Blog

Zonja deputete!
Zotërinj deputetë!

Zoti Kryetar!

Të nderuar qytetare dhe qytetarë që ndiqni këtë seancë!

Parlamenti i vendit, njohu javën që kaloi tronditjen e tij më të madhe në historinë e ekzistencës së tij si parlament pluralist. Parlamenti ka njohur dhe gjak në këto pllaka, ka njohur situata shumë të rënda por ju garantoj se ajo e javës së kaluar, ishte një situatë e cila mund të çonte vendin drejt një konflikti të hapur, të gjerë, dhe vështirësisht të mbyllshme. Provokimi më i ulët që ju i bëtë opozitës, duke sjellë vrasëit në parlament për të votuar për ministrat tuaj, është një akt i cili detyron çdo deputet të opozitës të mendojë për një zgjidhje finale dhe përfundimtare. Cila ëhtë ajo, është tjetër punë. Por akte të tilla, pas dy viteh debat kryesor krimin dhe dekriminalizimin, janë aktet më të shumtuara, në të cilën një mbështetës kryesor krimi që është Edi Rama me dy tre gjykatës, marrin përipër të zhysin vendin, qoftë dhe në konflikt të hapur civil, me mungesën totale të përgjegjësisë.

Ju po adaptoni doktrinën e krimit të dobishëm, kurse ne krimin e konsiderojmë të shëmtuar. Bazuar në doktrinën e krimit të dobishëm ju lejoni këtu vrasës dhe mbani në burg viktima, ju sillni vrasës në parlament për ti thënë opozitës se ne këtu i kemi. Dhe ju mendoni se në këtë mënyrë do fitoni betejën. Jo gabim shumë. Po ju them që ju në këtë mënyrë shkatërroni parlamentin, por betejë nuk fitoni. Betejat s’fitohen kurrë në këtë mënyrë! Ajo që fitohet është shkatërrimi parlamentit. Të njëjtin qëndrim ju mbani ndaj vendimit të Gjykatës Kushtetuese. Unë ju them ju zoti kryetar, se ai qëndrim është puç i shtetit brenda shtetit, në politologji ajo quhet “grusht shteti brenda shtetit”. Kur një institucion i merr pushtetin një institucioni tjetër, ky është grusht shteti brenda shtetit. Eshtë e tmerrshme kur parlamenti i merr pushtetin një institucioni, që është presupozuar të jetë themelor për një shtet ligjor, që është Gjykata Kushtetuese. Dhe ju duke marrë pushtetin për hir të Koços, të Valit, apo tjetrit, ju asgjesoni faktikisht Republikën, e cila është ndërtuar mbi një bazë ndarjesh pushtetesh. Ndërsa ju merrni gjithshka për hir të Koços, për hir të Valit, për hir të Rakipit, për hir të Sadriut, etj me radhë.

U ndala këtu se, ju në këtë mënyrë dëshmoni se këtu parlamenti nuk mund të ekzistojë pa de-kusarizimin e tij, ju dëshmoni se de-kusarizimi i parlamentit është po kaq jetik dhe më thellë jetik se sa dekriminalizimi. Ju dëshmoni se ju keni një vullnet të sëmurë për ta përdorur atë mandat për të vjedhur, rrjepur pasuritë e shqiptarëve. Po atëherë çfarë kemi ne ketu, çfarë na lidh ne me këtë parlament? Se ne opozitë jemi, këtë detyrë kemi ne, se ne vetëm pushtet moral kemi. Ju edhe një të drejtë kushtetuese që ka opozita në këtë vend ja merrni, nenin 77 të Kushtetutës ju e bëni abolicion, e hiqni, s’ekziston. Ju faktikisht në këtë mënyrë asgjesoni Kushtetutën, edhe me veprime, edhe në gërmë. Asgjesoni opozitën, e cila të gjithë fuqinë reale në këtë parlament e ka në atë nen.

Pra, unë gjykoj se parlamenti është, dhe ja u them me keqardhjen më të madhe këtë sepse unë jam njëri që e dua parlamentin, por ai është absolutisht buzë katastrofës dhe dezintegrimit. Dhe ka mënyra shumë të thjeshta për ta dezintegruar parlamentin.

Unë ju them se është ditë e zezë për Shqipërinë nëse dezintegrohet parlamenti. Por parlamenti nuk mund të ekzistojë kur ju sillni njerëz që sapo kanë vrarë, sapo  plagosur, dhe i ulni këtu karshi nesh. Parlamenti nuk mund të ekzistojë kur kusarët e shtetit rrëzojnë vendimin e Gjykatës Kushtetuese, nuk pyesin për asnjë nen. Por ju duhet të dini një fgjë, se në vendet demokratike, kudo ekziston një ligj i konfliktit të interesit, që nuk lejon mandatmbajtësit, pushtetmbajtësit, familjarët e tyre, njerëzit e tyre të plaçkisin pronën publike. Kurse këtu kjo është bërë ligj.

Atëherë, ose ju do pranoni procesin e de-kusarizimit, ose ne, në mënyrë absolute, nuk e gjejmë më veten në këtë parlament, sepse kështu ne nuk mund të rrimë. E kam thënë dje në mbledhje të grupit parlamentar. Ju mund t’ju duket çudi por e thashë se, më duket vetja si në ‘91, kur kaloja tek rruga e Kavajës kur shkoja tek selia PD, dhe shihja shtatoren e diktatorit dhe i thoja bashkpunëtorëve të mi që ne vetëm opozitë nuk jemi, çfarë opozite jemi ne këtu që ne kalojmë përbri tij. Çfarë opozite jemi ne kur ulemi këtu me njerëz që i kanë duart me gjak, të freskët. Çfarë opozite jemi ne këtu kur ulemi këtu me pushtetarë, të cilët përdorin mandatin, votën për të vjedhur dhe për t’u pasuruar? farë opozite jemi ne këtu kur Koço bllokon nëpërmjet sivllaut të tij botimin e gazetës zyrtare, çfarë opozite jemi ne?

