Blog

Kandidatja për Bashkinë e Durrësit, Grida Duma prezantoi programin përpara banorëve të Sukthit në fshatrat Vadardhë dhe Kullë, për këtë zonë. Duma tha se në një vit e gjysëm, kjo zonë do ketë ujë 24 orë ndërsa do zerohen faturat abuzive.

“Për Sukthin është llogaritur që në 1 vit e gjysëm do të kemi 24 orë furnizim me ujë. Të gjitha faturat e ujit të cilat kanë probleme dhe ju kanë ardhur fatura atëhere kur nuk ka pasur ujë, e kam thënë edhe në zona të tjera, drejtësia e faturimit do të vendoset. Atë shtetin e së drejtës do e kemi tek kjo bashki pas 21 Qershorit ku do kemi zyrën e madhe me konsulencë falas sa herë që qytetarët të paraqesin një faturë e cila është abuzive, kur ndërkohë ato kanë bërë shpenzime që me këtë shtetin e së drejtës i njihet e drejta të rimbursohen për shpenzimet që kanë bërë”, tha Duma.

Kandidatja e djathtë ngriti shqetësimin e investimeve elektorale duke theksuar se modeli i saj është ndryshe nga investimet e pamenduara. Ajo tha se plehrat nuk do të digjen në asnjë zonë të Durrësit dhe do punohet për riciklimin e tyre duke i ndarë që në burim. Sukthi do të ketë 4 shkolla të reja.

“Rrugët dhe kanalet nuk i ndërtojmë nga xhepi por nga taksat e shqiptarëve. Ato rrugët që i kanë bërë, a i kanë bërë brenda standardit?! Ato rrugët që i kemi bërë dhe ato paratë që kemi shpenzuar, kanë qënë në tender 10 cm, apo ka qënë 10 cm dhe i kemi bërë me 5 cm në rrugë ?! Apo ka qënë 500 metra kanalizim në tender dhe kemi bërë 100 metra kanalizim?! Kjo është përgjegjësia. Si i shpenzon fondet publike. Dhe po të shkosh në disa rrugë elektorale do qeshësh me të madhe por me dhimbje se kanë murosur edhe pemët. Tek rrënja e pemës kanë futur beton. Çdo 150 metra do të kemi 3 koshat me ngjyra, të ndajmë në burim plehrat, të merren dy herë në ditë dhe të shkojnë tek kompania e riciklimit dhe të zhdukim landfillet se nuk ka zgjidhje tjetër. Nuk ka më zgjidhje me djegie dhe nuk mund të jemi një bregdet turistik, as këtu, as në Manzë, as në Durrës dhe as kudo. Përsa i përket shkollave, kemi ndërtimin e 4 shkollave të reja për gjithë zonën e Sukthit. Edhe ajo që është do ristrukturohet me prioritet që është fusha e sportit, palestra dhe pjesa e hapur. Do shtohen ata që mbajnë higjenën, rojet dhe të gjitha parqet sportive para shkollës që do ti përdorë komuniteti edhe mbasdite”, tha Duma.

Zonja Duma foli në fshatin Kullë edhe për zgjidhjen e çështjes së pronësisë dhe azhornimit të tokave e cila do të behet e hapur me komunitetin.

“Mora pjesë në një nga projektet më të mbrekullueshme të ndërkombëtarëve për 8 mijë pronat e jugut. Si e zgjidhëm situatën?! E zgjidhëm me transparencë. I morëm hartat, i hapëm në komunitet, i lajmëruam njerëzit nga 10-15 herë derisa më në fund me harta transparente dhe me komunitetin përpara u arrit të zgjidhej në mënyrë përfundimtare përcaktimi i kufinjve dhe i pronës. Kjo është ajo që do bëjmë. Në Bashkinë e Durrësit do kemi zyrën hipotekore dhe kadastrale që do zgjidhë në mënyrë transparente dhe të hapur me komunitetin problemin e pronës. Azhornimi i tokës do ndodhë bashkë me ju, hapur”, u shpreh Duma.

Njoftim për shtyp i Partisë Demokratike, 10 Qershor 2015

Në takimin me banorë  dhe mbështetësit e Partisë Republikane kandidati Gjergj Mero tha se shtresat në nevojë do të mbështeten dhe nuk do të braktisen, sikurse po vepron  qeveria qendrore dhe bashkia, duke u hequr bukën e gojës,  që është ndihma sociale. Ai tha se nuk do të ketë më të varfër që të mos mund  të paguajnë dritat dhe të  kërcënohen  për burgim nga qeveria, pasi Bashkia e re do të gjejë mundësi subevcionimi për të bërë këtë pagesë. Aktualisht tha kandidati Mero unë kam takuar në qytet me qindra familje rome dhe në nevojë ,  të cilave u është hequr furnizimi me ujë dhe drita, pasi nuk kanë me çfarë të paguajnë.

