Blog

Në bilancin e punës së tij kandidati për Bashkinë e Tiranës Veliaj, tha se edhe Tirana meriton pjesën e vetë të Rilindjes.

Pasi guxoi të tallej një javë më parë me qytetarët shqiptarë duke u treguar se jashtë shtetit jetohet më mirë, sot guxon të tallet edhe me qytetarët e Tiranës duke u thënë se ata meritojnë një pjesë të Rilindjes.

Cilën pjesë të Rilindjes meritojnë?

Atë që prish shtëpitë dhe bizneset e ndërtuara me djersën e ballit, ndërkohë që kryeministri dhe deputetët e tij ndërtojnë saraje sipas qejfit.

Atë që u merr shtëpinë, por nuk paguan dritat siç bënë sot me ligjin që kaluan në parlament, apo ata që i fut në burg me këtë rast.

Atë që burgjet i ka mbushur me qytetarë të ndershëm shqiptarë, ndërkohë që qytetet i ka plotë me kriminelë që lëvizin lirshëm rrugës.

Cilën pjesë të Rilindjes meritojnë qytetarët e Tiranës?

Atë që nuk i hapi 300 mijë vende pune siç premtoi ministri, apo atë që rriti papunësinë në 18 përqind në vetëm 2 vjet, ku 34 përqind prej tyre janë të rinj shqiptarë.

Atë që largon bizneset e huaja nga Shqipëria, apo atë që u rrit çmimin e dritave, naftës dhe ushqimeve qytetarëve shqiptarë.

Atë që nuk krijon mundësi punësimi, por që heq nga skema e ndihmës ekonomike mbi 20 mijë familje të varfra shqiptare.

Atë që kandidati Veliaj del në foto me Pamelën e vogël në Lezhë, por që pas fushate e lë të vdesë nga i ftohti dhe nga skamja, apo atë pjesë të Rilindjes ku ministri del në foto me fëmijën rom, por mijëra të tjerë të këtij komuniteti i ka në gjendje të mjerueshme jashtë kamerave.

Apo atë ku kandidati Veliaj vë alarmin në mbarë botën dhe Europën për përrallën e Griseldës në Kavajë, por qytetarin shqiptar në ambulancë e lë të dergjet buzë rruge?

Apo atë ku shqiptarët nuk kanë as bukë, as punë, ndërkohë që vetë ministri e miqtë e tij pasurohen në kurriz të taksapaguesve shqiptarë dhe të ministrisë së mirëqënies personale.

Jo. Tirana nuk e meriton në mënyrë absolute pjesën e vetë të rilindjes. As shqiptarët nuk e meritojnë, ndaj boll u tallën me shqiptarët në 2 vite duke u ofruar atyre përrallën e rilindjes. Tirana nuk ka nevojë as për ministrin e rilindjes që bilancin më pozitiv në 2 vjet ka vetëm fotot që nxjerr në facebook dhe propagandën e reklamave në media, gjë që në fund të ditës nuk u jep as bukë, as punë, as dinjitet, qytetarëve të Tiranës dhe mbarë Shqipërisë.

Deklaratë për media e deputetit të Partisë Demokratike, Gerti Bogdani, 30 Prill 2015

 ·  Padurimi i njerëzve për të votuar është padurimi për të dalë nga kjo gjendje, është revoltë kundër qeverisë, është shpresë për një të ardhme tjetër, të re, të mirë. 21 qershori është dita e gjykimit të madh të kësaj qeverie.

·  Falë kundërshtimeve të opozitës dhe ndoshta edhe për taktikë elektorale qeveria ka bërë një hap prapa  në lidhje me këtë  projektligj  të turpshëm. Nëse kjo tërheqje do të konfirmohet, kemi arsye të regjistrojmë një tjetër fitore të opozitarizmit në mbrojtje të interesit publik.

·  Këto zgjedhje janë guri i provës, i vullnetit, i seriozitetit, i vendosmërisë dhe i lirisë për tu ndarë  me  akte dhe me ligj nga pengmarrja kriminale, nga ndërvartësia ndaj krimit të organizuar, nga aleancat e ndyra me individë me rekorde kriminale, nga  kandidimi në zgjedhjet vendore i personave nga kjo kategori.

·  Njerëzit e thjeshtë në Shqipëri s’po gjejnë më derman as duke  kërkuar ushqime  me listë, ndërsa kandidati socialist për Bashkinë e Poliçanit, Adriatik Zotka është kallëzuar penalisht për fshehje të 1.5 milionë eurove.

·  Qytetarët burgosen dhe shtyhen drejt vetëvrasjes për 30 mijë lekë të vjetra, ndërsa trafikantët e drogës dhe prostucionit janë sot kandidatë për kryebashkiakë, si Artur Bushi në Krujë, Ervin alias Elvis Roshi në Kavajë e gjetkë.

·  Asgjë nuk do t’a ndalë procesin e dekriminalizimit. Partia Demokratike ka kërkuar dhe kërkon të procedohet me shpejtësi për miratimin e amendamentit ligjor që pengon kandidimin e të inkriminuarve.

Fjala e plotë e Kryetarit të Partisë Demokratike Lulzim Basha në mbledhjen e Grupit Parlamentar të PD:

Të nderuar deputetë,

Më lejoni të ndaj sot, në këtë takim të përjavshëm, një lajm  shumë të mirë  të cilin po e ndjej, po e  shoh, po e prek, po e jetoj bashkë me ju,dhe me disa prej anëtarëve të grupit tonë të cilët në këtë moment janë në takime elektorale  me aleatët tanë,  me  kandidatët tanë për kryetarë bashkish, me  stafet e tyre elektorale në mbarë vendin.

