Blog

Kryetari i Partisë Demokratike Lulzim Basha prezantoi kandidatin për kryetar të Bashkisë së Kukësit z. Bashkim Shehu.  Z. Basha është ndalur tek situata e rëndë ekonomike që ka pllakosur vendin  ku mijëra familje kanë marrë rrugën e emigrimit pasi e kanë të pamundur të sigurojnë mbijetesën. 

“Kujt i thotë ky me demek kryeministër, se situatën e gjeti kështu? Në Kukës ai prodhoi mjerimin, në Kukës ai ngriti krimin dhe korrupsionin monument, në Kukës ai shkaktoi eksodin më të egër në 25 vite. Me mijëra familje nuk i kemi më mes nesh sepse kjo qeveri e pashpirt nuk u la asnjë rrugë, shteg, asnjë mundësi tjetër përveç largimit nga shtëpitë e tyre, i nisi me rrobat në shpinë, me fëmijët e vegjël në duar e krahë drejt kurbetit. Kjo është vepra, mynxyra e zezë e keqqeverisjes së Edi Ramës e Ilir Metës. Sot, si çdo mëngjes në këto dy vite të qeverisjes së tyre, me mijëra fëmijë janë çuar nga gjumi në shtëpitë e kuksianëve duke gjetur tavolina të zbrazura, prindër kokulur, pa asnjë të ardhur, mijëra familje të zhytura në borxhe deri në fyt, qindra, mijëra biznese në Kukës e mbarë Shqipërinë që shohin se si konsumatorët kokulur gërryejnë xhepat për kacidhet e fundit, që shohin se si listat dyfishohen, siç dyfishohet mjerimi, siç dyfishohet varfëria, papunësia në Shqipërinë e keqqeverisur nga dyshja e makutëve Rama-Meta. Dhimbja e vogëlushëve kuksianë, dhimbja e kryefamiljarëve kuksianë, dëshpërimi i rinisë kuksiane, së cilës me arbitraritet dhe urrejtje të madhe raciste i mbyllën edhe Universitetin e Kukësit, është arsyeja kryesore pse ju jeni përbashkuar kaq shumë rreth ofertës sonë të re, rreth alternativës sonë të re, rreth shpresës që sjell Partia Demokratike në këto zgjedhje, me alternativën tonë. Kurrë më parë nuk kemi patur një qeveri kaq të papërgjegjshme, kaq të paaftë, kaq të pashpirt për t’iu përgjigjur kërkesave elementare të shoqërisë dhe popullit të saj. Puna, mirëqenia, zhvillimi janë e duhet të jenë parafjala e çdo qeverie por kjo qeveri ka të tjera kryefjalë, ka kërbaçin për të pamundurit, ka gënjeshtrën dhe pabesinë për votuesit e saj, të cilëve u premtoi ulje të çmimit të energjisë, ndërkohë që e ngriti atë, të cilëve u premtoi ulje të çmimit të karburantit por e çoi në stratosferë, të cilëve u premtoi taksa të ulëta për 97% të shqiptarëve, kur sot 100% e shqiptarëve paguajnë më shumë taksa, taksa të cilat zhduken në xhepat korruptivë të dyshes Rama-Meta dhe klientëve të pushtetit të saj në Kukës e Tiranë, taksa të cilat nuk kthehen në projekte mirëqenie. Edi Rama dhe Ilir Meta thonë se jemi në rrugën e duhur dhe unë i besoj se ata janë në rrugën e duhur për veten pasi pasuritë e tyre shtohen ditë për ditë”, theksoi z. Basha. 

Nga Kukësi kryetari i Partisë Demokratike Lulzim Basha i ka kujtuar Edi Ramës dhe Ilir Metës se pavarësisht sa lekë nga paratë e shqiptarëve kanë futur në xhepat e tyre, këto dy vjet  nuk do të mund të blejnë votën dhe shpirtin e qytetarëve që sot i kanë zhytur në varfëri. Mashtrimi i premtimeve të tyre, theksoi z. Basha, u doli boja.

 Bashkimi i shqiptarëve në 21 qershor do të mundësojë kthimin e shpresës për qytetarët  dhe largimin e së keqes. 