“Kjo është qeverisja më antisociale dhe antihumane që po vuajnë korçarët dhe të gjithë shqiptarët, pasi varfëria dhe papunësia ka kapur nivele ekstreme. Dhe është një trishtim i madh kur po këta arkitektë të mjerimit vazhdojnë ende të mashtrojnë  njerëzit me premtime boshe, kur në realitet  ata kanë që në vitin  e kaluar lista të tëra ushqimesh pa paguar dhe nuk arrijnë dot të sigurojnë vaktet normale për familjet e tyre. Me drejtimin e bashkisë së re ne do të jemi avokatët dhe mbështetësit më të fortë të daljes së shtresave në nevojë nga kriza dhe punësimit të tyre ne shërbimet bashkiake si dhe në çeljen e bizneseve të reja private.-u shpreh kandidati Mero.

Në fjalën e tij kandidati demokrat  tha se prioritet i programit është punësimi nëpërmjet çeljes së bizneseve të reja dhe rihapjes së aktiviteteve të vogla,  të mbyllura nga kriza e rëndë ekonomike. Ai tha se lehtësitë e ndjeshme fiskale dhe mbështetja  për të punësuarit e rinj do të jenë objektivat kryesorë  për biznesin që në fillim të drejtimit,  si kryebashkiaku i Korçës.

Njoftim për shtyp i Partisë Demokratike, 10 Qershor 2015

Kandidati i Partisë Demokratike për bashkinë e Elbasanit Ardjan Turku zhvilloi një takim në lagjen 28 Nëntori. Vota e 21 Qershorit është mjaft e rëndësishme për Elbasanin dhe mbarë Shqipërinë, për ti thënë ndal situatës tepër të vështirë në të cilën e kanë zhytur vendin dhe cdo familje qeverisja aktuale, u tha gjatë takimit. Ndërkohë duke folur përpara qytetarëve kandidati Ardjan Turku, ka theksuar edhe njëherë faktin se bashkia aktuale me miliarda lekë në dispozicion ka menduar vetëm për qendrën e qytetit, duke braktisur çdo periferi të tij.

“Çfarë bëri Ardjan Turku, çfarë bëri Qazim Sejdini. Ju lutem, ju them që të gjithëve, kam qenë 3 vjet kryetar bashkie, i tillë ishte mandati, ka qenë 8 vjet kryetar bashkie, Sejdini, dy mandate me nga katër vjet. Kam menaxhuar në ato 3 vjet gjithsej 18 miliardë lekë të vjetra. Ndërsa Sejdini ka menaxhuar mbi 75 miliardë lekë të vjetra, sepse buxhetet iu shtuan. Dhe çfarë ka ndodhur. Ka ndodhur ajo që nga 1 maji deri tek stadium dhe nga tatimi, taksat, deri 300 metra pas pedagogjikes, vjet dhe sivjet janë hedhur mbi 15 miliardë lekë. Dhe po të fillosh nga këtu ku e kam lënë unë e tutje, të gjitha rrethinat e Elbasanit janë siç kanë qenë.

Njoftim për shtyp i Partisë Demokratike, 10 Qershor 2015

Kandidati i Partië Demokratike për Bashkinë Kavajë Engjëll Cara, shpalosi prioritetet e platformës së tij përpara banorëve të komunës Helmas. Prioritet, sipas z. Cara, do të jetë bujqësia dhe mbështetja e fermerëve, që të kontribuojnë në zhvillimin bujqësor, të kësaj zone. Gjithashtu, në projektin e tij zë një vend të veçantë edhe lufta ndaj atyre që në mënyrë flagrante, kanë uzurpuar tokat e fermerëve, duke shtuar që do të rishikohet nëse tokat janë ndarë ashtu siç e parashikon ligji.

“Bujqësia do t ketë prioritetin e buxhetit dhe të administratës së ardhshme të Bashkisë Kavajë. Subvencione për fermerët në nevojë. Do të ketë fond të veçantë nga Bashkia e Kavajës, 30% të fondit për bujqësinë do të jetë për subvencione, për njerëzit në nevojë, për fara, për pesticide. Do të bëjmë rivlerësimin dhe risistemimin e të gjitha sipërfaqeve të tokave. Aty ku ka abuzime dhe shkelje, marrim përsipër që gjithsecili, bazuar në ligjin që ka matur tokën, të marrë sasinë e duhur dhe të bëjmë njëherë e mirë ndarjen përfundimtare nga abuzuesit me tokat bujqësore, jo vetëm në këtë komunë, por në të gjitha komunat e Bashkisë së re të Kavajës”.

