Blog

Shumë të dashur qytetare dhe qytetarë të Tropojës,

Miq, të afërm, familjarë të Azem Hajdarit,

Të dashur Fatmira, Rudina, Kiri dhe Azem,

I nderuar z.kryetar i Bashkisë,

I nderuar Dr.Berisha,

Të nderuar deputetë dhe personalitete të Shqipërisë, Kosovës, Maqedonisë, Malit të Zi, Luginës së Preshevës,

Shkelqësi ambasadorë, anëtarë të trupit diplomatik, bashkëqytetarë të Azem Hajdarit,

Zonja dhe zotërinj,

Kam ardhur me gëzim dhe dëshirë të madhe në këtë festë të bukur, në këtë ditë solemne të rikthimit të përjetshëm të Azem Hajdarit, në vendlindjen e tij të dashur, në Tropojën e tij të shtrenjtë.

Këto male, e di janë plot me heroizëm dhe lavdi shqiptare që shkon thellë në histori. Azem Hajdari është heroi më i ri, është një maje e lartë e këtij panteoni të historisë e kombit tonë. Ai është  udhëheqësi i Lëvizjes Studentore demokratike dhe intelektuale të Dhjetorit 1990.

Tropojës i takon nderi t’i ketë dhënë kësaj lëvizje historike që hapi epokën e demokracisë europiane në Shqipëri edhe liderin e Studentëve të Dhjetorit, Azem Hajdarin, edhe liderin historik të demokracisë shqiptare Sali Berishën.

Azem Hajdari e shënoi hapjen e epokës së re të demokracisë shqiptare, e shënoi që nga çasti kur në emër të studentëve që u ngritën bashkë me të dhe me thirrjen e tij kundër diktaturës komuniste kërkoi vendosjen e pluralizmit politik në Shqipërinë e telave me gjemba e deri kur armiqtë e lirisë e goditën pabesisht, për ta ndarë në mes të një rruge të gjatë betejash, arritjesh, sfidash dhe sakrificash nga gjiri ynë. Beteja, sakrifica dhe sfida për të ruajtur busullën dhe kursin perëndimor të demokracisë së brishtë shqiptare.

Azem Hajdari është nga brumi i atyre heronjve që me kalimin e kohës e tresin brenda emrit të tyre çdo epitet që mund të thuhet për ta.

Azemi është uragani, është tribuni, është guximi, është trimëria, është frymëzimi, është liria, është shqiptaria.

Emri i tij është personifikimi i këtyre vlerave që mishërojnë dhe lartësojnë njeriun, shqiptarin, atdhetarin.

Si bir i familjes ku i lind dhe i krahinës ku u rrit, Azem Hajdari ju përket ju, i përket Tropojë dhe ju jeni krenarë për birin tuaj. Si udhëheqës politik Azem Hajdari i përket Partisë Demokratike të Shqipërisë, themelues dhe kryetari i parë i së cilës ishte. Demokratët janë dhe do të jenë përherë mirënjohës dhe krenarë me prijësin e tyre të orëve të para, me tribunin e tyre të pavdekshëm. Si heroi i demokracisë Azemi i përket gjithë Shqipërisë, i përket gjithë kombit.

Sa më shumë shkon koha, Azem Hajdari fiton përmasat e një figure politike të papërsëritshme, që afron, që bashkon, që frymëzon me shembullin dhe veprën e tij.

Shqiptarët i detyrohen shumë me mirënjohje dhe nderim për gjithçka bëri  e dha për lirinë e të gjithëve ne.

Duke i prirë betejës së madhe fisnike dhe heroike për lirinë e të gjithëve Azemi fitoi përjetësinë. Ky është fati i luftëtarëve të lirisë. Kjo përmendore që ngrihet sot në nderim të tij është vetëm njëra prej përmendoreve në mbarë vendin, në mbarë kombin.

Në fakt përmendoren më të madhe të Azemit e kemi e në zemrat dhe mendjet tona. Këtu në zemrat dhe mendjet tona Azem Hajdari vazhdon të  na ndriçojë rrugën. Këtu në mendjet dhe në zemrat tona Azemi na flet sikur të ishte i gjallë. Sepse këtu është dhe do të mbetet i gjallë përherë.