“Zgjidhja, miqtë e mi është bashkimi, bashkimi me votë i kuksianëve dhe shqiptarëve në 21 qershor, bashkimi kundër papunësisë, kundër padrejtësisë, kundër kërbaçit në dorën e qeverisë dhe lakut në fyt në familjet kuksiane dhe të Shqipërisë. Me votën tuaj në 21 qershor, ne kemi në dorë t’ua heqim njëherë e përgjithmonë kërbaçin nga dora këtyre boshibozukëve dhe jam i sigurt se do ua heqim. Ne kemi në dorë të heqim lakun nga fyti i familjeve të pamundura e ta vendosim atë në qafën e qeverisë së pashpirt Rama-Meta, për ta rrëzuar, për ta përmbysur me votën popullore, me votën tuaj”, deklaroi lideri i opozitës Lulzim Basha.

Njoftim për shtyp e Partisë Demokratike, 4 Maj 2015

Kandidati për kryebashkiak në Tiranë, Halim Kosova u takua me tregtarët e tregut Çam të cilët po vuajnë rënien e fuqisë blerëse. Problemeve të tyre u shtohen dhe taksat e rritura nga qeveria dhe tarifat e larta të energjisë. “Vazhdon prapë historia e mbifaturimit të korentit mbi biznesin. Po e mori Erjon Veliaj do t’i rrisë çmimet e taksat, si Edi Rama. Tani shpresojmë të jesh ti në krye”, u shpreh një tregtar.

Halim Kosova e ka parim që sa më shumë para t’u mbeten tregtarëve të vegjel, aq më shumë mundësi do të kenë ata të zgjerohen e të krijojnë vende pune.

“Sa më shumë lekë të kesh në xhep aq më shumë do mendosh të përmirësosh gjërat, për të marrë ndonjë njeri në punë. Gjithë çelsi aty është”, tha Kosova.

Kandidati Kosova u takua edhe me fermerë të Kasharit të cilët ankohen për taksat e larta.

“Taksa është aq shifër e madhe sa prodhuesit nuk arrijnë dot ta paguajnë taksën se është shumë e lartë”, tha një fermer.

Kosova thotë se ai do të angazhohet që mundësitë e fermerëve të shtohen, ç’ka do të ndihmojë në rritjen e tyre nga ku do të përfitojnë gjithë qytetarët.

“Ky prodhim i shkëlqyer që ti dhe shumë të tjerë përreth bëni, si t’ju shkoj në treg me qëllim që të justifikojë djersën tënde por edhe mos rëndojë qytetarët. Të justifikohet djersa juaj familjarisht. Qëllimi im nuk është që ty të të justifikohet, që ti të rish gjithë ditën në diell për të larë ato që ti ke investuar. Problemi është që ty të të ngelen sa më shumë lekë sepse sa më shumë lekë do të thotë më shumë mekanizim, më shumë zgjerim, më shumë mundësi për qytetin”, tha Kosova.

Kandidati për kryebashkiak, gjatë takimeve në Kashar u takua edhe me disa vizitorë italianë pranë liqenit në fshatin Kus, destinacion që me vëmendjen e bashkisë do kthehet në atraksion të mirëfilltë turistik.

Njoftim për shtyp e Partisë Demokratike, 3 Maj 2015

Sot nga kullat e betonizuara nga shefi i tij, Erjoni vazhdoi propagandën mediatike për çdo gjë, pa kuptuar akoma funksionet e Bashkisë. Ai sot nuk guxoi të dalë e të shohë 20 projektet e investimit që ajo zonë ka patur.

Për çfarë e fton në debat ErionVeliaj, dr.Halim Kosovën?

Në vazhdën e show-t propagandistik kandidati që do të mbetet i tillë fton në debat dr.Halim Kosovën, por se për çfarë, e ka të vështirë ta thotë.

E fton në debat për 20 mijë familjet që hoqi nga ndihma ekonomike për të futur miq dhe familjarë të tij dhe deputetëve të tjerë të mazhorancës?

E fton në debat për rritjen  e çmimit të energjisë apo për faktin se ende nuk ka dhënë asnjë kompensim për familjet në nevojë?

E fton në debat për  mijëra vende pune të mbyllura?

E fton në debat për mijëra familje që kanë marrë rrugët e emigrimit?

E fton në debat për 95% të shqiptarëve që marrin borxh për bukën e fëmijëve?

Apo për mijëra të rinj që enden të papunë rrugëve të Tiranës dhe Shqipërisë, apo për pensionistët që me pseudo reformën e tij u jep 200 lekë në ditë?

Për çfarë e kërkon debatin?

Dr. Halim Kosova por vijon të dëgjojë qytetarët e Tiranës pa dallime politike, të majtë e të djathtë, sepse kryetari i bashkisë është i të gjithë qytetarëve. Z.Kosova ka prioritet interesat e qytetarëve dhe të qytetit, jo propagandën mediatike me pyetje që i bën stafi dhe përgjigje të parapërgatitura, pa vizion, pa platformë dhe vetëm demagogji.