Gjithmonë në funksion të bujqësisë dhe banorëve, investime do të bëhen dhe në infrastrukturë, për të lehtësuar kështu lëvizjen e fermerëve dhe promovimin e produkteve të tyre, jo vetëm në fshatin e tyre, por edhe në fsharat e tjerë përfshirë dhe qytetin.

“Në investimet në buxhetin tonë i kemi të gjitha në funksion të banorëve. Infrastruktura, lidhjet fshat-qytet për të bërë të mundur transportin urban për të gjitha fshatrat do funksionojë një unazë në Bashkinë e re të Kavajës dhe shërbimi urban është projekti ynë për t’u zbatuar në 4 vitet e ardhshme”.

Njoftim për shtyp i Partisë Demokratike, 10 Qershor 2015

Vendimi i sotëm i Gjykatës së Lartë është një lajm i zi për vetë drejtësinë.

Thonë se në shtëpinë e të varurit nuk duhet të përmendet litari. Dhe litari që la jashtë sot Gjykata e Lartë me vendimin e saj të turpshëm, është një litar që kërkon të mbytë përfundimisht drejtësinë dhe të drejtat e qytetarëve shqiptarë. Që e keqja dhe e liga po çojnë vendin në një shteg që po mbytet.

Është një vendim i cili tregon për të gjithë shqiptarët standardin e rrënuar të kësaj Gjykate, të kapjes, të nënshtrimit dhe lakut që po mbyt drejtësinë dhe qytetarët dhe vendosjes së një regjimi autoritarist.

Vendimi i turpshëm i Gjykatës së Lartë sot, duke mbajtur të paprekur, të paprekshmit e urdhëruar personalisht me sms nga Rama për të dhunuar, ashtu si dhe vendimet e po kësaj gjykate për të dënuar eksponentët e lartë të Partisë Demokratike se preken me fjalën e lirë të paprekshmin Kryeministër, nuk kanë as për të intimiduar  opozitën, dhe për ta ndërprerë  betejën e saj për fjalën e lirë dhe dekriminalizimin pa kushte të parlamentit.

Beteja e opozitës do të vazhdojë më e fortë se kurrë sepse kapja e drejtësisë dhe nënshtrimi i saj është një lak që do mbysë qytetarët dhe demokracinë në vend, një lak që po tregon se vendin e demokracisë po e zë regjimi.

Këto vendime tregojnë qartazi gjendjen e rëndë në të cilën ndodhet drejtësia sot, e kapur, e nënshtruar, e urdhëruar dhe e vënë nën kontroll për ti shërbyer Kryeministrit dhe miqve të tij me rekorde të tmerrshme kriminale.

Tregojnë qartë se qytetarët nuk  mund të kenë asnjë shpresë më se drejtësia do jetë e paanshme, e pavarur dhe në shërbim të tyre dhe demokracisë, por po shkon drejt një drejtësie që i gjunjëzohet regjimit.

Të gjithë shqiptarët panë me zë dhe figurë se ishte personalisht Edi Rama ai që urdhëroi dhunën me sms, që ishin personalisht të paprekshmit e Ramës që zbatuan urdhërin dhe ushtruan një dhunë primitive ndaj deputetit dhe ja ku dolën të palagur. Çfarë mund të shpresojnë më qytetarët nga drejtësia, kur dhuna shfajësohet po të jesh në krah të Kryeministrit dhe fjala ndërshkohet po të jesh kundër tij?

Miliona shqiptarë janë dëshmitarë të këtyre skenave dhe vendimeve te turpshme që tregojnë qartë standardin e rrënuar dhe gjendjen e kalbjes së sistemit, të nënshtrimit të drejtësisë para urdhrave politikë të regjimit që po vendos Edi Rama.

Ky vendim i turpshëm, është edhe një thirrje më shumë që kjo mazhorancë që ka kapur çdo pushtet në vend, qe ka kapur drejtësinë dhe kërkon t’i hedhë lakun popullit duhet të marrë leksionin e duhur nga populli ne 21 qershor.

Edhe më i bashkuar edhe më i fortë do të jetë vendimi i shqiptarëve për të ndalur regjimin, të keqen dhe të ligën që po pushton vendin. Kanë mbetur më pak se dy javë.

Njoftim për shtyp i Partisë Demokratike, 10 Qershor 2015

Kandidatja për bashkinë e Durrësit, Grida Duma nisi prezantimin e programit në çdo lagje të qytetit dhe bashkisë së Durrësit. Ajo shpalosi programin në lagjen 18 të qytetit ku u shpreh se brenda 4 viteve qyteti do çlirohet dhe do hapen 15 mijë vende pune, do ulen taksat me 30 % dhe tarifat bashkiake nuk do jenë më shumë se 11 nga 24 që janë sot. Duma u shpreh se do zerohen faturat e ujit atje ku nuk ka ujë dhe brenda 6 muajve do ketë të paktën 3 herë ujë në ditë. Kandidatja e djathtë u shpreh se do ti jepet zgjidhje përfundimtare kanalizimeve si dhe do të 3 fishohet transporti publik duke futur edhe konceptin e biletës me orë.

