Blog

Erion Veliaj po përsërit PREMTIMET e pambajtura të dy viteve më parë, veçse kësaj radhë me ambalazh për Tiranën. Edhe në 2013 Erioni PREMTOI: “Të paktën 150,000 vende te reja pune nga zhvillimi i bujqësisë, blegtorisë dhe aktiviteteve të tjera rurale.”

Ku janë 150,000 vendet e reja të punës në bujqësi dhe blegtori? Erioni ishte Ministri përgjegjës për t’a realizuar këtë PREMTIM. Ai kishte plot 40% të buxhetit të shtetit për të realizuar këtë dhe dhjetëra premtime të tjera që po ia përmendim çdo ditë. Erioni PREMTOI por MASHTROI.

MASHTROI prapë para 2 javësh kur tha se ishin hapur vende pune por se sipas tij “Shqiptarët ishin dembelë”. Por MASHTRIMIN e tij e përgënjeshtrojnë Sigurimet Shoqërore të qeverisë, si edhe INSTAT-i i vetë qeverisë që tregoi se këto dy vite papunësia është rritur me 7%!

Erioni prapë PREMTON veç për të marrë pushtet dhe nuk e ka problem t’i MASHTROJË sërish qytetarët sapo ta ketë pushtetin.

Ka dy javë që çdo ditë po i kujtojmë Erionit nga një tjetër PREMTIM të thyer dhe nga një tjetër MASHTRIM, sepse votuesit nuk do të MASHTROHEN përsëri.

Çdo ditë PREMTIMET e pambajtura do postohen në faqen e internetit: www.drejtimiiduhur.al

Deklaratë e deputetes së Partisë Demokratike, Albana Vokshi, 22 Maj 2015

Përshëndetje miq 

Të dashur demokratë dhe demokrate, zonja dhe zotërinj, bashkëqytetarë të mi kudo ku jeni,

Të nderuar kandidatë të Partisë Demokratike,

Të nderuar deputetë dhe drejtues të Partisë Demokratike,

Të nderuar drejtues dhe përfaqesues të Alencës Popullore për Punë dhe Dinjitet,

Motra dhe vellëzër,

Zonja dhe zotërinj,

Jemi bashkuar sot në këtë hapje të mrekullueshme të fushatës për startin final të maratonës tonë politike, e cila është ne fakt maratona e çdo qytetari të këtij vendi që kërkon shpresë, punë dhe dinjitet.

Nisemi sot drejt  zgjedhjeve të 21 qershorit  plot me  besim dhe bindje për një punë të madhe:

Të ndalim me votë marshimin e të keqes, të flakim me votë pasigurinë, varfërinë dhe papunësinë që  kanë pllakosur dhe ulur në gjunjë shumicën dërmuese të shqiptarëve.

Të kthejmë në jetë, me votë të lirë, shpresën e  tyre të plagosur rëndë.

Të çelim me votë një përpektivë të re të ringritjes dhe përmirësimit ekonomik dhe shoqëror për çdo familje dhe individ.

Të fitojmë me votë dhe të fillojmë me votë një histori të re të demokracicë së re, të qeverisjes  me qyetarët, pranë qytetarëve dhe për qytetarët.

Nisemi sot me problemet e mëdha që ka vendi dhe shoqëria shqiptare, duke i parë drejt në sy, duke i ndjerë  thellë në shpirt si një kushtrim detyre.

Ndajmë sot bindjen tonë me të gjithë bashkëqytetarët tanë:  ka shpëtim dhe shpëtim ofrojmë,  ka  rrugëdalje dhe rrugëdalje propozojmë,  ka  zgjidhje dhe zgjidhje do të japim.

Papunësia, varfëria, pasiguria, përkeqësimi i panderprerë, eksodi dramatik i njerezve, largimi i investimeve dhe kapitalit si të ketë rënë zia e luftës, të gjitha këto nuk janë fatalitet, por  janë  produkti, marka,  damka e qeverisë Rama-Meta.

E kemi treguar dhe prapë do të tregojmë se dimë t’i japim vendit zhvillim dhe mirëqenie. Me  këtë bindje të thellë,  me historinë  tonë më të mirë, me reflektimet tona të vërteta, me përtëritjen tonë që vazhdon,  me bashkimin dhe ribashkimin tonë që forcohet e zgjerohet çdo ditë, ne demokratët nisemi sot  për zgjidhjen dhe me zgjidhjen që duan dhe meritojnë qytetarët: punë, dinjitet, mirëqenie dhe respekt!

Me votë, me votë, me votë! Kjo është thirrja e ditës për demokratët, për opozitarët, për të gjithë shqiptarët, të djathtë e të majtë, që ndajnë me ne shqetësimet dhe alarmin për paaftësinë dhe papërgjegjshmërinë flagrante të qeverisë Rama-Meta, për kursin e saj të gabuar, për bilancin  e saj të dështuar, për orekset e  saj  të shfrenuara për të sunduar kudo dhe mbi çdo gjë.

Me votë t’i ndalim, me votë t’u kthejmë reston e gënjeshtrave dhe mashtrimeve, me votë t’u japim hakun e merituar që tjetër premtuan e krejt tjetër gjë bënë. Me votë t’jua shfryjmë arrogancën dhe arbitraritetin që ua ka sjellë njerëzve në majë të hundës.

Me votë të vendosim ekuilibrin jetik të pushtetit qendror me pushtetin vendor. Me votë të   krijojmë një pol fuqie, të opozitës dhe qytetarëve pa dallime politike, një pol fuqie qytetare që do të diktojë menjëherë me forcën e shumicës uljen e çmimit të energjisë elektrike, faljen e kamatvonesave për energjinë elektrike dhe ujin e pijshëm, uljen e çmimit të karburantëve, uljen e taksave për familjarët dhe sipërmarrjen, ulje taksash dhe mbeshtetje për  biznese që punësojnë të rinjtë, mbeshtetje për biznese qe hapen nga gratë, uljen e tarifave për studentët dhe rihapje te filialeve te universitetve publike,  rritjen e rrogave dhe të pensioneve, subvencione për bujqesinë, rikthimin në listën e ndihmës ekonomike të të gjithë atyre që janë hequr me pa të drejtë apo që kanë nevojë për të, heqjen e tvsh për mallrat e shportës dhe orientimin e parave publike drejt investimeve që krijojnë punë dhe zhvillim.

Me votë të shpëtojmë pushtetin vendor nga rreziku evident i aneksimit dhe asgjësimit të plotë.   Me votë t’u japim autoritetin  të zgjedhurve  vendorë, të mos rrinë duke  pritur me sytë përpjetë lëmoshën e qeverisë që nuk do të vijë kurrë për shkak të rënies marramendese të  ardhurave në arkën e shtetit, por të rrisin dhe menaxhojnë me profesionalizëm e përgjegjësi  të lartë burimet e mëdha në bashkitë  që do të drejtojnë.