Ka një dëshirë të madhe, ka një padurim të qytetarëve për të votuar. Rrallë ka ndodhur gjatë 24 viteve të hapjes demokratike që fushatat të kulmojnë akoma pa nisur mirë akoma, që prezantimi i kandidatëve të Partisë Demokratike dhe opozitës  të shndërrohet në një vërshim e një marshim popullor, të protestës kundër qeverisë Rama-Meta, në një manifestim popullor të shpresës, në manifestim të  bashkimit pa dallime politike rreth  kandidatëve tanë, rreth ofertës  sonë.

Pse ky padurim? Pse ky  vërshim? Pse ky plebishit i përditshëm në qiell të hapur? Pse ky  bashkim rreth opozitës dhe kandidatëve të saj? Përgjigja nuk mund te jetë tjetër veç  asaj që na pohojnë qytetarët në  këto takime.

U ka ardhur ku nuk mban më.

Laku në fyt dhe thika në palcë, këtu i katandisi qeverisja Rama-Meta.

Padurimi i njerëzve për të votuar është padurimi për të dalë nga kjo gjendje, është revoltë kundër qeverisë, është shpresë për një të ardhme më të mirë, të re dhe të ndryshme nga e sotmja.

Përgjatë dy viteve qeveria ka bërë çfarë ka dashur me qytetarët, pa i pyetur, pa u marrë mendim, pa u dhënë shpjegime, pa u kërkuar ndjesë për gënjeshtrat dhe mashtrimet elektorale.

Përgjatë dy viteve qeveria Rama-Meta i ka dhunuar dhe poshtëruar sistematikisht njerëzit, duke  duke  u  hedhur në  kurriz  si peshqesh të zi varfërinë, arrogancën dhe dhunën.

Përgjatë dy viteve qeveria Rama-Meta ka patur në dorë edhe gurin dhe arrën kundër qytetarëve.

Kjo është një histori e dhimbshme, të cilën shumica dërrmuese e shqiptarëve e kanë të shkruar në lëkurë.

Por kjo  histori nuk mund të vazhdojë pa fund. Asnjë qeveri nuk mund të nxjerrë nga skena qytetarët, asnjë qeveri nuk mund të nxjerrë nga loja demokracinë.

Më 21 qershor e kanë  rradhën qytetarët.

Më 21 qershor e kanë  fjalën njerëzit.

Qytetarët janë ndergjegjësuar si asnjëherë tjetër se zgjedhjet janë dita e tyre, janë  mjeti i tyre, janë  instrumenti i tyre për të ndryshuar gjendjen.

Njerëzit  janë ndërgjegjësuar si asnjëherë tjetër për fuqinë sovrane  dhe pa çmim të votës së lirë.

Njerëzit  mezi po presin të marrin hak, t’i japim hakun, domethënë një mësim për t’u mbajtur mend, qeverisë që u uli kokat prindërve para fëmijëve, që u dha  rrugët e botës pas 25 vjetëve shqiptarëve.

21 qershori nuk është një ditë e zakonshme zgjedhjesh. 21 qershori është dita e gjykimit të madh të kësaj qeverie.

Do të pranohet, apo do të refuzohet me votë të lirë modeli i mashtrimit.

Do të pranohet apo do të refuzohet me votë të lirë modeli i kërbaçit.

Do të pranohet apo do të refuzohet me votë të lirë modeli i varfërisë dhe i korrupsionit.

Do të pranohet apo do të refuzohet me votë të lire ngritja e krimit në sistem.

Do të pranohet apo do të refuzohet me votë të lirë zhdukja e pushtetit vendor nga oligarkët Rama-Meta, që kanë vizatuar një hartë të çifligjeve të ëndërruara, por ligjin e decentralizmit nuk e bënë kurrë.

Kemi bindjen e plotë se qytetarët nuk do ta bekojnë, kurrsesi nuk mund ta bekojnë me votë këtë model të të keqes së tyre, por do ta ndalojnë, do ta delegjitimojnë në kutitë e votimit, do ta hedhin pas si një aksident të historisë sonë.

21 qershori është dita e ndëshkimit të madh të kësaj qeverie.

T’i ndalim, kjo është thirrja e bashkimit të shqiptarëve në barrikadën më të madhe të lirisë dhe demokracisë gjatë gjithë këtyre viteve.

21 qershori është dita e bashkimit të madh të shqiptarëve rreth aspiratës së tyre për punë, zhvillim dhe dinjitet, rreth ofertës sonë të re.

Kam kënaqësinë të pohoj para jush se axhenda opozitare e dy viteve të opozitës sonë të re është bërë një axhendë mbarëpopullore. Edhe socialistët, ata që nuk janë pjesë e tenderave dhe llokmave në panairin e krimit dhe korrupsionit qeveritar, janë në një mendje me ne për të gjitha problemet që kemi shtruar e po shtrojmë për rendin dhe sigurinë, ekonominë, arsimin, shendetësinë, papunësinë,  eksodin, borxhin, etj. E vërteta e mbështetur me fakte, argumente dhe arsye nuk mund të mos jetë përbashkuese, gjithmonë e më përbashkuese.

