Blog

Të nderuar kolege,

Nisja e sesionit  të ri parlamentar ndodh, në kushtet e krizës më të rëndë që ka përfshirë vendin,  në të gjithë sektorët,  në vitin e tretë qeverisës të Rilindjes.

Madje personalisht, prisja që sot  të na lajmëronit për dhënien me koncesion edhe të Parlamentit, tashmë që qeveria ka vetëm një prioritet në axhendën e saj  “dhënie me koncesion të cdo shërbimi, të cdo sektori, pra privatizim për pasurim, me cdo kusht , me cdo mënyrë”.

Sot Parlamenti  nis punimet me certifikimin e mëtejshëm të kësaj krize duke  vijuar traditën  me akte të paprecedentë, kur  në seancë  sillni dy akte normative për ndryshimin e buxhetit  brenda një muaji.

Nga ana tjetër. Parlamenti starton një vit, me  nivelin më të ulët të bësimit dhe vlerësimit publik.

Në këtë nisje të sesionit parlamentar, shumë përfaqësues në këtë sallë janë nën akuzë publike për korrupsion, me dosje në drejtësinë kombëtare dhe atë ndërkombëtare, janë të vënë në përgjegjësi publike për korrupsion gjigand me paratë e shqiptarëve .

 Kauza e këtij parlamenti është prej mëse dy vitesh, ngritja në system e abuzimit me taksapaguesit dhe ngritjes së shtetit oligarkik në emër të të bërit shtet,  duke përdhosur cdo praktikë dhe normë parlamentare, ligj e kushtetutë.

 Dëshmi e kësaj mënyre të të sunduarit alla Rilindje janë edhe këto ndryshime të buxhetit.

Kolegë!

Të ndryshosh buxhetin tri herë brenda një viti nuk është praktikë e amendimit të një ligji apo marëveshje rutinë, është ndërhyrje, është cënim i programit  themeltar vjetor të një qeverie, është maskim i mashtrimeve të saj,  është paaftesia për të bledhur të ardhurat e planifikuar prej vete asaj.

Ndërhyrja në buxhet, kaq  e shpeshtë , me kaq  shpërfillje, është tregues i tronditjes, i paaftësisë  dhe i kapjes së institucioneve nga interesat e ngushtë të klaneve dhe miqve tuaj.

Në vlerësimin tim, depozitimi i akteve normative për ndryshimin e buxhetit kanë  vënë  në udhëkryq pavarësinë e dy pushteteve, Ekzekutivin me Legjislativin, ku ky i fundit është kthyer në një amortizator për humorin dhe babëzinë e kryeministrit dhe qeverisë duke i marrë dhe qindarkat e bukës së gojës shqiptarëve.

 Parlamenti shihet si paradhomë e kryeministrit, ku pazaret mbyllen pa u futur në zyrë dhe vijnë e marrin fuqi ligjore me kartonat e siguruar nga paratë e krimit dhe të korrupsionit.

Madje si një  praktikë e rrezikshme parlamentare, noterizimi i  korrupsionit qeveritar e vë këtë parlament në pozitat më inferiore dhe me besueshmërinë më të ulët publike në këto 25 vite.

Parlamentit nuk i jipet hapësirë dhe dinjitet për të debatuar mbi interesin publik, por i sillen shkresurina qeveritare për ti hapur rrugë babëzisë pa fre të Ramës dhe klaneve ministrore.

A krijojnë këto akte mundësi për ti dhënë zgjidhje halleve, ekzistencializmit të mijëra familjeve në krizë për bukën e gojës?

Sigurisht që jo.

 Sikurse dhe për ju,  është e njëjta bindje që  aktet e depozituara, janë normë për korrupsion, janë ligj për  qindra tëndera abuzive, në dëm edhe më të madh të ekonomive familjare shqiptare.