Të dashur qytetarë shqiptarë,

Në detyrën tonë fisnike si opozita e vendit, ne kemi denoncuar zinxhirin e skandaleve qeveritare, kemi qarë hallet, kemi shkëmbyer mendime dhe propozime me ju në një bashkëbisedim të hapur e të pandërprerë.

Ne kemi thirrur protesta dhe marshime popullore, ju kemi prirë atyre, për t’i kërkuar qeverisë të zbrapsej nga rritja e taksave dhe e çmimeve që kanë thelluar papunësinë, varfërinë dhe pasigurinë në vend. Por ne kemi ofruar edhe alternativën tonë duke sjellë në parlament për votim amendamentet tona për të ulur çmimin e energjisë dhe të naftës, për të hequr tvsh mbi mallrat e shportës që do të ndihmonin mijëra familje që mezi mbyllin muajin, për të rritur rrogat dhe pensionet, për të mbështetur shtresat në nevojë, për të ulur taksat e sipërmarrjes që të hapë më shumë vende pune në vend që t’i mbyllë ato. Kemi vazhduar dhe do të vazhdojmë përballjen tonë, misonin tonë si opozitë, por edhe si alternativa juaj.

Më 21 qershor është radha juaj. Më 21 qershor fjalën dhe fuqinë e keni ju. Zgjedhjet janë  gjykimi suprem i qytetarëve, zgjedhjet janë zgjidhja, janë vendimi që marrin qytetarët për veten e tyre, janë shpëtimi nga morsa e të keqes që po ju merr frymën, janë frymëmarja e demokracisë.

Unë jam i bindur, se qytetarët shqiptarë janë përgatitur të marrin një vendim të mençur e të drejtë në zgjedhjet e 21 qershorit:  të ngrenë zërin, të dëgjohen, të reagojnë, t’i japim një mesazh të madh e të bashkuar, një mësim për tu mbajtur mend dyshes Rama-Meta.

T’i japim një shans ofertës tonë të re, t’i japim jetë alternativës tonë, të votojnë masivisht kandidatët e Partisë Demokratike, kandidatët e opozitës.

Kudo halle-halle, gjithkush hallin e tij, askush pa halle që vetëm shtohen. Nëse do të duhet të vemë gishtin apo të zgjedhim dy prej halleve më të mëdha të shqiptarëve në qeverisjen e dyshes Rama-Meta, ato janë, pasiguria dhe varfëria.

Pasiguria përgjon si “bisha” ditën dhe natën e shqiptarëve. Pasiguria i ka bërë me hije njerëzit. Pasiguri për punën, për rrogën, për jetën, për familjen, për pronën, për pensionin, për shëndetin, për bukën e fëmijëve, për shkollimin e tyre, për  të nesërmen.

Të pasigurtë  janë sipërmarrësit e  shtrënguar në  darën e katërfishtë të taksave të larta, të  kredive  me probleme dhe interesave të larta bankare, të  konkurencës së pandershme dhe  arbitraritetit qeveritar, që  vetem merr  dhe nuk jep asgjë  në shkëmbim, që vetëm  shtrëngon, vetëm bllokon, vetëm ndalon,  siç është  rasti i ndalimit kolektiv  të industrisë  së ndërtimit për teka dhe interesa korruptive dhe klienteliste të dyshes Rama-Meta, duke  hedhur në rrugë mijëra  punëtorë dhe profesionistë të sektorit.

Mijëra sipërmarrje kanë falimentuar. Ata që nuk janë rrëzuar akoma mezi e shtyjnë. Frika e falimentimit i ndjek si hije, ndërsa e dinë se duhet të luftojnë orë e çast betejën e egër të  mbijetesës me  qeverinë që punon kundër tyre.

Të pasigurtë janë fermerët, blegtorët, tregëtarët, prodhuesit e vegjël e të mesëm, bizneset e shërbimeve, të artizanatit të cilët përveçse nga taksat e larta dhe konkurenca e pandershme, janë  goditur nga rënia e pandalshme  e konsumit.

Reaksionit zinxhir të përkeqësimit nga rënia e konsumit nuk i ka shpëtuar askush. “16 milion lekë humba sivjet, siç nuk më ka ndodhur kurrë gjatë njëzet viteve”, me shkroi pak ditë pas vitit të  Ri  Maksi,  një rritës i gjelave të detit. “Shitjet ranë përtokë, njerëzit nuk kishin lekë. Para dy vjetësh shisja dy viça në ditë”, më tha një kasap në Korçë. “Tani mezi shes një në javë”. Pak ditë më parë hyra në  lokalin e një këpucari në Shkodër. Ty së paku nuk të ka prekur kriza, i thashë, pasi njerëzit që nuk blejnë më këpucë vijnë për t’i riparuar. “Jo prekur, por rrënuar”, m’u përgjigj, duke më treguar raftin plot me këpucë të riparuara.  “I lënë me muaj e me muaj pa i marrë sepse nuk kanë për të paguar”. “Familja ime emigroi,- më tha një zonjë në Kukës, sepse nuk na jepnin më as veresie se e dinin se nuk kishim me çfarë t’i paguanim”.   Shembuj të tillë të mëdhenj dhe të vegjël krizës dhe përkeqësimit janë më mijëra çdo ditë, në çdo qytet dhe fshat të vendit, në çdo sektor.

Të pashpresë dhe të dorëzuar janë ata që nuk kanë punë.

Pasiguria iu rri si çekan mbi kokë edhe atyre që kanë një punë në sektorin privat, tek presin me zemër të ngrirë mos do t’i kapë gërshëra e shkurtimeve për shkak të taksave të larta. Njëlloj edhe atyre në sektorin publik që nuk kanë asgjë të garantuar në sistemin klientelist të dyshes Rama-Meta e cila i rrëzoi standartet europiane të nëpunësit civil.

Pasiguria është kthyer në ankthin kolektiv të shqiptarëve.  Të pakët janë ata që kanë një pronë, një status, një biznes, një punë apo një aktivitet për të cilin nuk kanë pasiguri se do t’u zhvlerësohet, do t’u pakësohet,  do t’u rrudhet, do ta humbin apo do t’u merret fare në kandarin spekulativ të qeverisjes Rama-Meta.

Shqipëria demokratike ka ardhur nga rregjimi i varfërisë proverbiale. Lufta kundër varfërisë ka qenë dhe mbetet një nga sfidat më të mëdha që duhet të përballojë çdo qeveri.