Njoftim për shtyp e Partisë Demokratike, 3 Maj 2015

Kryetari i Partisë Demokratike Lulzim Basha prezantoi sot kandidatin për kryetar të Bashkisë së Lezhës Fran Frrokaj. Lideri i opozitës ka theksuar se ashtu si në Lezhë dhe në të gjithë Shqipërinë ka një padurim të madh për t’i dhënë mësimin e merituar në 21 qershor dyshes Rama-Meta për keqqeverisjen. Në 20 muaj qeverisje, – theksoi z. Basha kanë rritur taksat, çmimin e energjisë, çmimin e karburantit, kanë hequr me mijëra njerëz nga puna pa të drejtë, ndërsa dhjetëra, mijëra të tjerë i kanë hedhur në mes të rrugëve duke u mbyllur bizneset, duke ua bërë të pamundur ekzistencën, duke i shtyrë drejt dëshpërimit.

“Dyshja Rama-Meta premtoi parajsën por na ktheu prapa, na ktheu shumë prapa, e zhytën në mjerim, e zhytën në varfëri Shqipërinë. Sot, 95% e familjeve shqiptare duhet të marrin borxh që të mbyllin muajin. Dramatike, tragjike, e papranueshme është fatura e qeverisjes së tyre këtu në Lezhë, si kudo në Shqipëri, ku familjarët, kryefamiljarët jo vetëm numërojnë qindarkat për të vënë bukën e fëmijëve në tavolinën e përnatshme por janë shtyrë edhe drejt akteve të vetëflijimit. I morën jetën Mark Brahimajt sepse e larguan me të padrejtë nga puna dhe nuk i dhanë një ditë përgjigje se përse e bënë. 

I morën jetën Gjovalin Lazrit sepse i çuan një faturë të papërballueshme të energjisë elektrike, babait të jetimëve të pamundur ndërkohë që deputetët e tyre, ministrat e klientela e tyre akumulojnë borxhe të jashtëzakonshme në kurriz të taksapaguesve, askush nuk i prek me dorë, përkundrazi, i promovojnë, i veshin me pushtet, i bëjnë edhe më të pasur me paratë e taksave të lezhianëve dhe të shqiptarëve që i kanë rritur si asnjëherë më parë. 

Këtu në Lezhë, ka rënë shumë rëndë hanxhari i arbitraritetit, i padrejtësisë, i sistemit të vjedhjes suaj ditën e natën, i sistemit që ka rrënuar çdo shpresë e që po u lë vetëm një shteg shqiptarëve, të ikin, të largohen nga vendi i tyre. Ky është shtegu që do t’i lerë Edi Rama dhe Ilir Meta shqiptarëve, jo punë, jo mirëqenie, jo dinjitet por vetëm largim.” 

Z. Basha theksoi se drama të mëdha kanë shkaktuar e po shkaktojnë ditë për ditë dyshja Rama –Meta me  papërgjegjësinë dhe  korrupsionin e tyre duke e kthyer prapa Lezhën dhe  Shqipërinë.  Të vetmit që kanë përfituar nga qeverisja e tyre janë kriminelët që janë promovuar në nivelet më të larta të administratës së bashku me personat pa arsim apo me diploma false që sot janë drejtorë.

“21 qershori do të jetë dita juaj, dita jonë për të flakur tutje këtë poshtërim, do të jetë dita jonë, do të jetë dita juaj për t’i thënë jo kthimit prapa, për t’i thënë jo politikës së taksave të larta, çmimeve të larta, papunësisë, arbitraritetit, arrogancës. Do të jetë dita juaj për të vendosur Bashkinë e Lezhës në duart e lezhianëve. Ata që rritën taksat, ata që futën duart thellë në xhepat tuaj dhe baballarëve e nënave tuaj, rini e Lezhës, çfarë bënë me këto para? 

A kthyen shërbime te qytetarët e Lezhës, a hapën vende të reja pune, a përmirësuan ndopak cilësinë e jetës suaj, a plotësuan premtimet e tyre për shëndetësi falas. Asnjë nga këto. Çfarë kanë bërë? Qendrën e Lezhës që ju e mbani mend fare mirë, u investua vetëm 10 vite më parë, tashmë po e riinvestojnë me çmimin e kripur, me faturat e kripura abuzive e korruptive. Nuk hapin vende pune, nuk japin asnjë perspektivë as për fermerët, as për rininë lezhiane por hapin vepra korrupsioni, fasada e palma korrupsioni” – theksoi z. Basha. 