Ndaj në  padurimin  e natyrshëm të votuesve tanë për të shkuar një orë e më parë në zgjedhje shohim të  jenë bashkuar, po aq të paduruar, qindra mijëra qytetarë të lirë, qindra mijëra zgjedhës të zhgënjyer me qeverinë që kanë votuar para dy vjetësh.

Ky entuziazëm, ky padurim për të votuar  është për ne, Partinë Demokratike dhe opozitën,  momenti i një përgjegjësie të shumfishtë për t’i prirë deri në fund stuhisë që është ngritur për të ndëshkuar qeverinë, për të drejtuar  me  besnikëri  shpresën që paralajmëron ndryshimin, për të diktuar që në  këto zgjedhje, me fuqinë e votës popullore, ofertën tonë uljen e çmimit të energjisë, uljen e çmimit të karburanteve, uljen e taksave, uljen e  informalitetit,  mbylljen e  shpenzimeve dhe investimeve të luksit e korrupsionit, ofertën tonë të re për punë dhe dinjitet.

Rama-Meta nuk kanë fytyrë t’u dalin para qytetarëve. Takimet dhe prezantimet e tyre nuk janë manifestime të lira të qytetarëve, por inskenime të sforcuara me regji të sforcuar, nuk janë festa të shpresës, por funerale zie.

Pavarësisht propagandës, të cilën e kanë shtuar dhe do ta shtojnë dita -ditës sepse propagandën e kanë zanat dhe në propagandë i kanë mbështetur shpresat. Realiteti i sfidon orë pas ore, përkeqësimi u përplaset në  fytyrë ditë pas pas dite, duke i shumëzuar  me zero llafet e tyre të bukura.

Shikoni çfarë ndodh në dogana.  Importet janë rritur sipas INSTAT-it, por të ardhurat për muajin mars ranë në 70 përqind të planit. Marsi më keq se shkurti, prilli pritet të jetë më keq se marsi.  Është dështimi që kemi paralajmëruar ne,  është dështimi për të cilin kemi folur në rrafshin e  mbledhjes së të ardhurave nga qeveria. Por kjo që po ndodh në dogana nuk  mund të quhet më dështim. Është një vjedhje e përmasave gjigante e parave që duhej të shkonin  në arkën e shtetit.

Ku shkojmë kështu? Çfarë janë këta që rrisin në qiell taksat dhe mbledhin më pak para për buxhetin? Ç’janë këta që sillen si kaçakë me kollare dhe vula  me  mallrat  që hyjnë dhe dalin nga vendi?

Çfarë janë këta që marrin të tretën për xhepat e tyre dhe për shefat e tyre?  Si opozitë e përgjegjshme kemi detyrimin para publikut që, duke filluar që sot t’u  kërkojmë  shpjegime dhe  llogari, t’i vëmë para fakteve dhe t’i denoncojmë  me  argumente  për këtë situatë  paprecedent  në doganat e vendit.

Ja ku është një nga shkaqet e mëdha të përkeqësimit dhe varfërisë. Tallen, eksperimentojnë me kukulla, abuzojnë, vjedhin. Qytetarët nuk mashtrohen më nga propoganda e tyre. Propaganda e tyre xhiron në baltën e mashtrimeve, dështimeve dhe abuzimeve.

E dimë shumë mirë se gjatë  dy muajve që na ndajnë nga zgjedhjet, qeveria do të bëjë çmos të mpijë padurimin  e njerëzve për të votuar, do të bëjë çmos të  godasë  entuziazmin  dhe optimizmin e tyre për ndryshim , do të bëjë çmos të shkurajojë shpresën e tyre, do të bëjë çmos të  mashtrojë përsëri, duke hedhur në veprim  me frenezi  makinerinë e saj propagandistike të  shplarjes së truve, të premtimeve në hava, të  shpifjeve dhe  përbaltjes së  kundërshtarëve.

Qeveria e ka tmerr padurmin e njerëzve për të votuar.  Ndaj do të bëjë çmos ta vrasë këtë padurim.

Nuk do ta lejojmë. Është në dorën tonë të mbajmë gjallë  dhe të rrisim përditë si një ortek besimin e njerëzve në fuqinë  sovrane të votës. Me frymëzim, me kurajo, me  përkushtim, me bashkim, me qytetari, me ofertë, me programe, me këmbët në tokë, kjo është fushata jonë.

Në këtë kuadër grupi  ynë parlamentar ka një rol të dorës së parë për të vazhduar në aulën dhe tribunën e Kuvendit, mbrojtjen pa kompromis të interesit publik. Javën e kaluar dhe sot është në diskutim Projektligji “Për sektorin e energjisë elektrike” që parashikon  vendosjen e barrës hipotekore të sekuestros nga vetë OSHE mbi banesat e qytetarëve shqiptarë, që  kanë krijuar një detyrim prej 300 mijë lekë apo biznesin që ka krijuar një detyrim  200 mijë lekë.

Deri këtu ka shkuar marrëzia e qeverisë. Të aplikojë një masë që përbën ndërhyje flagrante në të drejtën kushteteuse të shtetasve.  Urdhërat e bandës së OSHE-së të dalin mbi kushtetutën!

Në asnjë rast dhe për asnjë rrethanë cënimi i së drejtës së pronësisë së një personi privat nuk mund të kryhet nga kreditori, thotë ligji.  OSHE është një subjekt privat, pa asnjë kompetencë për të vepruar mbi pronat e shqiptarëve. Çdo detyrim që i jep kësaj shoqërie statusin e kreditorit, duhet të vihet në ekzekutim nga mjetet e parashikuara nga ligji, njëlloj siç veprohet me çdo kreditor që pretendon ekzekutimin e një detyrimi në të holla.