Po çfarë bënë këta që erdhën me tam tame të mëdha dy vjet më parë? Çfarë guri vunë, çfarë shenjë lanë këta në këtë sfidë  të madhe?

Këta po e kthejnë vendin dekada prapa, në mos më keq. Këta e shndërruan varfërinë në epidemi. Varfëria është epidemia e ditëve tona, siç nuk ka qenë ndonjëherë gjatë dy dekadave të fundit.

Pasqyra e saj tronditëse janë listat e dyfishuara në dyqanet ushqimore, është rripi i shtrënguar për qindra mijëra familje që nuk mbyllin dot muajin, janë sytë e ulur përdhe të prindërve para fëmijëve, janë eksodet e reja të shqiptarëve në kërkim të bukës së gojës.

Çfarë ndodhi?  Cili është shkaku? Qeverisja e dyshes Rama-Meta. Ky është shkaku.

Taksa të larta në kohë krize- këta i vunë.

Rritje të çmimit të energjisë elektrike në kohë krize- këta e bënë.

Mbifaturime dhe kamatvonesa në kohë krize- këta i sollën.

Dajakun e shtetit në kohë krize – këta e ngriten.

Shpenzime luksi,  investime luksi dhe korrupsioni  në kohë krize – këta  po bëjnë.

Pasurimin në kohë krize – këta po venë si  oligarkë të vërtetë.

E kam uruar me zemër dhe publikisht që qeveria të krijonte 300 mijë vende pune, të sillte shëndetësi falas, të ulte taksat, të ulte çmimin e energjisë, të ndikonte në uljen e çmimit të ushqimeve bazë, të bënte legalizimet falas.

Pra të mbante premtimet, të respektonte kontratën me të cilën erdhi në pushtet, si i vetmi burim morali e legjitimiteti që mban në këmbë një qeveri.

Por në të vërtetë, ekonomia u përkeqësua në çdo drejtim. Papunësia është rritur me 7 përqind. Çmimi i energjisë është më i shtrenjtë. Tarifat e arsimit janë shtuar. Çmimet e larta të ushqimeve po torturojnë sot qytetarët. Nafta është më e shtrenjta në rajon. Biznesi i vogël është drejt falimentimit. Shëndetësia në ditën më të keqe. Borxhi kombëtar u rrit me 700 milionë dollar.

Pagat e pensionet nuk janë ngritur asnjë qindarkë.

Fatkeqësisht, ky është realiteti klithës, që e shohim sot tek çdo i ri që ka humbur shpresën, tek çdo kryefamiljar që shkon kokëulur në shtëpi se nuk ka çfarë tu japë fëmijëve, tek çdo i moshuar i këtij vendi që nuk shlyen dot më faturat.

I mbani mend listat e borxheve që Edi Rama rrëmonte nëpër dyqane për t’i gjetur e nxjerrë para kamerave? Sot janë dyfishuar.

E mbani mend kur u thoshte të rinjve që do u jepte mundësi për punë e do i largonte nga bastet? Sot nuk kane lekë as për baste.

A ju kujtohet kur u thoshte fermerëve, do të rri në fushë me ju, derisa të prodhoni e shisni. Prej dy vitesh s’ka më asnjë subvencion, i marrin një dorë miqsh të lidhur me qeverinë. Po naftën që ua premtoi se do ta ulte, çfarë bëri?  Sot është më e shtrenjtë se kurrë më parë.

Nuk është kjo një kronikë e një zone, e një qyteti apo një fshati ku ka rënë një mallkim. Eshtë ajo çfarë po ndodh nga Shkodra në Vlorë, nga Durrësi në Dibër. Kudo në çdo cep të Shqipërisë.

4 kokrra vezë në këmbim të një kile sheqer për fëmijën e sëmurë. E keni parë dhe e keni dëgjuar të gjithë këtë rast.

E keni degjuar për atë nënën në Korçë që i ra të fikët se kishte tre ditë pa ngrënë e kishte vetëm 200 leke te vjetra e nuk dinte c’tju blinte fëmijëve të saj.

Kjo është një dramë e përditshme dhe e përnatshme në jetët e njerëzve. Por qeveria nuk ndalet asnjë ditë të vetme. Nuk reflekton. Dhe në vend të punës, i shpenzon energjitë duke sulmuar opozitën.

Do të ishte tjetër Shqipëria, do të ishte ndryshe gjendja në vend, nëse Edi Rama do të luftonte varfërinë, me të njejtin zell që më lufton mua.

Do të uroja që me të njëjtin pasion që sulmon opozitën, të sulmonte papunësinë.

Që me të njëjtën forcë që sulmon e përbalt e fajëson këdo përveç vetes së tij, të ofronte zgjidhje për ju, për të ulur çmimet, për të ulur taksat, për të rritur rrogat dhe pensionet.

Do të uroja shumë që me atë inat që i sulet opozitës, ti sulej korrupsionit dhe abuzimit qeveritar.

Me lejoni të tërheq vemendjen tuaj tek një fakt i muajve të fundit: të ardhurat doganore dhe tatimore në Shqiperi janë në rënie pikiatë nga një muaj në tjetrin. Marsi më keq se shkurti, prilli më keq se marsi, maji do të jetë më keq se prilli. Taksat dhe akcizat i kanë rritur në qiell, e prapëseprapë mbledhin  më pak. Mbi 100 milion dollarë i mungojnë arkës së shtetit vetëm këto katër muaj.

Çfarë ndodh, ku shkojnë këto para që i mungojnë ekonomisë, u mungojnë rrogave dhe pensioneve, i mungojnë ndihmës sociale, u mungojnë detyrimeve që ka shteti ndaj shtresave që presin kompensim, i mungojnë shkollës dhe shëndetesisë.

Miliardat e munguara në arkën e shtetit i vjedhin oligarkët. Kjo është oligarkia Rama-Meta që  pasurohet me paratë e qytetarëve, që kërkon të kontrollojë në çdo gjë,  në çdo qytet, në çdo lagje, në çdo fshat, në çdo familje.

Po ta lëmë ne.. Por ne nuk do ta lemë, rinia nuk do ta lerë, demokratët nuk do ta lënë, opozita nuk do ta lerë, qytetarët e lirë nuk do ta lënë.  Doganat e Shqipërisë nuk janë trarë kaçakësh por janë pasuri e gjithë shqiptarëve, territori kombëtar është pasuri e gjithë shqiptarëve, financat publike janë pasuri e gjithë shqiptarëve, pavarësisht se në to kanë futur duart e rënda e të gjata.