Në mendjen dhe në zemrën time, në mendjet dhe zemrat e mbarë rinisë shqiptare kujtimi i ndritur i Azem Hajdarit vjen me mesazhin e gjallë e frymëzues se Liria nuk është një dhuratë e përjetshme, se liria u përket atyre që e duan dhe e çmojnë si më të shtrenjtën gjë në jetë, se Liria shërbehet e duhet të shërbehet me përkushtim e sakrifica. Se liria fitohet e mbahet me beteja duke shkuar çdo ditë në luftë për të. Se liria është mision për drejtuesit politikë.

Ky është Azemi i pavdekshëm i mendjeve dhe zemrave.

Por sa  bukur ta shohim sot në një vepër arti, në një përmendore si kjo që u lartësua në qytetin e tij të lindjes. Kështu kthehen heronjtë. Do ta keni në mesin tuaj, do të zgjoheni e ngryseni me të, me bashkëqytetarin tuaj të përjetshëm.

Tropoja është sot më e bukur me përmendoren e Azem Hajdarit.

Mirënjohjen time për artistin Isa Baliaj.

Urime gjithë qytetarëve, e qytetarëve të Tropojës,

Zoti e bekoftë Tropojën e demokracisë!

Zoti e bekoftë Shqipërinë!

Zoti i bekoftë shqiptarët!

Ju faleminderit!​

Cështja Tahiri nuk është fundi por fillimi i çmontimit të narko-shtetit

Pyetje: Keni pasur një takim të gjatë me ambasadorët e BE-së dhe ambasadorin amerikan?

Basha: Kam patur një takim me ambasadorin Lu. Ambasadorët e Bashkimit Europian kanë qenë në një takim tjetër po në të njëjtën godinë. Keqkuptime që kanë ndodhur dhe më parë me atë godinë.

Qëndrimi i qeverisë amerikane është i qartë dhe nuk ka nevojë për komentin tim. Ata mbështesin pa rezerva prokurorët dhe gjyqtarët në një hetim të plotë dhe të paanshëm për të zbardhur dhe për të vënë para përgjegjësisë penale të gjithë ata politikanë të përfshirë në krimin e organizuar dhe në trafikun e drogës si dhe dënojnë cdo përpjekje që politikanët të jenë mbi ligjin dhe jashtë ligjit. Pra që imuniteti parlamentar të përdoret për të mbrojtur politikanët e lidhur me krimin dhe drogën.

Sajmir Tahiri nuk do ti shpëtojë drejtësisë. Pavarësisht prej mbrojtjes politike që i bëri dje maxhoranca, faktet e dala publikisht dhe faktet e tjera të cilët disponohen nga organet shqiptare të hetimit, nga prokuroria shqiptare, por dhe nga partnerët, do të bëjnë të mundur që ai të marrë përgjegjësitë e tij penale para ligjit shqiptar për mbrojtjen dhe ndihmën  që i ka dhënë, jo thjesht  një bande kriminale por përpjekjes për ta kthyer Shqipërinë vetëm në katër vite në një bazë të sigurt të krimit të organizuar, në prodhuesin më të madh të  kanabisit në Europë dhe eksportuesin e drogave të lehta dhe të forta drejt Europës. Këto janë konstatime të institucioneve perëndimore nuk janë thjesht dhe vetëm konstatime të opozitës, e cila pa dyshim kanë qenë në ballë të kësaj beteje.

Sajmir Tahiri nuk është fundi por është fillimi i një procesi të cmontimit të narkoshtetit, të cmontimit të mafias së narkotikës, që ka kapur shtetin.