Ky parashikim është arbitrar dhe cënon drejtpërdrejt të drejtën e pronës së qytetarëve shqiptar dhe bizneseve shqiptare. Kjo dispozitë është antiligjore  e antikushtetuese, antinjerëzore, antipopullore .

Falë kundërshtimeve tona dhe ndoshta edhe për taktikë elektorale qeveria ka paralajmëruar një hap prapa  në lidhje me këtë  projektligj  të turpshëm. Nëse kjo tërheqje konfirmohet, kemi të arsye të regjistrojmë një  tjetër fitore të opozitës në mbrojtje të interesit publik.

Por duhet të jemi të përgatitur për betejë, sepse kjo qeveri e ka zakon pabesinë. Duhet t’ua bëjmë të qartë qytetarëve se nëse qeveria detyrohet të bëjë një hap prapa sot në  prag të fushatës,  ajo do ta shumëfishojë arbitraritetin e saj nesër,   nëse mbështetet me votë në zgjedhje. Duhet të lançojmë në çdo aulë të komunikimit publik ofertën tonë, këmbënguljen tonë për uljen e çmimit  të energjisë elektrike dhe faljen e kamatvonesave.

Të  nderuar deputetë,

Dekriminalizimi ka qenë një imperativ për jetën politike dhe shoqërore në vend që ditën kur grupi ynë parlamentar ia doli ta vendoste në axhendën e politikës kombëtare dhe në atë të partnerëve tanë amerikanë dhe europianë. Sot, në  prag të zgjedhjeve vendore, dekriminalizimi është më imperativ se kurrë. Këto zgjedhje janë guri i provës për  vullnetin, seriozitetin dhe vendosmërinë  për tu ndarë  me  akte dhe me ligj nga pengmarrja kriminale, nga ndërvartësia ndaj krimit të organizuar, nga aleancat me individë me rekorde kriminale, nga  kandidimi në zgjedhjet vendore i personave nga kjo kategori.

Ne kemi qenë dhe jemi të përkushtuar në angazhimet tona dhe nuk mund  të jetë ndryshe një forcë që e ka  denoncuar, ngritur dhe shtruar për zgjidhje problemin e  madh të krimit  në pushtet.

Nga ana tjetër, dyshja Rama-Meta që e ka krijuar problemin në përmasat troditëse që tashmë e njeh gjithë bota, në vend që të punojë e kontribuojë  për zbatimin pa humbur kohë të  angazhimeve, të shkruara me  ndërmjetësimin  e Brukselit, vazhdon të jetë e përfshirë në një një përpjekje  të vazhdueshme,  në lloj-lloj formash e mënyrash, për të penguar procesin e  dekriminalizimit.

Për një kohë të gjatë kanë zvarritur dhe sabotuar punën normale të komisionit parlamentar, duke nxjerrë pretekste dhe bishta.  Tani, ndërsa deputetët tanë kanë formuluar amendamentet ligjore për pengimin e kandidatëve me rekorde kriminale në zgjedhjet vendore, dyshja Rama-Meta po e sfidon hapur këtë proces, me akte dhe me gjeste.

Njerëzit e thjeshtë  në Shqipëri s’po gjejnë më derman, as duke  kërkuar ushqime  me listë, por kandidati socialist për Bashkinë e Poliçanit, Adriatik Zotka, është kallëzuar penalisht për fshehje të 1.5 milionë eurove.

Qytetarët burgosen dhe shtyhen drejt vetëflijimit për 30 mijë lekë të vjetra, por trafikantët e drogës dhe prostucionit janë sot kandidatë për kryebashkiakë, si Artur Bushi në Krujë, Ervin alias Elvis Roshi në Kavajë e gjetkë.

Asgjë nuk do t’a ndalë procesin e dekriminalizimit. Partia Demokratike ka kërkuar  dhe kërkon të procedohet me shpejtësi, pa asnjë vonesë për miratimin e amendamentit ligjor që pengon kandidimin e të inkriminuarve.

Dua me ketë rast të shpreh, mirënjohjen e veçantë timen dhe të Partisë Demokratike për  ndihmën dhe mbështetjen e madhe që po i jep Shqipërisë në sfidën e  dekriminalizimit, Ambasada e Shteteve të Bashkuara të Amerikës në Tiranë.

Sfida e ditës sot, është largimi i subjekteve të dekriminalizimit nga listat e kandidatëvë për pushtetin vendor. Ne  kemi treguar emra, kemi publikuar   prova dhe fakte që implikojnë kandidatët e dyshes së Edi Ramës.

Fjalët në erë nuk vlejnë. Nuk ka  më kohë për akrobacira.  Me krimin e veshur me pushtet dhe me pushtetin e veshur me krim, vendi vetëm vijon të humbë në imazh, në rrafshin e lirive dhe të drejtave, në çeëhtjet e rendit dhe sigurisë, në zhvillim, dhe në çdo fushë tjetër

Në këto kushte, duke mos u tërhequr asnjë milimetër dhe për asnjë çast nga angazhimi  ynë për dekriminalizimin e jetës politike dhe institucionale të vendit  përmes një ligji konsensual, përsëris bindjen dhe thirrjen tonë drejtuar qytetarëve të vendit, për ta zgjidhur  me votë të lirë  këtë problem  jetik për të ardhmen e tyre dhe të fëmijëve të tyre.