“15 mijë vende pune në fund të katër vjeçarit. Çdo familje e bashkisë së Durrësit do ketë së paku një të punësuar. Do të shkojmë nga 24 taksa dhe tarifa që ka tani bashkia, ta çojmë në 11 tarifa. Ne do të kemi menjëherë një çlirim të ekonomisë së vogël dhe të mesme. Kam një detyrim moral për të vendosur drejtësi. Të gjitha faturat e ujësjellësit të cilat kanë ardhur si faturim 24 orësh kur treçereku i popullsisë nuk ka pasur ujë do rishikohen, dhe në rastet kur janë faturuar kur nuk ka pasur ujë, do ti zeroj të gjitha. 6 muaj do të mjaftojnë për rehabilitimin e situatës së ujit. Një vit e 8 muaj është projekti për të mbyllur gjithë rrjetin kanalizimeve, ndarjen e kanalizimeve të ujërave të zeza nga ato të bardha, pastrimin e kanaleve të mëdha dhe kthimin në zona të gjelbërta të kanalit të Kënetës dhe mbylljen e plotë të kanalit të Shkozetit. 3 fishim i transportit publik është plani brenda 2 muajve si dhe futja e konceptit të biletës me orë. Nëse ke paguar një biletë në orën 8 sigurisht ajo do të vlejë deri në orën 11 apo në zona të veçanta deri më 12 sepse s’mund të zbresësh nga një stacion në tjetrin dhe të presësh biletë. Gjithë bota ka biletën me orë dhe gjithë qyteti ka një transport publik”, tha Duma.

Kandidatja tha më tej se më 21 Qershor, qyteti do të çlirohet nga ankthi.

“Ky kryebashkiaku nuk ka ndonjë problem të madh me metrat katrorë të betonit. Ky, kur vjen puna për të regjistruar njerëz me ardh e me votu, ka për borxh të bëjë një kontratë qeraje që në 50 metra të jetojnë 75 veta. Kështu që koncepti i tij për hapësirën luan sipas interesit të tij për të vjelë e përfituar andej e këndej. Por sot ju siguroj një gjë, të gjithë këto tentativa më duken qesharake. Është komplet qesharake të mendosh që do arrish të tenderosh konsumimin e pushtetit, pengmarrjen e qytetit, varfërimin e qytetarëve me kështu makinacionesh të vogla të cilat nuk do të jenë asgjë përpata votës së madhe që do hedhim ne më 21 Qershor. Dhe sa herë i dëgjoj kam të njëjtën buzëqeshje se kuptoj se në çfarë ankthi është. Ai është në ankth të madh por duhet ta shpëtojmë edhe atë nga ky ankth dhe të fillojmë një rrugëtim”, tha Duma.

Ajo u ndal në veçanti në shkatërrimin e gjetjes së lagjes antike arkeologjike në ish Lulishten 1 Maji e cila u mbulua me beton.

“Miqtë e mi, lulishtja 1 Maji është e pakthyeshme. Është njësoj sikur kemi marrë pjesë në një nga varrimet më të mëdhaja të këtij qyteti. Kjo që është gjetur aty, që kur e shikojmë sot në foto drithërohemi, mund të ishte Pompei i Shqipërisë. Do të kishin ardhur nga mbarë bota të shikonin çfarë qyteti ishte aty poshtë. Dhe kjo është ajo sot aty. E ka murosur me beton. Të bëhemi bashkë, të mos pranojmë më asnjë milimetër të kësaj varrosje në çdo cep të këtij qyteti. Të dalë dhe të thotë më falni për këtë varrosje nën beton të shumicës së gjërave të rëndësishme, ai pikërisht atë që ëhshë mëkati i tij më i madh e propozon si projektin e tij më të madh”, tha Duma.

Një premtim i veçantë ishte edhe rehabilitimi i lagjes së ish të përdjekurve politikë.

“Kjo është një lagje e banuar nga përgjithësisht ish të persekutuar që gjithastu janë konsideruar të persekutuar edhe nga bashkia. Por kanë ideale dhe kanë arritur të mbrojnë që aty të mos u ndërtohej gjë me beton. Kur shkova aty më thanë; zonja Grida, e kemi ruajtur se e dinim  që dikush do e bënte për ne”, u shpreh Duma.