Z. Basha ka ftuar lezhianët dhe shqiptarët t’i bashkohen ofertës së re të PD për punë dhe dinjitet, paratë qe sot janë përqendruar në duart e  oligarkëve të kthehen në projekte zhvillimi për qytetarët, për bujqësinë, blegtorinë, turizmin, për peshkimin, për të gjithë asetet që nuk u takojnë e nuk mund t’u takojnë kurrë oligarkëve por janë e do të jenë prona, pasuria, mirëqenia e qytetarëve. 

“Në këtë përbashkim të madh e të paduruar sot, le të ftojmë këdo, çdo lezhiane e lezhian, pavarësisht ngjyrave politike që e do kryeqendrën e bashkisë së ardhshme për Lezhën e për lezhianët, që e do qeverisjen e Lezhës nga Lezha, çdokush që e di se hallet mund e duhet t’i zgjidhë me atë që përfaqëson Lezhën e lezhianët, këtu në Lezhë, pavarësisht prej bindjeve politike, çdokush që refuzon regjimin, nënshtrimin dhe qeverisjen nga Gjiri i Lalzit, le të bashkohet me ne, me votën e 21 qershorit, me Fran Frrokaj, me PD, me opozitën! 

Koha po vjen, ora po vjen. Është ora, vota juaj, është vendimi juaj, është gjykimi juaj të cilit ata i tremben për paudhësitë e zullumet që kanë shkaktuar në këto dy vite. Mos u gënjeni, mos u mashtroni, mos qëndroni pasivë, të marrim këdo që do të bashkohet në këtë kauzë të madhe popullore për punë dhe dinjitet e së bashku t’i japim ndëshkimin e merituar keqqeverisjes Rama-Meta, së bashku të hapim një kapitull të ri, një epokë të re për qytetarët e Lezhës, për banorët e Lezhës, për të gjithë Shqipërinë, të qeverisjes me ju dhe për ju, të qeverisjes me frymëzim dhe sytë nga hallet e problemet tuaja, të qeverisjes së zemrës së dhimbsur të qeverisjes së zgjedhjeve dhe zgjidhjeve të mëdha për ju!” – u shpreh lideri i opozitës Lulzim Basha.

Njoftim për shtyp e Partisë Demokratike, 3 Maj 2015

urizmi duhet ti sjellë të ardhura qytetit dhe të krijojë vende pune. Kjo është ideja që ka kandidati për kryebashkiak në Tiranë, Halim Kosova, i cili shprehet se ka shumë për të bërë që nga linjat e dedikuara pë vendet turistike të Tiranës e deri tek paisja me informacionin e duhur për destinacionet atraktive dhe të trashëgimisë kulturore. Këto shqetësime janë diskutuar në një takim të z.Kosova me njohës të fushës dhe me operatorë turistikë.

“Turizmi kulturor në kryeqytetet e botës dhe qytetet e botës që kanë vlera autentike të aspektit arkeologjik, kulturor, historik, ka disa politika të themi kulturore dhe strategji të mira afatshkurtër dhe afatmesëm dhe ne sot jemi të gjithë bashkë për ti diskutuar me specialistë, me njerëz të fushës dhe ky është një shkak i mirë që Dr. Halimi t’u dëgjojë”, u shpreh Ardian Isufi, kordinatori i këtij takimi.

Kandidati për kryebashkiak u ndal tek rëndësia e informacionit.

“Informacioni për turizmin nuk është i rëndësishëm vetëm për turistët por është i rëndësishëm dhe për ne vetë që jemi këtu, që edhe ne ta dimë se çfarë kemi përreth, sa kala kemi, sa shpella kemi, sa vende të bukura piktoreske kemi që duhet të shkojmë . Unë do të mirëprisja çdo lloj gjëje sepse sa më shumë ide të ketë, aq më e pjekur del edhe strategjia e qytetit të Tiranës për të vizituar veprat e rëndësishme që Tirana ka dhe të përcaktojmë guida, dhe pika informacioni në të gjitha anët e qytetit ku edhe turisti ta dijë cilat janë qendrat që s’duhen lënë pa parë, cilat janë vlerat tradicionale”, u shpreh Kosova.

“Tirana ka një mbret dhe ai është Mali i Dajtit të cilin do ta respektojmë të gjithë. Çfarë do të bëni ju në të ardhmen për masivizimin e sporteve që kanë lidhje me natyrën?”, u shpreh një alipnist i pranishëm në takim.

Halim Kosova e ftoi që të punojnë sëbashku për ide e projekte konkrete për te rritur numrin e vizitorëve në Malin e Dajtit.