Kjo luftë e cila sapo ka filluar, nuk do të jetë as e lehtë dhe as e shkurtër . Por Partia Demokratike do të ketë rolin e saj jashtëzakonisht të rëndësisshëm në këtë luftë, në planin e mbështetjes totale ndaj organeve të zbatimit të ligjit,  në vecanti ndaj prokurorisë dhe gjykatave të vendit. Në planin legjislativ për të rrëzuar dhe zhveshur narkoshtetin dhe përfaqësuesit e mafies në nivelin politik nga cdo alibi, me anë të së cilës mbrohen nga ligji sic është imuniteti parlamentar. Dhe po kështu, në planin politik me qëllim që Shqipëria të clirohet nga krimi, të clirohet nga droga, të clirohet nga narkoshteti që ka depërtuar në cdo qelizë.

Kjo është një përpjekje të cilën ne e bëjmë në bashkëpunim me partnerët strategjikë të Shqipërisë, me BE dhe SHBA dhe jemi krah për krah me ta.

Beteja sapo ka nisur dhe jemi shumë të inkurajuar nga mbështetja që i është dhënë dhe do t’i jipet në ditët dhe javët në vazhdim, kësaj beteje jetike për të ardhmen e Shqipërisë dhe për integrimin europian të Shqipërisë, që kalon vetëm përmes cmontimit të narkoshtetit.

Cmontimit në kuptimin ligjor, pra vënin para përgjegjësisë të cdo politikani që ka mbrojtur apo i ka shërbyer trafikut të drogës dhe organizatave kriminale, dhe në kuptimin politik për ti dhënë Shqipërisë një qeveri dhe një qeverisje të pastër nga krimi i organizuar dhe nga lidhjet e krimit me narkotrafiqet dhe me mafien, e cila ka diktuar dhe dikton vendimarrje të turpshme politike, sic ishte ajo e djeshmja e Edi Ramës për të mbrojtur Sajmir Tahirin me imunitet parlamentar nga akuzat ligjore të prokurorisë të bazuara në përgjimet e antimafias.

Pyetje: Edi Rama i lexon në favor të tij deklaratat e ambasadorit LU gjatë ditës së sotme duke i konsideruar si një qëndri kundër ndaj një gjyqi që ai e quajti komunist.

Basha: Ky është një qëndrim i dëshpëruar i Edi Ramës. Qeveria e SHBA ka folur fare qartë. Unë nuk jam këtu për të interpretuar qëndrimet e tyre. Po ju mund të shikoni mbështetjen e plotë që i është dhënë hetimit, gjykatësve, prokurorisë dhe dënimit të cdo qëndrimi që mbron përmes imunitetit parlamentar, politikanët e akuzuar për lidhje me krimin.

Qëndrimi i sotëm i Ramës nuk është vetëm një qendrim i dëshpëruar i të mbyturit që kapet pas fijes së kashtës por po kështu evidenton para shqiptarëve dhe para partnerëve se Rama vazhdon të jetë, siç ka qenë prej fillimit, pjesë e problemit dhe refuzon të bëhet pjesë e zgjidhjes.

Është pjesë e problemit sepse pa lejen e tij, pa miratimin e tij, pa dijeninë e tij, Shqipëria nuk do të mund të shndërrohej në një hambar të drogës në këto katër vjet vetëm përmes Saimir Tahirit. Saimir Tahiri është vetëm një hallkë. Saimir Tahiri, Arben Ndoka, Armando Prenga, Elvis Rroshi, Vangjush Dako, prania e bandave kriminale dhe afërsia e tyre me të gjitha shtabet elektorale të Partisë Socialiste janë tregues të një projekti politik, nuk janë rastësi. Edi Rama e di fare mirë se është ai përgjegjës para opinionit publik dhe para partnerëve ndërkombëtarë që në katër vite të shkurtër e ktheu Shqipërinë nga një vend anëtar i NATO-s, qytetarët e të cilit lëviznin lirshëm pa viza në Bashkimin Europian, në një vend që tregohet si strehë e krimit të organizuar, si baza kryesore e prodhimit dhe trafikimit të kanabisit, dhe si një nga bazat kryesore të eskportit të drogave të frota drejt Europës perëndimore. Përgjegjësitë e tij janë të qarta në kuptimin politik dhe Partia Demokratike do të bëjë gjithçka që këto përgjegjësi ai ti ti mbajë politikisht por edhe ligjërisht para drejtësisë.