Njoftim për shtyp i Partisë Demokratike, 10 Qershor 2015

Kryetari i Partisë Demokratike Lulzim Basha zhvilloi takime elektorale në Pukë dhe Dajç. Në panikun e humbjes së zgjedhjeve, zoti Basha ka theksuar se dyshja Rama Meta kanë nisur presionin ndaj votuesve dhe përpjekjet për manipulimin dhe blerjen e votave. Por, zoti Basha deklaroi se fatin e kësaj beteje nuk e vendosin as kërcënimet e Edi Ramës, as paratë e pista të krimit, e vendos shpirti i lirë i njerëzve të lirë, e vendos trimëria dhe kurajo civile e qytetarëve e shqiptarë, e vendos gjykimi i urtë i shqiptarëve.

“Rama –Meta dhe makineria e tyre s’kanë lënë gjë pa bërë, që të mpijnë, të lodhin padurimin tuaj, vendosmërinë tuaj për të folur me votë në 21 qershor. Nuk kanë lënë gur pa lëvizur, me shantazhe, me sondazhe, me pazare, me kërcënime, me diversione. Kanë bërë gjithçka në këto 6 javë të fushatës por nuk ia kanë dalë dot. Nuk ia kanë dalë dot as ta trembin, as të na kërcënojnë, as ta ndalin vullnetin tuaj.”

Zoti Basha kërkoi votën masive të shqiptarëve kundër mashtrimeve dhe gënjeshtrave të certifikuara të qeverisë Rama-Meta, kundër përkeqësimit të gjithanshëm të jetës ekonomike dhe shoqërore, për shkak të keq qeverisjes, kundër poshtërimit, kundër shpërfilljes që u ka rezervuar kjo qeveri dhe përfaqësuesit e saj në çdo nivel dhe hap të pushtetit.

“Erdhën në pushtet, rritën taksat kur kishin premtuar uljen e tyre, rritën çmimin e energjisë, kur kishin premtuar uljen e tij, rritën kërbaçin mbi kokën e popullit dhe tani i gënjen mendja se kur në fakt bënë të kundërtën e asaj për të cilën ishin votuar, se mund të injorojnë votën popullore të 21 qershorit. U them sot nga Puka se vota e popullit është ligj dhe ligji do të zbatohet menjëherë, për uljen e taksave, për uljen e çmimit të energjisë, për faljen e kamatë-vonesave. Ky është ligji që ju ftoj ta votojmë dhe vulosim së bashku në 21 qershor” – theksoi zoti Basha.

Kryetari i Partisë Demokratike ftoi shqiptarët të votojnë në 21 qershor ofertën e PD për uljen e çmimit të energjisë me 25%, për faljen e kamatë-vonesave, për uljen e taksave në nivelin më të ulët në Ballkan, për rritjen e rrogave dhe pensioneve, për futjen në  listën e ndihmës ekonomike të gjithë atyre të hequrve  me të padrejtë dhe çdo kujt që e meriton.

“Me votën e 21 qershorit për PD, ne nuk do të presim por do të kërkojmë e do të çojmë deri në fund betejën tonë, deri në fitore, për uljen e çmimit të energjisë me 25% dhe faljen e kamatë-vonesave, për uljen e taksave dhe uljen e çmimit të naftës, për rritjen e rrogave dhe pensioneve, për rikthimin në listën e ndihmës ekonomike të të gjithë atyre që u hoqën me të padrejtë dhe çdokujt tjetër që ka nevojë, për trefishimin e buxhetit në ndihmë të bujqësisë e blegtorisë. Fitore, fitore, fitore!”

Njoftim për shtyp i Partisë Demokratike, 9 Qershor 2015

Rama asnjë strategji për luftën ndaj korrupsionit në drejtësi. Fsheh periudhën kur paguhej rryshfet për promovimet e gjyqtarëve.

Të dashur miq,

Reforma në drejtësi është një reformë jashtëzakonisht e domosdoshme për vendin dhe të ardhmen europiane të tij. Dje doli e qartë se Rama nuk ka patur në programin e vetë para 2 vjetësh asnjë strategji për reformën në drejtësi. Nuk ka patur dhe as ka sot pas 2 vjetësh asnjë program, asnjë vizion, asnjë strategji me plane konkrete, hapa konkrete, afate konkrete për luftën ndaj korrupsionit në drejtësi.
Gjatë 2 viteve ajo që Rama bëri ishte vetëm zëvendësimi I karrigeve në drejtesi duke vendosur aty militantët e PS-së, ish – pushtetarë të PS-së dhe ish gjyqtarë të diktaturës.
I vetmi lajm që shpërndau nga aktiviteti në mediat pranë tij ishte se gjyqtarët kanë paguar rryshfet për promovimin e tyre, duke fshehur kohën kur kjo ndodhte.
Me presidencën e Nishanit mori fund njëherë e mirë periudha e rryshfeteve për promovimin e gjyqtarëve. Presidenti Nishani i hoqi një njollë të madhe drejtësisë me ndershmërinë dhe përkushtimin e tij.
Por papagalli fshehu kohën kur kjo ndodhte sepse e ka tashmë në prehër të akuzuarin ndërkombëtar për rryshfetet në drejtësi.