Se ne duhet t’ja u shtrojmë këto pyetje vetes, ne kaq kemi pushtet, vendimet i merrni ju. Pushteti ynë është vetëm ky, pushtet moral, merr vendime mbi bazën e ligjeve dhe sigurisht, kur ato janë të bazuara në ligje, dëgjohen. Unë ju them edhe një herë, është koha e fundit të reflektoni, para se parlamenti të shkojë drejt dezintegrimit të plotë!

Fjalimi në Kuvend i ish kryeministrit Sali Berisha, 3 Mars 2016

Në fakt nuk do të ishin fare të nevojshme negociatat, pasi formulari, për të cilin bëhet fjalë ka ardhur i gatshëm nga FBI, siç jeni dhe ju në dijeni dhe nuk ka pasur fare nevojë të hyjë në këto negociata për të arritur në një marëveshje përfundimtare. Megjithatë dje PS nuk pranoi të adoptonte këtë formular dhe aktet nënligjore të përshtatshme por tentuan të fusnin në formular pika që praktikisht krijonin hapësira për të shpëtuar një numër i madh i atyre të inkriminuarve që janë në parlament apo që mbajnë poste të larta në administratën aktuale.

Jemi ende në negociata dhe në momentin e parë që do të informohemi për mbylljen e negociatave do të kthehemi në parlament.

Por ajo që unë dua të theksoj është që aktet nënligjore për ligjin e dekriminalizimit ishin detyrim i këtj parlamenti dhe sot siç e dini është data e fundit që duhet të kalonin.

Por ne kemi dhe tri kërkesa të tjera, që nuk janë teka tonat por që lidhen gjithashtu me detyrime dhe të drejta kushtetuese, që ka ky parlament dhe kjo mazhorancë.

Kërkesa e parë e lindur nga ajo që ndodhi javën e kaluar në parlament ku një deputet i mazhorancës i akuzuar, i kapur në flagrance, se ka plagosur dhe ka qëlluar me armë para derës së komisariatit policisë, na u shfaq papritur në Parlament,  na detyroi që, ligjërisht ti kërkojmë parlamentit , mazhorancës të miratojë një amendament që të ndalojë të gjithë ata zyrtarë jo thjesht deputetë por të gjithë ata zyrtarë që kapen në flagrancë duke krye akte të rënda siç janë plagosja ose vrasja, ti ndalojë që deri në një vendim të gjykatës për ta, të ushtrojnë detyrat e tyre.

Nuk ka pasur asnjë argumentim kundër kësaj kërkese, përveç disa abuzimeve dhe justifikimeve bajate, se gjoja ligji sapo ka kaluar dhe nuk është logjike që ta ndryshojmë brenda dy muajsh. Asnjë logjikë juridike dhe njerëzore nuk ka këtu, sepse ligjet bëhen dhe ndryshohen në bazë të kushteve dhe situatave që krijohen. Për atë arsye krijohen ligjet sepse jeta ka sjellë nevojë e një ligji për të zgjidhur  një çështje apo problem i caktuar.

Dhe fakti është që ne u gjendëm përpara një të papriture, ku askush nuk e priste, që një deputet, i cili është i akuzuar për plagosje i kapur në flagrancë do të shfaqej në dyert dhe karriget e Parlamentit. Pra kërkesa jonë është mëse logjike dhe absolutisht brenda çdo rregulli që ka miratimi i një amendamenti apo projektligji.

Kërkesa tjetër në fakt po them kërkesa por këto janë detyrime ligjore që i ka parlamenti dhe mazhoranca, lidhet në fakt me të gjitha këto, janë pika që lidhen me marrëveshjen e Dhjetorit 2014 pavarësisht sa jashtë normale duket që ti kërkosh mazhorancës të zbatojë Kushtetutën, por në ato kushte u gjendem atëherë dhe fatkeqësisht në në ato kushte gjendemi prapë dhe pas arritjes së marrëveshjes së Dhjetorit 2014, ne jemi në kushtet kur prapë mazhoranca shkel kushtetutën dhe vendimet e Gjykatës kushtetuese.

Vetëm pak ditë më parë Gjykata kushtetuese zbardhi vendimin që kishte marrë lidhur me rastin, me precedentin Kokëdhima.  Siç  e dini është përfitues i fondeve publike në kundërshtim me Kushtetutën e Shqipërisë, deputet që ka përfituar fonde publike dhe sipas ligjit dhe kushtetutës, ky zotëri, jo vetëm duhet të dorëzojë paratë që ka marrë, por i digjet dhe mandati si deputet. Të njëjtat raste janë me zonjën Leskaj dhe me zotin Suli, të cilët jo direkt, po nëpërmjet fëmijëve të tyre kanë përfituar fonde publike dhe ligji për konfliktin e interesave është i qartë dhe për këto pika.

Por çfarë ndodhi ndërkohë? Ndërkohë që ne prisnim të zbatohej vendimi i Gjykatës kushtetuese për Koço Kokëdhimën, mblidhet Këshilli i Mandateve dhe vendos të kundërtën e asaj që kishte vendosur Gjykata kushtetuese.

