Blog

BASHKIA TIRANË

KËSHILLI BASHKIAK

GRUPI I KËSHILLTARËVE TË PARTISË DEMOKRATIKE

Tiranë, më 17/03/2016     

Drejtuar: Z. Sadi Vorpsi

Prefekt, Qarku Tiranë

Marco Leidekker

Shefi i Zyrës Këshillit të Europës, në Shqipëri

ShTZ. Florian Raunig

Kryetar i Prezencës së OSBE-së, në Shqipëri

ShSZnj.  Romana Vlahutin

Kreu Delegacionit të Bashkimit Europian, në Shqipëri

ShST. Z. Donald Lu

Ambasador i ShBA-ve, Tiranë                            

 Për dijeni: Z. Aldrin Dalipi

N/Kryetar

Këshilli Bashkiak Tiranë

Erion Veliaj

Kryetar

Bashkia Tiranë

Lënda: Mbi shkeljen e ligjit në vijueshmëri në funksionimin e Këshillit Bashkiak  Tiranë dhe mungesës së plotë të bashkëpunimit dhe shkeljes flagrante të ligjit nga ana e administratës së Bashkisë Tiranë

Të nderuar,

Me shqetësim të madh Ju bëj me dije se funksionimi i Këshillit Bashkiak Tiranë vijon të jetë thuajse krejtësisht jashtë çdo kuadri ligjor e procedurial dhe në shkelje të hapur të të drejtave të këshilltarit e demokracisë së brendshme, por edhe të drejtave dhe detyrimeve që ka ky këshill në raport me komunitetin apo grupet e interesit.

Edhe pse Neni 53, pika 2, e ligjit Nr. 139/2015, “Për vetëqeverisjen vendore”, përcakton qartë se: “Mbledhjet e radhës së këshillit bashkiak zhvillohen si rregull, sipas përcaktimit që bën vetë këshilli, por jo më pak se një herë në muaj”, mbledhja e radhës u mbajt më datë 11 mars, ndërkohë që ajo e mëparshme ishte zhvilluar më datë 30 dhjetor të vitit 2015, pra për më shumë se dy muaj këshilli nuk u mblodh. Ndërkohë që pika 4, po e nenit 53, përcakton se: “Thirrja për mbledhjen e këshillit bëhet nga kryetari i këshillit dhe njoftimi për mbledhjen bëhet, si rregull, jo më pak se 5 ditë para datës së zhvillimit të saj”, shpesh nuk zbatohet. Mbledhja e datës 11 mars, edhe pse me një pikë të rendit të ditës shumë të rëndësishme, sikundër P/Vendimin:  Për  “Disa  ndryshime  në  Vendimin  e  Këshillit  Bashkiak  nr. 59,  datë 30.12.2015, ‘Për sistemin  e Taksave dhe Tarifave Vendore në qytetin  e Tiranës’”, u njoftua vetëm 48 orë më herët. Në rastin e mbledhjes së datës 30 dhjetor, ku diskutoheshin dy nga aktet më të rëndësishme për aktivitetin e Bashkisë, sikundër është Buxheti dhe Paketa fiskale, njoftimi u bë në limitet fundore që parashikon ligji, duke mos i dhënë kështu  mundësinë Këshillit që ta diskutojë me komunitetin apo grupet e interesit, një e drejtë dhe detyrim ligjor i tij. Kjo paketë, e cila u miratua në kundërshtim me ligjin, pasi përcaktonte hyrjen në fuqi më datë 1 janar 2016, ende pa u dekretuar nga Presidenti, ashtu sikundër këshilltarët e djathtë e nënvizuan gjatë kësaj mbledhje, solli për pasojë reagime të ashpra kundërshtuese nga biznesi dhe banorët. Protestat e tyre për barrën e rëndë fiskale mbeten dëshmia më konkrete e këtij veprimi arbitrar. Të ndodhur para këtij fenomeni, grupi i këshilltarëve të PD-së filloi një fushatë dëgjesash me biznesin e banorët në gjithë territorin e Bashkisë Tiranë dhe pas këtij konsultimi frutdhënës, më datë 23 shkurt 2015, paraqiti pranë Këshillit Bashkiak propozimet e tij, një pjesë e mirë e të cilave u propozuan edhe në mbledhjen e datës 30 dhjetor, por që nuk u morën fare në shqyrtim.

Në mbledhjen e datës 11 mars, në rendin e ditës Bashkia paraqiti edhe një pikë ku kërkonte rishikimin e disa aspekteve të paketës fiskale, si pasojë e presionit dhe protestave të vijueshme të bizneseve dhe kontakteve që kryetari i Bashkisë kishte patur me ta. Për fat të keq, në shkelje flagrante të Kushtetutës, të ligjit Nr. 139/2015, “Për vetëqeverisjen vendore”, “Rregulloren e funksionimit të Këshillit Bashkiak Tiranë”, parimi i demokracisë, fjalës së lirë dhe transparencës u godit sërish në themel.

Në kundërshtim të çdo kuadri ligjor e procedurial, drejtimi arbitrar i drejtuesit të seancës, nuk mundësoi jo vetëm diskutimet mbi pikën nr. 6 të rendit të ditës, P/Vendimin:  Për  “Disa  ndryshime  në  Vendimin  e  Këshillit  Bashkiak  nr. 59,  datë 30.12.2015, ‘Për sistemin  e Taksave dhe Tarifave Vendore në qytetin  e Tiranës’”, por nuk lejoi që në seancë të merrnin pjesë përfaqësuesit e grupeve të biznesit, një e drejtë kjo e garantuar nga Kushtetuta, si dhe Neni 16, pika 1 dhe 2 (1. Organet e vetëqeverisjes vendore janë të detyruara të garantojnë pjesëmarrjen publike në procesin e vendimmarrjes. 2. Çdo njësi e vetëqeverisjes vendore është e detyruar të caktojë koordinatorin për njoftimin dhe konsultimin publik, në përputhje me dispozitat e ligjit në fuqi për njoftimin dhe konsultimin publik), si dhe Neni 17, pika 1 (Mbledhjet e këshillit të bashkisë janë të hapura për publikun. Çdo shtetas lejohet të ndjekë mbledhjet e këshillit, sipas mënyrës së përcaktuar në rregulloren e këshillit), të ligjit Nr. 139/2015, “Për vetëqeverisjen vendore”.

