thikë. Kush e di se kur do të formohet Këshilli i Lartë i Prokurorisë? Duhej të ishte formuar në Prill. Kanë kaluar 8 muaj. Opozita nuk kishte asgjë në dorë të pengonte apo përshpejtonte KLP. Kjo është një alibi, një gënjeshtër, një mashtrim i Edi Ramës. Faktet tregojnë se Edi Rama ka investuar për mosformimit të KLP-së, përmes levave të tij në shoqërinë civile. E ishin ata që insistuan se njëri nga ata duhej të vinte nga shoqëria civile dhe ishte pikërisht, shoqëria civile që dilte në demostrata për Reformën në Drejtësi, sipas versionit të Ramës dhe jo sipas Venecia-s, që tani nuk na çon kandidatët. Se kur do të formohet KLP nuk është në dorën e opozitës. Këshilli i Lartë i Prokurorisë është sabotuar, për të mos pasur një kryeprokuror me vetting dhe me 3/5 e Kuvendit, por për të pasur një kryeprokuror pa vetting, të emëruar nga Edi Rama, në shkelje flagrante të Kushtetutës dhe për të njejtën arsye po sabotohet dhe po vonohet formimi i SPAK dhe Byrosë së Hetimit, të cilën opozita siç e dini, është i vetmi nga shtatë ligjet që e ka votuar dhe e ka mbështetur në Kuvend.

Abc News: Z. Basha, ju e quani mazhorancën nul në bazë së asaj që thoni se eshtë zgjedhur me vota të vjedhura. Njëkohësisht sot po e quani zgjidhjen e Gjykatës Kushtetuese si një iluzion që mund t’i jepet qytetarëve sepse sipas jush nuk mund të marrë zgjidhje nëpërmjet dokumentave ligjorë. Ju keni deklaruar njëkohësisht se do të bëni opozitë institucionale por tashmë po i ktheheni popullit për t’i kërkuar praktikisht ndihmë. A nuk do të thotë kjo që ju nuk po njihni institucionet dhe nuk ka asnjë mënyrë që kjo të nisë dhe të çohet deri në fund si opzion ligjor që ekziston?

Basha : Dua të përsëris atë që thashë, por ta bëj pak më të qartë, për ju dhe për njerëzit. Dje Edi Rama vendosi kryeprokurorin siç deshi vetë, pa vetting, pa asnjë proçedurë, pra KLP nuk ka, por KLP është Ulsi Manja. Ulsi Manja mori kryeprokurorin dhe tha, ky do të jetë kryeprokurori dhe Shqipëria tani ka një prokuror që është edhe kryeministër, sepse nuk ka kryeprokuror tjetër. Ta zëmë se me të njëjtën logjikë, Edi Rama mbledh Parlamentin ditën e enjte, dhe vendos se mandati i kryeministrit nuk do të jetë 4 vjet, por do të jetë 8 vjet, ta zëmë se vendos të anulojë pluralizmin politik, siç e kuptoni, as problemi nuk është ligjor dhe kushtetues, çështje e interpretimit të hollë, fin dhe delikat të detajeve, dhe as zgjidhja nuk mund të jetë institucionale në kuptimin e peticioneve ndaj gjykatave. Problemi është thellësisht politik. Grushti i shtetit, puçi kushtetues, nuk ndalet me peticion ndaj gjykatave, por ndalet vetëm me përballje dhe vendosmëri popullore. Opozita ka pjesën e vetë, opozita nuk është pronare, as zëdhënëse e Kushtetutës, janë të gjithë qyetarët dhe të gjithë faktorët e shoqërisë, duke përfshirë median, shoqërinë civile të vërtetë, jo atë të kapurën dhe të blerën, duke përfshirë faktorin ekonomik, biznesin e vogël dhe të mesëm, të rinjtë, të rejat, studentët , të gjithë njerëzit duhet të vetëdijesohen se Kushtetuta është e tyre, as e imja, as e Edi Ramës, as e Partisë Demokratike, as e Partisë Socialiste. Është pakti që garanton paqen sociale dhe politike, demokracinë, rrotacionin përmes zgjedhjeve të lira dhe të ndershme, shtetin ligjor, të drejtat dhe liritë themelore të qytetarit, funksionimin e lirive në kuptimin e avancimit individual, në lumturi, në liri, të gjitha këto janë në Kushtetutë. Kushtetuta është dokumenti themelor. Puçi kushtetues nuk ndalet me peticione, ndalet vetëm me përballje.