Njoftim për shtyp i Partisë Demokratike, 9 Qershor 2015

Bashkëbisedim i kandidatit për kryebashkiak, Halim Kosova, në aktivitetin e organizuar nga Dhoma Amerikane e Tregtisë  

Zhvillimi ekonomik dhe roli i qeverive lokale në nxitjen e rritjes ekonomike është duke u ripërcaktuar ne gjithë botën. Cila është strategjia juaj për promovimin e zhvillimit ekonomik lokal? Cilat do të jenë dy inisiativat tuaja prioritare për të krijuar vende pune dhe për të tërhequr investime në Tiranë?

Në 2011 punësimi dhe zhvillimi ekonomik nuk konsideroheshin si prioritete. Në këto 4 vite filloi një eksperiencë e mirë me heqjen e taksave dhe tarifave dhe fondin e garancisë, por në këtë periudhë ka nevojë të bëjmë më shumë.

Unë kam dy fusha ku dua të fokusohem: Ulja e taksave dhe bërja e një mjedisi miqësor ndaj bizneseve, zgjerimi i skemës së fondit të garancisë dhe investimet publike në infrastrukturë, arsim, etj. Investimet strategjike me Bulevardin dhe Stacionin Multimodal ku nëpërmjet Partneritetit Publik Privat do të stimulohen bashkëpunime me investitorë strategjikë.

Tirana është shtëpia e pak kompanive shumëkombëshe. Cilat janë pengesat kryesore për tërheqjen e investimeve të huaja në Tiranë? Çfarë do të bëni ju si Kryetar i Bashkisë për ta bërë Tiranën më mikpritëse për biznesin dhe për të informuar kompanitë e huaja që Tirana është e hapur për biznes?

Klimë miqësore dhe trajtim i barabartë për këdo (One stop shop). Plani urban do jetë udhërrëfyes dhe mbrojtës i interesave si të bizneseve dhe të pronarëve. Do udhëheqë investimet në qytet dhe do ndihmojmë të zhvillojmë zona të prapambetura. Do shkoj kudo për të gjetur vende të reja pune, e do shkoj kudo për të tërhequr investime të huaja.

Do ta bëjmë Tiranën qytet model për shërbimin/pastrimin me standarte të BE. Arsimi dhe vetëm arsimi do të ndihmojë që të gjitha këto të bëhen realitet, që ju të keni një forcë pune të kualifikuar e që Shqipëria të konkurojë në rajon e më gjërë. Për këtë arsye arsimi është një nga prioritetet e mia.

Partneriteti Publik Privat (PPP) mund të ofrojë mundësi për të krijuar vende pune dhe për të përmirësuar ofrimin e shërbimeve publike. Si Kryetar i Bashkisë, do të jeni një avokat i PPP-ve? Ju lutem, identifikoni dy shembuj të PPP-ve që ju besoni se janë premtuese për Tiranën dhe qytetarët e saj.

Unë e di që një pushtet lokal nuk i bën dot të gjitha vetë dhe për këtë arsye do kem nevojë për ju. Shumë nga shërbimet e bashkisë mund të ofrohen në bashkëpunim me privatin, si manaxhimi mbetejeve (23.7 mln euro investim) dhe Terminali multimodal (50 mln euro investim).

Çfarë propozimesh do të bëni ju si Kryetar Bashkie për menaxhimin dhe mbledhjen e tatimit mbi pronën në Tiranë? Cilat mendoni se do të jenë zërat e fuqishem që do të sigurojnë të ardhurat e bashkise tani që të ardhurat nga taksat e biznesit të vogël kanë rënë ndjeshëm?

Po, ashtu si dhe ju dhe unë e di dhe jam i ndërgjegjshëm që qeveria i ka rritur taksat dhe sidomos ato që prekin bizneset tuaja.  Jam në dijeni dhe që ju keni kërkuar ndryshimin dhe uljen e tatimit mbi fitimin, tatimin mbi të ardhurat e dividentit dhe ju jap fjalën këtu që si kryetar bashkie do të mbështes cdo lloj iniciative që ju do të propozoni dhe që do të jetë në shërbim të rritjes së vendeve të punës. Për këtë arsye unë dua të ul çdo taksë lokale si taksa e biznesit të vogël (por që ju nuk ju prek), por dhë një rikonceptim të taksës së pronës me vlerë dhe jo me vit ndërtimi që të ketë një vlerësim të drejtë të investimit tuaj. Për taksën e pronës do të krijoj një databazë të lidhur me hipotekën dhe regjistër ku të kemi një inventar të saktë të cdo prone për të pasur baraziz dhe jo selektivitet në pagesa.