Gjykata Kushtetuese vendimin e ka të qartë, nuk është Parlamenti i cili mund të diskutojë dhe të marrë vendime për çështje të tilla. Nëse opozita apo 1/10-a e deputetëve kërkon që të shqyrtohen çështjet e konfliktit të interesit, konkretisht siç janë rastet e Kokëdhimajt, Leskajt, apo Rakip Sulit, atëherë detyrimisht Parlamenti e kalon në Gjykatë Kushtetuese dhe është Gjykata Kushtetuese më pas që gjykon dhe merr vendime për këtë çështje. Çfarë ndodhi. Vetëm dy ditë më parë këshilli i mandateve bëri të njëjtën gjë që kishte bërë me Kokëdhimën dhe me Leskajn, trajtoi çështjen e Rakip Sulit dhe vendosi që mos ta dërgojë në Gjykatë Kushtetuese, një vendim hapur në shkelje të Gjykatës Kushtetuese, vendimeve të Gjykatës dhe vetë Kushtetutës. Pra jemi ende në pozitat e mosfunksionimit të Parlamentit pavarësisht pikës e cila po negociohet tani. Janë disa çësthje të tjera që ky Parlament është krejtësisht jashtë realitetit apo situatës normale përderisa institucioni më i lartë ligjvënës është i pari që shkel Kushtetutën e vendit.

-Nëse refuzohen aktet nënligjore, cfarë ndodh me Parlamentin?

Vërtetë po negociohet për një nga pikat, por janë tre pika të tjera për të cilat Parlamenti është në shkelje kushtetuese. Ju thatë të marrim kohë për Koço Kokëdhimën ndërkohë që Këshilli i Mandateve ka marrë një tjetër vendim. Nëse nuk do të kishte ndodhur ajo që ndodhi me rastin e Rakip Sulit, pra që u mor një tjetër vendim i Parlamentit, në këtë rast, Këshillit të Mandateve në kundërshtim me vendimin e sapozbardhur të Gjykatës Kushtetuese, mbase do të duhej të ishim në kushtet e pritjes të zbatimit të procedurës. Por na është thënë qartazi edhe me arrogancë që nuk kemi ndërmend të zbatojmë vendimet e Gjykatës Kushtetuese. Në këto kushte nuk e di se çfarë mund të pritet. Ky Parlament vazhdon të jetë në një situatë aspak normale, përderisa është i pari ai që shkel vendimet e Gjykatës dhe vetë Kushtetutës.

-Z. Paloka, për këto tre pika a i keni lënë një afat mazhorancës, dhe çfarë do të bëjë opozita në rast se këto nuk zbatohen?

Këtu nuk bëhet fjalë për afate as për procedura, ju e ndoqët një javë më parë në në konferencën e kryetarëve na nxorën justifikime të rregullores apo pjesës së procedurës, ndërkohë që po sot atë që ne e kërkuam një javë më parë, futjen në rend të ditës së akteve nënligjore duke e votuar siç u votua në Parlament, një javë më parë na thanë se kjo nuk mund të ndodhë se nuk e lejon procedura, sot e futën. Pra këtu nuk bëhet fjalë për procedurë, rregullore apo për pjesë të kësaj rregulloreje, por thjesht për mungesë vullneti politik. Këtu mungon vullneti politik i kësaj mazorance edhe për dekriminalizimin edhe pse janë të detyruar të miratojnë aktet nënligjore dhe për çdo pikë tjetër. Sepse nuk shpjegohet ndryshe që kryeministri i vendit shëtit dhe bën shou nga një i inkriminuar në një tjetër. Ka një javë që nuk ka lënë asnjë nga të inkriminuarit që ne kemi përmendur dhe që dihen publikisht si zyrtarë, apo ish- deputetë apo kryetarët bashkishë të inkriminuar, pa i nxjerrë në krah të tij. Bushi ishte i fundit. Pra kemi të bëjmë me një mungesë vullneti të hapur nga kjo mazhorancë për të realizuar të gjitha këto pika dhe i kërkojmë detyrimet e saj kushtetuese.

-Përse e quani pikë të paplotësuar rastin e z.Rakip Suli kur Parlamenti nuk është shprehur ende?

Parlamenti, këshilli i mandateve kishte mundësinë të tregonte që e kishte lexuar vendimin e Gjykatës Kushtetuese dhe të zbatonte detyrimin e tij që ti rekomandonte parlamentit të kalojë çështjen në Gjukatë Kushtetuese, ndërkohë që këshilli i mandateve e hodhi poshtë, nuk pranoi ta bënte këtë rekomandim. Sepse minimumi këtë duhet të bëjë. Këshilli është organ këshillimor, nuk është vendimmarrës, duhej ti rekomandonte seancës plenare që çështjen e Rakip Sulit ta kalojë dhe të gjykohet në Gjykatë Kushtetuese. Nuk jemi ne, nuk është ky Parlament që merr vendime dhe as gjykon. Eshtë Gjykata Kushtetuese.

-Do të rrini në sallë sa të mbarojnë negociatat?

Për qëndrimin tonë në lidhje me pikat e tjera, rastin konkret se si do të sillemi sot në seancë do ta vendosë përsëri Grupi, por asgjë nuk ka ndryshuar nga qëndrimi ynë parimor lidhur me çfarë ju thash më lart. Për sot do të marrë vendim Grupi.

Prononcimi për mediat i kryetarit të grupit parlamentar, Edi Paloka, 3 mars 2016

Reagim për mediat i deputetit Flamur Noka, pas raportit të Departamentit Amerikan të Shtetit për narkotikët.

-Z.Noka, pak minuta më parë në një dalje z.Tahiri tha se Raporti i DASH ka vlerësuar punën efektive të policisë së shtetit për sa i përket luftës së narkotrafikut. Cili është reagimi juaj?