TVSH :  Zoti Basha, në këto momente që po flasim janë akoma të  ndaluar protestues të djathtë para Parlamentit ndërkohë që disa deputetë  janë duke u ndjekur penalisht. A keni  një qëndrim lidhur me këtë ?

Basha : Kjo është pjesë e skemës së terrorit të narkoshtetit dhe të një ministri të brendshëm, i cili është aty jo si pjesë e vullnetit politik, por si emërim i narkotrafikut, të cilit i shërben përmes vëllait të tij Agron Xhafaj. Nuk ka asnjë habi nga ana ime. Kjo ka ndodhur sa herë opozita ka protestuar. Dhe sot kur shpërbërja e krim politikës sapo ka nisur dhe paniku i Edi Ramës dhe Fatmir Xhafës është në kulm, natyrisht tregon pasigurinë dhe panikun e tyre. Ne do të ndjekim hap pas hapi të gjithë hapat ligjorë. Avokatë, jurisë të PD, deputetë të PD janë pranë çdo të ndaluari në mënyrë të paliogjshme për ti mbështetur ata nga ana ligjore, po kështu dhe nga ana morale dhe politike. Ne po evidentojmë dhe do të  evidentojmë çdo punonjës të shtetit që po shkel ligjin apo po zbaton urdhëra politikë dhe i garantoj se, do t’i dokumentojmë me emër dhe mbiemër dhe për çdo shkelje të ligjit dhe dhunim të protestuesve, të qytetarëve dhe të mbështetësve të opozitës, do të japin llogari shumë shpejt.

Report TV :  Zoti Basha ambasada e SHBA dhe e BE e kanë cilësuar të dhunshme protestën dhe gjithashtu e kanë dënuar sjelljen e deputetëve në Parlament. Keni një reagim në lidhje më këto qëndrime?

Basha : Nuk kam ndërmend të ndryshoj sot rregullin tim për të mos komentuar ambasadorët e huaj. Dhuna e vetme dje në Parlament nuk ishin tymueset por dhunimi i Kushtetutës . cfarëdo të thonë ambasadorët, faktet janë ato që janë . Këshilli i lartë i Prokurorisë nuk është krijuar prej 8 muajsh në dhunim flagrant me Kushtetutën. Prokurori është zgjedhur në mënyrë antikushtetuese nga Edi Rama. Prokurori është zgjedhur pa Veting. SPAK dhe Byroja e Hetimit nuk  janë formuar dhe nuk dihet se kur do të formohen. Këto janë fakte, të tjerat pastaj janë cështje mendimesh  dhe opinione që gjithkush ka të drejtë t’i japë dhe natyrisht të mbajnë përgjegjësi para atyre që mbajnë përgjegjësi.

Report TV : A jeni në komunikim ju me ambasadorët dhe me ambasadat  lidhur me këto fakte?

Basha : Partia Demokratike  dhe unë personalisht jemi në komunikim të vazhdueshëm me të gjithë faktorin ndërkombëtar, i cili është më i vetëndërgjegjësuar se dje për krizën kushtetuese dhe politike  në vend të shkaktuar nga kthimi i Shqipërisë në narkoshtet si projekt politik i Edi Ramës dhe të jeni të sigurt që nesër do të jenë më të vetëndërgjegjësuar se sot. Fundi i narkoshtetit është i sigurt dhe i pashmangshëm.

Deputetët e Partisë Demokratike denoncuan procesverbalin e votimit në Kuvend për Kryeprokuroren ku vërtetohet falsifikimi dhe manipulimi i votës së deputetëve. Sipas procesverbalit, në votim kanë marrë pjesë me votë pro disa deputetë të opozitës, ç’ka vërteton vjedhjen e votës në Kuvend. Deputeti Genc Pollo e vlerësoi këtë votim të paligjshëm si dhe publikoi edhe foton ku karta e tij e votimit merrej nga kreu i socialistëve në Kuvend, Taulant Balla.

“Këta fallsifikojnë edhe emrin e tyre !!! Jo më votën time!!! Votimi i PPP i paligjshëm e i pavlefshëm!!!”, tha Pollo.

Deputetja Jorida tabaku tha se ky votim është një puç kushtetues dhe për më tej i pavlefshëm.