“Industria turistike është një nga industritë kryesore që siguron punësim sepse sa më shumë që rritet teknologjia aq më tepër punonjës duhen. Ndërkohë që ndodh e kundërta me teknologjitë e tjera. Është e rëndësishme që të ndërmerren masa, të planifikohen masa që janë stimuluese për turizmin”, tha përfaqësuesi i një operatori tursitik.

Kandidati për kryebashkiak shprehu gadishmërinë për të punuar në këtë drejtim.

“Numër një do ishte çfarë kemi gati. Ato që kemi gati t’ia ofrojmë turistëve. E dyta, në një plan shumë të afërt, çfarë mund të bëjmë për të ofruar ato gjëra që ne i kemi por që duan edhe ndonjë rikonstruksion që ta futësh turistin, por edhe neve vetë kur të shkojmë ta shohim. Dhe e treta, për gjërat tradicionale të Tiranës dhe komunave përreth, të gërmojmë ku ka gjëra që janë tradicionale dhe atraktive, por që i ka mbuluar koha”, u shpreh Kosova.

Teksa bisedonte me të ftuarit në këtë takim për turizmin, një grup vizitorësh nga Çekia u ndalën dhe u takuan me kandidatin për Kryetar Bashkie. Z.Kosova u foli atyre për mundësitë që ofron kryeqyteti ynë, dhe u dhuroi një guidë mbi atraksionin turistik dhe vlerat e tradhëgimisë.

Njoftim për shtyp e Partisë Demokratike, 3 Maj 2015

Kandidatja për bashkinë e Durrësit, Grida Duma vazhdon takimet e përditshme në çdo rrugicë të qytetit e në veçanti të rrethinave të tij duke u ndalur në veçanti në zonën industriale të Shkozetit. Ndonëse një zonë me potencial të madh zhvillimi e cila nga ana urbane është duke u bashkuar me Durrësin dhe zonën e plazhit, banorët vuajnë varfëri deri në kushte ekstreme, mungesë të madhe punësimi e perspektive, mungëse rrugësh, ujë të pijshëm dhe çdo shërbim të nevojshëm nga bashkia duke jetuar si qytetarë të dorës së dytë.

Krahas harresës dhe lënies së kësaj zone të qytetit si geto, mjaft prej qytetarëve durrsakë janë viktimë e keqqeverisjes dhe përbuzjes nga ana e autoriteteve bashkiake.

“Jam një banor i lagjes 14. Kam punuar tek ujësjellësi prej 8 vitesh me ndërgjegjen më të madhe. Nuk kam parë majtas apo djathtas por kam punuar me drejtësi. Brenda 24 orëve më kanë hequr nga puna dhe më kanë thënë se ti je ai zotëria që ke votuar djathtas. I thashë; z drejtor të lutem mos shih djathtas e majtas por shiko atë që bën punën. Unë bëj punën”, u shpreh i përlotur një qytetar Durrësi.

Kandidatja Duma u përgjigj duke e ftuar të bëhet pjesë e modelit që ajo i ofron Durrësit, atë të punës.

“Përlotet një burrë që punon, që nuk na duhet majtas apo djathtas se janë të gjithë qytetarë e banorë. Dhe ku ti gjejmë njerëzit që punojnë. Unë jam vetëm për një model; njeriun e punës”,tha Duma.

Në bashkëbisedim me këta banorët, kërkesa e tyre kryesore është punësimi. “E para duhet të jetë puna dhe buka. Këto të dyja njëherë pastaj rruga e të tjerat me radhë se nuk bëhet dot menjëherë”, u shpreh një banore e zonës.

Zonja Duma u zotua se puna e saj do fillojë tek hallet e shtëpisë së durrsakëve, tek hapja e mundësive për punësim dhe perspektivë për qytetin.

“Është e vërtetë që puna është e para. Sepse keni nevojë të gjithë. Në fund të ditës shtrihesh tek jastiku yt dhe hallet e shtëpisë. Aty fillon e gjitha, tek hallet e shtepisë tuaj. Duhet të shohim njëri tjetrin si hallet e shtëpisë.

Njoftim për shtyp e Partisë Demokratike, 3 Maj 2015

Kandidati për kryetar Bashkie në Tiranë, Halim Kosova, pati një bashkëbisedim me të rinjtë me moderimin e aktorit të njohur Jul Deda.

Duke iu përgjigjur disa pyetjeve, z.Kosova ka folur për konceptet e tij për Tiranën, për çështjet e mprehta të punësimit të të rinjve, por edhe për familjen e Facebookun-un.