Asnjë votë trafikantëve! Asnjë votë tutorëve të prostitucionit! Asnjë votë kriminelëve dhe vrasësve nga bota e errët e krimit të organizuar.

Faleminderit

Njoftim për shtyp i Partisë Demokratike, 30 Prill 2015

Kandidati për kryebashkiak në Tiranë, Halim Kosova, u takua me banorë dhe ekspertë të fushës së zhvillimit urban në Kashar, ku ndau me ta ide dhe mendime për të ardhmen e kësaj zone. Kosova tha se është shumë i interesuar të dëgjojë nga afër qytetarët për të përfshirë në program kërkesat e tyre.

“Do të isha vërtet shumë i kënaqur që mendimet e qytetarëve të Tiranës, kudo ku ata banojnë, të pasqyrohen në projektet tona sepse në fund të fundit Bashkia punon për qytetarët dhe për gjithë zonat që e rrethojnë Tiranën”.

“Në zonën tonë ka një liqen. Ai liqen ka ngelur i vdekur siç ka qenë para 30, 40 vjetësh. Po të vihet dorë atje, me një rrugë rreth e rrotull, ajo bëhet gjë fantastike për të gjithë fshatin”, u shpreh një banor.

“Atë program, ato projekte t’i bëjmë realitet. Dhe unë mendoj që këtu vuan Shqipëria. Nuk vuan për të shkruajtur letra, për të bërë programe por ato duhen çuar tek qytetari. Tek qytetari çohen duke u bërë realitet. Që çdo njeri duhet ta dijë, aty ku banon, që po fillon ky projekt sot dhe për kaq kohë do të mbarojë”, tha kandidati Kosova.

Në Kashar janë të shqetësuar se çfarë do të ndodhë me projektet dhe punët e nisura, tani që komuna do të shkrihet me ndarjen e te territoriale.

“Facilitetet, pikat e kontaktit nuk do të humben. Edhe planet që janë bërë nuk do të humben. E rëndësishme është që ato plane të integrohen në një plan të vetëm dhe nga ana tjetër, ndonjë koment, kritikë, ndonjë sugjerim, ndonjë problem real që ka dalë, të përmirësohet në mënyrë që Plani i Përgjithshëm të lehtësojë punën dhe jo ta mbajë të bllokuar”, u shpreh Besnik Aliaj i pranishëm në takim.

“Ajo që mua, si eksperte ndërtimi, më shqetëson është se si do bëhet, ose se si do ishte më e mira për tu bërë, kombinimi i të dyja planeve ose i shumë planeve studimore që janë zhvilluar si për Tiranën ashtu edhe për komunat që do ti bashkohen Tiranës”, tha një inxhiniere ndërtimi.

“Ideja ime është që duke i lënë një lloj autonomie të gjitha qendrave, autonomi por e kontrolluar dhe e kombinuar, do të bëjmë që çdo njeri ose çdo komunë ose çdo individ të ketë mundësi të eci përpara”, deklaroi Halim Kosova

“Tapitë falas! S’ka falas. Ja la hajdutëve, burgaxhinjve, maskarenjve ia la Edi Rama”, revoltohet një banor i Kasharit.

Halim Kosova tha se: “Nuk ka shembull më të keq, për çdo qytetar të këtij vendi, që djersa të groposet dhe abuzimi të lulëzojë”.

Duke u ndalur tek vizioni i tij për Tiranën, Halim Kosova theksoi se ka hyrë në këtë garë për të shërbyer, për të dhënë, për të bërë më të mirën.

“Tirana nuk është e imja, të gjithë duhet të konsiderojmë që Tirana është e imja. Nëqoftëse më thotë njeri që je qytetari i parë i Tiranës, absolutisht nuk e pranoj këtë. Unë jam një njeri që kam pranuar të marr mbi vete përgjegjësi në mënyrë që të bëjmë më të mirën për qytetin tonë. Unë jam i sigurtë se sëbashku do të ndërtojmë një Tiranë moderne dhe Europiane”, u shpreh Halim Kosova.

Njoftim për shtyp i Partisë Demokratike, 30 Prill 2015

Kandidatja për Bashkinë e Durrësit, Grida Duma takoi gratë dhe vajzat e një prej bizneseve fason në qytet. Duma u shpreh se Durrësi ka një shans për ti kthyer shpresën e për të pasur më shumë punë.

“Nuk do t’u them më jepni votën mua sepse atë do e bëni si ta ndjeni vetë. Ajo që unë kam detyrë të them është që kemi një shans. E kemi bashkë këtë shansin sot të bëjmë dy gjëra të mëdha. Ta bëjmë Durrësin siç e meriton një qytet që të sjellë më shumë punë, për fëmijët dhe për vetë ne me një rrogë më dinjitoze. Dhe këtu falenderoj me mirënjohje biznesin që arrin të mbijetojë edhe në kushte të vështira”, tha Duma.