“Sot akti i zgjedhjes së PPP (Prokurorit të Përkohshëm të Përgjithshëm) përveçse një puç kushtetues ishte dhe një proces i falsifikuar. Të paktën në dy raste deputetët e Partisë Socialiste kanë marrë kartat dhe kanë votuar duke e zhytur akoma dhe më shumë në paligjshmëri dhe antikushtetuetshmëri këtë proces. Ky proces nisi dhe bitisi si i pavlefshëm!”, tha Tabaku.

Deputeti Ervin Salianji tha se do të ketë ndjekje penale për vjedhjen e votës së deputetëve në Kuvend. Sipas tij, kjo vjedhje ja delegjitimuar Kuvendin.

“Ndjekje penale për vjedhjen dhe tjetërsimin e votës së deputetëve! Deputetë të maxhorancës vjedhin votën në sallën e parlamentit; në prani të kamerave, të fotografëve dhe të çdo shqiptari që ndiqte këtë seancë. Mendoni çfarë kanë bërë me votën e qytetarëve. Mendoni çfarë kanë bërë dhe bëjnë me tenderat dhe aferat korruptive që janë në dokumenta që nuk i sheh dot publiku”, tha Salianji.

Për deputetin tritan Shehu, votimi është nul dhe antikushtetues. Sipas tij, provat janë të pakundërshtueshme për tjetërsimin e votës së deputetëve në Kuvend.

“Ajo që ka ndodhur sot në sallën e Kuvendit me kartat e deputetëve, e konfirmuar edhe në listën e votuesve për prokurorin, e nulifikon me prova të pa kundershtueshme atë proces votimi. Ky proces, që filloi si antikushtetues u “asgjesua” qartësisht edhe teknikisht nga një manipulim banal. Nuk thonë kot, kush do t’i bëjë varrin tjetrit bie vetë brenda!”, tha Shehu.

Basha: Tërhiquni nga shkelja e Kushtetutës! 

Berisha: Mohimi i së drejtës së fjalës duke përdorur Gardën, është shpallje lufte në Parlament! 

Basha : Edi Rama si Adolf Hitler. Qytetarët si gardianë të Kushtetutës, kanë të drejtë të marrin në dorë fatin e tyre! 

Ndërhyrja e parë e Lulzim Bashës:

Zonja dhe zotërinj,

Të dashur bashkëqytetarë që na ndiqni nëpërmjet ekranit,

Të nderuar protestues, që jeni mbledhur jashtë kësaj salle.

Sot është një ndër ditët më dramatike për këtë Parlament, një nga ditët më të rënda për demokracinë 27 vjeçare, një nga ditët më të ështira për qytetarët shqiptarë që duan një vend demokratik ku respektohet ligji dhe Kushtetuta.

Sot, në dhunim flagrant të Kushtetutës, shumica parlamentare po kërkon të marrë një pushtet që nuk i takon. Akoma më keq, që e ka të ndaluar ta prekë, e ka të ndaluar t’i afrohet. Kjo është një seancë antikushtetuese.

Sot në mënyrë tinzare ju po bëheni gati për një grusht të mirëfilltë shteti.

Prej shekujsh, Perëndimi, Europa, SHBA, shembujt e shumicës dërrmuese të shqiptarëve, e kanë sanksionuar qartë, ndarjen e  pushteteve si themelin e demokracisë, si themelin e vetë lirisë së çdo individi.

Legjislativi, ekzekutivi dhe drejtësia, janë dhe duhet të jenë të ndarë nga njëri- tjetri. Kjo është arsyeja se pse Kushtetuta e Shqipërisë dhe Reforma në Drejtësi, e cila është e gjitha e mishëruar në këtë Kushtetutë, ia ndalon shprehimisht, një force të vetme politike emërimin e Prokurorit të Përgjithshëm. Nenet e kësaj kushtetute janë të qarta dhe ju jeni paralajmëruar vazhdimisht gjatë këtyre javëve të zeza për demokracinë, për kushtetutshërinë dhe për Reformën në Drejtësi, të mbani duart larg pushtetit të tretë, pushtetit të drejtësisë.

Jeni paralajmëruar të mos vazhdoni më pengimin dhe bllokimin e hetimeve për Sajmir Tahirin, për Vangjush Dakon, për Qazim Sejdinin, për dosjet e korrupsionit të ministrave për konncesionet, për inceneratorët, për qindra milionë euro të shqiptarëve,të vjedhura e të shpërdoruara sipas dokumentave zyrtare të këtij shteti. Por ju jeni të vendosur të shkelni Kushtetutën për të mbrojtur veten tuaj, për të mbrojtur pushtetin tuaj të paligjshëm dhe për të mbrojtr pasuritë tuaja.