Rama-Meta janë kokë e këmbë brenda në këtë megavjedhje. Për të mbushur këtë gropë të zezë, për të kompensuar grabitjen e miliarda lekëve nga oligarkët e qeverisë, ata kanë ngritur kërbaçin kundër qytetarëve të thjeshtë, po u kruajnë xhepat qytetarëve të thjeshtë, kanë mbushur burgjet me qytetarë të thjeshtë për t’u marrë kacidhen e fundit.

Me varfërimin e popullit mbulojnë miliardat e vjedhura. Ky është thelbi i tyre. Ky është shpjegimi pse nuk kanë me se blejnë qytetarët, pse ka rënë konsumi, pse Shqipëria e qeverisë Rama-Meta shtyn ditët duke marrë borxh dhe duke ngrënë veten e saj. Haka e popullit do t’i zerë. Jo kjo haka e fjalës, jo haka e mallkimit.  Haka e votës, sepse vota zë tamam, vota bën drejtësi, vota jep zgjidhje.

Zonja dhe zotërinj,

Ne, opozita, kemi ngritur zërin, kemi denoncuar, kemi thirrur protesta dhe marshime popullore. Por nuk jemi mjaftuar me kaq. Ne kemi ofruar alternativën tonë. Kemi bashkëbiseduar me qytetarët, jemi ulur me grupet e interesit, kemi propozuar zgjidhje.

Kemi propozuar në Parlament 36 amendamente, për uljen e taksave, për heqjen e akcizës së naftës për bujqësinë, për heqjen e TVSH për produktet e shportës, për uljen e çmimit të naftës dhe energjisë, për mosrritje taksash, për rritje të investimeve në sektorët e zhvillimit, për rritjen e pagave dhe pensioneve.

Kemi insistuar në këto amendamente, edhe pse përballë kishim një mur të pandjeshëm, të verbër e të shurdhër ndaj qytetarëve. Për fat të keq, Rama dhe Meta refuzuan. Per fat të keq, ata zgjodhen të votojnë kundër. Në fakt është refuzuar qytetari. Sepse refuzim i qytetarit është, kur nuk pranon ti gjendesh në krah të përmirësosh jetën e tij.

Për fatin e keq të sipërmarrjes, për fatin e keq të mijëra e mijëra të papunëve që do të kishin përfituar  vende  pune nga paketa jonë e taksave të ulta, për  fatin e  keq të tetëdhjetë përqind të shqiptarëve që do të kishin përfituar nga ulja e çmimit të energjisë elektrike  dhe e karburanteve të gjitha këto amendamente janë refuzuar nga qeveria  me kokëfortësi, me  egoizëm,  pa  asnjë agument.

Por ne nuk heqim dorë, ne do të vazhdojmë të punojmë për ju, alternativa  për ne është vetë arsyeja pse ekzistojmë si forcë politike.

Ulja e taksave; kjo është kryefjala e ofertës tonë të re për zgjedhjet vendore. Të gjithë kandidatët tanë  janë zotuar solemnisht për uljen e taksave për biznesin e vogël  në maksimumin që e lejon ligji,  deri në 30 përqind,  si një mundësi reale  për t’i dhënë frymëmarrje biznesit,  për  nxitjen e investimeve  dhe  hapjen e vendeve të punës në nivel  vendor.

Oferta jonë është kujdesi me përparësi për qytetarët dhe familjet në nevojë, per ata qe jo vetëm janë harruar por edhe janë goditur më rendë, më egërsisht dhe arbitrarisht me gjoba, taksa, fatura, prishje te shtëpive e bizneseve të vogla nga dyshja Rama-Meta e që sot po marrin të pashpresë arratinë nga Shqipëria. Oferta jonë është përdorimi i fondeve publike për investime prioritare në rrugë, ujësjellësa, shkolla, qendra shëndetësore dhe shërbime të tjera bazë që përmirësojnë jetën, nxisin sipërmarrjen dhe rrisin punësimin.

Partia Demokratike ka qenë, është dhe do të mbetet partia e investimeve publike dhe shpenzimeve në shërbim të drejtpërdrejtë të qytetarëve, sipërmarrjes dhe punësimit.

Perballë janë kandidatët e dyshes Rama-Meta që, njësoj si padronët e tyre sot, do të shpërdorojnë nesër fondet publike për fasada, palma, zyra, makina e luks; asgjë për qytetarët, asgjë për sipërmarrjen, më shumë papunësi, më shumë varfëri, më pak shërbime.

Oferta jonë është demokracia pjesëmarrëse, qeverisja me qytetarët, me komunitetet dhe për komunitetet përbërese të bashkive të zgjeruara.

Oferta jonë është frenimi i centralizimit të mëtejshëm, rikthimi dhe thellimi i decentralizimit, i vendimmarrjes transparente dhe perfshirëse të komuniteteve dhe qytetarëve, pasi vetëm kështu qeverisja mund të jetë demokratike dhe jo oligarkike, e ndershme dhe jo e korruptuar a kriminale, zhvilluese dhe jo varfëruese, përfshirese dhe jo përjashtuese.

Oferta jonë janë kandidatët më të mirë,  burra dhe gra me integritet të lartë  që vijnë nga politika, nga  bota universitare, nga shoqëria civile, nga sipërmarrja e lirë, individë të  suksesshëm  në punët, profesionet dhe detyrat që kanë ushtruar, njerëz  të respektuar nga qytetarët për vlerat e tyre intelektuale, morale dhe njerëzore, menaxherë të aftë, të përkushtuar dhe me përvojë të madhe, drejtues të spikatur dhe të sprovuar në shërbim të publikut, të gjithë të gatshëm për të marrë përgjegjësi dhe për të vënë në zbatim  në   bashkitë e tyre  ofertën  tonë të punësimit, mirëqënies dhe dinjitetit.

Kandidatët tanë zotohen se do të jenë 24 orë në shërbim të njerëzve, se do degjojnë zërin e çdo qytetari, hallin dhe problemin e kujtdo, pa dalllim politik apo lokalist.

Unë e di që të jesh kryebashkiak është përgjegjësi e madhe, por dhe një nga detyrat publike më të bukura. Të jep mundësinë të bësh një ndryshim në jetën e qytetarëve. Këtë jam munduar të bëj çdo ditë në Tiranë. Kam ulur taksat dhe kam reduktuar tarifat. Kam ngritur fonde për kreditimin dhe punësimin e të rinjve, kam ofruar mijëra stazhe pune dhe bursa për ta. Të gjitha këto masa sollën një klimë pozitive për sipërmarrjen që hapi mbi 25 mijë vende të reja pune në Tiranë.