Kjo praktikë arbitrare e ndjekur në vijimësi nga mazhoranca e Këshillit, bie ndesh edhe me Neni 18, pika 1 dhe 2 të ligjit Nr. 139/2015, “Për vetëqeverisjen vendore”, ku theksohet qartë se “Këshilli bashkiak ose këshilli i qarkut, përpara shqyrtimit dhe miratimit të akteve, zhvillon seanca këshillimi me bashkësinë, të cilat janë të detyrueshme për rastet e parashikuara në nenet 54, shkronjat “a”, “dh”, “e”, “f” dhe “k”, dhe 77, shkronjat “a”, “dh”, “e”, “f” dhe “k”, të këtij ligji”, por edhe me pikën 2, ku thuhet: “Këshillimi me publikun, në çdo rast, bëhet sipas mënyrës së përcaktuar në rregulloren e këshillit, duke përdorur një nga format e nevojshme, si takimet e hapura me banorët e grupet e interesit, takime me specialistë, me institucione të interesuara dhe organizata jofitimprurëse ose nëpërmjet marrjes së nismës për organizimin e referendumeve vendore”. Në gjykimin tonë dhe të gjithë grupeve të interesit kjo dhunë fiskale, në kufijtë e gjobëvenies, në mungesë të plotë transparence dhe dialogu është një goditje e rëndë që i bëhet iniciativës së lirë dhe sipërmarrjes, duke e çuar atë në prag falimenti.

Ashtu sikundër Ju kemi bërë me dije edhe me letrën e datës 07/12/2015, për atë çka ndodhi në mbledhjen e Këshillit Bashkiak të Tiranës, të mbajtur më datë 11.11.2015, por edhe në mbledhjet e mëparshme, situata u ripërsërit. Dhuna e kartonëve ndaloi diskutimet e detyrueshme të këshilltarëve dhe pjesëmarrjen e përfaqësuesve të biznesit që kishin kërkuar zyrtarisht, konfrom ligjit, të ishin pjesë e dëgjesës. Kjo arrogancë e diktat që u bëhet këshilltarëve të zgjedhur më votën e qytetarëve dhe grupeve të interesit është prova më elokuente e faktit se Këshilli Bashkiak Tiranë tashmë nuk njeh as një kuadër ligjor e procedurial, me përjashtim të abuzimit në emër të shumicës.          E konsiderojmë krejtësisht antiligjore dhe antidemokratike praktikën “rutinë” tashmë, për fat shumë të keq, të drejtuesit të seancës, i cili kërkoi votimin pa diskutime P/vendimit: Për  “Disa  ndryshime  në  Vendimin  e  Këshillit  Bashkiak  nr. 59,  datë 30.12.2015, ‘Për sistemin  e Taksave dhe Tarifave Vendore në qytetin e Tiranës’”, duke injoruar krejtësisht jo vetëm kuadrin ligjor e sipërpërmendur, por edhe përkatësisht nenet 33, 34, 35, 36, 37, 38, 39, 40, e “Rregullore e funksionimit të Këshillit Bashkiak Tiranë”. Në thelb, ashtu sikundër Ju kemi bërë me dije edhe më parë, ky veprim minon elementët më bazikë të funksionimit demokratik të Këshillit.

Si përfaqësues të zgjedhur me votën e lirë këto veprime e akte të rënda antidemokratike jo vetëm nuk na mundësojnë të respektojmë betimin e bërë për të mbrojtur interesat e qytetarëve e atë publik, por fatkeqësisht janë një injorim e neglizhim i paprecedent dhe absolut i interesave të qytetarëve të Tiranës.

Ata kanë të drejtën të dinë se çfarë vendimesh merren në emër të tyre, por edhe të dinë si cilat mund të ishin alternativat më të mira. Ashtu sikundër Ju kemi bërë me dije, në mbledhjet e Këshillit Bashkiak propozimet, amendimet apo kërkesat për informacion të opozitës injorohen krejtësisht, ndërkohë që futen për diskutim dhe miratim në rendin e ditës çështje të cilat nuk i ishin paraqitur më parë këshilltarëve apo edhe jashtë rendit të ditës. Një tentativës e qartë, në gjykimin tonë, për të uzurpuar pushtetin në emër të shumicës.

Mungesa e transparencës dhe dialogut në Këshill është kthyer në një praktikë pune në tërësi edhe më qytetarët. Konflikt i rëndë social është krijuar me banorët e zonës ku po ndërtohet Bulevardi i Ri, në shkelje të plotë të lirive dhe të drejtave të njeriut dhe shenjtërisë së pronës private. Një konflikt i cili sa vjen e agravohet dhe, në disa raste ka shkaktuar tragjedi të rënda njerëzore, deri në humbje të jetës.

Po kështu, dhuna e policisë bashkiake dhe asaj të shtetit e përdorur në mënyrën më brutale ndaj qytetarëve që kanë protestuar për ndërtimin e paligjshëm në brendësi të Liqenit artificial të Tiranës, e cila vijon pa hezitim edhe në këtë moment, është një tjetër dëshmi e hidhur jo vetëm e mungesës së transparencës, por dhe logjikës së dhunës shtetërore në vend të dialogut, informimit dhe konsultimit me komunitetin. Qytetarët që protestojnë në mbrotje të mushkrisë së vetme të gjelbër që i ka mbetur Tiranës, po dhunohen barabarisht nga pushteti qendror dhe vendor, vetëm e vetëm se kërkojnë transparencë dhe ndaljen e një krimi ndaj ambientit. Kjo është e papranushme në një shtet që pretendon se është demokratik.