Kandidatja për Durrësin shtoi se qyteti dhe rrethinat e tij në bashkinë e re, kanë një potencial të vërtetë për të dalë nga varfëria. Ajo tha se do të punojë për një model tjetër, më afër qytetarëve dhe biznesit

“Jetoni në një qytet të mrekullueshëm. Realiteti i një qyteti me port. Realiteti e një qyteti me plazh. Realiteti e një turizmi që mban gjithë turizmin e Shqipërisë përfundon që të jetë më i varfër në përgjithësi se sa mesatarja e Shqipërisë. Nuk mund dhe duhet të mbarojë ku skalvari që skeni shpresë nesër. Kam ardhur me shpirt për ta marrë Bashkinë e Durrësit, për të pasur një model si ne, për të pasur një model me dashuri. Ajo që ju kërkoj është hajdeni me mua në një projekt tjetër, në një tjetër qytet dhe të bëjmë me mirënjohje ndaj këtij biznesi dhe ndaj shumë bizneseve të tjera, një gjë që të nesërmen ta ketë më të mirë”, tha Duma.

Ajo mori mbështetjen e grave dhe vajzave të pranishme duke shpresuar tek modeli ndryshe e zonjës Duma. “Shpresa vdes gjithmonë e fundit. Ne shpresojmë dhe kemi besim të plotë tek ju. Dhe shpresojmë që çdo gjë të realizohet. Ne do të jemi gjithmonë pas jush”, tha një punonjëse.

Njoftim për shtyp i Partisë Demokratike, 30 Prill 2015

Kryetari i Partisë Demokratike Lulzim Basha prezantoi kandidatët për kryetarë bashkie në Lushnje z.Darien Xhindoli, në Kavajë z.Engjëll Cara, në Rrogozhinë z.Eqrem Deliu dhe Divjakë z.Irakli Gorea.

Kryetari i Partisë Demokratike theksoi se vota e 21 qershorit  është dhe duhet të jetë vota plebishitare e ndarjes nga politika e lakut në fyt  dhe politikës së gabuar që ka çuar qytetarët në kufijtë e mbijetesës. Ndërsa qytetarët përballen sot me sfidën e bukës së gojës dhe të vetmen shpresë kanë  emigrimin,  kryeministri turist bredh nga njeri vend i botës në tjetrin duke injoruar një popull të tërë të cilin e ka zhytur në varfëri dhe mjerim.

“Ne sot përballemi me qytetarët në Lushnje dhe në gjithë Shqipërinë, që nga mungesa e shpresës kanë marrë rrugët e kurbetit. Qytetarët ikin nga varfëria, Edi Rama ikën sepse nuk do të dëgjojë dhe nuk do të shikojë sepse nuk ia ndjen për problemet e qytetarëve. Le t’i japim fund këtij regjimi të pashpirt. Asnjë të mos qëndrojë në shtëpi, të gjithë bashkë, të djathtë e të majtë t’i themi jo skllavërisë së re”.

Nga Kavaja kryetari i PD-së theksoi se bashkimi i shqiptarëve do ta ndalë të keqen dhe krimin që ka depërtuar deri tek nivelet më të larta të drejtimit të qeverisjes.

“Kudo shoh e prek stagnacionin, ecjen mbrapa, depresionin ekonomik, papunësinë dhe vrasjen e shpresës që janë gjëmat e mëdha të Rilindjes së Ilir Metës, Edi Ramës dhe Ervin Alias Elvis Rroshi. Në 21 qershor është ora juaj. Forca juaj është e papërballueshme nga çdo oligark, është e papërballueshme nga çdo kriminel, nga çdo pazarxhi, është forca e ndryshimit njëherë e përgjithmonë”, theksoi Basha.

Në Rrogozhinë qytetarët i shprehën z.Basha revoltën e tyre për prishjen e ndërtimeve  pa asnjë paralajmërim dhe pa asnjë kompesim. Z.Basha theksoi se qytetarët kanë sot një qeveri që kujdeset vetëm për të zbrazur xhepat e qytetarëve dhe mbushur xhepat e saj.

“Në këto dy vite asnjë vend i ri pune nuk është hapur, përkundrazi, mijëra vende pune janë mbyllur për shkak të politikës të taksave të larta, të arbitraritetit dhe të arrogancës së qeverisë. Ndërkohë që qeveria bën goditje selektive, sheshon dhe godet banesat, bizneset e të pamundurve. Ndërkohë që sarajet e klientëve dhe miqve të tyre hedhin shtat në Rrogozhinë, në Kavajë, në Surrel, në Qeparo dhe gjithë Shqipërinë”.

Çdo qytetar, theksoi kryetari i Partisë Demokratike, i majtë e i djathtë, është sot i zhgënjyer, i mashtruar nga kjo qeveri. U mori votën me premtime të mëdha, por sot i vetmi rezultat është eksodi.

“Le t’i pyesim këta votues të 23 qershorit të cilët janë këtu sot, dyfish më të zhgënjyer se votuesit tanë. A kanë të ardhura më shumë se dy vite më parë? Apo shesin më shumë dhe më mirë se dy vite më parë? Përgjigja që ju jepni sot këtu është përgjigjja që dëgjojmë në çdo shesh, është përgjigjja e mjerimit pa skaj që ka sjellë politika e dështuar”.

Njoftim për shtyp i Partisë Demokratike, 29 Prill 2015

Pasi guxoi të tallej me qytetarët shqiptarë para një jave, ministri i Mirëqënies Sociale, tashmë siç e njohin të gjithë ministri i mirëqënies personale, duke thënë se shqiptarët ikin jashtë se jetohet më mirë, sot guxoi të tallet përsëri.

Guxoi  duke i thënë qytetarëve shqiptarë dhe mbi gjitha të rinjëve shqiptarë hajdeni,  dynduni në Pallatin e Kongreseve, se ka 5 mijë vende pune për të tërë.