Tirana ka sot një plan urbanistik të konsultuar me banorët e saj, çka fshiu një herë e mirë paradhomën e pazareve të kryebashkiakut. Tirana ka sot 49 kilometra rrugë dhe 98 km2 trotuare më shumë, 120 mijë metra katrore gjelbërim dhe 16 mijë pemë më shumë se 4 vite më parë. Tirana ka sot projektet e transformimit rrënjësor me Bulevardin e Ri, rehabilitimin e Lumit të Tiranës dhe ndërtimin e stacionit multimodal, që do të sjellin mijëra vende pune dhe do ta bëjnë Tiranën tonë më moderne, më të zhvilluar, më europiane.

Prioriteti im i vetëm ka qenë dhe është puna, veprat, rezultatet konkrete për njerëzit.  Është e lehtë të flasësh kur prioritet ke propagandën, demagogjinë, shfaqjet, dhe fasadat. Është e veshtirë t’u çosh ujë 50 mijë familjeve, të ndërtosh e rindërtosh 30 shkolla, kopshte e çerdhe, 50 kënde lojrash për fëmijë, Të modernizosh sistemin e kontrollit të trafikut dhe të sigurosh ngrohje për të gjitha kopshtet dhe cerdhet dhe 95 përqind të shkollave, të projektosh zgjidhje të mëdha dhe aftgjatë dhe të gjesh dhjetëra miliona euro financime të huaja në kohë krize.

Kjo kërkon përkushtim, kërkon devocion, kërkon dashuri të madhe për qytetarët e Tiranës. Dhe në nderim të qytetarëve të Tiranës, në respekt të tyre dhe shërbimeve më të mira për ta, në shërbim të mbarimit të projekteve, larg betejave politike në funksion vetëm të interesave të tyre, oferta jonë për Tiranën është Halim Kosova, njeriu i punës, rezultateve dhe dinjetit.

Ekipi i kandiatëve tanë shkëlqen në shumë aspekte, por unë dua të veçoj një element përbashkues, një cilësi që ka tërhequr e po tërheq më masë simpatinë e shqiptarëve: vertëtësinë. Kandiatët tanë janë të vërtëtë në çdo gjë që thonë e premtojnë, janë të  vërtetët në  takimet solemne dhe në biseda të lira, janë të vërtëtë sepse të tillë janë  formuar në jëten e tyre  dhe, veç kësaj,  janë të  vërtëtë sepse  e vërtetë është oferta jonë, qasja jonë, lidhja jonë me zgjedhësit.

Vërtetësia e Halim Kosovës e  ka nxjerrë në pah në gjithë përmasën e vet falsitetin e Edi Ramës dhe kukullës së tij në Tiranë. Dardha bie nën dardhë, falsiteti falsitet prodhon, këtë histori e shohim në Tiranë dhe  në mbarë vendin.

Por Tirana nuk është e vetme në ofertën tonë, respektin tonë, përkushtimin tonë ndaj qytetarëve. Korçarët do të kenë një kryebashkiak që do të punojë me ta dhe për ta dhe nuk do t’i shpenzojë lekët për kulla korrupsioni që mbushin xhepat e shefave në Tiranë. Po keshtu Elbasani, Lezha, Berati, Dibra, Pogradeci, Gjirokastra, do të kenë kryebashkiakë të aftë dhe me përvojë dhe që porositë i marrin vetëm nga qytetarët e tyre. Shkodranët, durresakët dhe himariotët do të kenë zonja të nderuara në drejtim të bashkive të cilat do të jenë 24 orë në shërbim te tyre duke punuar për të përmirësuar cilesinë e jetës së banorëve.  Fierakët, vlonjatët, kukësianët, lushnjarët, do kenë në shërbim të tyre energjinë rinore të kryebashkiakëve të ardhshëm. Në çdo bashki ne kemi sjell modelin e kryebashkiakëve me integritet, me pervojë dhe të përkushtuar për t’iu shërbyer qytetarëve.

Zonja dhe zoterinj,

Të dashur bashkëqytetarë,

21 qershori është dita e gjykimit të madh të kësaj qeverie. Do të pranohet apo do të refuzohet me votë të lirë modeli i mashtrimit. Do të pranohet apo do të refuzohet me votë të lirë modeli i papunësisë, taksave dhe çmimeve të larta, modeli i burgut dhe i varfërisë. Do të pranohet apo do të refuzohet me votë të lirë ngritja e krimit në system. Do të pranohet apo do të refuzohet me votë të lirë kapja e pushtetit vendor nga oligarkët. Kemi bindjen e thellë se qytetarët nuk mund ta bekojnë me votë këtë model të se  keqes, por do ta ndalojnë, do ta delegjitimojnë në kutitë e votimit.

Me  votë! Me votë!

Bashkë me ju,  kam ardhur në këtë  nisje  kaq entuziaste nga një udhëtim i gjatë nepër Shqipëri. Kam takuar mijera e mijëra  burra dhe  gra, të rinj e të reja,  fëmijë e të moshuar,  kam parë padurimin në vuajtjen, në shpërthimin apo edhe në heshtjen e tyre të rëndë: padurimin për të votuar; kam lexuar në sytë e tyre një kërkesë, një lutje, një porosi, për t’u prirë, për t’i drejtuar, për  të mos i zhgënjyer.

Për ketë zotohem, për ketë zotohemi sot të gjithë bashkë:

Për një punë të madhe, Për një detyrë të madhe para qytetarëve shqiptarë:  Të ndalim të keqen, të çelim perspektiven e re.

Të nisemi dhe të mos ndalemi për fitoren e kandidatëve të Partisë Demokratike dhe opozitës, pë fitoren e qytetarëve të lirë.

Për një të nesërme të sigurtë.

Për ju.

Për Punë dhe Dinjitet.

Zoti e bekoftë Shqipërinë!

Fjala e Kryetarit të Partisë Demokratike Lulzim Basha në hapjen e fushatës, 21 Maj 2015

Kryetari i Kuvendit Ilir Meta e shndërroi sot foltoren e institucionit më të rëndësishëm në vend në një frëngji të sulmit banal e të papranueshëm ndaj opozitës.

Fyerjet e z.Meta ndaj zonjës Jozefina Topalli, janë shenjë e degjenerimit të plotë dhe te agonisë ku gjendet sot kjo mazhorancë, dyshja Rama – Meta, në prag të votës së 21 qershorit.

Ilir Meta është i fundit në këtë parlament që duhet të ketë kurajën për të bërë ofendime të ulëta, pasi ai vjen nga një akuzë publike për porositjen e vrasjes së dy deputetëve, akuza që erdhi nga vetë radhët e mazhorancës së tij.