Për fat të keq, në këto 8 muaj funksionimit të Këshillit dhe drejtimit të Bashkisë nga z. Veliaj, logjika e “të fortit” është i vetmi kuadër ligjor e procedurial që po funksinon. Ju bëj me dije se gjatë këtyre 8 muajve rreth një mijë punonjës janë pushuar nga puna në kundërshtim me ligjin, por z. Veliaj hesht dhe refuzon të informojë edhe vetë të larguarit nga puna, duke e shndërruar Bashkinë në një institucion tërësisht hermetik dhe të bunkerizuar. Kjo situatë antiligjore dhe totalisht shpërfillëse ndaj të zgjedhurve me votë është bërë praktikë “normale” në marrëdhëniet e anëtarëve të këshillit me kryetarin e Bashkisë dhe administratën e Bashkisë Tiranë. Në kundërshtim flagrant të Nenit 51, pika 3, Neni 54, germa, ‘ë’ dhe germa ‘k’, të ligjit Nr. 139/2015, “Për vetëqeverisjen vendore”; VKB, Nr. 14, datë 02.05.2012, neni 14, pika 2, “Për miratimin e rregullores për organizimin, funksionimin, detyrat dhe përgjegjësitë e administratës së aparatit të Bashkisë së Tiranës”, ku këshilltari ka të drejtë të informohet “për gjithçka dhe në çdo kohë” nga kryetari dhe nga administrata e Bashkisë Tiranë, këshilltarëve të opozitës kërkesa për marrje dokumentacioni apo informacioni nga administrata e Bashkisë u është mohuar krejtësisht. Kryetari i Bashkisë dhe administrata në mënyrë permanente vijojnë të refuzojnë informimin.

Bashkangjitur keni të gjitha kërkesat tona që në kundërshtim të hapur me ligjin vijojnë të mos marrin përgjigje, në mungesë të plotë transparence dhe shpërdorim të hapur të detyrës nga ana e z. Veliaj.

Ritheksoj se mungesa e transparencës në veprimtarinë e Këshillit Bashkiak si dhe mos respektimi i të drejtës themelore për informim nga administrata e bashkisë Tiranë, ndaj këshilltarëve të këtij organi kolegjial apo pasqyrimin e plotë të asaj çka ndodh në mbledhjet e tij është një strategji e qartë. Një veprim që e reflekton më së miri këtë fenomen është fakti se për herë të parë që nga formimi i këtij organi, mbledhjet e Këshillit Bashkiak transmetohen me regji qendrore duke ndaluar ‘de facto’ prezencën e kamerave të mediave vizive.

Edhe pse formalisht pranohet e drejta për të qenë prezent çdo media, redaksitë na bëjnë me dije se nga zyra e shtypit të Bashkisë Tiranë u thuhet se nuk është e nevojshme të jenë në sallë, pra se nuk do të lejohen, me justifikimin se nuk ka vend mjaftueshëm apo se krijohet konfuzion. Përpjekja e qartë për të kontrolluar fjalën dhe mesazhet e këshilltarëve nëpërmjet një regjie qendrore, e cila më pas shpërndan sinjalin për televizionet e tjera përbën një shkelje të rëndë të së drejtës për informim të parashikuar nga neni 23/3 i Kushtetutës. Po kaq problematike është situata edhe në web-site e Bashkisë, pasi aktet e miratuara nga Këshilli qëllimisht janë hedhur në mënyre kaotike dhe shumë prej tyre ndër vite nuk i gjen dot.

Këshilltarët e Partisë Demokratike kanë bërë me dhjetëra herë apel publik, edhe në mbledhjet e këshillit, që mazhoranca e këshillit Bashkiak dhe kryetari Veliaj të kenë kurajën të zbatojnë pa asnjë ekuivok dhe me rigorozitet absolut gjithë kuadrin ligjor për sa më sipër parashtroj. Mendësia e arrogantit, megalomanit apo “të fortit”, në abuzim me besimin që u kanë dhënë qytetarët po kundërshtohet më të gjithë forcën dhe të drejtën që na jep ligji, por dhe nga vetë qytetarët.

Ne shprehim vullnetin tonë të plotë për të qenë një opozitë konstruktive. Kemi dhënë dhe do të vijojmë të japim për çdo projekt-vendim jo vetëm kritikat tona, por mbi të gjitha alternativat tona, sepse besojmë se e bëjmë për interesin më të mirë të qytetarëve të Tiranës. Por kjo përpjekje e sinqertë po refuzohet kokëfortësisht nga shumica, duke e sjellë në një rrugë pa krye funksionimin normal të këshillit.

Për asnjë çast nuk harrojmë se opozita është mision jo në favor të politikës së ditës apo retorikës politike, por në dobi të mirë administrimit të qytetit dhe interesave të qytetarëve të Tiranës. Për të përmbushur me sukses këtë mision ne po ndjekim të gjithë hapat ligjore dhe mjetet demokratike, për të vendosur ligjshmërinë, transparencën në funksionimin e Këshillit Bashkiak Tiranë dhe respektimin e plotë të të gjitha të drejtave që na jep ligji si këshilltarë, por edhe si qytetarë nga ana e administratës së Bashkisë.

Duke Ju falënderuar për mirëkuptimin e ndarjes së shqetësimeve tona me Ju,

Me respekt,

Leonard Olli

Kryetar

Grupi i Këshilltarëve të PD

Këshilli Bashkiak Tiranë

Njoftim për media e Partisë Demokratike, 17 mars 2016

Bashkia Tiranë – 17 Mars 2016 (1) Kerkese

Kerkesa – Punet publike_Festat

Kerkesa – Pushimet nga puna Kerkesa 

Sheshi Nene Tereza Kerkese

Grupi Keshilltareve PD – 11 mars 2016

LETER – GRUPI KESHILLTAREVE PD

Grupi Keshilltareve PD – 20 tetor 2015

Kryetari i Partisë Demokratike, Lulzim Basha ka marrë mbështetjen e kongresmenëve amerikanë për sfidën që ka sot përpara jo vetëm Partia Demokratike por çdo qytetar shqiptar, pastrimi i politikës nga të inkriminuarit, zgjedhjet e lira dhe të ndershme si dhe reforma në drejtësi.

Në ditën e dytë të qëndrimit në SHBA, lideri i opozitës u takua me kongresmenët Dana Rohrabacher, kryetar i Komitetit për Europën në Kongresin Amerikan Robert Aderholt dhe David Jolly, me drejtorin për Ballkanin në Departamentin Amerikan të Shtetit Thomas Yazdgerdi, si dhe u prit në një takim të veçantë në Këshillin e Sigurisë  Kombëtare të Shtëpisë së Bardhë. SHBA-të kanë pritshmëri se po punojnë me partner të besuar  dhe këtë duhet ta tregojë qeveria shqiptare, theksoi kongresmeni amerikan Jolly.

