Blog

Partia Demokratike denoncon para opinionit publik dhe institucioneve ndërkombëtare përdorimin nga Edi Rama për qëllime elektorale të institucioneve qeveritare, fondeve dhe administratës publike.

Pas urdhërit ndaj drejtorëve të administratës publike për të mbushur kutitë e votimit, Edi Rama ka urdhëruar vënien e institucioneve publike në dispozicion të fushatës së kandidatit për Tiranën.

Në dy ditët e para të nisjes zyrtare të fushatës elektorale të dy aktiviteteve të zhvilluara nga kandidati i Edi Ramës, janë në dhunim të hapur të nenit 3 të Kodit Zgjedhor duke përdorur institucionet publike të Ministrisë së Shëndetësisë dhe ALUIZNI-t.

Ministria e Shëndetësisë u vu në shërbim të kandidatit të Ramës duke dezinfektuar për interes të fushatës, por në fakt duke ndotur rëndë standardet e këtyre zgjedhjeve.

ALUIZN-i, së bashku me drejtorin e kësaj agjencie, janë kthyer në zyrë partiake ne dispozicion të kandidatit të Edi Ramës për Tiranën. Sot kandidati i Edi Ramës, një qytetar privat pa asnjë atribut publik, shpërndau leje elektorale dhe kjo është hera e tretë brenda pak ditësh.

Përdorimi i institucioneve, fondeve dhe administratës publike, është shkelje e rëndë dhe flagrante e nenit 3 të Kodit Zgjedhor, i cili ndalon përdorimin e aseteve publike në fushatën elektorale dhe konkretisht në pikën 7 dhe të 8 të këtij neni thuhet :

Neni 7. Me përjashtim të rasteve të parashikuara në ligj, ndalohet vënia në përdorim të subjekteve zgjedhore i mjeteve, fondeve dhe materialeve të ndryshme pronë publike, si dhe i burimeve njerëzore të administratës publike të çdo niveli.

Neni 8. Institucionet e administratës publike, të çdo niveli, me veprimtarinë e tyre nuk duhet të cënojnë zhvillimin e zgjedhjeve.

Partia Demokratike i bën thirrje misionit vëzhgues të OSBE-ODIHR, dhe përfaqësive diplomatike të BE-së dhe SHBA-së të monitorojnë nga afër këto shkelje të ligjit dhe cënimin e standardeve të zgjedhjeve të lira dhe të ndershme.  Ne i bëjmë thirrje prokurorisë të nisë menjëherë procedimin penal dhe të vërë para ligjit autorët dhe përgjegjësit e kësaj shkelje të hapur dhe të rëndë të Kodit Zgjedhor.

Deklaratë e deputetes së Partisë Demokratike, Jorida Tabaku, 23 Maj 2015

Kandidati për kryetar i bashkisë së Vaut të Dejës Zef Hila, përmes një deklarate për shtyp, i kërkon Ministrisë së Brendshme dhe Policisë së Shtetit të marrin masa të menjëhershme dhe të largojnë banditët me uniformë nga Vau i Dejës.

 “Shpreh keqardhjen për mos reagimin e Policisë së Shtetit  pas denoncimeve të njëpasnjëshme që unë personalisht kam bërë për  dhunën dhe terrorin që militantë e banditë të veshur me  uniformën e Policisë së Shtetit ushtrojnë në zonën e Vaut të Dejës.  Edhe pse unë e kam denoncuar për javë të tëra dhunën dhe terrorin policor, nuk është  marrë asnjë masë deri mbrëmë kur u qëllua në drejtim të vëllait tim. Ky akt i rëndë dhe i paprecedent, kur një punonjës me uniformë policie përdor armën kundër vëllait të një kandidati, është rezultat i drejtpërdrejtë i qëllimit dhe misionit që i është ngarkuar policisë nga kjo qeveri.