Ilir Meta duhet të jetë i fundit të ketë kurajën të përbaltë parlamentin, pasi ai vjen nga një proces i manipuluar me forcën e pushtetit të tij dhe të kryeministrit, për të mbyllur e për të mos lejuar zbardhjen e akuzës më të rëndë të bërë në këto 25 vite.

Koha e kësaj dysheje që dhunon parlamentin e opozitën, po vjen drejt fundit. Ata mund ti shpëtojnë organeve të drejtësisë, por jo drejtësisë së popullit. Ora po vjen, 21 qershori po afron.

Deklaratë për media e deputetit të Partisë Demokratike, Gert Bogdani, 21 Maj 2015

PRAPË PREMTIME – PRAPË MASHTRIME

Ditën e djeshme, Erioni ripërsëriti edhe një herë premtimet që dy vite më parë ai dhe shefi i tij i premtuan biznesit të vogël. Premtime që në këto dy vjet nuk janë mbajtur por që paturpësisht i përsëriten biznesit të vogël në prag të zgjedhjeve.

Njësoj si dy vjet më parë, Erioni i premtoi biznesit të vogël uljen e taksave, megjithëse dy vjet në qeveri nuk pati asnjë nismë për të ulur taksat dhe tarifat për këtë biznes, përkundrazi 97% e shqiptareve patën rritje taksash. A mos vallë është lehtësim për biznesin e vogël shtimi i barrës për sigurimet shoqërore? A mos është lehtësim për biznesin e vogël rritja e taksës së ndërtesës? Apo mos është lehtësi fiskale rritja e tarifimit të energjisë elektrike për këto biznese?

Dy vjet më parë, qeveria që premtoi rilindjen e ekonomisë u zotua se politikat fiskale do të ndërtohen në dakortësi me Këshillin Ekonomik Kombëtar. Deri më tani, të dy paketat fiskale të ndërtuara nga qeveria jo vetëm që nuk kanë dëgjuar zërin e biznesit por e kanë shpërfillur atë edhe kur ky zë u ka ardhur në formë amendamentesh.

Të dhënat e INSTAT, flasin për përkeqësimin e klimës së biznesit. Të dhënat e Ministrisë së Financave për katër mujorin tregojnë se kemi rënie të pagesës së biznesit të vogël, nga paaftësia e qeverise. Ndërkohë që Heritage Foundation e ka ulur me 9 pozicione renditjen e vendit tonë në listën e të bërit biznes.

Erioni ne qeveri mbronte idenë qe rritja e taksave sjell rritje punësimi, por kjo solli rritje te papunësisë me 7% sipas vete INSTAT-it te qeverise. PD beson se ulja e taksave sjell punësim.

Veliaj i premtoi bizneseve se do të krijojë fondin e punësimit por ndërkohë harron të na thotë se ku ka shkuar fondi prej 4.5 milionë dollarët që duhet të punësonin të rinj në Fier dhe Vlorë. Si ka mundësi që shqiptarët po largohen nga vendi ndërkohë që ish ministri pergjegjës për punësimin pretendon se ka shpenzuar një fond prej 2.7 milion dollarësh për punësimin? Ku kane shkuar këto para në një kohe qe papunësia u rrit me 7% vetëm ne dy vitet e fundit?

Ndërkohë qe ne dy vjet nuk kane mbajtur asnjë premtim madje e ka zhytur vendin ne varfëri, kane rritur taksat dhe çmimet, kane detyruar mijëra biznese te mbyllen sot na riciklohen me te njëjtat premtime por me një ambalazh ndryshe.

Çdo ditë PREMTIMET e pambajtura do postohen në faqen e internetit: www.drejtimiiduhur.al

Deklaratë për media e deputetes së Partisë Demokratike, Jorida Tabaku, 21 Maj 2015

Kandidati për kryetar Bashkie në Tiranë, Halim Kosova u takua me punonjës të një ndërmarrje fasone në zonën e Dajtit, ku theksoi mesazhin për uljen e taksave, si dhe për ofrimin e shërbimeve aty ku jetojnë qytetarët.

“Bashkia do të jetë shumë miqësore me biznesin, duke e parë këtë si një mundësi reale për punësim. Dhe punësimi është kryefjala e çdolloj bisede që unë kam bërë deri sot. 1 milion banorë në Tiranën e madhe do të kenë mundësi të përfitojnë aty ku ata banojnë, nga lehtësirat që Bashkia e ardhshme e Tiranës do të ofrojë”, tha Kosova.

Gjatë një takimi me banorët e Njësisë 8 në Tiranë, Kosova tha se qytetarët janë të lodhur e të zhgënjyer nga politika boshe që nuk sjell zhvillim. Ai tha se ka ardhur koha për të sjellë besimin përmes punës dhe dinjitetit.

“Eshtë shumë e rëndësishme për çdo banor të qytetit të Tiranës që të shohë një dritë jeshile për problemet që kanë. Në këto dy vjet ju e keni parë që politika i ka rënduar hallet, është shkëputur nga qytetari dhe ka krijuar probleme aq sa kurrë më parë ndonjëherë, përveç viteve 90, nuk kemi parë kaq shumë njerëz që shpresën e tyre për të ardhmen ta kenë tek valixhet dhe të nisen jashtë pa ndonjë destinacion, vetëm të ikin nga ky vend për të gjetur një jetë më të mirë. Ne, të jeni të sigurtë, që do kthejmë shpresën se çdo njeri; prindin, familjen, lagjen ku është rritur, vendin ku është rritur, e lë vetëm për një arsye madhore dhe ajo është buka e fëmijëve. Nëqoftëse të gjitha këto mundësitë, me punë dhe dinjitet, ne i krijojmë në vendin tonë, dhe ata që janë jashtë do vijnë këtu por për momentin as ata nuk e kanë të sigurtë pavarësisht vështirësive që ata kanë në vende të ndryshme. Kështuqë ne do ta fillojmë një epokë të re bashkëpunimi në mënyrë që ti kthejmë mirëqënien e munguar prej shumë vitesh qytetarëve të Tiranës, banorëve të Tiranës”, tha Halim Kosova.

Njoftim për shtyp i Partisë Demokratike, 20  Maj 2015

Kryetari i Partisë Demokratike, Lulzim Basha zhvilloi një bashkëbisedim me të rinjtë në qytetin e Durrësit. Zoti Basha është njohur me shqetësimet që kanë sot të rinjtë e Durrësit për papunësinë në rritje, tarifat e larta të universiteteve, pamundësinë e prindërve të tyre për të mbyllur muajin pa marrë borxh e deri te mungesa e shpresës se nesër do të bëhet më mirë. Vendi është zhytur në krizë, tha zoti Basha, por qeveritarët refuzojnë të japin llogari e t’i pergjigjen pyetjeve dhe shqetësimeve të qytetarëve.