-Në një ditë si kjo pas raportit të Departamentit Amerikan të Shtetit i cili ka konfirmuar atë që ne kemi thënë vazhdimisht, atë që shqiptarët kanë parë në këtë periudhë se Shqipëria është mbuluar me kanabis, dalja e ministrit ishte një dalje prej krenaristi kur Shqipëria është gjelbëruar anekënd me hashash, dhe kështu ndodh sepse raporti i DASH, e cilëson në mënyrë të drejtprërdrejt që Shqipëria është prodhuesi kryesor i kanabisit në Europë dhe Shqipëria është pikë kryesore e tranzitit të drogave të forta. Konfirmim më të qartë dhe më të plotë se ky për treguar se në këtë vend ku qeverisemi nga Edi Rama dhe ministri i tij kryetrafikant Sajmir Tahiri, se në këtë vend ku bandat dhe trafikantët të lidhur drejtpërdrejt me ta janë edhe në parlament, pra konfirmim për atë që ne shohim se shqiptarët dhe Shqipëria qeveriset nga trafikantët, ku nuk mund të ndodhë ndryshe kur në Parlament kemi banditë dhe trafikantë, nuk mund të ndodhë ndryshe kur bandat e Habilajve dhe të Shullazit e kanë kthyer Shqipërinë në plantacion droge dhe në korridorin kryesor të drogave të forta. Ky është realiteti dhe në këtë realitet që ne e jetojmë çdo ditë, i vuri vulën sot edhe Departamenti Amerikan i Shtetit. Ky është një turp i madh për këtë qeveri. Ju mbani mend në vitin 2012 Shqipëria kishte dalë nga harta e trafikut të drogave të forta, Shqipëria nuk ishte më pikë tranzit. Ky është një kthim mbrapa dhe dalja e një krenaristi është e turpshme, në vend të futej sot skutave dhe të fshihej nga turpi për këtë damkë që mori vendi ynë, ai del me paturpësi së bashku me kryeministrin e tij si krenaristë dhe mburren për një turp dhe një damkë që iu vu vendit tonë sot.

Prononcim i deputetit të Partisë Demokratike Flamur Noka, 3 mars 2016

 ​

Ka një skenar të Edi Ramës për të prishur marrëveshjen e 24 Dhjetorit të vitit 2014, kushti për të cilin palët politike ranë dakort me ndërhyrjen e Brukselit për dy çështje madhore, çështja e parë që kishte të bënte me dekriminalizimin dhe çështja e dytë që kishte të bënte me ekzekutimin e vendimeve të Gjykatës Kushtetuese. Ju keni ndjekur live debatet e zhvilluara në Këshillin e Rregullores lidhur me ekzekutimin e vendimit të Gjykatës Kushtetuese dhe precedentin e rastit Kokëdhima, për deputetët e tjerë, të cilët kanë përfituar fonde publike. Gjykata Kushtetuese e ka thënë të qartë pa asnjë ekuivok, se në rast se opozita kërkon që një deputeti i cili ka përfituar fonde publike, thënë ndryshe ka marrë para nga gjaku i shqiptarëve, duhet të shkojë para gjykatës, askush nuk ka të drejtë që të pengojë.

Nëse kryeministri e pengon, thotë Gjyakata Kushtetuese, për çdo deputet, rasti ishte për Kokëdhimën, por edhe për z. Suli dhe për znj. Leskaj, atëherë bie Kushtetuta, bie ndarja e pushteteve.

Edi rama ka një skenar për ta kundërshtuar dhe e kundërshtoi dhe e rrëzoi vendimin e Gjykatës Kushtetuese. Nuk pranuan që ti hiqnin mandatin deputetit Sula dhe ky është një skenar për të krijuar një krizë politike e cila nuk vjen rastësisht. Vjen pikërisht tani kur ka ardhur Venecia 2, e cila e ka thënë qartë se Byroja Kombëtare e Hetimit nuk mund të jetë byroja e Rilindjes dhe e Sajmir Tahirit. Por Rama kërkon të krijojë një krizë politike për të zhbërë konsensusin për reformën në drejtësi. Për ti ikur Byrosë së Hetimit, sepse shqetësimi i qytetarëve është i qartë, shqetësimi i qytetarëve është korrupsioni në Parlament. Eshtë kështu apo jo? A ka korrupsion në qeveri? Ka korrupsion në qeveri. Kush është thembra e Akilit për korrupsionin dhe reformën në drejtësi, është Byroja e Hetimit dhe Byroja e Hetimit nuk do të jetë më Sajmir Tahiri por do të jetë në Prokurorinë e Përgjithshme.

Dhe për të mbrojtur deputetët e tij kërkon të krijojë një krizë politike, kërkon të krijojë dhe po përshkallëzon një tension politik të jashtëzakonshëm.

Dhe kjo ka të bëjë me dy çështjet për të cilat i gjithë opinioni publik shqiptar por edhe i gjithë opinioni ndërkombëtar ka qenë i sensibilizuar. Ju e mbani mend. Ka ardhur Brukseli këtu për këto 2 çështje, për vendimet e Gjykatës Kushtetuese dhe për Dekriminalizimin. Për orë të tëra nuk u arrit dakordërsia që deputetët me rekorde kriminale të largohen nga Parlamenti duke sajuar dhe duke i rënë ballë ligjit për dekriminalizimin dhe një natë më parë pikërisht, vendimit të Gjykatës Kushtetuese, u refuzua në mënyrë arrogante nga mazhoranca.

Këto janë çështjet që të gjithë shqiptarët duhet ti dinë dhe ne jemi për t’ua bërë të ditur. Nuk kemi ende një njoftim për të mbledhur këshillin e rregullores por duket qartë. Ju e patë se edhe 3 orët e tjera në të cilat qëndruam, këta refuzojnë në mënyrë permanente dhe arrogante të hartojnë formularin i cili është instrumenti se si do dalin deputetët e inkriminuar nga Partlamenti.