Unë dua që Tirana të jetë konkuruese dhe do bëj të mundur që të ketë barazi ndërmjet jush ku disa paguajnë dhe disa jo. Me mua nuk ka selektivitet. Jam dhe në dijeni që qeveria ka dështuar në mbledhjen e taksës së biznesit të vogël, për këtë arsye do të kërkoj që kjo taksë të manaxhohet nga bashkia dhe me uljen e saj rreth 5000 biznese të vogla që janë mbyllur të riaktivizohen e të hapen. Unë do ti bëj kryeministrit dhe një propozim të veçantë ku do të kërkoj tax share (përqindje të taksave) nga ajo që ju paguani në qeveri, ti kalojë bashkisë sepse ju investoni në këtë qytet, punoni në këtë qytet dhe unë dua që dhe shërbimet bashkiake të jenë në nivelin e investimit tuaj, shërbim dinjitoz.

Tirana e re, si rezultat i Reformës Territoriale, do të rritet në madhësi dhe në popullsi dhe do të behet më i vështirë dhe më i komplikuar menaxhimi i saj. Territori i Tiranës do të rritet nga 42 kilometra katrorë në 1100 kilometra katrorë. Trembëdhjetë komuna do të bëhen pjesë e Bashkisë së Tiranës, duke përfshirë edhe komunat rurale si ajo e Krrabës dhe e Shëngjergjit. Si Kryetar Bashkie, çfarë do të bëni për të siguruar që të gjitha zonat e Tiranës së re do të përfitojnë nga shërbimet e përmirësuara? Si do të përfshini të gjithë qytetarët në procesin e vendimmarrjes? Çfarë hapash do të ndërmerrni për të patur aktivitet ekonomik në të gjitha zonat e Tiranës së re?

Një sfidë e veçantë do të jetë zhvillimi urban. Së pari harrojeni që me mua të fillojë çdo gjë nga zero. Unë do marr cdo gjë të mirë të këtyre 4 viteve e cdo gjë të mirë të 11 viteve më parë e ta vazhdoj. Historia nuk fillon me mua.  Për mua nuk do të ketë selektivitet në dërtim, plani ka rregulla dhe unë do ti zbatoj. Plani është ndërtuar me konsulencë, gjithëpërfshirje. Politikani tipik fillon cdo gjë nga 0 unë jo.  Ju nuk keni kohë për të humbur që ksuhdo që vjet si kryetar bashkie të fillojë të ndryshojë me vite të tëra planin urban. Ne më në fund e kemi një plan urban.  Ajo që unë do bëj është integrimi i planeve urbaneve të Tiranës me komunat dhe krijimi i një plani të integruar zhvillimi. Duke përdorur më të mirat e eksperiecnën e të gjithëve. Të majtë e të djathtë. Unë nuk jam politikan i betonit, e as më duhet të jap leje ndërtimi për të siguruar votat në parti sic ka qënë bërë më parë, unë kam primar interesin e qytetarëve, pronarëve por dhe dua që bzinesei të punojë. Më duket absurde bllokimi nga ana e qeverisë e lejeve të ndërtimit sepse ju ka penguar ju të punoni. Së dyti do të ketë: Aftësi manaxheriale dhe trajtim i barabartë për këdo.  E njëjta cilësi shërbimi do të jetë si në qëndër a periferi, infrastrukturë, arsim etj. Do të bëj të mundur stimulim me taksa të ulëta të zonave periferike ku të sjellim zhvillim. Do të ketë administrator lokalë me detyra të përcaktuara dhe publikuara si dhe vizita periodike në çdo njësi të Tiranës së re.

Punët krijohen kur një qytet ndërtohet mbi avantazhet e tij konkurruese, duke mbështetur zhvillimin e industrive të telekomunikacionit, arteve, turizmit, prodhimit dhe industrive mjedisore. Çfarë avantazhesh konkurruese ka Tirana dhe çfarë industrish do të shihni ju si objektiva për zhvillimin ekonomik? Çfarë veprimesh do të ndërmerrni për të mbështetur këto industri? Sot 40% e ndërmarrjeve janë në fushën e tregtisë, dhe vetëm 7% e totalit kanë më shumë se 4 të punësuar. Si do e orientoni kalimin e ekonomise se Tiranes drejt bizneseve më të qëndrueshme, përtej tregtisë dhe vetëpunësimit, qe do te siguronte zhvillim të qëndrueshëm?