 “Ku janë 300 mijë vendet e punës, ku është punësimi, ku janë çmimet e ulura të energjisë dhe të naftës, ku është shëndetësia falas, ku është arsimi për të gjithë, ku janë universitetet që do të hapin dyert e tyre për të mos lënë asnjë të ri pa shkollë ,siç u premtua para dy vitesh, kush përgjigjet për këto pyetje? Askush. Edi Rama dhe Ilir Meta, të dy së bashku dhe veç e veç organizojnë estrada të pakuptimta rrugëve dhe shesheve të Shqipërisë me një tufë zyrtarësh memecë përpara, recitojnë të njëjtën histori nga fillimi deri në fund, çdo ditë, katër herë në ditë, pa u lodhur pa u bërë fare merak se asnjë nga shqiptarët nuk merr përgjigje për këto pyetje. Ku është mirëqenia e premtuar, ku është siguria, ku është rendi, asnjë përgjigje. Në rastin më të mirë sulme ndaj opozitës, sulme ndaj meje sulme ndaj Gridës, çfarë fshehin këto? Mungesën e zgjidhjeve, mungesën e ofertës, mungesën e përgjegjësisë dhe përgjegjshmërisë para jush”,- u shpreh zoti Basha.

Dyshja Rama –Meta, tha Basha, rritën çmimin e energjisë për qytetarët, por CEZ-it i falën 600 milion euro, thelluan borxhin me 700 milion dollarë por nuk kanë hapur asnjë vend të ri pune apo te kenë kryer investime të reja.

“E rritën çmimin e energjisë. I rritën faturat për shqiptarët, i gërmuan xhepat e shqiptarëve deri në kacidhet e fundit, por CEZ-it i falën 600 milionë euro  të njohura me faturë. 600 milionë euro, 200 euro për banor, 200 euro për shqiptar ia falën me një dorë, pa llogaritur ato të tjerat. Këto ishin detyrime të njohura. Gropën e buxhetit e kanë rritur me 700 milion dollar, 240 mijë lek më shumë paguan çdo shqiptar. kKa marrë çdo shqiptar borxh këto vite me Edi Ramën dhe Ilir Metën, këta që do ta mbyllnin gropën. E thelluan me 700 milion dollar më shumë. Por çfarë bënë me këto para? Sa kantiere pune kanë hapur këtu në Durrës? Sa vende pune hapën në Durrës? Sa familje shtuan në listën e ndihmës ekonomike për shkak të pamundësive të krijuara? Asgjë, asnjë llogari, asnjë rezultat. Dhe sot asnjë zgjidhje, asnjë ofertë. E vetmja gjë që bëjnë, kërcënojnë, po nuk na votuan ne, nuk do të ketë bukë, nuk do të ketë ujë, kuçedra do të zërë burimet Propozuan që t’iu merrnin edhe shtëpitë shqiptarëve që s’kishin me se të paguanin faturat e energjisë. Ndërsa para dy ditësh kanë hequr vellon e planit të tyre famkeq, të antireformës së ujit, me anë të së cilës duan të vendosin edhe  një kërbaç tjetër mbi kokën e shqiptarëve, atë të rritjes së tarifave dhe të çmimeve të ujit, dhe të reprezaljeve ndaj qytetarëve për ujin e pijshëm. Aty ku është, por edhe aty ku s’është, sepse dhe energjinë e kërkojnë edhe aty ku nuk ka energji elektrike, edhe aty ku faturat janë aforfe dhe abuzive,”- nënvizoi kryetari Basha.

Kryetari i Partisë Demokratike theksoi se Rama-Meta jo vetëm nuk mbajtën asnjë premtim, por përkundrazi refuzuan të dëgjojnë zërin e qytetarëve, kur kërkonin mos rritjen e  çmimeve si dhe refuzuan të miratonin në parlament amendamentet e opozitës për uljen e çmimit të energjisë, naftës uljen e taksave etj. Mazhoranca, tha Basha, vazhdoi me rritjen e taksave, duke e bërë të pamundur për bizneset të punësojnë më shumë, përkundrazi shumë prej tyre mbyllën vende pune. 40% është papunësia mes të rinjve, dyfishi i papunësisë kombëtare. 7%, sipas Instatit, më i lartë sesa kur e morën këta qeverinë.

“E denoncuam siç e denoncojmë sot, me fakte, me argumenta. As me shpifje, as me përbaltje. Por nuk u mjaftuam me kaq, sepse ne jemi opozita, jemi edhe alternativa. Çuam në Kuvend amendamentet tona, amendament për punësimin e rinisë, të hiqen taksat për një periudhë kohore një deri në pesë vjet për çdo biznes që punëson të rinjtë. Çfarë bënë? E hodhën poshtë. Amendament për uljen e çmimeve për mallrat e shportës, të miellit, të sheqerit, orizin, për bukën, për vajin, që familjet që mezi mbyllin muajin ta kenë pak më të lehtë, pak më të mundur, për shkak të asaj që bën shteti, që të blejë pak më shumë, apo të blejnë kotheren e bukës, për fëmijët e tyre, ta vendosin të tavolinë. Çfarë bënë? E hodhën poshtë. Çuam amendamentet për uljen e çmimit të energjisë dhe të naftës, që në fakt ishin premtimet e tyre. Çfarë bënë? E hodhën poshtë. E hodhën poshtë në mes të natës me kartonat e tyre të cilat, sipas Edi Ramës dhe Ilir Metës, përfaqësojnë 1 milion shuplakat e 23 qershorit 2013, por që në fakt sot nuk përfaqësojnë as vet njerëzit që i mbajnë këto kartona,”- tha Basha.

Dy vjet më parë, tha zoti Basha, i morën votat me mashtrime teksa kësaj here kërcënojnë qytetarët se nuk do te kenë ujë, drita e bukë po votuan kundër tyre. Kryetari i Partisë Demokratike i ka pyetur të rinjtë e Durrësit nëse sot jetojnë më mirë, kur qyteti dhe qeveria janë të një krahu.

“Po t’i pyesim këtu nga Durrësi, këtu për dy vite kanë pasur edhe bashkinë, edhe qeverinë. Sa vende pune hapën këtu në Durrës? Cili prej jush është punësuar në dy vitet e fundit? A janë ulur çmimet në Durrës? A paguani më pak taksa në Durrës? A jetohet sot më mirë në Durrës se dy vite më parë? Po s’ka se si.  Pushteti korrupton. Pushteti absolut korrupton në mënyrë absolute. Binomi Rama-Dako nuk ka bërë asgjë të mirë për Durrësin. Në këto dy vite Durrësi është zhytur në papunësinë më të madhe, mjerim edhe më të madh, papunësi edhe më të madhe. Kryebashkiaku i konsumuar i Durrësit nuk ka ofertë për ju.  Kryeministri nuk ka ofertë për ju”,- u shpreh Kryetari i Partisë Demokratike.