Prononcim për mediat i deputetit Eduard Halimi, 3 mars 2016

Ajo që po ndodh, deri mbrëmë por vazhdon dhe sot, janë përpjekje të mazhorancës që konsensusi i 21 Dhjetorit të prishet. Eshtë detyrim i Parlamentit të miratojë pikë për pikë atë që kërkon ligji dhe pikë për pikë jo vetëm gërmat, por dhe frymën e ligjit. Formulari i vetëdeklarimit që ofron PD i jep mundësinë Ligjit të dekriminalizimit që të zbatohet plotësisht. Ajo që kërkon PS është që nëpërmjet formularit të propozuar prej saj,  të cungojë thelbësisht mundësinë e prokurorisë dhe organeve kompetente që të kërkojnë çdo të dhënë, të hetojnë  çdo të dhënë të personave që kanë rekorde kriminale dhe qëllimi është vetëm një, që kriminelët që janë sot në politike dhe në administratë të shpëtojnë dhe në të ardhmen të kenë mundësinë përsëri të përsërisin atë që kanë bërë nga viti 2013 e këtej. Ne nuk pranojmë në asnjë rast që nëpërmjet një instrumenti si formulari që paraqet PS, kriminelët të kenë rastin përsëri të livadhisin në politikë apo administratë. E vetmja mundësi është që duke pranuar formularin që ofron PD i cili është plotëisht në përputhje me ekspertizën më të mirë të ofruar nga ekspertët e FBI dhe që zbaton jo vetëm në germë, por ligjit të dekriminalizimit i jep mundësinë të marrë dhe të shoshisë çdo lloj të dhëne me karakter penal që kanë politikanët, drejtuesit e lartë apo administrate, dhe kush gjendet më pas në kushtet e ndalimit të ligjit të largohet.

Formulari  është vetëm instrumenti që do të mbledhë të dhëna nuk është instrumenti për zbatimin e ligjit siç kërkon ta qasë mazhoranca. Formulari është kurthi, ku kriminelët duhet të ngecin dhe jo të përdoret si instrumenti për tu shmangur nga zbatimi i ligjit. Këtë kanë bërë deri dje në darkë, sot mbetet akoma dhe pak hapësirë për ta parë nëse mazhoranca do të tërhiqet.

Mos harroni që dje qe një tentativë e turpshme nëpërmjet një instrumenti të përdorur nga stafi i Kuvendit për ta quajtur ligjin antikushtetues, tentativë e pastër për të rrënuar zbatimin e ligjit, për ta vonuar atë. Por gjithashtu, një gjë me shumë rëndësi është që nëse ne nuk i japim zgjidhje fenomenit që deputeti  Prenga ilustron, pra duke pranuar Parlamenti amendamentin e PD, kjo kategori e rrezikshme duhet të largohet nëpërmjet ligjit të dekriminalizimit pra vetëm me ligj dhe jo me vullnete individuale, sigurisht atëherë nuk kemi zgjidhje. Pra të dyja janë shumë të rëndësishme: miratimi i amendamente që kërkojmë ne dhe nga ana tjetër zbatimi i plotë pa asnjë lloj shtegu të lirë për kriminelët i ligjit të dekriminalizimit. Kjo arrihet duke pranuar proprozimin e detajuar që ka ofruar PD. Çdo lloj tentative tjetër është zvarritje dhe minim i ligjit. Nuk ka asnjë hapësire tjetër. Po ju them nëse vazhdohet me atë që u bë dje, sigurisht që nuk do të kemi asnjë lloj zgjidhje. Ajo që ndodhi dje është vetëm një zvarritje për të marrë kohë por kohë nuk ka më.

Prononcim për mediat i deputetit Oerd Bylykbashit, 3 mars 2016

Kryetari i Partisë Demokratike Lulzim Basha priti në një takim zv. Presidentin e Bankës Botërore për Rajonin e Europës dhe Azisë Qendrore, z. Cyril Muller, Drejtorin Ekzekutiv të Bankës Botërore për Shqipërinë, z. Patrizio Pagano dhe znj. Ellen Goldstein, Drejtoreshë Rajonale për Vendet e Europës Juglindore.

Zoti Basha ka shprehur shqetësimin për situatën e rëndë ekonomike që po kalon vendi, rritjen e borxhit publik, mungesën e investimeve dhe çfarë është më problematikja rritjen e papunesise dhe varferise me ritme te pershpejtuara.

Korrupsioni i shtrirë në të gjitha qelizat e qeverisjes, mungesa e transparencës, krimi, pasiguria juridike dhe rritja e nivelit të varfërisë ishin disa ndër problematikat e ngritura në këtë takim nga kryetari i Partisë Demokratike.

Në vitin 2015 rreth 400 milionë euro i munguan buxhetit të shtetit vetëm nga doganat dhe tatimet. Shqetësim është rritja e borxhit publik nga 62% në 74%. 1.1 miliardë euro ka marrë borxh qeveria, tha Basha dhe sot nuk asnjë investim publik, asnjë rrugë të re, asnjë shkollë, nuk ka as rritje pagash e pensionesh, as më shumë fonde për personat në ndihmë ekonomike, përkundrazi është ulur pagesa për papunësinë, ndërkohë që është rritur papunësia, siç raporton Komisioni Europian.
Kryetari i Partisë Demokratike është ndalur dhe tek niveli i lartë i korrupsionit. Basha theksoi se 1 miliardë euro janë vjedhur vetëm gjatë vitit të kaluar, 400 milionë euro nga doganat dhe tatimet dhe 777 milionë euro nga tenderat, prokurimet dhe koncesionet korruptive, të cilat gjithnjë fitohen nga familjarët, miqtë dhe klientët e Kryeministrit dhe ministrave të tij.

Koncesionet janë kthyer në një mënyrë përfitimi të parave publike nga një grup personash të lidhur me qeveritarët siç janë ato në shëndetësi e deri tek rasti i TVSH, ku siç raportojne meduat investigative koncesionari ka lidhje me vëllain e kryeministrit dhe për këtë arsye u shkarkua dhe ministri i Financave për t’u zëvendësuar nga Arben Ahmetaj. Po kështu zoti Basha solli në vëmendje përfitimet e deputetëve nga fondet publike, siç është rasti i Koço Kokëdhimës, Valentina Leskajt dhe Rakip Sulit. Një tjetër shqetësim i zotit Basha ishte dhe bllokimi i komisioneve hetimore nga mazhoranca duke bojkotuar mbledhjet, siç është dhe rasti më flagrant i serverit të tatimeve, ku u morën të dhënat 25vjeçare te tatimpaguesve.