Pyetje: z Basha, a ju kanë kërkuar ndërkombëtarët dhe në veçanti ambasadori Lu të hidhni idenë të një Parlamenti të zhveshur totalisht deputetët nga imuniteti?

Basha: Këto janë qendrime që Partia Demokratike ka 8 vite që i mban në mënyrë të përsëritur dhe në këtë kuptim ne jemi në një rol aktiv. Përveç mbështetjes totale ndaj Prokurorisë, ndaj Gjykatave në hetimin e rastit Tahiri dhe çdo rasti tjetër që pritet të dalë të politikanëve të lartë që i kanë dhënë mbështetje dhe mbrotje trafikut të drogës, kërkojmë një zgjidhje politike përmes një qeverie antimafia, një qeverie jo të kapur nga mafia dhe interesat mafioze, por edhe përmes ndryshimeve legjislative që do të ndihmojnë çmontimin e narko shtetit dhe kupolës mafioze që ka zaptuar shtetin.

Pyetje: Z Basha, a do ti kthehet Partia Demokratike jetës normale parlamentare dhe e kam fjalën për pjesëmarrjen tuaj në komisionet parlamentare?

Basha: Jetë normale parlamentare, siç e keni parë, nuk ka. Prej ditës së parë të këtij parlamenti të dalë nga një votë e shtrembëruar përmes milionave të drogës siç evidentohete dhe nga përgjimet e antimafias italiane, ne kemi shtruar dhe shtrojmë domosdoshmërinë e një zgjidhje politike.

Çfarë ndodh në një vend ku maxhoranca është fiktive, ku parlamenti është ilegjitim dhe për rrjedhojë edhe qeveria është ilegjitime?! Kjo qeveri nuk është përgjegjëse para shqiptarëve. Kjo qeveri është përgjegjëse para atyre që me paratë e drogës e sollën në pushtet. Pa zgjidhur këtë problem të jashtëzakonshëm politik vendi nuk mund të ecë përpara. Lufta kundër krimit nuk mund të ecë përpara.

Ndaj paralelisht me mbështetjen që u japim organeve të drejtësië, prokurorisë, për të çuar deri në fund hetimin dhe për ta vënë Saimir Tahirin para përgjegjësisë penale, të cilës nuk do ti shpëtojë, detyra jonë është që së bashku me të gjithë faktorët e tjerë shoqërore, me qytetarët e ndershëm të këtij vendi, me median – një pjesë të së cilës dua ta përgëzoj nga zemra për kurajon e jashtëzakonshme në veçanti dua të përgëzoj nga zemra gazetarët që janë në vijën e parë të frontit, që nuk kanë asnjë privilegj dhe asnjë joshje nga narkoshteti dhe nga mafia, por kanë vetëm kërcënime të turpshme si ato të djeshmet, – pra të gjithë së bashku ne do të mundësojmë që vendi ti kthehet normalitetit.

Për momentin nuk ka normalitet dhe nuk mund të ketë normalitet as në parlamentin shqiptar. Por ne do ta vazhdojmë këtë betejë brenda parlamentit me të gjitha instrumentat e opozitës parlamentare derisa së bashku me qytetarët shqiptarë të marrim një vendim tjetër.

Pyetje: z Basha a ndieni një lloj shqetësimi mes diplomatëve dhe atyre amerikanë në lidhje me vonesën e ngritjes së institucioneve të reja të Drejtësisë? A ka një shqetësim që po vonon reforma që në një farë mënyre ka edhe autorisë e tyre?

Basha: Lejomëni t’ju them që Partia Demokratike mbështet fuqimisht zbatimin sa më shpejt të reformës në drejtësi zbatimin e vetingut, ngritjen e strukturës së posaçme antikorrupsion, SPAK dhe ka besim të plotë që ky proces do të ndihmojë në çmontimin e mafies dhe narkoshtetit. Natyrisht mafia dhe narkoshteti kanë interesa të tjera, të zvarritjes dhe mundësisht të kapjes së procesit të reformës në drejtësi. Kam besim se në bashkëpunim me partnerët tanë, me SHBA dhe BE, opozita dhe Partia Demokratike do t’ia dalin të që institucionet e reja të drejtësisë të jenë një vlerë e shtuar në luftën kundër mafies, në luftën kundër krimit të organizuar, në luftën kundër trafikut të drogës dhe në çmontimin e narkoshtetit.