“Jam i lumtur të mbështes qëndrimin tuaj për implementimin e ligjit të dekriminalizimit, gjithashtu iniciativën tuaj për realizimin e reformës në drejtësi pasi të nisë zbatimi i ligjit për dekriminalizimin si dhe për zgjedhje të lira dhe të ndershme. Së pari sepse besoj në rritjen e sigurisë në Shqipëri, besoj në miqësinë mes Shqipërisë dhe SHBA-ve. Gjithashtu edhe sepse SHBA-të kanë pritshmëri të punojnë me partner të besuar dhe një qeveri ku mund të mbështetet.  Siguria juaj është siguria jonë por kjo vjen bashkë me përgjegjësitë dhe një qeverisje etike. Prandaj ne do t’ju inkurajojmë dhe mbështesim në  zbatimin e ligjit të dekriminalizimit  si dhe në zbatimin e reformës në drejtësi sapo ajo të miratohet. Sigurisht edhe për zgjedhje të lira dhe të ndershme, një prej pritshmërive që SHBA-të gjithmonë kanë. Në të njëjtën kohë në këtë kontekst ne do t’ju mbështesim si vend me statusin kandidat në BE dhe pjesë e NATO-s dhe jam shumë i lumtur që të punojmë me ju në të ardhmen”, tha Jolly.

Për kryetarin e Partisë Demokratike, Lulzim Basha nuk ka asnjë dilemë mes reformës në drejtësi dhe zgjedhjeve pasi sipas tij do të ketë reformë në drejtësi dhe zgjedhje të lira dhe të ndershme. Në takimet e zhvilluara në Këshillin e Sigurisë Kombëtare të Shtëpisë së Bardhë është vlerësuar roli i Partisë Demokratike në qeverisje ashtu dhe në opozitë përsa i përket sfidave të sigurisë globale. Sfida e sotme, sipas zotit Basha, është garantimi i një sigurie funksionale në Shqipëri.

“Në takimet me anëtarë të Kongresit Amerikan, me përfaqësues të lartë të administratës amerikane është diskutuar mbi shqetësimet për zhvillimet në Shqipëri e në veçanti sa i përket çështjes së dekriminalizimit. Implementimit të ligjit të dekriminalizimit dhe nxjerrjes jashtë nga politika të njerëzve me rekorde të tmerrshme kriminale që u sollën aty nga Edi Rama. Si dhe për sfidën e Shqipërisë për zgjedhje të lira dhe të ndershme dhe aprovimin e reformës në drejtësi sipas rekomandimeve të Komisionit të Venecias duke i hapur rrugë dialogut politik, kompromisit dhe konsensusit politik, por gjithmonë bazuar mbi rekomandimet e Komisionit të Venecias. Po kështu në këto takime e në veçanti në takimet në Këshillin e Sigurisë Kombëtare të Shteteve të Bashkuara të Amerikës në Shtëpinë e Bardhë u shpreh mirënjohje për rolin e Partisë Demokratike, si dje në qeverisje ashtu edhe sot në opozitë sa i përket sfidave të sigurisë globale për të cilat Shqipëria ka dhënë dhe duhet të vazhdojë të japë kontributin e saj. Pa dyshim kontributi më kryesor që Shqipëria mund të japë  dhe duhet të japë është siguria e saj duke garantuar një siguri funksionale, duke garantuar shtetin e të drejtës, duke garantuar zgjedhje të lira e të ndershme, duke implementuar ligjin për dekriminalizimin dhe reformën në drejtësi.

Dhe kjo nuk është një çështje zgjedhjesh: O reformën në drejtësi ? O zgjedhje të lira e të ndershme? Edhe reformën në drejtësi edhe zgjedhje të lira dhe të ndershme. Reformën në drejtësi për të vënë para përgjegjësisë, para ligjit zyrtarët e korruptuar. Për të vënë para ligjit kriminelët me lidhje me pushtetin, të cilët bashkërisht shkelin ligjin duke i imponuar qytetarëve një tirani dhe duke qëndruar për vete me privilegjet e tyre, me korrupsionin e tyre mbi ligjin dhe jashtë ligjit sot e gjithë ditën.

Dhe nga ana tjetër zgjedhje të lira dhe të ndershme për të vënë para përgjegjësisë keqqeverisjen e këtyre tre viteve. Pra, dilema nuk është reformë në drejtësi apo zgjedhje të parakohshme. Edhe reformë në drejtësi edhe zgjedhje të lira e të ndershme. Ky është mesazhi që dua të ndaj sot nga Uashingtoni dhe për të cilën kam marrë mbështetjen e plotë dhe të gjithanshme të partnerëve tanë dhe të përfaqësuesve të tyre në Kongresin Amerikan”, theksoi zoti Basha.

Drejtori për Ballkanin në Departamentin Amerikan të Shtetit në takimin me zotin Basha ka mbështetur iniciativën e Partisë Demokratike për dialog dhe konsensus politik mes qeverisë dhe opozitës për të miratuar reformën në drejtësi bazuar në rekomandimet e Komisionit të Venecias.

“Kam takuar drejtorin për Ballkanin në Departamentin e Shtetit z. Yazgerdi, i cili është shprehur i qartë dhe i vendosur sa i përket mbështetjes që administrata amerikane i jep Shqipërisë; për procesin e dekriminalizimit, për papranueshmërinë e personave me rekorde kriminale në politikë, për mbështetjen që Departamenti i Shtetit i jep Shqipërisë për reformën në drejtësi sipas rekomandimeve të Venecias dhe kërkesës se kahershme për dialog të vërtetë politik, dialog të sinqertë politik mes qeverisë dhe opozitës për t’i kthyer këto rekomandime në akte kushtetuese dhe ligjore.

Dhe së treti, sa i përket zgjedhjeve të lira e të ndershme që janë një domosdoshmëri për funksionimin e demokracisë në Shqipëri. Këto tre çështje janë të lidhura së bashku. Opozita, Partia Demokratike i sheh të lidhura së bashku dhe kushdo që mendon ndryshe gabohet rëndë”, theksoi lideri i opozitës Lulzim Basha.