Me votën e bashkuar të 21 qershorit, tha zoti Basha, do t’i hapet rruga ofertës se Partisë Demokratike per ulje çmimesh, uljen e tarifave për studentët, faljen e kamatvonesave për ujin dhe energjinë, ulje taksash dhe krijimi i lehtësirave për bizneset që punësojnë të rinj.

“Lulzim Basha ka një zotim për zgjedhjet e 21 qershorit. Që me votën e bashkuar, të djathtë e të majtë, pas 21 qershorit të diktojmë uljen e taksave në nivelin më të ulët në Ballkan, uljen e çmimit të energjisë me 25% dhe faljen e kamatvonesave anëembanë. Të diktojmë rritjen e rrogave e pensioneve dhe jo ngrirjen e tyre, të diktojmë destinimin e të gjitha fondeve publike për investime që ndihmojnë në hapjen e vendeve të punës. Pra, për punë, dinjitet dhe respekt për gjithë shqiptarët”,- mbylli zoti Basha.

Kandidatja për Bashkinë e Durrësit, Grida Duma, tha se bashkë me të rinjtë dhe durrsakët do t’i kthejnë shpresën dhe do të bëjmë më të mirën për qytetin.

“Ne do kemi vetëm një strategji, luftë frontale papunësisë. Papunësia sepse është nëna e të gjithë të këqijave. Aty lind varfëria, aty lind keqësia, aty lind mungesa e shpresës. T’i kthjemë jetën qytetit, t’i kthejmë shpresën të gjithë atyre njerëzve që varfëria ia ka ulur kokën. Pas 21 qershorit do e keni kokën lart se do bëjmë më të mirën për qytetarët. Të rinjtë të vijnë bashkë me ne dhe të shkojmë drejt punësimit, parqeve, të shkojmë drejt rrogës më të lartë. A duhet ne të subvenciojmë një numër të caktuar kur të rinjtë punësohen?! Po, ne jemi të gatshëm për ta bërë këtë. Trekëndëshi midis agroturizmit, bregdetit dhe arkeologjisë do na e kishte zili e gjithë bota. Ne e kemi dhe hajde ta bëjmë”, tha Duma.

Njoftim për shtyp i Partisë Demokratike, 20  Maj 2015

Kandidati Mero ishte në disa fshatra të Korçës, të njohura për prodhimet bujqësore  në të gjithë Shqipërinë  si Dvoran, Biranjë, Belorta, Kamenicë, Neveçisht etj. Z. Mero tha se fshati duhet të kthehet në një motor për zhvillimin ekonomik të Korçës dhe për këtë politikat dhe programi i bashkisë së re ka përfshirë lehtësi fiskale, mbështetje subvencionesh për fermerët, ngritjen e pikave të grumbullimit të produkteve bujqësore dhe përmirësimin e infrastrukturës si rrugë, kanalet vaditëse, etj.

Banorët e fshatit Dvoran,  i njohur për mollët dhe qershitë i thanë profesor Meros se qindra kuintalë mollë dhe qershi kanë mbetur stok ndaj edhe janë prishur për shkak mungesës së politikave për tregtimin e tyre,  brenda dhe jashtë Shqipërisë.  Ata vunë theksin se importi i produkteve të rajonit, po rrënon punën dhjetëra vjeçare të fermerëve të Korçës.

“Ne jemi braktisur nga qeveria pasi nuk u realizua ngritja e magazinave të grumbullimit, u rritën taksat e transportit, ujit dhe dritave dhe nuk u shpërndanë subvencionet tek fermerët në nevojë thanë banorët e Dvoranit. Kandidati Mero siguroi se, fshati me produktet e tij,  është në fokus të prioriteteve për ti kthyer vëmendjen dhe përkushtimin e munguar.  Me bashkinë e re, ndër vendimet e para do të jetë ngritja e pikave të grumbullimit dhe tregtimit,  kanalizimet e  ujërave të zeza dhe përmirësimi i lidhjes së fshatrave me aksin nacional,- u shpreh profesor Mero.

Njoftim për shtyp i Partisë Demokratike, 20  Maj 2015

Erion Veliaj po përsërit PREMTIMET e pambajtura të dy viteve më parë, veçse kësaj radhe për Tiranën. Dhe ndonëse vetë INSTAT-i i qeverisë tregon rritje të papunësisë me 5% gjatë këtyre dy viteve, Erioni po premton punë për të rinjtë përmes ngritjes së arsimit profesional.

Por edhe në 2013-ën Erioni PREMTOI: “Dyfishim i shkollave të arsimit profesional dhe ndërthurje me Qendrat e Formimit profesional, duke krijuar një rrjet disa herë më të gjerë formimi profesional. Zgjerim i shërbimit arsimor dhe formimit profesional në fshat, duke ofruar aftësi në bujqësi, agropërpunim e shërbime bujqësore.”

Ky PREMTIM doli MASHTRIM.  Erioni si Ministër ishte përgjegjës për ta realizuar këtë premtim. Ai kishte plot 40% të buxhetit të shtetit për të realizuar këtë dhe dhjetëra PREMTIME të tjera që kanë rezultuar MASHTRIME dhe që po ia përmendim çdo ditë përgjatë 50 ditëve. MASHTROI me formimin profesional dhe MASHTROI me punësimin siç konfirmon INSTAT-i i Qeverisë.

Erioni prapë PREMTON veç për të marrë pushtet dhe nuk e ka problem t’i MASHTROJË sërish qytetarët sapo ta ketë pushtetin. Çdo ditë do t’i kujtojmë Erionit nga një tjetër PREMTIM të thyer dhe nga një tjetër MASHTRIM, sepse votuesit nuk do të MASHTROHEN përsëri.

(Çdo ditë PREMTIMET e pambajtura do postohen në faqen e internetit: www.drejtimiiduhur.al)

Deklaratë e kandidatit të djathtë për Këshillin Bashkiak të Tiranës, Akil Kraja, 20 Maj 2015

Kandidati për kryetar Bashkie në Tiranë, Halim Kosova u takua me banorë të njësisë 1 në Tiranë, ku ndau me ta idetë e tij për menaxhimin e qytetit. Kosova tha se është angazhuar në këtë garë, sepse kërkon të shërbejë me integritet e përkushtim.

Njoftim për shtyp i Partisë Demokratike, 20  Maj 2015