Në bashkëbisedimin me zv. Presidentin e Bankës Botërore për Rajonin e Europës dhe Azisë Qendrore z.Muller, zoti Basha u ndal dhe në një prej problemeve më të rënda për politikën dhe shoqërinë shqiptare, promovimi i personave me precedent kriminal deri në Kuvendin e Shqipërisë. Mungesa e vullnetit nga ana e mazhorancës bëri që një vit pas marrëveshjes për dekriminalizimin të hartohet dhe miratohet një ligj i veçantë. E ndërsa diskutohej për hartimin e këtij ligji, kryeministri kandidoi në zgjedhjet vendore persona me rekorde kriminale. Sot vonon miratimin e  akteve nënligjore dhe e sfidon ligjin duke pozuar me kryetar bashkie subjekt të dekriminalizimit apo duke promovuar në parti personat që dekriminalizimi i nxori jashtë Parlamentit.

Sfida e zgjedhjeve të lira dhe të ndershme, blerja e votës dhe reforma në drejtësi ishin gjithashtu pjesë e diskutimit në këtë takim. Zoti Basha vlerësoi opinionin e Komisionit të Venecias i cili faktoi përmes opinionit të saj tentativën e mazhorancës për të kapur sistemin e drejtësisë.

Njoftim per shtyp i Partisë Demokratike, 2 Mars 2016

Qindra banorë kërkojnë të drejtën e tyre.  Përfaqësuesit e PD përkrahin qytetarët

Kopliku ishte në këmbë sot, në protestë kundër varfërisë, papunësisë dhe padrejtësive të shkaktuara nga qeveria.

Sekretari për aksionin qytetar Ervin Salianji i shoqëruar nga deputeti Gjovalin Bzheta dhe kryetari i Partisë Demokratike në Malësinë e Madhe, Pjerin Spathari, ishin në përkrahje të banorëve të cilët protestuan për kushtet e rënda ekonomike, braktisjen e shtetit, mungesën e dritave, largimet nga puna, mungesën e ndihmës në bujqësi dhe stokun e produkteve të tyre.

Dhjetra banorë të dalë në protestë përpara Bashkisë thanë se ata dhe familjarët e tyre i kanë hequr nga puna pasi nuk kanë votuar të majtën.

Njëri prej tyre baba i 5 fëmijëve proteston pasi u largua nga puna padrejtësisht, pas 11 vjetësh si elektricist. “Më kanë hequr pa asnjë motiv”, tha ai.

Banor: “Jam vetë i katërti në shtëpi. Gruaja mësuese prej 20 vitesh. Përse s’kam votuar për ta e kanë hequr nga puna gruan. Kam pasur një ndihmë ekonomike. Sot detyrohem të nis fëijët jashtë sepse nuk kanë çfarë të bëjnë këtu. Mbështetje nuk kemi”.

Banor: Ky popull ka duruar shumë për këtë shtet që është.

Banor: Ekonomia sa vjen e bie më shumë. Arsyet janë të thjeshta. Çmimi i dritave në kulm, subvencione aspak, papunësia ka arrit kulmin, çmimet po rriten përditë dhe dua të garantoj diçka, nëse do të hapen kufijtë shqiptarë do mbeten vetëm ata që nuk lëvizin dot nga shëndeti.

Banor: Kam votuar me më sjellë ujë, e jo me ma heq ujin, kam votuar për drita. Drita s’ka.

Ndërsa Sekretari për aksionin qytetar Ervin Salianji tha se protestat do të përshkallëzohen në të gjithë territorin e Shqipërisë.

“Bashkë me përfaqësuesit e Partisë Demokratike të zonës së Malësisë së Madhe jemi sot në koplik për ti dhënë zë, për të qenë në mbështetje të banorëve dhe është fillimi i një rruge të gjatë, të përballjes, të protestës, së rezistencës, për largimin një orë e më parë të kësaj qeverie e cila e ka kthyer në simbol jo vetëm në qendër, jo vetëm në Kryeministri, por siç e shikoni edhe këtu përpara bashkisë në simbol të dyerve të mbyllura dhe të arrogancës. Pavarësisht se ne sot kemi lajmëroj një protestë për të reaguar bashkia dhe qeveria e këtij vendi për papunësinë, për braktisjen totale që i ka bërë shteti kësaj zone. Për inkriminimin dhe mbushjen e institucioneve me njerëz të paaftë vetëm sepse janë të lidhur me PS apo LSI dhe largimin jo vetëm të njerëzve të cilët kanë investuar në shkollim në këtë zonë dhe kanë investuar për t’u promovuar por kanë vrarë dhe kanë larguar shpresën duke bërë që disa fshatra apo qindra dhe mijëra banorë të kësaj zone të largohen dhe të shohin azilin si të vetmen shpresë për të jetuar. Sot edhe një herë tjetër i bëjmë thirrje qeverisë që të kthejë sytë nga qytetarët ose përballja që ka nisur në çdo qytet të Shqipërisë, nga Malësia e Madhe në Sarandë, nga Korça në Dibër dhe në çdo qytet tjetër, do të mblidhet në Tiranë për të larguar përfundimisht dyshen Rama-Meta si të keqen më të madhe të këtij vendi”, tha Salianji.