Jul Deda: Shqipëria!

Halim Kosova: Vend që duhet të bëjmë të pamundurën të gjithë, të bëjmë diçka që t’ia ndërrojmë një çik fytyrën.

Jul Deda: Rini

Halim Kosova: Pjesa më vitale e çdo populli nga e cila merr impulse për të ardhmen e vendit.

Jul Deda: Facebook

Halim Kosova: Facebook-u më detyron të kthej përgjigje.

Jul Deda: Familja

Halim Kosova: S’ka gjë më të shtrenjtë se sa familja, për çdo njeri.

Jul Deda: Tirana

Halim Kosova: Tirana është një qytet i dashur për çdo njeri që banon këtu por jo vetëm kaq. Tiranën mund ta quajmë pa frikë kryeqytetin e gjithë shqiptarëve kudo që banojnë, të cilit duhet të bëjmë gjithë përpjekjet tona t’i hapim mundësitë që projektet madhore të përparojnë dhe në mënyrë urgjente të shikojmë çfarë nuk ka shkuar në të mirë të qytetarit, çfarë ka ngecur, të vëmë diagnozën mbi hallkat që e kanë penguar këtë lloj rrugëtimi, sepse, mbetet kryeqytet, pavarësisht nga emri metropol dhe europian, ka shumë për të bërë që vërtetë ta meritojmë këtë lloj emri.

Një i ri:  A keni ju një program për punësimin e të rinjve në qytetin tonë? Faleminderit.

Halim Kosova: Unë kam gjithë këto ditë që po bëj një tur nëpër lagje, nëpër qytet. Kur e shikon se sa të rinj të dalin përpara paradite, është mbështetje por është edhe keqardhje. Do të uroja që, kur të vija më pas, mos të më dilnin kaq shumë njerëz para për të më pritur paradite, por të ishin të gjithë të zënë me nga një vend punë. Kjo vizitë që unë bëj nëpër lagje, më ka ndihmuar shumë për të parë nga afër dhe për të prekur problemet dhe çdo lloj problemi i hedhur mbi tavolinë dhe i grumbulluar nga një shtab i madh, ndërton një strategji të cilën rreth datës 20-22 Maj, ne do ta shpalosim dhe do ta shikoni që do të jetë shumë i prekshëm, shumë konkret dhe me një vizion shumë të qartë për të ardhmen që të gjithë bashkë do ta realizojmë.

Halim Kosova është ndalur në rëndësinë dhe në fuqinë e votës së 21 qershorit.

“Kjo është shumë e rëndësishme për të gjithë dhe këtë kam pasur si moto, se e ndjej vetë, që mos mendo për një ditë, por mendo për katër vjet sepse duke menduar të gjithë pak më gjatë, do ti japim një pamje tjetër qytetit, politikës, vendit, Shqipërisë”.

Komunikimi I drejtpërdrejtë me qytetarit, është një bindje, një çelës suksesi për z.Kosova.

“Gjatë gjithë kësaj eksperience si drejtues i institucionit, kam fituar një përvojë dhe e kam parë sa e vlefshme është komunikimi direkt me pacientin, me qytetarin, me familjarin dhe këtë do ta transferoj në Bashki sepse është çelsi i suksesit për mos lënduar njerëz dhe për të bërë atë që duhet në kohën e duhur”.

Njoftim për shtyp i Partisë Demokratike, 2 Maj 2015

Kandidati për kryetar Bashkie në Tiranë, Halim Kosova u takua me banorë të njësisë 8 në Tiranë dhe në rrugën Riza Cerova dhe dëgjoi shqetësimet e tyre të jetës së përditshme. Kosova u angazhua për ngritjen e një sistemi efikas që do të bëjë të mundur ndalimin e burokracive dhe abuzimeve.

“Do të ndërtojmë një sistem, që të mos lejojë sorollatjet e qytetarëve. Kjo është më e rëndësishmja, më e rëndësishme se vullneti im”, u shpreh Kosova.

Kandidati për kryebashkiak hyri dhe në shtëpinë e një qytetari për të parë nga afër kushtet e tij dhe për të dëgjuar kërkesat.

Më tej, Halim Kosova e mbylli ditën në një festë të organizuar në bllok nga të rinjtë e degës numër 5 të Partisë Demokratike në Tiranë.

Njoftim për shtyp e Partisë Demokratike, 2 Maj 2015

Kryetari i Partisë Demokratike Lulzim Basha deklaroi nga qyteti i Durrësit se nuk ka bandit dhe kriminel që ta ndalë uraganin e fitores së shqiptarëve më 21 qershor. Pas një takimi me qytetarë durrsakë duke iu referuar dhunës së ushtruar ndaj të rinjve demokratë një ditë më parë, zoti Basha theksoi se është shenjë dëshpërimi e Ramës, Metës dhe Dakos për humbjen plebishitare që i pret më 21 qershor.