Mosmarrja e masave në kohë rëndon më shumë situatën dhe e bën transparente në sytë e kujtdo se ky nuk është një rast i izoluar, por një porosi e qartë politike. Dua dhe njëherë sot t’i kërkoj Ministrisë së Brendshme, Policisë së Shtetit dhe kryeministrit të tërheqë nga Vau i Dejës banditët e veshur me uniforma policie dhe të mos provokojë qytetarët. Shqiptarët e kanë larguar frikën 24 vjet më parë, sot dhuna dhe terrori tregojnë vetëm dëshpërim dhe mjerimin e atyre që e urdhërojnë.”

Njoftim për shtyp i Partisë Demokratike, 23  Maj 2015

Në Ditën e biodiversitetit, kandidati demokrat për bashkinë e Vlorës, Genc Deromemaj, ia ka kushtuar mjedisit. Ai ishte pjesë e një takimi me përfaqësues të shoqatave mjedisore e aktivistë të mjedisit, për t’ju përgjigjur pyetjeve të tyre, mbi prioritetet e programit të tij. Ai tha se Vlora e gjelbër do të jetë një realitet i afërt.

“Në pikëpamjet tonë, të gjithëve ne këtu dhe jo vetëm kërkojmë një Vlorë turistike, kërkojmë një Vlorë që të na vizitojnë. Por përpara se ta bëjmë të vizitueshme Vlorën, duhet ta bëjmë të jetueshme për veten tonë. Sot situata është shumë e vështirë situata mjedisore. Kur them e vështirë kam parasysh që nga mbetjet urbane, spitalore, landfilldin, gjelbërimin, shtimin e hapësirave publike, infrastrukturën, pastrimin e qytetit etj. Kur flasim për infrastrukturën mjedisore duhet të kemi parasysh jo vetëm infrastrukturën e qytetit të Vlorës. Mendoj se është e patolerueshme që Vlora me këtë kapacitet ujor që ka, kaq pranë qytetit dhe kaq pranë detit Adriatik dhe Jon të jetë një qytet i ndotur. Është një fatkeqësi për ne dhe një gjë që nuk mund t’ia lejojmë vetes. Për zgjidhjen e këtij problemi mjafton vetëm vullneti i duhur qytetar dhe administrativ për ta bërë të mundur që Vlorës ti kthejmë pastërtinë e merituar”, tha Deromemaj.

Të shumta ishin pyetjet nga auditori, rreth menaxhimit të mbetjeve urbane e inerte, ndërtimit të landifilldit, etj, të cilat morrën përgjigje nëpërmjet nismave e projekteve konkretë, pjesë të plaftormës së kandiatit demokrat, për të cilin mjedisi mbetet prioriteti i një qyteti turistik.

“Me platformën tonë do të aplikojmë strategjinë tonë duke u nisur nga pika kryesore e krijimit të mbetjeve, nga individi, nga qytetari. Fushata jonë do të jetë ndërgjegjësuese konkrete nga komunitetit për ndaljen e mbetjeve. Ndërgjegjësimi do të shkojë deri aty sa secili nga ne të denoncojë, në kuptimin e mirë të fjalës”.

Koncepti i bashkëpunimit me shoqërinë civile dhe çdo aktor kompetent për çështjet mjedisore, ka qenë një kërkesë e hershme e ambientalistëve në Vlorë, të cilët për këtë kërkuan të marrin garancinë e bashkëpunimit me administratën e re të bashkisë pas 21 qershorit. Ata përshëndetën iniciativës e sipërmarrjes së madhe komunitare për mjedisin, platformë kjo,  unikale në llojin e vet në Shqipëri, pjesë e programit të Genc Deromemaj.

Deromemaj i ka idetë e platformën e qartë për Vlorën e një mjedisi të duhur, e një qyteti turistik, ndaj ai insistoi që shoqëria civile e gjithë komuniteti të bëhen pjesë e iniciativave dhe ideve në shërbim të Vlorës, ai shprehu garancinë se dera e bashkisë do të jetë gjithmonë e hapur.