Nuk mund të na i propozoni këto akte si instrumenta për zhvillimin e infrastrukturës,  investimeve publike apo përmirësimit të standarteve, në një kohë kur për të tretin vit, Shqipëria herë përmbytet në Veri, herë në Jug e herë në zemër të saj.

Dhe si e përballët  ju si qeveri këtë emergjencë kombëtare? Ku ishte kryeministri? ku ishin ministrat përgjegjës? ku ishte kryebashkiaku? Pse nuk u mblodh parlamenti?

Drejtimet që funskionuan ishin vetëm dy: solidariteti i shqiptarëve mes njëri tjetrit dhe vëmendja e pakursyer e medias që raportonte cdo orë nga tërreni.

Cfare ironie!

Me dt 7 janar, ditën e permbytjeve te medha, kur ashtu si të gjithë kolegët e mi të Opozitës, që shkuan pranë zonave të tyre, në mbështëtje të banorëve, si deputete e Qarkut të Kukesit, isha në fshatin Domje të Hasit, njësi vendore që qeveriset nga të majtët dhe bashkë me kryetarin e kësaj bashkie, i bëmë apel qeverisë të ndërhynte urgjent për të përmbyturit nga  vërshimet e ujit. Pleq me lot në sy ju drejtuan Ju apelin për ndihmë, ndërkohë që ju nga zyrat lluksoze paskeni qënë duke u pregatitur për devijimin e fondit rezerve për propogandën fallse/ reklamën 8 faqëshe.

Turp!

 Por në cfarë rrethanash ekonomike dhe sociale i keni sjellë sot aktet e ndryshimit të buxhetit?

 Besoj dakortësohemi të gjithë se shifrat në nivel makro dhe mikro në sektorët publikë, investime dhe të ardhura, inflacion dhe borxh i brendshëm, papunësi e rritje taksash, flasin me qartë për dështimin, papërgjegjshmërinë  dhe abuzimet marramendëse me fondet publike, per grabitjen e parave të shqiptarëve duke e thelluar skamjen deri në palcë.

Këto dy akte vijnë sot në vijim të frymës më  antihumane që ka treguar deri më tani ndonjë qeveri dhe që ka dëgjuar dhe është përballur ndonjëherë ky parlament.

Në vitin 2015 varfëria i coi shqiptarët në një kalvar vetëvrasjesh, vetflijime si pasojë e humbjes së cdo shprese.

2015-ta,  hyri në historinë tonë si viti i eksodit historik të shqiptarëve,  si shpërngulja masive e të rinjve, drejt rrugëve të Evropës, si 25 vite më parë, kur mori fund diktatura gjysëm shekullore.

Treguesit e skamjes janë tronditës, sikurse vetë panoramat bardhë e zi të mjerimit nga Jugu në Veri.

Ajo cfarë dinë shqiptarët dhe ju nuk ua fshihni dot është se;

• Niveli i papunësise për vitin 2015 është rritur jo vetem krahasuar me vitin 2014 por edhe nga tre mujori në tre mujor.
• Niveli i varfërise shtohet nga dita në dite ndërkohe që shumë familje janë nxjerrë me të padrejte nga skema e ndihmës ekonomike.
• Ka rënë interesi i investitoreve të huaj per investime në vendin tone dhe kjo jo vetëm si rezultat i informalitetit por kryesisht si rezultat i taksave të larta.

Ata qe nuk lexojne vetem “The Ekonomist”, por i referohen edhe burimeve të tjera e kanë marre vesh se;

• Sipas BB në raportin e saj të fundit “doing busines”, Shqipëria renditet e 97-ta nga 189 vende, ose 35 vende me poshtë se nje vit më parë dhe ky pozicion e klasifikon si të fundit ndër vendet e Rajonit.
• Raporti i Forbes( dhjetor 2015) gjithashtu per klimën e biznesit, renditi Shqipërine në vendin e 109 për taksa të larta dhe në vendin e 99 për nivelin e korrupsionit.
• Raporti HERITAGE konstaton rënie me 9 vende per lirine ekonomike në një vit.
• 61 koncesionet e kanë zhytur Shqipërinë në të paktën 3,5 miliardë dollar detyrime.