“Ky përbashkim i madh i durrsakëve rreth alternativës sonë, rreth ofertës sonë të re, rreth Partisë Demokratike, aleatëve tanë dhe kandidates sonë fituese Grida Duma, ka shkaktuar dëshpërim të thellë tek kundërshtarët tanë politikë. I dëshpëruar është Edi Rama, i dëshpëruar është Ilir Meta, i dëshpëruar dhe i kërrusur është Gjushi që mendon se e ka marrë me tapi Durrësin, por që e di se ditët dhe orët në krye të abuzimit me pushtetin i ka të numëruara. Edhe 51 ditë dhe durrsakët do të çojnë në shtëpi Gjushin pasi nuk ka bërë as punësim, s’ka rritur mirëqenien, s’ka bërë as investime. Ka ardhur ora të japë llogari dhe nuk do t’i shmanget ndëshkimit që do t’i japin durrsakët më 21 qershor.  Ndaj e ka zënë frika , e ka zënë paniku, siç i ka zënë të gjithë këta, në vend që të përballet me qytetarët,  në vend që të japë llogari para qytetarëve. Çfarë bën, sulmon fushatën e Partisë Demokratike. I vërsulet me banda dhe me banditë të rinjve tanë të guximshëm, kurajozë dhe fitimtarë. Sulmi i bandave të djeshme mbi fushatën e Partisë Demokratike është mbi të gjitha dhe para së gjithash shenja e frikës  së humbjes së pashmangshme të Vangjush Dakos. Humbja është e pashmangshme sepse durrsakët nuk mund ta pranojnë më të keqen.  Kanë vendosur të ndahen nga e keqja, kanë vendosur të përqafojnë të mirën, ofertën tonë , programin tonë, kandidaten tonë, Grida Dumën , Partinë Demokratike dhe opozitën. Ndaj, çfarëdo që të bëjnë nuk i shpëtojnë dot verdiktit popullor të qytetarëve të Durrësit.

I bëj thirrje prokurorisë ta vërë banditin dhe banditët që agresuan dje të rinjtë demokratë, pa vonesë prapa hekurave dhe para drejtësisë. Nuk ka bandit, nuk ka kriminel të ndalë cunamin që ka nisur anembanë Shqipërisë për të përmbysur regjimin e varfërisë, regjimin e poshtërisë dhe talljes së shqiptarëve.  Ne nuk kemi frikë sepse na pret fitorja, na pret shpresa për të nesërmen, na pret besimi për një të ardhme më të mirë”, theksoi zoti Basha.

Entuziazmi i fitores tha zoti Basha ndjehet në çdo cep të Shqipërisë sepse qytetarët përballen sot me sfidën e mbijetesës. Rritja e nivelit të papunësisë ka zhytur shqiptarët në borxhe për bukën e fëmijëve dhe çfarë është më e keqe, nuk kanë asnjë shpresë se situata do të jetë më mirë në muajt që vijnë.

Shkaku i varfërisë suaj, që është pabesia dhe poshtërimi dhe premtimet e pambajtura të 23 qershorit, që janë taksat e larta, çmimet e larta, diskriminimi, moszbatimi i ligjit njësoj për të gjithë ju, që është papunësia e ngritur në themel të një regjimi që pasi ju merr bukën e gojës, do t’iu blejë dinjitetin me thes me miell, do t’i japim fund me votën tonë, të djathtë e të majtë, të gjithë të bashkuar. Ndaj, theksoi zoti Basha, frika që i ka kapur, sa vjen e do të shtohet.