Këto janë thjeshtë mashtrime të rradhës, mashtrime që nuk i japin asgjë qytetarëve shqiptarë, që nuk ndihmojnë të ardhmen e tyre, këto janë mashtrime që nuk i ndihmojnë në punësimin e tyre.

Por kjo e sotmja është në vazhdën e të gjitha padrejtësive që kjo ministri, kjo qeveri i ka bërë qytetarëve shqiptarë. Sot shqiptarët janë më pak të punësuar se më parë. Këtë e tregojnë shifrat e INSTAT-it, shifrat zyrtare ku numri i papunësisë është rritur deri në 18 % dhe 34% nga këta janë të rinj.

E tregojnë shifrat e sigurimeve shoqërore të cilat kanë rënë me 3.4 % për vitin e kaluar. Kjo tregon që shqiptarët nuk punësohen, sepse nqse nuk punësohen, nuk paguajnë as sigurime shoqërore. Ministri sot guxon e tallet dhe i thotë që kemi mbyllur marrëveshjet me pensionet për Gjermaninë.

Shqiptarët sot nuk duan pensione, shqiptarët sot duan punë, shqiptarët sot duan një ministër që të punojë për mirëqënien e tyre dhe jo t’i çojë ata në emigracion.

Shqiptarët sot duan një kryeministër që të rrijë në Shqipëri dhe të punojë, jo një kryeministër që të udhëtojë sa nga Gjermania e si sot në Turqi, një kryeministër turist i një populli në eksod.

Njoftim për shtyp i Partisë Demokratike, 29 Prill 2015

Kandidati për kryebashkiak, Halim Kosova, dëgjon kërkesat dhe shqetësimet e grave në Kryeqytet dhe angazhohet të ofrojë lehtësi e mbështetje për to. Por dhe t’u japë përgjegjësi për qeverisjen e qytetit. 

Kandidati për kryetar Bashkie në Tiranë, Halim Kosova, u takua dhe bashkëbisedoi dje me gra të profesioneve të ndryshme në kryeqytet.

Kosova që në hyrje e vlerësoi si arritje ndryshimin ligjor që bën të mundur që listat e këshillit bashkiak të jenë të përbëra në gjysmën e tyre nga gratë.

“Isha pjesë e votimit që 50 %, pse jo, edhe të këshillave bashkiakë, të jenë femra. Sepse në fund të fundit janë femrat, gratë dhe vajzat ato që kanë peshën kryesore të familjeve dhe janë ato që mendojnë ditë e natë të bëjnë më të mirën për  fëmijët e tyre”, tha kandidati për kryebashkiak.

Doktor Kosova theksoi se ai i ka idetë e qarta se si të ndihmojë në ndërtimin e një sistemi i cili do ta ruajë shëndetin e gruas sepse të gjithë pjesëtarët e familjes janë të rëndësishëm por nëna është ajo që i mbledh të gjithë rreth vetes dhe nëna është ajo që që i jep drejtimin e duhur familjes.

Z.Kosova siguroi se nisur nga përvoja e tij, do të bëjë gjithçka për të promovuar gratë në përgjegjësi e detyra, pasi ato dinë të drejtojnë me sukses dhe efikasitet.

“Ashku sikundër gjatë gjithë jetës sime përbri suksesit tim u kam pasur ju, gra dhe vajza, në sektorin që kam punuar, pse jo të mos e vazhdoj këtë eksperiencë të mirë edhe nesër në bashki që t’u kem ju përkrah për të drejtuar sektorë që kanë shumë nevojë edhe për zemërgjerësinë, dashurinë, njerzillëkun”, tha Kosova.

Kandidati për kryebashkiak dëgjoi shqetësimet dhe kërkesat e grave.

“Jam e larguar nga puna në Zyrat e Punës, nga ministri Erion Veliaj. Doja të dija si do të veproni ju me administratën?”.

“Drejtësia, ose vënia në vend e asaj që nuk shkon, ose dhënia e hakut të çdo njeriu, ky do të jetë, ka qënë dhe do të jetë prioriteti im”, u përgjigj Kosova.

“Personalisht u kam borxh jetën time sepse më keni shpëtuar nga një lindje e vështirë. Kam një dyqan të vogël. Jam piktore dhe stiliste. Dua nga bashkia të ndihmojë gratë në bzines”.

“Në çdo qytet, nëse kryetari i bashkisë së atij qyteti nuk ndihmon biznesin e vogël dhe të mesëm i cili përfaqëson pjesë më të madhe të biznesit në qytet, i ka bërë një dëm shumë të madh qytetit të vet”, u shpreh Kosova.

Z.Kosova shpjegoi se po punohet për një program të detajuar, të saktë dhe efikas për qeverisjen e qytetit.

“Kemi disa plane konkrete që dita ditës po afron periudha që ne do t’i shpalosim dhe pse jo sërish presim sugjerime të vlefshme për këtë moment sepse gjërat nuk vulosen dhe nuk ndryshojnë. Jemi të gatshëm të marrim mendime nga shtresa të ndryshme në mënyrë që ato të bëhen pjesë e programit tonë të nesërm. Program që të jetë realist, i zbatueshëm, i aplikueshëm dhe i prekshëm nga të gjithë. Dhe gjërat që do të vendosim të mos ngelin në letër por por të kenë një impakt direkt tek ju”, deklaroi Kosova.