Dhe të gjitha keto vazhdojnë ta bëjnë krenar “ liderin tonë të reformave”.

Kolegë!

Nisja e sesionit me akte normative që forcojnë sistemin e pushtetit oligarkik është një ogur i keq për muajt në vijim, si parathënie e thellimit të sigurtë të krizes.

Por shqiptaret dhe Opozita nuk mund të lejojnë më që shtëpia e sovranit të mbahet peng nga bandat e pushtetit, nga njerëzit që nuk duan pushtetin e ligjit.

 Opozita i ka hyrë një rruge pa kthim që do të jetë dhenia fund e mandatit të kesaj mazhorance të inkrimunuar, për ti kthyer shqiptarëve parlamentin që meritojnë, me deputetë që të hartojnë e miratojnë ligje në interes të shqiptarëve në interes të zhvillimit evropian të Shqipërisë.

Viti 2016 do të jetë viti i shpresës, i kthesës së madhe, viti i shpëtimit të shqiptarëve.

Fjalimi në Kuvend e deputetes Mimoza Hajdarmata, 21 janar 2016

Denoncimi në media i Arben Kices, që bëri të mundur dënimin e bandës së lushnjes që solli drejtësi për krimet cnjerëzore të Aldo Bares, është tronditës dhe tregon se si ai trajtohet si armik nga çdo hallkë e shtetit.

Në vend se dëshmitari i drejtësisë të gëzonte privilegje, sipas ligjit, ai jo vetëm është lënë në mes të katër rrugëve, pa mbrojtje e pa mbështetje, por luftta e qeverisë ndaj tij shkon deri aty sa ai nuk regjistron dot as vajzën në shkollë.

Ky rast skandaloz tregon fytyrën e vërtetë të qeverisë, të Edi Ramës e Tahirit të tij, që bëjnë lloj-lloj paktesh me krimin, i ofrojnë lehtësi bandave e trafikantëve, dhe nga ana tjetër i nxijnë jetën një dëshmitari drejtësie.

Ky është modeli dhe ideja që Edi Rama ka për drejtësinë.

Kjo është një tradhëti që i bëhet shtetit, parimeve të tij, drejtësisë dhe një favor ndaj bandës së Aldo Bares.

Partia Demokratike i bën thirrje zyrave përgjegjëse të ofrojnë shërbimet që dëshmitarit i takojnë me ligj, e të mos bëhen pjesë e kësaj skeme kriminale të ndëshkimit të dëshmitarit dhe familjes së tij.

Deklarata për mediat e kreut të Departamentit të Rendit dhe Sigurisë, Enkelejd Alibeaj, 21 Janar 2016

Në mbledhjen e sotme të Komisionit për Edukimin dhe Mediat deputetët e opozitës Luciano Boçi e Bedri Hoxha sollën në debat aktin e padenjë të Ervin Culit, drejtor i Teatrit Kombëtar, i cili personalisht dhunoi dhe nxorri jashtë salle gazetarin e kulturës të një televizioni privat gjatë vënies në skenë të një drame. Një person i tillë me një skandal të tillë nuk mund të rrije më në këtë detyrë.

Këta deputetë përcollën shqetësimin për arrestimin e paligjshëm nga policia në Shkodër në 11 janar të gazetarit Kristian Troshani, reporter në një TV lokal dhe dhunimin e z. Enver Doçi, korrespondent i Neës 24 në Burrel në Dhjetor 2015 të gjatë një konference shtypi të Ministres së Arsimit Nikolla.