Pyetje: Paralajmërimet tuaja për ministrat e tjerë ose zyrtarë të tjerë socialistë, bazohen mbi pritshmëri, për atë çfarë do të ndodh, apo mbi informacione që ju mund t’i keni.

Basha: Partia Demokratike dhe unë jemi në një kontakt të vazhdueshëm me partnerët tanë. Edhe opozita, edhe partnerët kanë informacione të besueshme dhe të shumta për rolin e individëve, politikanëve me pushtet në kthimin e Shqipërisë në një bazë të sigurt të krimit të organizuar dhe trafikut të drogës.

Është detyra jonë si opozitë që në bashkëpunim dhe në bashkërendim me partnerët ndërkombëtarë të bëjmë jo thjeshtë dhe vetëm denoncimin publik të këtyre fakteve, por të sigurohemi që prokuroria shqiptare dhe gjyqësori shqiptar, këta individë sado të pushtetshëm qofshin, anëtarë të kabinetit, drejtues të lartë të pushtetit, të trajtohen njësoj para ligjit si çdo qytetar shqiptar dhe të marrin para drejtësisë atë që meritojnë.

Asnjë politikan që ka mbrojtur dhe ka përfituar nga ndihma e drejtëpërdrjetë dhe bashkëpunimi me krimin e organizuar dhe trafikun e drogës nuk duhet t’i shpëtojë drejtësisë. Kjo është beteja jonë sot që nis me rastin Tahiri, por ky nuk është fundi, por vetëm fillimi i çmontimit të narko-shtetit.

Pyetje: Z.Basha ju thoni që ndërkombëtarët kanë fakte, kanë prova që implikojnë jo vetëm Tahirin por edhe shumë ministra të tjerë. Por ambasadori Lu në fakt shigjetoi  edhe një pjesë të politikës nga e djathta, pasi tha që :“në 27 vjet ka politikanë majtas dhe djathtas të korruptuar të korruptuar të cilët nuk janë ndëshkuar.”

Basha: Unë nuk marr përsipër të komentoj deklaratat dhe qëndrimet. Mund t’ju them vetëm që këto qëndrime janë fare të qarta: Mbështetje totale të hetimit, mbështetje totale prokurorëve dhe gjyqtarëve dhe një paralajmërim i fortë për mbrojtjen që iu bë në rastin “Tahiri”  duke mos  i hequr imunitetin, duke lejuar Saimir Tahirin, të ruajë privilegjet imunitare duke refuzuar kërkesën e Prokurorisë për arrestimin e tij si një hap i domosdoshëm për procedimin me sukses të kësaj çështje.

Megjithatë shpreh bindjen time më të thellë se bazuar mbi fakte dhe prova ligjore, Prokuroria me mbështetje parimore, publike nga opozita dhe nga partnerët ndërkombëatrë do ta finalizojë misionin e saj dhe se gjyqësori do të bëjë drejtësi në rastin “Tahiri” duke dhënë shembullin e parë dhe jo të fundit, që politikanët e lidhur me krimin e organizuar dhe me trafikun e drogës nuk do të mund t’i shpëtojnë drejtësisë.

Pyetje: Kush janë këta politikanë që janë të implikuar z.Basha, përveç Tahirit?

Basha: Unë jam këtu për të dhënë qëndrimet e opozitës. Unë e di që gazetaria ka kohë të vështira, ju ftoj edhe ju që të bëheni pjesë e zbulimit të kësaj të vërtete, që ishte edhe një nga thirrjet e bëra sot nga ambasadori Lu dhe dua t’i përsëris mesazhin çdo shqiptari që të lexojë qartë mesazhet e partnerëve tanë, qëndrimet e partnerëve tanë.