Për kryetarin e Partisë Demokratike Lulzim Basha, testi i parë për Edi Ramën për të treguar nëse vërtet e do reformën në drejtësi  është miratimi i  Byrosë Kombëtare të Hetimit, miratimi i akteve kushtetuese dhe ligjore që i hap rrugë kësaj vegle që lufton korrupsionin në nivele të larta.

“Qëndrimi ynë për Byronë Kombëtare të Hetimi ka qenë i prerë dhe i qartë që prej fillimit. Po Byrosë Kombëtare të Hetimit nën Prokurorinë, ashtu siç ka sanksionuar Komisioni i Venecias.

Ky është edhe testi i sinqeritetit për maxhorancën: E do me të vërtetë reformën në drejtësi apo ishte e interesuar vetëm kur kjo t’i mundësonte kapjen e drejtësisë?! Sot që Komisioni i Venecias është shprehur qartë prova, barra e provës është në anën e Edi Ramës. Nëse është gati për reformën në drejtësi, testi i parë është Byroja Kombëtare e Hetimit. Është së pari miratimi i akteve kushtetuese dhe ligjore për t’i hapur rrugë kësaj vegle që lufton korrupsionin në nivele të larta.

Dhe së dyti, implementimi i luftës kundër korrupsionit në nivele të larta përmes kësaj Byroje dhe monitorimi i këtij implementimi nga Shtetet e Bashkuara të Amerikës dhe Bashkimi Europian” u shpreh kryetari i Partisë Demokratike, Lulzim Basha.

Njoftim për media e Partisë Demokratike, 17 mars 2016

Kryetari i Partisë Demokratike ka nisur vizitën në Shtetet e Bashkuara të Amerikës me takime me kongresmenë dhe Këshillin e Atlantikut të Veriut.  Sfidat e Shqipërisë për ndërtimin e një demokracie funksionale dhe shtetit të së drejtës, si zbatimi i reformës së dekriminalizimit, zgjedhjet e lira dhe të ndershme dhe reforma në drejtësi janë në qendër të axhendës së liderit të opozitës Lulzim Basha.

Kryetari i Partisë Demokratike Lulzim Basha u prit në Washington nga drejtuesit e lartë të Këshillit të Atlantikut. Në këtë takim të konceptuar si seancë degjimore, kreu i opozitës iu përgjigj interesit të Zv/Presidentëve të Këshillit të Atlantikut Damon Wilson dhe Fran Burwell, anëtarëve të bordit Ian Berzinski dhe Frank Kramer mbi situatën politike dhe zhvillimet në Shqipëri dhe rajon. E në veçanti mbi ecurinë e procesit  të dekriminalizimit, luftën kundër korrupsionit, zgjedhjet, reformën në drejtësi dhe rolin e Shqipërisë në NATO, çështje të sigurisë, luftës kundër terrorizmit etj.

Kryetari i Partisë Demokratike e ka konsideruar të paprecedent për një vend demokratik dhe aq më tepër një vend anëtare të NATO-s që në Parlament të ulen njerëz me rekorde kriminale, të dënuar për trafik të qenieve njerëzore, trafik droge, plagosje me dashje, siç ka ndodhur në Shqipëri me bekimin e kryeministrit.

Zoti Basha theksoi se sot në Shqipëri ka një përballje jo mes socialistëve dhe demokratëve por mes shumicës dërrmuese të qytetarëve nga njëra anë dhe një grushti oligarkësh të cilët kanë futur në duart e tyre pasuritë publike, paratë e qytetarëve dhe janë të vetmit përfitues të tenderave dhe koncesioneve.

Shqipëria dhe shqiptarët janë sot para një sfide të madhe: Të largojnë të inkriminuarit nga politikbërja dhe administrata, të garantojnë zgjedhje të lira dhe të ndershme dhe të rikthejnë shpresën në vend. Këto sfida nuk janë të lehta, tha zoti Basha. Ky grup oligarkësh që kontrollon pasuritë e Shqipërisë do të kërkojë me çdo kusht të deformojë vullnetin e zgjedhësve, siç bëri në 2015-ën duke blerë vota, kërcënuar votuesit. Një hap i rëndësishëm në këtë drejtim, tha zoti Basha është  implementimi i ligjit të dekriminalizimit. Garantimi i zgjedhjeve të lira dhe të ndershme, si dhe reforma në drejtësi janë prioritet i çdo shqiptari, përtej simpative partiake, tha zoti Basha. Të vetmit që nuk i duan janë oligarkët ne pushtet dhe për këtë zoti Basha ka kërkuar ndihmën dhe mbështetjen e SHBA-ve.  Zv/Presidentja e Këshillit të Atlantikut Fran Burwell, theksoi se problematika të cilat i kishim konsideruar të tejkaluara janë rishfaqur duke kthyer pas standardet demokratike.

Bashkëbiseduesit ndanë mendimin se Këshilli i Atlantikut duhet të jetë i pranishëm në Shqipëri për të parë nga afër problematikën dhe për të ndihmuar në formulimin e  zgjidhje të qarta dhe afatgjata që garantojnë siguri. Fokusi dhe ndihma e SHBA-ve për tejkalimin e sfidave të demokracisë shqiptare është imediate dhe e shumëpritur nga çdo qytetar që vuan situatën e rëndë ekonomike, mungesën e shtetit të së drejtës dhe sheh si zgjidhje vetëm largimin nga Shqipëria.

Zv/Presidenti i Këshillit të Atlantikut Damon Wilson e falënderoi zotin Basha për angazhimin e tij si ministër i Jashtëm dhe më pas i Brendshëm për bashkëpunimin me SHBA-të në çështje të rëndësishme për sigurinë globale.

Kryetari i Partisë Demokratike Lulzim Basha u prit në Kongresin Amerikan nga Bashkëkryetari i Komitetit për Europën Eliot Engel, Gregory W Mwks, anëtar i Komitetit për Punët e Jashtme dhe Gus Billiraki, anëtar i Komisionit për Sigurinë Kombëtare.