Deromemaj në plafromën e tij për mjedisin, tashmë të formëzuar plotësisht, përfshin nisma konkrete për menaxhim të mbetjeve urbane e inerte, ndërtimin e  landfilldit, disiplinimin e ujërave të zeza, sistemin tërësor të hapësirave të uzurpuara nga intertet e bonifikimin e tyre, sistemin e rikthim të plazheve publike qytetarëve, e gjelbërim në çdo bllok banimi. Deromemaj gjithashtu garantoi se  do të ulet taksa e pastrimit për çdo familje e çdo biznes, ndërkohë mbledhja e saj do të shkojë tërësisht në investime për mjedisin.

Njoftim për shtyp i Partisë Demokratike, 23  Maj 2015

Kryetari i Partisë Demokratike Lulzim Basha zhvilloi një bashkëbisedim me gratë në qytetin e Korçës.

Z. Basha është njohur me shqetësimin e tyre për pamundësinë për të siguruar dhe bukën e fëmijëve. Ato bënë të ditur se një vend i ri pune nuk është hapur në Korçë, asnjë lehtësi për gratë në biznese, madje ato kanë qenë të parat që kanë deklaruar falimentimin si rezultat i taksave të larta, i rritjes së çmimit të energjisë dhe rënies së fuqisë blerëse. Në Korçë qytetarët luftojnë për mbijetesë ndërsa miliona euro janë investuar në kullën e korrupsionit e cila dhe e ka shëmtuar qytetin e serenatave. Z. Basha tha se Rama kujtohet për gratë vetë kur i duhet t’i përdorë për fushatë elektorale.

”Gjithë ditën flet për gratë, nga mëngjesi deri në darkë. Por çfarë ke bërë për gratë? Sepse Brunildën e çove drejt vetëflijimit dhe askush s’mbajti përgjegjësi. Atë tjetrën e çove në korent sepse donte të lidhte energjinë elektrike për fëmijën që kishte të sëmurë me azmë.
Mijëra e mijëra gra janë hequr nga lista e ndihmës ekonomike, dhe vënë duart në kokë se s’kanë me çfarë të ushqejnë fëmijët. Këto janë gjëmat që Edi Rama dhe Ilir Meta u kanë shkaktuar grave të Shqipërisë me politikën e tyre të rritjes së taksave, me politikën e tyre të rritjes së çmimit të energjisë e naftës, të largimit nga puna në mënyrë të paligjshme të mijëra e mijëra të tjerave, të mbylljes së dyerve të mijëra bizneseve që kanë nxjerrë dhjetëra, mijëra gra në mes të katër rrugëve.” 

Kandidati për kryetar Bashkie Gjergji Mero dhe kryetari i opozitës Lulzim Basha kanë theksuar se në platformën e Partisë Demokratike, një vend të rëndësishëm zënë lehtësirat fiskale për biznese të hapura nga gratë apo biznese që punësojnë gra, kthimin në listat e ndihmës ekonomike dhe grave të larguara pa të drejtë dhe dhënie ndihme për ato që janë në nevojë.

“Respektin për gruan tregoje duke hapur vende pune për gruan. Respektin dhe dashurinë për gruan tregoje duke ulur taksat për bizneset e themeluara nga gratë. Respektin për gruan tregoje duke i mbajtur në punë e jo duke i hequr në kundërshtim me ligjin. Respektin për gruan tregoje duke ua bërë më të lehtë blerjen e ushqimeve bazë që do t’u vënë fëmijëve mbi tavolinë.
Ndaj me 21 qershor kemi një instrument të fuqishëm në dorë për të diktuar me votë uljen e taksave, uljen e çmimeve, rritjen e rrogave, rritjen e pensioneve.”