Njoftim për media i Partisë Demokratike, 2 Mars 2016

Situata është e jashtëzakonshme dhe po përkeqësohet nga ora në orë. Qytetarët shqiptarë duhet ta marrin vesh se Edi Rama jo vetëm refuzon që të pezullojë Armando Prengën nga punimet e Parlamentit por tashmë ka depozituar në Kuvend një kërkesë ku refuzon kalimin e vendimit për zbatimin e ligjit për dekriminalizimin. Ai kërkon që ne në vend të zbatimit të këtij ligji sipas një vendimi që e përcakton vetë ligji në nenin 6 – pra ligji i dekriminalizimit në nenin 6 thotë që Parlamenti do të miratojë një vendim për të përcaktuar afatet, formularin e vetëdeklarimit etj – por tani deklaron se duhet një ligj tjetër për të zbatuar ligjin e dekriminalizimit.

Ndërkohë që dje, në dhunim të plotë të vendimit të Gjykatës Kushtetuese mbi precedentin Kokëdhima, Këshilli i Rregullores dhe Mandateve përsëri refuzon të çojë në Gjykatën Kushtetuese Rakip Sulin, përfituesin e qindramijë eurove parave të gjakut, kërbaçit mbi shqiptarët nga banda e OSHEE-së të cilat ky i merr me lopatë si qera në shkelje dhe thyerje të Kushtetutës. Dhe siç e patë nga ana tjetër, në komisionet hetimore vazhdon në një formë apo tjetër bllokimi siç ishte rasti i djeshëm refuzimi i ish ministrit Cani si personi që ka dijeni për vjedhjen e të dhënave në serverin e Tatimeve.

Është pra një strategji e Edi Ramës për të goditur thelbin e marrëveshjes politike të Dhjetorit 2014 që i dha fund bojkotit të opozitës. Marrëveshjes politike të arritur me opozitën me ndihmën e Parlamentit Europian, të popullorëve dhe socialistëve europianë, që ka të bëjë me reforma kyç për vendin siç është dekriminalizimi që është përshëndetur jo më shumë se dy javë përpara nga Sekretari Amerikan i Shtetit në Tiranë.

Pyetja shtrohet pse ky provokim?! Dhe pse tani kur Komisioni i Venecias ka sjellë opinionin e dytë për Reformën në Drejtësi. Kjo është një lojë perfide e Edi Ramës me anë të së cilës ai kërkon ti shpëtojë një Reforme në Drejtësi. Ai kërkon ti shpëtojë Byrosë Kombëtare të Hetimit, jo nën Saimir Tahirin por nën Prokurorinë. Ai kërkon ti shpëtojë një drejtësie të pavarur sepse e di që një drejtësi e pavarur ka të paktën 12 shkaqe të njohura publikisht për ta marrë atë si të pandehur dhe për ta çuar para drejtësisë.

Në Grupin Parlamentar sot kemi diskutuar gjatë për këtë situatë. Dhe pas një diskutimi të gjatë por konstruktiv, të hapur e demokratik, vendimi është bllokimi i seancës parlamentare nesër nga Grupi Parlamentar i Partisë Demokratike nëse maxhoranca nuk reflekton.

Nesër është edhe afati i fundit për të kaluar aktin e zbatimit të ligjit të dekriminalizimit. Nëse Edi Rama prapë refuzon të pezullojë ligjërisht, jo vullnetarisht, Armando Prengën, nëse Edi Rama dhe të tijtë refuzojnë tia dorëzojnë Gjykatës Kushtetuese të drejtën që vetë Kushtetuta dhe Gjykata e aserton për të gjykuar mbi mandatet e 3 deputetëve që kanë përfituar miliona pasuri publike të shqiptarëve, Koço Kokëdhimës, Rakip Sulit dhe Valentina Leskajt, nëse Edi Rama refuzon ti japë fund përpjekjes së tij mjerane për të ndalur të pamundurën, transparencën për çështjet ku kemi hetim parlamentar siç janë ato të serverit të tatimeve dhe të emërimeve dhe shkarkimeve në administratë, edhe njëherë zgjedhja është e Edi Ramës por me aktet e sotme Edi Rama duket se e ka bërë zgjedhjen.

Ai kërkon të ndalojë dekriminalizimin në mënyrë që me kriminelët që ka ardhur në pushtet dhe me të cilët po qeveris ti ketë në krah. Ai kërkon që milionat e shqiptarëve e taksave të shqiptarëve të vazhdojnë të përfundojnë në xhepat e ministrave të korruptuar, deputetëve në kundërshtim me Kushtetutën dhe ligji të mos veprojë. Ai ligji që vepron për atë që lyen fasadën pa leje të mos veprojë kur këta të vjedhin milionat e shqiptarëve.

Do të përballet me vendosmërinë tonë nesër në Parlament sikundër i jap fjalën që nuk do të shpëtojë dot nga një drejtësi e reformuar, nga një prokurori e reformuar, nga një kapacitet hetues për korrupsion në nivele të larta. Venecia ka folur qartë. Venecia na ka dhënë të drejtë. Herët a vonë Prokuroria Speciale Antikorrupsion do të ketë të bëjë me shkaktarin e kësaj krize të gjithanshme që quhet Edi Rama.

Prononcimi i kryetarit të Partisë Demokratike, Lulzim Basha pas mbledhjes së Grupit Parlamentar, 2 Mars 2016

Edi Ramës nuk i mjafton kontrolli që ka arritur të verë mbi mediat private përmes joshjes, blerjes, shantazhit e kopaçes AMA.

Por edhe një media publike si RTSH, megjithëse e komandon de facto, do patjetër ta shtjerë në dorë edhe de jure.

Ligji për Median Audiovizive, i miratuar me konsensus  pak muaj para zgjedhjeve parlamentare 2013, do të ishte një bazë e duhur për një transmetues publik të ringritur. Ishte PS e Ramës në opozitë që në vitin 2012 vuri si kusht për konsensusin ndaj këtij ligji shumicën e cilësuar në Këshill Drejtues të RTSH për emërimin e Drejtorit të Përgjithshëm. Mazhoranza e PD asokohe e pranoi kushtin e opozitës dhe e votoi kështu ligjin.