Zoti Basha i ka njohur bashkëbiseduesit me situatën në Shqipëri dhe kërcënimin që po i bëhet demokracisë nga krimi, korrupsioni dhe promovimi në poste kyçe të administratës dhe në Parlament i personave me rekorde kriminale. Këta tre element janë përdorur, theksoi zoti Basha për të blerë vota dhe intimiduar votuesit në zgjedhjet e 2015-ës, të cilat janë konsideruar nga institucioni përgjegjës për certifikimin e standardit, si jo të lira dhe të ndershme. Për këtë arsye, tha zoti Basha beteja kryesore e çdo qytetari është përqendruar tek garantimi i zgjedhjeve të lira dhe të ndershme. Përballë një mazhorance dhe një kryeministri që jo vetëm nuk ka vullnet t’i largojë personat me precedent kriminal por po i promovon në strukturat drejtuese të partisë, pasi në këtë mënyrë synon të manipulojë zgjedhjet e ardhshme. Ndihma e SHBA-ve e Kongresit Amerikan është jetike për të sotmen dhe të ardhmen e Shqipërisë, theksoi kryetari i opozitës.

Kongresmenët amerikan shprehën mbështetjen e tyre për përkushtimin e opozitës për zgjedhje te lira dhe te ndershme dhe e garantuan për një vëmendje të shtuar të kongresit amerikan ndaj Shqipërisë, qytetareve shqiptare  dhe sfidave me të cilat ajo po përballet.

Njoftim për shtyp i Partisë Demokratike,​ 16 Mars 2016

Qëndrimi i grupit parlamentar do të mbetet i njëjti përderisa nuk ka ende një reflektim nga mazhoranca për çështjet që ne kemi ngritur që tashmë ju i njihni shumë mirë. Atë që lidhet me ligjin e dekriminalizimit,  funksionimin e komisioneve hetimore dhe dërgimin në Gjykatë Kushtetuese të deputetëve, të cilët ne na rezultojnë se janë në shkelje të kushtetutës dhe konfliktit të interesit përderisa kanë përfituar fonde publike. Javën  e kaluar ju patë që pati një votim për Koço Kokëdhimën por nuk u  votua kërkesa jonë për deputetin Suli, kërkesë e cila do të votohet nesër dhe shpresojmë që qëndrimi i mazhorancës nesër të jetë në përputhje me vendimin e Gjykatës Kushtetuese për ta dërguar në Gjykatë Kushtetuese kërkesën e opozitës, më pas kemi një kërkesë edhe për znj. Leskaj për të njëjtën çështje e cila pritet të diskutohet nga Këshilli i Mandateve për të marrë edhe ajo rrugën e saj drejt Gjykatës Kushtetuese. Gjithashtu amandamentet tona për Ligjin e dekriminalizimit dhe komisionet hetimore janë në pritje pët t’u diskutuar në komisionin e ligjeve fillimisht dhe më pas në seancë plenare.

-Ju do të jeni vetëm për çështjen e z. Suli në seancë nesër?

Qëndrimi i grupit parlamentar nuk ka ndonjë ndryshim. Aq ,më tepër që jo vetëm nuk shohim reagim nga mazhoranca por shohim që kryeministri bën krejt të kundërtën e asaj që pritet prej tij dhe që është zbatimi i ligjit, zbatimi i Kushtetutës, por në rradhë të parë ndjekja e disa parimeve morale që i kërkohen jo vetëm nga opozita, jo vetëm nga shoqëria shqiptare por edhe nga ndërkombëtarët. Kemi një qëndrim krejtësisht arrogant të kryeministrit në kundërshtim edhe me vetë ligjin që miratoi për dekriminalizimin. E shohim që ata që bëri sikur i nxori nga dritarja si të inkriminuar, po i fut haptas apo fshehtas nga dera.

-A do t’i shtohet këtyre kushteve ngritja e Byrosë së Hetimit brenda 2 javëve. I referohem këtu një postimi të z. Berisha në FB.

Për momentin byroja e hetimit mbetet një çështje që duhej të ishte zgjidhur. Ne prej kohësh kemi deklaruar që duhet që Byroja e Hetimit sipas rekomandimeve të Venecias të kalonte në parlament sa më parë, nuk ka asnjë arsye për t’u vonuar. Sigurisht grupi, nëse kjo çështje do të ngrihet, do ta diskutojë si çështje për tu zgjidhur, jo si kushte. Ne kërkojmë që amazhoranca të zbatojë ligjet që ka miratuar vetë dhe Kushtetutën e vendit.

1. Paloka, është e vërtetë që opinioni final i Venecias ka rrëzuar Partinë Demokratike me kërkesat dhe parashtrimet që ka bërë opozita, si edhe për reformën në drejtësi?

Nëse do të merrnim për të vërtetë këtë do të merrej si e vërtetë fakti që Komisioni i Venecias ka vendosur kapjen politike të institucioneve të drejtësisë shqiptare. Nuk ka asnjë gjë të tillë. Sigurisht, Komisioni i Venecias ka dhënë rekomandimet e tij finale që përputhen plotësisht me parimet kryesore që ne kemi dhe që Komisioni i Venecias i ka qëndruar që në fillim. Që janë parimet kryesore, jo pikat dhe detajet, sepse ato sigurisht i diskuton Komisioni i Reformës, por parimet kryesore tonat janë, moskapja, moslejimi i kapjes së drejtësisë dhe dialogu politik. Zgjidhja e të gjitha çështjeve politike, kompromisi dhe marrëveshja. Të dyja këto pika Komisioni i Venecias i ka theksuar që në fillim dhe nuk I ka ndryshuar asnjëherë qëndrimet e saj. Ne jemi plotësisht të njëjtë me Komisionin e Venecias dhe do të vazhdojmë të ngulim këmbë që të fillojë sa më shpejt dialogu politik për ti dhënë rrugë edhe Reformës në Drejtësi. Po presim reagimin e palës tjetër e cila duket që nuk  e ka këtë qëndrim.

Prononcim për media e kryetarit te Grupit Parlamentar të Partisë Demokratike, Edi Paloka, 16 mars 2016

Prej një javë, shqiptarët janë njohur nepërmjet medias se Byroja Federale e Hetimit (FBI) ka zbarkuar në Shqipëri pasi ka rënë në gjurmët e një krimi financiar.