Kryetari i PD Lulzim Basha u takua dhe me banorë të Mirasi në Devoll. Mungesa e subvencioneve, rritja e çmimit të energjisë dhe naftës, papunësia në rritje ishin shqetësimet e banorëve. Z. Basha theksoi se platforma e PD parashikon uljen e çmimit të energjisë, faljen e kamatvonesave të ujit dhe energjisë, subvencione për bujqësinë, ulje taksash dhe investime që hapin vende pune dhe sjellin zhvillim dhe jo investime korruptive.

“Atyre që thonë se ky nuk është momenti për të ulur taksat. Atyre që thonë se kjo nuk është garë për të ulur çmimin e energjisë, pra Edi Ramës dhe Ilir Metës që mundohen t’ju gënjejnë përsëri ju them se nuk ka prioritet më të madh për politikën, nuk mund të ketë prioritet më të madh për ata që ndjejnë dhimbjen dhe problemet tuaja, sesa hallet tuaja, papunësia, varfëria, pamundësia, mungesa e rrogave e pensioneve të larta. Ky është problemi më i madh i juaji, ky është prioriteti im numër një. Asgjë nuk do të më tërheqë nga beteja për hallet tuaja, për problemet tuaja”- theksoi kreu i PD-së, Lulzim Basha. 

Njoftim për shtyp i Partisë Demokratike, 23  Maj 2015

PRAPË PREMTIME – PRAPË MASHTRIME

Erion Veliaj po përsërit PREMTIMET e pambajtura të dy viteve më parë, por kësaj radhe po i paraqet me ambalazh për Tiranën. Në 2013-ën Erioni PREMTOI: “Përgjysmim i papunësisë femërore. Garantim i përparësisë në punësim për grate dhe vajzat që kanë imigruar në zonat urbane dhe qytetet e mëdha.”

Ku janë vendet e reja të punës për gratë dhe vajzat? Erioni ishte Ministri përgjegjës për ta realizuar këtë PREMTIM. Ai kishte plot 40% të buxhetit të shtetit për të realizuar këtë dhe dhjetëra premtime të tjera që po ia përmendim çdo ditë qysh prej 2 javësh dhe ia publikojmë në website. Erioni PREMTOI por MASHTROI.

Kandidati i kryeministrit firmosi për shkarkimin e mbi 3 mijë grave dhe vajzave profesioniste. Nënat kryefamiljare, personat me aftësi të kufizuar dhe gratë viktima të dhunës u lanë pa punë dhe pa përkujdesje sociale. Në statistikat gjinore, 50 përqind e grave dhe vajzave janë të papuna. Raporti është nga vetë qeveria.

Sot gratë dhe vajzat nuk marrin asnjë punësim përveç talljeve dhe fyerjeve në zyrat e punës. Të gjithë jemi dëshmitarë që punësim u ofrohet grave në këmbim të abuzimeve seksuale nga perversët e pushtetit.

Erion Veliaj, ky papagall i Ramës, vetëm PREMTON por i ka vetëm fjalë pasi nuk REALIZON.

Erioni PREMTON veç për të marrë pushtet dhe nuk e ka problem t’i MASHTROJË sërish qytetarët sapo ta ketë pushtetin. Ka dy javë që çdo ditë po i kujtojmë Erionit nga një tjetër PREMTIM të thyer dhe nga një tjetër MASHTRIM. Votuesit nuk janë lodra që të MASHTROHEN përsëri.

Deklaratë e deputetes së Partisë Demokratike, Albana Vokshi, 23 Maj 2015

Qeveria e nisi fushatën zyrtare me dhunë policore. Banditë, militantë të veshur me uniforma policie i kanë ndërprerë rrugën Alfred Hilës, vëllait të kandidatit të Partisë Demokratike për bashkinë e Vaut të Dejës, Zef Hila dhe kanë qëlluar me armë në drejtim të tij.