“Boll kanë qëndruar të heshtur qytetarët duke parë ditë për ditë se si shtohej trashja e zullumit, boll kanë qëndruar kokulur para fëmijëve duke numëruar kacidhet e fundit akoma pa u mbyllur muaji, 88% e durrsakëve, 88% e shqiptarëve besojnë se 6 mujori i ardhshëm me këtë qeveri do të jetë më i keq se 6 mujori që po lëmë pas. 1 në 3 familje shqiptare merr borxh ditë për ditë për bukën e gojës, ndërkohë që Gjushi dhe klientela e tij krihen  në projekte luksi dhe korrupsioni. Si është e mundur? Kurrë nuk është e mundur në mes të Europës të mbijetojë një regjim i tillë dhe tani që po ju vjen fundi i kanë kapur sëmundjet e vjetra të baballarëve të tyre politikë, kanë filluar të fajësojnë popullin, a thua se e ka fajin populli që e kanë detyruar të marrë borxh për bukën e gojës, a thua e ka fajin populli që 7 në 100 durrsakë kanë humbur vendet e punës në dy vitet e fundit që kur erdhi kjo e keqe në pushtet. A e ka fajin populli për mijëra e mijëra të tjerë  të cilët kërkojnë punë ditë për ditë, por nuk gjejnë dot. Por ciniku, kryeministri i së keqes si një kloun thotë: Punë ka, por populli shqiptar është popull dembel dhe nuk di ta kërkojë punën. Unë ju them se puna do të vijë, mirëqenia do të vijë,  të ardhurat do të vijnë, lekët do të vijnë, taksat do të ulen, çmimet do të rriten kur këta bashkimbuzukë do t’i çojmë në shtëpi me votën tonë plebishitare më 21 qershor”, theksoi zoti Basha.

Optimizmi i fitores dhe shpresa e shqiptarëve për t’u ndarë nga e keqja më 21 qershor, ndjehet në çdo cep të vendit dhe është e pathyeshme, tha lideri i opozitës sipas të cilit, nga jugu në veri shqiptarët janë bashkuar si asnjëherë më parë kundër të keqes në pushtet.

“Është e mahnitshme sesi njerëzit akoma pa nisur zyrtarisht fushata elektorale janë bashkuar rreth kësaj kandidature, rreth këtij vizioni, rreth këtij ekipi, rreth kësaj alternative për Durrësin dhe durrsakët njësoj si do të bashkoheshin në një familje të madhe politike dhe biologjike. Kjo ka ndodhur vëllezër dhe motra, sepse këtu në Durrës shtypja është e dyfishtë, varfëria është e dyfishtë, papunësia është e dyfishtë, përpjekja për të vrarë shpresën është e dyfishtë, ndaj edhe reagimi është i dyfishtë, revolta është e dyfishtë dhe fitorja do të jetë e dyfishtë. Do të jetë fitore plebishitare kundër qeverisë së lakut në fyt. Më 21 qershor durrsakët të zgjuar dhe të bashkuar në këmbë , të djathtë e të majtë, do të votojnë kundër qeverisë të së keqes, kundër mjerimit, kundër papunësisë, kundër shtypjes, kundër varfërisë. Do të votojnë sepse e keqja ka kapur prej fyti  këtë qytet, i ka kapur prej fyti njerëzit dhe nuk po i lëshon. Duart do t’i heqin nga fyti qytetarëve, lakun do ta heqin nga fyti qytetarëve me votën e bashkuar të 21 qershorit. Kërbaçin do t’ja heqin nga duart me votën tonë të bashkuar më 21 qershor. Nuk ka forcë të na ndalë sepse kjo nuk është më një fushatë politike, nuk është më fushatë e një partie, kjo është një fushatë misionare e të gjithë qytetarëve të Durrësit e të gjithë Durrësit të bashkuar për të nesërme më të mirë dhe për fitore “, theksoi kryetari i PD.

Kandidatja e Partisë Demokratike për bashkinë e Durrësit Grida Duma, shprehu besim se më 21 qershor shqiptarëve do t’u kthehet shpresa, besimi, puna dhe dinjiteti.

“Sot jemi në një situatë katastrofike. Durrësi është më i varfër se mesatarja e Republikës së Shqipërisë ndonëse Durrësi është qyteti më i pasur për burime, me portin e mrekullueshëm, me plazhin e turizmin, që arrin në 400 mijë turistë në verë. Sot ky qytet mposhtet nga e keqja e të shkurtërve. Kam prekur duar e njerëz të vuajtur. Kam ecur në gjithë rrethinat e këtij qyteti, janë ndier dhe ndihen të frikësuar për të ardhmen e tyre dhe të zhgënjyer për të ardhmen e tyre. Duhemi të gjithë ne t’i kthejmë njerëzve besimin që ditët e mira na presin. Kanë nevojë së pari të ngrihen në mëngjes dhe të kuptojnë se ashtu siç e ka bekuar zoti këtë qytet, do të bekojë jetët e tyre me ne.  Ne do i sjellim qytetit shpresën, besimin, do i kthejmë njerëzve dinjitetin se me ata dhe vetëm ata do lulëzojmë këtë qytet”, theksoi kandidatja e PD-së për bashkinë e Durrësit Grida Duma.  

Njoftim për shtyp i Partisë Demokratike, 2 Maj 2015