Kompania e cila hetohet është drejtuar nga Knidi Bashari, këshilltari i Ministrit të Financave Arben Ahmetaj, që siç e pohon edhe ai vetë ka drejtuar këtë kompani deri në gusht 2015.

Pavarësisht të dhënave hetimore që ka publikuar media për 5245 veprime elektronike të cilësuara si kriminale, qeveria shqiptare nuk ka pasur asnjë reagim për këtë megaskandal, hesht dhe merr në mbrotje të kërkuarin e FBI-së.

Këshilltari i financave hetohet nga zyra më e njohur e globit për mashtrim financiar ndërsa ministri e ka emëruar si këshilltar të tij.

Ky është një kombinim kriminal mes një të kërkuari për mashtrim financiar nga FBI dhe një ministri hajdut e me skandale si Arben Ahmetaj. Për më tepër, edhe pas këtij lajmi, personi në fjalë vijon të këshillojë ministrin e Financave.

Kjo është situatë e pastër inkriminimi ku një mashtrues financiar punon në ministrinë e Financave. Edi Rama dhe ministri i tij i skandaleve nuk kanë vullnet për të zbatuar ligjin e dekriminalizimit.

Ky rast dëshmon qartë vullnetin e Edi Ramës për të bashkëjetuar e bashkëqeverisur me krimin.

Deklarata për mediat e deputetit, Luçiano Boçi, 16 Mars 2016

Qindra qytetarë në Kurbin protestuan sot përpara bashkisë në Ditën e Verës kundër djegies së mbeturinave në kodrën e gjelbër të qytetit duke u kthyer në një rrezik të madh për jetën e tyre. Protesta nisi në sheshin qendror të qytetit të Laçit ku protestuesit kanë kërkuar largimin e qeverisë së Edi Ramës që po i varfëron ata çdo ditë e më shumë. Kreu i Departamentit të Mjedisit në Partinë Demokratike, Jamarbër Malltezi akuzoi qeverinë dhe pushtetin lokal se po vret qytetin e Laçit me djedien e mbeturinave duke e kthyer në një skemë të pastër korrupsioni për të ndarë paratë publike.

“Gjithë qyteti duhet të vuajë për shkak se dy persona ndajnë miliona. i gjithë qyteti duhet të bëjë analizat se rrezikohet nga kanceri i mushkrive për shkak të djegies së mbeturinave në kodrën e qytetit. Kjo rrezikon edhe ujin e pijshëm të Laçit. Për fat të keq qytetarët nuk kanë të sigurtë as ajrin që thithin dhe as ujin që pijnë, disa të tjerë ndajnë miliona. Kjo është shumë e rëndë dhe në një shtet ligjor kjo nuk mund të egzistojë. Duhet të kishte njerëz që duhet të përgjigjeshin penalisht për këtë çështje. Para disa vitesh ka pasur gjobë ndaj bashkisë së Kurbinit kur ishte dhe më e vogël për mostrajtimin e mbeturave, pra për djegien e tyre që çlirojnë gazra toksikë. Unë besoj se shëndeti i fëmijëve tuaj është shumë herë më i rëndësishëm se sa miliona e dy personave që ndajnë me njëri tjetrin”, tha Malltezi.

Deputeti Mhill Fufi dhe kreu i PD në Kurbin Altin Biba kërkuan largimin e qeverisë Rama për keqqeverisjen dhe rritjen e varfërisë. Në mënyrë simbolike, protestuesit lidhën me zinxhir hyrjen e Bashkisë së Kurbinit. Më pas, dhjetra qytetarët janë ngjitur kodrave të qytetit të Laçit, aty ku dhe hidhen prej vitesh mbetjet pranë kurorës së gjelbërt të rrethuara nga pishat. Hedhja e mbeturinave në këtë zonë ka shkaktuar një ndotjet të madhe duke u kthyer në një rrezik real për qytetarët.  Pranë grumbullit të mbetjeve ndodhet dhe rezervuari i ujit të pijshëm për qytetarët laçiane, një mundësi dhe më shumë e perhapjes së ndotjes dhe indiferecës së drejtuesve vendorë. Protestuesit mbollën disa fidanë pranë zonës ku mjetet e bashkisë depozitojnë plehrat e qytetit.

Njoftim per shtyp i Partisë Demokratike, 14 Mars 2016

Partia Demokratike është e tronditur nga sulmi i përgjakshëm terrorist mbrëmë në qendër të Ankarasë, ku humbën jetën mbi 30 qytetarë. Partia Demokratike shpreh ngushëllimet e saj për familjet e viktimave dhe uron shërim të shpejtë të të plagosurve. Ne gjendemi në krah të popullit turk në këtë ditë të vështirë dhe në krah të autoriteteve turke. Partia Demokratike e dënon me forcë këtë akt të rëndë dhe shprehet e vendosur në mbështetjen e luftës ndaj terrorizmit dhe ekstremizmit të çdo lloji.​

Njoftim për shtyp i Partisë Demokratike, 14 Mars 2016

Kryetari i Partisë Demokratike Lulzim Basha i cili po merr pjesë në takimin e organizuar nga Partia Popullore Europiane mes krerëve të Partive simotra dhe Ministrave të Jashtëm të partive anëtare të PPE-së u takua dhe bisedoi me Presidentin e PPE Joseph DAUL, kryetarin e  Komisionit për Punët e Jashtme në Parlamentin Europian, Elmar BROK me  komisiinerin per zgjerim Johannes Hahn, ministrin e Jashtëm Austriak Sebastian Kurz etj. Një nga çështjet kryesore të diskutuara në këtë takim ka qenë situata në Ballkanin Perëndimor. Zoti Basha i ka njohur bashkëbiseduesit me situatën në Shqipëri, krizën ekonomike që ka përfshirë vendin, korrupsionin galopant, refuzimin që mazhoranca i bën zbatimit të vendimeve të Gjykatës Kushtetuese, ecurinë e procesit të dekriminalizimit, Reformën në Drejtësi etj.