Inspektori i policisë Gjergj Dodani, ka qëlluar me armë në drejtim të Alfred Hilës duke u kërcënuar.

Pak ditë më parë, më dt. 8 maj, Partia Demokratike e Shkodrës kishte denoncuar me një deklaratë implikimin e policisë së shtetit në fushatën e PS-së. Po ashtu, kandidati i Partisë Demokratike z. Zef Hila, ka denoncuar tek Drejtori i Policisë së Shkodrës, pikërisht Gjergj Dodanin për angazhimin e tij në fushatë duke bërë presion ndaj votuesve demokratë.

Por reagimi i shtetit për këto denoncime ka qenë prita e inspektorit të policisë ndaj vëllait të kandidatit të PD-së.

Edhe pas ngjarjes dhe denoncimit të djeshëm të Partisë Demokratike, Ministria e Brendshme hesht, Drejtoria e Policisë hesht. Asnjë masë ndaj autorit të kësaj ngjarjeje duke vërtetuar kështu, katërcipërisht implikimin e drejtpërdrejt të shtetit në dhunën ndaj opozitës.

Tashmë janë denoncuar dhe raste të tjera si ai i Malësisë së Madhe që demaskojnë faktin se policia e shtetit, në fakt policia e Ramës dhe Tahirit po përdoren në fushatë kundër opozitës.

Partia Demokratike i paralajmëron dhe një herë, jo vetëm urdhërdhënësit por dhe ekzekutorët e këtyre akteve, se edhe individualisht, ata që po bëjnë cubat një për një, do të japin llogari  shumë shpejt.

Partia Demokratike i bën thirrje misionit të OSBE-ODIHR, dhe përfaqësive diplomatike të BE-së dhe SHBA-së të monitorojnë nga afër këtë përshkallëzim të dhunës dhe terrorit qeveritar. Ne i bëjmë thirrje organeve të drejtësisë të nisin menjëherë hetimet dhe të venë para përgjegjësisë dhunuesit dhe urdhëruesit e dhunës policore.

Më 21 qershor shqiptarët do ju japin përgjigjen e parë Ramës dhe Metës. Fundi i kësaj maxhorance të dhunës e mjerimit është afër.

Deklaratë për media e deputetit të Partisë Demokratike, Edi Paloka, 23 Maj 2015

Kryetari i Partisë Demokratike Lulzim Basha, zhvilloi një bashkëbisedim me banorë të qytetit të Pogradecit. Në nisje të takimit z.Basha bëri publike një letër të 30 peshkatarëve nga qyteti i Pogradecit të cilët bëjnë të ditur se u është rritur me 42 herë liçenca e peshkimit. Kjo shifër sipas tyre, është e papërballueshme për ta dhe e ben të pamundur sigurimin e bukës së fëmijëve të tyre. Z. Basha bëri të ditur alternativën e Partisë Demokratike të uljes së taksave, uljes së çmimeve,  subvencionit etj. 

 “Jemi 30 peshkatarë nga Pogradeci. Liçencën e peshkimit e kemi pasur 100 mijë lekë të vjetra kurse tani na kërkojnë 4 milionë e 200 mijë lekë.  Z. kryetar, për ne kjo shifër është e pamundur. Ne jemi të gjithë të papunë, si do vejë halli jonë?  

As nuk u bëhet vonë fare  se si do të shkojnë në shtëpi në darkë me sytë përdhe para fëmijëve të tyre që nuk kanë t’u blejnë as bukën e gojës, nuk u bëhet vonë. Kemi një alternativë, alternativën e uljes së çdo takse bashkiake dhe alternativën e madhe, platformën time për uljen e taksave kombëtare në nivelin më të ulët në Ballkan, uljen e çmimit të energjisë me 25%, faljen e çdo kamatëvonese për energjinë dhe për ujin, rritjen e rrogave dhe pensioneve, subvencione për fermerët, subvencione për peshkatarët, tha Basha.