Si dhe t’i bëjë thirrje Edi Ramës të heqë dorë nga përpjekjejet e dëshpëruara si i mbyturi pas fijes së kashtës, për të keqinterpretuar qëndrimet që janë të qarta. Mbështetje totale për hetimet, mbështetje totale për prokurorinë, dënim të mbrojtjes së çdo politikani që hetohet për krimin dhe drogën, përmes imunitetit parlamentar. Siç ndodhi dje nga Parlamenti shqiptar, nga mazhoranca shqiptare me një votë të turpshme. Dhe ky është rekordi historic: në 24 vite që prej vitit 1994 ky është rasti i parë kur një politikan mbrohet nga maxhoranca e tij, ndërkohë që drejtësia ka kërkuar arrestimin për akuzën e bashkëpunimit për trafikun e drogës në  një grup të strukturuar kriminal dhe korrupsion pasiv.

Ky është një alarm i madh i kuq i ndezur në çdo kancelari dhe në çdo qendër të partnerëve tanë, të cilët janë krah shqiptarëve dhe me të cilët në krah ne do të vazhdojmë deri në fund betejën që sapo ka nisur për çmontimin e narkoshtetit dhe kupolës mafioze në pushtet.​

Të nderuar bashkëqytetarë,

Që krimi, droga dhe e keqja kanë zaptuar Shqipërinë, treguesi më i mirë është puna e këtij Kuvendi. Ja ku jemi prapë, jo për të parën herë, duke u marrë me një tjetër kriminel. Kuvendi i Shqipërisë që pas ardhjes në pushtet të Edi Ramës është rasti i vetëm në historinë e botës, që është marrë më shumë me punët e kriminelëve brenda kësaj salle, sesa me punët e ekonomisë, shëndetësisë, mirëqenies së njerëzve.

Ja ku jemi, duke shpenzuar më shumë kohë për të larguar kriminelët që ti Edi Rama ke sjellë në radhët e kësaj qeverie dhe këtij parlamenti, sesa të punojmë për jetët e fëmijëve tuaj, për të hapur vende pune  dhe për t’i liruar lakun nga fyti njerëzve të thjeshtë. Kemi shpenzuar më shumë kohë për të ndalur dorën tënde grabitëse nga xhepat e njerëzve me tendera, me koncensione, me grabitje sesa për t’i ndihmuar njerëzit në nevojë.

Sot ky Kuvend ka vendosur një tjetër rekord të zi. Është hera e parë që Kuvendi hedh poshtë kërkesën e Prokurorisë për heqjen e imunitetit të një deputeti. 24 deputetëve rresht,  Kuvendi i Shqipërisë ju ka hequr imunitetin pa asnjë përjashtim nga viti 1994.  Ju është hequr politikanëve më të lartë të vendit, të majtë e të djathtë në pushtet dhe në opozitë. Ju është hequr nga shumica të majta, ju është hequr nga shumica të djathta, ju është hequr për akuza të rënda, për akuza më të lehta e madje edhe qesharake.

Por arsyeja për këtë qëndrim të pandryshuar të Kuvendit ka qenë e thjeshtë. Me të mirat dhe me të këqijat e tyre, të gjitha legjislaturat e mëparshme kanë respektuar parimin se pushtetet janë të ndara. Se i takon drejtësisë të vendosë për këdo. Detyra e Parlamentit është vetëm t’i hapë rrugë drejtësisë.

Deri më sot.

Sot ky Kuvend është kthyer në vulën e narkoshtetit Rama-Tahiri. Narkoshteti Rama-Tahiri ka dy standarde për drejtësinë: një për veten e tyre dhe një për njerëzit e thjeshtë. Narkotrafikantët dhe narkopolitikanët janë të paprekshëm.

Dy vjet më parë, para një pallati të rrënuar në Fier, ia behën në orën 01:00 të natës, një varg me makina me xhama të errët të ardhur nga Tirana. Mbi 20 inspektorë dhe policë të Kontrollit të Brendshëm të Ministrisë të drejtuar nga Saimir Tahiri, hynë në një apartament të thjeshtë, në tre dhoma ku jetonin 7 shpirtra në një gjendje pothuajse të mjeruar. Ata kontrolluan shtëpinë pa asnjë dokument dhe pa asnjë lloj urdhri kontrolli, dhe pastaj morën një burrë zvarrë dhe e futën në makinë pa i thënë asgjë.