Deputeti Myqerem Tafaj kërkoi shpjegime për qartësimin e procedurave mbi pranimin e maturantëve në universitete ketë vjeshtë pasi keto ende nuk jane të publikuar nga ministria; objekte shqetësimi ishin edhe kompetencat e reja të bashkive mbi kopshtet e shkollat të cilat janë të paqarta dhe pa nje bazë ligjore të miratuar si dhe roli i një agjencie britanike të njoftuar nga Rama e Nikolla, në akreditimin institucional të universiteteve.

Komisioni do të kërkojë me sqarimet përkatëse me shkrim nga ministrat e qeverisë për këto çështje, fazën aktuale edhe pse ka gjashtë muaj që maturanët kanë përfunduar testimet, Ministria e arsimit nuk ka bërë publikë praktikat përkatëse.

Shpreh ngushëllimet e mia për familjarët e Agron Balës. Ndarja e shpejtë dhe shumë e parakohshme nga jeta na ka hidhëruar thellë, ka hidhëruar thellë kolegët e tij, komunitetin e gazetarëve, pedagogët, publicistët, ndjekësit e tij anembanë.

Në këtë ditë dua ta përkujtoj si një njeri që i shërbeu gjithë jetën e tij të vërtetës, si kumti dhe misioni i gazetarit dhe të shpreh besimin se gjenerata të tërë gazetarësh të edukuar nga pedagogu Bala do të dinë ta ruajnë amanetin e tij për t’i shërbyer të vërtetës, për t’i shërbyer me devotshmëri publikut dhe qytetarëve pavarësisht prej kostos që kjo sjell në jetën personale dhe profesionale, kosto të cilën Agron Bala diti ta përballojë me dinjitet gjatë gjithë jetës së tij të shkurtër por të ngjeshur në shërbim të gazetarisë, të vërtetës dhe publikut shqiptar.

U prehtë në paqe !

Njoftim për shtyp i Partisë Demokratike, 20 Janar 2016

Sot në Komisionin e Ekonomisë u diskutuan dy akte normative për ndryshimin e buxhetit.

Skandalet dhe abuzimet e Ilir Beqës në shëndetësi janë të larmishme dhe në çdo fushë.

Raporti i Kontrollit të Lartë të Shtetit, për veprimtarinë e Fondit të Sigurimit të Detyrueshëm të Kujdesit Shëndetësor për vitin 2014, që gjendet në Prokurori, ka zbuluar zhvatje të milionave edhe në financimin e paketës shëndetësore për shërbime që kryhen në spitalet private.

Miliona lekë u janë dhënë spitaleve private, në mënyrë korruptive, pa zbatuar procedurat, pa zbatuar legjislacionin në fuqi (fq 43-46), pa një vendim te Këshillit Administrativ (fq 160), pra vetëm me urdhër gojor të Ilir Beqës.

Ja ku keni dokumentin e auditit.

Po ashtu, abuzime janë konstatuar edhe në rastet e dhënies së parave për trajtimet mjekësore jashtë vendit.

Kontrolli konstaton shumë raste, rimbursim i tyre është bërë në kundërshtim me vendimin e qeverisë nr 638 datë 1.10.2014.

Janë janë evidentuar më shumë 90 milionë lekë të dhëna në klinika për trajtime që ato nuk i kryejnë, apo për trajtime që janë kryer në spitale brenda vendit (fq 44) në kundërshtim me VKM-në. Mbi 60 milionë lekë janë rimbursime për trajtime në vite të mëparshme që nuk parashikohen fare në vendimin e qeverisë (fq 45-46). Gjatë pagesave, konstaton KLSH-ja, u gjenden edhe raste rimbursimi pacientësh që nuk jetojnë më. Pra, as të vdekurit s’i kanë kursyer për të vjedhur fonde.

Një kërdi me qindra milionë lekë që shpërndahen nga Ilir Beqa në miq e klientë, sipas interesave të tij, në kundërshtim me ligjin.

Një ditë më parë, ne bëmë publike pjesën e raportit që fliste për skemën kriminale të korrupsionit me rimbursimin e ilaçeve.