Kryetari i PD-së tha se ka Rama-Meta nuk kanë asnjë zgjidhje, asnjë ofertë për situatën. Sot rendin nëpër Shqipëri vetëm duke sharë opozitën dhe kërcënuar qytetarët.

 “I mungojnë shumë gjëra Edi Ramës në këtë fushatë, i mungon oferta, i mungon vizioni, i mungojnë zgjidhjet për ju, por mbi të gjitha i mungon një popull budalla, një popull që ti hajë broçkullat, prandaj është i dëshpëruar, prandaj ka filluar të kërcënojë qytetarët.  Nuk e ndal dot vullnetin e qytetarëve Edi Rama, as me gënjeshtra, as me kërcënime. Ja, këtu kemi qënë, e kam pasur bashkinë, e kam pasur dhe qeverinë për dy vite. Sa vende pune kanë krijuar, sa i kanë ulur taksat, i kanë rritur, e kanë rritur çmimin e energjisë, e kanë rritur çmimin e naftës”.

1. Basha solli në vëmendje edhe rënien e të ardhurave në buxhetin e shtetit në katër muajt e parë të vitit. 100 milion dollarë i mungojnë arkës së shtetit ndërsa 1.5 milion dollarë jane vjedhur nga fondi i rimbursimit të ilaçeve në 5 muajt e fundit.

“Shikojeni çfarë grope kanë bërë, në 4 muaj ju mungojnë 100 milionë dollarë në arkën e shtetit. Pse, taksat i kanë rritur, faturat e energjisë i kanë rritur, i kruajnë xhepat e shqiptarëve i marrin i rrasin në burg kur nuk paguajnë faturat. Ku janë 100 milionë dollarë? Kjo qeveri i vjedh qytetarët e sëmurë, merr nga xhepi i  tyre, i rrit çmimet e ilaçeve dhe nga ana tjetër fondet për rimbursimet i vjedh, i vjedh 1.5 milionë dollarë janë vjedhur nga dhjetori deri në fund të prillit. Asnjë ofertë, asnjë zgjidhje për problemet tuaja. Asnjë zgjidhje në horizont për papunësinë. për varfërinë. Këtë duhet ta ndalojmë, dhe jam i bindur që do ta ndalojmë në Pogradec me Eduart Kaprin dhe kudo në Shqipëri me Partinë Demokratike”, tha Basha.

Njoftim për shtyp i Partisë Demokratike, 23  Maj 2015

Partia Demokratike shpreh shqetësimin e thellë për ngjarjen e sotme në Vaun e Dejës kur një efektiv i policisë hapi zjarr me armën e shërbimit kundër vëllait të kandidatit të Partisë Demokratike në bashkinë e Vaut të Dejës. Duke dënuar me forcë këtë akt, Partia Demokratike i bën thirrje prokurorisë të marrë të gjitha masat për zbardhjen e kësaj ngjarje të rëndë dhe vënien e autorit para drejtësisë.

Njoftim për shtyp i Partisë Demokratike, 22  Maj 2015

Halim Kosova bashkëbisedon me qytetarët për higjienën e Tiranës, shtimin e zonave të gjelbërta, pastrimin e ajrit dhe çështjen e ujit të pishëm. 

Ne kemi programuar që për 5 ditë me radhë të diskutojmë me ju problemet dhe t’iu paraqesim 5 prioritetet kryesore që janë:
1- Tirana e Gjelbër dhe e Pastër
2- Arsimi dhe cilësia e tij