Shpirti i ligjit për dekriminalizimin po sfidohet akoma pa nisur punë, theksoi zoti Basha duke përmendur shfaqjet e kryeministrit në krah të personave me precedentë kriminal, që nga ish-deputeti socialist Arben Ndoka, tek kryebashkiaku i Kavajës dhe Krujës, apo rasti flagrant i kthimit në Parlament të deputetit Armando Prenga i cili plagosi katër persona brenda në Komisariatin e Policisë.

Kryetari Basha theksoi faktin se, Edi Rama se largon dot nga Parlamenti Armando Prengën pasi deputeti i radhës është i dënuar me burg.

Duke shprehur shqetësimin se lidhja e Ramës me krimin dhe korrupsionin mbetet e fortë, Basha tha se dekriminalizimi që të zbatohet kërkon vullnet politik, gjë që tek Kryeministri i vendit për shkak të lidhjeve të tij mungon. Zbatimi i ligjit te dekriminalizimit eshte njr kusht themelor për zgjedhje të lira dhe të ndershme, theksoi zoti Basha.  Raporti i OSBE/ODHIR-it për zgjedhjet e 2015-ës ishte një sinjal alarmi për shitblerjen e votës, intimidimin e votuesve, përdorimit të administratës, keqpërdorimit të Policisë së Shtetit etj. Kryetari i Partisë Demokratike ka theksuar se Shqipëria nuk mund të bëjë asnjë hap përpara pa zgjidhur problemin e rikthyer fuqishëm nga Edi Rama ne zgjedhjet e 2015-ës, të cilat u konsideruan si zgjedhje jo të lira dhe të ndershme.  Reforma në Drejtësi ishte një tjetër çështje e diskutuar në takimet e zotit Basha. Lideri i opozitës ka shprehur shqetësimin për mungesën e vullnetit nga ana e mazhorancës për të bashkëpunuar në frymën e konsensusit politik, për të prodhuar një Reformë në Drejtësi, e cila lufton korrupsionin, pamundëson kapjen politike dhe vendosjen e gjyqtarëve dhe prokurorëve në shërbim të qeverisjes, qeverisë apo Kryeministrit. Rekomandimet e Venecias janë udhërrëfyesi më i mirë për Reformën në Drejtësi, theksoi zoti Basha.

Njoftim per shtyp i Partise Demokratike, 13 Mars 2015

Deklarata për mediat e zëdhënëses Ina Zhupa, 13 Mars 2016

“Shqipëria dhe Kosova duhet të bashkojnë agjendat për të  Drejtat e Grave në të gjitha trevat shqipfolëse”, kështu deklaroi në Prizren, Albana Vokshi, Kryetare e Lidhjes Demokratike të Gruas së Shqipërisë, e ftuar në një takim për 26 vjetorin e themelimit të Forumit të Gruas së Lidhjes Demokratike të Kosovës.

Zonja Vokshi tha se në Shqipëri dhe Kosovë, qytetarët kanë humbur besimin dhe i janë drejtuar portave të Evropës për mbijetesë, si kombi me numrin më të madh të azilkërkuesve në Union, ku Shqipëria zë vendin e dytë pas Sirisë. Mijëra familje, mijëra gra, nëna të zhytura në skamje e mjerim azilojnë çdo ditë shpresëhumbur, pa kthyer kokën pas.

Politikat anti- sociale të ndjekura nga qeveria e Edi Ramës në Tiranë kanë thelluar varfërinë në Shqipëri, e cilat më së shumti rëndon mbi supet e grave, deklaroi deputetja Vokshi.  Çdo tre muaj INSTAT raporton rritjen pa kthim të papunësisë ndër gra dhe vajza e cila shkon në rajone të ndryshme edhe mbi 50 deri 70%. Papunësia ndër të rinj ka arritur 34%. Fasada me numrat e grave në qeveri e Parlament nuk reflektohet aspak në një përmirësim të numrit dhe statusit të tyre në administratën publike dhe atë private. Në të kundërt, rritja e çmimeve, taksave, tarifave këto 3 vjet e kanë përkeqësuar gjendjen dhe statusin e tyre.

Kryetarja e LDGSH, Vokshi inkurajoi partitë politikë në Kosovë të ndiqnin iniciativat e mira në drejtim të promovimit të rolit të grua në politikat lokale. Kuota 50% a lançuar nga PD dhe z.Basha tashmë është realitet në Shqipëri. “Sfida të tjera na presin së afërmi për rritjen e kuotës së grave parlamentare në Shqipëri e Kosovë”, tha Vokshi.

Sa më shumë gra në parlament e poste drejtuese në administratë, aq më pak burra me të shkuar kriminale e precedentë penalë. Sa më shumë gra në politikë, aq më pak burra të korruptuar, theksoi Vokshi.

Një grua jo e fuqizuar ekonomikisht, është a mënjanuar, e pambështetut dhe papromovuar politikisht. Ndaj dhe është domosdoshmëri kombëtare që më ardhjen e PD në pushtet, të zhbëhen të gjitha politikate masat anti-grua e të vendoset promovimi i saj në të gjitha axhendat qeveritare.

Znj vokshi kërkoi që PD dhe LDK tu bashkangjiten nismave të Organizatës së kombeve të bashkuara: “Step it up for Gender Equality!!”

Ajo iu bëri thirrje grave në Shqipëri dhe Kosovë të ngrihen për të drejtat e tyre ekonomike që fëmijët  e tyre të mos brakstisin vendlindjet nga varfëria dhe pasiguria. E ardhmja e fëmijëve tanë –tha deputeja Albana Vokshi- duhet të ndërtohet në Shqipëri dhe në Kosovë.

Kryetarja e Forumit të Gruas së Lidhjes Demokratike të Kosovës, Lirije Kajtazi përgëzoi kolegen Albana Vokshi për lobimin e saj jo vetëm në Partinë Demokratike , por edhe në forumet politike europiane dhe në agjencitë ndërkombëtare për të fuqizuar statusin e gruas në Shqipëri dhe deklaroi se edhe LDK është gati të ndryshojë statusin për më shumë gra në vendimmarrje.

Gjatë takimit në Prizren, përfaqësueset e forumeve të grave nga Shqipëria dhe Kosova u angazhuan për nisma rajonale të përbashkëta për të mbështetur projekte për fuqizimin e satusit të grave dhe vajzave.

Njoftim per shtyp i Partise Demokratike, 13 Mars 2016