Njoftim për shtyp i Partisë Demokratike, 29 Prill 2015

Kandidati për kryebashkiak i Tiranës, Halim kosova, u takua sot me banorët e një prej zonave më të varfëra të Tiranës, pranë Shkollës së Bashkuar. Banoret ankohen për kushtet ekstreme ku jetojnë.

“Thonë nuk vuan populli për bukë. Ne po vuajmë për bukën e gojës dhe na vënë litarin tek fyti. Neve nuk na japin lekët e invalidëve”, tha një banor.

Z. Kosova vizitoi banesën e një familjeje në gjendje të rënduar ekonomike.

“Ideja ime është që të gjithë ta keni të mundur një copë mundësi për të punuar, sepse ju vini këtu nga halli por që po të kishit mundësi me punu dhe me marrë rrogën të gjithë si një pjesë e mirë, atëherë e dini vetë ju se çfarë gatuani dhe si i harxhoni lekët në shtëpi”, u tha Kosova familjarëve.

Kandidati për kryebashkiak theksoi se është i vendosur për të pasur një program realist e të prekshëm për qytetarët.

 “Kemi dy muaj, nga Erjon Veliaj, që nuk marrin neve pensionin. Dhe gjithë lagjia ka ikur në Gjermani sepse është ekonomia përtokë”, shprehet e revoltuar banorja.

Kandidati për kryebashkiak theksoi rëndësinë e votës së 21 qershorit.

“Ajo që unë kam thënë edhe në zgjedhjet e 2013 , ajo që më pëlqen është se ka ardhur koha që duhet vlerësuar vota juaj dhe ju këtë mundësi keni, por votën tuaj ta shfrytëzoni për të mirën tuaj. Aty ku vërtet ju ndërtoni një prespektivë. Nuk është puna të fitoni diçka në votim por është puna për të fituar 4 vjetët”, u shpreh Halim Kosova.

Njoftim për shtyp i Partisë Demokratike, 28 Prill 2015

Sot, Rama u tregoi qytetarëve të vendit se është një producent i dobët shfaqjesh televizive, por nuk ka degë palme që mbulon dështimin e tij monumental si një kryeministër që ka rritur me 7 përqind papunësinë, që ka çuar varfërinë dhe dëshpërimin në kufijtë historikë.

Milionat që ai po shpenzon për fushatë elektorale, me fasada qytetesh, nuk kanë ndihmuar askënd, përpos klientelës që po pasurohet me këto tendera. Fasadat, sidomos ato që lyhen vetëm nga faqet e shesheve, nuk sjellin zhvillim. Në të kundërt, përse 16 mijë qytetarë të vendit, sipas raportimeve të mediave serioze, kanë lënë vendin vetëm në 3 muaj, në një eksod të dëshpëruar pa fund e pa krye, vetëm për t’i ikur skamjes?

Cilin shqiptar kanë ndihmuar milionat e bëra rrush e kumbulla për trille dekorative e pasurim klanesh?

Mos kanë ndihmuar dhjetra mijë bashkëqytetarët tanë që kanë përfunduar në burg për shkak se nuk paguajnë dot energjinë elektrike, se nuk kanë me se, se janë pa punë e pa të ardhura?

20 mijë familje ka hequr qeveria nga skema e ndihmës ekonomike. I ka dëbuar, i ka përjashtuar nga mbështetja e shoqërisë, i ka hedhur në rrugë të madhe. Dhe për ata që përfitojnë, kjo ndihmë është ulur, dhe është sot sa gjysma e parave që i duhet një familjeje për të paguar gjobën e përmuajshme të OSHEE-së.

Ç’do t’u thotë Rama rreth 80 përqind të familjeve shqiptare, për të cilat rriti me mbi 25 përqind çmimin e energjisë elektrike? Do t’u thotë rrini në errësirë, rrini në errësirë – se tani kemi palma.

Me Edi Ramën në këto dy vite është pesëfishuar numri i familjeve që jetojnë në kushte ekstremisht të varfra. Ky është realiteti i hidhur që preket me dorë e ndjehet në çdo rrugë, dhe shfaqja në salla me dokumentarë të sajuar është një akt cinik talljeje që thellon edhe më shumë dhimbjen e shqiptarëve.

Si mund të kesh guximin t’u shesësh qytetarëve një Shqipëri që nuk ekziston, kur në vend ka mbërthyer kriza e urisë?

Borxhi publik është rritur në 70 përqind, investitorët po ikin, taksat e rritura po i marrin shpirtin ekonomisë, nuk ka një investim të vetëm, s’ka një kilometër rrugë të re, çmimi i naftës është më i larti në rajon, pagat dhe pensionet nuk rriten prej dy vitesh, ka rënë besimi dhe fuqia blerëse e konsumatorëve.

Llogariten rreth 8 mijë ndërtime të ligjshme të hedhura në tokë nga Edi Rama. Mijëra jetë të rrënuara, duke bërë hi mundin e djersën, kursimet e 20 viteve. Eksportet janë më të ulta se vjet dhe poashtu të ardhurat tatimore e doganore kane rënë frikshëm.

Shfaqja e sotme me siguri do të marrë çmimin si provokimi më i madh i bërë në këto 25 vite. Ndërsa vetë producenti, Edi Rama, do ta marrë më 21 qershor vlerësimin e publikut, të qytetarëve, të popullit që po e shtyp dhe e sundon me arrogancë e arbitraritet prej 2 vitesh.

Deklaratë për media e deputetit të Partisë Demokratike, Florion Mima, 28 Prill 2015