3- Trotuaret dhe transporti

4- Si të ulim taksat për familjet dhe biznesin

5- Çfarë do të bëjmë ne për shtresat në nevojë

Si do të bëhet menaxhimi i mbetjeve të Tiranës, si do të përmirësohet cilësia e ajrit ku ka zona që janë shumë të ndotura siç është 21 Dhjetori, si do të përmirësojmë cilësinë e ujit të pijshëm, gjithashtu ne do të punojmë më shumë dhe përsa i takon sigurisë ushqimore dhe ne do të paraqesim një program të detajuar si do të shtojmë më shumë hapsirat e gjelbërta. Për të gjitha këto janë marrë dhe masat përkatëse se çfarë do të bëjë bashkia e ardhëshme nën drejtimin tim. Kemi përllogaritur që në landfillin e Sharrës të ketë një investim prej 23.7 milion euro në mënyrë që mbeturinat e hedhura në këtë zonë të mos kthehen në një burim infeksioni si të ajrit ashtu edhe të ujit të pishëm. Ne kemi menduar që pastrimin e ajrit ta rregullojmë në masën 20% gjatë katër viteve të ardhshme. Kemi menduar që të ketë rreth 30 mijë pemë të mbjellura në Tiranë, të ketë rreth 2 milion pemë të mbjellura në gjithë kurorën përreth Tiranën, të pyllëzohen rreth 100 hektarë tokë në Farkë e cila është pjesë e Tiranës. Gjithashtu do ti ofrojmë qytetarëve rreth 4500 kazanë modernë për grulbullimin e plehrave dhe 1000 kosha në të gjithë qytetin. Tiranës është parashkikuar t’i vihen në dispozicion për pastrimin e ajrit dhe përmirësimin e cilësisë së jetës edhe 400 mijë m2 lulishte brenda qytetit. Të gjitha këto masa dhe shumë të tjera, do të jenë objektivat e mia për të bërë më të mirën në qytetin tonë. Një nga prioritetet e mia është që të gjitha përmirësimet që do bëhen në këto drejtime, do të jenë të prekshme, në dispozicion të çdo banori të qytetit të Tiranës kudo ku jeton. Do të kenë shërbim të barabartë dhe do të kenë dorën e Bashkisë në jetën e tyre të përditshme.

Pyetje: Përshëndetje z.Halim Kosova, kam ardhur rastësisht po shkoja në fakt në punë, pashë njerëzit, pieta, kuptova dhe dje në televizor pashë një slogan tuajin që më dha arsyen që të merrja këtë mikrofon. Ju jeni shprehur se do të jeni i ashpër me korrupsionin.

Halim Kosova: Një nga sekretet e punës time është kontrolli hap pas hapi i çdo lloj kontrate, dhe kjo ka qënë parandalimi më i mirë i mungesës së shërbimit për qytetarët. Një tjetër element është bashkëpunimi i ngushtë që do të kem me qytetarët dhe banorët e Tiranës, ashtu sikurse bëra edhe si drejtor spitali e Ministër Shëndetësie. Ky do të jetë çelësi i suksesit që ne të kapim në kohë problemet, t’i japim zgjidhjen e duhur, por më e rëndësishmja, bashkarisht ti mbikëqyrim.

Megjithëse zgjedhjet e 23 qershorit ishin bërë, kam qëndruar deri ditën e fundit si Ministër, deri në orën 6 pasdite në zyrë duke kërkuar llogari një më një, e duke marrë masa pë rata që kishin abuzuar. Shumë miqtë e mi më thonin çfarë bën ore, je në vete? Eshtë ndërgjegjia ime qytetare, nuk mund të fle rehat kur shoh një abuzim, kur shof një vjedhje, kur shoh një që e fut dorën në lekët e popullit, e qytetarëve, këtë nuk e fal.

Pyetje: Kam një problem, që është ai i ujit. Ka shumë përmirësime në këto 4 vitet e fundit, por dëgjoj palën kundërshtare që thotë se do rrisë tarifën e ujit, më lind pyetja, çfarë mendon doktor për këtë problem? E dyta, përsa i përket depozitave të ujit të vendosura në tarracat e pallateve, keni menduar ndonjë projekt konkret për ta ndryshuar këtë situatë?