Sot në pushtet, pikërisht këtë formulë të kërkuar prej tij para 5 vitesh Edi Rama do ta anullojë këtë të enjte në Kuvend. Ankohet se e bllokon opozita. Edhe pse mes dy kandidatëve të përzgjedhur nga Këshilli Drejtues, që të dy me jetë aktive politike në PS prej 25 vjetësh, si shenjë kompromisi e bashkëpunimi, anëtarët nga opozita përkrahin njërin prej tyre. Por jo detyrimisht mikun familjar të Edi Ramës. Atëhere të ndryshohet ligji thotë Rama. Të ndryshohet ad hominem, për njeriun konkret. Për mikun  e bën gjënë të cilën refuzon ta bëjë për mikun tjetër, Prengën e Laçit. Se nuk i leverdis.

E bën edhe me procedurë urgjence për të shmangur konsultimin në radhë të parë me BE, OSBE, e KiE që kanë ndihmuar shumë për këtë ligj e fushë. Edhe këtu zhbën nje praktikë pozitive të deritashme.

Dhe për të kuptuar mentalitetin e tij vëreni faktin: Ka emeruar Drejtore të Informacionit madje donte ta emëronte përkohësisht si Drejtoreshë të Përgjithshme e RTSH, shefen e PR në Bashkinë Tiranë deri në 2011.

Deklaratë e kryetarit të Komisionit Parlamentar të Medias, Genc Pollo, 2 Mars 2016

Gra, nëna, vajza nga i gjithë vendi kanë protestuar sot para kryeministrisë kundër dhunës  ndaj grave dhe mbrojtjes së të drejtave të tyre. E organizuar nga Lidhja Demokrate e Gruas, protesta dënoi ashpër dhunën e rëndë verbale që kryeministri dhe anëtarë të mazhorancës ushtruan gjatë seancës parlamentare,  ndaj deputeteve Albina Deda dhe Arbjola Halimi, të cilat u dënuan nga mazhoranca me përjashtim disaditor nga jeta parlamentare.

Gjatë fjalës së tyre deputetet Albina Deda dhe Arbjola Halimi theksuan se demokracia dhe parlamenti janë të kapur edhe kur kryeministri cënon rëndë gratë deputete të opozitës.

Sot gratë janë në mjerim, të kërcënuara në të gjitha të drejtat e tyre. Me dhjetëra nëna janë burgosur dhe për shkak të faturave që nuk përballojnë dot.  Ato jetojnë lënduara dhe sot si kurrë më parë atyre u është vrarë shpresa, u shprehën ndër të tjera  deputetet demokrate.

Kryetarja e LDGSH Albana Vokshi tha se bota e grave nuk mund të jetë kurrë bota e Ramës, arrogante me komplekset, inatin, zemërimin, urrejtjen ndaj çdokujt.

“Sjellja  dhe fjalët e kryeministrit janë të pafalshme, të patolerueshme e të papranueshme. Shpërfillja, tallja dhe dhuna verbale që ai ushtron në mënyrë sistematike ndaj grave përcjell dhe prodhon dhunë tek të tjerët. Sa më tepër Edi Rama fshihet pas fjalëve e veprimeve, aq më shumë vërteton të kundërtën e asaj që pretendon sepse ai s’mund te jetë feminist, aq më pak socialist”, u shpreh zonja Vokshi.

Ndërsa Sekretarja për Marrëdhënien me Publikun Grida Duma tha se Edi Rama fyen gratë se ai nuk i kupton dhe nuk i ndjen ato. “Por pas asaj dhune që jepet si spektakel në sytë e gjithë shqiptarëve, ofendime nga kreu i shtetit gjenden familje, femijë, vëllezer, motra të cilët pasi i është fyer nena dhe babai zgjohen vetëm me dëshirë hakmarrje dhe agresiviteti. Politika është akt përgjegjësie, të cilit nuk mund ti shpëtosh sidomos duke qënë kryeministër dhe përdredh fjalën duke thënë se është ngatërruar motra me mostrën. Jo nuk janë ngatërruar as bashkuar asnjëherë mostra me motrën”, tha Duma.

Kryeministri fyeu rëndë   zonjat deputete. Të gjitha këto janë forma të dhunës që kanë për qëllim nënshtrimin, që dekurajojnë  gratë, të cilat janë motori i familjes, i ekonomisë dhe i shoqërisë, tha këshilltarja demokrate në Bashkinë e Tiranës, Reila Bozdo.

Në protestë morën fjalën mjeke, dentiste, pensioniste, përfaqësuese të komunitetit rom, të shoqërisë civile, studente , biznesmene, pedagoge, dhe nëna të reja të cilat i apeluan   Edi Ramës të mos diskrimojë dhe të mos fyejë misionin e shenjtë të mëmësisë, sakrificat fisnike dhe dinjitetin e grave shqiptare  . Ato theksuan se Edi Rama, Parlamenti i inkriminuar  dhe qeveria e tij e koncesioneve nuk përfaqësojnë asnjë interes të  grave dhe vajzave, të cilat ndiejnë pasojat më të rënda të kësaj krize të gjithanshme, që gjeneron qeveria dhe mazhoranca e Rilindjes.

Edi Rama  ka shkelur rëndë të drejtat e grave, jo vetëm verbalisht por mbi të gjitha ka cënuar rëndë statusin e tyre në shoqëri  duke e çuar papunësinë e grave dhe vajzave  afro 40%, duke i detyruar nënat kryefamiljare drejt vetëvrasjes për shkak të pamundësisë, dëshpërimit të  krizës ekonomike, faturave dhe çmimeve  të papërballueshme duke i nxjerrë ato në rrugë dhe pastrehë si në rastin e mbi 70 familjeve rome në Selitë, duke mbyllur me mijëra vende pune në biznes të nënave dhe vajzave për shkak të dhjetëfishimit të taksave.

Njoftim për media i Partisë Demokratike, 1 Mars 2016