Tirana ka avantazhe e saj konkuruese dhe unë mendoj që nuk duhet të kemi luftë ndërmjet qyteteve në Shqipëri.  Në një ekonomi globale ne konkurojmë jo vetëm në rajon por dhe në Europë. Unë kam menduar të stimuloj disa sektorë si: Ringritja dhe mbështetja e prodhimit artizanal dhe i produkteve karakteristike të Tiranes, duke fuqizuar markën Tirana si një destinacion turistik dhe kulturor rajonal e ballkanik dhe krijuar mbi 5.000 vënde pune në turizëm dhe agro-biznes.  Bizneset e reja që punësojnë mbi 50 persona u hiqen taksat vendore katër vitet e para.  Diferencim i taksës së ndërtimit (më e ulët në zonat më pak të zhvilluara për të orientuar investimet atje). Përdorimi me efektivitet i fondeve publike dhe krijimi i 8.000 vënde pune si rezultat i investimeve të bashkisë në infrastrukture. Ulja e taksave dhe stimulimi i biznesit duke krijuar 7.000 punësime nga incentivët dhe projektet e Bashkise me sektorin privat apo promovimi i investimeve. Fondi i grancisë prej 15 mln usd ku prioritet do të kenë bizneset në teknologjinë e informacionit dhe sipërmarrjet e të rinjve. Ristrukturimi dhe vënia në dispozicion i aseteve të bashkise për veprimtari prodhuese nëpërmjet Partneritetit Publik Privat, krijimit e zonave të lira ekonomike me incentiva fiskale e administrative etj.   Ndërtimin e 8 tregjeve të reja me një kapacitet total prej 450 vendësh, sipas standardeve të higjienës më të larta dhe traditës lokale me qëllimin kthimin e tyre në një destinacion turistik dhe rivitalizimin e tregtisë: Futjen e fermerëve dhe të sipërmarrësve rurale në skemën financiare të Bashkisë Tiranë (15 milion euro) si një mënyrë për të nxitur punësimin dhe zhvillimin rural në të gjithë territorin: Shitje të produkteve lokale nëpërmjet një promovimi më cilësor, krijimit të 13 pikave të grumbullimit por dhe nëpërmjet tregjeve të lëvizshëm dhe lokale për fermerë të grupuar sipas zonave; Mbështetje në promovimin dhe blerjen e produkteve bujqësore lokale nga rrjetet e restoranteve në Tiranë (çerdhe etj.) duke ndihmuar direkt zhvillimin e ekonomisë lokale.

Njoftim për shtyp i Partisë Demokratike, 9 Qershor 2015

Kandidatja për bashkinë e Durrësit, Grida Duma bashkëbisedoi me banorët e zonës së Spitallës ku u zotua se do të çlirojë qytetin nga pengmarrja e kryebashkiakut Dako për ti dhënë shans të gjithëve. Duma tha se modeli i saj është hapja e shanseve për të gjithë dhe jo për një grup prej 5 njerëzish dhe se modeli i saj do të hapë 15 vende pune.

“15 mijë vende pune vijnë nga shanset që i jep qeverisësi dhe vijnë nga shanset e dhëna dhe jo të munguara. Dhe vijnë nga fakti që ti nuk e privatizon me 5 vetë por hap tregun për 500. Vijnë nga shanset që; ul taksat zotëri se i ke tmerruar bizneset me taksa të dyfishta më të larta se Tirana dhe me frikën se duhet të mbyllin derën se i vijnë tatimet ditën e zgjedhjeve. Duhet sqaruar që 15 mijë vende pune do krijohen me Grida Dumën sepse do çlirohet qyteti. Do çlirohet nga taksat dhe do ti shkojmë në kurifin minimal të taksave”, tha Duma.

Kandidatja e djathtë u zotua edhe për normalizimin furnizimin me ujë të pijshëm brenda 6 muajve, ndërtimin e 4 shkollave në këtë zonë si dhe gjelbërim dhe parqe për fëmijët në çdo lagje.

“Në 6 muajt e ardhshëm, 3 herë në ditë furnizim me ujë në gjithë bashkinë e Durrësit sepse s’mund të jetë qytet turistik dhe të mos ketë ujë. Kjo është një nga zonat bashkë me Kënetën pak më poshtë ku janë projektuar ndërtimi i 4 shkollave. Njëra do të jetë gjimnaz siç është tani projekti dhe 3 tjerat do jënë shkollë dhe kopësht, sepse ka nevojë edhe për kopësht sepse po i çojnë fëmijët vetëm në privat. Në të gjitha rastet shkolla, të treja këto që do të jenë të reja, do të shërbejnë edhe si një qendër pasditeje për palestrën, për fushën e sportit për komunitetin. Të gjitha lagjet me kuartalle duke i vendosur një parametër ku do të ketë minimalisht një deri në dy miniparqe për fëmijët, në një hapësirë prej 4 mijë metrash katrorë, tha Duma.

Njoftim për shtyp i Partisë Demokratike, 9 Qershor 2015