Halim Kosova: E para që prek ty dhe të gjithëve ju, tarifat, kam rastin sot të deklaroj, që në drejtimin e ardhshëm të BT, nuk do të ketë ngritje të çmimit të ujit. E dyta, duhet dhe ta kesh ujin. Kemi filluar punën, për ti siguruar Tiranës ujin e rrjedhshëm për 24 orë. Kam shkuar në Shën Gjergj dhe në Shën Mëri, kam vizituar depot e ujit, kam folur dhe dëgjuar banorët të cilët thonë, që këtu jo vetëm që janë depozitat e mëdhaja në gjendje të furnizojnë Tiranën më ujë të pijshëm, të një cilësie jashtëzakonisht të mirë, por ka dhe liqen që ne mund ta shfrytëzojmë për vaditje dhe të mos kemi asnjë problem. Kjo do të thotë që rezervat e ujit janë shumë të mëdhaja dhe nuk justifikojnë depozitat në tarracat e pallateve, të cilat për më tepër janë burim ndotje të ujit që rrjedh në rubinet, dhe ne kemi filluar të bëjmë planifikimin se si Tirana të ketë ujë 24 orë, duke mbledhur rreth vetes, ekspertët më të mirë të kësaj fushe. Ky është një problem i vjetër, që nuk gjeti zgjidhje as për 11 vjet përpara këtyre katër viteve, por që ne do ti futemi punës seriozisht për të përballur problemet, duke filluar që nga kanalizimet, tubacionet dhe burimet që do të furnizojnë qytetin me ujë. Në momentin që do të kem një program të qartë, një përllogaritje të saktë, do të dal përpara jush dhe ajo që do të them me afate dhe data, do të jetë ashtu siç do ta them, pa lëvizur nga ajo, asnjë pikë.

Njoftim për shtyp i Partisë Demokratike, 22  Maj 2015

Në takimet me banorë autoktonë të Korçës në lagjet  13, 14, 15 kandidati Gjergji Mero është përballur me varfërinë  ekstreme. Banorët  janë të braktisur dhe të papërkrahur nga shërbimet e bashkisë, e cila investimet i perëndoi tek Kulla dhe tek shatërvani në shumën e 2,5 milion eurove dhe jo tek nevojat imediate të qytetit.

“ Na kanë hequr nga lista e ndihmës ekonomike dhe ne nuk kemi me çfarë të ushqehemi. Prej dhjetë ditësh janë shkëputur dhe dritat pasi nuk kemi me çfarë ti paguajmë. – u shpreh një zonjë e moshuar, ndërkohë që banorët i thanë profesor Meros se pensionet dhe përkrahja sociale nuk u dalin as për ushqime dhe ilaçe.

Kandidati Mero tha se korçarët në këto vite nuk kanë patur një derë ku të trokasin dhe një vesh që ti dëgjonte në Bashki. Bashkia ka punuar këto vite për projektet e korrupsionit për të pasuruar pushtetarët  dhe jo për  të mbrojtur  qytetarët.  Varfëria dhe faturat e papërballueshme i kanë rrënuar korçarët, të cilët cdo gjë e përballojnë me listë veresie. Unë, tha profesor Mero do të kem kauzë të punës sime të përditshme, luftën kundër varfërisë  nëpërmjet ndihmës ekonomike, uljes së taksave vendore dhe mbështetjes me projekte punësimi.

Gjatë takimeve, kandidati Mero shkoi dhe ne shumë dyqane të vogla, shitësit e të cilëve I treguan fletoret me lista të gjata të pashlyera që vjet nga banorët. Ata thanë se shitjet janë të bllokuara nga varfëria e tejskajshme pasi shumë familje nuk kanë njerëz të punësuar .

“Në 21 qershor korçarët do ti japin fund mjerimit me votë për më shumë punësim dhe dinjitet”- u shpreh profesor Mero.

Njoftim për shtyp i Partisë Demokratike, 22  Maj 2015