Emri i burrit është Dritan Zagani. Pasi e sollën në Tiranë, gjithë natën, e mbajtën të tre ditë të mbyllur pa të drejtë avokati dhe më në fund e çuan para Gjykatës ku më në fund mësoi akuzën “shpërdorim detyre”. “Shpërdorim detyre”, pa asnjë fakt, pa asnjë informacion kriminal. “Shpërdorim detyre” sepse ndau me partnerët informacionin se anti-droga e Fierit ishte vënë në dispozicion të bandave kriminale që kontrolloheshin dhe komunikonin me Saimir Tahirin dhe me Edi Ramën.

Sot Zagani fatmirësisht ndodhet në Zvicër në strehim politik për shkak të persekutimit politik nga narko-shteti Rama-Tahiri.

Kjo është drejtësia që Sajmir Tahiri dhe Edi Rama u ka dhënë shqiptarëve. Njerëzit e ndershëm, njerëzit e varfër janë rrëmbyer në kundërshtim me ligjin dhe për akuza qesharake.

22 vjeçari Estref Halili nga Kolonja e Lushnjes u arrestua dhe u çua në vetëvrasje për një cigare hashash. Për Tahirin, që është kapur në përgjimet e antimafias me tonelata hashash ju nuk shihni prova.

Melita Çenga, infermiere nga Shkodra, Brunilda Meka nga Korça u hoqën nga puna dhe shkuan drejt vetëvrasjes se nuk mbanin dot familjen. Ju mbroni Tahirin që merrte 30 mijë Euro për ngarkesë.

Resmije Alla 35 vjeç humbi jetën sepse donte që fëmija e saj azmatik të kishte dritë dhe mundësi për pompën e frymës që ti ia ndërpreve se nuk kishte mundësi të paguante. Tahiri merr 9 mijë Euro byzylykë, 15 mijë Euro diamante nga trafikantët dhe ti thua “s’ka prova”.

12 kryefamiljarë në një vit të vetëvrarë sepse nuk paguanin dot energjinë elektrike, dhe 5 milionë Euro në muaj nga kryetrafikanti Ministri yt i Brendshëm, po ti nuk ke prova.

Qamil Zela, i burgosur, i vetëvarur për një borxh prej 3 mijë e 200 lekësh ndaj Operatorit të Shpërndarjes së Energjisë që e ke vënë në funksion të bandave të Durrësit, por Sajmir Tahirit i duheshin të paktën 20 milionë Euro për fushatë.

Arif Doda, Klajdi Muça, Llazar Nasi, Gjovalin Gjini, e dhjetëra të tjerë, i ke çuar ti drejt vetëvrasjes për faturën e energjisë, por për Ministrin tënd të Brendshëm me targë AA003GB që bënte trafik droge ti nuk ke prova.

Ky është shteti yt mafioz që burgos dhe dhunon të varfërit dhe mbron e u bëhet mburojë kriminelëve dhe trafikantëve.

Ka dhe një të vërtetë tjetër.

Mbrëmjen e ditës kur deputetët socialistë të Këshillit të Mandateve vendosën për të mos i hequr imunitetin Sajmir Tahirit, dy miq të mi të huaj, darkonin në një nga lokalet më luksoze të Tiranës. Për çudinë e tyre, por jo timen, dy tavolinat e vetme të zëna në restorant kishin në tryezë deputetë socialistë.

Në njërën një deputet socialist, në një shoqëri të hareshme, me puro të rralla kubane dhe konjak të zgjedhur. Në tjetrën një ish-ministër i yti darkonte me verë që kushtonte më shtrenjtë se rroga minimale në Shqipëri. Dy deputetë, pothuajse tërë jetën rrogëtarë të shtetit, në jetën e tyre nuk e kishin parë këtë lluks, por që sot jetojnë si sheikë mes vendit më të varfër të Europës.

Kjo është e vërteta tjetër e votës suaj sot.