Përgjigja mjerane e Ilir Beqës, nuk kishte lidhje me faktet që ne publikuam dje, ai mashtroi për uljen me 30% të çmimit të barnave, apo furnizimin e vazhdueshëm me barna të spitaleve. Prej politikave Rama-Beqaj kompani serioze jane larguar e të tjera kanë paralajmëruar largimin. E megjithatë Beqaj pranoi se edhe pse miku e klienti i tij është i ndjekur penalisht, i ka ndërprerë kontratën me Fondin për abuzime marramendëse, ai vazhdon ti japë miliona në tendera barnash spitalore.

Partia Demokratike i bën thirrje Prokurorisë të hetojë me shpejtësi dhe në mënyrë të plotë këto akte të rënda korruptive, këtë vjedhje të parave të shqiptarëve, të provuar me fakte e me dokumenta.

Dosja është në organin e akuzës dhe nuk duhet të ketë zvarritje për të nxjerrë para përgjegjësisë këtë hajdutëri kriminale, të kryer nga kampioni i korrupsionit, Ilir Beqa.

Deklarata për mediat e deputetes, Albana Vokshi, 19 Janar 2016

Nënkryetari i Grupit Parlamentar të Partisë Demokratike Eduard Halimi dhe Zëdhënësja e Grupit Jorida Tabaku, të shoqëruar nga Ekspertët e Opozitës për Reformën në Drejtësi, pritën në një takim Drejtoren për Europën Perëndimore, Ballkanin Perëndimor dhe Turqinë në Shërbimin e Jashtëm Europian (EEAS) Znj. Angelina Eichhorst, me të cilën biseduan rreth Reformës në Drejtësi.

Që në fillim të takimit, z. Halimi e informoi zyrtaren e Bashkimit Europian mbi qëndrimin dhe vullnetin e Partisë Demoraktike, për të kontribuar në realizimin e një Reformë reale në sitemin e drejtësisë, bazuar në standardet e Komisionit të Venecias, duke e konsideruar këtë reformë si jetike për vendin, në funksion të ndërtimit të një sistemi drejtësie me mekanizma të qëndrueshëm që të luftojë korrupsionin, por nga ana tjetër që garantojnë pavarsinë e sistemit nga politika.

Z. Halimi ndau shqetësimin me znj. Eichhorst mbi veprimet e mazhorancës për të përjashtuar çdo mundësi bashkëpunimi me opozitën në realizimin e kësaj reforme, si dhe rrezikun evident që ekziston për kapjen politike të sistemit të drejtësisë nëpërmjet amendamenteve kushtetuese të propozuara nga mazhoranca.

Z. Halimi u shpreh se pas daljes së Opinionit Paraprak të Komisionit të Venecias, Partia Demokratike kërkoi që të bëhej një draft i përbashkët bazuar në standardet e Venecias dhe se vullneti i mirë do tregohej në rast se do respektoheshin sërish të gjitha rakomandimet e Venecias. Mirëpo, kjo ishte e pamundur, për shkak se përsëri mazhoranca ndërtoi një proces të njëanshëm dhe dërgoi për mendim final në Komisionin e Venecias një draft të njëanshëm, që shmang rekomandimet e Venecias.

Znj. Eichhorst e konsideroi realizimin e Reformës në Drejtësi si një nga prioritetet kyçe për ecurinë e Shqipërisë në Bashkimin Europian, dhe shprehu gadishmërinë për të ndihmuar në këtë proces. Ajo ndau të njëjtin mendim se palët duhet të bashkëpunojnë në mënyrë të sinqertë në realizimin e këtij procesi, sipas të njëjtin model te aplikuar gjate procesit të miratimit te akteve ligjore dhe kushtetuese për dekriminalizimin.

Njoftim për shtyp i Partisë Demokratike, 19 Janar 2016