Ky është çasti i fundit ku në emër të Kushtetutës ju kërkoj të tërhiqeni!

Kushtetuta është arsyeja përse ekziston ky Parlament, dhe jo anasjelltas. Ky është urdhëri i popullit, bindjuni atij, ose përndryshe përballuni me pasojat!

Ndërhyrja e Sali Berishës pasi Garda u urdhërua t’I ndalojë fjalën:

Kjo nuk ka ndodhur kurrë në historinë e këtij Parlamenti. Një deputeti i jepet fjala, një kryehorr, një pispisi, një fundërrinë që do sot të bëhet kryeprokuror, fut Gardën në një akt të pashembullt për të ndërprerë të drejtën e fjalës të cilën e mora në përputhje të plotë me procedurën. Me këtë akt, ky horr shpall luftë në Parlament dhe të jetë i bindur që do t’i qëndrojmë dhëmb për dhëmb dhe fije për fije kryepisit të Shqipërisë, kryehorrit të Shqipërisë, atij që kërkon sot të bëhet edhe kryeprokuror i Shqipërisë.

Ndërhyrja e dytë e Lulzim Bashës:

Gramoz Ruçi, Ke një kërkesë të drejtuar nga unë në emër të gjithë opozitës parlamentare, ke një kërkesë me shkrim  institucionale nga tre grupet parlamentare opozitare. Dhe jo vetem kaq. Është detyra jote, e gjithësecilit prej nesh në këtë salle të mos lejojmë dhunimin e kushtetutës.

Kushtetuta është arsyeja pse jemi ulur sot këtu. Kushtetuta është arsyeja pse ka parlament dhe jo Parlamenti pse ka Kushtetutë. Kushtetuta ta ndalon shprehimisht të bësh aktin që ke futur në rendin e  ditës, kapjen e Prokurorit të Përgjithshëm me votat e një partie politike. Reforma në drejtësi ta ndalon të kapësh Prokurorin e Përgjithshëm, reforma në drejtësi që kaloi me 140 vota dhe me përkrahje politike totale kombëtare dhe ndërkombëtare ta thotë shprehimisht se Prokurori I Përgjithshëm nuk mund të zgjidhet me më pak se 3/5 e votave se Prokurori i Përgjithshëm nuk mund të zgjidhet pa vetting. Ndaj, kërkesat i ke dhe mbi kërkesat ke urdhrin sublim të sovranit, të shkruar në kushtetutë të zezë mbi të bardhë, tërhiqu nga shkelja e kushtetutës, tërhiqu nga tentativa për puç kushtetues, përndryshe opozita brenda dhe qytetarët jashtë nuk kanë rrugë tjetër, por të qëndrojnë me të gjitha forcat dhe mjetet në mbrojtje të kushtetutës.

Ndërhyrja e tretë e Lulzim Bashës :

Ju shikoj, unë, ju shikojnë shqiptarët, ju shikon bota, dhe më në fund e kuptojmë se sa qesharakë jeni kthyer, se çfarë skllevërie të krimit ju ka kaptuar shpirtin. Si mundet të ngrehni kartonat ju në një votim të thjeshtë procedure për të shkelur Kushtetutën. Edhe Adolf Hitleri u kujdes për forma më shumë se ju, kur shkatërroi pluralizmin politik dhe demokracinë gjermane, me konsekuence fatale për botën dhe Europën, edhe për vendin tonë. Kush mendoni ju se jeni?! Të ngrehni kartonat për të ndryshuar me vullnetin tuaj të ndrydhur nga paratë e drogës, krimit dhe korrupsionit vullnetin e shqiptarëve që e përfaqëson vetëm Kushtetuta e Shqipërisë. Nuk ka shans!

Kushtetuta jua thotë qartë; nuk e keni këtë të drejtë! Ju doni ta merrni me zor! E pra dijeni se gardianët e Kushtetutës, qytetarët shqiptarë, kanë çdo të drejtë të marrin në dorë fatin e tyre nëse ky Parlament dhe kjo shumicë kukull e krimit dhe e drogës vendos të shkelë dokumentin themeltar që ndaj të drejtën nga e keqja, paqen nga lufta.