Nuk ishte votë për të mbrojtur krimet e Tahirit, por ishte votë për të mbrojtur tenderat e vjedhura, koncesionet klienteliste, pasuritë publike të tjetërsuara. Për të mbrojtur të paktën gjysmën e meshkujve në kabinetin tënd, të xhiruar dhe të përgjuar nga partnerët, siç t’i kanë dhënë ty provat, si lidhje të drejtpërdrejta të bandave kriminale të drogës dhe trafikut të armëve.

Sot me këtë votë keni mbrojtur veten tuaj. Sot me këtë votë, i keni vënë gozhdën e fundit një familje politike dhe ideologjike, që sot e keni kthyer në një familje kriminale, trëndafilin e të cilës e keni zëvendësuar me lulen e hashashit.

Vota e sotme është edhe kundër socialistëve të thjeshtë. Vota e sotme është votë dëshpërimi, paniku, për ty Edi Rama dhe për këdo tjetër, këtu në këtë sallë që nuk u çlirua dot nga interesat e ngushta personale dhe frikës së dosjeve që do të hapen.

Por, historia tregon se kur regjimet fillojnë të bien, skërmisin dhëmbët. Dhe e sotmja e tillë është, skërmitje dhëmbësh.

Kjo qeveri ka rënë! Është de facto e vdekur! Dhe orët e narkoshtetit kanë filluar të trokasin mbrapsht.

Letra që nxori sot Saimir Tahiri mund të tundet për militantët e oborrit por për askënd tjetër.

Prokuroria e Katanias, ka arrestuar Moisi Habilajn dhe kërkon anëtarët e tjerë të bandës, sepse ata janë kapur duke e kryer aktivitetin kriminal në territorin e tyre, në Itali.

Prokuroria e Katanias, nuk mund dhe nuk e ka për detyrë të procedojë Ministrin në Tiranë, që mbështet, lehtëson dhe i hap rrugën bandës në trafikun e drogës.

Kjo është detyrë e prokurorisë shqiptare.

Pikërisht, këtë detyrë të prokurorisë dhe drejtësisë shqiptare, Edi Rama dhe Saimir Tahiri po e pengojnë, duke mos pranuar kërkesën e saj.

Aktakuza e antimafias italiane per Tahirin jane 1800 faqe prova, dëshmi, dhe fakte të drejtësisë italiane tregojnë përfshirjen direkte të Tahirit dhe përfitimet e tij në miliona euro nga trafiku i tonelatave me drogë.

Cdo qytetar shqiptar do të ishte në burg me këto prova.

Por Saimir Tahiri jo, sepse ka imunitet, dhe sepse e mbron Edi Rama.

Arsyet pse e mbron Edi Rama, tashmë janë të qarta për këdo. Sepse është i kapur, sepse Tahiri nuk do të rrinte duarkryq, por sic ia ka bërë të ditur, do të nxirrte provat dhe materialet që ka për përfshirjen direkt të Edi Ramës, të familjarëve të tij, të ministrave të tij, në afera të rënda kriminale.

Ndaj, Edi Rama jo vetëm nuk miratoi kërkesën, cka pritet ta finalizojë nesër në Parlament me votën kundër, por edhe më shumë, ka nisur një sulm të paprecedentë ndaj prokurorisë.

Një sulm frontal, të paprinciptë, dhe shantazhe të njëpasnjëshme, ku dallon këtu kërcënimi ndaj dëshmitarit që ka prokuroria e krimeve të rënda, për lidhjen e Tahirit me Habilajt.

Ndërkohë që ndaloi drejtësinë të bënte punën e saj, Edi Rama i dha kohën e duhur Tahirit të pastronte shtëpinë dhe të zhdukte provat që e lidhin me bandën e trafikut të drogës.

Parlamenti shqiptar nesër ka provën, nëse do të zgjedhë drejtësinë dhe barazinë para ligjit, apo do të zyrtarizojë dy standartet e Ramës, e do të marrë në mbrojtje krimin.

Partia Demokratike dhe opozita qëndrojnë në anën e drejtësisë dhe barazisë para ligjit.