Ne nuk do të lejojmë në asnjë sekondë të kthehemi në një fasadë të këtij veprimi antikushtetues. Thirrini mendjes, tërhiquni tani nga shkelja e Kushtetutës përndryshe do të përballeni me të gjitha pasojat që përballet autokrati kriminal kur shkel urdhrin e sovranit. Kushtetuta është urdhër i popullit dhe ju keni detyrimin e padiskutueshëm t’i bindeni e ta zbatoni. Tërhiquni tani nga shkelja e Kushtetutës ose përndryshe deklaroni vdekjen përfundimtare të këtij Parlamenti.

Siç e keni marrë vesh, mbledhja e tryezës së bashkuar të opozitës ka përfunduar me një vendimarrje unanime. Opozita është e bashkuar dhe e vendosur për protestën e së nesërmes, protest e cila do të zhvillohet brenda dhe jashtë sallës së Kuvendit, nga opozita parlamentare dhe nga qytetarët e bashkuar për të kundërshtuar me çdo formë dhe mjet demokratik puçin kushtetues që Edi Rama do të vërë në jetë nesër.

Interesi i Edi Ramës është dhe vetëm një; të shpëtojë Saimir Tahirin, për të shpëtuar lëkurën e tij. Të mbyllë dosjet e korrupsionit dhe hajdutërisë masive të ministrave të tij, të ndihmojë narkotrafikantët që kanë rënë në rrjetën e Krimeve të Rënda apo në rrjetat e Antimafias dhe institucioneve ndërkombëtare të ligjzbatimit, të pengojë me çdo kusht nisjen e pastrimit të madh të politikës nga krimi përmes Reformës në Drejtësi.

Nesër Edi Rama ka dy qëllime. Duke dhunuar Kushtetutën të emërojë një prokuror politik. Duke emëruar një prokuror politik, të pengojë, të ngadalësojë apo të asgjesojë dosjet e krimit dhe korrupsionit që lidhin bashkëpunëtorët e tij të ngushtë me krimin dhe me atë vetë.

Në këto kushte, shqiptarët kanë të vetme zgjedhje, që mund të ketë çdo popull i civilizuar kur Kushtetuta, pakti që ndaj të mirën nga e keqja, politikën demokratike nga diktatura, dhunohet dhe shkelet, dhe kjo është të bashkohemi për të treguar që ky vend ka institucionin e opozitës në këmbë, ka qytetarët e lirë në këmbë për të mbrojtur liritë themelore.

Nëse nesër, Edi Rama tenton të çojë deri në fund puçin e tij kushtetues, duhet ta dijë se kostoja e përballjes do të jetë e madhe në kuptimin e goditjes që do t’i japë bashkëjetesës demokratike, stabilitetit në vend, dhe se shqiptarët si çdo komb tjetër i civilizuar nuk mund dhe nuk do ta pranojnë as dhunimin e Kushtetutës, as kapjen politike të drejtësisë, as asgjesimin e Refomës në Drejtësi për të cilën kemi investuar kaq shumë dhe që shqiptarët mezi e presin për interesat e tyre si qytetarë por edhe për interesin madhor kombëtar të pastrimit të politikës nga krimi, pa të cilën nuk do të ketë as hapje negociatash, as Shqipëri europiane.

Pra, nesër bashkohemi për këto qëllime të mëdha që i ndajnë kombet e civilizuara nga kombet e robëruara. Për të mbrojtur Kushtetutën, për të mbrojtur drejtësinë nga kapja politike, për të mbrojtur Reformën në Drejtësi.

Reagimi i qytetarëve në këto 24 orë të organizimit opozitar është i jashtëzakonshëm ndaj dua t’i ftoj të gjithë ata që duan me të vërtetë demokraci, duan reformën në drejtësi, duan të kenë të garantuara kushtet për të jetuar këtu dhe jo një Shqipëri që rrënohet ditë për ditë dhe e bën të pamundur për të ndershmin, për njeriun me integritet, me talent, të jetojë në Shqipëri port ë largohet si refugjat, të gjithë të bashkohemi para Kuvendit të Shqipërisë, para Parlamentit në orën 9.30 kur do të nisë protesta popullore jashtë Kuvendit dhe protesta popullore brenda Kuvendit.

Ju ftoj të jemi të gjithë së bashku pavarësisht bindjeve politike. Ajo që na bashkon si shqiptarë dhe si europianë është mbrojtja e Kushtetutës, drejtësia e pakapur politikisht, dhe mbrotja e Refomës në Drejtësi si e vetmja garanci për një Shqipëri europiane.